पुणे :एमबीए झालेला मुलगा नपुंसक असताना मुलीच्या आई वडिलांची फसवणुक करुन लग्न लावून दिले.आणि मुल व्हावे, यासाठी सासर्‍याबरोबर शारीरीक संबंध ठेवण्यासाठी मुलाने व सासुने त्रास दिला. ही विवाहिता एकटी असताना निवृत्त सहायक पोलीस आयुक्ताने रुममध्ये शिरुन तिला आपल्या पदाची व ओळखीची भिती दाखवून बळजबरी करण्याचा प्रयत्न केल्याचा धक्कादायक प्रकार समोर आला आहे. याप्रकरणी सहकारनगर पोलिसांनी निवृत्त सहायक पोलीस आयुक्त (वय ६१), त्याची पत्नी (वय ५६) व मुलगा (वय ३५) यांच्याविरुद्ध गुन्हा दाखल केला आहे .

याबाबत एका ३० वर्षाच्या विवाहितेने सहकारनगर पोलीस ठाण्यात फिर्याद दिली आहे. ही घटना ५ मे ते २३ जून २०२५ दरम्यान घडली आहे. ही घटना घडल्यानंतर हे सर्व कुटुंब घराला कुलूप लावून पसार झाले असल्याचे सहकारनगर पोलिसांनी सांगितले.याबाबत पोलिसांनी दिलेल्या माहितीनुसार, यातील सासरे हे निवृत्त सहायक पोलीस आयुक्त आहेत. त्यांचा मुलगा एमबीए झाला आहे. मुलगा नपुंसक आहे, हे माहिती असताना ती गोष्ट लपवून ठेवून पुणे जिल्ह्यातील तरुणीशी त्याचा मे महिन्यात विवाह केला. आपला पती हा नपुसंक असल्याचे फिर्यादी यांच्या लक्षात आले. त्यावर मुल व्हावे, यासाठी तिचा पती व सासु यांनी सासरे बरोबर संबंध ठेवावेत, यासाठी विवाहितेला शारीरीक व मानसिक त्रास दिला. २३ जून रोजी फिर्यादी रुममध्ये एकटी असताना सासरा जबरदस्तीने रुममध्ये शिरला. आपल्या सुनेला पदाची व ओळखीची भिती दाखवून आपल्याबरोबर शारीरीक संबंध ठेवण्याबद्दल मागणी करुन तिचा हात धरुन तिच्यावर बळजबरी करण्याचा प्रयत्न केला. त्याला तिने विरोध केल्यावर जीवे मारण्याची धमकी दिली. या घटनेनंतर फिर्यादी या माहेरी निघून गेल्या. त्यानंतर तिने आता याबाबत सहकारनगर पोलीस ठाण्यात फिर्याद दिली आहे. या घटनेची माहिती मिळताच त्यांनी या कुटुंब घर बंद करुन पसार झाले असल्याचे दिसून आले आहे. महिला पोलीस उपनिरीक्षक काळे तपास करीत आहेत.

पुणे, दि. १०: महाराष्ट्र विधानमंडळ लोक लेखा समितीची बैठक समिती प्रमुख आमदार विजय वडेट्टीवार यांच्या अध्यक्षतेखाली विभागीय आयुक्त कार्यालय येथे आज झाली. यावेळी भारताचे नियंत्रक व महालेखापरीक्षक (कॅग) यांच्या सन २०१८-१९ या वर्षाच्या आर्थिक व महसूल क्षेत्र अहवालातील अनर्जित उत्पन्नाच्या महसूल वसूलीबाबतच्या परिच्छेदाच्या अनुषंगाने संबंधित अधिकाऱ्यांकडून वस्तुस्थितीची माहिती घेऊन म्हणणे नोंदविण्यात आले.

बैठकीस समिती सदस्य आमदार प्रकाश सोळंके, सत्यजीत तांबे, समीर कुणावार, कृपाल तुमाने, रोहित पवार, महेश शिंदे, विधान मंडळाचे सहसचिव नागनाथ थिटे, उपसचिव उमेश शिंदे उपस्थित होते.

बैठकीत विभागीय आयुक्त डॉ. चंद्रकांत पुलकुंडवार, जिल्हाधिकारी जितेंद्र डूडी, उपविभागीय अधिकारी यशवंत माने, वैभव नावडकर, निवासी उपजिल्हाधिकारी ज्योती कदम, महसूल तहसीलदार उमाकांत कडनोर यांनी माहिती सादर केली. अपर आयुक्त (महसूल) तुषार ठोंबरे यांनी स्वागत केले.

पुणे- अखिल भारतीय मराठी साहित्य परिषदेच्या वतीने १७ वे छत्रपती संभाजी महाराज मराठी साहित्य संमेलन रविवार दिनांक ५ ऑक्टोबर २०२५ रोजी महात्मा फुले सांस्कृतिक भवन वानवडी पुणे येथे होणार असल्याची माहिती अखिल भारतीय मराठी साहित्य परिषदेचे राष्ट्रीय अध्यक्ष
डॉ. शरद गोरे यांनी दिली आहे. यावेळी अखिल भारतीय मराठी साहित्य परिषदेचे प. म. कार्याध्यक्ष. विक्रम मालन आप्पासो शिंदे उपस्थित होते.

ग्रंथपूजनाने या संमेलनाची सुरुवात होणार असून त्यानंतर उद्घाटन समारंभ, पुरस्कार वितरण, परिसंवाद, कविसंमेलन असे संमेलनाचे स्वरूप असणार आहे. १६ भाषांमध्ये पारंगत असलेले बुधभूषण, नायिकाभेद, सातशतक, नखशिख, ग्रंथाचे लेखन करून मानवी मूल्यांपासून राजनीती, समाजशास्त्र, अर्थशास्त्र, नैतिकशास्त्र, धर्मशास्त्र, विधीशास्त्र, न्यायशास्त्र, वनस्पतीशास्त्र, यासह अनेक विषयांत निष्णात असलेले जागतिक कीर्तीचे विचारवंत छत्रपती संभाजी महाराज यांच्या साहित्यिक पैलूंचा व त्यांच्या इतिहासाचा प्रचार व प्रसार व्हावा म्हणून या साहित्य संमेलनाचे आयोजन दरवर्षी राज्यभरात विविध ठिकाणी केले जाते. आतापर्यंत राज्यात छ. संभाजी महाराज यांच्या नावाने १६ साहित्य संमेलने यशस्वीपणे पार पडली आहेत. पुण्यात होणाऱ्या या साहित्य संमेलनात रसिक साहित्यिकांनी सहभागी व्हावे यासाठीही आवाहन यावेळी करण्यात आले.

पुणे : मराठी भाषेची संस्कृती व परंपरा जतन करण्याची जबाबदारी फक्त साहित्यिकांची अथवा मराठी भाषिकांची नसून शासनाची देखील आहे. महायुतीच्या सरकारने हिंदी भाषेची सक्ती केलेली नाही. त्रिभाषा सूत्रासंदर्भात आधीच्या सरकारने स्थापन केलेली समिती शासकीय होती की त्या राजकीय पक्षाची होती या विषयी विश्लेषण व्हायला हवे, अशी भूमिका उद्योग व मराठी भाषा मंत्री उदय सामंत यांनी आज अखिल भारतीय मराठी साहित्य महामंडळाच्या व्यासपीठावर मांडली. आधुनिक जगाला सामोरे जाताना छत्रपती शिवाजी महाराज यांच्या राजधानीत होत असलेल्या संमेलनासाठी सर्वतोपरी सहकार्य करण्याची भूमिका मांडत मराठी भाषा विभागाकडून एक कोटी रुपयांचा अतिरिक्त निधीही त्यांनी जाहीर केला.
महाराष्ट्र साहित्य परिषद, शाहूपुरी शाखा आणि मावळा फाउंडेशन आयोजित अखिल भारतीय मराठी साहित्य महामंडळाच्या 99व्या अखिल भारतीय मराठी साहित्य संमेलनाच्या बोधचिन्हाचे अनावरण बुधवारी (दि. 10) ख्यातनाम हास्यचित्रकार शि. द. फडणीस यांच्या हस्ते झाले. त्या वेळी सामंत बोलत होते. महाराष्ट्र साहित्य परिषदेच्या माधवराव पटवर्धन सभागृहात कार्यक्रमाचे आयोजन करण्यात आले होते. वयाची शंभरी पार केलेल्या शि. द. फडणीस यांनी हे बोधचिन्ह साकारले आहे.
सार्वजनिक बांधकाम मंत्री तसेच साहित्य संमेलनाचे स्वागताध्यक्ष शिवेंद्रसिंहराजे भोसले यांची प्रमुख उपस्थिती होती. अखिल भारतीय मराठी साहित्य महामंडळाचे अध्यक्ष प्रा. मिलिंद जोशी अध्यक्षस्थानी होते तर महामंडळाच्या कार्यवाह सुनिताराजे पवार यांची सन्मानीय उपस्थिती होती. कार्याध्यक्ष विनोद कुलकर्णी, कोषाध्यक्ष नंदकुमार सावंत मंचावर होते.
साहित्य संमेलनाच्या नियोजनातही मराठी भाषा विभाग सहभागी होईल, अशी ग्वाही देत उदय सामंत म्हणाले, मराठी भाषेची परंपरा आणि ठेवा जतन करण्यासाठी शालेय शिक्षणात साहित्यिकांवरील अभ्यासक्रम असणे आवश्यक आहे. तसेच इतर भाषांमधील उत्तमोत्तम साहित्य मराठी भाषेत अनुवादीत व्हावे याकरिता अनुवाद समिती स्थापन करण्याचे कार्य सुरू आहे. मराठी भाषेला परदेशातही मान मिळावा यासाठी विश्व मराठी साहित्य संमेलनाचे आयोजन करण्यात येत आहे. त्याचप्रमाणे बालसाहित्य, महिला आणि युवा साहित्य संमेलनाचे आयोजन करण्याचा मानस आहे.
मराठी बोलता येत नाही म्हणून त्याला मारणे ही महाराष्ट्राची संस्कृती नाही. राज्यात राहणाऱ्या अनेक अमराठी व्यक्तींनी मराठी भाषा शिकण्याची इच्छा व्यक्त केली आहे. अशा व्यक्तींना मराठी भाषेचे शिक्षण देण्यासाठी ॲप विकसित करण्यात येत आहे. बोधचिन्हासंदर्भात बोलताना उदय सामंत म्हणाले, हे बोधचिन्ह सरकारलाही बोध देणारे आहे. मराठी भाषेवर अन्याय होऊ नये आणि अन्याय करणाऱ्यांवर वार केला जावा हे या बोधचिन्हातून दर्शविले गेले आहे.
मराठी भाषेच्या विचाराला आणि संस्कार परंपरेला पुढे नेण्यात साहित्य संमेलनांचे अनन्यसाधारण महत्त्व आहे. सातारा येथे होणारे संमेलन नाविन्यपूर्ण आणि वेगळेपण दर्शविणारे तसेच पुढच्या संमेलनाला आदर्श दर्शविणारे ठरेल, असा विश्वासही मंत्री सामंत यांनी व्यक्त केला. मराठी भाषेच्या विकासासाठी उद्योजकांकडून सीएसआरअंतर्गत निधी संकलन करण्यात येत आहे. हा निधीही संमेलनासाठी देण्याची घोषणा त्यांनी केली.
रत्नागिरी जिल्ह्यालाही उत्तमोत्तम साहित्यिक आणि कलाकारांची परंपरा लाभली आहे. त्यामुळे पुढील वर्षी होणाऱ्या साहित्य संमेलनाचे स्वागताध्यक्ष होण्याची संधी मिळावी, अशी अपेक्षाही उदय सामंत यांनी व्यक्त केली.
शि. द. फडणीस म्हणाले, संमेलनासाठी मी साकारलेल्या बोधचिन्हाचे अनावरण माझ्या हस्ते व्हावे हा मोठा योग आहे. व्यंगचित्रकारांना वाटते की, फक्त आम्हीच विनोद करू शकतो; परंतु राजकीय अंगाने विनोद करणारे राजकारणी आज व्यासपीठावर आहेत. त्यामुळे त्यांनी विनोदी लेखनाकडे वळावे अशी मार्मिक सूचनाही केली. शिवकालीन काळात राज्य चालविण्यासाठी फक्त तलवारीच नव्हे तर उत्तम प्रशासनाची गरज होती हे ओळखून छत्रपती शिवाजी महाराज यांनी पेशवे पदाची नेमणूकही सातारहून केली. या लेखणीची व तलवारीची ताकद बोधचिन्हात दर्शविली जावी आणि लेखणीतून साहित्य निर्मितीसह सामाजिक दंभ, ढोंगबाजीवर तलवारीप्रमाणे वार व्हावा हे सूचित करण्याचा प्रयत्न केला आहे.
अध्यक्षीय मनोगत व्यक्त करताना प्रा. मिलिंद जोशी म्हणाले, संमेलनापासून दूर गेलेले साहित्य रसिक संमेलनाकडे परत यावेत या करिता प्रयत्न होणे आवश्यक आहे. मराठी भाषेचा अभ्युदय सातऱ्यातूनच झाला आहे. शासनाची इच्छा असल्यास मराठी भाषेचे नक्कीच भले होऊ शकते. संमेलनाकरिता निधी संकलन करताना फक्त लक्ष्मीचीच पूजा न होता सरस्वतीची पूजा देखील अग्रक्रमाने व्हावी अन्यथा सरस्वतची वीणा क्षीण होईल. राजकीय इच्छाशक्ती प्रबळ असल्यास मराठी भाषेला अभिजात दर्जा प्राप्त झाल्यानंतर केंद्र सरकारकडून मिळणारा निधी वाटपातील असमानता दूर करून मराठी भाषेच्या विकासासाठी पोहचणे गरजेचे आहे. सातारा येथे होणारे साहित्य संमेलन अधिक स्वायत्त, साहित्याभिमुख तसेच लोकाभिमुख व्हावे अशी अपेक्षाही व्यक्त केली.
स्वागताध्यक्ष शिवेंद्रसिंहराजे भोसले म्हणाले, सातारा जिल्ह्याला साहित्यिकांची मोठी परंपरा लाभली आहे याचा अभिमान आहे. साहित्य महामंडळाने 33 वर्षांनंतर साताऱ्याला संमेलनाची संधी दिली त्यामुळे सातारकर देखील या संमेलनासाठी उत्सुक आहेत. हे संमेलन उत्तम पद्धतीने यशस्वी करून सातारचा ठसा या संमेलनात आणि मराठी साहित्य क्षेत्रात नक्कीच उमटवू.
प्रास्ताविकात बोधचिन्हाविषयी माहिती देताना विनोद कुलकर्णी म्हणाले, मराठा साम्राज्याची राजधानी असलेल्या साताऱ्याचे महत्त्व बोधचिन्हातून प्रकट करण्यात आले आहे. मराठी भाषेवर अत्याचार होऊ नये तसेच इतर भाषांचे अतिक्रमण होऊ नये त्या करीता लढा दर्शविणारे बोधचिन्ह साकारण्यात आले आहे.
मान्यवरांचे स्वागत शिवेंद्रसिंहराजे भोसले यांनी सातारच्या पेढ्यांचा हार घालून केले. कार्यक्रमाचे सूत्रसंचालन स्नेहल दामले यांनी केले तर आभार सुनिताराजे पवार यांनी मानले.
हास्यविनोदात रंगला सोहळा
शिवेंद्रसिंहराजे भोसले – उदय सामंत यांच्या गावी जाऊनही त्यांची भेट झाली नाही याचे मनात दु:ख होते परंतु या कार्यक्रमाच्या निमित्ताने त्यांची प्रत्यक्ष भेट झाली याचा आनंद आहे.
शिवेंद्रसिंहराजे भोसले – हा राजकीय सोहळा नाही. राजकीय सोहळ्याप्रमाणे एकाच हाराने सत्कार न करता दोन्ही पाहुण्यांसाठी वेगवेगळे हार आणले आहेत.
उदय सामंत – सत्कारासाठी दोन वेगवेगळे हार आणले आहेत, हे मलाही समजले. माझा हार माझ्या वाहनात पोहोचला असून त्यातील पेढे मी रात्री खाणार आहे.
प्रा. मिलिंद जोशी – पुणेकर नुसतेच गोड बोलतात परंतु सातारकर गोड बोलत नाहीत तर गोड पेढे देऊन काम करवून घेतात. सत्कारासाठी आणलेल्या हारातील पेढे सातारच्या मोदींचे आहेत, हे मात्र कुणी सांगत नाहीत.

पुणे-४० वर्षांपासूनची “पुष्पक वाहिनी” ही शववाहीकेची सेवा अचानक बंद का करण्यात आली ? असा सवाल घेऊन खासदार सुप्रिया सुळे थेट PMPML कार्यालयात गेल्या आणि पुष्पगुच्छ देत गांधीगिरी मार्गाने पीएमपीएमएलचे अध्यक्ष एस देवरे यांना याबाबत विचारणा केली .पुणे शहरातील सार्वजनिक वाहतूक व्यवस्था नागरिकांच्या सेवेसाठी सज्ज ठेवण्यासाठी जास्तीत जास्त प्रमाणात बसेस रस्त्यावर आणाव्यात अशीही सुप्रिया सुळे यांनी मागणी केली. गेल्या अनेक वर्षांपासून सेवा देणाऱ्या “पीएमपीएमएल”च्या अनेक कर्मचाऱ्यांना अजूनही सेवेत कायम करण्यात आलेले नाही, या कर्मचाऱ्यांना सेवेत कायम करावे, तसेच या कर्मचाऱ्यांना सातव्या वेतन आयोगाच्या फरकाची रक्कम व त्यांच्या निवृत्तीवेतनाची रक्कम अदा करण्यात यावी अशीही कामगार संघटनेच्या वतीने मागणी मांडली.

राष्ट्रवादी काँग्रेस पार्टी शरदचंद्र पवार पक्षाच्या राष्ट्रीय कार्याध्यक्ष खा. सुप्रिया सुळे यांच्या नेतृत्वात कामगार संघटनेच्या पदाधिकारी व शहराध्यक्ष प्रशांत जगताप यांच्यासह पक्षाच्या शिष्टमंडळाने बुधवारी पीएमपीएमएलचे अध्यक्ष एस देवरे यांची भेट घेतली.यावेळी खासदार सुप्रिया सूळे, प्रशांत जगताप, विशाल तांबे, सचिन दोडके, शिवाजीराव खटकाळे, सुनिल नलावडे, अनिता इंगळे आदि मान्यवर उपास्थित होते.

गेल्या ४० वर्षांपासून पीएमपीएमएलच्या वतीने सुरू असलेली “पुष्पक वाहिनी” ही शववाहीकेची सेवा अचानक बंद करण्यात आली आहे. पुणेकरांच्या दुःखाच्या प्रसंगाला धावून येणारी ही सेवा अचानक बंद करण्यात आली ही बाब दुर्दैवी आहे. तातडीने ही सेवा पूर्ववत सुरू करावी अन्यथा अंत्ययात्रा घेऊन पीएमपीएमएलच्या स्वारगेट, पुणे येथील मुख्य कार्यालयावर मोर्चा आणण्यात येईल असा इशारा प्रशांत जगताप यांनी दिला.

पीएमपीएमएल च्या प्रशासकीय अधिकाऱ्यांनी या सर्व मागण्यांना सकारात्मक प्रतिसाद दिला असून लवकरात लवकर याबाबत उचित कार्यवाही होईल ही अपेक्षा शहराध्यक्ष प्रशांत जगताप यांनी व्यक्त केली आहे.

पुणे

येथील कर्वे समाजसेवा संस्थेमध्ये गेली अकरा वर्षापासून शिक्षण सेवा दिलेले तसेच सनराइज समाजकार्य महाविद्यालय श्रीगोंदा चे प्र प्राचार्य म्हणून नुकतेच रुजू झालेले प्रा चेतन दिवाण यांना पुणे येथील नामांकित जाधव वर ग्रुप ऑफ इन्स्टिट्यूटसचा आदर्श शिक्षक पुरस्कार नुकताच संस्थेचे उपाध्यक्ष ॲड शार्दुलराव जाधव यांच्या वाढदिवसानिमित्त महाराष्ट्र एज्युकेशन सोसायटीचे अध्यक्ष एअर मार्शल डॉ भूषण गोखले व प्रतिभा ग्रुप ऑफ इन्स्टिट्यूटसचे संस्थापक अध्यक्ष डॉ दीपक शहा यांच्या हस्ते तसेच संस्थेचे अध्यक्ष प्राचार्य सुधाकर राव जाधवर यांच्या प्रमुख उपस्थितीमध्ये नुकताच प्रदान करण्यात आला

प्रा चेतन दिवाण हे गेली वीस वर्षांपासून व्यावसायिक समाजकार्य, मानसिक आरोग्य, दिव्यांगत्व, व्यावसायिक समाजकार्य शिक्षण व संशोधन या विविध क्षेत्रांमध्ये नवोपक्रम उदयास आणणारे तसेच प्रत्यक्ष कार्याद्वारे , प्रात्यक्षिकांद्वारे विद्यार्थ्यांना नवनवीन गोष्टींचा अवलंब करीत अनुभव देणारे तसेच वैविध्यपूर्ण उपक्रम राबवून अनुभव देणारे असे अवलिया प्राध्यापक म्हणून सर्वत्र परिचित असून विद्यार्थ्यांची नाळ समजून साध्या व सरळ भाषेमध्ये प्रात्यक्षिकांद्वारे शिक्षण देणारे प्राध्यापक म्हणून विद्यार्थ्यांमध्ये व शैक्षणिक क्षेत्रामध्ये परिचित आहेत

प्रा चेतन दिवाण हे सावित्रीबाई फुले पुणे विद्यापीठाच्या दिव्यांग अभ्यास मंडळाचे माजी सदस्य तथा अध्यक्ष व विद्या परिषदेचे माजी अध्यक्ष असून राज्यातील बहुतांशी महाविद्यालये, शिक्षण संस्था, विद्यापीठे तसेच महाराष्ट्र शासनाच्या दिव्यांग विभाग, सार्वजनिक आरोग्य विभाग व उच्च शिक्षण विभागाच्या विविध समित्यांवर तज्ञ सदस्य व तज्ञ शिक्षण सल्लागार म्हणून देखील काम पाहत आहेत

विद्यापीठ अनुदान आयोगाद्वारे महाराष्ट्र व गोवा राज्यामध्ये घेण्यात येत असलेल्या समाजकार्य विषयाच्या सेट परीक्षेचे चेअरमन म्हणून ते उत्तम कार्य पार पाडत असून महाराष्ट्र राज्यात नवीन शैक्षणिक धोरण 2020 ची राज्यातील सर्व समाजकार्य महाविद्यालयांमध्ये अंमलबजावणी करण्यासाठी गठित करण्यात आलेल्या समितीचे अध्यक्ष म्हणून देखील ते नवीन शैक्षणिक धोरणाची व्यावसायिक समाजकार्यामध्ये उत्तम प्रकारे अंमलबजावणी करीत आहेत.

महाराष्ट्र राज्य तसेच केंद्र सरकारच्या वतीने राज्यामध्ये यशस्वी व्यसनमुक्ती मोहीम राबविणे, कोविड काळामध्ये राज्य शासनाच्या विविध विभागांबरोबर समन्वय साधून विविध हेल्पलाइन सुरू करीत जनतेचे मानसिक आरोग्य संवर्धन करणे तसेच मानसिक आरोग्य, व्यसनमुक्ती व दिव्यांग क्षेत्रामध्ये पाठीमागील वीस वर्षांपासून दिलेल्या योगदानाची दखल घेत जाधवर ग्रुप ऑफ इन्स्टिट्यूटसच्या वतीने प्रा चेतन दिवाण यांना शिक्षक दिन व संस्थेचे उपाध्यक्ष ऍड शार्दुल राव जाधव यांच्या वाढदिवसाचे औचित्य साधून आदर्श प्राध्यापक पुरस्कार प्रदान करून सन्मानित करण्यात आले

यावेळी सावित्रीबाई फुले पुणे विद्यापीठाचे कुलगुरू डॉ सुरेश गोसावी तसेच सीओईपी टेक्नॉलॉजी विद्यापीठाचे कुलगुरू डॉ सुनील भिरूड यांना आदर्श कुलगुरू, पुणे जिल्हा माध्यमिक शिक्षण विभागाचे शिक्षणाधिकारी प्रा भाऊसाहेब कारेकर यांना आदर्श शिक्षण सेवक , दत्तकला शिक्षण संस्था दौंड चे संस्थापक अध्यक्ष डॉ रामदास झोड यांना आदर्श संस्थापक, तसेच मातोश्री विमलाबाई देशमुख महाविद्यालय अमरावतीच्या प्राचार्य स्मिता देशमुख यांना आदर्श प्राचार्य अशा पुरस्कारांनी या समारंभामध्ये सन्मानित करण्यात आले.

प्रा चेतन दिवाण यांना प्रदान करण्यात आलेल्या आदर्श शिक्षक प्राध्यापक पुरस्काराबद्दल सर्व स्तरातून त्यांचे कौतुक होत असून अभिनंदन व्यक्त करण्यात येत आहे

या कार्यक्रमासाठी विविध क्षेत्रातील मान्यवर जाधवर ग्रुप ऑफ इन्स्टिट्यूट चे सर्व शिक्षक व विद्यार्थी मोठ्या संख्येने उपस्थित होते

पुणे – कौटुंबिक हिंसाचार प्रकरणात गुन्हा दाखल असलेल्या तक्रारदार व त्याचे इतर तीन नातेवाईक यांना अटक न करण्यासाठी बारामती पोलिस ठाण्यातील महिला पोलिस हवालदार यांनी एक लाख रुपये लाचेची मागणी केली. तडजोडीअंती २० हजार रुपयांची लाच स्विकारत असताना सदर पोलिस कर्मचाऱ्यास लाचलुचपत प्रतिबंधक पथक (एसीबी)ने सापळा रचून अटक केली आहे. अंजना बिभीषण नागरगोजे (वय- ३८,रा.बारामती,पुणे) असे अटक करण्यात आलेल्या आरोपी महिला पोलिस हवालदाराचे नाव आहे.

यााबत बारामती पोलिस ठाण्यात आरोपी विरोधात ३९ वर्षीय व्यक्तीने तक्रार दाखल केली आहे. त्यानुसार पोलिस हवालदार अंजना नागरगोजे यांचेवर भ्रष्टाचार प्रतिबंध अधिनियम १९८८ चे कलमानुसार गुन्हा दाखल करण्यात आला आहे. तक्रारदार व त्यांची पत्नी, सासू -सासरे व मेहुणा यांचे विरोधात त्यांच्या मेहुण्याचे पत्नीने बारामती पोलिस ठाण्यात कौटुंबिक हिंसाचाराची तक्रार दिली होती. त्यानुसार त्यांच्यावर गुन्हा दाखल करण्यात आला होता. परंतु या गुन्हयात तक्रारदार यांना महिला पोलिस हवालदार अंजना नागरगोजे यांनी तक्रारदार व त्यांचे तीन इतर नातेवाईक यांना गेट जामीन देऊन अटक न करण्यासाठी एक लाख रुपये लाचेची मागणी केली होती.

तडजोडीअंती तक्रारदार यांची पत्नी व त्यांचे सासू सासरे या चार आरोपींसाठी प्रत्येकी पाच हजार रुपये याप्रमाणे एकूण २० हजार रुपये लाचेची मागणी करण्यात आली. तक्रारदार यांनी याबाबत एसीबीकडे फोनद्वारे माहिती देत तक्रार दाखल केली. त्यानुसार एसीबीचे पथकाने बारामती येथे जाऊन समक्ष भेटून पडताळणी कारवाई केली. त्यावेळी पोलिस हवालदार नागरगोजे यांनी पंचासमक्ष तक्रारदार यांचेकडे कारवाई न करण्यासाठी २० हजार रुपये लाच मागितल्याचे निष्पन्न झाले. त्यानुसार एसीबीचे पथकाने सापळा रचून आरोपीस रंगेहाथ पकडले आहे. एसीबीचे पोलिस अधीक्षक शिरीष सरदेशपांडे, अपर पोलिस अधीक्षक अजित पाटील यांचे मार्गदर्शनाखाली संबंधित कारवाई करण्यात आल्याची माहिती सहाय्यक पोलिस आयुक्त दयानंद गावडे यांनी दिली आहे.