पुणे :  मुद्रा योजना जास्ती जास्त लोकांपर्यंत पोहचवण्यासाठी बँकांनी प्रयत्न करावेत. गरजूंना या योजनेचा लाभ मिळवून द्यायचा असेल तर या योजनेचा प्रसार तळागाळा पर्यंत झाला पाहिजे. यासाठी लोकप्रतिनिधींना विश्वासात घेऊन काम करा . अशा सूचना पालकमंत्री गिरीश बापट यांनी बँक अधिकाऱ्यांना दिल्या. पुणे जिल्हा मध्यवर्ती बँकेत झालेल्या प्रधानमंत्री मुद्रा योजनेच्या आढावा बैठकीत ते बोलत होते.

या बैठकीला अतिरिक्त मुख्य कार्यकारी अधिकारी दिनेश डोके , आरबीआयचे बी.एम.कोरी, नाबार्डचे सहाय्यक महाव्यवस्थापक श्री पठारे, अग्रणी बँक व्यवस्थापक श्री देशमुख ,  उद्योग प्रतिनिधी श्री पानसरे, बँक ऑफ इंडियाचे प्रादेशिक व्यवस्थापक कदम, उपजिल्हाधिकारी उदय भोसले, पुणे जिल्हा मध्यवर्ती बँकेचे अध्यक्ष रमेश थोरात यांच्यासह विविध बँकेचे अधिकारी उपस्थित होते.

यावेळी बोलताना पालकमंत्री बापट म्हणाले, मुद्रा योजना राबवण्यात पुणे जिल्हा महाराष्ट्रात प्रथम क्रमांकावर आहे. याबद्दल आम्हा लोकप्रतिनिधीना अभिमान वाटतो. बेरोजगार तरुणांना व्यवसाय करण्यासाठी  भांडवल उपलब्ध करून देण्यासाठी मुद्रा बँकेकडून कर्ज पुरवठा केला जातो. या योजने अंतर्गत आता १० लाखापर्यंत कर्ज मिळू शकते. मात्र अजूनही या योजनेचा लाभ शेवटच्या गरजूपर्यंत पोहचत नाही. त्यामुळे या अधिकाधिक लोकांपर्यंत या योजनेचा फायदा पोहचवण्यासाठी अधिकाऱ्यांनी लोकप्रतिनिधींना विश्वासात घेवून काम केले पाहिजे.  यामुळे  योजनेचा प्रसार होवून अधिकाधिक लोकांना याचा लाभ होवून या योजनेचा हेतू सफल होईल.

मुद्राचे कर्ज घेण्यासाठी आलेल्यांना त्रास न देता सहकार्य करा.  त्यासाठी व्यावहारिकपणे विचार न करता भावनिक होऊन विचार करा. तसेच जास्ती जास्त लोकांनी हे कर्ज परत करावे यासाठी त्यांचे  प्रबोधन करा. अशा सूचना ही श्री बापट यांनी  बँक अधिकाऱ्यांना दिल्या.  मुद्रा योजना राबवण्यात पुणे जिल्हा देशात अग्रेसर व्हावा अशी अपेक्षा त्यांनी यावेळी व्यक्त केली.

अतिरिक्त मुख्य कार्यकारी अधिकारी दिनेश डोके यांनी मरगळ झटकून कामात गतिमानता आणण्याच्या सूचना बँक अधिकाऱ्यांना यावेळी केल्या.

पुणे, : ‘सूर्यदत्ता ग्रुप ऑफ इन्स्टिट्यूट्स’ने पोलिस, सशस्त्र दले, वीर नारी व वीर पुरुष यांच्या कुटूंबातील सदस्यांच्या कल्याणासाठी गेल्या महिन्यात ‘एज्यु-सोशिओ कनेक्ट इनिशिएटिव्ह (२०१७)’ या उपक्रमाचे आयोजन केले होते. हा पुढाकार पुढील टप्प्यात नेण्याचा एक भाग म्हणून ‘सूर्यदत्ता नॅशनल स्कूल’च्या (एसएनएस) इयत्ता पाचवी ते नववीतील विद्यार्थ्यांनी नुकतीच पुण्यातील पोलिसांची सदिच्छा भेट घेतली. शिवाजीनगरमधील पोलिस ग्राऊंडवर जाऊन विद्यार्थ्यांनी महिला व पुरुष पोलिस कर्मचाऱ्यांचे प्रशिक्षण बघितले आणि त्यांचा सत्कार केला. प्रशिक्षण सत्रादरम्यान पोलिस कर्मचाऱ्यांची शिस्त आणि समन्वय पाहून हे विद्यार्थी भारावून गेले.

वैभवी राऊत या विद्यार्थिनीने मराठीत प्रास्ताविक करुन सर्व उपस्थितांना शुभेच्छा दिल्या आणि या कार्यक्रमासाठी वेळ दिल्याबद्दल त्यांचे आभारही मानले. हा कार्यक्रम कशासंदर्भात आहे, याची माहिती उपस्थित पोलिस कर्मचाऱ्यांना देण्यात आली. रक्षाबंधनाच्या सणाचे औचित्य साधून विद्यार्थिनींनी पुरुष पोलिसांना राखी बांधली तर विद्यार्थ्यांनी महिला पोलिसांचा भेटवस्तू देऊन सन्मान केला. सर्व विद्यार्थ्यांनी पोलिस कर्मचाऱ्यांचे आशीर्वाद घेतले. ‘सूर्यदत्ता ग्रुप ऑफ इन्स्टिट्यूट्स’मध्ये सुरु असणाऱ्या अल्पकालीन कौशल्य विकास अभ्यासक्रमांसाठी शिष्यवृत्ती देऊ करणारी पत्रे यावेळी सर्व पोलिस कर्मचाऱ्यांना देण्यात आली. पोलिसांनी आपली शैक्षणिक व कौशल्यात्मक गुणवत्ता वृद्धिंगत करण्याच्या हेतूने त्यांच्या पसंतीचा यापैकी कोणताही अभ्यासक्रम निवडावा, असे प्रोत्साहनही देण्यात आले.

कार्यक्रमाच्या समाप्तीस ‘सूर्यदत्ता ग्रुप ऑफ इन्स्टिट्यूट्स’चे अध्यक्ष प्रा. डॉ. संजय बी चोरडिया यांनी पोलिसांची आपल्या समाजातील भूमिका विद्यार्थ्यांना विशद केली. पोलिसांनी नागरिकांच्या कल्याणासाठी घालून दिलेल्या नियमांचे आपण पालन करणे महत्त्वाचे आहे, या मुद्यावर त्यांनी भर दिला.

या कार्यक्रमासाठी वेळ दिल्याबद्दल, तसेच सन्मान करण्याची संधी दिल्याबद्दल पोलिस प्रमुख व अन्य कर्मचाऱ्यांचे पियूष बॅनर्जी याने आभार मानले. डॉ. चोरडिया यांनी विद्यार्थ्यांसाठी हा आगळा कार्यक्रम आयोजित केल्याबद्दल त्यांचेही विशेष आभार मानण्यात आले.

पुणे-भारतीय जनता पार्टी युवा मोर्चा युवती आघाडीच्या पुणे शहरामधील पहिल्या शाखेच्या नामफलकाचे अनावरण  पुणे कॅन्टोन्मेंट भागात संत नामदेव चौकात महाराष्ट्र राज्याचे सामाजिक न्याय राज्यमंत्री दिलीप कांबळे यांच्याहस्ते फीत कापून करण्यात आले . यावेळी भारतीय जनता पार्टी युवा मोर्चा महाराष्ट्र प्रदेश अध्यक्ष आमदार योगेश टिळेकर , प्रदेश सचिव प्रियांका मेदनकर , भारतीय जनता पार्टी युवा मोर्चा युवा मोर्चा अध्यक्ष नगरसेवक दीपक पोटे , नगरसेवक सुशील मेंगडे , पुणे शहर चिटणीस गणेश घोष ,पुणे शहर युवती आघाडी पुणे शहर प्रमुख डॉ. सायली कुलकर्णी ,पुणे कॅन्टोन्मेंट युवती आघाडी प्रमुख कांचन गायकवाड , पिंपरी चिंचवड प्रमुख तेजस्विनी दुर्गे ,  नगरसेवक दिलीप गिरमकर , नगरसेविका प्रियांका श्रीगिरी , नगरसेविका डॉ. किरण मंत्री , माधुरी गिरमकर , दिनेश नायकू , संतोष इंदूरकर , किरण क्षीरसागर व मेघराज पवार आदी मान्यवर उपस्थित होते .

या कार्यक्रमाचे संयोजन सांची किशोर सिंगवी ,  गुणवंती कोठारी , कला सिंगवी , निलम सुराणा , वैष्णवी काटकर , पूजा काटकर , सुमित्रा राजगुरू , पूनम कांबळे , कांचन कांबळे , पुनीत जोशी , प्रतिक देसरडा यांनी केले होते .

या कार्यक्रमामध्ये  भारतीय जनता पार्टी युवा मोर्चा महाराष्ट्र प्रदेश अध्यक्ष आमदार योगेश टिळेकर यांनी सांगितले कि , महाराष्ट्रात दहा हजार शाखा उघडण्याचे उद्दिष्ट असून त्यामधील आठ हजार शाखाचे उदघाटन झाले आहे . उरलेल्या शाखा आगामी काळात उदघाटन करण्यात येणार आहे . युवा मोर्चाची ताकद राज्यात निर्माण करण्याची असून त्या माध्यमातून युवा शक्तीचा सहभाग राज्याचा विकासासाठी होणार आहे .

महाराष्ट्र राज्याचे सामाजिक न्याय राज्यमंत्री दिलीप कांबळे यांनी सांगितले कि , पुणे कॅन्टोन्मेंट भागात जास्तीत जास्त शाखा खोलून आपण पुणे कॅन्टोन्मेंटच्या विकासासाठी हातभार लावू .

या कार्यक्रमात उपस्थितांचे स्वागत सांची किशोर सिंगवी यांनी केले तर सूत्रसंचालन विकास भांबुरे यांनी केले तर आभार सुप्रिया राजगुरू यांनी मानले .

राष्ट्रीय सीएसआर परिषद : ५०१ सेवाभावी संस्थांच्या परिचय पुस्तकाचे प्रकाशन

पुणे : सीएसआर निधीतून अनेक चांगले प्रकल्प सेवाभावी संस्था राबवीत असतात, त्यामुळे अनेक चांगले बदल सामाजात घडून येत आहेत. सरकार प्रत्येकासाठी चांगले काम करण्यासाठी प्रयत्नशील आहे परंतू प्रत्येकच गोष्ट सरकार करेलच या विश्वासावर अवलंबून न राहता प्रत्येकाने आपले योगदान दिले तर सशक्त  समाजासाठी आवश्यक असे कार्य होवू शकते, असे प्रतिपादन पालकमंत्री गिरीश बापट यांनी केले.

आर्ट ऑफ लिव्हिंग आणि सोशल रिस्पोन्सिबिलीटीच्या माध्यमातून राष्ट्रीय सीएसआर परिषदेचे आयोजन पं. भीमसेन जोशी कलामंदीर, औंध येथे करण्यात आले होते. सीएसआर हेल्पलाईन व ५०१ एनजीओच्या कार्यपुस्तिकेचे प्रकाशन करण्यात पालकमंत्री गिरीश बापट यांच्या हस्ते करण्यात आले. यावेळी ते बोलत होते. आर्ट ऑफ लिव्हिंगचे मार्गदर्शक श्री. शेखर मुंदडा, भारत विकास ग्रुपचे मुख्य संचालक श्री. हनुमंतराव गायकवाड, पुण्याचे विभागीय आयुक्त श्री. चंद्रकांत दळवी, पुण्याच्या धर्मादाय सहआयुक्त श्रीमती कांचनगंगा जाधव, हिवरे बाजारचे सरपंच श्री. पोपटराव पवार, कोहिनूर ग्रुपचे मुख्य संचालक श्री. कृष्णकुमार गोयल, दे आसरा फाउंडेशनचे संचालक श्री. एस. आर. जोशी, रामभाऊ म्हाळगी प्रबोधिनीचे श्री. हर्षल विभांडीक, सोशल रिस्पोन्सिबिलीटीचे अध्यक्ष श्री. विजय वरुडकर आदी मान्यवर यावेळी उपस्थित होते.

कार्यक्रमाची सुरुवात राष्ट्रगीताने झाली. त्यानंतर पूज्य श्री. श्री. रवीशंकरजी गुरुजींनी व्हिडिओच्या माध्यमातून सर्व क्षेत्रामध्ये कार्य करणाऱ्या एनजीओना ‘एकत्रित’ कार्य करण्यासाठी शुभेच्छा दिल्या. ‘वसुधैव कुटुंबंम’ असे समजून सर्वांनी समाजाच्या उन्नतीसाठी एकत्र येवून कार्य करावे, असा संदेश यावेळी गुरुजींनी दिला.

हिवरे बाजारचे सरपंच श्री. पोपटराव पवार म्हणाले की, आजच्या घडीला पर्यावरणाच्या बाबतीत जनजागृती होताना दिसून येते, ही चांगली बाब आहे. मात्र, पाणी आडवा, पाणी जिरवा यांच्या बरोबरीने उपलब्ध असलेले पाणी विवेकाने वापरणे आवश्यक आहे. यासाठी पाण्याचा ताळेबंद राखणे ही खरी काळाची गरज आहे.

विभागीय आयुक्त श्री. चंद्रकांत दळवी म्हणाले की, कॉर्पोरेट आणि एनजीओ यांच्यासाठी हे योग्य व्यासपीठ आहे. एनजीओला काम करताना नक्की कोणत्या अडचणी येतात, हे कॉर्पोरेट जगताने  समजावून घेताना त्यांना मदत करण्यासाठी पुढे येणे आवश्यक आहे. याचबरोबरीने अशा कार्यामध्ये महापालिकेला देखील निश्चितच सामाविष्ट करून घेता येवू शकेल.

धर्मादाय सहआयुक्त श्रीमती कांचनगंगा जाधव म्हणाल्या की, सर्वच एनजीओना नोंदणी करणे आवश्यक आहे. यामुळे सीएसआर निधी मिळविण्यासाठी मदत होते, तसेच याविषयीच्या मार्गदर्शनासाठी लवकरच शिबिराचे आयोजन करण्यात येणार आहे.

यावेळी भारत विकास ग्रुपचे संचालक हनुमंतराव गायकवाड म्हणाले की, अनिवासी भारतीय नागरिक भारताच्या विकासासाठी आपले योगदान देण्यासाठी तत्पर असतात. परंतू त्यांच्याकडे त्या त्या क्षेत्रात कार्यरत असणाऱ्या एनजीओची माहिती उपलब्ध नसते. संकेतस्थाळाच्या माध्यमातून आपण ही माहिती उपलब्ध करून दिल्यास याचा फायदा निश्चितच होईल.

यावेळी बोलताना कोहिनूर ग्रुपचे मुख्य संचालक श्री. कृष्णकुमार गोयल म्हणाले की, समाजातील चांगल्या कामांसाठी निधी उपलब्ध करून देणारे अनेक लोक आहेत. परंतू, आपला निधी नीट वापरला जातोय ना, याबाबत ते साशंक असतात. अशा वेळी एनजीओने आपल्या कामाचा ठसा उमटविला तरच असे निधी उपलब्ध करून देणारे अनेक लोक या कार्यात आनंदाने सहभागी होतील.

आर्ट ऑफ लिव्हिंगचे मार्गदर्शक श्री. शेखर मुंदडा यावेळी म्हणाले की, पूज्य गुरुजींच्या आशीर्वादाने आणि प्रेरणेतून ही एनजीओ व कॉर्पोरेट यांना एकत्रित व्यासपीठ उपलब्ध करून देण्याची संकल्पना आम्ही मांडली. या संकल्पनेला एनजीओ व कॉर्पोरेट या दोन्ही घटकांनी चांगला पाठींबा दिल्यामुळेच या कार्यक्रमाचे आयोजन करण्यात आले.

यावेळी एनजीओसाठी ९टी (9T) ही संकल्पना शेखर मुंदडा यांनी मांडली.  या कार्यक्रमात भारत विकास ग्रुप, सुमेरू बेव्हरेजेस व कोहिनूर ग्रुप यांनी मोलाचा वाटा उचलला. प्रास्ताविकात कार्यक्रमाचे मुख्य संयोजक श्री. शेखर मुंदडा यांनी या कार्यक्रमाची पार्श्वभूमी मांडली, कार्यक्रमाचे सूत्रसंचालन श्री. सुधीर गाडगीळ यांनी तर आभारप्रदर्शन सोशल रिस्पोन्सिबिलीटीचे अध्यक्ष श्री. विजय वरुडकर यांनी केले. ‘वंदे मातरम’ गीताने कार्यक्रमाची सांगता झाली.

पुणे: “सर्वांना शांती हवी असेल तर त्यासाठी न्यायाची अधिक अवश्यकता आहे. आपण असे म्हणू शकतो, की शांती ही खरी व खोटीसुद्धा असू शकते. कारण ज्या ठिकाणी जे लोक हवे, ते नसल्यामुळे या देशात अशांतीचे वातावरण पसरलेले आहे”असे विचार समाजसुधारक मौलाना सय्यद कल्बी रशीद रिझवी यांनी काढले.
‘डॉ.विश्‍वनाथ कराड एमआयटी वर्ल्ड पीस युनिव्हर्सिटी’ (एमआयटी डब्ल्यूपीयू) पुणेतर्फे .‘विज्ञान आणि अध्यात्माच्या समन्वयातून विश्‍वशांती’ या विषयावर आयोजित दोन दिवसीय जागतिक शिखर परिषदेच्या समारोप समारोहामध्ये प्रमुख अतिथी म्हणून ते बोलत होते.
या प्रसंगी एमआयटी डब्ल्यूपीयूचे कार्याध्यक्ष प्रा. राहुल वि.कराड, कायदे पंडीत व विचारवंत शिराज कुरेशी, भारतीय इतिहास संशोधन परिषदेचे माजी अध्यक्ष वाय. सुदर्शन राव, डॉ.जेनिफर रिटर, थर्ड आसाइटचे संस्थापक व प्रमुख देवांशू दत्ता, आंतरराष्ट्रीय व्यवस्थापन आणि अग्नेय आशियाच्या आंतरराष्ट्रीय विकास प्रमुख डॉ.भूमिका गुप्ता, भारतीय तत्त्वज्ञान संशोधन परिषदेचे अध्यक्ष डॉ.एस.आर.भट्ट, औद्योगिक प्रशिक्षक संतोष जोशी व भारतातील अमेरिकन चेंबर ऑफ कॉमर्सच्या महासंचालिका रंजना खन्ना सन्माननीय अतिथी म्हणून होत्या व एमआयटी डब्ल्यूपीयूचे कुलसचिव प्रा. डी.पी आपटे हेही उपस्थित होते.
मौलाना सय्यद कल्बे रशीद रिझवी म्हणाले,“भारत ही आमची माता आहे. या देशात शांतीपूर्ण वातावरण निर्माण करण्यासाठी आम्हाला बलिदान देण्याची वेळ आली, तरी ती आनंदाने स्विकारू. देशावर होणार्‍या हल्यांना आम्ही चोख उत्तर देवू. या देशामध्ये वेगवेगळ्या धर्माच्या प्रमुख जागी जे नको आहेत, त्याचप्रमाणे प्रत्येक क्षेत्रात हीच स्थिती निर्माण झाल्यामुळे देेशात अराजकता पसरत आहे. अशावेळेस देशात शांती निर्माण करण्यासाठी युवकांना पुढाकार घ्यावा लागेल. अशा महान कार्यासाठी या विद्यापीठाची महत्वपूर्ण भूमिका असवाी, अशी अपेक्षा आहे.”
शिराज कुरेशी म्हणाले,“हिंदूस्तान, इन्सान आणि इन्सानियत या गोष्टींच्या विषयी सम्मानाबरोबर ते जीवनात प्रत्यक्ष उतरविल्यावर खर्‍या शांतीचा अनुभव येवू शकतो. जोपर्यंत मणुष्याला शिक्षणाची आवड आहे, तो पर्यंत त्यात अध्यात्म जीवंत असतेे. क्षणा क्षणाला शिकण्याची इच्छा प्रत्येकाच्या मनात असावी. जीवनासाठी शिक्षण आणि माणुसकी आवश्यक आहे. संस्कृती आणि परंपरेचा सुगंध भारतातील प्रत्येक क्षेत्रातून दरवळतो.”
रंजना खन्ना म्हणाल्या, “अर्जुनांला ज्या प्रमाणे फक्त पोपटाचा डोळा दिसत होता, त्याप्रमाणे
प्रत्येकाने शांतीचे उद्दिष्ट निर्धारित केल्यावर ही सृष्टी शांतीपूर्ण होईल. येथे प्रत्येकांने मणुष्याला जोडण्याचे कार्य करावे.”
डॉ.भूमिका गुप्ता म्हणाल्या,“शिक्षण हे जीवनात परिवर्तन घडविणारे साधन आहे. शिक्षणाच्या माध्यमातून विश्‍वशांतिला अनुकूल अशी विद्यार्थ्याची मानसिकता तयार करता येवू शकते.”
सुदर्शन राव म्हणाले,“ज्ञान आणि विज्ञान यूांच्या संगमातून सरस्वती प्रकट होते. यामध्ये भारताची व येथील शिक्षणपद्धतीची भूमिका सृजनात्मक आहे.”
यानंतर डॉ.एस.आर.भट्ट, देवांशू दत्त आणि संतोष जोशी यांनी विश्‍वशांती स्थापनेसाठी सर्वाचे योगदान किती महत्वपूर्ण आहे यावर विचार प्रकट केले.
प्रा.राहुल वि.कराड यांनी प्रस्तावनेत नव्या विद्यापीठाची संपूर्ण माहिती दिली. एमआयटी डब्ल्यूपीयूचा दृष्टिकोन सर्व जगात शांतीचा प्रसार व्हावा असा आहे. आजची परिषद हीसुद्धा या विद्यापीठाच्या विद्यार्थ्यांच्या शिक्षणाचाच एक भाग आहे.
वेस्ट मिन्स्टरचे विद्यार्थी वेरा लवलेस, लिह हॉपके व एमआयटीची नलिनी देवी या विद्यार्थ्यांनी आपले मनोगत व्यक्त केले. श्रेयांश खंडेलवाल, अंकित बन्सल, अक्षय ठाकूर आणि अंकित पाटील या विद्यार्थ्यांना एमआयटी डब्ल्यूपीयू मधील शांती दलाचे सैनिक म्हणून घोषित करण्यात आले.
प्रा. गौतम बापट यांनी सूत्रसंचालन केले. प्रा. डी.पी आपटे यांनी आभर व्यक्त केले.

पुणे-केदार फ्रेंड्स सर्कल,हिंगणे व नगरसेविका.सौ.मंजुषा नागपुरे यांनी आयोजित केलेल्या दही हंडी उत्सवामध्ये अंध विद्यार्थ्यांनी सहभाग नोंदवून, दही हंडी फोडण्याचा आनंद लुटला. किष्किंधा प्रतिष्ठान संचलित अंध वसती गृहातील 25 अंध विद्यार्थ्यांनी हा आनंद लुटला. ‘चलो जलाए दीप जहाँ, अब भी अंधेरा हे’ ही संघ संस्काराने दिलेली शिकवण, म्हणूनच अंध विद्यार्थ्यांमध्ये आनंद वाटण्यासाठी, त्यांना आपल्यात सामावून घेण्यासाठी या हंडीचे आयोजन केल्याचे सौ.नागपूरे म्हटल्या.यावेळी, या विद्यार्थ्यांना हंडी फोडण्यासाठी प्रोत्साहन देण्यासाठी मोठ्या संख्येने लोक उपस्थित होते. यावेळी, श्री.दीपक  नागपुरे व आयोजक श्री.समीर महाडिक यांनी उपस्थित लोकांना चायनीज वस्तू न वापरण्याची शपथ दिली. चालू विकृत स्वरूपाला फाटा देऊन, एक नवीन आदर्श उपक्रम सिंहगड रस्त्यावर सुरू केल्याबद्दल केदार फ्रेंड्स सर्कल चे लोकांनी आभार मानले व समाधान व्यक्त केले .यावेळी, अभिनेते गिरीश परदेशी उपस्थित होते.त्यांनी  केदार च्या या उपक्रमाचे कौतुक केले .शिवशार्दूल ढोल ताशा पथकाचे वादन हे देखील कार्यक्रमाचे आकर्षण ठरले.कार्यक्रमाला प्रमुख पाहुणे म्हणून  उमेश चव्हाण उपस्थित होते .
कार्यक्रम हिंगणे खुर्द, सिंहगड रोड येथे संपन्न झाला . कार्यक्रमाची मुख्य दही हंडी बारामती गोविंदा पथकाने फोडली । कार्यक्रमाची सांगता सामूहिक शिववंदना ने करण्यात आली. महेश वैद्य, मयूर पांगारे, ओंकार वैरणकर, विशाल अवघडे, संदीप कदम, मंगेश बुजवे , आदींनी कार्यक्रम यशस्वी करण्यासाठी मेहनत  घेतली