मुंबई, दि. 23 :- पुण्यातील माण-हिंजवडी ते शिवाजीनगर मेट्रो तीनच्या मार्गावरील शिवाजीनगर ते औंध दरम्यानच्या कामास गती देण्यासाठी सार्वजनिक सुट्ट्यांच्या दिवशी तसेच इतर शासकीय सुट्ट्यांच्या दिवशी गर्डर टाकण्याच्या कामास पोलीसांनी चोवीस तास परवानगी द्यावी. या मार्गावरील वाहतूक कोंडी टाळण्यासाठी एकात्मिक दुमजली उड्डाणपुलाच्या खालील रस्ते सुव्यवस्थित ठेवण्याची काळजी घ्यावी, असे निर्देश उपमुख्यमंत्री तथा पुण्याचे पालकमंत्री अजित पवार यांनी आज दिले. मेट्रो लाईन तीनच्या कामाची पाहणी करण्यासाठी येत्या 26 सप्टेंबर रोजी भेट देणार असल्याचेही त्यांनी यावेळी सांगितले.

माण-हिंजवडी ते शिवाजीनगर मेट्रो तीनच्या कामाचा उपमुख्यमंत्री अजित पवार यांनी मंत्रालयात आज आढावा घेतला. बैठकीस वित्त विभागाचे अपर मुख्य सचिव ओ. पी. गुप्ता, नियोजन विभागाचे अपर मुख्य सचिव राजगोपाल देवरा, नगर विकास विभागाचे प्रधान सचिव असिमकुमार गुप्ता, पोलीस उपायुक्त (वाहतूक) बापू बांगर आदी उपस्थित होते. पुणे विभागाचे विभागीय आयुक्त चंद्रकांत पुलकुंडवार, पुण्याचे जिल्हाधिकारी सुहास दिवसे, पुणे महापालिकेचे आयुक्त राजेंद्र भोसले, पुणे महानगर विकास प्राधिकरणाचे महानगर आयुक्त योगेश म्हसे, पुणे पोलीस आयुक्त अमितेश कुमार, सहपोलीस आयुक्त मनोज पाटील यांच्यासह मेट्रो तीनचे काम करणाऱ्या कंपन्यांचे अधिकारी दूरदृश्य प्रणालीद्वारे उपस्थित होते.

मेट्रो लाईन तीनच्या कामात येणाऱ्या अडथळ्यासंदर्भात माहिती घेऊन उपमुख्यमंत्री श्री. पवार म्हणाले की, मेट्रोच्या कामांमुळे रस्ते खराब झाल्यास, ड्रेनेजलाईन खराब झाल्यास त्याची तातडीने दुरुस्ती करणे आवश्यक आहे. त्यासाठी नवीन तंत्रज्ञानाचा वापर करावा. मेट्रोचे काम व त्याखालील खराब रस्त्यांमुळे मोठ्या प्रमाणात वाहतूक कोंडी होते. त्यामुळे मेट्रोचे काम करताना त्याखालील रस्ते, ड्रेनेजलाईनची कामे तातडीने करण्यात यावीत. ही कामे वेळेत होत नसल्यास संबंधित कंपनीविरुद्ध कारवाई करण्यात येईल.

बाणेर रॅम्प व पाषाण रॅम्पची कामे गतीने होण्यासाठी पोलीस विभागाने मेट्रोचे काम करणाऱ्या कंपनीस गर्डर टाकणे व इतर कामांसाठी सार्वजनिक सुट्ट्यांच्या दिवशी चोवीस तास काम करण्याची परवानगी द्यावी. याकाळात वाहतूक वळविण्यात येणारे रस्ते सुस्थितीत असतील याची संबंधितांनी काळजी घ्यावी, असे निर्देशही उपमुख्यमंत्री अजित पवार यांनी दिले.

हार्वर्ड– प्रेरित ‘हेयुरेका’ अभ्यासक्रमाचे अनावरण

पुणे  – युरोकिड्स या भारतातील आघाडीच्या प्रीस्कूल एक्सपर्ट कंपनीला त्यांच्या ‘हेयुरेका’ – दृश्य वैचारिक अभ्यासक्रमाची आठवी आवृत्ती लाँच करताना आनंद होत आहे. हार्वर्ड विद्यापीठाच्या प्रोजेक्ट झीरोपासून प्रेरणा घेऊन तयार करण्यात आलेला आणि राष्ट्रीय शिक्षण धोरण २०२० शी सुसंगत सर्वसमावेशक विकासाचे धोरण ठेवणारा हेयुरेका अभ्यासक्रम लहान विद्यार्थ्यांमध्ये सर्जनशील विचार कौशल्य विकसित करेल.

युरोकिड्सच्या महत्त्वाकांक्षी विकास धोरणाचा एक भाग म्हणून प्रीस्कूल नेटवर्कने पुणे व महाराष्ट्रात आणखी विस्तार करण्याचे ठरविले आहे. युरोकिड्सने पुढील पाच वर्षांत राज्यात ३२५ नवी केंद्रे सुरू करत महाराष्ट्रातील केंद्रांची संख्या ४०० वर नेली आहे. या विस्ताराद्वारे राज्यातील प्राथमिक शिक्षणाचा दर्जा उंचाविण्याचे ध्येय आहे. प्राथमिक शिक्षण क्षेत्रातील आघाडीची कंपनी या नात्याने युरोकिड्सला ते दर्जेदार असण्याची गरज माहीत आहे आणि म्हणूनच कंपनीद्वारे अभ्यासक्रम सातत्याने अद्ययावत ठेवला जातो.

हेयुरेका मुलांना ‘काय’ विचार करायचा, हे सांगण्याऐवजी त्यांना ‘कसा’ विचार करायचा, याची कौशल्ये आत्मसात करायला मदत करणार आहे. या अभ्यासक्रमात २० वैशिष्ट्यपूर्ण पद्धतीच्या, हार्वर्ड प्रेरित थिंकिंग रूटिन्सचा समावेश असून, त्यामुळे लहान मनांमध्ये उत्सुकता, कल्पनाशक्ती आणि विचार कौशल्य विकसित होते. मुलं फक्त माहिती घेत नाहीयेत, तर ती सक्रियपणे त्याचा वापर करत आहेत व त्यांच्यामध्ये सखोल आकलन आणि सर्जनशीलता विकसित होत आहे, याची काळजी या अभ्यासक्रमाद्वारे घेतली जाते.

१८ महिन्यांचे कठोर संशोधन, प्राथमिक चाचणी व आवश्यक बदलांनंतर हेयुरेकाला ईपिक्स तत्त्वाची तोड देण्यात आली आहे. त्यामध्ये एरवी शिक्षण क्षेत्रात दुर्लक्ष केल्या जाणाऱ्या भावनिक, शारीरिक, बौद्धिक, सर्जनशील आणि आध्यात्मिक अशा पाच महत्त्वाच्या विकास जागांचा समावेश करण्यात आला आहे. १३ वैशिष्ट्यपूर्ण प्रोग्रॅम या अभ्यासक्रमाचे प्रमुख स्तंभ असून (कोडक्वेस्ट, युरोकनेक्ट, युरोफिट, युरोआर्ट, एलेव्हेट आणि इतर बरंच काही), ते प्रत्येक मुलाला फक्त शैक्षणिक यशच नव्हे, तर आयुष्यभर पुरणारा वैयक्तिक विकास साधण्यासाठी मदत करेल.

या अभ्यासक्रमाच्या लाँचविषयी केव्हीएस सेशसाई, मुख्य कार्यकारी अधिकारी, प्री– के विभाग (युरोकिड्स), लाइटहाउस लर्निंग म्हणाले, ‘युरोकिड्समध्ये आम्ही अगदी दोन वर्षे वयाइतक्या लहान मुलांमधली उत्सुकता आणि विचार कौशल्य विकसित करत आयुष्यभराचा पाया घालत असतो. डॉ. अनिता मदन, प्रमुख- अभ्यासक्रम विकास विभाग यांनी हेयुरेका हा लहान मुलांसाठीच्या शिक्षण क्षेत्रातील अनोखा अभ्यासक्रम तयार केला आहे. आमचा सर्वसमावेशक दृष्टिकोन लहान मुलांना फक्त शाळेसाठीच नव्हे, तर आयुष्यभरासाठी तयार करतो व त्यांना सातत्याने बदलत असलेल्या जगासाठी आवश्यक कौशल्यांनी सक्षम असतो. हा अभ्यासक्रम विचारवंत, इनोव्हेटर्स आणि उद्याच्या लीडर्सना कशा प्रकारे आकार देतो, हे पाहण्यासाठी आम्ही उत्सुक आहोत. या नव्या अभ्यासक्रमाच्या मदतीने आम्ही पुणे व महाराष्ट्रातील आमचे अस्तित्व आणखी बळकट करण्याचे ध्येय ठेवले आहे.’

या अभ्यासक्रमाच्या लाँचविषयी युरोकिड्सच्या अभ्यासक्रम विभागाच्या प्रमुख डॉ. अनिता मदन म्हणाल्या, ‘हेयुरेका हा प्राथमिक शिक्षण क्षेत्रासाठी क्रांतिकारी दृष्टिकोन मांडणारा आहे. ईपिक्स फ्रेमवर्कच्या मदतीने आम्ही बुध्यांकावर (आयक्यू) लक्ष केंद्रित करत आहोत, तसेच भावनिक, शारीरिक, सर्जनशील आणि आध्यात्मिक पैलूंवर काम करत चौफेर विकास करत आहोत. मुलांनी केवळ प्रश्नांची उत्तरे देऊ नयेत, तर उत्तरांवरही प्रश्न उभे करावेत, यासाठी त्यांना प्रोत्साहन देण्याची आमची इच्छा आहे. यामुळे उत्सुकता, वैचारिक विश्लेषण आणि भोवतालच्या जगासह सखोल नाते त्यांच्यात रुजवेल. शैक्षणिक तयारीबरोबरच हेयुरेका मुलांना नाती जोडण्यासाठी, अडचणी सोडविण्यासाठी आणि जगाशी अर्थपूर्ण पद्धतीने संवाद साधण्यासाठी आवश्यक कौशल्यांचा विकास करण्यासाठी चालना देणारी मानसिकता विकसित करत आहे.’

एनईपी २०२० शी सुसंगत असलेला हा अभ्यासक्रम पंचकोश किंवा मानवी अस्तित्वाचे पाच पैलू या प्राचीन भारतीय संकल्पनेवर आधारित समग्र विकासावर भर देणारा आहे. हेयुरेकामध्ये या तत्त्वांचे शैक्षणिक विचारसरणीत रुपांतर करण्यात आले आहे. युरोकिड्स आपले होमबडी अपमध्ये या अभ्यासक्रमाशी सुसंगत बदल करत असून, आकलनात्मक विकासाला पाठिंबा देणारा समृद्ध संवादी कंटेंट उपलब्ध करत समतोल स्क्रीन टाइम मिळवून दिला जाणार आहे.

२३ वर्षांचा अनुभव आणि ४०० शहरांतील १,६०० पेक्षा जास्त प्रीस्कूलचे नेटवर्क व आतापर्यंत ७,००,००० विद्यार्थ्यांचा विकास करत, युरोकिड्स लहान मुलांना भविष्यासाठी सज्ज करण्यात आघाडीवर आहे. हा अभ्यासक्रम युरोकिड्सची सर्वसमावेशक विकास झालेले लर्नर्स तयार करण्याची बांधिलकी अधोरेखित करणारा असून, त्यामुळे प्राथमिक शिक्षण क्षेत्रातील कंपनीचे आघाडीचे स्थान अधोरेखित झाले आहे.

पिंपरी: बलात्कार करणाऱ्याला काठोरात कठोर शिक्षा करा.., गुन्हा होताना तो केवळ मोबाईलमध्ये रेकॉर्ड न करता तो गुन्हा थांबवण्यासाठी पुढाकार घ्या .., महिला सुरक्षेसाठी काटिबद्ध रहा .., असा संदेश देत महिलांवरील अत्याचारा बाबत भाष्य करणारा एक आगळा वेगळा फॅशन शो आज संपन्न झाला.

कशीश सोशल फाउंडेशन आणि कशीश प्रोडक्शनच्या वतीने विष्णुप्रिया 7 आर्ट, Ak’s जगदंबा ज्वेलर्स यांच्या सहकार्याने  मिस,मिसेस,मिस्टर, किड्स इंडिया ईलाईट – इंडिया आयकॉन २०२४’फॅशन शो चे आयोजन करण्यात आले होते. हा फॅशन शो एल्प्रो मॉल सभागृह, चिंचवड येथे पार पडला. यामध्ये महिलांवर वारंवार होत असलेल्या अत्याचारा विरोधात जनजागृती करण्याच्या उद्देशाने तसेच विविधतेतून एकता असा संदेश देण्यात आला. यावेळी  प्रमुख पाहूणे म्हणून अखिल भारतीय मराठी नाट्य परिषद ( पिंपरी – चिंचवड शाखा) अध्यक्ष भाऊसाहेब भोईर, Ak’s जगदंबा ज्वेलर्सचे डॉ. अजयकुमार कारंडे, देव झुंबरे, गणेश गुरव,ब्रॅंड अॅबेसिडर सोना म्हात्रे, प्रश्विता बेहळे, आयोजक आणि पुण्याचे पॅडमॅन योगेश पवार यांसह सिनेमा,फॅशन क्षेत्रातील अनेक मान्यवर उपस्थित होते.

यावेळी बोलताना पॅडमॅन योगेश पवार म्हणाले, अलीकडच्या काळात महिलांवरील अत्याचाराचे केवळ राज्यातच नव्हे तर संपूर्ण भारतात प्रमाण मोठ्या संख्येने वाढले आहे. या पार्श्वभूमीवर देशातील प्रत्येक नागरिकांची जबाबदारी आहे की असे प्रकार घडण्या पासून थांबवणे. या फॅशन शो च्या माध्यमातून आम्ही नागरिकांमध्ये या विषयी जनजागृती करण्याचे काम करत आहोत.आशा आहे की जास्तीत जास्त लोकांपर्यंत हा संदेश पोहोचला आसावा.

भाऊसाहेब भोईर म्हणाले, आजची सामाजिक परिस्थिती बघितली तर गांभीर्याने सांगितलेली माहिती कितपत पटेल हे सांगता येत नाही, मात्र प्रबोधनात्मक किंवा मनोरंजक पद्धतीने सांगितले तर लोक स्वीकारतात असे अनेकदा दिसते. पॅडमॅन योगेश पवार यांनी फॅशन शो च्या माध्यमातून समाजातील अत्यंत ज्वलंत विषयाला हात घातला आहे, महिला अत्याचारांविरोधात लढण्याची, जनजागृती करण्याची आज गरज आहे. पवार देशभर राबावत असलेले कार्य आदर्शवत आहे.  

महिलांवर होत असलेल्या अत्याचारांच्या विरोधात ‘महिला सुरक्षा’ या थीमवर एक फॅशन वॉक करण्यात आला. यामध्ये मॉडेल्सनी  आणि आयोजकांनी महिला सुरक्षे  विषयी संदेश फलक घेवून रॅम्प वॉक केला. तसेच यामध्ये स्पर्धकांनी विविधतेतून एकता संदेश देत भारतातील विविध राज्यांचे प्रतिनिधित्व करत त्या त्या राज्यांच्या संस्कृतीचे दर्शन या फॅशन शोमध्ये घडले.अंजली रघुनाथ वाघ, अर्चना माघाडे, दीपाली मुंढरे, ह्यांनी मॉडेल्स ला शिकवायला योगेश पवार ला सहाय्य केले. संपूर्ण भारतातून  ३ वर्षे वयोगट ते ५५ वर्षे असे एकूण ७५ स्पर्धकांना ह्या कार्यक्रमामध्ये निवडण्यात आले होते

विजेते – कार्तिकी बत्ते ,जोहान,डॅनियल मुजावर,शरयू पाटील ,सारा ,जरीन इराणी ,दीपाक्षी,जितेश पवार…उपविजेते- खुशी मोहिते,शिवण्या काकडे,अद्वित राजवडे,जेनिसा,भुवी डेंगळे, पोर्णिमा अंबार्गे ,जिया देवारे,प्रियांका मानकर, टीना शहा,अर्जुन झुंबरे,सुजल अग्रवाल

ऋत्विक फाउंडेशनतर्फे शनिवारी

भीमसेन जोशी, गानरसरस्वती किशोरी आमोणकर यांना सांगीतिक मानवंदना

डॉ. राधिका जोशी, अभिषेक काळे यांचे होणार गायन

पुणे : भारतरत्न पं. भीमसेन जोशी आणि गानसरस्वती किशोरी आमोणकर यांना ऋत्विक फाउंडेशन फॉर परफॉर्मिंग आर्टस्‌‍तर्फे सांगीतिक मानवंदना दिली जाणार असून या निमित्त शनिवार, दि. 28 सप्टेंबर रोजी ‌‘सहेला रे – आ मिल गाएं ..‌’ या गायन मैफलीचे आयोजन करण्यात आले आहे. मैफल सायंकाळी 6 वाजता ऋत्विक फाउंडेशन फॉर परफॉर्मिंग आर्ट्स, प्लॉट नं. 17, वेद भवन मागे, कोथरूड, पुणे येथे आयोजित करण्यात आली असून यात जयपूर-अत्रैली घराण्याच्या गायिका डॉ. राधिका जोशी आणि किराणा घराण्याचे गायक अभिषेक काळे यांचे गायन होणार आहे. डॉ. राधिका जोशी या पंडित रघुनंदन पणशीकर यांच्या शिष्या असून त्यांना पद्मविभूषण गिरीजादेवी यांचेही मार्गदर्शन लाभलेले आहे. शास्त्रीय, उपशास्त्रीय तसेच ठुमरी, दादरा, कजरी, होरी या गायन प्रकारात त्यांचे प्रभुत्व आहे. अभिषेक काळे यांचे गायनातील प्राथमिक शिक्षण त्यांच्या आई स्वाती काळे यांच्याकडे झाले असून पंडित जयतीर्थ मेवुंडी आणि पंडित शरद बापट यांचेही मार्गदर्शन लाभत आहे. अभंग, ठुमरी, नाट्यसंगीत, गझल आणि बंदिशींच्या सादरीकरणातून भारतरत्न पं. भीमसेन जोशी आणि गानसरस्वती किशोरी आमोणकर यांना सांगीतिक मानवंदना दिली जाणार आहे. कलाकारांना रामकृष्ण करंबेळकर (तबला), मालू गांवकर (हार्मोनियम), प्रथमेश तारळकर (पखवाज), उद्धव कुंभार (साईड ऱ्हिदम) साथसंगत करणार आहेत. डॉ. वंदना बोकील-कुलकर्णी यांचे निवेदन आहे. कार्यक्रम सर्वांसाठी खुला आहे, अशी माहिती ऋत्विक फाउंडेशन फॉर परफॉर्मिंग आर्टस्‌‍च्या समन्वयक रश्मी पाठारे यांनी निवेदनाद्वारे कळविली आहे.

पुणे-
मुंढवा आणि लोणीकाळभोर पोलिसांनी टाकेल्या छाप्यात नुकताच यावेळी पोलिसांनी 48 लाख 1 हजार 800 रुपयांचे पेट्रोल, डिझेलसह मुददेमाल पकडला होता. याप्रकरणात प्रविण सिद्राम मडीखांबे या टोळीप्रमुखासह बारा जणांवर महाराष्ट्र संघटीत गुन्हेगारी कायद्यान्वये (मोक्का) कारवाई करण्याचे आदेश अपर पोलिस आयुक्त मनोज पाटील यांनी पोलिस आयुक्त अमितेश कुमार यांच्या मार्गदर्शनाखाली दिले आहेत. शुभम सुशील भगत (23, रा. बोरकरवस्ती, थेऊरफाटा, ता. हवेली), तृशांत राजेंद्र सुंभे (31, रा. बॅक ऑफ बडोदाजवळ, थेऊरु फाटा) रवी छोटेलाल केवट (25, रा. बोरकरवस्ती, माळीमळा, ता. हवेली), विशाल सुरेश गोसावी (30, रा. वाणीमळा, थेऊर फाटा), कृष्णा उर्फ किरण हरिभाऊ आंबेकर (31, रा. कदमावाक वस्ती), रोहितकुमार छेद्दुलाल (25, रा.बोरकरवस्ती, माळीमळा), अभिमान उर्फ सुभाष सुरेश ओव्हाळ (35, माळीमळा, लोणी काळभोर), पांडुरंग निळकंठ नकाते (42 रा. माळीमळा, लोणी काळभोर), आकाश सुखदेव घोडके (24, रा. हनुमाननगर, कोथरूड), तेजस तुकाराम वाघमारे (23, रा. श्रावणधारा वसाहत, कोथरूड), टँकर चालक यांच्यासह फरार झालेला टोळीप्रमुख प्रविण सिद्राम मडीखांबे (रा. कदमवाकवस्ती, ता. हवेली, जि. पुणे) अशी मोक्का कारवाई झालेल्या आरोपींची नावे आहेत.

दि. 10 सप्टेंबर रोजी मुंढवा पोलिस ठाण्याचे सहायक पोलिस निरीक्षक राजू महानोर, पोलिस कर्मचारी ढमढेरे आणि शिवाजी जाधव असे लोणी काळभोर पोलिस ठाण्याच्या हद्दीत पेट्रोलिंग करत होते. यावेळी त्यांना गोपनीय बातमीदारामार्फत बातमी मिळाली की, मौजे कुंजीरवाडी, थेऊर फाट्याजवळ पुणे-सोलापूर महामार्गाच्या बाजूला असलेल्या एका पत्र्याच्या शेडजवळ टँकर घेऊन जाऊन त्यामधून पेट्रोल-डिझेल बॅरल मध्ये काढले जात आहे. पोलिस घटनास्थळी पोहोचल्यावर त्यांना आयओसिएल व एचपीसीएल असे एकुण 3 इंधन टॅकर आढळून आले. त्या टॅकर मधून इलेक्ट्रिक मोटारीच्या साहाय्याने डिझेल बॅरलमध्ये काढत असल्याचे देखील मिळून आले. या छाप्यात एकुण 1 हजार 620 लिटर डिझेल मिळून आले, यावेळी पोलिसांनी काही जणांना अटक केली. लोणी काळभोर पोलिस ठाण्याचे वरिष्ठ पोलिस निरीक्षक राजेंद्र करणकोट यांनी प्रस्ताव तयार करून, पोलिस उपायुक्त आर. राजा यांच्या मार्फत अपर पोलिस आयुक्त मनोज पाटील यांच्याकडे सादर केला होता. त्यांनी पोलिस आयुक्तांच्या मार्गदर्शनाखाली मोक्काला मंजुरी दिली.

सर्वोत्कृष्ट प्रायोगिक एकांकिकेसाठीचे जयराम हर्डीकर स्मृतिचिन्ह ‌‘सखा‌’ला
पुणे : महाराष्ट्रीय कलोपासक आयोजित 59व्या आंतर महाविद्यालयीन पुरुषोत्तम करंडक एकांकिका स्पर्धेत म. ए. सो. गरवारे कॉलेजने सादर केलेल्या बस नं. 1532 एकांकिकेने बाजी मारत यंदाच्या पुरुषोत्तम करंडकावर आपले नाव कोरले. संघाला 5001 रुपयांचे रोख पारितोषिक देण्यात येणार आहे. सर्वोकृष्ट प्रायोगिक एकांकिकेसाठी असलेले जयराम हर्डीकर स्मृतिचिन्ह व 5001 रुपयांचे पारितोषिक मएसोचे इन्स्टिट्यूट ऑफ मॅनेजमेंट ॲण्ड करिअर कोर्सेसे (आयएमसीसी) सादर केलेल्या सखा या एकांकिकेने पटकाविले.
स्पर्धेतील सांघिक द्वितीय क्रमांकाचे पारितोषिक हरी विनायक करंडक आणि 3001 रुपयांचे रोख पारितोषिक विद्या प्रतिष्ठानचे कला, वाणिज्य व विज्ञान महाविद्यालय, बारामतीच्या ‌‘पाटी‌’ एकांकिकेने तर सांघिक तृतीय पारितोषिक संजीव करंडक आणि 2001 रुपयांचे पारितोषिक न्यू आर्टस्‌‍ ॲन्ड सायन्स कॉलेज अहमदनगरच्या ‌‘देखावा‌’ या एकांकिकेला जाहीर करण्यात आला.
पुरुषोत्तम करंडक एकांकिका स्पर्धेची अंतिम फेरी शनिवार (दि. 21) आणि रविवारी (दि. 22) भरत नाट्य मंदिरात आयोजित करण्यात आली होती. प्राथमिक फेरीतून अंतिम फेरीत पोहोचलेल्या नऊ संघाचे तीन सत्रात सादरीकरण झाले. स्पर्धेचा निकाल रविवारी (दि. 22) रात्री जाहीर करण्यात आला.
पुरुषोत्तम करंडक स्पर्धेच्या अंतिम फेरीचा पारितोषिक वितरण समारंभ शनिवार, दि. 28 सप्टेंबर रोजी सायंकाळी 5 वाजता भरत नाट्य मंदिर येथे आयोजित करण्यात आला असून पारितोषिक वितरण ज्येष्ठ नाटककार चं. प्र. देशपांडे यांच्या हस्ते होणार आहे. पारितोषिक वितरण समारंभापूर्वी स्पर्धेत प्रथम आलेल्या बस नं. 1532 या एकांकिकेचे सादरीकरण होणार आहे.
पुरुषोत्तम बेर्डे, शुभांगी गोखले, गिरीष परदेशी यांनी स्पर्धेचे परीक्षण केले.
: स्पर्धेचा सविस्तर निकाल :
सांघिक प्रथम : बस नं. 1532 (म. ए. सो. गरवारे वाणिज्य महाविद्यालय)
सांघिक द्वितीय : पाटी (विद्या प्रतिष्ठानचे कला, वाणिज्य व विज्ञान महाविद्यालय, बारामती)
सांघिक तृतीय : देखावा (न्यू आर्टस्‌‍, कॉमर्स ॲण्ड सायन्स कॉलेज, अहमदनगर)
सर्वोत्कृष्ट प्रायोगिक एकांकिका : सखा (म. ए. सो.चे इन्स्टिट्यूट ऑफ मॅनेजमेंट करिअर कोर्सेस)
सर्वोत्कृष्ट विद्यार्थी लेखक : ओम चव्हाण (सखा, आयएमसीसी महाविद्यालय)
सर्वोत्कृष्ट विद्यार्थी प्रायोगिक लेखक : पवन पोटे (देखावा, न्यू आर्टस्‌‍, कॉमर्स ॲण्ड सायन्स महाविद्यालय, अहमदनगर)
उत्तेजनार्थ विद्यार्थी लेखिका : सई काटकर आणि वेदिका कुलकर्णी (11,111, फर्ग्युसन महाविद्यालय, पुणे, स्वायत्त)
सर्वोत्कृष्ट दिग्दर्शक : यश मेंगडे (बस. नं. 1532, गरवारे वाणिज्य महाविद्यालय)
उत्तेजनार्थ दिग्दर्शन : ऋषिकेश सकट (देखावा, न्यू आर्टस्‌‍, कॉमर्स ॲण्ड सायन्स कॉलेज अहमदनगर)
उत्तेजनार्थ दिग्दर्शन : सुबोधन जोशी (पाटी, विद्या प्रतिष्ठानचे कला, विज्ञान व वाणिज्य महाविद्यालय, बारामती)
सर्वोत्कृष्ट वैयक्तिक अभिनय नैपुण्य : सुजल बर्गे (भूमिका अरविंद, एकांकिका – पाटी, विद्या प्रतिष्ठानचे कला, वाणिज्य, विज्ञान महाविद्यालय)
अभिनय नैपुण्य (अभिनेता) : यश पत्की (भूमिका – सदा मोरे, एकांकिका – बस नं. 1532, म. ए. सो. गरवारे वाणिज्य महाविद्यालय)
अभिनय नैपुण्य (अभिनेत्री) : श्रद्धा रंगारी (भूमिका – सुवर्णा, एकांकिका – पाटी, विद्या प्रतिष्ठानचे कला, विज्ञान व वाणिज्य महाविद्यालय)
वाचिक अभिनय नैपुण्य : पवन पोटे (शंकर, एकांकिका – देखावा, न्यू आर्टस्‌‍, कॉमर्स ॲण्ड सायन्स कॉलेज, अहमदनगर)
उत्तेजनार्थ (अंतिम फेरी) : अभिनय : ओम चव्हाण (सुदामा/फडतरे, एकांकिका – सखा, आयएमसीसी)
अनामिका मदने (ज्ञानेश्वरी, एकांकिका – बिजागरी, पुणे विद्यार्थी गृहाचे अभियांत्रिकी महाविद्यालय)
तन्वी खाडिलकर (प्रिया, एकांकिका – पार्टनर, स. प. महाविद्यालय)
शुभ्रा जाधव (माय, एकांकिका – बिजागरी, पुणे विद्यार्थी गृहाचे अभियांत्रिकी महाविद्यालय)
राखी गोरखा (आत्या, एकांकिका – देखावा, न्यू आर्टस कॉमर्स ॲण्ड सायन्स कॉलेज, अहमदनगर)
समृद्धी कुलकर्णी (बारकी, एकांकिका – बस नं. 1532, गरवारे वाणिज्य महाविद्यालय)
व्योम कुलकर्णी (भूषण, एकांकिका – पार्टनर, स. प. महाविद्यालय)
वैष्णवी भिडे (आनंदीबाई, एकांकिका – तृष्णा चक्र, डॉ. भानुबेन नानावटी कॉलेज ऑफ आर्किटेक्चर)
प्रद्युम्न उमरीकर (सचिन, एकांकिका – 11,111, फर्ग्युसन महाविद्यालय, पुणे, स्वायत्त)
पार्थ दीक्षित (माधव, एकांकिका – पार्टनर, स. प. महाविद्यालय)

सर्वोत्कृष्ट आयोजित संघ : भगीरथ करंडक : पेमराज सारडा महाविद्यालय, अहमदनगर (एकांकिका अय)

: मानाचा चौथा श्री तुळशीबाग गणपती सार्वजनिक गणेशोत्सव मंडळ ट्रस्ट यांच्यावतीने कृतज्ञता समारंभाचे आयोजन
पुणे : सर्व गणेश मंडळांनी आपापल्या स्तरावर घेतलेल्या मेहनतीमुळे अत्यंत उत्साहात आणि चांगल्या वातावरणात गणेशोत्सव साजरा करण्यात आला. मानाचे गणपती, पुण्याचे प्रतिष्ठित गणपती आणि सर्व गणेशोत्सव मंडळे यांनी कोणतीही तक्रार पोलिसांबद्दल ठेवली नाही. पोलीस दल आणि जनता यांच्यामध्ये समन्वय घडवून पुढील काळात आम्ही कायदा सुव्यवस्था चांगल्या पद्धतीने निर्माण करण्यासाठी  कटिबद्ध आहोत. मेहनतीने शहराला शिस्त लावण्याचा प्रयत्न करू यासाठी शहराचा विश्वास आणि प्रेम यापुढेही असेच लाभेल असा आम्हाला विश्वास आहे, अशी भावना पोलीस आयुक्त अमितेश कुमार यांनी व्यक्त केली.

मानाचा चौथा श्री तुळशीबाग गणपती सार्वजनिक गणेशोत्सव मंडळ ट्रस्ट च्या वतीने कृतज्ञता समारंभाचे आयोजन करण्यात आले होते. बाजीराव रस्त्यावरील नुमवि प्रशालेच्या सभागृहात कार्यक्रम झाला. यावेळी श्रीमंत भाऊसाहेब रंगारी गणपती मंडळ ट्रस्टचे विश्वस्त पुनीत बालन, परिमंडळ १ चे पोलीस उपायुक्त संदीप गिल, ॲड.शिवराज कदम जहागीरदार, पराग ठाकूर, मंडळाचे अध्यक्ष विकास पवार, उपाध्यक्ष विनायक कदम, कोषाध्यक्ष नितीन पंडित उपस्थित होते. उपरणे, श्रीफळ, तुळशीबाग गणपतीची प्रतिमा देऊन कृतज्ञता सन्मान करण्यात आला. अग्निशमन दलातील अधिकारी, जीव रक्षक, तसेच उत्सव यशस्वी करणाऱ्या हातांचा सन्मान यावेळी करण्यात आला.

पुनीत बालन म्हणाले, ज्यांना गणपतीवर श्रद्धा होती त्यांनी उत्सव चांगल्या पद्धतीने साजरा केला आणि ज्यांना आवडला नाही त्यांनी टीका केली. टीकाकारांना मी एवढेच सांगेल पुण्याच्या गणेशोत्सव हा वैभवशाली गणेशोत्सव आहे. श्रीमंत भाऊसाहेब रंगारी, लोकमान्य टिळक यांनी सुरू केलेला गणेशोत्सव आहे. त्यामुळे गणेशोत्सव कधीही हायजॅक होऊ शकत नाही. हा उत्सव जपण्याचे काम आम्ही गणेशोत्सव मंडळांनी केले आहे.

ते पुढे म्हणाले, एका गोष्टीची खंत वाटते, उत्सवातले दहा दिवस अतिशय चांगल्या पद्धतीने साजरे झाले परंतु एका ठिकाणी आपण चुकलो ते म्हणजे विसर्जन मिरवणूक. विसर्जन मिरवणूक देखील एक उत्सव म्हणून साजरा व्हायला पाहिजे ती जास्त वेळ रेंगाळायला नको. पोलीस आणि प्रशासनावर आपण किती ताण देणार याचे आत्मचिंतन करायला हवे. उत्सवात देखील भाविक हे बापांच्या दर्शनासाठी येतात ते आपल्यासाठी येत नाहीत त्यामुळे त्यांना किती वेळ ताटकळत ठेवायचे याचा देखील विचार मंडळाने आणि कार्यकर्त्यांनी करायला हवा. हा गणेशोत्सव यशस्वी होण्यासाठी ज्या लोकांनी सहकार्य केले ते खऱ्या अर्थाने उत्सवाचा कणा आहेत. त्यांचा सन्मान तुळशीबाग मंडळांने केला आहे. नितीन पंडित यांनी सूत्रसंचालन केले. प्रदीप इंगळे यांनी आभार मानले.

‌

‘स्वरयोगिनी : भारतीय संगीतातील नवोन्मेष‌’ दोन दिवसीय महोत्सवाची सांगता

पुणे : स्वरयोगिनी, पद्मभूषण डॉ. प्रभा अत्रे यांनी रचनलेल्या विविध बंदिशींचे सादरीकरण तसेच त्यांच्या बंदिशींवर आधारित कुचिपुडी नृत्याविष्काराद्वारे डॉ. प्रभा अत्रे यांना सांगीतिक अभिवादन करण्यात आले.

डॉ. प्रभा अत्रे शिष्य परिवारातर्फे स्वरयोगिनी, पद्मविभूषण डॉ. प्रभा अत्रे यांच्या साहित्य, कला आणि संगीत या क्षेत्रांमधील कार्यावर आधारित ‌‘स्वरयोगिनी : भारतीय संगीतातील नवोन्मेष‌’ या दोन दिवसीय महोत्सवाचे बालगंधर्व रंगमंदिर येथे आयोजन करण्यात आले होते. महोत्सवाच्या दुसऱ्या दिवशी (दि. 22) स्वर-नृत्य-प्रभाअंतर्गत डॉ. प्रभा अत्रे यांच्या बंदिशींवर आधारित संगीत-नृत्याचा अनोखा कार्यक्रम झाला. यात डॉ. मनिषा रवी प्रकाश, पियू मुखर्जी यांचे गायन तर नृत्यगुरू वैजयंती काशी आणि सहकाऱ्यांनी कुचिपुडी नृत्य सादर केले.
गायक कलाकारांना पांडुरंग मुखडे (तबला), सुयोग कुंडलकर (संवादिनी) यांनी साथसंगत केली.
महोत्सवाचे आयोजन डॉ. प्रभा अत्रे फाऊंडेशनच्या सचिव डॉ. भारती एम. डी. आणि कार्यक्रम निर्देशक प्रसाद भडसावळे यांनी केले होते.

डॉ. प्रभा अत्रे यांच्या शिष्या व डॉ. उषा अत्रे-वाघ यांच्या कन्या डॉ. मनिषा रवी प्रकाश यांनी सादर केलेल्या ‌‘अभिमानाने मीरा वदते हरी चरणाशी माझे नाते‌’ प्रार्थनेने कार्यक्रमाची सुरुवात झाली. ही प्रार्थना डॉ. प्रभा अत्रे व त्यांच्या भगिती डॉ. उषा अत्रे-वाघ यांनी एकत्रितपणे नागपूर आकाशवाणीवर सादर केलेले एकमेव गीत असल्याची आठवण या वेळी सांगण्यात आली.
या नंतर पश्चिम बंगालमधील सुप्रसिद्ध भारतीय शास्त्रीय गायिका पियू मुखर्जी यांनी डॉ. प्रभा अत्रे यांच्या रचना सादर केल्या. बिलासखानी तोडीमधील ‌‘मैं तोरी शरण आयी जगतजननी‌’, ‌‘जग माता तू भवानी चामुंडे महाकाली‌’ या बंदिशी बडाख्याल, मध्यलय आणि द्रुत एकतालात सादर केल्या. ‌‘सुनो मोरी अरज, कैसे धरू धीरज‌’ ही देसरागातील मध्यलय रुपकमधील बंदिश प्रभावीपणे सादर केली. तसेच ‌‘तानी दे रे ना तदाने तान दीम्‌‍‌’ हा तराणा सादर करून त्यांनी रसिकांना मोहित केले. मैफलीची सांगता ‌‘आए नही मोरे शाम‌’ या मिश्र भैरवीतील ठुमरीने केली.
कार्यक्रमाच्या उत्तरार्धात बेंगळुरू येथील नृत्यगुरू वैजयंती काशी आणि त्यांच्या शिष्यांचे बहारदार कुचिपुडी नृत्य सादरीकरण झाले. सादरीकरणाची सुरुवात गणेश वंदनेने झाली. डॉ. प्रभा अत्रे यांना समर्पित नृत्याविष्कारात ‌‘माता भवानी काली‌’ ही त्रिशक्तीची रूपे दर्शविणारी प्रस्तुती केली. या नंतर मर्यादापुरुषोत्तम श्री राम आणि नटखट श्री कृष्णाचे वर्णन करणाऱ्या ‌‘कोई राम कहे, कोई शाम कहे‌’ या रचनेवर वैजयंती काशी यांनी एकल नृत्य सादर केले. ‌‘सगुण स्वरूप नंदलाल‌’ या रचनेवरील नृत्याविष्कारात भक्तीचे अनोखे दर्शन घडविले. डॉ. प्रभा अत्रे यांच्या विविध रचनांवर सादर झालेला विलोभनीय नृत्याविष्कार रसिकांच्या मनाचा ठाव घेणारा ठरला.
डॉ. प्रभा अत्रे यांच्या 90व्या वाढदिवसानिमित्त त्यांच्या जीवनप्रवासाचे वर्णन करणारा पोवाडा शाहीर हेमंत मावळे यांनी रचला होता. या पोवाड्याचे दृकश्राव्य माध्यमातील चित्रिकरण या प्रसंगी दाखविण्यात आले.
कलाकारांचा सत्कार निलिमा छापेकर, वीणा शुक्ला, रघुवीर कुलकर्णी, अशोक वळसंगकर यांनी केला. कार्यक्रमाचे सूत्रसंचालन राजेश दामले यांनी केले.