पुणे: पुण्यातील कात्रज घाट परिसरात गुरुवारी (दि. 23 एप्रिल 2026) सायंकाळी सुमारे 5:25 वाजण्याच्या सुमारास भीषण अपघात घडला. आंबेगाव पोलीस ठाण्याच्या हद्दीत कात्रज घाट बोगदा संपल्यानंतर पुण्याकडे येताना दुसऱ्या वळणावर एसटी बस आणि ऑटो रिक्षा यांच्यात समोरासमोर धडक झाली.या दुर्घटनेत रिक्षा चालकाचा जागीच मृत्यू झाला असून तीन प्रवासी गंभीर जखमी झाले आहेत.
पोलिसांनी दिलेल्या माहितीनुसार, एमएच 10 डीटी 2697 क्रमांकाची महाराष्ट्र राज्य परिवहन महामंडळाची एसटी बस स्वारगेटहून सांगली जिल्ह्यातील विटा दिशेने जात होती. त्याचवेळी एमएच 12 जीएस 9695 क्रमांकाची रिक्षा खेड शिवापूरकडून स्वारगेटच्या दिशेने येत होती. घाटातील वळणावर दोन्ही वाहनांची जोरदार धडक झाली. अपघात इतका भीषण होता की रिक्षाचा अक्षरशः चक्काचूर झाला.
या अपघातात रिक्षा चालक हनुमंत रमेश हंगरगे (वय 42, रा. सुखसागर नगर, बिबेवाडी) यांचा घटनास्थळीच मृत्यू झाला. त्यांच्या मृत्यूमुळे परिसरात हळहळ व्यक्त केली जात आहे. तसेच रिक्षातील अन्य प्रवासी देखील गंभीर जखमी झाले आहेत. राजेश इंगवले (वय 48, रा. गोकुळ नगर, कात्रज-कोंढवा रोड), दशरथ निरगुडे (वय 43, रा. अप्पर बिबेवाडी), शहाजी लक्ष्मण शिवदे (वय 41, रा. अप्पर इंदिरानगर, बिबेवाडी) अशी जखमीची नावे आहेत.
जखमींना 108 रुग्णवाहिकेद्वारे तातडीने जवळच्या रुग्णालयात दाखल करण्यात आले असून त्यांच्यावर उपचार सुरू आहेत. घटनेची माहिती मिळताच आंबेगाव पोलीस ठाण्याचे अधिकारी घटनास्थळी दाखल झाले आणि मदतकार्य हाती घेतले. अपघातामुळे काही काळ वाहतूक कोंडी निर्माण झाली होती. पोलिसांनी तत्काळ वाहतूक सुरळीत केली.
दरम्यान, एसटी बस चालक जालिंदर विष्णु शिंदे (वय 53, रा. शेडगेवाडी, ता. खानापूर, जि. सांगली) यांना पोलिसांनी ताब्यात घेतले असून त्यांची वैद्यकीय तपासणी सुरू आहे. अपघाताचे नेमके कारण अद्याप स्पष्ट झाले नसून पोलिसांकडून पुढील तपास सुरू आहे.
