पुणे, ७ नोव्हेंबर २०२४
वडगाव शेरीच्या उज्ज्वल भविष्यासाठी परिसराचा सुरक्षित, स्वच्छ आणि समृद्ध विकास हे ध्येय समोर ठेवत बहुजन समाज पक्षाचे उमेदवार डॉ.हुलगेश चलवादी मतदारांना सर्वकर्षी विकासाची ‘गॅरंटी’ देत आहेत. डॉ.चलवादींच्या हमींची त्यामुळे सर्वत्र चर्चा रंगली असून घरोघरी, गल्लीबोळासह चौकाचौकात ‘भैय्यांच्या गॅरंटी’चे आश्वासक वारे वाहत असल्याचे दिसून येत आहे. मतदार संघातील प्रत्येक नागरिकानीं सुखी जीवन जगावे, त्यांच्या कुटुंबाचे संरक्षण व्हावे, त्यांच्या मुलांना दर्जेदार शिक्षण मिळावे, त्यांना रोजगाराच्या संधी उपलब्ध व्हाव्यात, यासाठी ‘लाडका भैय्या’ या नात्याने मतदार बंधू-भगिनींसमक्ष एक निश्चित विकासाचा कृती आराखडा डॉ.चलवादी यांनी ठेवला आहे.
गुन्हेगारीमुक्त आणि सुरक्षित वडगाव शेरी ही पहिली हमी चलवादी यांनी दिली आहे.पिण्याच्या पाण्याचे योग्य नियोजन,टॅंकरमुक्त आणि टॅंकरमाफियामुक्त परिसर आणि नागरिकांना २४ तास पाणीपुरवठा करण्याची दुसरी हमी डॉ.चलवादी मतदारांना देत आहेत.अंमली पदार्थाच्या विळख्यातून वडगाव शेरीची मुक्तता करणे आणि व्यसनाधीन तरुणांना पुनर्वसनाच्या मदतीने योग्य मार्गावर आणणे, मतदारसंघात उत्तम दर्जाचे शैक्षणिक उपक्रम आणणे, तरुणांना रोजगार मिळावून देण्यासाठी केंद्र, राज्य, आणि महानगरपालिकेच्या योजनांची प्रभावी अंमलबजावणी करण्याची हमी सुद्धा डॉ.चलवादींकडून दिली जात आहे.
झोपडपट्टीवासींचे त्यांच्या मूळ जागेवर पुनर्वसन, एसआरए कायद्यात आवश्यक त्या सुधारणा आणि प्रत्येक गरजू कुटुंबाला किमान ५०० चौरस फुटाचे घर उपलब्ध करून देण्याची योजना आहे. शिवाय वाहतूक व्यवस्थापन आणि वाहतूक कोंडीमुक्त मतदारसंघासाठी योग्य वाहतुकीचे नियोजन करून शिस्तबद्ध व्यवस्था उभारली जाईल. नैसर्गिक नाल्यांच्या काठांचे सौंदर्यीकरण करीत जॉंगिंग ट्रॅक उभारण्याची योजना,सातत्याने उद्भवणाऱ्या पूरस्थितीवर कायमस्वरूपी तोडगा काढण्याची योजना तसेच महिला आत्मनिर्भर करणे,वयोवृद्ध आणि महिलांना शासकीय योजनांचा लाभ मिळवून देण्यासाठी प्रयत्न करण्याची ‘हमी’ डॉ.चलवादींकडून दिली जात आहे.
आपल्या प्रत्येकासाठी या सर्व सुविधा उपलब्ध करून देणे, हे आमचे ध्येय आहे. वडगाव शेरीचा संपूर्ण विकास होण्यासोबतच इथे राहणाऱ्या प्रत्येक नागरिकाला आनंदी जीवन मिळावे, हीच आमची इच्छा आहे. आपण आम्हाला साथ दिल्यास, एकत्र येऊन आपण वडगाव शेरीचे भविष्य उज्ज्वल करू शकतो. मतदारांचा विश्वासच आम्हची ताकद असल्याची भावना डॉ.चलवादी यांनी व्यक्त केली. वडगाव शेरीचा समृद्ध आणि सुंदर विकास हीच आमची प्रेरणा आहे. आपल्या प्रत्येकाला सुरक्षित, स्वच्छ, आणि सुखी समाज मिळावा, यासाठी सदैव प्रयत्नरत आहे. जनतेच्या विश्वासाने आम्हाला ताकद मिळेल, वडगाव शेरीच्या उभारणीसाठी आवश्यक आधार मिळेल.हे फक्त एक वचन नाही, तर वडगाव शेरीच्या भावी पिढीसाठी आमचे स्वप्न असल्याची भावना त्यांनी व्यक्त केली.
