पुणे:गरीब कुटुंबातून पुढे आलेले माजी गृह राज्यमंत्री रमेश बागवे हे कधी आपली जन्मभूमी, वस्ती आणि झोपडपट्टी भागाला विसरले नाहीत. विलासराव देशमुख मुख्यमंत्री असताना बागवे यांनी झोपडपट्टीवासीयांचे पुनर्वसन करून त्यांना हक्काचे घर मिळवून दिले. झोपडीतून हक्काच्या घरात नेले. गरिबांना हक्काचा निवारा दिला, अशा शब्दांत माजी राज्यमंत्री व ज्येष्ठ नेते बाळासाहेब शिवरकर यांनी रमेश बागवे यांच्या कामाबद्दल मंगळवारी गौरवोद्वगार काढले.

रमेश बागवे यांना प्रशासकीय आणि विधानसभेच्या कामाचा अनुभव, तसेच विकासाची दूरदृष्टी आहे. त्यांना कँटोन्मेंटच्या प्रश्नांची जाण आहे. कँटोन्मेंट बोर्डाची निवडणूक झाली नसल्याने येथील विकास खुंटला आहे. बागवे विजयी झाल्यास ते कँटोन्मेंटचे महापालिकेत त्वरित विलीनीकरण करून घेतील. आजची राजकीय , धार्मिक परिस्थिती पाहता, सामाजिक ऐक्य आणि विकासासाठी मतदारांनी रमेश बागवे यांनाच निवडून द्यावे, अशी कळकळीची विनंती मी करतो. कँटोन्मेंट विधानसभा मतदारसंघाचा सर्वांगीण विकास, तसेच या भागातील धार्मिक व सामाजिक ऐक्य जपण्यासाठी बागवे यांना विजयी करणे आवश्यक आहे, असे आवाहन त्यांनी केले.
पुणे कँटोन्मेंट विधानसभा मतदारसंघातील महाविकास आघाडी, इंडिया फ्रंट व मित्रपक्षांचे काँग्रेसचे उमेदवार रमेश बागवे यांची पदयात्रा मंगळवारी उत्साहात पार पडली. यानिमित्त शिवरकर यांनी मतदारांना बागवे यांना भरघोस मतदान करण्याचे आवाहन केले. रमेश बागवे गरीब कुटुंबातून पुढे आलेले सामाजिक व राजकीय कार्यकर्ते आहेत. महापालिकेत नगरसेवक म्हणून त्यांनी ठसा निर्माण केला. सामान्य माणूस आणि झोपडवासीयांच्या पाणी, वीज, रस्ते, स्वच्छतागृहे, शाळा, आरोग्य या गरजा पूर्ण करून त्यांनी विविध सोयी-सुविधा निर्माण केल्या. कँटोन्मेंट विधानसभा मतदारसंघात विकासकामे केली. कँटोन्मेंटआधी पर्वती मतदारसंघातून निवडून आले, तेव्हा त्या भागाचाही मोठा विकास त्यांनी घडवला, अशी प्रशंसा शिवरकर यांनी केली.
कँटोन्मेंटमध्ये सर्व समाजाचे लोक राहतात. बागवे यांनी सर्वधर्मसमभाव, सामाजिक ऐक्य आणि सामाजिक न्याय हा काँग्रेसचा विचार येथे रुजवून सामाजिक सलोखा वाढवला, असे सांगून शिवरकर यांनी बागवे यांना मोठ्या मताधिक्याने विजयी करण्याचे आवाहन मतदारांना केले.
दादापीर दर्गा येथे चादर चढवून, तसेच भवानीमाता मंदिर आणि बालाजी मंदिर येथे दर्शन व आशीर्वाद घेऊन बागवे यांची पदयात्रा मंगळवारी निघाली. बनकर तालीम, सरस्वती सोसायटी, दुल्हा-दुल्हन कब्रस्तान, जिज्ञासा एसआरए वसाहत, पत्र्याची चाळ, राजेवाडी झोपडपट्टी, पवार वाडा, इस्लामपुरा आणि नाना पेठ या भागांत कार्यकर्त्यांच्या गर्दीत पदयात्रा पार पडली. पेढे वाटून आणि फटाके फोडून स्थानिक कार्यकर्त्यांनी बागवे यांचे स्वागत केले. ‘कँटोन्मेंटचा विकास म्हणजे रमेशदादा’ अशा घोषणेने परिसर दणाणून गेला. महिलांनी रमेशदादा यांचे औक्षण करून त्यांना विजयाचा विश्वास दिला. बागवे यांनी फळविक्रेते, रिक्षाचालक, दुकानदार, व्यापारी, स्थानिक मंडळांचे कार्यकर्ते, स्वच्छता कर्मचारी, महिला, तरुण आणि ज्येष्ठ नागरिकांशी, तसेच मुस्लिम समाजाशी संवाद साधून कँटोन्मेंटच्या विकासाचे वचन दिले. काँग्रेसचे शहराध्यक्ष अरविंद शिंदे, शिवसेना उद्धव बाळासाहेब ठाकरे पक्षाचे डॉ. अमोल देवळेकर, तसेच माजी नगरसेवक अविनाश बागवे, रफिक शेख, उस्मान तांबोळी, चेतन अग्रवाल, बाशूभाई शेख, सुनील घाडगे, बुधाजी मोरे, संजय सोनवणे, गौतम कांबळे, अक्षय अवचिते, विठ्ठल थोरात, अमजद शेख यांच्यासह महाविकास आघाडीतील काँग्रेस, राष्ट्रवादी काँग्रेस शरदचंद्र पवार पक्ष, शिवसेना उद्धव बाळासाहेब ठाकरे पक्ष, आप यांचे पदाधिकारी आणि कार्यकर्ते पदयात्रेत सहभागी झाले होते.

पुणे : आंबील ओढा परिसरासह, पर्वती विधानसभा मतदारसंघातील नाल्यांच्या बाजूला असलेल्या रहिवासी वस्तीतील पूरस्थिती रोखण्यासाठी वेळोवेळी शासनाकडे पाठपुरावा करून २०० कोटींचा निधी आणला आहे. तसेच, केंद्रशासनाने शहरात पावसाळयात उद्भवणारी स्थिती लक्षात घेऊन शहरीपूर व्यवस्थापनासाठी महापालिकेस ३५० कोटींचा निधी दिला जाणार असून या निधीतूनही मतदारसंघात विकासकामे केली जाणार असल्याची माहिती आमदार माधूरी मिसाळ यांनी दिली. मिसाळ यांच्या प्रचारार्थ बिववेवाडी परिसरात प्रचारफेरी काढण्यात आली होती. यावेळी या भागातील नागरिकांशी संवाद साधला. वर्षा साठे, रूपाली धाडवे, भीमराव साठे, पिंटू धाडवे, मीनानाथ पराडकर, महेश कुंभार, राखी शिंदे , महेश कुंभार, संतोष नांगरे, अविनाश खेडेकर, विनीत पिंगळे यांच्यासह महायुतीचे पदाधिकारी तसेच कार्यकर्ते यावेळी मोठया संख्येने उपस्थित होते.

मिसाळ म्हणाल्या की, पाच वर्षांपूर्वी कमी वेळामध्ये जास्त पाऊस झाल्याने आंबील ओढ्याला पूर आला होता. या परिस्थितीमुळे आंबील ओढा सहकार नगर अरण्येश्वर कात्रज धनकवडी दांडेकर पुलासहित अन्य भागातील जलवाहिन्या आणि ड्रेनेज लाईन खराब झाल्या.सोसायटीलगतच्या सीमा भिंती या पडल्या. या ठिकाणी तात्पुरती कामे करण्यात आली होती. मात्र, आंबील ओढयाला सिमाभिंत बांधणे गरजेचे होते, तर, खासगी सोसायटयांमध्ये शासनाच्या निधीतून कामे होत नसल्याने अडचण होती. या भिंती बांधून देण्याची मागणी नागरिक करीत होते. बांधकाम आराखड्यानुसार सोसाय त्यांनी सीमा भिंती बांधल्या होत्या मात्र आपत्ती त्या पडल्याने बांधून देण्याची जबाबदारी महापालिका आणि सरकारची असल्याची भूमिका मांडली होती मात्र तशी तरतूद नसली तरी विशेष बाब म्हणून सोसायटी आणि भोवतीच्या भिंती बांधण्यासाठी सकारात्मक निर्णय घ्यावा अशी मागणी केली होती. त्यानुसार राज्य शासनाने २०० कोटींचा निधी उपलब्ध करून दिला आहे.

कमी काळात अधिक पाऊस झाल्याने आंबील ओढा परिसरात झालेली मनुष्यहानी व वित्त हानी आपण अनुभवली. महायुती सरकारने २०० कोटी रुपयांचा निधी दिल्याने सीमाभिंतींचे काम करता येईल. या कामामुळे कमी वेळेत अधिक पाऊस झाल्यास वित्त आणि जिवितहानी टाळण्यास मदत होणार आहे.- माधुरी मिसाळ ( महायुती उमेदवार )

या ठिकाणी होणार कामे
– निर्मल पार्क ते बागूल उद्यान सीमाभिंत पाच कोटी

• पश्चिमनगर ते सेंट झेविअर्स शाळा सीमाभिंत तीन कोटी
• खोराडा वस्ती सिंहगड रस्ता सीमाभिंत तीन कोटी
• गजानन महाराज मठामागील बाजूस सीमाभिंत तीन कोटी
• विठ्ठलनगर सिंहगड रस्ता परिसरात सीमाभिंत पाच कोटी
• मंदार सोसायटी ते चंद्रशेखर मार्ग सीमाभिंत तीन कोटी
• सावित्रीबाई नगर सिंहगडरस्ता सिमाभिंत दोन कोटी
• ईएसआयसी हॉस्पिटल ते तिरंगा हॉटेल सीमाभिंत दोन कोटी
• कटारिया हायस्कूल ते कॅनॉल सीमाभिंत पाच कोटी
• मार्केट यार्ड, मुकुंदनगर, महर्षीनगर सीमाभिंत दोन कोटी
• हिंगणे परिसर ओढ्यालगत सीमाभिंत दोन कोटी
• गुरुराज सोसायटी सीमाभिंत पाच कोटी
• के.के. मार्केट ते गुरुराज सोसायटी बिबवेवाडी उर्वरित भागात सीमाभिंत पाच कोटी

पुणे: विमाननगर आज प्रबळ विकासाचा नारा घेऊन बापूसाहेब पठारे यांच्या नेतृत्वाखाली भव्य पदयात्रा संपन्न झाली. या पदयात्रेत महाविकास आघाडीचे प्रमुख पदाधिकारी उपस्थित होते, तसेच स्थानिक नागरिकांनी मोठ्या संख्येने सहभागी होत त्यांच्यावर विश्वास व्यक्त केला. परिसराच्या सर्वांगीण विकासासाठी कटिबद्ध असलेल्या पठारे यांनी मतदारांना रोजगाराच्या संधी, मूलभूत सोयीसुविधा, शिक्षण आणि आरोग्याच्या क्षेत्रात प्रगतीचे आश्वासन दिले.

ही पदयात्रा गणपती चौक, यमुना नगर, दत्त मंदिर चौक, म्हाडा कॉलनी, गंगा पुरम सोसायटी, संजय पार्क सोसायटी, विमान दर्शन अशा विविध मार्गांवरून निघाली, आणि या मार्गावर नागरिकांचा चांगला प्रतिसाद मिळाला. पदयात्रेदरम्यान ठिकठिकाणी बापूसाहेब पठारे यांचे नागरिकांनी हार-फुलांनी स्वागत केले.

बापूसाहेब पठारे यांच्या नेतृत्वाखालील या पदयात्रेचा उद्देश म्हणजे विमाननगर भागात विकासाचे एक नवे पर्व सुरू करणे आहे. प्रत्येक नागरिकाला प्रगतीचा भागीदार बनवण्याचे आश्वासन पठारे यांनी दिले. ते म्हणाले, “माझा एकच संकल्प आहे – सर्वांगीण विकास. मेट्रोचा विस्तार जगद्गुरू संत तुकाराम महाराज आंतरराष्ट्रीय विमानतळापर्यंत करण्याचा माझा संकल्प आहे. त्यामुळे वाहतूक सुरळीत होईल. मी तुम्हाला दिलेल्या आश्वासनांचा मान राखीन.”

पदयात्रेच्या दरम्यान, बापूसाहेब पठारे यांनी नागरिकांचे थेट संवाद साधत त्यांच्या अडचणी आणि अपेक्षा जाणून घेतल्या. त्यांनी गावात स्वच्छता, पाण्याचा योग्य पुरवठा, चांगले रस्ते, महिलांसाठी सुरक्षा, तसेच तरुणांना रोजगाराच्या संधी उपलब्ध करून देण्याचे आश्वासन दिले. त्यांचे प्रमुख उद्दीष्ट आहे विकासाला गती देणे आणि स्थानिकांना एक उत्कृष्ट जीवनमान उपलब्ध करणे.

पुणे: विधानसभा निवडुकीची रणधुमाळी अखेरच्या टप्प्यात येत आहे. हडपसरमध्ये प्रतिस्पर्धी उमेदवारांना प्रचारात मागे सोडत प्रशांत जगताप यांनी मोठी आघाडी घेतली आहे. मतदारसंघातील घरोघरी जात मतदारांचा पाठिंबा मिळवण्यात जगताप यशस्वी ठरले आहेत. त्यामुळेच हडपसरमध्ये ‘लहान-थोरांचा एकच निर्धार, यंदा प्रशांत जगताप हेच आमदार’ असे चित्र पाहायला मिळत आहे. असा दावा जगताप समर्थक करत आहेत.

हडपसर विधानसभा मतदारसंघातील महाविकास आघाडीचे अधिकृत उमेदवार प्रशांत जगताप यांनी मंगळवारी मॉर्निंग वॉक करीत प्रचाराची सुरुवात केली. कात्रज उद्यान व तलावाजवळ नागरिकांसोबत संवाद साधला. नागरिकांच्या समस्या समजून घेतल्या. विद्यमान आमदार नागरिकांना मुबलक पाणी, चांगले रस्ते, ड्रेनेज, प्रदूषणमुक्त वातावरण, ट्रॅफिकमुक्त वाहतूक देण्यात सपशेल अपयशी ठरले आहेत, अशी भावना सर्वांनीच व्यक्त केली. हीच परिस्थिती आपल्याला बदलायची आहे. त्यासाठी परिवर्तन घडवून प्रशांत जगताप यांना विजयी करायचे आहे, असे शिवसेनेचे नेते वसंत मोरे यांनी सांगितले.

कात्रज, कोंढवा, हांडेवाडी, सय्यदनगर परिसरात नागरिकांच्या घरी जाऊन गाठीभेटी घेतल्या. स्थानिक पदाधिकारी, कार्यकर्त्यांच्या निवासस्थानी भेटी दिल्या. या दरम्यान अनेक कार्यकर्त्यांनी जगताप यांना आपला पाठिंबा जाहीर केला. कोंढव्यातील सामाजिक कार्यकर्ते कार्यकर्ते मोहसीनभाई शेख यांनी खासदार सुप्रिया सुळे यांच्या उपस्थितीत राष्ट्रवादी काँग्रेस पार्टी शरदचंद्र पवार पक्षात प्रवेश केला. समाजातील युवकांची ताकद जगताप यांना देण्याचा निर्धार त्यांनी केला.

प्रशांत जगताप म्हणाले, “महायुतीच्या नेत्यांकडून वारंवार महापुरुषांचा अपमान केला जातो. जनतेच्या समस्या सोडवण्यापेक्षा घोषणांचा पाऊस पडून लोकांची दिशाभूल करण्याचे काम हे लोक करताहेत. महाराष्ट्राशी गद्दारी करून शिवसेना व राष्ट्रवादीतून भारतीय जनता पार्टीच्या वळचणीला जाऊन बसलेल्यांना आपल्याला धडा शिकवायचा आहे. हडपसरच्या विकासाची दिशा घेऊन या निवडणुकीला सामोरे जात आहे. शरद पवार यांच्यासारखा जाणता राजा आपल्यासोबत आहे. तेव्हा महाराष्ट्राच्या आणि मतदारसंघाच्या विकासासाठी तुतारी वाजवणारा माणूस चिन्हासमोरील बटन दाबून मला निवडून द्यावे.”

जाणीव संघटना प्रणीत हातगाडी, फेरीपथारी, स्टॉलधारक संघटनेने दिला जाहीर पाठिंबा

पुणे दि. 12 – जाणीव संघटना प्रणीत हातगाडी, फेरीपथारी, स्टॉलधारक संघटनेने कसबा विधानसभा मतदारसंघातील महाविकास आघाडी, इंडिया फ्रंट आणि मित्रपक्षांचे उमेदवार रवींद्र धंगेकर यांना जाहीर पाठिंबा दिला.
या संघटनेने गेल्या निवडणुकीतही धंगेकर यांना पाठिंबा दिला होता. याही वेळी फेरीवाले, पथारीवाले आणि स्टॉलधारक यांनी धंगेकर यांच्या पाठीशी उभे राहण्याचा निर्णय घोषित केला आहे. धंगेकर यांनी पथविक्रेता योजना-२०२४ अमलात आणावी, पथविक्रेता, धोरण, पथविक्रेता कायदा आणि पथविक्रेता योजना निश्चित करून त्याची अंमलबजावणी करावी, अशी मागणी या संघटनेने केली असून, हे काम धंगेकर निश्चितपणे करतील, असा विश्वास व्यक्त करीत त्यांच्या पाठीशी उभे राहण्याचा निर्णय या संघटनेने घेतला आहे. संघटनेतर्फे अध्यक्ष श्वेता ओतारी, उपाध्यक्ष कैलास बोरणे, विभागीय अध्यक्ष विनायक दहीभाते, विभागप्रमुख अभिजित हत्ते, विभागप्रमुख संदीप यादव, विभागप्रमुख परवेज अन्सारी यांच्या स्वाक्षरीने हे पाठिंब्याचे पत्रक धंगेकर यांना देण्यात आले.

पुण्यातील पथारीवाले, हातगाडीवाले आणि स्टॉलधारक यांच्या समस्यांची आपल्याला जाणीव असून, त्यासंदर्भात आपण निश्चितपणे महाराष्ट्र विधानसभेत आवाज उठवू आणि त्यांच्या मागण्यांचा पाठपुरावा करू, तसेच त्यांच्यासंदर्भातील धोरण अंमलबजावणीचेही प्रयत्न निश्चितपणे करू, अशी ग्वाही धंगेकर यांनी यावेळी दिली. आज धंगेकर यांनी लक्ष्मी रस्ता व परिसरातील हातगाडी, फेरीपथारी, स्ट़ॉलधारक यांची भेट घेतली. तसेच संपूर्ण मार्गावरील विविध व्यापाऱ्यांची भेट घेऊन त्यांच्याही समस्यांबाबत चर्चा केली. यावेळी हातगाडी, फेरीपथारी व स्टॉलधारक, तसेच व्यापारी यांनी गेल्या दीड वर्षात धंगेकर यांनी त्यांचे अनेक प्रश्न सोडविल्याबद्दल धन्यवाद दिले व पुढील पाच वर्षे आमचे सर्व प्रश्न शंभर टक्के सुटतील, असा धंगेवकरांवर विश्वास व्यक्त केला.
दरम्यान, काल धंगेकर यांनी खडक माळ आळी, सिंहगड गॅरेज, कैकाड आळी,मीरा मार्केट, घोरपडे पेठ, पीएमसी कॉलनी, मोमीनपुरा, देवळाची तालीम, मासे आळी, गंजपेठ, समता भूमी, टिंबर मार्केट, जानाई मळा, आदि भागातून पदयात्रा काढली. या पदयात्रेला महाविकास आघाडी, इंडिया फ्रंट आणि मित्रपक्षांचे सर्व कार्यकर्ते उपस्थित होते. यावेळी जेष्ठ नेते उल्हासदादा पवार, माजी खासदार वंदना चव्हाण, माजी आमदार मोहन जोशी, संजय बालगुडे, नरेंद्र व्यवहारे, हेमंत येवलेकर, रमेश साठे, निलेश बोराटे, पंकज बरीदे इत्यादी सहभागी झाले होते.

दिवाळी फराळ, सोसायटी भेटीगाठी, सामाजिक मेळाव्यांद्वारे प्रचाराचा धडाका

पुणे, दि. १२ नोव्हेंबर, २०२४ : गोखलेनगर परिसरात म्हाडाच्या इमारतींवर मिळकत करावर लावलेला तीनपट दंड रद्द करण्याची मागणी विधानसभेत केल्यानंतर मंत्री उदय सामंत यांनी नवे धोरण लागू होई पर्यंत दिलेली दंड स्थगिती, छत्रपती शिवाजीनगर मतदार संघातील प्रत्येक भागात केलेली महत्त्वाची विकासकामे, सातत्याने असलेला जनसंपर्क, विधानसभेत वेळोवेळी उपस्थित केलेले प्रश्न, त्यांची केलेली सोडवणूक आणि प्रचाराच्या प्रत्येक ठिकाणी जनतेचा मिळत असलेला अभूतपूर्व प्रतिसाद याच्या जोरावर निवडून येणारच असा विश्वास महायुतीचे छत्रपती शिवाजीनगर मतदार संघाचे अधिकृत उमेदवार सिद्धार्थ शिरोळे यांनी व्यक्त केला.

दिवाळी फराळ, सोसायटींमधील रहिवासी यांच्याशी प्रत्यक्ष भेटीगाठी, युवा, महिला, सामाजिक मेळावे, मतदार संघ पिंजून काढणाऱ्या पदयात्रा, जागोजागी नागरिकांकडून होणारे स्वागत अशा भारावलेल्या वातावरण सिद्धार्थ शिरोळे यांचा प्रचार सध्या सुरु आहे.        

गेल्या काही दिवसात दयानंद इरकल, प्रबोधन मंच, सतीश बहिरट पाटील मिञ परिवार आयोजित दिवाळी फराळ कार्यक्रम, व्हिजन सोशल फाऊंडेशन आयोजित व्यापारी व मारवाडी समाज मेळावा येथेही नागरीकांनी शिरोळे यांना पाठींबा दिला. यावेळी समाजातील प्रतिष्ठीत नागरीकांनी कार्यक्रमाला उपस्थिती लावली होती. याबरोबरच दीप बंगला चौक, मित्र नगर कॉलनी येथील रहिवाशांची भेटही शिरोळे यांनी घेतली.

यावेळी बोलताना शिरोळे म्हणाले, “गोखलेनगर- वडारवाडी भागातील प्रश्नांची सोडवणूक करणे याला मी कायमच महत्त्व दिले आहे. मागील ५ वर्षांत या भागात तब्बल १७ कोटी २९ लाख रुपये निधी आणण्यात यश आले असून या अंतर्गत विविध विकासकामे सुरु आहेत. यामध्ये प्रामुख्याने नवीन ड्रेनेज लाईन टाकणे व जुन्या ड्रेनेज लाईन दुरुस्त करणे, रस्ता कॉन्क्रीटीकरण, पेव्हिंग ब्लॉक टाकणे, जलवाहिनी, बोरवेलचे काम, सामाजिक सभागृह उभारणी, पायाभूत विकासकामे, सीसीटीव्ही कॅमेरे बसविणे यांचा समावेश आहे. या सर्वांमुळे या भागाच्या सर्वांगीण विकासाला गती मिळत आहे याचा आनंद आहे.”

नजीकच्या भविष्यात या भागातील म्हाडाच्या इमारतींवर मिळकत करावर लागलेला तीनपट दंड कायमस्वरुपी रद्द व्हावा, गोखलेनगर वडारवाडी भागातील म्हाडाच्या पूरग्रस्त वसाहतींना गावठाण घोषित करण्यासाठी प्रयत्न करणे जेणेकरून नागरिकांना वाढीव एफएसआय व बँक लोन मिळण्यास मदत होईल, स्वच्छतागृहांची उपलब्धता वाढवून देणे, पाणीपुरवठा प्रणाली आणखी सक्षम करणे, पैलवान मारुती चव्हाण वडार आर्थिक विकास महामंडळा मार्फत वडार समाजाला कार्यक्षम करणे, मेट्रो स्थानका पर्यंत जाण्यायेण्यासाठी फिडर बस व रिक्षा सेवा उपलब्ध करून देणे आणि जनवाडी गोलशेड, जनवाडी ओटा घर, पांडवनगर शेजघर या भागातील एफएसआयचा प्रश्न मार्गी लावणे यांना प्राधान्य देत ही कामे पूर्णत्वास नेणे यावर माझा भर असेल असेही शिरोळे म्हणाले.