पुणे: ग्रामीण भागातील गरजू व वंचित घटकांतील विद्यार्थ्यांना समान संधी, त्यांना शिक्षणासाठी अर्थसहाय्य उपलब्ध व्हावे, यासाठी ‘समावेश’ संस्थेने घेतलेला पुढाकार महत्वाचा आहे. शिक्षक आणि विद्यार्थी यांच्यातील समन्वय वाढला, तर शिष्यवृत्ती योजनेतील अडचणी दूर होतील. सारथी, स्वयंम स्वाधार, महाज्योती, महाडीबीटी या माध्यमातून मिळणाऱ्या शिष्यवृत्त्या लवकर मिळतील, असे प्रतिपादन समाजकल्याण विभागाचे सहाय्यक आयुक्त विलास लोंढे यांनी केले.
नॅशनल फार्मसी वेल्फेअर असोसिएशनतर्फे (एनपीडब्ल्यूए) ‘समावेश: ॲक्शन फॉर इम्पॅक्ट’ संस्थेच्या सहकार्याने आयोजित शिष्यवृत्ती सहाय्य कार्यक्रमाच्या उद्घाटनप्रसंगी विशाल लोंढे बोलत होते. एमसीई सोसायटीच्या इन्स्टिट्यूट ऑफ फार्मसीमध्ये झालेल्या कार्यक्रमावेळी तांत्रिक शिक्षण संचालनालयाचे सहाय्यक संचालक मारोती जाधव, एमसीई सोसायटीचे सचिव इब्रान शेख, ‘समावेश’ संस्थेचे संस्थापक प्रविण निकम, ‘एनपीडब्ल्यूए’चे अध्यक्ष सचिन कोतवाल, उपाध्यक्ष अमोल शाह, प्रवीण जावळे आदी उपस्थित होते.
विशाल लोंढे म्हणाले, “शिक्षकाला विद्यार्थी दत्तक दिला, तर त्यांचे प्रश्न सुटतील. विद्यार्थी कोणत्याही प्रवर्गातील असला, तरी प्रवेश घेताना सर्व कागदपत्रे शिक्षकांनी पाहावीत. त्याची पडताळणी करावी. ‘समावेश’सारखी संस्था फार्मा असोशिएशनच्या विविध महाविद्यालयांमध्ये स्वतः येऊन साहाय्य करत आहे. त्यांच्या या मदतीचा पुरेपूर फायदा करून घेत मुलांना शासनाच्या विविध शिष्यवृत्तीचा अधिकाधिक लाभ करून देण्यासाठी सकारात्मक विचार करायाला हवा.”
प्रवीण निकम म्हणाले, “विद्यार्थ्यांना विचारक्षम, सजग आणि न्यायाभिमुख नागरिक घडवणे हे ‘समावेश’चे ध्येय आहे. त्यासाठी ‘समावेश’ची टीम शिक्षणाचा मूलभूत हक्क आणि मूलभूत न्यायतत्व यामध्ये संशोधन आणि कृतीशील कार्यक्रम करते. विद्यार्थ्यांना शिक्षण, कायदेशीर ओळखपत्रे आणि शिष्यवृत्ती उपलब्ध करून देण्यासह शासनाच्या योजना विद्यार्थ्यांपर्यंत पोहचविण्यासाठी संस्था कार्यरत आहे. आतापर्यंत २००० हून अधिक गरजू विद्यार्थ्यांना उच्च शिक्षणाच्या प्रवाहात आणण्याचे काम केले आहे.”
पुढील तीन वर्षे हा उपक्रम यशस्वीपणे राबवण्यासाठी ‘एनपीडब्ल्यूए’ने ‘समावेश’ संस्थेसोबत सामंजस्य करार केला. डॉ. व्ही. एन. जगताप यांनी स्वागत, तर प्रा. प्रविण जावळे यांनी प्रास्ताविक केले. सचिन कोतवाल यांनी ‘एनपीडब्ल्यूए’ची माहिती दिली. डॉ. संपत नवले यांनी आभार मानले. प्रा. तस्लिम कुरेशी यांनी सूत्रसंचालन केले.
उपराष्ट्रपतीपदाच्या निवडणुकीत झाले संजय राऊतांचे वस्त्रहरण–भाजपा माध्यम विभाग प्रमुख नवनाथ बन यांची बोचरी टीका
पुणे-
उपराष्ट्रपतीपदाच्या निवडणुकीने खा. संजय राऊत यांना पुरते उघडे पाडले. उबाठा, राऊत आणि युपीएला आरसा दाखवणारी अशी ही निवडणूक होती. एनडीएची मते फुटून उपराष्ट्रपतीपदाच्या निवडणुकीत युपीएची सरशी होईल असा डंका वाजवणाऱ्या राऊतांना निकालानंतर ‘जोर का झटका’ बसला. निकालानंतर एनडीए आणि युपीए मध्ये तब्बल 150 मतांचा फरक समोर आला. उबाठाच्या खासदारांनीच उबाठा आणि तुमच्यावर काडीमात्र ही विश्वास ठेवला नाही. उपराष्ट्रपतीपदाच्या निवडणुकीत एनडीएचा शर्ट ओढता-ओढता राऊतांची काय अवस्था झाली, असा बोचरा सवाल भारतीय जनता पार्टीचे माध्यम विभाग प्रमुख नवनाथ बन यांनी बुधवारी केला. प्रदेश कार्यालयात झालेल्या पत्रकार परिषदेत ते बोलत होते. पुरते उघडे पडूनही आमची इज्जत शाबूत आहे असा केविलवाणा दावा श्री. राऊत करत आहेत हे हास्यास्पद असल्याचेही श्री. बन यांनी नमूद केले.
यावेळी श्री. बन म्हणाले की, राहुल गांधींचं नेतृत्व उपराष्ट्रपतीपदाच्या निवडणुकीत पुरते निष्प्रभ ठरले आहे. युपीएच्या खासदारांनीच क्रॉस व्होटिंग करून आपली खदखद व्यक्त केली. यातली सगळ्यात मोठी गंमत म्हणजे महाराष्ट्रातून एनडीएला सर्वाधिक साथ मिळाली. हेच महाराष्ट्राच्या राजकारणाचं आजचे सत्य आहे. मुख्यमंत्री देवेंद्र फडणवीस यांच्यावर उचलली जीभ लावली टाळ्याला अशा आवेशात टीका करताना, 2019 मध्ये उबाठा आणि श्री. राऊत यांनी देवेंद्रजींच्या पाठीत खंजीर खुपसूनही देवेंद्रजी पुन्हा उभे राहिले हे श्री. राऊत यांनी लक्षात ठेवावे असे खडसावले. विधानपरिषद, राज्यसभा आणि आता उपराष्ट्रपती निवडणूक या सर्व निवडणुकांमध्ये महाराष्ट्राने देवेंद्रजींच्या नेतृत्वाची झलक पाहिली आहे. त्यांची जादुई कांडी, त्यांचा करिष्मा, आणि त्यांची धोरणात्मक अचूकता पुन्हा पुन्हा दिसून आली. श्री. राऊत तुम्हाला राज्यसभेत केवळ अर्ध्या मताने आघाडी मिळाली होती यांची जाणीव ठेवा, आणि पुढील तीन वर्षांत तुम्हाला पुन्हा राज्यसभा मिळणार नाही, हे ही सत्य स्विकारा असाही टोला श्री. बन यांनी लगावला.
नेपाळसारखे अराजक माजावे हीच राऊतांची इच्छा ? देशात नेपाळसारखे अराजक माजेल असे भविष्य वर्तवणारे राऊत हे खंडोजी खोपड्याचे वारसदार आहेत का? जसा खोपडे स्वराज्यात द्रोह करून गेला, तसेच महाराष्ट्रद्रोह आणि देशद्रोहाचे बीज तुम्ही रोवताय का? असा खणखणीत सवाल श्री. बन यांनी विचारला. हा देश स्वामी विवेकानंदांचा, महात्मा गांधींचा, आणि आज सक्षम नेतृत्व करणाऱ्या नरेंद्र मोदीजींचा आहे. येथे कधीही अराजकता माजणार नाही. खरं तर, जे तुमच्या मनात आहे तेच तुमच्या ओठावर आलं. भारताला नेपाळसारख्या अस्थिरतेत ढकलण्याची तुमची सुप्त इच्छा आहे का? असा प्रश्न विचारत महाराष्ट्र आणि भारत इतके सक्षम आहेत की, तुमचे हे कपटी डाव कधीच यशस्वी होणार नाहीत. उलट तुम्ही पेटवलेल्या आगीत तुमचं तोंड भाजल्याशिवाय राहणार नाही असा इशारा श्री. बन यांनी दिला.
देशात आता Gen Z नाही, तर Gen M आहे – M for Modi! देशातील तरुणाईचा पंतप्रधान नरेंद्र मोदी यांच्या नेतृत्वावर विश्वास आहे. 2014, 2019 आणि 2024 मध्ये नरेंद्र मोदी यांना सर्वाधिक मतदान तरुणाईने केले. हीच तरुणाई म्हणजे भारताचं भविष्य, आणि ती ठामपणे मोदींसोबत उभी आहे. राऊत यांच्यासारखे आगडोंब माजवण्याचे घाणेरडे राजकारण तरुणाईला रुचत नाही, त्यांना विकास आणि स्थैर्य हवं आहे आणि हे केवळ मोदींचे सक्षम नेतृत्व देऊ शकेल हा विश्वास आहे. म्हणून कितीही वायफळ बडबड केली तरीही या देशात किंवा महाराष्ट्रात अराजकता माजवण्याचा प्रयत्न कधीही यशस्वी होणार नाही असेही खडसावले.
नेपाळमधील हिंसाचार आणि निषेधाच्या दरम्यान, हजारो भारतीयांप्रमाणेच, मध्य प्रदेशातील छतरपूर जिल्ह्यातील चार कुटुंबे देखील काठमांडूमध्ये अडकली आहेत. या कुटुंबांमध्ये मुलांसह एकूण १४ लोक आहेत, जे पंतप्रधान नरेंद्र मोदींना देशात सुरक्षित परतण्यासाठी विनंती करत आहेत.हिंसाचार दरम्यान, जाळपोळ, तोडफोड आणि अनेक लोकांचा मृत्यू झाल्याचे वृत्त समोर येत आहे. छतरपूरच्या गल्ला मंडी येथील रहिवासी व्यापारी पप्पू माटेले, वाहतूक व्यावसायिक निधी अग्रवाल, गुड्डू अग्रवाल आणि कुशवाह कुटुंब सहलीसाठी नेपाळला गेले होते. हे सर्व लोक सध्या काठमांडूमधील एका हॉटेलमध्ये अडकले आहेत.
काठमांडू – नेपाळमध्ये गेल्या तीन दिवसांपासून सुरू असलेल्या हिंसाचारात, अब्जाधीश उद्योगपती उपेंद्र महातो यांच्या घरावर हल्लेखोरांनी लूट केली. उपेंद्र रशियामध्ये राहतात आणि रशिया-नेपाळ चेंबर ऑफ कॉमर्स अँड इंडस्ट्रीचे अध्यक्ष आहेत.मंगळवारी नेपाळमध्ये निदर्शनांनंतर लोकांनी दुकाने आणि मॉल लुटले. याचा एक व्हिडिओ सोशल मीडियावर व्हायरल होत आहे. यामध्ये लोक दुकानातून कपडे चोरताना आणि वस्तू फोडताना दिसत आहेत.नेपाळमध्ये सुरू असलेल्या अशांततेमुळे उत्तर प्रदेशची सोनौली सीमा बंद करण्यात आली आहे. त्यामुळे येथे ८ किमी लांबीच्या ट्रकच्या रांगा लागल्या आहेत. यातील अनेक ट्रक जीवनावश्यक वस्तू घेऊन जात आहेत.
‘नेपाळमध्ये अडकलेल्या परदेशी प्रवाशांनी जवळच्या पोलिसांशी संपर्क साधावा’ नेपाळमध्ये सुरू असलेल्या तणावामुळे, नेपाळ लष्कराने तिथे अडकलेल्या परदेशी प्रवाशांना तात्काळ जवळच्या पोलिस किंवा सुरक्षा एजन्सीशी संपर्क साधण्यास सांगितले आहे. लष्कराने हॉटेल मालक, टूर कंपन्या आणि इतर संस्थांना प्रवाशांना मदत करण्यास सांगितले आहे. मीडिया रिपोर्ट्सनुसार, परदेशी प्रवाशांना बाहेर काढण्यासाठी आणि त्यांची सुरक्षितता सुनिश्चित करण्यासाठी हे पाऊल उचलण्यात आले आहे.
आंध्र प्रदेश सरकारने नेपाळमध्ये अडकलेल्या भारतीयांसाठी हेल्पलाइन क्रमांक जारी केले आहेत नेपाळमध्ये अडकलेल्या भारतीय नागरिकांना (विशेषतः तेलुगूंना) मदत करण्यासाठी आंध्र प्रदेश सरकारने हेल्पलाइन क्रमांक जारी केले आहेत. सरकारने सांगितले की नेपाळमध्ये अडकलेले लोक भारतीय दूतावासाच्या +९७७-९८०८६०२८८१ आणि +९७७-९८१०३२६१३४ या क्रमांकांवर संपर्क साधू शकतात. भारतीय दूतावासाच्या म्हणण्यानुसार, हे क्रमांक फोन कॉल तसेच व्हॉट्सअॅपवर उपलब्ध आहेत.नेपाळमध्ये अडकलेल्या आंध्र प्रदेशातील लोकांना आपत्कालीन मदत किंवा इतर कोणत्याही समस्येसाठी नवी दिल्लीतील आंध्र प्रदेश भवनशी +९१-९८१८३९५७८७ वर संपर्क साधण्याचा सल्ला देण्यात आला आहे.
काठमांडू विमानतळ अनिश्चित काळासाठी बंद, शेकडो परदेशी प्रवासी अडकले नेपाळमध्ये मोठ्या प्रमाणात झालेल्या हिंसक निदर्शनांमुळे बुधवारी काठमांडूचे त्रिभुवन आंतरराष्ट्रीय विमानतळ (TIA) अनिश्चित काळासाठी बंद करण्यात आले आहे. या अशांततेमुळे शेकडो परदेशी प्रवासी अडकले आहेत.विमानतळाभोवती आणि धावपट्टीच्या काही भागात धूर दिसत असल्याने सुरक्षेच्या कारणास्तव विमानतळ बंद करण्यात आल्याचे विमानतळाचे प्रवक्ते रिंजी शेर्पा यांनी सांगितले.यापूर्वी बुधवारी सायंकाळी ६ वाजेपर्यंत विमानतळ बंद ठेवण्याची घोषणा करण्यात आली होती, परंतु आता ते अनिश्चित काळासाठी बंद करण्यात आले आहे. एअर इंडियाने काठमांडूला जाणारी उड्डाणे रद्द केली एअर इंडियाने १० सप्टेंबर रोजी काठमांडूला येणारी आणि येणारी सर्व उड्डाणे रद्द केली आहेत. एअर इंडियाच्या प्रवक्त्याने माध्यमांना सांगितले की काठमांडू विमानतळ बंद असल्याने हा निर्णय घेण्यात आला आहे. प्रवक्त्याने सांगितले – आम्ही परिस्थितीवर लक्ष ठेवून आहोत आणि लवकरच अधिक माहिती शेअर करू.
नेपाळमधील बालसुधारगृहात संघर्ष, ५ जणांचा मृत्यू, ७ जण जखमी नेपाळमधील नौबस्ता येथील बालसुधारगृहात किशोरवयीन मुलांमध्ये झालेल्या संघर्षात पाच जणांचा मृत्यू झाला तर सात जण जखमी झाले. नौबस्ता तुरुंगाचे जेलर जालंधर भुसाल म्हणाले की, गुन्हेगारांनी गेट तोडून पळून जाण्याचा प्रयत्न केला तेव्हा हा संघर्ष झाला.५८५ कैद्यांपैकी १४९ कैद्यांना ताब्यात घेण्यात आले आणि ७६ कैदी बालसुधारगृहातून पळून गेले. त्यांनी सांगितले की, कैदी आणि बालगुन्हेगारांना एकत्र ठेवल्यामुळे ही परिस्थिती उद्भवली.
सीपीएन अध्यक्ष पुष्पा कमल दहल ‘प्रचंड’ यांच्या मुलीच्या घरातून मृतदेह सापडला सीपीएन अध्यक्ष पुष्पा कमल दहल ‘प्रचंड’ यांच्या कन्या गंगा दहल यांच्या जळालेल्या घरातून मृतदेह सापडला आहे.ललितपूरचे एसएसपी श्याम कृष्ण अधिकारी म्हणाले की, ढोलाहिती येथील गंगा यांच्या निवासस्थानी मृतदेह सापडला आहे. त्यांनी सांगितले की, मृतदेहाची ओळख पटू शकली नाही. हा पुरूषाचा मृतदेह आहे, परंतु त्याची स्थिती अशी आहे की त्याची ओळख पटू शकत नाही. यामुळे मृतांची एकूण संख्या २४ झाली आहे.
नेपाळ हिंसाचारात अडकल्या हरियाणातील मुली नेपाळमध्ये सोशल मीडिया बंदी आणि भ्रष्टाचाराविरुद्ध सुरू असलेल्या आंदोलनात दिल्लीची उपासना गिल तिच्या टीमसोबत अडकली आहे.उपासना गिल व्हॉलीबॉल स्पर्धेसाठी तिथे गेली होती. तिच्या टीममध्ये हरियाणातील फरीदाबाद येथील मुलींचाही समावेश आहे. उपासना गिलने सोशल मीडियावर मदतीची याचना करणारा एक व्हिडिओ शेअर केला आहे. नेपाळ हॉटेल असोसिएशनने पर्यटकांना मदत करण्याचे आवाहन केले आहे सध्या सुरू असलेल्या अशांततेमध्ये पर्यटकांची वाहतूक सुलभ करण्यासाठी आणि अनुकूल वातावरण निर्माण करण्यासाठी हॉटेल असोसिएशन नेपाळ (HAN) ने अधिकाऱ्यांना आणि संबंधित पक्षांना आवाहन केले आहे. गुरुवारी जारी केलेल्या निवेदनात, HAN ने म्हटले आहे की कर्फ्यू आणि त्रिभुवन आंतरराष्ट्रीय विमानतळ बंद केल्याने देशी आणि परदेशी पर्यटकांच्या प्रवास योजना विस्कळीत झाल्या आहेत.असोसिएशनने यावर भर दिला की पर्यटकांचे आगमन थेट नेपाळच्या प्रतिमेशी आणि पर्यटनाच्या भविष्याशी जोडलेले आहे.HAN ने म्हटले आहे की ते देशाच्या विविध भागात अडकलेल्या पर्यटकांना मदत सुनिश्चित करण्यासाठी नेपाळ पर्यटन मंडळ आणि नेपाळ सैन्यासोबत काम करत आहे. हॉटेलमध्ये राहण्याची गरज असलेल्या पर्यटकांना HAN च्या हॉटलाइन क्रमांक 9851031495 वर संपर्क साधण्याचा सल्ला देण्यात आला आहे.
पुणे-राज्य विधी मंडळाच्या पावसाळी अधिवेशनात मंजूर करण्यात आलेल्या जनसुरक्षा विधेयकाविरोधात महाविकास आघाडीकडून राज्यव्यापी आंदोलन करण्यात येत आहे. शहरी नक्षलवादाचा बीमोड करण्याच्या नावाखाली विरोधी पक्षाचा आवाज दाबण्यासाठी हे विधेयक मंजूर करण्यात आले, असा आरोप महाविकास आघाडीकडून करण्यात येत आहे. पुण्यात राष्ट्रवादी कॉंग्रेस शरद पवार गटाचे आंदोलन खासदार सुप्रिया सुळे यांचे नेतृत्वात सुरू करण्यात आले आहे. पुणे स्टेशन जवळील महामानव भारतरत्न डॉ. बाबासाहेब आंबेडकर यांच्या स्मारकाजवळ संविधानाचा जयजयकार करत सरकारच्या हुकूमशाही प्रवृत्तीचा निषेध करण्यात आला. यावेळी शहराध्यक्ष प्रशांत जगताप यांच्यासह राष्ट्रवादी काँग्रेस पार्टी शरदचंद्र पवार पक्षाचे राज्य प्रवक्ते महेश तपासे, RPI चे नेते सचिन खरात, विशाल तांबे, मनाली भीलारे, शेखर धावडे, डॉ.निकिता गायकवाड, मंजिरीं घाडगे, श्रधा जाधव,पायल चव्हाण, फईम शेख, युसुफ शेख, नरेश पगाडल्लू, वंदना मोडक, शैलेंद्र बेल्हेकर, सागर खांदवे व मोठ्या संख्येने पदाधिकारी व कार्यकर्ते मोठ्या संख्येने उपस्थित होते.
भारतीय संविधानाचा विजय असो, जनसुरक्षा कायदा रद्द करा, अशा घोषणाबाजी करत राज्यभर हे आंदोलन सुरू करण्यात आले आहे. पुण्यात आंदोलनावेळी माध्यमांशी बोलताना सुप्रिया सुळे म्हणाल्या, महाविकास आघाडीमध्ये तुम्हाला आठवत असेल जेव्हा माननीय उद्धवजी स्वतः असेंब्लीमध्ये आले होते त्यावेळेस कॉंग्रेस असेल, राष्ट्रवादी कॉंग्रेस शरद पवार गट असेल आम्ही सगळ्यांनी मिळून हा कायदा आणला होता, तेव्हा सगळ्यांनीच याचा विरोध केला होता. मला एकाच गोष्टीचे आश्चर्य वाटते की एकीकडे हे सरकार सातत्याने सांगत आहे की हे या देशातून नक्षलवाद संपवला असे हे केंद्र सरकार नाहीतर राज्यातील सरकार सांगत आहे. तर मग नक्षलवादाच्या विरोधात आधीच आपल्याकडे कायदे असताना आणखी एक कायदा कशासाठी? असा सवाल सुळे यांनी उपस्थित केला.
पुढे बोलताना सुप्रिया सुळे म्हणाल्या, सगळ्या समाजात अशी एक चर्चा आहे की हा फक्त की असे कायदे आणून संविधानाच्या विरोधी घेतलेला हा निर्णय आहे. हा देश कोणाच्या मन मर्जी चालणार नाही. हा देश फक्त बाबासाहेब आंबेडकरांच्या संविधानाने चालणार आणि म्हणून या विधेयकाचा महाविकास आघाडी म्हणून तर आहेच पण जबाबदार नागरिक या नात्याने विरोध करू. आमची विनंती आहे हे विधेयक मागे घेण्यात यावे.
उपराष्ट्रपती पदाच्या निवडणुकीवर प्रश्न विचारण्यात आला असता सुप्रिया सुळे म्हणाल्या, गुप्त मतदान असताना मग कसे कळणार की त्यात कोणत्या पक्षाने क्रॉस व्होटिंग केले? वायएसआर कॉंग्रेस हा पक्ष इंडिया आघाडीत नाही. तुम्हाला कसे माहीत आहे की गुप्त मतदान असताना कोणती मते फुटली हे कसे समजेल? असे आरोप जर केले जात आहेत तर राहुल गांधी जे म्हणतात ते खरेच आहे व्होट चोरी झाली. मला माहीत नाही कोणाची मते फुटली. 15 मते अवैध आहेत आणि त्यातली 10 मते त्यांची असल्याचे त्यांनीच कबूल केले आहे.
दरम्यान,जनसुरक्षा विधेयक हे दडपशाही आणि हुकूमशाही प्रवृत्तीचे असल्याचा आरोप काँग्रेसने केला आहे. हे विधेयक म्हणजे सरकारविरोधातील आवाज दडपण्यासाठी वापरले जाणारे एक ‘अस्त्र’ आहे, अशी भीतीही काँग्रेसने व्यक्त केली आहे. काँग्रेसच्या मते, सध्या नक्षलवादाशी संबंधित कायदे पुरेसे कठोर आहेत. त्यामुळे वेगळ्या कायद्याची गरज नाही. या नव्या विधेयकानुसार कोणत्याही व्यक्तीला अटक करण्याचा, तुरुंगात टाकण्याचा आणि त्यांची संपत्ती जप्त करण्याचा अधिकार सरकारला मिळेल. यामुळे विरोधकांचा आवाज दडपला जाण्याची शक्यता आहे, असे काँग्रेसने त्यांचे प्रसिद्धी पत्रकातून म्हटले आहे.
पुणे- महानगरपालिकेच्या वतीने देण्यात येणाऱ्या सन २०२५ च्या आदर्श शिक्षक पुरस्कार वितरण समारंभ प्रसंगी महापालिका आयुक्त नवल किशोर राम म्हणाले कि,राष्ट्रघडणीतील शिक्षकांचे योगदान महत्त्वाचे आहे आणि ते नेहमीच महत्वाचे राहिले आहे. यावेळी पुणे महापालिकेच्या वतीनेपालिकेच्या प्राथमिक शाळांमधील १० व खाजगी शाळा मधील ५ आदर्श शिक्षकांना पुरस्कार देण्यात आले. आदर्श शिक्षक वितरण पुरस्कार्थीना यावेळी मानपत्र, सन्मानचिन्ह, तसेच टॅब देऊन गौरविण्यात आले.
बालगंधर्व रंग मंदिरात झालेल्या या आदर्श शिक्षक पुरस्कार वितरण प्रसंगी नवल किशोर राम यांनी शिक्षक, विद्यार्थ्यांच्या सर्वांगीण विकासासाठी करत असलेल्या प्रयत्नांचे कौतुक केले. राज्यात पुणे महानगरपालिका शिक्षणासाठी,विद्यार्थ्यांच्या शैक्षणिक, सामाजिक प्रगतीसाठी अविरत झटणारी महानगरपालिका म्हणून गणली जाते असे त्यांनी म्हटले. विद्यार्थ्यांना ई लर्निंग च्या माध्यमातून शिक्षण दिले जाते. तसेच विविध स्पर्धा परीक्षांना मुलांना बसविले जाते व त्यातूनच विद्यार्थ्यांच्या प्रगतीचा आलेख उंचाविण्याचा शिक्षकांचा सतत प्रयत्न चालू असतो. समाजात विद्यार्थी चांगल्या प्रकारे उभा रहावा हे शिक्षकाचे मुख्य उदिष्टय असते. शिक्षणात कौशल्याधिष्टीत ज्ञान गरजेचे असते. शिक्षकांबद्दल आदर व्यक्त करीत असताना त्यांच्या शालेय जीवनातील गुरुकुल पद्धतीच्या शाळेतील स्वावलंबी शिक्षणाच्या आठवणींना त्यांनी उजाळा दिला.
पुणे महानगरपालिकेच्या वतीने पुढील वर्षभरात ७५ मॉडेल स्कूल तयार करण्याबाबतचे सुतोवाच यावेळी त्यांनी केले. तसेच पुढील तीन वर्षात सर्व शाळा मॉडेल करण्याचा संकल्प त्यांनी व्यक्त केला. शिक्षकांना शिकविण्याशिवाय झ्तरही बरीच कामे करावी लागतात, ती कमी करण्याचा प्रयत्न करु असे त्यांनी म्हटले. शिक्षकांनी स्वतः व विद्यार्थ्यांना वाचनाची आवड लावावी . त्यासाठी पुणे मनपाच्या वतीने पुस्तक मेळावा आयोजित केला जाईल असे सांगितले. मराठी संस्कृती व मराठी भाषा खूप उच्च दर्जाची असून ती विद्यार्थांपर्यंत पोहचविण्याचा सर्व शिक्षकांनी प्रयत्न करावा असे त्यांनी सांगितले.याप्रसंगी वडगावशेरीचे आमदार बापूसाहेब पठारे यांनी गुरुजनांचा योग्य सन्मान व्हावा असे सांगितले. प्रास्ताविक शिक्षण विभागाचे उपायुक्त विजय थोरात यांनी केले .शिक्षकांचे प्रश्न सोडविण्यास महापालिका बांधिल राहील.तसेच समाविष्ट गावातील व इतर सर्व शाळांना भौतिक सुविधा पुरविण्याचे धोरण महापालिकेचे राहील असे त्यांनी स्पष्ट केले. महानगरपालिका क्षेत्रातील सर्व ३००० शिक्षक आमच्या दृष्टीने आदर्श आहेत असे गौरवउद्गार आपल्या प्रास्ताविकात काढले. शिक्षण विभागाच्या प्रशासकीय अधिकारी सुनंदा वाखारे यांनी गुरु शिष्य परंपरा या शिक्षक दिनाच्या निमित्ताने जपली जाते असे म्हटले. मुलांमध्ये शिक्षणाची ओढ निर्माण करणारे शिक्षक हवेत असे यावेळी सांगितले. आदर्श शिक्षक पुरस्कार प्राप्त शिक्षिका रेखा कामथे (रेखा एकनाथ भालघरे) यांनी आपल्या मनोगतात विद्यार्थ्यांसाठी शिक्षण विभाग पुणे महानगरपालिकेमार्फत करत असलेल्या विद्यार्थ्यांच्या सर्व योजनांचा नामोल्लेख केला. आपण आपल्या सहकाऱ्यांच्या सहकार्यातून आपली शाळा व आपले पुणे शहर निश्चितच स्मार्ट बनवून दाखवू असे सर्व शिक्षकांच्या वतीने सांगितले. व आदर्श शिक्षक पुरस्कार देऊन शिक्षकांचा यथोचित सन्मान केल्याबद्दल, शिक्षकांना प्रोत्साहन दिल्याबद्दल पुणे महानगरपालिकेचे आभारही व्यक्त केले. याप्रसंगी एम जे प्रदीप चंद्रन (भाप्रसे )अतिरिक्त महापालिका आयुक्त ( ज) .तसेच पुणे महानगरपालिकेच्या माध्यमिक शिक्षणाधिकारी श्रीमती आशा उबाळे उपस्थित होते. उपप्रशासकीय अधिकारी श्रीमती शुभांगी चव्हाण यांनी कार्यक्रमाचे आभार मानले. सदर कार्यक्रमासाठी आदर्श पुरस्कार प्राप्त शिक्षक व त्यांचे नातेवाईक, पुणे शहरातील शिक्षक व शिक्षण विभागातील सर्व अधिकारी मोठ्या प्रमाणावर उपस्थित होते.
मुंबई ता. १०: राष्ट्रीय आरोग्य अभियानातील (एनएचएम) कर्मचाऱ्यांनी पुकारलेला संप आरोग्य मंत्री प्रकाश आबिटकर यांच्या समवेत झालेल्या बैठकीनंतर आज अखेर मागे घेण्यात आला. मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि अजित पवार याविषयी सकारात्मक असल्याचे सांगत आबिटकर यांनी संघटनेतील पदाधिकाऱ्यांची बैठक घेऊन १३ पैकी १० मागण्यांना तत्वतः मान्यता दिली. तसे लेखी पत्र राष्ट्रीय आरोग्य अभियान एकत्रीकरण समितीच्या पदाधिकाऱ्यांना सुपूर्त केले. यामुळे गेल्या २३ दिवसांपासून सुरू असलेला बेमुदत संप संघटनेने मागे घेतला.
१४ मार्च २०२४ रोजी झालेल्या शासन निर्णयाची अंमलबजावणी व्हावी, यासाठी १९ ऑगस्टपासून एनएचएमच्या राज्यभरातील सुमारे ३५ हजार अधिकारी व कर्मचाऱ्यांचे बेमुदत कामबंद आंदोलन सुरू होते. विविध मागण्यांसाठी आरोग्य सेवेतील १६ संघटनांनी प्रथमच एकत्रित येऊन यात सहभाग घेतला होता. आरोग्यमंत्री आबिटकर यांनी आज एकत्रीकरण संघटनेशी सविस्तर चर्चा करून यावर तोडगा काढला. यावेळी संघटनेचे राज्य समन्वयक विजय गायकवाड, ॲड. भाग्यश्री रंगारे, श्रीधर पंडित, गौरव जोशी यांच्यासह इतर पदाधिकारी उपस्थित होते. तत्पूर्वी आयुक्त कादंबरी बलकवडे आणि सार्वजनिक आरोग्य सेवेचे संचालक नितीन अंबाडेकर यांच्यातही याविषयी सकारात्मक बैठक झाली.
आबिटकर म्हणाले की, समायोजन प्रक्रियेसह कंत्राटी अधिकारी व कर्मचाऱ्यांचे प्रलंबित प्रश्न प्राधान्याने मार्गी लागावे, अशी माझी कायमच आग्रही भूमिका होती. परंतु, हे प्रश्न सोडवताना भविष्यात त्यामध्ये कोणत्याही त्रुटी राहू नये, यासाठी मी प्रयत्नशील होतो. सामान्य प्रशासक, ग्रामविकास, नगर विकास, वैद्यकीय शिक्षण यांच्या देखील मी सातत्याने संपर्कात होतो. सदर कार्यभार सांभाळणाऱ्या मंत्री महोदयांनी तसेच वरिष्ठांनी याविषयी अनुकूलता दर्शविली. मागण्यांची अंमलबजावणी करताना शासकीय पातळीवर सकारात्मकता असली तरी प्रशासकीय आणि तांत्रिक बाबींची पडताळणी आणि पूर्तता करण्यासाठी आवश्यक तो वेळ द्यावा लागेल. उर्वरित ३ मागण्या समायोजनासंदर्भात असल्याने त्यातील तांत्रिक बाबींना लागणारा विलंब लक्षात घेता, त्यावरही लवकरच कार्यवाही केली जाईल, असे सांगून मंत्री आबिटकर यांनी संघटनेला आश्वासित केले. तसेच पुढील समन्वय व पाठपुराव्यासाठी संघटनेने समिती स्थापन करावी, अशी सूचनाही केली.
संघटनेचे समन्वयक गायकवाड यांनी सांगितले की, माननीय मंत्री महोदयांशी झालेल्या आश्वासक चर्चेनंतर आम्ही त्याक्षणी संप मागे घेण्याचा निर्णय घेतला. समायोजनाबाबत पहिल्या टप्प्यात १० वर्षाहून अधिक सेवा पूर्ण झालेल्या १३ हजार कर्मचाऱ्यांना फायदा होणार असून भविष्यात सर्व राष्ट्रीय आरोग्य अभियानातील कर्मचाऱ्यांना त्याचा लाभ होईल. काही मागण्या टप्प्याटप्प्याने मार्गी लागतील, याची आम्हाला कल्पना असून यासाठी शासन व प्रशासनाला सर्वतोपरी सहकार्य करण्याची आमची भूमिका आहे. आम्ही लवकरच मंत्री महोदयांच्या सूचनेचे पालन करून समिती स्थापन करणार आहोत. यासाठी आम्हाला वेळ दिल्याबद्दल मी सर्व संघटनेच्या वतीने आरोग्य मंत्री प्रकाश आबिटकर, आयुक्त कादंबरी बलकवडे आणि संचालक नितीन अंबाडेकर यांचे मनापासून आभार मानतो.
तत्वतः मंजूर झालेल्या मागण्या;
१. कर्मचारी मूल्यांकन अहवालानुसार, मानधनवाढ न करता सरसकट दरवर्षी ८ टक्के व एकवेळची बाब म्हणून सन २०२५ व २६ मध्ये १० टक्के वार्षिक वाढ करावी.
२. ३ व ५ वर्षे सेवा पूर्ण झालेले अधिकारी व कर्मचारी यांना लॉयटी बोनस पूर्ववत लागू करावा.
३. Pay Protection नियमानुसार मानधन संरक्षित करावे जुन्या कर्मचाऱ्यांची नवीन ठिकाणी नियुक्ती झाल्यास लागू करावे.
४. सन २०१६ आणि २०१७ पूर्वी कार्यरत असलेल्या व २०१७ च्या नंतर नियुक्त झालेल्या कर्मचारी यांच्यातील मानधनातील तफावत दूर करून नवीन वेतन सुसूत्रीकरण धोरण राबवावे.
५. कर्मचाऱ्यांना विमा संरक्षण अपघाती मृत्यू पाच लक्ष अपंगत्व २५ लाख औषध उपचार २ ते ५ लाख प्रमाणे लागू करावे.
६. ईपीएफ, ग्रॅज्युटी योजना १५ हजार त्यापेक्षा जास्त मानधन असणाऱ्या सर्व कंत्राटी कर्मचाऱ्यांना लागू करावी.
७. १० वर्ष सेवा पूर्ण झालेल्या कर्मचाऱ्यांचे १०० टक्के समायोजन व प्रत्येक वर्षी ३० टक्के प्रमाणे सार्वजनिक आरोग्य विभाग ग्रामविकास व नगर विकास विभाग वैद्यकीय शिक्षण व संशोधन विभाग यामध्ये समायोजन करावे.
८. १४ मार्च २०२४ रोजी झालेल्या शासन निर्णयानुसार जोपर्यंत शासन स्तरावर पात्र कर्मचारी यांचे समायोजन होत नाही तोपर्यंत सर्व नियमित शासकीय कर्मचारी यांचे नियम व वेतन आयोगाच्या वेळोवेळी होणाऱ्या शिफारशीनुसार लागू करावे किंवा समान काम समान वेतन लागू करावे ज्या कंत्राटी कर्मचाऱ्यांचे रिक्त जागी समायोजन होणार नाही अशा सर्व कंत्राटी व अधिकारी कर्मचाऱ्यांचे अधिसंख्य पदे निर्माण करून समावेशन करावे.
९. केंद्र शासनाच्या मार्गदर्शक सूचनेनुसार समुदाय आरोग्य अधिकाऱ्यांच्या सेवा कालावधी सहा वर्षे पूर्ण झाल्यानंतर कंत्राटी सेवा नियमित करण्याचा निर्णय सर्वांना लागू करणे.
१०. कर्मचारी मूल्यांकन अहवाल असमाधानकारक असल्यास नैसर्गिक न्यायाच्या नियमानुसार सदर करणाऱ्या कर्मचाऱ्यास स्वतःची बाजू मांडण्याची संधी उपलब्ध करून देणेबाबत परिपत्रक जारी करणे.
११. समुदाय आरोग्य अधिकारी बदली धोरणाप्रमाणे जिल्हा व अंतर जिल्हा बदली एक वेळची बाब म्हणून सर्व एनएचएम कर्मचारी यांना विनंतीप्रमाणे बदली धोरण लागू करावे
१२. CHO यांचे एकत्रित मानधन ३५ हजार व पीबीआय रुपये ५००० करावे.
१३. अतिदुर्गम भागात काम करणाऱ्या कंत्राटी अधिकारी व कर्मचारी यांना हँडशिप अलाउन्स वनक्षलग्रस्त भागाप्रमाणे सर्व भत्ते देणे.
संसद आणि सर्वोच्च न्यायालय जाळले:संपूर्ण काठमांडूमध्ये जाळपोळ, लोक म्हणाले- आमचे सरकार करप्ट गॅंग
काठमांडू-नेपाळमध्ये सोशल मीडिया बंदी आणि भ्रष्टाचाराविरुद्ध सुरू असलेल्या आंदोलनाचा आज तिसरा दिवस आहे. हिंसक निदर्शने थांबवण्यासाठी मंगळवारी रात्री १० वाजल्यापासून लष्कराने संपूर्ण देशाचा ताबा घेतला आहे.नेपाळी सैन्याने म्हटले आहे की, कठीण काळाचा फायदा घेत काही दुष्कृत्ये सामान्य लोकांचे आणि सरकारी मालमत्तेचे नुकसान करत आहेत. लूटमार आणि जाळपोळ यासारख्या कारवाया होत आहेत. अशा कारवाया थांबवल्या पाहिजेत.
निदर्शकांचा रोष पाहून केपी शर्मा ओली यांनी पंतप्रधानपदाचा राजीनामा दिला आणि काठमांडू सोडले. तत्पूर्वी, निदर्शकांनी केपी ओली यांचे खाजगी घर, राष्ट्रपती भवन आणि सर्वोच्च न्यायालयाला आग लावली.
काल आंदोलकांनी शेर बहादूर देउबा, झलानाथ खलन आणि पुष्प कमल दहल प्रचंड या तीन नेपाळच्या पंतप्रधानांच्या घरांना आग लावली.माजी पंतप्रधान झलनाथ खनाल यांच्या पत्नी राजलक्ष्मी चित्रकर त्यांच्या घरात लागलेल्या आगीत गंभीर भाजल्या. त्यांना तातडीने कीर्तिपूर बर्न हॉस्पिटलमध्ये नेण्यात आले, जिथे त्यांचा मृत्यू झाला.त्याच वेळी, माजी पंतप्रधान शेर बहादूर देऊबा यांना त्यांच्या घरात मारहाण करण्यात आली, तर अर्थमंत्री विष्णू पौडेल यांना काठमांडूमधील त्यांच्या घराजवळ पाठलाग करून मारहाण करण्यात आली.
नेपाळमध्ये सोशल मीडिया बंदी आणि भ्रष्टाचाराविरुद्ध सुरू असलेल्या आंदोलनाचा आज तिसरा दिवस आहे. हिंसक निदर्शने थांबवण्यासाठी मंगळवारी रात्री १० वाजल्यापासून लष्कराने संपूर्ण देशाचा ताबा घेतला आहे.नेपाळी सैन्याने म्हटले आहे की, कठीण काळाचा फायदा घेत काही दुष्कृत्ये सामान्य लोकांचे आणि सरकारी मालमत्तेचे नुकसान करत आहेत. लूटमार आणि जाळपोळ यासारख्या कारवाया होत आहेत. अशा कारवाया थांबवल्या पाहिजेत.निदर्शकांचा रोष पाहून केपी शर्मा ओली यांनी पंतप्रधानपदाचा राजीनामा दिला आणि काठमांडू सोडले. तत्पूर्वी, निदर्शकांनी केपी ओली यांचे खाजगी घर, राष्ट्रपती भवन आणि सर्वोच्च न्यायालयाला आग लावली.नेपाळच्या चितवन जिल्ह्यात मंगळवारी निदर्शकांनी सर्वोच्च न्यायालय आणि सरकारी वकिलांच्या कार्यालयाला आग लावली, ज्यामुळे अनेक कागदपत्रे जळून खाक झाली.
नेपाळमध्ये २००८ पर्यंत सुमारे २५० वर्षे राजेशाही होती. १९५१ मध्ये लोकशाहीचा प्रयत्न सुरू झाला असला तरी तो वारंवार थांबवण्यात आला. १९९६ ते २००६ पर्यंत माओवादी बंडखोर आणि राजेशाहीमध्ये १० वर्षांचे गृहयुद्ध सुरू राहिले, ज्यामध्ये १७ हजारांहून अधिक लोक मृत्युमुखी पडले.अखेर, २००७ मध्ये, राजेशाही संपवण्याचा निर्णय घेण्यात आला आणि २००८ मध्ये नेपाळला लोकशाही प्रजासत्ताक घोषित करण्यात आले. सुमारे ३ कोटी लोकसंख्या असलेल्या नेपाळमध्ये १०० हून अधिक वांशिक गट आणि भाषा आहेत, ज्यामुळे राजकीय एकमत निर्माण करणे नेहमीच कठीण राहिले आहे. २००८ पासून, येथे सरकारे सतत बदलत राहिली आणि भ्रष्टाचाराच्या घटना वाढतच गेल्या.२०१५ मध्ये सीपीएन-यूएमएल नेते केपी शर्मा ओली पहिल्यांदाच पंतप्रधान झाले. २०२४ मध्ये त्यांनी नेपाळी काँग्रेससोबत युती सरकार स्थापन केले आणि २०२७ पर्यंत दोन्ही पक्ष आलटून पालटून सरकार चालवतील असा निर्णय घेण्यात आला. परंतु हिंसक निदर्शनांनंतर ओली यांनी मंगळवारी राजीनामा दिला.
200 दंगलखोरांना अटक-सोशल मीडियावर ब्लॉक एव्हरीथिंग चळवळ पॅरिस-नेपाळनंतर फ्रान्समध्येही सरकारविरोधात निदर्शने सुरू झाली आहेत. अर्थसंकल्पातील कपातीविरोधात आणि राष्ट्राध्यक्ष इमॅन्युएल मॅक्रॉन यांच्या राजीनाम्याच्या मागणीसाठी बुधवारी १ लाखांहून अधिक लोक रस्त्यावर उतरले.अनेक ठिकाणी निदर्शकांचे सुरक्षा दलांशी संघर्ष झाले आहेत. त्यांनी अनेक ठिकाणी तोडफोड आणि जाळपोळही केली आहे. सरकारने ८० हजार पोलिस तैनात केले आहेत. आतापर्यंत २०० हून अधिक दंगलखोरांना अटक करण्यात आली आहे.
फ्रान्सचे नवे पंतप्रधान सेबास्टियन लेकोर्नूंनी बुधवारी निषेधांदरम्यान पदभार स्वीकारला. राष्ट्राध्यक्ष इमॅन्युएल मॅक्रॉन यांचे निकटवर्तीय आणि माजी संरक्षण मंत्री असलेले लेकोर्नू गेल्या दोन वर्षांत पाचवे पंतप्रधान बनले आहेत.लेकोर्नू पंतप्रधानांच्या निवासस्थानी पोहोचले, जिथे त्यांनी माजी पंतप्रधान फ्रँकोइस बायरो यांची भेट घेतली. अर्थसंकल्पीय तूट कमी करण्याच्या योजनेवर मतभेद झाल्यामुळे संसदेने बायरो यांना पदावरून काढून टाकले.
सोशल मीडियावर ब्लॉक एव्हरीथिंग चळवळ सुरू झाली. यामध्ये १० सप्टेंबर रोजी देशभरात सर्वकाही बंद करण्याचे आवाहन करण्यात आले. पंतप्रधानपदाचा राजीनामा देणाऱ्या फ्रँकोइस बायरो यांच्या अर्थसंकल्पीय धोरणांविरुद्ध हे आंदोलन सुरू झाले. बायरो यांनी सार्वजनिक खर्चात सुमारे ४ लाख कोटी रुपयांची कपात केली होती. यामुळे देशभरात पेन्शन बंद करण्यात आली आणि इतर अनेक सामाजिक योजनांमध्ये कपात करण्यात आली. यामुळे लोक संतापले.फ्रान्सचे गृहमंत्री ब्रुनो रिटेलो म्हणाले की, बुधवारी निदर्शकांनी अनेक शहरांमध्ये रस्ते अडवले.अनेक ठिकाणी पोलिस आणि निदर्शकांमध्ये संघर्ष झाला. परिस्थिती नियंत्रणात आणण्यासाठी पोलिसांनी अश्रुधुराच्या नळकांड्या फोडल्या. आंदोलनाच्या सुरुवातीला सुमारे २०० जणांना अटक करण्यात आल्याचे मंत्र्यांनी सांगितले.
उपसभापती डॉ. नीलम गोऱ्हे यांच्या शिफारशीला कामगार मंत्री आकाश फुंडकर यांचे आश्वासन
मुंबई, दि. ९ सप्टेंबर २०२५ : महाराष्ट्रात वाढत्या गिग (कंत्राटी) व प्लॅटफॉर्म कामगारांच्या सामाजिक सुरक्षेसाठी स्वतंत्र कायदा करण्यासंदर्भात उपसभापती डॉ. नीलम गोऱ्हे यांनी ८ जून २०२५ रोजी मुख्यमंत्री देवेंद्र फडणवीस व कामगार मंत्री आ. आकाश फुंडकर यांना पत्राद्वारे शिफारस केली होती. त्यांच्या शिफारशीला सकारात्मक प्रतिसाद देत कामगार मंत्री यांनी गिग कामगारांच्या हितासाठी नवीन प्रस्तावित कायद्यामध्ये ठोस उपाययोजना करण्याचे आज (९ सप्टेंबर २०२५) पत्राद्वारे आश्वासन दिले आहे.
डॉ. गोऱ्हे यांनी गिग व प्लॅटफॉर्म कामगारांच्या (राइड-शेअरिंग/टॅक्सी सेवा चालक, फूड डिलिव्हरी कर्मचारी, फ्रीलान्स व्यावसायिक, ग्राफिक डिझाइनर्स, कंटेंट रायटर्स, वेब डेव्हलपर्स, व्हिडिओ एडिटर्स, हायपरलोकल डिलिव्हरी व कुरिअर सेवा कर्मचारी, ऑनलाइन ट्यूटर्स व ट्रेनर्स) कल्याणासाठी स्वतंत्र कायदा व त्रिपक्षीय मंडळ स्थापन करण्याची शिफारस केली होती.
कामगार मंत्री आकाश फुंडकर यांनी कळविले आहे की, राज्यातील नागरी भागात ई-कॉमर्स व प्लॅटफॉर्म सेवांमध्ये मोठ्या प्रमाणात कार्यरत असलेल्या गिग कामगारांसाठी स्वतंत्र नियामक व कल्याणकारी कायदा करण्याची कार्यवाही शासनस्तरावर सुरू आहे. त्यांनी नमूद केले की, या संदर्भात विविध बैठका घेऊन प्रस्तावित कायद्याचा अभ्यास करण्यात आला आहे. तसेच, डॉ. गोऱ्हे यांनी मांडलेल्या सुचनांचा विचार करूनच अंतिम कायदा तयार केला जाईल.
डॉ. गोऱ्हे यांनी गिग कामगारांसाठी किमान वेतन, आरोग्य विमा, सवेतन रजा, निवृत्ती लाभ, कौशल्यविकास कार्यक्रम, महिला-पुरुष समान वेतन, आरोग्य व मानसिक तणाव प्रतिबंधक उपाययोजना आणि पारदर्शक तक्रार निवारण यंत्रणा यांसारख्या तरतुदी कायद्यात समाविष्ट करण्याची शिफारस केली होती.
राज्य शासनाने हा कायदा पारित केल्यास महाराष्ट्र इतर राज्यांसाठी आदर्श ठरेल, असेही डॉ. गोऱ्हे यांनी नमूद केले आहे. तसेच, सर्व गिग कामगार, स्वयंसेवी संस्था व सामाजिक कार्यकर्ते यांना आवाहन केले आहे की, याव्यतिरिक्त त्यांच्या काही सूचना, प्रस्ताव असल्यास ते शासनाला व उपसभापती कार्यालयास पाठवावेत. जेणेकरून योग्य सूचना व प्रस्ताव विचारात घेणे शक्य होईल.
संगनमत करून ६०० मतपत्रिका चोरून लपवून ठेवल्याचा आरोप
मुंबई दि. ०९ :
मतचोर म्हणून राजकारण्यांना बोलले जाते, पण ही व्होटचोरी आता मुंबई मराठी साहित्य संघाच्या निवडणुकीत सुरू आहे. संघातील कर्मचारी आणि निवडणूक अधिकारी यांच्याशी संगनमत करून ६०० सदस्यांच्या मत पत्रिका चोरून लपवून ठेवल्या आहेत. योग्य वेळी त्या पेटीत टाकायच्या,असे कारस्थान सुरू आहे. तसेच मतदारांना आता ‘ डुप्लिकेट ‘ मत पत्रिका दिल्या जात असल्याचा गंभीर आरोप डॉ.भालेराव विचार मंच पॅनलच्या उमेदवारांनी डॉ. उषा तांबे यांच्या ‘ऊर्जा’ पॅनलवर केला आहे. निवडणुकीचा कंत्राटदार आणि निवडणूक अधिकारी यांची फौजदारी चौकशी व्हावी, अशी मागणीही भालेराव पॅनलने केली आहे.
गिरगाव येथील मुंबई मराठी साहित्य संघाच्या पंचवार्षिक निवडणुकीत सुरू असलेल्या मनमानी कारभाराबाबत ही निवडणूक लढविणाऱ्या डॉ.भालेराव विचार मंच पॅनलचे उमेदवार प्रा.नरेंद्र पाठक, प्रमोद पवार, दिवाकर दळवी, अनिल गजके, सारंग दर्शने यांनी मंगळवारी मुंबई मराठी पत्रकार संघात परिषद घेत माध्यमांशी संवाद साधला.
निवडणुका जाहीर होण्यापूर्वी मतदार यादी अद्यावत करणे गरजेचे होते. मात्र संघाच्या कार्यवाह डॉ.अश्विनी भालेराव यांनी त्याची काही आवश्यकता नसल्याचे सांगत आमची सूचना दुर्लक्षित केली. आम्ही ४०० रुपये भरून यादी घेतली. त्यातील १३१५ मतदारांना आमचा जाहीरनामा पाठविला. सदस्य यादी अद्यावत नसल्यामुळे ३४५ पत्रे परत आली. मतदारांकडे चौकशी केली असता त्यांना अदयाप मत पत्रिका मिळालेल्या नाहीत. ऊर्जा पॅनलचे डॉ. उषा तांबे, डॉ. भालेराव, भागवत, मेहेंदळे, हिंगलासपूरकर, केंकरे व इतर उमेदवारांनी निवडणूक अधिकारी ऍड. यशोधन दिवेकर आणि संघातील कर्मचारी यांच्याशी संगनमत करून ६०० मत पत्रिका लपवून ठेवल्या आहेत. योग्य वेळी ही मत पेटीत टाकायची कारस्थान रचण्यात आले आहे. मत पत्रिकेचे कंत्राट ज्या खासगी एजन्सीला देण्यात आले त्या एजन्सीने प्रत्यक्षात मतपत्रिका न पाठविता केवळ बुकिंग रिसिट साहित्य संघात जमा केली. हा फौजदारी स्वरूपाचा आर्थिक घोटाळा असून त्याची चौकशी करण्यात यावी, अशी मागणीही डॉ.भालेराव विचार मंच पॅनलचे प्रमोद पवार यांनी केली आहे.
मराठीतील नामवंत चेहऱ्यांना घेऊन तयार झालेला ‘आतली बातमीफुटली’ हा सिनेमा येत्या १९ सप्टेंबरपासून मनोरंजनाची सफर घडवायला सज्ज झाला आहे. या सिनेमाचा धमाकेदार ट्रेलर सोहळा नुकताच संपन्न झाला. नामवंतांची उपस्थिती, सिनेमाच्या म्युझिक टीमने संगीत निर्मितीचे उलगडलेले सुखद अनुभव आणि वेगवेगळ्या धमाकेदार परफॉर्मन्सच्या सादरीकरणाने या सोहळ्याची रंगत चांगलीच वाढवली. वीजी फिल्म्स या बॅनरअंतर्गत दिग्दर्शक विशाल पी. गांधी आणि जैनेश इजरदार ‘आतली बातमी फुटली’ हा नवाकोरा मराठी चित्रपट प्रेक्षकांच्या मनोरंजनासाठी घेऊन आले आहेत.
‘आतली बातमी फुटली’ हा कॉमेडी क्राइम सिनेमा आहे. या चित्रपटाची कथा एका खूनाच्या सुपारीच्या रहस्यभेदाभोवती फिरते. ही खूनाची सुपारी नेमकं कोणतं वळण घेणार? या वळणावर कोणते बंध निर्माण होणार? याची धमाल कथा म्हणजे आतली बातमी फुटली हा सिनेमा नातेसंबधावर भाष्य करतानाच प्रेमाचे वेगवेगळे कंगोरे हा चित्रपट उलगडून दाखवतो. जीवनात प्रत्येकाचा एक दृष्टीकोन असतो. त्यामुळे दुसऱ्याचा दृष्टीकोन हा आपल्याला नेहमीच वेगळा वाटतो. हा दृष्टीकोन कधी पटतो तर कधी पटत नाही. यावरही या चित्रपटात प्रकाश टाकण्यात आला आहे. ज्येष्ठ अभिनेते मोहन आगाशे, अभिनेत्री रोहिणी हट्टगंडी, पॉवरपॅक्ड अभिनेता सिद्धार्थ जाधव असे मराठीतले नामवंत चेहरे या चित्रपटाच्या निमित्ताने पहिल्यांदाच एकत्र आले आहेत. या तिघांसोबत विजय निकम, भारत गणेशपुरे, आनंदा कारेकर, प्रीतम कागणे, त्रिशा ठोसर आदि कलाकारांची जमून आलेली भट्टी आणि खिळवून ठेवणारी कथा असलेला ‘आतली बातमी फुटली’ चित्रपट धमाल आणणार आहे.
आपल्या मराठी पदार्पणाबद्दल बोलताना चित्रपटाचे दिग्दर्शक विशाल पी. गांधी सांगतात, ‘माझा जन्म मुंबईतला त्यामुळे मराठी कलाकार आणि मराठी चित्रपटाचे विषय या सगळ्याबद्दल मला कायमचं आकर्षण राहिलं आहे. चित्रपटाचा आशय हे मराठी चित्रपटाचं बलस्थान राहिलं आहे. त्यामुळे मनोरंजक आणि तितकाच दर्जेदार आशय आणताना काहीतरी वेगळं देण्याचा प्रयत्न मी ‘आतली बातमी फुटली’ या चित्रपटातून केला आहे. हा चित्रपट सिच्युएशनल कॉमेडी असून प्रेक्षकांना आवडेल असा विश्वास आहे. सर्वसामान्य माणसाच्या आयुष्याशी निगडीत असलेला हा धमाल मनोरंजक चित्रपट प्रेक्षकांना निश्चितच आवडेल’, असा विश्वास निर्मात्या ग्रीष्मा अडवाणी, सहनिर्माते अम्मन अडवाणी यांनी व्यक्त केला.
सादरीकरण आणि मांडणीत वैविध्य असलेल्या या सिनेमाचे संगीत देखील रिफ्रेश करणारं झालंय. या चित्रपटाचा फ्रेश लुक आणि त्याला साजेसं संगीत प्रत्येकाला नक्कीच आवडेल असं आहे. ‘सखूबाई’, ‘चंद्राची गोष्ट’, जालीम सरकार, ‘आतली बातमी फुटली’ हे रॅप अशी वेगवेगळ्या मुडची चार गाणी या सिनेमात आहेत. ही चारही गाणी सध्या सोशल माध्यमावर ट्रेंडिंग आहेत. चैतन्य कुलकर्णी यांनी लिहिलेल्या चित्रपटातली गाण्यांना जावेद अली, सुनिधी चौहान, प्रेमराज सोनाली सोनावणे, एग्नेल रोमन यांचा स्वरसाज लाभला असून चित्रपटाच्या संगीताची जबाबदारी एग्नेल रोमन यांनी सांभाळली आहे. चित्रपटातील सुमधूर गीतांचा हा नजराणा प्रेक्षक नक्कीच एन्जॉय करतील, असा विश्वास चित्रपटाचे दिग्दर्शक विशाल पी. गांधी यांनी व्यक्त केला.
या चित्रपटाची निर्मिती विशाल पी. गांधी आणि ग्रीष्मा अडवाणी यांची आहे. सहनिर्माता अम्मन अडवाणी तर सहयोगी दिग्दर्शक जीवक मुनतोडे आहेत. ‘आतली बातमी फुटली’ चित्रपटाचे छायांकन अमित सुरेश कोडोथ तर संकलन रवी चौहान यांचे आहे. कथा जैनेश इजरदार यांनी तर पटकथा जीवक मुनतोडे, अम्मन अडवाणी,जैनेश इजरदार, विशाल पी. गांधी यांची आहे. संवाद लेखन जीवक मुनतोडे, व अद्वैत करंबेळकर यांनी केले आहेत. वेशभूषा ग्रीष्मा अडवाणी यांची, नृत्यदिग्दर्शन राहुल ठोंबरे, तिजो जॉर्ज यांचे आहे. प्रॉडक्शन डिझायनर रवी नाईक आहेत. कास्टिंग दिग्दर्शन जोकीम थोरास यांनी केले आहे, तर कार्यकारी निर्माते अब्दुल खान आहेत. चित्रपटाच्या वितरणाची जबाबदारी फिल्मास्त्र स्टुडिओजने सांभाळली आहे.
१९ सप्टेंबरला ‘आतली बातमी फुटली’ हा चित्रपट प्रेक्षकांच्या मनोरंजनासाठी सज्ज होणार आहे.
‘शिवसंस्कार महोत्सव २०२५’चे मंत्री आशिष शेलार यांच्या हस्ते उद्घाटन — छत्रपती शिवाजी महाराजांच्या कालातीत विचारांना समर्पित ऐतिहासिक सांस्कृतिक महोत्सव मुंबईत सुरू
मुंबई, 9 सप्टेंबर २०२५ – छत्रपती शिवाजी महाराजांच्या जीवनावर आधारित ‘शिवसंस्कार चित्रकाव्य कलादालन’ या आगळ्या-वेगळ्या सांस्कृतिक उपक्रमाचे उद्घाटन आज महाराष्ट्र राज्याचे सांस्कृतिक कार्य व माहिती तंत्रज्ञान मंत्री आशिष शेलार यांच्या हस्ते संपन्न झाले.
युनेस्कोच्या जागतिक वारसा यादीत छत्रपती शिवाजी महाराजांच्या बारा दुर्गांचा ऐतिहासिक समावेश झाल्यामुळे महाराष्ट्र संस्कृतीकडे जागतिक स्तरावर सर्वदूर अभिमानाने आणि औत्सुक्याने पाहिले जात आहे. रायगड, विजयदुर्ग, साल्हेर, शिवनेरी, लोहगड, जिंजी, राजगड, प्रतापगड, पन्हाळा, खांदेरी, सुवर्णदुर्ग आणि सिंधुदुर्ग हे बारा दुर्ग ‘मराठा मिलिटरी लँडस्केप्स’ या संकल्पने अंतर्गत युनेस्कोच्या यादीत समाविष्ट झाले आहेत.
या महत्त्वपूर्ण ऐतिहासिक प्रसंगाचे औचित्य साधून आणि छत्रपती शिवाजी महाराजांच्या जीवनातील कालातीत मूल्ये भावी पिढ्यांपर्यंत पोहोचवण्यासाठी, दि. ८ ते १४ सप्टेंबर २०२५ दरम्यान विविध उपक्रमांसह मुंबईतील प्रभादेवी येथील पु. ल. देशपांडे महाराष्ट्र कला अकादमीमध्ये सईशा प्रॉडक्शन्स, मुंबई यांनी “शिवसंस्कार महोत्सव २०२५” आयोजित केला होता. हा महोत्सव इतिहास, संस्कृती आणि प्रेरणेचा एक सुंदर संगम ठरला.
शिवसंस्कार महोत्सव केवळ इतिहासाचे सादरीकरण म्हणून नव्हे, तर आजच्या नागरिकांसाठी, तरुणांसाठी आणि विद्यार्थ्यांसाठी देशभक्ती, नेतृत्व, नीतिमत्ता, चारित्र्य आणि एकता या मूल्यांची आठवण करून देणारा एक जिवंत अनुभव असेल. सईशा प्रॉडक्शन्स, मुंबई गेली १५ वर्ष हा अनमोल वारसा जनमानसापर्यंत पोहोचविण्यासाठी सातत्याने कार्य करीत आहे.
लेखक, गीतकार आणि या उपक्रमाचे अनिल नलावडे म्हणाले, “छत्रपती शिवाजी महाराजांचे जीवन केवळ लढाया आणि विजयांपुरते मर्यादित नाही; त्यात दूरदृष्टी, नीतिमत्ता, नेतृत्वाचे आणि राष्ट्राप्रती आपल्या कर्तव्याचे अमूल्य धडे आहेत. शिवसंस्कार महोत्सवाद्वारे आम्हाला ही मूल्ये तरुण पिढीपर्यंत पोहोचवायची आहेत, जेणेकरून ते एक मजबूत आणि एकसंघ भारत घडविण्यास मोलाची भूमिका बजावतील.”
शिवसंस्कार महोत्सव २०२५ मध्ये मुंबईकरांना छत्रपती शिवाजी महाराजांच्या जीवनावर आधारित विविध पैलूंना अनुभवण्याची संधी मिळाली. महोत्सवाची सुरुवात ‘शिवसंस्कार चित्रकाव्य कलादालनाने’ झाली असून हे कलादालन दिनांक ७ ते १३ सप्टेंबरदरम्यान रोज सकाळी १० ते रात्री ८ या वेळेत पु. ल. देशपांडे महाराष्ट्र कला अकादमीच्या तळ मजल्यावरील आर्ट गॅलरीत आयोजित करण्यात आले होते. यात श्री. अनिल नलावडे यांनी अनेक वर्ष अभ्यास करून लिहिलेल्या व त्यांच्या संकल्पनेतून साकार झालेल्या १५० पेक्षा जास्त चित्रकाव्यरूप कलाकृतींचा समावेश होता. यातील काही व्यक्तिचित्र चित्रकार राम देशमुख यांच्याकडून तयार करून घेतली गेली होती, तर काही AI न्यूरल रेंडरिंगच्या माध्यमातून सईशा प्रोडक्शन्स, मुंबईने तयार केली होती.
“सईशा प्रोडक्शन्स मुंबई यांनी सर्व शाळा आणि महाविद्यालयांना आवाहन केलं आहे की त्यांनी आपल्या विद्यार्थ्यांसहित ‘शिवसंस्कार चित्रकाव्य कलादालनाला’ नक्की भेट द्यावी. या प्रदर्शनातून त्यांना भारताचा समृद्ध इतिहास आणि राष्ट्रीय वारसा अनुभवता येईल.”
कार्यक्रम संचालक, दिग्दर्शक व निवेदक पद्मश्री राव म्हणाल्या, “हा महोत्सव म्हणजे छत्रपती शिवरायांना पुन्हा नव्याने जाणून घेण्याची संधी – फक्त एक शूर योद्धा म्हणून नव्हे, तर दूरदृष्टी असलेले राजकारणी आणि नैतिक शक्तीचा आधारस्तंभ म्हणूनही. कविता, गाणी आणि संवाद यांच्या माध्यमातून आम्ही इतिहास आणि आजचा काळ यांच्यातला संबंध अजून जवळ आणण्याचा प्रयत्न करत आहोत.”
दि. ८ ते १२ सप्टेंबर दरम्यान दररोज आयोजित होणाऱ्या ‘युद्धापलीकडले शिवराय ’ या चर्चा मालिकेचा विशेष भाग असेल. या मालिकेत छत्रपती शिवाजी महाराजांच्या मूल्यांवर आणि नेतृत्वावर प्रकाश टाकण्यात येईल. पद्मश्री राव आणि अनिल नलावडे हे महाराजांच्या विविध पैलूंवर माहितीपर सत्र घेणार आहेत. या माहितीपर सत्रासाठी दररोज ५० मर्यादित आसने असणार आहेत.
या चर्चासत्रांत पुढील विषयांवर सखोल विचारमंथन केले जाईल: बालपणी आईवडिलांनी दिलेल्या संस्कारातून शिवराय काय शिकले?, शिवरायांचे नेतृत्वगुण, युद्धनीती, रणनीती, दुर्गनीती, स्वराज्य आणि सुराज्य याचं महत्व, चारित्र्य आणि शीलवान व्यक्तिमत्त्व, शिवरायांचे व्यवस्थापनकौशल्य आणि माणसांमधली गुंतवणूक.
१४ सप्टेंबर रोजी ‘शिवराय जगतांना’ या कार्यक्रमात कविता, संवाद आणि अनप्लग्ड संगीत एकत्र आणून सह्याद्री, राजमाता जिजाऊ, किल्ले, दूरदृष्टी आणि स्वराज्य यांसारख्या विषयांचा शोध घेतला जाईल. तसेच, कला अकादमीच्या मिनी सभागृहात शिवचरित्रावर आधारित श्री. अनिल नलावडे यांनी लिहिलेल्या पाच नवीन गाण्यांचे प्रकाशन होईल. यात कलाकार श्रीरंग भावे, केतकी भावे जोशी, पद्मश्री राव आणि अनिल नलावडे सहभागी होतील.
महोत्सवाचा समारोप १४सप्टेंबर रोजी स्वातंत्र्यवीर सावरकर राष्ट्रीय स्मारक, शिवाजी पार्क, दादर येथे ‘संगीत शिवस्वराज्यगाथा’ या संगीतमय ऐतिहासिक कार्यक्रमाने होईल. ४३ नवीन रचनांद्वारे छत्रपती शिवाजी महाराजांचे प्रेरणादायी जीवन सादर करणाऱ्या या पुरस्कारविजेत्या संगीतमय कार्यक्रमात नचिकेत देसाई, श्रीरंग भावे, केतकी भावे जोशी, अनिल नलावडे आणि पद्मश्री राव सहभागी होतील. हा कार्यक्रम फक्त सशुल्क रू. १५०/- इतका असेल. याची तिकिटे बुकमायशो वर उपलब्ध आहेत. बाकी सर्व उपक्रम विनामूल्य आहेत.
हा महोत्सव फक्त कार्यक्रमांची मालिका नाही, तर विचार जागवणारा, प्रेरणा देणारा आणि समाजमनाला घडवणारा शिवसंस्कार आहे.
या महोत्सवात मोठ्या संख्येने सहभागी व्हा, शिवसंस्कारांची ऊर्जा स्वतः अनुभवा, सोबत इतरांना ही अनुभवण्यासाठी घेऊन या.. कारण ‘शिवचरित्र हा राष्ट्राच्या उज्ज्वल भवितव्याचा पाया आहे.’
विश्वधर्मी प्रा.डॉ. विश्वनाथ दा. कराड यांच्या संकल्पनेतून साकार
पुणे, ९ सप्टेंबरः रामेश्वर रुई या गावाचे नुकतेच ‘विश्वधर्मी मानवतातीर्थ’ असे नामकरण झाले. त्याचेच पुढचे पाऊल म्हणजे ‘विश्वधर्मी मानवतातीर्थ भवन’ या वास्तूची निर्मिती होय. विश्व शांती केंद्र आळंदी, माईर्स एमआयटी, पुणे भारत तर्फे या भवनाचा लोकार्पण सोहळा ५, ६ आणि ७ ऑक्टोबर रोजी विश्वधर्मी मानवता तीर्थ रामेश्वर रुई येथे होणार आहे. यावेळी देशभरातील विविध धर्मांचे मान्यवर मोठ्या संख्येने उपस्थित राहतील.
त्याची पूर्व तयारी या ‘विश्वधर्मी मानवता तीर्थ भवन’ च्या ऐतिहासिक स्वरूपाचे संपूर्ण नक्षीदार लाकडी बांधकाम उभारण्याचा कार्यक्रम तसेच सदरील भवनाच्या आवारात पवनपुत्र श्री हनुमान यांचा भव्य व देखणा ११ फूट उंचीचा पुतळा स्थापन करण्याचे काम नुकतेच संपन्न झाले. यावेळी विश्वधर्मी प्रा.डॉ. विश्वनाथ दा. कराड, सौ. उषा विश्वनाथ कराड, रामेश्वर-रुईचे माजी सरपंच तुळशीराम दा कराड, काशीनाथ दा कराड, राजेश कराड आणि पंचक्रोशितील नागरिक मोठ्या संख्येने उपस्थित होते. सदरील ‘ विश्वधर्मी मानवता तीर्थ भवनात’ विविध धर्माचे संस्थापक, जगाच्या इतिहासातील मान्यवर संत, सज्जन, वैज्ञानिक, विचारवंत, दार्शनिक यांचे सचित्र दर्शन माहितीद्वारे भवन सजविण्यात येऊन जगाला शांती व मानवतेचा संदेश देण्याचे कार्य करण्यात येणार आहे. यावेळी प्रा.डॉ. विश्वनाथ दा. कराड म्हणाले,” महाराष्ट्रातील मराठवाड्यातील रामेश्वर रुई हे गांव यज्ञभूमी म्हणून परिचित आहे. याच गावातील हिंदू मुस्लिम बांधवांनी एकत्र येऊन जवळपास २७५ वर्षापूर्वी उध्वस्त केलेले श्रीराम मंदिर व सुमारे ६३ वर्षापूर्वी उध्वस्त करण्यात आलेली जामा मस्जिद व ख्याजा जैनुद्दिन चिश्ती दर्गा यांची पुनर्बांधणी केली. भारताच्या इतिहासातील सांप्रदायिक सद्भावनेचे हे एक उत्कृष्ट उदाहरण आहे. त्याचबरोबर तथागत भगवान गौतम बुद्ध विहार व भारतरत्न डॉ. बाबासाहेब आंबेडकर स्मृती भवन यांची उभारणी केली आहे. अशा ऐतिहासिक, सांस्कृतिक, सामाजिक अशा विविध उपक्रमांमुळे हे गाव खर्या अर्थाने मानवतातीर्थ म्हणून जागतिक स्तरावर उदयास आले आहे.” राष्ट्रपिता महात्मा गांधी यांची १५६वीं तसेच भारताचे दुसरे पंतप्रधान व साधी राहणी व उच्च विचार सरणी याचे मुर्तीमंत प्रतिक असलेले भारतरत्न श्री लाल बहाद्दुर शास्त्री यांची १०१वीं जयंती याचे औचित्य साधून सदरील विश्वशांती मानवता तीर्थ भवनाचे लोकार्पण योजण्यात आले आहे. पंचक्रोशितील नागरिकांनी विविध सामाजिक, सांस्कृतिक, शैक्षणिक उपक्रमांसाठी राष्ट्रीय ऐक्याचे प्रतिक असणार्या या भवनाचा सद्उपयोग करावा, असे आवाहन डॉ. कराड यांनी केले.
▪️ रिंगरोड, पुरंदर विमानतळासह विकासकामांना होणार मदत
पुणे, दि.९: नैसर्गिक वाळूला पर्याय म्हणून कृत्रिम वाळू निर्मितीचे शासनाचे धोरण लागू करण्यात आले असून, जिल्ह्यात सुरु असलेल्या विविध विकास कामांच्या मागणी-पुरवठा तुटवड्याचा विचार करता कृत्रिम वाळू निर्मितीकरिता अधिकाधिक व्यवसायिकांनी नोंदणी करावी, असे आवाहन जिल्हाधिकारी जितेंद्र डुडी यांनी केले.
जिल्हाधिकारी कार्यालयाच्या बहुउद्देशीय सभागृहात कृत्रिम वाळू धोरण व अमलबजावणी कार्यशाळेचे आयोजन करण्यात आले. यावेळी जिल्हाधिकारी श्री. डुडी यांनी उद्घाटन केले. या प्रसंगी अपर जिल्हाधिकारी सुहास मापारी, निवासी उपजिल्हाधिकारी ज्योती कदम, जिल्हा खनिकर्म अधिकारी आनंद पाटील यांच्यासह संबंधित विभागाचे अधिकारी, शार्या इन्फोटेकचे पदाधिकारी, पर्यावरण सल्लागार, प्रायव्हेट टेकचे प्रतिनिधी, खाणपट्टाधारक, क्रशरधारक मोठ्या संख्येने उपस्थित होते.
श्री. डुडी म्हणाले की, महसूल व वन विभाग यांच्या २३ मे २०२५ रोजीच्या शासन निर्णयान्वये राज्यात विविध बांधकामासाठी कृत्रिम वाळूचा वापर करण्याबाबत धोरण निश्चित करण्यात आले आहे. जिल्ह्यामध्ये प्रथम पुढाकार घेणाऱ्या राज्यातील अधिवास असलेल्या आणि नोंदणी केलेल्या ५० संस्थांना एम-सँड युनिट स्थापन करण्याकरिता उद्योग व महसूल विभागाच्या विविध सवलती मिळणार आहेत. महसूल व वन विभागाच्या १७ जुलै २०२५ रोजीच्या शासन परिपत्रकान्वये कृत्रिम वाळू धोरणाच्या अंमलबजावणीची कार्यपद्धती निश्चित करण्यात आलेली आहे.
नैसर्गिक वाळूला पर्याय म्हणून कृत्रिम वाळू निर्मितीच्या धोरणामुळे जिल्ह्यातील रिंगरोड, पुरंदर विमानतळासह विकासाची विविध कामे वेगाने पूर्ण होऊ शकतील. मागणी व पुरवठा यामध्ये ताळमेळ बसविण्याकरिता प्रयत्न करता येतील. एम-सँड प्रकल्पाकरिता स्वामित्वधनामध्ये ४०० रुपये प्रति ब्रास इतकी सवलत शासनाने दिली असल्याचेही श्री. डुडी यांनी स्पष्ट केले.
या कार्यशाळेत सर्व संबंधित विभागांच्यावतीने करण्यात येणाऱ्या कार्यवाहीबाबत माहिती देण्यात आली. खाणपट्टाधारक व क्रशरधारक यांच्या अडचणी व शंकांचे निरसन करण्यात आले. कार्यशाळेत साधारणतः २०० इच्छुक व्यावसायिकांनी सहभाग नोंदविला. जिल्ह्यातील उपविभागीय अधिकारी, तहसिलदार हे देखील दुरदृष्यप्रणालीद्वारे सहभागी झाले.
पिंपरी (दि.९) : पुणे महानगर प्रदेश विकास प्राधिकरणातर्फे आकुर्डीतील ग.दि. माडगुळकर सभागृहात मंगळवारी ६.२५% जमीन परताव्याबाबत संबंधित शेतकऱ्यांसोबत संवाद मेळावा घेण्यात आला. सन १९७२ ते १९८३ या कालावधीत तत्कालीन पिंपरी चिंचवड नवनगर विकास प्राधिकरणाने संपादित केलेल्या जमिनींच्या मोबदल्यात शेतकऱ्यांना ६.२५% परतावा कसा, मिळणार याबाबत जमीन व मालमत्ता विभागाचे सह आयुक्त हिम्मत खराडे यांनी मार्गदर्शन केले.
संबंधित योजना शेतकऱ्यांची मागणी पूर्ण होण्याकडे एक महत्वाचे पाऊल आहे. यावेळी ६.२५% जमीन परताव्याची कार्यपद्धती व अर्ज प्रक्रियेबाबत शेतकऱ्यांना सविस्तर माहिती देण्यात आली. ज्या मूळ जमीनमालक मयत आहेत, त्यांच्या वारसांनी वारस प्रमाणपत्रासह अर्ज करणे बंधनकारक आहे. १४ मार्च २०२४ या शासन निर्णयानुसार प्राधान्यक्रमाने पात्र शेतकऱ्यांना परतावा मिळावा, या उद्देशाने महानगर आयुक्त डॉ. योगेश म्हसे, अतिरिक्त महानगर आयुक्त दीपक सिंगला यांच्या निर्देशानुसार संबंधित बैठक घेण्यात आली.
संबंधित १०६ शेतकऱ्यांना ६.२५% जमीन परताव्याचा लाभ व्हावा, या दृष्टिकोनातून पीएमआरडीएतर्फे वारंवार जनजागृती करण्यात येत आहे. यात आतापर्यंत १७ शेतकऱ्यांना परतावा देण्यात आला असून २ प्रकरणे पेपर नोटीसवर, १ सुनावणीसाठी तर ५ प्रकरणे न्यायप्रविष्ठ आहेत. यात २९ प्रकरणात संबंधितांना त्रुटीबाबत कळविण्यात आले आहे.
यावेळी पुणे महानगर प्रदेश विकास प्राधिकरणाच्या जमीन व मालमत्ता विभागाचे सह आयुक्त हिम्मत खराडे, तहसीलदार अभिजित जगताप, विशेष भूसंपादन अधिकारी विठ्ठल उदमले, व्हिडिओ कॉन्फरद्वारे भूसंपादन समन्वय अधिकारी कल्याण पांढरे, संगीता राजापूरकर-चौगुले आदी अधिकारी उपस्थित होते. शासन निर्णयाचा लाभ घेऊन संबंधित शेतकऱ्यांना त्यांच्या हक्काचा परतावा मिळवून देण्यासाठी पीएमआरडीए कटीबद्ध असल्याचे यावेळी अधिकाऱ्यांनी स्पष्ट केले.
अर्जदारांसाठी विशेष शिबिर या प्रक्रियेदरम्यान शेतकऱ्यांना दाखले वितरित करण्यात आले असून उर्वरित अर्जदारांसाठी २५ व २६ सप्टेंबरला विशेष शिबिर घेण्यात येणार असल्याचे भूसंपादन समन्वय अधिकारी कल्याण पांढरे यांनी सांगितले. यावेळी निगडी, चिखली, मोशी, रहाटणी, रावेत, आकुर्डी आदी गावातील शेतकऱ्यांनी अर्ज करण्याची कार्यपद्धती समजून घेत त्यासाठी लागणारे कागदपत्रे, आपल्या अडचणी आणि त्यावर नियमानुसार काय उपाय आहेत यावर चर्चा करण्यात आली.
संबंधितांनी अर्जासोबत सादर करावयाची कागदपत्रे १. विहीत नमुन्यात अर्ज. २. संपादनापुर्वी व नंतरचा ७/१२ उतारा व फेरफार ३. मुळ जमिन मालक मयत असल्यास मृत्युचा दाखला व दिवाणी कोर्टाचे वारस प्रमाणपत्र ४. विशेष भूसंपादन अधिकारी यांचेकडील भूसंपादन दाखला. ५. भूमीसंपादन कायदा १८९४ चे कलम १८,२८,३० नुसार मोबदल्यात वाढ करणेबाबत संपादनाबाबत कोणत्याही कोर्टात दावा दाखल केले नसलेबाबत व वारसाबाबत रु.१००/- स्टॅम्प पेपरवर प्रतिज्ञापत्र. ६. रु.५००/- च्या स्टँप पेपरवर केलेले क्षतीपुर्ती बंधपत्र.
