पुणे- 2021 च्या दिवाळीत मेट्रो सुरु होण्याची चिन्ह आहेत.अर्थात अजूनही मेट्रो ला लांबचा पल्ला गाठायचा आहे, मेट्रोची ‘ट्रायल रन’ झाल्यामुळे पुणे आणि पिंपरी चिंचवडमधील प्राधान्यक्रमाच्या मेट्रोच्या चारही स्थानकांच्या कामांना वेग आला आहे. पिंपरी चिंचवडमधील मेट्रो ऑगस्टअखेर कार्यान्वित होणार असल्याचेही महामेट्रोकडून स्पष्ट केले. संत तुकारामनगर स्थानकाचे काम ९५ टक्के पूर्ण झाले आहे.पिंपरी चिंचवड-स्वारगेट (१५ किलोमीटर) आणि वनाज-रामवाडी (१६ किलोमीटर) मार्गावरील मेट्रो प्रकल्पाचे काम सुमारे ४८ टक्के पूर्ण झाले आहे. संत तुकारामनगर ते फुगेवाडी आणि वनाज ते गरवारे महाविद्यालय दरम्यान अनुक्रमे सहा आणि पाच किलोमीटर मार्गावर या वर्षात मेट्रो धावणार असा दावा करण्यात येतो आहे.या मार्गावरील संत तुकारामनगर ते फुगेवाडी दरम्यान मेट्रो धावणार आहे. दोन्ही स्थानकांची कामे अनुक्रमे ९५ टक्के आणि ८३ टक्के पूर्ण झाली आहेत. या मार्गावर स्थानकाच्या दोन्ही बाजूंना सरकते जिने उभारण्याचे काम अंतिम टप्प्यात आले आहे. पुढच्या टप्प्यात तिकीट खिडकी उभारणे आणि प्रवासी केंद्रित सुविधा निर्माण करणे, यावर भर असल्याची माहिती महामेट्रोचे महाव्यवस्थापक हेमंत सोनवणे यांनी दिली. दुसऱ्या टप्प्यात वनाज ते गरवारे महाविद्यालय दरम्यान मेट्रो धावणार आहे. वनाज स्थानकाचे ३६ टक्के तर, गरवारे महाविद्यालय स्थानकाचे काम ५१ टक्के पूर्ण झाले आहे.दुसऱ्या टप्प्यातील मार्गाचे काम डिसेंबरअखेर पूर्ण होइल असा त्यांचे नियोजन। आहे.