पुणे-सरदार वल्लभभाई पटेल यांची १५० वी जयंती अनुषंगाने पोलीस आयुक्त यांचे वतीने पोलीस मुख्यालय येथे काल सकाळी ०६/३० वा. राष्ट्रीय एकता दौड म्हणजे ५ कि.मी. पायी चालण्याचे (Walk) वॉक/रन फॉर युनिटीचे आयोजन करण्यात आले होते.यास उत्तुंग प्रतिसाद मिळाला .
या कार्यक्रमा दरम्यान प्रथम पोलीस आयुक्त यांच्या हस्ते सरदार वल्लभभाई पटेल यांच्या प्रतिमेस पुष्पहार घालून पूजन करण्यात आले. त्यानंतर उपस्थित सर्व अधिकारी व अंमलदार तसेच महाविदयालयीन मुले/गुली व नागरिक यांनी देशाची एकता, अखंडता व सुरक्षा अबाधित राखण्यासाठी स्वतःला समर्पित करण्याची तसेच देशाची अंतर्गत सुरक्षा सुनिश्चीत करण्याकरीता स्वतःचे योगदान देण्याचा सत्यनिष्ठापूर्वक संकल्प करीत असल्याची शपथ पोलीस आयुक्त यांचे समवेत घेतली.

कार्यक्रमाची सुरुवात पोलीस मुख्यालय शिवाजीनगर, परेड ग्राऊंड येथुन करुन मॉडर्न कॉलेज जंगली महाराज रोड बालगंधर्व चौक डेक्कन जिमखाना नंतर एफ.सी. रोड मुख्यालय मेन गेट मधुन पोलीस मुख्यालय परेड ग्राऊंड येथे पूर्ण करण्यात आली.
या वेळी पोलीस बॅण्डच्या वतीने देशभक्तीपर गीतांचे व झुंबा डान्स सादरीकरण देखील करण्यात आले. तसेच पुणे शहरातील अलका टॉकीज चौक, श्रीमंत दगडूशेठ गणपती मंदिर, सारसबाग, संभाजी उदयान या ठिकाणी देखील पोलीस बॅण्डच्या वतीने देशभक्तीपर गीतांचे सादरीकरण करण्यात आले..
१५० पोलीस अधिकारी, ६१६ पोलीस अंमलदार, ५७० विदयार्थी, १५० नागरिक, ५० लहान मुले असे एकूण १५३६ जण सहभागी झाले होते. सहभागी होणा-यांचे १२ वर्षाखालील सर्व, १२ ते ६० वर्षापर्यंत पुरुष, १२ ते ६० वर्षापर्यत महिला व ६० वर्षावरील ज्येष्ठ नागरीक असे चार गट तयार करण्यात आले होते. तसेच पुणे पोलीस आयुक्तालयातील झोन ०२ मध्ये एकुण २१४० व झोन ०३ मध्ये १३०० लोकांचा सहभाग होता. वॉक फॉर युनिटीचे आयोजनामध्ये फोटोग्राफर, व्हिडीओ शुटींग, वैद्यकीय अधिकारी, अॅम्ब्युलन्स व्यवस्था, निर्जलीकरण औषध साठा, सीपीआर तज्ञ इत्यादी व्यवस्था करण्यात आली होती.
या रन/वॉक फॉर युनिटी कार्यक्रमामध्ये सहभागी झालेले विदयार्थी, नागरिक व पोलीस यांचे हातामध्ये १) एकतेचा जयघोष, भारताचा नवा जोश २) हातात हात, मनात एकसात ३) एकतेचा रंग, देशात उमंग ४) चला मिळून चालू या, भारताला उभ करु या ५) भेद नको रे भावा, एकतेचा लाव दिवा ६) एकतेचा ध्यास, भारताचा विकास ७) सर्व धर्म सर्व जाती, एकतेतच खरी शक्ती ८) Walk together, stronger forever 9) One goal,one soul-Unity makes whole 10) Miles we go, for unity to grow 11) Together we stand, hand in hand 12) Join the race, for unite place असे घोषवाक्य असलेले फलक देण्यात येऊन ते प्रदर्शित करण्यात आले होते.

राष्ट्रीय एकता दौड निमित्त वॉक फॉर युनिटी कार्यक्रम हा पुणे पोलीस आयुक्तालयातील सर्व पोलीस स्टेशन कार्यक्षेत्रात देखील स्थानिक पातळीवर आयोजित करण्यात आला होता. पोलीस स्टेशनच्या परिसरात पायी रॅलींचे आयोजन करण्यात आले होते.
या कार्यक्रमास पोलीस आयुक्त अमितेश कुमार, अपर पोलीस आयुक्त संजय पाटील, अपर पोलीस आयुक्त, गुन्हे पंकज देशमुख, पोलीस उप-आयुक्त मुख्यालय श्रीमती राजलक्ष्मी शिवणकर, पोलीस उप-आयुक्त, वाहतुक. हिंमत जाधव, पोलीस उप-आयुक्त, विशेष शाखा संदीप भाजीभाकरे, पोलीस उप-आयुक्त, गुन्हे निखील पिंगळे, पोलीस उप-आयुक्त, आर्थिक गुन्हे, विवेक मासाळ, पोलीस उप-आयुक्त परिमंडळ १, ऋषीकेश रावळे, पोलीस उप-आयुक्त, परिमंडळ २, मिलींद मोहिते, पोलीस उप आयुक्त, परिमंडळ-३, संभाजी कदम, पोलीस उप-आयुक्त, परिमंडळ-५राजकुमार शिदे तसेच सहायक पोलीस आयुक्त, पोलीस निरीक्षक, सहायक पोलीस निरीक्षक व पोलीस उप-निरीक्षक दर्जाचे अधिकारी आणि पोलीस नियंत्रण कक्ष, वायरलेस, एमटी सेक्शन, विशेष शाखा, गुन्हे शाखा, क्यूआरटी सायबर पो.स्टे. व मुख्यालयाकडील सर्व विभागांचे अधिकारी व अंमलदार सहभागी झाले होते.

पुणे :-शहरातील रस्ते खोदाई आणि खड्डे याबाबत येणाऱ्या तक्रारींची दखल घेत महापालिकेने ३ नोव्हेंबरपासून खड्डेमुक्त रस्ते विशेष अभियान राबविणाचा निर्णय घेतला आहे. महापालिकेचा पथ विभाग आणि १५ क्षेत्रिय कार्यालयांची मिळून १५ टीम्सद्वारे हे काम करण्यात येणार असल्याची माहिती महापालिका आयुक्त नवल किशोर राम यांनी येथे दिली.ते म्हणाले,’ सोमवार अर्थात ३ नोव्हेंबरपासून शहरातील रस्ते खड्डेमुक्त करण्यासाठी विशेष मोहीम हाती घेण्यात येणार आहे. यासाठी पथ विभाग आणि पंधरा क्षेत्रिय कार्यालयांच्या मिळून १५ टीम्स तयार करण्यात येणार आहेत. खड्डेमुक्त रस्ते अभियानासाठी रस्त्यांचे काम करणार्‍या ठेकेदारांचे सहकार्य घेण्यात येणार आहे. महिन्याभरात विशेष मोहीम राबवून सर्व रस्ते खड्डेमुक्त करण्यासाठी आमचे प्रयत्न राहातील.

शहरात मेट्रोचे काम, गृह विभाग आणि महापालिकेच्या माध्यमातून आपत्ती व्यवस्थापनासाठी सुरू असलेल्या फायबर केबल टाकण्यासाठीच्या खोदाईमुळे आणि पावसाळ्यामुळे शहरातील रस्त्यांची अक्षरश: चाळण झाली आहे. खड्डेमय रस्त्यांमुळे पुणेकरांचे आरोग्य धोक्यात आले असून वाहतुकीचा वेग मंदावून कोंडीतही भर पडत आहे. पावसाळा संपत आल्याने तसेच शहरात जानेवारीमध्ये आंतरराष्ट्रीय सायकल स्पर्धा होणार असल्याने त्यापुर्वीच महापालिका प्रशासनाने शहरातील सर्वच रस्ते खड्डेमुक्त करण्यासाठी पावले उचलली आहेत.

महापालिकेकडून शहरात विविध सेवा वाहिन्या टाकण्यासाठी शासकीय, निमशासकीय व खासगी संस्थांना सशुल्क परवानगी दिली जाते. पथ विभागाकडून १ ऑक्टोबर ते ३१ एप्रिलपर्यंत खोदाईला परवानगी दिली जाते. त्यानंतर एक मे ला खोदाई बंद करून ३१ मे पर्यंत रस्ते दुरुस्त करणे बंधनकारक असते. तसेच पथ विभागाकडून पावसाळ्यापूर्वी शहरातील रस्ते दुरुस्ती केले जातात. मात्र, खोदाईनंतर दुरुस्तीची कामे योग्य प्रकारे केली जात नाहीत, त्यामुळे पावसाळ्यात रस्त्यांवर खड्डे पडतात. पावसाचे पाणी आणि खड्डे यामुळे वाहतुक मंदावते.

महापालिकेच्या विविध प्रकल्पांना, कामांना भेट देण्यासह आयुक्त नवल किशोर राम यांनी नागरी प्रश्न सोडवण्यावर भर दिला आहे. पाहणी दौऱ्याच्या दरम्यान त्यांना शहरातील रस्त्यावर पडलेल्या खड्ड्यांमुळे व अशास्त्रीय दुरुस्तीमुळे मोठी समस्या निर्माण झाल्याचे लक्षात आले. या पार्श्वभूमीवर आयुक्तांनी शहरात खड्डे मुक्त रस्ते करण्यासाठी विशेष अभियान राबवण्याचा निर्णय घेतला आहे. हे अभियान ३ नोव्हेंबरपासून सुरू केले जाणार आहे. यासाठी १५ पथके तयार करण्यात येणार आहे. या पथकांना प्रत्येकी १० – १० किलो मीटरची जबाबदारी दिली जाणार आहे. यासाठी ७ ठेकेदारांना काम दिले जाणार आहे. या कामात ठेकेदारांना एक रुपये सुध्दा फायदा होणार नाही, असेही आयुक्त नवल किशोर राम यांनी सांगितले.

जिल्हाधिकारी जितेंद्र डुडी यांच्या मार्गदर्शनाखाली कारवाई

पुणे, दि. 31ऑक्टोबर: अहिल्यानगर जिल्ह्यातील कोपरगाव तालुक्यातील मानेवाडी (ता. कोपरगाव) येथील श्री. नाना जाधव यांनी जिल्हा विधी सेवा समिती, पुणे व जिल्हाधिकारी (स.यो.) पुणे यांचेकडे अर्ज देऊन आपले तसेच इतर नऊ कुटुंबांतील ऊसतोडणीस गेलेले कामगार मौजे राहु (माधवनगर), ता. दौंड, जि. पुणे येथील जमीनमालक हिरामण गणपत गाढवे यांनी बंधक ठेवले असल्याची तक्रार केली होती. संबंधित मालकाने कामगारांना मूळ गावी न जाण्यास सक्ती केली होती तसेच मारहाण, शिवीगाळ, दमदाटी व महिलांचा अनादर करण्यात येत असल्याचे नमूद करण्यात आले होते.

या तक्रारीची दखल घेऊन जिल्हा विधी सेवा समिती, पुणे यांच्या वतीने अॅड. देवभक्त महापुरे, अॅड. सुनिल म्हस्के आणि दीपक पवार यांची समिती गठीत करण्यात आली. समितीतील सदस्य, स्थानिक महसूल प्रशासन, पोलीस यंत्रणा, कामगार आयुक्तालयाचे प्रतिनिधी, मंडळ अधिकारी जयंत भोसले, ग्राम महसूल अधिकारी राहु, कामगार विभाग, पोलीस प्रशासन तसेच स्वयंसेवी संस्थेचे कर्मचारी यांनी घटनास्थळी जावून कारवाई केली. या संयुक्त मोहिमेत एकूण २७ ऊसतोड वेठबिगार कामगार व त्यांच्या कुटुंबीयांना बंधमुक्त करण्यात येऊन संबंधित जमीनमालक हिरामण गणपत गाढवे यांच्याविरुद्ध यवत पोलीस ठाण्यात “The Bonded Labour System (Abolition) Act, 1976” अंतर्गत गुन्हा दाखल करण्यात आला आहे.

सर्व कामगारांना आवश्यक प्रमाणपत्रे देऊन त्यांच्या मूळ गावी जाण्यासाठी वाहतुकीची सोय करून देण्यात आली. ही कारवाई दिनांक २९ ऑक्टोबर २०२५ रोजी पूर्ण करण्यात आली.

ही संपूर्ण कारवाई जिल्हाधिकारी जितेंद्र डुडी यांच्या मार्गदर्शनाखाली पार पाडण्यात आली.

पुणे, दि. 31ऑक्टोबर : आगामी जिल्हा परिषद व पंचायत समिती सार्वत्रिक निवडणूक 2025 च्या पूर्वतयारीच्या अनुषंगाने जिल्हाधिकारी जितेंद्र डुडी यांच्या अध्यक्षतेखाली महसूल व पोलीस प्रशासनातील वरिष्ठ अधिकाऱ्यांची व्हिडिओ कॉन्फरन्सद्वारे आढावा बैठक घेण्यात आली.या बैठकीस जिल्हाधिकारी कार्यालयातील नोडल अधिकारी, उपविभागीय पोलीस अधिकारी (पुणे ग्रामीण), सर्व उपविभागीय अधिकारी, निवडणूक निर्णय अधिकारी तसेच सर्व तहसीलदार उपस्थित होते.

बैठकीदरम्यान जिल्हाधिकारी पुणे आणि पोलीस अधीक्षक, पुणे ग्रामीण यांनी निवडणुकीच्या पार्श्वभूमीवर कायदा व सुव्यवस्था राखण्यासाठी आवश्यक ती तयारी करण्याच्या सूचना दिल्या. सर्व तडीपार प्रकरणांचा गुणवत्तेवर निपटारा करणे, दारूबंदी आदेश निर्गत करणे, शवबंदी आदेशाची काटेकोर अंमलबजावणी करणे तसेच यापूर्वीच्या निवडणुकीतील गुन्ह्यांचा पाठपुरावा करणे यासंबंधी स्पष्ट निर्देश देण्यात आले.

ईव्हीएम व्यवस्थापनासंदर्भात पोलीस आणि उपविभागीय अधिकाऱ्यांनी निवडणूक आयोगाच्या सर्व निर्देशांचे काटेकोर पालन करावे, तसेच ईव्हीएम स्ट्राँग रूमला पुरेशी सुरक्षा व्यवस्था सुनिश्चित करावी अशा सूचना देण्यात आल्या. याशिवाय ईव्हीएमची योग्य हाताळणी, सॉफ्टवेअरमध्ये आवश्यक माहिती भरणे, मतदार यादी अद्ययावत ठेवणे, मतदान वाढीसाठी मतदार जागृती अभियान राबवणे आणि सर्व मतदान केंद्रांवर आवश्यक मूलभूत सुविधा उपलब्ध करून देणे याबाबतही संबंधित अधिकाऱ्यांना मार्गदर्शन करण्यात आले.

बैठकीत निवडणुकीसंबंधित सर्व प्रक्रिया निवडणूक आयोगाच्या निर्देशांप्रमाणे काटेकोरपणे पार पाडाव्यात, अशा सूचना जिल्हाधिकारी जितेंद्र डुडी यांनी यावेळी केल्या.

पुणे, दि. 31ऑक्टोबर: प्रादेशिक परिवहन कार्यालय, पुणे येथे नवीन वाहनांसाठी आकर्षक, पसंतीचा नोंदणी क्रमांक आरक्षित करण्याची फेसलेस (ऑनलाईन) सेवा 1 नोव्हेंबर 2025 रोजी दुपारी 12 वाजल्यापासून सुरू होणार आहे.

ही सेवा पूर्णपणे ऑनलाईन स्वरूपात कार्यान्वित असून, कार्यालयामध्ये ऑफलाईन पद्धतीने शुल्क स्वीकारले जाणार नाही. नागरिकांनी ही सेवा घरबसल्या https://fancy.parivahan.gov.in या संकेतस्थळावरून वापर करता येईल.

सदर फेसलेस सेवा २५ नोव्हेंबर २०२४ पासून कार्यान्वित असून, अर्जदार आधार लिंक मोबाईल क्रमांकाद्वारे ओटीपी घेऊन नोंदणी प्रक्रिया पूर्ण करू शकतात. नव्याने सुरू होणाऱ्या एमएच 12 वाय व्ही मालिकेतील पसंतीचे नोंदणी क्रमांक अर्जदारांना आरक्षित करता येतील. असे उप प्रादेशिक परिवहन अधिकारी, पुणे यांनी प्रसिध्दीपत्रकान्वये कळविले आहे.

पुणे, दि. 31ऑक्टोबर: शासनाच्या निर्देशानुसार दिनांक ७ नोव्हेंबर २०२५ रोजी “वंदे मातरम” या गीताच्या १५० व्या वर्षानिमित्त सर्व तालुक्यांच्या ठिकाणी सामूहिक गानचे आयोजन करण्यात आले आहे. या कार्यक्रमाच्या यशस्वी आयोजनासाठी शासनाच्या सर्व विभागांतील शासकीय व निमशासकीय अधिकारी आणि कर्मचारी यांनी अनिवार्यपणे उपस्थित राहणे आवश्यक असल्याचे आदेश शासनाने जारी केले आहेत. या अनुषंगाने संबंधित अधिकाऱ्यांनी तालुक्याच्या ठिकाणी “वंदे मातरम” गीताच्या सामूहिक गान प्रसंगी उपस्थित राहावे, असे आवाहन तहसिलदार सर्वसाधारण, पुणे यांनी केले आहे.

या उपक्रमाचा उद्देश देशभक्तीची भावना दृढ करणे आणि “वंदे मातरम” या राष्ट्रगीतास १५० व्या वर्षानिमित्त अभिवादन करणे हा असून, जिल्ह्यात हा कार्यक्रम उत्साहात पार पाडावा असे आवाहनही तहसिलदार यांनी केले आहे.

योग्य भूमी अभिलेखांसाठी सुलभ बदल नोंद प्रक्रिया अत्यंत महत्त्वाची – मनोज जोशी

पुणे दि. 31 भारत सरकारच्या भूमी संसाधन विभाग (DoLR), मसूरी येथील लाल बहादूर शास्त्री राष्ट्रीय प्रशासन अकादमी (LBSNAA) आणि पुण्यातील यशवंतराव चव्हाण विकास प्रशासन अकादमी (यशदा) यांच्या सहकार्याने, ‘महसूल न्यायालयीन खटले व्यवस्थापन प्रणालींचे आधुनिकीकरण’ (RCCMS) या विषयावर 31 ऑक्टोबर ते 1 नोव्हेंबर 2025 दरम्यान पुणे येथील यशदा येथे दोन दिवसीय राष्ट्रीय चिंतन शिबिराचे आयोजन केले आहे.

या शिबिराचे उद्घाटन आज (31 ऑक्टोबर) रोजी भारत सरकारच्या भूमी संसाधन विभागाचे सचिव मनोज जोशी; महाराष्ट्र राज्याचे प्रधान सचिव तसेच मुख्य निवडणूक अधिकारी एस. चोकलिंगम; पुण्यातील यशदा’चे महासंचालक निरंजन के. सुधांसू; भारत सरकारच्या भूमी संसाधन विभागाचे सहसचिव कुणाल सत्यार्थी; कर्नाटक राज्याच्या महसूल विभागाचे प्रधान सचिव राजेंद्र कटारिया; आणि तेलंगणाचे अतिरिक्त मुख्य सचिव विनोद अग्रवाल यांच्या उपस्थितीत करण्यात आले. देशभरातील इतर सर्व राज्यांचे प्रतिनिधी देखील या कार्यशाळेत सहभागी होत आहेत.

मनोज जोशी यांनी आपल्या प्रमुख भाषणात आधुनिक, पारदर्शक, कार्यक्षम आणि तंत्रज्ञान आधारित भूमी प्रशासनाचे आपले दृष्टिकोन मांडले. त्यांनी सुधारणा, नवोन्मेष आणि नागरिक-केंद्रित महसूल प्रशासनाचे महत्त्व अधोरेखित केले. देशभरात जरी समान भूमी अभिलेख प्रणाली कार्यरत असली तरीही दुरुस्ती आणि बदल प्रक्रिया प्रत्येक राज्यात वेगवेगळ्या पद्धतीने केली जाते, ज्यामुळे ती वेळखाऊ आणि गुंतागुंतीची बनते, असे त्यांनी नमूद केले. केंद्र सरकारने या समस्यांचे निराकरण करण्यासाठी आधीच काही मार्गदर्शक तत्त्वे जारी केली आहेत आणि या चिंतन शिबिराचे उद्दिष्ट या उपक्रमांवर संवाद सुलभ करण्यासाठी उच्च-स्तरीय व्यासपीठ म्हणून काम करणे, हे असल्याचे त्यांनी सांगितले.

मनोज जोशी यांनी महसूल न्यायालयीन प्रक्रिया सुलभ करणे, हक्कांच्या नोंदींचे मानकीकरण (RoR) करणे तसेच महसूल विषयक संज्ञांचा एकसंध शब्दकोश तयार करण्याचे महत्त्व देखील अधोरेखित केले. “मालमत्ता बाजारातील व्यवहार सुलभ असणे हे भूमीच्या मूल्यात वाढ होण्यासाठी आवश्यक आहे. तसेच बदल नोंद प्रक्रिया सुरळीत असणे हे योग्य भूमी अभिलेखन साठी अत्यंत महत्त्वाचे आहे,” असे ते म्हणाले. जोशी यांनी सर्व सहभागी प्रतिनिधींना देशभरातील भूमी प्रशासन प्रणालींची कार्यक्षमता सुधारण्यासाठी सूचना आणि कल्पना मांडण्याचे आवाहन केले.

कुणाल सत्यार्थी यांनी आधुनिक महसूल न्यायालयीन खटले व्यवस्थापन प्रणालीच्या उद्दिष्टांवर सविस्तर सादरीकरण केले, तसेच महसूल न्यायालयीन प्रकरणांमध्ये प्रक्रिया सुलभ करण्यासाठी काही उपाययोजनांची शिफारस केली. कुणाल सत्यार्थी यांनी विद्यमान प्रक्रिया मजबूत करण्यासाठी अनेक अंतर्दृष्टीपूर्ण उपाय देखील सुचवले.

पुणे, दि. 31 ऑक्टोबर : पुणे जिल्ह्यातील सर्व इच्छुक व्यक्ती व संस्था ज्यांना एम-सॅण्ड (कृत्रिम वाळू) युनिट स्थापन करायचे आहे, त्यांनी जिल्हा प्रशासनाकडे अर्ज करण्याचे आवाहन जिल्हाधिकारी जितेंद्र डुडी यांनी केले आहे.

राज्यातील कृत्रिम वाळू धोरण जाहीर झाले असून, त्याची प्रभावी अंमलबजावणीसाठी मार्गदर्शक सूचना जारी केल्या आहेत. मार्गदर्शक सूचना जिल्हाधिकारी कार्यालय, पुणे, तसेच सर्व उपविभागीय अधिकारी आणि तहसील कार्यालयांमध्ये उपलब्ध आहेत. तसेच ही माहिती https://pune.gov.in या संकेतस्थळावरही अवलोकनासाठी उपलब्ध आहे.

एम-सॅण्ड युनिट स्थापनेसाठी इच्छुकांनी कागदपत्रांसह पूर्ण अर्ज जाहिरात प्रसिद्ध झाल्यापासून एक महिन्याच्या आत जिल्हाधिकारी कार्यालयातील खनिकर्म शाखेत सादर करणे आवश्यक आहे.

अर्जासोबत मिळकतीचा चालू ७/१२ उतारा, वैयक्तिक अर्जदारासाठी – आधारकार्ड व पॅनकार्ड, संस्थेच्या नावाने अर्ज असल्यास – संस्थेची कागदपत्रे, उद्योग आधार नोंदणी प्रमाणपत्र, अर्ज शुल्क रु. ५००/-, महाराष्ट्र प्रदूषण नियंत्रण मंडळाकडून मिळालेल्या CTE परवान्याची प्रत, शंभर टक्के एम-सॅण्ड उत्पादनाबाबतचे रु. १००/- च्या स्टॅम्प पेपरवरील हमीपत्र व दगडाच्या पुरवठा स्रोताचा तपशील जोडणे आवश्यक आहे.

यापूर्वी महाखनिज सॉफ्टवेअर प्रणालीवर एम-सॅण्डसाठी अर्ज केलेल्या युनिटधारकांनाही पुन्हा नव्याने जिल्हाधिकारी, पुणे यांच्याकडे अर्ज सादर करणे आवश्यक आहे.

अधिक माहितीसाठी जिल्हा खनिकर्म अधिकारी, जिल्हाधिकारी कार्यालय, पुणे तसेच संबंधित उपविभागीय अधिकारी किंवा तहसील कार्यालयांशी संपर्क साधावा असे आवाहन जिल्हाधिकारी जितेंद्र डुडी यांनी केले आहे.