पुणे : विश्वबंधुता साहित्य परिषद आणि काषाय प्रकाशन या संस्थाच्या वतीने बंधुता लोकचळवळीच्या सुवर्णमहोत्सवानिमित्त आयोजित पहिल्या विश्वबंधुता काव्य महोत्सवाच्या अध्यक्षपदी ज्येष्ठ गझलकार मीना शिंदे यांची, तर स्वागताध्यपदी पंचविसाव्या राष्ट्रीय बंधुता साहित्य संमेलनाच्या अध्यक्षा मधुश्री ओव्हाळ यांची निवड करण्यात आली आहे, अशी माहिती परिषदेचे संस्थापक अध्यक्ष बंधुताचार्य प्रकाश रोकडे यांनी दिली.
प्रकाश रोकडे म्हणाले, “येत्या २ जून २०२४ रोजी दिवसभर हा काव्यमहोत्सव नवी पेठेतील पत्रकार भवनाच्या सभागृहात होणार आहे. बंधुता मूल्यसंवर्धन समितीच्या अध्यक्षा मीना शिंदे यांच्या ‘दीवान-ए-मीना’ या गझल संग्रहाची नुकतीच इंडिया बुक ऑफ रेकॉर्डमध्ये नोंद झाली आहे. हा १७१ मराठी गझलांचा संग्रह गझल विश्वातील एक अभिनव ग्रंथ ठरला आहे. यापूर्वी त्यांचा ‘स्पंदन’ हा कविता संग्रह, हृद्गत हा गझलसंग्रह प्रकाशित झाला असून गझल रुपेरी आणि कातर वेळी या सीडीही प्रसिद्ध आहेत.”
‘महोत्सवाच्या यशस्वीतेसाठी मुख्य निमंत्रक ज्येष्ठ कवी प्रा. चंद्रकांत वानखेडे, मुख्य संयोजक प्रा. प्रशांत रोकडे आणि डॉ. बंडोपंत कांबळे यांनी विशेष पुढाकार घेतला आहे,’ असेही त्यांनी नमूद केले.