‘धडाडीचे दादा’ आता परावलंबी झालेत; रोहित पवारांचा अजितदादांना टोला

पुणे -भाजपसोबत सत्तास्थापनेसाठी अजित दादांनी सातत्याने बदललेला पेहराव बदलल्याची कबुली दिली. यावर रोहित पवार यांनी मोजक्याच शब्दात उपमुख्यमंत्री अजित पवारांवर निशाणा साधला. भाजपात जाण्यासाठी पेहराव बदलणाऱ्यांनाच लोकसभेत स्वाभीमानी जनतेने टोपी घातली आहे, असा टोला लगावला.
राष्ट्रवादी काँग्रेस महायुतीमध्ये सहभागी होण्यापूर्वी मी आणि केंद्रीय गृहमंत्री अमित शहा यांच्यामध्ये 10 बैठका झाल्या होत्या. या बैठकीला जाण्यासाठी मी खास पेहराव करून दिल्लीला जायचो. मास्क आणि टोपी घालून मी या बैठकीला उपस्थिती लावायचो, असा गौप्यस्फोट अजित पवार यांनी आज पत्रकारांशी बोलताना दिल्लीत केला. त्यावर शरद पवार गटाचे आमदार रोहित पवार यांनी भाष्य केले.
काय म्हणाले रोहित पवार?
रोहित पवार म्हणाले की, अजित दादा पवार यांनी भाजपसोबत जाण्यासाठी टोपी घातली असावी. पण, आपण लोकसभेमध्ये बघितलं तर स्वाभिमानी जनतेने त्यांच्या पार्टीला टोपी घातली आहे. मुळात, अजित पवार हे धडाडीचे दादा म्हणून आम्हाला माहीत होते. आत्ताचे भाजपसोबत गेलेले अजित दादा यांना सर्व गोष्टी विचाराव्या लागतात. एखादी सही केल्यानंतर दुसऱ्या उपमुख्यमंत्र्याकडे त्यांची फाईल जाते. त्यानंतर मुख्यमंत्र्यांकडे फाईल जाते, असा खोचक टोला रोहित पवारांनी लगावला.
बारामतीत लढतीसारखा उमेदवार देऊ
बारामतीत विधानसभा निवडणुकीसाठी कुठला उमेदवार देणार असा सवाल उपस्थित केला जात आहे. त्यावर देखील रोहित पवार यांनी भाष्य केले. बारामतीत योग्य असा उमेदवार देऊ, राजनीतीचा तो भाग आहे. पुढील 20 दिवसात समजेल की तिथे उमेदवार कोण असेल, उमेदवार जो कोणी असेल, योग्य उमेदवार तिथे दिला होता. तिथे खूप चांगली लढत आमच्याकडून होईल, असे रोहित पवार म्हणाले.