मंगळवारी (१३ जून) राज्यातील प्रमुख वृत्तपत्रात एक जाहिरात देण्यात आली आहे. ‘देशात मोदी अन् राज्यात शिंदे’ असा संदेश या जाहिरातीतून दिला आहे. यापूर्वी महाराष्ट्राच्या राजकारणात ‘देशात नरेंद्र अन् महाराष्ट्रात देवेंद्र’ अशी घोषणा दिली होती. पण आज प्रमुख वृत्तपत्रांच्या पहिल्या पानावर देण्यात आलेल्या जाहिरातीवर ‘राष्ट्रामध्ये मोदी, महाराष्ट्रात शिंदे’ असा मजकूर छापण्यात आला आहे. मात्र यावर झालेल्या मोठ्या घडामोडींनंतर शिंदे गटाचे नेते शंभूराज देसाई यांनी काल घुमजावके ला आहे. आजच्या वर्तमानपत्रात छापून आलेल्या जाहिरातीचा शिवसेनेशी (शिंदे गट) काहीही संबंध नाही. एकनाथ शिंदे आणि देवेंद्र फडणवीसांच्या हितचिंतकांनी ही जाहिरात दिली असावी, असं स्पष्टीकरण देसाई यांनी दिलं. ते प्रसारमाध्यमांशी संवाद साधत होते.संबंधित जाहिरातीवर स्पष्टीकरण देताना शंभूराज देसाई म्हणाले, “आज वर्तमानपत्रात जी जाहिरात छापून आली आहे, त्या जाहिरातीचा शिवसेना पक्षाशी (शिंदे गट) कसलाही संबंध नाही.या दोन्ही नेत्यांच्या हितचिंतकांनी कदाचित ही जाहिरात दिली असेल. पण एक गोष्ट समाधानकारक आहे की, पहिल्या आणि दुसऱ्या क्रमांकावर शिवसेना-भाजपाचेच नेते आहेत. शिवसेना-भाजपा युती आणि आमचे मित्रपक्ष ५० टक्क्यांच्या पुढे आहेत, हे सर्व्हेवरून दिसलं आहे.”
विशेष म्हणजे शिंदे गटातील विविध नेत्यांकडून संबंधित जाहिरातीतील दाव्याचं समर्थन करण्यात आलं आहे. शंभूराज देसाई यांनीही काल सकाळी ‘टीव्ही ९ मराठी’शी बोलताना जाहिरातीतील मजकूराचं समर्थन केलं होतं. एकनाथ शिंदेंकडून वर्तमानपत्रात दिलेल्या जाहिरातीत बाळासाहेब ठाकरेंचा फोटो नाही, या राऊतांच्या टीकेला उत्तर देताना शंभूराज देसाई म्हणाले होते, “बाळासाहेब ठाकरे हे आमच्या हृदयात आहेत. आम्ही आज जे काही आहोत, ते बाळासाहेब ठाकरे यांच्यामुळेच आहोत.त्यामुळे काहीतरी वक्तव्य करून राऊत वातावरण बिघडवण्याचा प्रयत्न करतायत. हा एक सर्व्हे आला आहे. यामध्ये लोकांची मतं जाणून घेतली जातात. महाराष्ट्रात आमची युती आहे. सर्वसामान्य लोकांनी दिलेला हा कल आहे. जनमताचा आपण आदर केला पाहिजे.”