येवल्यात शरद पवारांची सभा सुरु होईल तेव्हाच भुजबळांची नाशिक मध्ये रॅली सुरु होईल
टीव्हीवर सभा आणि रॅली दोन्ही एकाच वेळी दिसाव्यात असा राहील प्रयत्न ..
येवला- अजित पवारांच्या बंडामागे छगन भुजबळांची मोठी भूमिका लक्षात घेता शरद पवार पक्षफुटीनंतरची पहिली सभा ८ जुलैला येवल्यात घेणार आहेत.आणि याच वेळी भुजबळांनीही शक्ती दाखवत पवारांविरोधात नाशिकमध्ये रॅली काढण्याचा निर्णय घेतला आहे.आज शनिवारी दुपारी तीन वाजता येवला बाजार समितीच्या मैदानावर पवारांची सभा होणार आहे. स्थानिक नेते माणिकराव शिंदे व अन्य पदाधिकाऱ्यांनी जोरदार तयारी सुरू केली आहे. केंद्रीय कृषिमंत्री असताना पवारांनी जिल्ह्यातील अनेक तालुक्यांना विविध योजनांच्या माध्यमातून दिलेल्या लहान-मोठ्या प्रकल्पांची परतफेड म्हणून सभेला जास्तीत जास्त लोकांनी यावे अशी साद घातली जात आहे.
पवारांची सभा सुरू होईल त्याच वेळी इकडे भुजबळ यांच्या रॅलीला सुरुवात होणार आहे, जेणेकरून टीव्ही चॅनलमध्ये शेजारी-शेजारी दोन्ही घडामोडी लोकांना दिसतील व त्यातून संभाव्य डॅमेज कंट्रोल करता येईल अशी रणनीती भुजबळ कॅम्पने आखली आहे. दुपारी दोन वाजता भुजबळ इगतपुरीत येणार असून मुंबई-आग्रा महामार्गावर त्यांचे जोरदार स्वागत केले जाणार आहे. त्यानंतर पाथर्डी फाटा येथे त्यांचा भव्य सत्कार करून राष्ट्रवादी भवन येथे तेे दाखल होणार आहेत. हा सर्व मार्ग साधारण पंचवीस किलोमीटरचा असून येथून जाणाऱ्या रॅलीचे लाइव्ह प्रक्षेपण होणार असल्यामुळे शरद पवारांना मिळणारी संभाव्य मीडिया स्क्रीन निम्मी-निम्मी करण्याचा प्रयत्न आहे.