मुंबई-माथाडी कामगारांच्या महाराष्ट्र शासनाशी संबंधित असलेल्या विविध प्रश्नांची सोडवणुक होण्यासाठी आज दि.१८ जून,२०१८ पासून आझाद मैदान,मुंबई येथे “महाराष्ट्र राज्य माथाडी, ट्रान्सपोर्ट आणि जनरल कामगार युनियन”च्या पदाधिकारी व कार्यकर्त्यांचे उपोषण आंदोलन सुरु आहे,

या उपोषण आंदोलनामध्ये युनियनचे सरचिटणीस आमदार नरेंद्र अण्णासाहेब पाटील, कार्याध्यक्ष गुलाबराव जगताप, संयुक्त सरचिटणीस वसंतराव पवार, चंद्रकांत पाटील, ऋषिकांत शिंदे, आनंद पाटील, युनियनचे कायदेशीर सल्लागार अॅड.सौ.भारतीताई पाटील, अध्यक्ष एकनाथ जाधव, उपाध्यक्ष सुर्यकांत पाटील, खजिनदार गुंगा पाटील, सहा.खजिनदार भानुदास इंगूळकर, तसेच इतर सर्व पदाधिकारी व बृहन्मुंबई, ठाणे, पालघर, रायगड व महाराष्ट्रातील इतर जिल्ह्यातील प्रमुख कार्यकर्ते मोठ्या संख्येने सहभागी झालेले आहेत. माथाडी सल्लागार समितीची पुनर्रचना करुन त्यावर अनुभवी कामगार नेत्यांच्या नेमणुका कराव्या, माथाडी बोर्डाच्या पुनर्रचना करुन त्यावर युनियनच्या सभासद संख्येच्या प्रमाणात सदस्यांच्या नेमणुका कराव्या, माथाडी बोर्डाच्या कार्यालयीन सेवेत कामगारांच्या सुशिक्षित मुला-मुलीना प्राध्यान्य द्यावे,  महाराष्ट्रातील ३६ माथाडी मंडळाचे एकच माथाडी मंडळ करण्याचा प्रयत्न शासनाने थांबवावा, माथाडी मंडळावर पुर्णवेळ चेअरमन,सेक्रेटरी यांच्या नेमणुका कराव्या, माथाडी कायदा व बोर्डाच्या योजनांचा धोका निर्माण करणारे शासन निर्णय रद्द करावे, मापाडी कर्मचा-यांना बाजार समितीच्या कार्यालयीन सेवेत घ्यावे,कळंबोली स्टील मार्केट व रेल्वे माल धक्क्यावरील कामगारांच्या प्रश्नांची सोडवणुक व्हावी, गुलटेकडी मार्केट, पुणे, लातूर, कोल्हापूर येथिल कामगारांच्या प्रश्नांची सोडवणुक व्हावी, माथाडी कामगारांच्या घरकुलासाठी वडाळा व चेंबूर याठिकाणी दिलेल्या जमिनीसंदर्भातील प्रश्नांची आणि इतर दैनंदिन आदी प्रश्नांची सोडवणुक  तातडीने करण्याबद्दल युनियनने शासनाकडे मागणी केली आहे. माथाडी कामगारांच्या न्याय्य मागणीकडे शासन सतत दुर्लक्ष करीत असल्यामुळे उपोषण आंदोलनाचा निर्णय घेणे भाग पडले असल्याचे पत्रकात युनियनने म्हटले आहे.

गेले अनेक वर्षापासून तेच प्रश्न तीच आश्वासने मात्र प्रत्यक्ष कोणतीच कृती सरकारकडून केली जात नसल्यामुळे तमाम माथाडी कामगारांमध्ये कमालीचा असंतोष पसरला आहे. राज्य सरकारने सकारात्मक भुमिकेतून गेले अनेक वर्षापासून प्रलंबित असलेले माथाडी कामगारांचे प्रश्न तातडीने सोडवावेत, अन्यथा माथाडी कामगारांना उपोषण आंदोलनाबरोबर रस्त्यावर उतरुन तीव्र निदर्शने व धरणे आंदोलन करणे भाग पडेल, असा इशारा “महाराष्ट्र राज्य माथाडी,ट्रान्सपोर्ट आणि जनरल कामगार युनियन” ने दिला आहे.

मुंबई- माथाडी कामगारांशी संबंधित महाराष्ट्र शासनाच्या कामगार, पणन व सहकार, उद्योग व अन्य खात्याअंतर्गत प्रलंबित असलेल्या प्रश्नांची सोडवणुक होण्यासाठी सोमवार दि.१८ जून, २०१८ पासून मंत्रालयाजवळ, सकाळी ८: ३० वाजता महात्मा गांधी यांच्या पुतळ्याला हार व वंदन करून, आझाद मैदानात सर्व पदाधिकारी व कार्यकर्ते आमरण उपोषण करणार असल्याचे महाराष्ट्र राज्य माथाडी, ट्रान्सपोर्ट आणि जनरल कामगार युनियनचे नेते सरचिटणीस नरेंद्र अण्णासाहेब पाटील, कार्याध्यक्ष गुलाबराव जगताप, आमदार शशिकांत शिंदे व अध्यक्ष एकनाथ जाधव यांनी प्रसिध्दी पत्रकाव्दारे जाहिर केले आहे. दि.१३ जून रोजी माथाडी भवन, नवीमुंबई येथे आयोजित केलेल्या विविध माथाडी बोर्डाच्या टोळीचे मुकादम, उपमुकादम, कार्यकत्र्यांच्या बैठकित हा निर्णय निश्चित करण्यात आला.

(१) माथाडी सल्लागार समितीची पुर्नरचना करुन अनुभवी कामगार नेत्यांच्या सदस्य म्हणून नेमणुका कराव्या,

(२) विविध माथाडी मंडळाच्या पुनर्रचना करुन त्यावर युनियनच्या सभासद संख्येच्या प्रमाणात सदस्यांच्या नेमणुका कराव्या,

(३) माथाडी मंडळाच्या कार्यालयीन सेवेत माथाडी कामगारांच्या मुलांना प्राधान्य द्यावे,

(४) माथाडी मंडळावर पुर्णवेळ चेअरमन व सेक्रेटरी यांच्या नेमणुका कराव्या,

(५) महाराष्ट्रातील ३६ माथाडी मंडळाचे एकच माथाडी मंडळ करण्याचा प्रयत्न शासनाने थांबवावा,

(६) माथाडी कायदा व कामगारांच्या हिताला बाधा आणणारे शासनाने काढलेले शासन निर्णय रद्द करावे,

(७) वडाळा घरकुल योजनेसंबंधी महसूल विभागाकडून आदेश मिळणे व चेंबूर येथिल जमिनीवरील झोपड्यांचे अतिक्रमण हटविणे,

(८) नाशिक येथील माथाडी कामगारांच्या लेव्ही व अन्य प्रश्नांची सोडवणुक करणे,

(९) गुलटेकडील मार्केट, पुणे व लातूर येथिल कामगारांच्या प्रश्नांची सोडवणुक करणे,

(१०) माथाडी कायदा व मंडळाच्या योजनेचा दुरुपयोग करणाऱ्या अधिकारी/व्यक्तींना रोखण्यासाठी स्वतंत्र कमिटी गठीत करणे,

(११) बाजार समितीच्या अनुज्ञाप्तीधारक मापाडी कर्मचा-यांना बाजार समितीच्या सेवेत घेणे,

(१२) माथाडी अॅक्ट, १९६९ ला ५० वर्षे पुर्ण होत असल्याने सुवर्णमहोत्सवानिमित्त शासनामार्फत विविध कार्यक्रमाचे आयोजन करणे आदी माथाडी कामगारांचे न्याय्य प्रश्न महाराष्ट्र शासनाकडे संघटनेने मांडलेले आहेत, यासंदर्भात अनेक वेळा संयुक्त बैठकाही झाल्या तसेच लाक्षणिक बंद, मोर्चे यासारखी आंदोलनेही केली, मात्र महाराष्ट्र शासनाने प्रत्येक वेळी प्रश्नांची सोडवणुक करण्याचे फक्त आश्वासन दिले. पण प्रत्यक्षात कामगारांच्या न्याय्य प्रश्नांची सोडवणुक केली जात नसल्याचे महाराष्ट्र राज्य माथाडी, ट्रान्सपोर्ट आणि जनरल कामगार युनियनचे म्हणणे असून, माथाडी कामगारांच्या न्याय्य प्रश्नांची महाराष्ट्र शासनाकडून सोडवणुक व्हावी, यासाठी हा आमरण उपोषण आंदोलनाचा पवित्रा घेणे भाग पडले आहे. याही आंदोलनाची महाराष्ट्र शासनाने त्वरीत दखल न घेतल्यास पुढील आंदोलन अधिक तीव्र केले जाईल, असाही ईशारा युनियनने दिला आहे.

कष्टकरी कामगारांना नोकरीविषयक संरक्षण मिळण्यासाठी स्व. आमदार अण्णासाहेब पाटील यांनी महाराष्ट्र शासनाकडून “माथाडी अॅक्ट,१९६९” हा कायदा व त्यान्वये विविध माथाडी मंडळाच्या योजनांची निर्मिती करुन घेतली, माथाडी मंडळाच्या कामकाजात सुसूत्रता रहाण्यासाठी मंडळाच्या पुनर्रचना करणे, सेवानिवृत्त झालेल्या कर्मचा-यांच्या जागेवर माथाडी कामगारांच्या मुलांना सेवेत घेणे, माथाडी कायद्यात बदलत्या परिस्थितीत सुधारणा करण्याऐवजी मूळ कायद्यात व योजनेत फेरबदल करुन माथाडी कायदा व माथाडी मंडळांच्या योजना धोक्यात आणणारे निर्णय शासन घेत आहे, शासनाने आपली ही भुमिका बदलून सकारात्मक भूमिकेतून माथाडी कामगारांचे प्रश्न सोडवावेत, असेही कळकळीचे आवाहन संघटनेने केले आहे.

पुणे – राज्यातील तरुणाईच्या हाताला रोजगार मिळवून देण्याचे काम उद्योग विभागाने हाती घेतले आहे. त्यासाठी बाळासाहेब ठाकरे रोजगार मेळाव्याची अभिनव संकल्पना राज्य सरकारने सुरू केली आहे. रोजगार मेळावा हा फक्त ‘सोहळा’ नसून  शासनाची ती ‘बांधिलकी’ असल्याचे सांगत या रोजगार मेळाव्याच्या माध्यमातून नोकरी मागणारा आणि देणारा यांच्यात सांगड घालण्याचे काम शासन करत असल्याचे प्रतिपादन उद्योगमंत्री सुभाष देसाई यांनी आज केले.

राज्य शासनाचा उद्योग विभाग आणि सी.आय.आय.च्यावतीने उरळी देवाची जि. पुणे येथे आयोजित पहिल्या बाळासाहेब ठाकरे रोजगार मेळाव्याच्या उद्घाटन प्रसंगी उद्योग मंत्री सुभाष देसाई बोलत होते. यावेळी पालकमंत्री गिरीश बापट, जलसंपदा राज्यमंत्री विजय शिवतारे, शिवसेनेचे युवा सेना प्रमुख आदित्य ठाकरे, खादी ग्रामोद्योग महामंडळाचे विशाल चोरडीया, उद्योग विभागाचे विकास आयुक्त डॉ. हर्षदीप कांबळे, जिल्हाधिकारी नवल किशोर राम, सी. आय. आय.चे महाव्यवस्थापक आशिष केशरवानी उपस्थित होते.

उद्योग मंत्री सुभाष देसाई म्हणाले, राज्यातील उद्योगवाढी बरोबरच तरुणांच्या हाताला काम मिळवून देण्याचे काम उद्योग विभागाचे आहे. राज्यात उद्योगांची संख्या वाढली की त्यांना काम करणाऱ्या कुशल कामगारांचीही गरज असते, असे कुशल कामगार या मेळाव्याच्या माध्यमातून उद्योजकांना मिळणार आहेत. बाळासाहेब ठाकरे रोजगार मेळाव्यासाठी पहिल्याच आठवड्यात 8 हजार 800 उमेदवारांनी ऑनलाईन नोंदणी केली होती. तर दोन ते तीन हजार नव्या उमेदवारांनी आज प्रत्यक्ष नोंदणी केली आहे. हा पहिलाच मेळावा अत्यंत यशस्वी झाला आहे. याच प्रकारचे मेळावे राज्यभर घेण्यात येणार आहेत. यासाठी एका स्वतंत्र कक्षाची स्थापना करून या मेळाव्याच्या माध्यमातून नोंदणी केलेल्या उमेदवारांना नोकरी मिळेपर्यंत त्याचा पाठपुरवा करण्यात येणार असल्याचे त्यांनी सांगितले.

पालकमंत्री गिरीश बापट म्हणाले, तरुणांच्या हाती ताकद आहे, बुद्धी आहे, परंतु रोजगार नसल्याने प्रश्न निर्माण होत आहेत. अशा परिस्थितीत या रोजगार मेळाव्याला मोठे महत्व आहे. राज्यातील आतापर्यंतचा हा सर्वात मोठा मेळावा आहे. एका युवकाला रोजगार मिळाला की त्याचे संपुर्ण कुटुंब उभे राहते. त्यामुळे या मेळाव्याच्या माध्यमातून महाराष्ट्रातील अनेक कुटुंबे उभी राहणार असल्याचे त्यांनी सांगितले.

राज्यमंत्री विजय शिवतारे म्हणाले, विकासाच्या कामात प्रशिक्षीत मनुष्यबळाची खूप आवश्यकता असते. या मेळाव्याच्या माध्यमातून अनेक बेरोजगार युवकांना काम मिळणार आहे. रोजगाराबरोबरच स्वयंरोजगाराला या माध्यमातून चालना मिळणार आहे. गुंजवणी धरणाच्या माध्यमातून पुरंदर तालुक्याच्या विकासाला मोठी चालना मिळाली आहे. पुरंदर विमानतळामुळे पुरंदर हा सर्वात वेगाने विकसित होत असलेला तालुकाअसल्याचे त्यांनी सांगितले.

श्री आदित्य ठाकरे म्हणाले, बाळासाहेब ठाकरे रोजगार मेळावा ही राज्य शासनाची अत्यंत उपयुक्त संकल्पना आहे. या मेळाव्याच्या माध्यमातून राज्यातील तरुणाईच्या हाताला त्याच्या योग्यतेचे काम मिळणार आहे. राज्यातील बेरोजगारीचे प्रमाण कमी होण्यासाठी या मेळाव्याचा मोठा उपयोग होणार आहे. कोणत्याही परिस्थितीत तरुणांनी जिद्द आणि चिकाटी सोडू नये असे आवाहन त्यांनी यावेळी केले.

कार्यक्रमाचे प्रास्ताविक डॉ. हर्षदीप कांबळे यांनी केले. तर आभार विश्वनाथ राजाळे यांनी मानले. मेळाव्याला हजारो तरुण-तरुणींसह पालक मोठ्या संख्येने उपस्थित होते.

मेळाव्याची ठळक वैशिष्ट्ये

• या मेळाव्यासाठी एकूण १० हजार ६८० उमेदवारांची ऑनलाईन आणि ऑफलाईन नोंदणी.
• मेळाव्यामध्ये ४ हजार ३०० उमेदवारांची उपस्थिती.
• मेळाव्यात १ हजार ८९० उमेदवारांना नियुक्ती पत्र.
• नोंदणी झालेल्या उमेदवारांना नोकरी मिळवून देण्याच्या पाठपुराव्यासाठी उद्योग विभाग स्वतंत्र कक्ष उभारणार.
• देशातील नामवंत ६० हून अधिक कंपन्यांची मेळाव्यात हजेरी.
• स्वयंरोजगार मार्गदर्शनासाठी स्वतंत्र दालन.
• स्वयंरोजगार मार्गदर्शनासाठी विशेष चर्चासत्राचे आयोजन.
• योग्य नियोजनामुळे मेळाव्यासाठी उपस्थित उमेदवार आणि पालक यांच्यात समाधान.
• पालक आणि उमेदवारांच्यात मोठा उत्साह.

मेळाव्यात सहभागी झालेल्या उमेदवारांच्या प्रतिक्रीया-

 मेळाव्याला आल्याचे सार्थक झाले…

मी माजी सैनिक आहे. सैन्य दलातून निवृत्त झाल्यावर कुटुंबाची काळजी घेत, घराच्या जवळ दुसरी नोकरी मिळविण्यासाठी प्रयत्नशील होतो. बाळासाहेब ठाकरे रोजगार मेळाव्याची माहिती मिळाली, त्यानुसार मी नोकरीसाठी मेळाव्यात नाव नोंदविले. सैन्य दलातील माझ्या कामाचा अनुभव पाहून मला तात्काळ या ठिकाणी नोकरी मिळाली. मला लगेचच जॉईनिंग लेटर ही मिळाले. या मेळाव्याला आल्याचे सार्थक झाले, मी शासनाचा मनापासून आभारी आहे.

–          आबासाहेब चौधरी रा. फुरसुंगी, पुणे.

मला माझ्या पात्रतेची नोकरी मिळाली!

कराड तालुक्यातील छोट्या खेड्यातील मी मुलगा आहे. मी सीएनजी ऑपरेटर आहे. मी कामाच्या शोधात होतो. नोकरीसाठी मी अनेक ठिकाणी जावून आलो परंतू मला माझ्या पात्रतेची नोकरी मिळत नव्हती. बाळासाहेब ठाकरे मेळाव्यात मी आलो आणि मला माझ्या पात्रतेची नोकरी मिळाली. या ठिकाणी मला थेट जॉईनिंग लेटरच मिळाले, त्यामुळे मी खूप खूश असून शासनाचा आभारी आहे.

–          राहूल आनंदराव खबाले,रा. विंग, ता. कराड, जि. सातारा.   

नोकरी मिळाल्याचा मोठा आनंद!

बाळासाहेब ठाकरे मेळाव्याची माहिती मला मिळाल्यानंतर या ठिकाणी मी नोकरीसाठी नावाची नोंदणी केली. एकाच ठिकाणी एवढ्या कंपन्या आल्यामुळे नोकरी नक्की मिळेल अशी आशा होती. मात्र लगेच आजच हातात कॉल लेटर मिळेल असे वाटले नव्हते. मात्र या रोजगार मेळाव्यामुळे हे शक्य झाले. नोकरी मिळाल्याचा मला मोठा आनंद असून शासनाचा मी खूप-खूप आभारी आहे.

–          प्रसाद सुनिल मेमाणे ,रा. पारगाव, ता. पुरंदर, जि. पुणे. 

लगेच नोकरी मिळेल असे वाटलेच नव्हते…

दौंड तालुक्यातले लोणारवाडी हे माझ गाव आहे. मात्र मी पुरंदर तालुक्यातल्या माझ्या काकांच्या गावात शिक्षण पूर्ण केले. बाळासाहेब ठाकरे रोजगार मेळाव्या विषयी माहिती मला मिळाल्यावर मी सहजच नोकरीसाठी माझ्या नावाची नोंदणी केली. एवढी मुल इथ दिसल्यावर मला नोकरी मिळेल का? अशी शंका होती, मात्र अगदी सहजच मला नोकरी मिळाली, कॉल लेटर हातात घेतल्यावर सुध्दा एवढ्या सहज नोकरी मिळाली आहे, असं वाटतच नाही. मी शासनाचा आभारी आहे.

–          अक्षय गाढवे ,रा. लोणारवाडी, ता. दौंड, जि. पुणे. 

खुपच चांगले उमेदवार आम्हाला मिळाले

बाळासाहेब ठाकरे रोजगार मेळाव्यात आमची आयएसटीसी प्रायव्हेट लिमिटेड कंपनी सहभागी झाली होती. या निमित्ताने अनेक होतकरू, हुशार उमेदवार आम्हाला मिळाले आहेत. आमच्याकडे आलेल्या अर्जातील मुलांच्या पात्रतेनुसार आम्ही त्यांना नोकरी देणार आहे. या मेळाव्याच्या निमित्ताने कुशल उमेदवार आम्हाला मिळणार आहेत, या रोजगार मेळाव्याचा उमेदवारांबरोरच कंपन्यांनाही चांगला फायदा झाला आहे.-          मनिषा मोहिते ( आयएसटीसी प्रा. लि. कंपनी. प्रतिनीधी  रा. खराडी, पुणे. )

मुंबई-: रॉनी आणि झरीना स्क्रूवाला यांनी स्थापन केलेल्या स्वदेस फाउंडेशनने शनिवारी,१६ जून रोजी, डॉइश बँकेतील अनेक उत्साही स्वयंसेवकांच्या साथीने वृक्षारोपण मोहिमेचे आयोजन केले.
पुण्यातील पथक सकाळी १० वाजेच्या सुमारास रायगड जिल्ह्यातील माणगाव तालुक्यातील साइकोंड गावात पोहोचले. वृक्षारोपणाची प्रक्रिया आणि त्यादरम्यान अवलंबण्याचे सुरक्षिततेचे उपाय यांची माहिती
त्यांना स्वदेसच्या पथकाने दिली. तेथून ते खोदून ठेवलेल्या शेतांपर्यंत (डग फिल्ड्स) चालत गेले आणि त्यांनी एका मागोमाग एक आंब्याची रोपे लावण्यास सुरुवात केली. प्रत्येक कर्मचाऱ्याने सरासरी ५ रोपे लावल्यामुळे जवळपास ६० कर्मचाऱ्यांनी लावलेल्या रोपांची संख्या ५०० पर्यंत पोहोचली. येत्या ३-४
वर्षांत या रोपांची फळे लगडलेली झाडे होतील आणि पर्यावरणाचा समतोल राखण्यात ती मदत करतील.त्याचप्रमाणे शेतकऱ्यांना उपजीविकेचा स्रोतही पुरवतील.रायगड जिल्ह्यातील ग्रामीण भागात मोडणाऱ्या १९०० खेड्यांमध्ये सर्वांगीण ग्रामीण विकासासाठी काम करणाऱ्या स्वदेस फाउंडेशनने डॉइश बँकेच्या पुणे येथील कर्मचाऱ्यांना त्यांचा वेळ व संसाधने सत्कारणी
लावण्यासाठी ही संधी मिळवून दिली. यामुळे शेतकऱ्यांनाही लाभ मिळणार आहे.
या उपक्रमाबद्दल स्वदेस फाउंडेशनचे विश्वस्त व संस्थापक संचालक रॉनी आणि झरीना स्क्रूवाला म्हणाले, “या विशाल वृक्षारोपण उपक्रमासाठी डॉइश बँकेशी सहयोग करता आला याचा आम्हाला, स्वदेस फाउंडेशनला, खूप आनंद वाटतो. हा उपक्रम आनंदाने भरलेला असून; समाज, आमचे कर्मचारी आणि डॉइश
बँक एकत्र येण्याची ही तिसरी वेळ होती. फळझाडांच्या रोपणाचे महत्त्व अतिशयोक्त ठरणार नाही, कारण याचे फायदे पर्यावरणाच्या तसेच आर्थिक अशा दोन्ही दृष्टिकोनातून, सध्याच्या व आगामी पिढ्यांना
मिळणार आहेत.” रोपांच्या लागवडीनंतर शेतकरी व डॉइश बँकेच्या कर्मचाऱ्यांमध्ये संवादाचे एक सत्र झाले. या विचार व कल्पनांच्या आदानप्रदानामुळे बँकेतील कर्मचाऱ्यांना शेतकऱ्यांसोबत अधिक खोलवर जोडून घेण्यासाठी एक मार्ग मिळाला. डॉइश बँकेच्या कॉर्पोरेट सोशल रिस्पॉन्सिबिलिटी विभागाच्या प्रमुख तसेच उपाध्यक्ष रुची खेमका म्हणाल्या, “आमचा स्वदेस फाउंडेशनसोबतचा सहयोग म्हणजे उपजीविकेचे शाश्वत स्रोत निर्माण करून
ग्रामीण समुदायांना सक्षम करण्याप्रती आम्ही मानत असलेली बांधिलकी आहे. या वृक्षारोपण उपक्रमाने आमच्या कर्मचाऱ्यांना शेतकऱ्यांच्या आयुष्यांत बदल घडवून आणण्यासाठी एक अर्थपूर्ण व्यासपीठ दिले.
शेतकऱ्यांसोबत संवाद साधणे आणि त्याचवेळी वृक्षारोपणासाठी त्यांच्यासोबत काम करणे हा आमच्यासाठी खूपच समाधान देणारा अनुभव होता. आमच्या कर्मचाऱ्यांना परिवर्तनाचे वाहक होण्याची संधी मिळेल अशा अनेक उपक्रमांत भाग घेण्यासाठी आम्ही उत्सुक आहोत.” शहरात राहणाऱ्या कर्मचाऱ्यांना ग्रामीण भागातील पाककलेचा खरा स्वाद चाखण्याची संधी देणाऱ्या भोजनाच्या कार्यक्रमाने उपक्रमाची सांगता झाली. या भोजनाचे आयोजन स्थानिक स्वयंसहाय्यता गटाने केले होते. ग्रामीण भारतात शाश्वत विकास घडवून आणण्यासाठी सर्वोत्तम पद्धतींचे उपयोजन करण्यावर स्वदेस फाउंडेशनचा भर कायम आहे. डॉइश बँक स्वदेस फाउंडेशनला २०१६ सालापासून मदत पुरवत आहे. रायगड जिल्ह्यातील सहा तालुक्यांतील ग्रामीण भागात ७,५००हून अधिक कुटुंबांना पिण्याचे पाणी पुरवण्यात बँकेने स्वदेस फाउंडेशनला मदत केली आहे. त्याचप्रमाणे सुमारे ३५०हून अधिक ग्रामीण कुटुंबांची उपजीविकेची साधने

अधिक बळकट करण्याच्या दृष्टीने वर्षाजल नियोजनाची साधने निर्माण करण्यात व सिंचनाच्या वितरणातही बँकेने मदत केली आहे.स्वदेस फाउंडेशनविषयी: रॉनी आणि झरीना स्क्रूवाला यांनी स्थापन केलेल्या स्वदेस फाउंडेशनचा एककेंद्री भर ग्रामीण भारताला सर्वांगीण व शाश्वत वाढीच्या माध्यमातून सक्षम करण्यावर आहे. यासाठी ही संस्था ग्रामीण भागातील
समुदायांच्या साथीने त्यांच्या सक्षमीकरणासाठी प्रयत्न करते, अनेकविध कार्यक्रमांची अमलबजावणी प्रत्यक्ष क्षेत्रावर जाऊन करते आणि ग्रामीण भागाला सध्याच्या परिस्थितीतून बाहेर काढण्याच्या धोरणाकडे (एग्झिट स्ट्रॅटेजी) वाटचाल करते.
त्यांचे वैशिष्ट्य म्हणजे विकासासाठी सर्व बाजूंनी, आतून-बाहेरून हस्तक्षेप करणारे आणि वाढता प्रभाव असणारे प्रारूप. आरोग्य व पोषण, शिक्षण, पाणी व स्वच्छता आणि आर्थिक विकास या चार क्षेत्रांच्या माध्यमातून व्यक्ती आणि समुदाय विकासाच्या सर्व बाजू लक्षात घेणारा सर्वांगीण दृष्टिकोन संस्थेने ठेवला
आहे. सध्या संस्था रायगड जिल्ह्यांतील सहा तालुक्यात काम करत आहे. त्यांच्या कामाचा लाभ सुमारे पाचेक लाख लोकांना मिळत आहे.
डॉइश बँकेविषयी:
डॉइश बँक व्यावसायिक व गुंतवणूक बँकिंग, रिटेल बँकिंग, व्यवहार (ट्रान्झॅक्शन बँकिंग) आणि मालमत्ता व
संपत्ती व्यवस्थापन उत्पादने व सेवा कंपन्या, सरकारे, संस्थात्मक गुंतवणूकदार, छोटे व मध्यम
आकारमानाचे उद्योग व खासगी व्यक्तिगत ग्राहकांना पुरवते. डॉइश बँक ही जर्मनीतील आघाडीची बँक
असून, युरोपात हिचे स्थान भक्कम आहे. अमेरिका आणि आशिया पॅसिफिक प्रदेशातही बँकेला महत्त्वाचे
स्थान आहे.