पुणे – राष्ट्रवादी काँग्रेस पक्षाचे राष्ट्रीय अध्यक्ष आणि उपमुख्यमंत्री अजितपवार,प्रदेशाध्यक्ष खा.सुनील तटकरे यांच्या मार्गदर्शनाखाली व शहराध्यक्ष दीपक मानकर यांच्या नेतृत्वात पुणे शहरात राष्ट्रवादी काँग्रेस पक्षाचे सदस्य नोंदणी अभियान राबविण्यात येत आहे. राष्ट्रवादी काँग्रेस पार्टी सभासद नोंदणी अभियानाच्या पार्श्वभूमीवर शहराध्यक्ष दीपक मानकर यांच्या सुचनेनुसार कोथरूड विधानसभा मतदारसंघात सभासद नोंदणी अभियानाच्या प्रभावी अंमलबजावणीसाठी १० मार्च रोजी कर्वेनगर येथील रत्ना हॉटेल येथे नियोजन बैठक आयोजित करण्यात आली होती. याप्रसंगी उपस्थित पदाधिकाऱ्यांना सभासद नोंदणी संदर्भात मार्गदर्शन करण्यात आले तसेच मोठ्या उत्साहात अभियानाचे संपूर्ण नियोजन करून सदस्य नोंदणी अभियानाला शुभारंभ करण्यात आला. यावेळी कोथरूड विधानसभा मतदारसंघातील फादर बॉडीचे पदाधिकारी, सेलचे पदाधिकारी या पदाधिकाऱ्यांकडून सभासद नोंदणीसाठी करावयाची पूर्वतयारी म्हणून आढावा घेत माहिती घेण्यात आली.

सदर प्रसंगी कोथरूड विधानसभा मतदारसंघ अध्यक्ष हर्षवर्धन दीपक मानकर, महिला अध्यक्ष तेजल दुधाने, कोथरूड निरीक्षक माणिकशेठ दुधाने, विद्यार्थी शहराध्यक्ष शुभम माताळे, वैद्यकीय मदत कक्ष शहराध्यक्ष विजय बाबर, शहर सरचिटणीस धनंजय पायगुडे, फादर बॉडी शहर उपाध्यक्ष आनंद बंडू तांबे, संतोष बराटे,कुमार बराटे,प्रशांत निम्हण,रजनी पाचंगे,संजय चव्हाण,संघटक सचिव ओमकार निम्हण, महिला शहर कार्याध्यक्ष संगीता बराटे,विधानसभा सरचिटणीस महिला दिपाली गायकवाड, उपाध्यक्ष अपूर्वा तांबे,कांता खिलारे,विद्यार्थी कार्याध्यक्ष सत्यम पासलकर,युवक उपाध्यक्ष,सुरज गायकवाड,सागर चंदनशिवे कोथरूड विद्यार्थी अध्यक्ष अनिकेत मोकर, कोथरूड सरचिटणीस नवनाथ खिलारे, सामाजिक न्याय अध्यक्ष अमित तुरुकमारे आदी पदाधिकारी उपस्थित होते.

• प्रसिद्ध इतिहास अभ्यासक व माजी पोलिस महानिरीक्षक डॉ. बी. जी. शेखर पाटील यांचे प्रतिपादन

पुणे – “छत्रपती संभाजी महाराजांच्या क्रूर हत्येनंतर मराठी स्वराज्य बलाढ्य औरंगझेबाविरुद्ध किती पराक्रमाने लढले, या लढ्याचा इतिहास रोमहर्षक आहे. या लढ्याची सूत्रे स्वीकारली ती महापराक्रमी संताजी घोरपडे आणि त्यांच्या शूर सहकार्यांनी. सरदार संताजी घोरपडे या व्यक्तिमत्वाने आणि त्यांच्या तळपत्या पराक्रमाच्या गाथेने मला साद घातली. त्याची परिणती ‘शूर सरसेनापती संताजी’ या पुस्तकाच्या लेखनात झाली”, असे मनोगत प्रसिद्ध अभ्यासक, संशोधक आणि माजी पोलिस महानिरीक्षक डॉ. बी. जी. शेखर पाटील (IPS) यांनी मंगळवारी व्यक्त केले. ११ मार्च १६८९ या दिवशी औरंगझेबाने छत्रपती संभाजी महाराजांची क्रूर हत्या केली होती. मंगळवारी धर्मवीर शंभूराजांच्या स्मृती जागवणाऱ्या दिवसाचे औचित्य साधून डॉ. शेखर पाटील यांनी पत्रकारांशी संवाद साधला. शंभूराजांच्या हत्येनंतरच्या काळातील मराठा सरदार, औरंगजेब, त्यांच्या लढाया विशेतः संताजी घोरपडे याविषयी डॉ. शेखर पाटील यांचा विशेष अभ्यास आहे.

डॉ. शेखर पाटील म्हणाले, “१६८३ ते १६९४ पर्यंतच्या काळात मराठी सैन्य संताजींच्या नेतृत्वाखाली औरंगझेबाशी लढत राहिले, हा इतिहास आहे. छत्रपती राजाराम महाराज जिंजीच्या किल्ल्यावर वेढ्यात असतानाही, मराठी स्वराज्याचे सर्व अर्थांनी रक्षण आणि बलाढ्य शत्रूशी दोन हात अशी कामगिरी करणारे संताजी घोरपडे हे व्यक्तिमत्व मला सदैव साद घालत राहिले. त्यातूनच या काळाविषयीच्या माझ्या संशोधनाला चालना मिळाली, आणि ‘शूर सरसेनापती संताजी’ या पुस्तकाचे लेखन घडले. आता लवकरच या पुस्तकावर आधारित रणधुरंधर संताजी हा मराठी चित्रपट प्रेक्षकांच्या भेटीस येणार आहे. उच्च दर्जाच्या सिनेमॅटोग्राफी साठी प्रसिद्ध असलेले व विविध राष्ट्रीय पुरस्कारांचे मानकरी असलेले दिग्दर्शक अमोल गोळे हा चित्रपट दिग्दर्शित करणार आहेत”, अशी माहितीही त्यांनी दिली. याप्रसंगी दिग्दर्शक अमोल गोळे, डॉ. अनिरुद्ध आंबेकर, करणसिंग बांदल, एकनाथ दुधे, आदित्य शेखर पाटील, निवृत्ती नवले तसेच घोरपडे घराण्याचे वंशज चंद्रहार घोरपडे व मानसिंग घोरपडे तसेच अन्य घोरपडे कुटुंबीय उपस्थित होते. यावेळी चित्रपटाच्या पहिला पोस्टरचे अनावरण करण्यात आले.

डॉ. शेखर पाटील पुढे म्हणाले, “शिवरायांचे जन्मस्थान असणार्या शिवनेरी किल्ल्याच्या पायथ्याशी माझे लहानपण गेले. तेव्हापासून इतिहासाची गोडी लागली. अभ्यास सुरू झाला. अवघ्या २३ व्या वर्षी संभाजी महाराज छत्रपती झाले. त्यानंतरची ९ वर्षे त्यांनी औरंगझेबाशी अशा लढाया केल्या, की औरंगझेबाने विचार बदलून आधी निजामशाही, आदिलशाही आणि कुतुबशाही संपविण्याचा निर्णय घेतला. या संपूर्ण काळाचे संशोधन हा माझ्या विशेष अभ्यासाचा विषय आहे. सलग ५ वर्षे संशोधन, सुमारे ८ हजार किलोमीटरचा प्रवास, लढायांची माहिती. या काळाशी संबंधित प्रत्येक स्थळाला भेट देऊन, मी लेखन केले आहे. सर्व उपलब्ध कागदपत्रांचा मी अभ्यास केला आहे. सुमारे ८ वर्षे स्वराज्याचे सेनापती या नात्याने संताजी घोरपडे यांनी स्वराज्य जपले, राखले, आणि औरंगजेबाला हैराण केले. संताजींच्या महापराक्रमी कर्तृत्वाला आदरांजली म्हणून माझा लेखनप्रपंच आहे, त्या लेखनाचे चित्रपटरूपही लवकरच रसिकांसमोर येईल. या विशिष्ट काळातील इतिहास, आणि मराठी सरदारांचे महान कर्तृत्व सर्वांसमोर यावे, हाच उद्देश आहे”.

दिग्दर्शक अमोल गोळे म्हणाले, “ऐतिहासिक चित्रपट करताना वातावरणनिर्मिती, पेहराव, तत्कालीन वास्तू, वस्तू यांना सर्वाधिक महत्त्व असते, हे मी मंगल पांडे, पावनखिंड या ऐतिहासिक चित्रपटांसाठी काम करताना शिकलो आहे. ‘रणधुरंदर संताजी’ चित्रपटाचे दिग्दर्शन करताना हा अनुभव उपयोगी ठरेल. सुमारे वर्षभराच्या काळात हा चित्रपट रसिकांसमोर येईल, असा आमचा प्रयत्न राहील”.

घोरपडे घराण्याचे वंशज चंद्रहार घोरपडे म्हणाले, “संताजी घोरपडे हा घराण्याचा अभिमान आहे. संताजींचे वडील मालोजी घोरपडे हे छत्रपती संभाजी महाराजांचे सरसेनापती होते. या पितापुत्रांनी स्वराज्यासाठी जे योगदान दिले, त्याचे दर्शन यातून घडेल”, याचा विश्वास आहे.

• पुणे प्रादेशिक संचालक भुजंग खंदारे यांचे गौरवोद्गार

पुणे, :तांत्रिक व अत्यंत धकाधकीच्या वीजक्षेत्रामध्ये काळानुरुप आव्हाने स्वीकारण्यासाठी सक्षम असल्याचे महिला अभियंता, अधिकारी व कर्मचाऱ्यांनी आजवर केलेल्या उल्लेखनीय कामगिरीवरून सिद्ध केले आहे असे गौरवोद्गार महावितरणचे पुणे प्रादेशिक संचालक भुजंग खंदारे यांनी काढले.

जागतिक महिला दिनानिमित्त महावितरणकडून रास्तापेठ येथील प्रशासकीय इमारतीच्या ‘प्रकाशदीप’ सभागृहात पुणे परिमंडलातील महिला अभियंता, अधिकारी व कर्मचाऱ्यांसाठी विविध कार्यक्रमांचे आयोजन करण्यात आले. यावेळी प्रादेशिक संचालक खंदारे बोलत होते.व्यासपीठावर मुख्य अभियंता राजेंद्र पवार, अधीक्षक अभियंते सर्वश्री युवराज जरग, सिंहाजीराव गायकवाड, रवींद्र बुंदेले, सहायक महाव्यवस्थापक (वित्त) माधुरी राऊत (वित्त व लेखा) यांची उपस्थिती होती. यावेळी पाहुण्यांच्या हस्ते सर्व संवर्गातील महिला अधिकारी, अभियंता, कर्मचाऱ्यांचा प्रातिनिधिक गौरव करण्यात आला.

मुख्य अभियंता राजेंद्र पवार म्हणाले की, महावितरणमध्ये महिला अभियंता, अधिकारी व कर्मचाऱ्यांची संख्या लक्षणीय आहे व त्या अतिशय सक्षमपणे काम करीत आहेत. कौटुंबिक व नोकरीच्या जबाबदाऱ्या एकाचवेळी सांभाळताना योग्य ताळमेळ साधण्याचे कसब महिलांमध्ये अधिक आहे.

‘महिला दिना’निमित्त आरोग्य तपासणी, नेत्र तपासणी शिबिराचे आयोजन करण्यात आले. तसेच प्रधानमंत्री सूर्यघर योजना व नवीकरणीय ऊर्जा याबाबत सहायक अभियंता शुभांगी क्षीरसागर यांनी सादरीकरणाद्वारे माहिती दिली. यानंतर खास महिलांसाठी संगीत रजनीचा कार्यक्रम झाला. सूत्रसंचालन उपकार्यकारी अभियंता ऐश्वर्या वस्त्रद यांनी केले. कार्यक्रमाला महिला अभियंता, अधिकारी व कर्मचारी मोठ्या संख्येने उपस्थित होते.

पुणे ; महावितरणच्या पर्वती विभाग अंतर्गत वडगाव शाखा कार्यालयाचे वडगावमधील मध्यवस्तीत स्थानांतरण करण्यात आले. या कार्यालयाच्या नव्या वास्तूचे उद्घाटन मुख्य अभियंता श्री. राजेंद्र पवार यांच्याहस्ते नुकतेच झाले.

वडगाव धायरी उपविभागातील वडगाव शाखा कार्यालय पूर्वी अभिरूची मॉलसमोर भाडेपट्टी तत्त्वावर होते. आता हे कार्यालय वडगावमधील महावितरणच्या मालकीच्या जागेमध्ये कृष्णकुंज सोसायटी, सिंहगड कॉलेज रस्ता, महादेव मंदिराजवळ येथे स्थानांतरीत करण्यात आले आहे. वडगाव परिसरातील सुमारे ३२ हजार ग्राहकांना वीज व विविध ग्राहकसेवा देणाऱ्या या कार्यालयासाठी नवीन वास्तू उभारण्यात आली आहे.

या  वास्तुचे उद्घाटन करताना मुख्य अभियंता श्री. राजेंद्र पवार यांनी अभियंता व कर्मचाऱ्यांशी संवाद साधला. यावेळी श्री. पवार यांनी तत्पर ग्राहकसेवेसोबतच तक्रारी व समस्यांचे विनाविलंब निराकरण करण्याचे निर्देश दिले. कार्यक्रमाला प्रभारी अधीक्षक अभियंता श्री. रवींद्र बुंदेले, कार्यकारी अभियंता श्री. मनीषकुमार सूर्यवंशी, अतिरिक्त कार्यकारी अभियंता श्री. अविनाश कलढोणे व श्री. राहुल यादव (स्थापत्य), श्री. विशाल लंके, वडगावचे शाखा अभियंता श्री. आतिश इंगळे व कर्मचाऱ्यांची उपस्थिती होती.

पुणे, दि. ११ मार्च २०२५: महावितरणच्या पर्वती विभाग अंतर्गत दत्तवाडी शाखा कार्यालयाच्या प्रांगणातील पडीक जागेत उभारलेल्या ‘प्रकाशदूत’ बागेचे उद्धाटन मुख्य अभियंता श्री. राजेंद्र पवार यांच्याहस्ते नुकतेच झाले. या शाखा कार्यालयाच्या प्रांगणात सुमारे ८०० चौरसफूट जागा अडगळीने व्यापली होती. तेथे साफसफाई करून हिरव्या गवताचा गालिचा व सुमारे १५० झाडांची रोपटे लावून वनराई फुलवली आहे.

‘लाइनमन दिना’निमित्त पर्वती विभागाकडून दत्तवाडी शाखा कार्यालयात कार्यक्रमाचे आयोजन करण्यात आले होते. यावेळी प्रामुख्याने छोटेखानी ऑक्सीजन रोपट्यांची लागवड केलेल्या ‘प्रकाशदूत’ बागेचे उद्घाटन मुख्य अभियंता श्री. पवार यांच्याहस्ते झाले. यावेळी अधीक्षक अभियंता श्री. रवींद्र बुंदेले व श्री. संजीव नेहेते, कार्यकारी अभियंता श्री. मनीषकुमार सूर्यवंशी व श्री. विजेंद्र मुळे यांची प्रमुख उपस्थिती होती. पाहुण्यांच्या हस्ते लाइनमन व लाइनवूमनचा प्रातिनिधिक गौरव करण्यात आला.

मुख्य अभियंता श्री. पवार यांनी अभियंता व जनमित्रांशी संवाद साधला. ‘महावितरणच्या सेवेचा केंद्रबिंदू हा वीजग्राहकच आहे. त्यांना दर्जेदार व तत्पर सेवा देण्यासोबतच स्वतःच्या आणि ग्राहकांच्या वीजसुरक्षेला सर्वोच्च प्राधान्य द्या’ असे आवाहन त्यांनी केले. कार्यक्रमाला अतिरिक्त कार्यकारी अभियंते उमेश कवडे, उमेश करपे, राहुल यादव, सहायक अभियंता चेतन सोनार व महेश देशमुख आदींसह अभियंते, जनमित्र उपस्थित होते.

• शिवजयंती महोत्सव समिती, पुणे तर्फे भव्य रक्तदान मानवंदनेचे आयोजन ; १०० स्वराज्यघराण्यांचा आणि महाराष्ट्रातील शिवशंभू भक्तांचा सहभाग 

पुणे : शिवजयंती महोत्सव समिती, पुणे तर्फे स्वराज्यरक्षक धर्मवीर छत्रपती संभाजी महाराज यांच्या ३३६ व्या बलिदान दिनी रक्तदानातून मानवंदना देण्यात आली. मानवंदनेचे हे सलग १२ वे वर्ष आहे. यावेळी जिजाऊ माँसाहेब शहाजी महाराज शिवज्योत रथाच्या नेतृत्वाखाली शिवजन्मोत्सव स्वराज्यरथ सोहळ्यात सहभागी होणाऱ्या तब्बल १०० स्वराज्यघराण्यांच्या वंशजांनी, ढोलताशा पथकांनी, क्रिडा संघटनांनी, गणेशोत्सव मंडळांनी रक्तदान मानवंदनेत सहभाग नोंदवला.

शुभारंभ लॅान्स, म्हात्रे पूल डीपीरोड येथे मानवंदनेची सुरुवात छत्रपती संभाजी महाराजांच्या पुतळ्याला पुष्पहार अर्पण करुन करण्यात आला. यावेळी रक्तदान मानवंदनेचे संकल्पक समितीचे संस्थापक अध्यक्ष अमित गायकवाड, सचिन पायगुडे, रवींद्र कंक, शंकर कडू, मंगेश शिळीमकर, प्रवीणभय्या गायकवाड, रिंकल अमित गायकवाड तसेच स्वराज्यघराण्यांचे प्रतिनीधी उपस्थित होते.

रक्तदान मानवंदनेची सुरुवात ईशान अमित गायकवाड, सचिन पायगुडे, महेंद्र भोईटे, अविनाश कडू, राजेश जोगदंड, सुनील जोगदंड, दादा भोसले, मंदार मते, बाजीराव निगडे,  ऋषीकेश पासलकर यांनी रक्तदान करुन केली. यावेळी रक्तदात्यांचा संकल्प पुर्ण झाला. हिंजवडी रक्तपेढीने रक्त संकलन केले.

अमित गायकवाड म्हणाले, स्वराज्यरक्षक धर्मवीर छत्रपती संभाजी महाराज यांचा बलिदान दिन ११ मार्च हा दिवस “महामृत्युंजय रक्दान दिन” म्हणुन महाराष्ट्र सरकारने जाहीर करावा अणि त्यादविशी संपुर्ण महाराष्ट्रात रक्तदान चळवळीतून संभाजी महाराजांना मानवंदना द्यावी. ज्या स्वराज्यरक्षक छत्रपती संभाजी महाराजांनी रक्ताचा थेंबनथेंब अर्पण केला स्वराज्याच रक्षण करण्यासाठी, भारतभूमीच रक्षण करण्यासाठी, भारताच्या गौरवशाली संस्कृतीच रक्षण करण्यासाठी त्या स्वराज्यरक्षक छत्रपती संभाजी महाराजांना रक्तदानातुन मानवंदना देऊयात, रक्ताच पांग रक्ताने फेडूया, रक्ताचे रक्ताशी नाते जोडूयात ही जाणीव जपत आम्ही सलग १२ वर्षे रक्तदान मानवंदना आयोजित करीत आहोत आणि भविष्यात राज्यव्यापी मानवंदनचे आयोजन करण्यात येणार आहे.