पुणे : पर्वती विधानसभा मतदारसंघातील अपक्ष उमेदवार आबा बागुल यांनी गुरुवारी घरोघरी जाऊन नागरिकांची भेट घेत त्यांच्या शुभेच्छा स्वीकारल्या. यावेळी त्यांनी सातारा रस्त्यावरील वाहतूक कोंडी सोडविण्यासाठी कटीबद्ध असल्याचे सांगून, स्वारगेट ते कात्रज हा मेट्रो मार्ग शीघ्रगतीने मार्गी लावणार असल्याचे आश्वासन दिले.
हिरा हे निवडणूक चिन्ह असलेल्या आबा बागुल यांनी आज नागरिकांच्या प्रत्यक्ष भेटीगाठी वर भर दिला. यावेळी त्यांनी पर्वती मतदार संघ टँकर मुक्त करून सर्वांना वेळेवर पाणी देण्यासाठी मी प्रयत्न करणार आहे. विजयी झाल्यावर हा परिसर टँकर माफियामुक्त होईल असा विश्वास त्यांनी नागरिकांना दिला.
नेहमी नागरिकांच्या संपर्कात असलेल्या आबा बागुल यांची आज संदेश नगर येथील विद्यासागर सोसायटीच्या रहिवाश्यांनी भेट घेऊन येथील पाणी प्रश्न सोडविण्यासाठी प्रयत्न करावे अशी विनंती केली. यावेळी आबा यांनी हा प्रश्न तातडीने सोडविला जाईल असे सांगितले. दरम्यान पर्वती मतदार संघातील कोणतेही प्रश्न असतील ते मला सांगा, तसेच आपल्या भागातील विकासाबाबत काही कल्पना असतील, अडचणी असतील त्या वाळवेकर लॉन्स येथील जनसंपर्क कार्यालयात आणून द्यव्यात, त्याचे निराकरण निवडून आल्यावर केले जाईल असे आवाहन आबा बागुल यांनी नागरिकांना केले.
पर्वती मतदारसंघातील अपक्ष उमेदवार आबा बागुल हे गेली ३२ वर्षे महापालिकेत अपराजित नगरसेवक आहेत. आपल्या प्रभागातील मूलभूत समस्यांचे निवारण त्यांनी केले आहे. याचबरोबर संपूर्ण राज्याला नव्हे तर देशाला हेवा वाटेल असे राजीव गांधी ई-लर्निंग स्कुल, भारतरत्न भिमसेन जोशी कलादालन, १९७१ च्या युद्धावर आधारित म्युझिकल कारंजे व लेझर शो प्रकल्प यशस्वीरित्या राबविले आहेत.

२६ वा स्वर सागर सांस्कृतिक महोत्सव

पिंपरी, पुणे (दि. ७ नोव्हेंबर २०२४) स्वरसागर सांस्कृतिक महोत्सवाच्या दुसर्‍या दिवसाची शर्वरी डिग्रजकर – पोफळे यांनी आपल्या शास्त्रीय गायनाची सुरुवात राग पुरिया कल्याणने केली. त्यानंतर मत्स्यगंधा नाटकातील नाट्यपद सादर केले. “आम्हा न कळे ज्ञान” या अभंगांने सांगता केली. त्यांच्या गायनाने उपस्थित रसिक प्रेक्षक मंत्रमुग्ध झाले. त्यांना तबल्यावर रोहित कुलकर्णी आणि हार्मोनियम साथ राजीव तांबे यांनी केली.
प्रारंभी स्नेहल सोमण यांच्या नृत्यरंग सादरीकरणाने झाली. सोमण यांची नृत्य शारदा कथक कला मंदिर ही संस्था आहे. स्नेहलजी आणि त्यांच्या शिष्यांनी प्रथम गणेश वंदनेने सादरीकरणाची सुरुवात केली. त्यानंतर शिखर अनवट ताल, ठुमरी, पंच महाभूत प्रस्तुती, सरस्वती वंदना, अष्टपदी आणि शेवट फ्यूजन प्रकाराने सादरीकरणाचा शेवट केला.
कार्यक्रमाच्या शेवटच्या सत्रात “स्वरस्वप्न” व्हायोलिन समुहाने आपले सादरीकरण केले. गुरू स्वप्ना दातार यांच्या सुश्राव्य निवेदनाखाली संपूर्ण शिष्यवर्गाने हा कार्यक्रम सादर केला. व्हायोलिनच्या समूह सादरीकरणाची सुरुवात “पंचतुंड नररुंड” या नांदीने झाली. त्यानंतर शिष्य समूहाने रागमाला, भूप, सूलताल, भीमपलास, किरवाणी, तुर्कीश मार्च सादरीकरण केले. यानंतर भक्तीसंगीत अभंगाच, देशभक्तिपर गीते, फोक संगीत प्रकार आणि शेवटी सूरत पिया या प्रसिद्ध गाण्याने सांगता केली. प्रेक्षक व्हायोलिनच्या संगीतात रममाण झाले होते.
व्हायोलिन समूह वादनात श्रेयस, मानस, आरोही, सानविका, अर्जुन, कार्तिकेय, वेधा, मनस्वी, मंजिरी, अनुराग, आर्या, रिओना, सिद्धी, मल्हार, ईशा, रिया, पार्थ, आशिष, दिवीज, तनिष्का यांचा सहभाग होता. तबला साथ मनोज देशमुख, रोशन चांदगुडे, पखवाज भागवत चव्हाण, ताल वाद्य शुभम शहा, ड्रम्स तुषार देशपांडे, कीबोर्ड तुषार दीक्षित आणि ध्वनी नियंत्रण नामदेव पानगरकर यांनी केले.
स्वर सागर महोत्सवाचे मुख्य संयोजक प्रवीण तुपे यांच्या मार्गदर्शनाखाली तानाजी थिगळे, हंबीर आवटे, श्रेयश आवटे, मृगेश नटराजन, गजानन शंकर चिंचवडे, पुरुषोत्तम डबीर, मोहन लोंढे, सुरेखा कुलकर्णी, अस्मिता सावंत, अनिल दराडे, सोनाली थोरवे, सुनील पोटे, शिरीष कुंभार यांनी कार्यक्रमाचे संयोजन केले
सूत्रसंचालन अभिजीत कोळपे यांनी केले.

पुणे -बंगलोर महामार्गावरील हॉटेल रिपल्स (Hotel Ripples) येथे खुलेआम हुक्का पार्लर (Hookah Parlour) तसेच दारुची विक्री केली जात असल्याचे आढळून आले. खंडणी विरोधी पथकाने दोघांवर कारवाई करुन ४१ हजारांचा माल जप्त केला आहे.

निलेश उद्धव कांबळे (वय ३४, रा. पाण्याच्या टाकीजवळ,वडगाव ), प्रमोद शांताराम खुटवड (वय २९, रा. हटवे, खु़ हतवे बु़) अशी गुन्हा दाखल झालेल्यांची नावे आहेत.याबाबत पोलीस हवालदार सुरेंद्र दिलीप जगदाळे यांनी सिंहगड रोड पोलीस ठाण्यात फिर्याद दिली आहे. आंबेगाव पोलीस ठाण्यातील अधिकारी व कर्मचारी बेकायदेशीर अवैध धंद्यांवर कारवाई करण्यासाठी पेट्रोलिंग करत होते. त्यावेळी पोलीस उपनिरीक्षक गौरव देव, सहायक पोलीस निरीक्षक प्रियंका गोरे यांना बातमीदारांमार्फत माहिती मिळाली की, रिपल्स हॉटेल येथे बेकायदेशीर रित्या हुक्का तसेच दारु विक्री केली जात आहे, असे कळविले. त्या माहितीनुसार पोलीस पथक तातडीने हॉटेल रिपल्स येथे गेले. हॉटेलमध्ये काही ग्राहक हुक्का ओढत होते. त्यांच्या टेबलवरच बियरच्या बाटल्या ठेवल्या होत्या. तेथील १७ हुक्का पॉट, हुक्का फ्लेवरचे डबे, बियरच्या बाटल्या असा ४१ हजार १०२ रुपयांचा माल पोलिसांनी जप्त केला आहे. सहायक पोलीस निरीक्षक प्रियंका गोरे अधिक तपास करीत आहेत.

पुणे: खडकवासला विधानसभा मतदारसंघातील २०२४ निवडणुकीसाठी निवडणूक आयोगाच्या RO (रिटर्निंग ऑफिसर) हँडबुकमध्ये नमूद असलेल्या मार्गदर्शक तत्त्वांचे अनुसरण करून निवडणूक निर्णय अधिकारी डॉ. यशवंत माने, तहसीलदार किरण सुरवसे आणि नायब तहसीलदार सचिन आखाडे यांच्या मार्गदर्शनाखाली विविध गटांसाठी विशेष मतदान केंद्रांची स्थापना करण्यात आली आहे. अशी माहिती मनुष्यबळ कक्षाचे नोडल अधिकारी सहा. आयुक्त विजय नायकल , सहा. महसूल अधिकारी प्रमोद भांड, साहीर सय्यद, धम्मदीप सातकर, भूमेश मसराम यांनी दिली. पुढे बोलतांना साहीर सय्यद म्हणाले की, या केंद्रांचे उद्दिष्ट म्हणजे प्रत्येक गटातील मतदारांसाठी सुलभ, सुरक्षित, आणि समावेशक वातावरणात मतदानाची सोय करणे. RO हँडबुकनुसार, या विशेष मतदान केंद्रांचे प्रकार आणि त्यांच्या गरजा लक्षात घेऊन त्यांचे नियोजन करण्यात आले आहे. या केंद्रांवर मतदार संख्या ठरवून ठेवण्यात आली असून, मतदारांना सुविधा मिळवून देण्यासाठी विविध उपाययोजना करण्यात आल्या आहेत.
विशेष मतदान केंद्रांचे प्रकार, मतदार संख्या, आणि त्यांची उद्दिष्टे पुढील प्रमाणे :

1. महिला (Pink) मतदान केंद्र: महिलांना सुरक्षित आणि आरामदायी वातावरणात मतदानाची सुविधा मिळावी यासाठी हे केंद्र फक्त महिलांसाठी बनवले गेले आहे. येथे महिला निवडणूक अधिकारी आणि कर्मचारी नियुक्त केले आहेत, ज्यामुळे महिला मतदारांचा सहभाग वाढेल.
   पत्ता: शिवसागर सोसायटी क्लब हाऊस हॉल क्र.१, वडगाव बु
   मतदार संख्या: ११०२
2. PWD मतदान केंद्र: दिव्यांग मतदारांसाठी आवश्यक सुविधा असलेल्या या केंद्रांवर रॅम्प, व्हीलचेअर, आणि मदतनीसांची सोय केली जाते. दिव्यांग मतदारांना सहजतेने मतदान करता यावे, हा या केंद्राचा मुख्य उद्देश आहे. येथे दिव्यांग कर्मचारी देखील असतात.
   पत्ता: नांदेड सोटी पब्लिक स्कूल, नांदेड सीटी
   मतदार संख्या: ७१८
3. युवा (Youth) मतदान केंद्र: युवा मतदारांचा अधिकाधिक सहभाग मिळवण्यासाठी आणि त्यांना प्रोत्साहन देण्यासाठी हे केंद्र तयार करण्यात आले आहे. त्यांना मतदान प्रक्रियेबद्दल जाणीव वाढवण्यास मदत करणे हे याचे मुख्य उद्दिष्ट आहे.
   पत्ता: जिल्हा परिषद प्राथमिक शाळा, बहुली
   मतदार संख्या: ७३३
4. Unique मतदान केंद्र: RO हँडबुकनुसार, विशिष्ट स्थानिक वैशिष्ट्ये जपण्यासाठी unique मतदान केंद्र स्थापन करण्यात आले आहे. यामुळे मतदारांना त्यांच्या स्थानिक संस्कृतीचा अनुभव घेता येतो.
   पत्ता: जिल्हा परिषद प्राथमिक शाळा, डोणजे
   मतदार संख्या: १४८६
5. Pardanashin मतदान केंद्र: पारंपारिक संस्कृती पाळणाऱ्या महिलांसाठी हे विशेष केंद्र त्यांना गोपनीय आणि सुरक्षित वातावरणात मतदान करण्याची सुविधा देते.
   पत्ता: जिल्हा परिषद प्राथमिक शाळा, कोंढवे धावडे
   मतदार संख्या: १४१४
6. आदर्श (Model) मतदान केंद्र: RO हँडबुकनुसार, आदर्श मतदान केंद्र म्हणजे सुशोभित व सुव्यवस्थित केंद्र, ज्यामुळे मतदारांना सकारात्मक अनुभव मिळतो. हे केंद्र प्रामुख्याने आधुनिक तंत्रज्ञान आणि पूर्ण सुविधांनी सुसज्ज असते.
   पत्ता: सनसिटी पुणे सन.१०, वडगाव बु कम्युनिटी हॉल
   मतदार संख्या: १२८०
7. निगेटिव्ह मतदान केंद्र: संवेदनशील भागांमध्ये असलेल्या केंद्रांसाठी निगेटिव्ह मतदान केंद्रांची संकल्पना आहे. या केंद्रांवर विशेष सुरक्षा आणि अतिरिक्त सुविधा पुरवून मतदारांचा सहभाग सुरक्षित पद्धतीने वाढवण्याचा प्रयत्न केला जातो.
   पत्ता/मतदार संख्या: निरंक म्हणजे खडकवासला मतदार संघात एकही संवेदनशील मतदार केंद्र नाही.
   RO हँडबुकनुसार घेतलेले विशेष निर्णय
   RO हँडबुकनुसार, या विशेष मतदान केंद्रांच्या स्थापनेने निवडणूक प्रक्रियेत सहभागी होण्यास अधिकाधिक मतदारांना प्रोत्साहन मिळते असे डॉ. माने म्हणाले . विविध प्रकारच्या मतदारांना त्यांच्या गरजेनुसार मतदानाची सुविधा उपलब्ध करून देण्याचे उद्दिष्ट असल्याने या विशेष केंद्रांची स्थापना महत्त्वपूर्ण ठरते.

पुणे: महाराष्ट्र विधानसभा निवडणूक २०२४ शांतता, पारदर्शकता, आणि यशस्वितेसह पार पाडण्यासाठी खडकवासला विधानसभा मतदारसंघात विविध पातळ्यांवर तयारी केली जात आहे. याचाच एक भाग म्हणून SST (स्टॅटिक सर्व्हेलेन्स टीम), FST (फ्लाइंग स्क्वॉड टीम), आणि VVT (व्हिडिओ व्हिजिलन्स टीम) यांच्या व्हिडिओग्राफर्ससाठी निवडणूक कार्यालयात विशेष प्रशिक्षण सत्राचे आयोजन करण्यात आले होते. निवडणूक निर्णय अधिकारी डॉ. यशवंत माने, किरण सुरवसे, आणि सचिन आखाडे यांच्या मार्गदर्शनाखाली हे प्रशिक्षण यशस्वीरीत्या पार पडले.
या प्रशिक्षण सत्राचे व्यवस्थापन प्रा. तुषार राणे आणि प्रा. माधुरी माने यांनी केले, ज्यांनी टीमच्या सदस्यांना विविध तांत्रिक आणि प्रक्रियात्मक बाबींमध्ये कौशल्य मिळवून दिले. व्हिडिओग्राफर्सना निवडणूक प्रक्रियेत अधिक सजगता, सतर्कता, आणि अचूकता ठेवून काम करण्याचे महत्त्व समजावले गेले. निवडणूक प्रक्रियेत प्रत्येक टप्प्याचे योग्य व्हिडिओ दस्तऐवजीकरण राखण्यासाठी आवश्यक तंत्रज्ञानाचा वापर, तसेच संभाव्य समस्यांचे निराकरण कसे करावे याचे विशेष मार्गदर्शन देण्यात आले.
प्रशिक्षणात शिकवलेल्या प्रमुख बाबी
प्रशिक्षणामध्ये व्हिडिओ रेकॉर्डिंगचे नियम, निवडणूक आयोगाच्या मार्गदर्शक तत्त्वांचे पालन, तसेच विविध उपकरणांचा योग्य वापर यांवर विशेष लक्ष देण्यात आले. निवडणूक प्रक्रियेदरम्यान मतदार केंद्रांवरील अनुशासन, तसेच मतदानाची पारदर्शकता आणि सुरक्षितता सुनिश्चित करण्यासाठी आवश्यक असणाऱ्या व्हिडिओ रेकॉर्डिंगच्या पद्धती याविषयी माहिती देण्यात आली. या प्रक्रियेत स्टॅटिक सर्व्हेलेन्स टीम (SST) स्थिर देखरेख करणार, फ्लाइंग स्क्वॉड टीम (FST) तातडीने प्रतिसाद देईल, तर व्हिडिओ व्हिजिलन्स टीम (VVT) निवडणुकीच्या प्रक्रियेचे दस्तऐवजीकरण करेल.
निवडणुकीसाठी समर्पित आणि प्रशिक्षित टीम
या प्रशिक्षणामुळे खडकवासला विधानसभा मतदारसंघात निवडणुकीच्या तयारीत एक नवा आत्मविश्वास निर्माण झाला आहे. प्रशिक्षित व्हिडिओग्राफर्सनी निवडणूक प्रक्रियेच्या प्रत्येक टप्प्यावर आवश्यक असणारी सजगता आणि जबाबदारी समजून घेतली आहे. या टीमच्या कार्यक्षमतेमुळे खडकवासला मतदारसंघातील निवडणूक प्रक्रिया सुरक्षित, पारदर्शक, आणि निर्भय वातावरणात पार पडणार आहे, असा विश्वास निवडणूक अधिकाऱ्यांनी व्यक्त केला आहे.

शिरोळे यांच्या प्रचारार्थ आयोजित महिला मेळाव्याला जोरदार प्रतिसाद

पुणे, दि. ७ नोव्हेंबर, २०२४ : राजकारणात संस्कारी असणाऱ्यांची, महिलांची प्रतिष्ठा राखणाऱ्यांची सर्वाधिक आवश्यकता आहे. सिद्धार्थ शिरोळे राजकारणातील संस्कारी चेहरा आहेत, असे कौतुकोद्गार भारतीय जनता पक्षाच्या नेत्या पंकजा मुंडे यांनी काढले. छत्रपती शिवाजीनगर मतदार संघाचे महायुतीचे अधिकृत उमेदवार सिद्धार्थ शिरोळे यांच्या प्रचारार्थ शिवाजीनगर गावठाण येथे आयोजित करण्यात आलेल्या महिला मेळाव्यात मुंडे बोलत होत्या.

श्री रोकडोबा देवस्थान सभागृह परिसरात आयोजित करण्यात आलेल्या या मेळाव्यासाठी सुजाता सिद्धार्थ शिरोळे, पक्षाच्या प्रदेशसचिव अॅड.  वर्षा डहाळे, महिला मोर्चा पुणे शहर अध्यक्षा हर्षदा फरांदे, निवेदिता एकबोटे, शिवाजीनगर महिला आघाडी अध्यक्ष अपर्णा कुऱ्हाडे, राष्ट्रवादी कॉंग्रेस (अजित पवार गट) पक्षाच्या लावण्या शिंदे, माजी नगरसेविका स्वाती लोखंडे, महिला आघाडी शहर सरचिटणीस भावना शेळके, अपर्णा कुऱ्हाडे, लता धायगुडे, शारदा पुनावळे, श्रद्धा शिंदे, अर्चना मुसळे उपस्थित होत्या  

मला लाखोंच्या सभेपुढे बोलताना कायमच झाशीच्या राणीचे रूप घ्यावे लागते आज शिवाजीनगर येथे होत असलेल्या या मेळाव्यात मला बोलण्यातला गोडवा, सहजता आणि बहिणींशी गप्पा मारल्याचे सुख अनुभविता आले, याचा आनंद पंकजा मुंडे यांनी व्यक्त केला.      

आपले वडील गोपीनाथ मुंडे यांचा सिद्धार्थ शिरोळे यांचे वडील अनिल शिरोळे यांसोबत असलेला ऋणानुबंध आणि मैत्रीचे नाते याच्या अनेक आठवणी पंकजा यांनी जागविल्या. यावेळी बोलताना मुंडे म्हणाल्या, “जेव्हा पंतप्रधान नरेंद्र मोदी यांनी पहिल्यांदा पंतप्रधान पदाची शपथ घेतली तेव्हा घरोघरी शौचालय ही योजना जाहीर केली. भारतीय जनता पक्ष हा स्त्रियांचा सन्मान करणारा पक्ष असून याच पक्ष शिस्तीत सिद्धार्थ यांची जडणघडण झाली आहे. शिवाजीनगर मतदार संघात त्यांना दुसऱ्यांदा देण्यात आलेली संधी हे त्यातेच द्योतक असून त्यांच्या विजयासाठी महिलांनी पुढे सरसवा.”        

आजवर स्त्रीने खूप चटके सहन केले असून एका स्त्रीसाठीच रामायण महाभारत घडले आहे. आजच्या कलयुगातही स्त्रीचा हा लढा संपला नसून आज तिची परिस्थिती अधिक बिकट झाली आहे. स्त्रीयांची ही परिस्थिती सुधारण्यासाठी राज्य सरकारने आणलेली ‘लाडकी बहिण’ योजना ही खऱ्या अर्थाने स्त्रियांचे सक्षमीकरण करणारी योजना आहे, असेही मुंडे यांनी नमूद केले.  

या आधी सिद्धार्थ शिरोळे यांच्या प्रचारार्थ मतदार संघातील विविध भागात पदयात्रेचे आयोजन करण्यात आले होते. यामध्ये गोखलेनगर, कपिला सोसायटी, मंगलवाडी, रामोशी वाडी, चाफेकर पुतळा, वाकडेवाडी, शिवाजीनगर रेल्वे स्थानक, भैय्यावाडी या ठिकाणी सर्व स्तरातील, वयोगटातील नागरिकांच्या भेटी शिरोळे यांनी घेतल्या. या भेटीदरम्यान वयोवृद्ध नागरीकांनी शिरोळे यांना आशीर्वाद दिले तर लहानग्यांना त्यांच्यासोबत सेल्फी काढण्याचा मोह आवरता आला नाही. शिरोळे यांनीही या मुलांचा हट्ट पुरविला.

पुणे- कल्याणीनगर पोर्शे अपघात प्रकरणात कारमध्ये मागे बसलेल्या एका अल्पवयीन मुलाचे रक्ताचे नमुने बदलल्याप्रकरणी दाखल असलेल्या गुन्ह्यात उच्च आणि सर्वोच्च न्यायालयाने अटकपूर्व जामीन फेटाळल्यानंतर अखेर आरोपी पुणे जिल्हा सत्र न्यायालयात शरण आला आहे. याप्रकरणी न्यायालयाने त्यांची न्यायालयीन कोठडीत रवानगी केली आहे.
अरुणकुमार देवनाथ सिंग असे त्याचे नाव आहे. कारचालक मुलाच्या दोन अल्पवयीन मित्रांना वाचविण्यासाठी या गुन्ह्यात यापूर्वी अटक करण्यात आलेले आरोपी यांनी ससूनच्या आपत्कालीन विभागाचा तत्कालीन मुख्य वैद्यकीय अधिकारी डॉ. श्रीहरी हाळनोर व न्यायवैद्यक विभागाचे प्रमुख डॉ. अजय तावरे यांना लाच दिली. त्यानंतर एका आरोपीने एका मुलाच्या रक्ताच्या नमुन्यांच्या जागी स्वतःच्या रक्ताचा नमुना दिला, तर आशिष नावाच्या आरोपीने अरुणकुमार सिंग याच्या सांगण्यावरून दुसऱ्या मुलाच्या जागी स्वतःचे रक्त दिल्याचे पोलिसांच्या तपासात उघड झाले होते. या प्रकरणी गुन्हा दाखल झाल्यानंतर सिंग याने येथील जिल्हा न्यायालयात जामिनासाठी अर्ज केला होता. मात्र, न्यायालयाने तो फेटाळला होता. त्यामुळे त्याने उच्च न्यायालयात अपील केले होते. सुरुवातीला त्याला अंतरिम जामीन मंजूर केला होता. मात्र, आता न्यायालयाने त्याचा जामीन दि. 23 ऑक्टोबरला फेटाळून लावला होता. मात्र उच्च न्यायालयाने दिलेल्या आदेशाविरोधात सिंग याने सर्वोच्च न्यायालयाचा दरवाजा ठोठवला होता. मात्र सर्वोच्च न्यायालयाने सिंग याला कोणत्याही प्रकारचा दिलासा न देता रक्त बदलण्याच्या प्रक्रियेत सक्रिय सहभाग दिसत असल्याने जामीन फेटाळून लावला. त्यामुळे आपली अटक निश्चितच असल्याचे मानले जात असतान अरूणकुमारने अधिकच्या पळवाटा न काढता तो स्वतःहून न्यायालयात शरण आला.