नव्या कार्यकारिणीची निवड -विजय जगताप ,चंद्रकांत हंचाटेंचा समावेश

पुणे-पुणे श्रमिक पत्रकार संघाच्या अध्यक्षपदी श्रीरामपूरच्या दै. सार्वमतचे पुणे प्रतिनिधी राजेंद्र पाटील यांची रविवारी निवड करण्यात आली. दै. पुढारीच्या पांडुरंग सांडभोर यांची सरचिटणीसपदी तर दै. सामनाच्या ब्रिजमोहन पाटील यांची खजिनदारपदी बिनविरोध निवड झाली आहे. उपाध्यक्षपदी सकाळचे विश्‍वजीत पवार आणि महाराष्ट्र टाईम्सचे रोहित आठवले यांची निवड झाली .

सन 2018-2019 साठीची निवडणुक जाहिर झाल्यानंतर दै. पुढारीचे पांडुरंग सांडभोर यांची सरचिटणीस म्हणून तर दै. सामनाचे ब्रिजमोहन पाटील यांची खजिनदार म्हणून बिनविरोध निवड झाली. कार्यकारिणी सदस्य म्हणून प्रशांत आहेर (महाराष्ट्र टाईम्स), सागर आव्हाड (टीव्ही 9), चंद्रकांत हंचाटे (सीएनएन आयबीएन), संदीप नवले (अ‍ॅग्रो वन), प्रसाद पाठक (सकाळ), अर्जुन शिरसाठ (पुण्यनगरी), युगंधर ताजणे (लोकमत), दिलीप तायडे (केसरी), निलेश शेंडे आणि मंजु पवार (पुण्यनगरी) यांची बिनविरोध निवड झाली . रविवारी सकाळी साडेदहा ते दुपारी एक या वेळेत मतदान झाले. एकुण 383 मतदारांनी मतदानाचा हक्‍क बजाविला.

पुणे : ‘फोर्स मोटर्स एव्हरेस्ट एक्स्पीडिशन २०१८’ या गिर्यारोहण मोहिमेचे नेतृत्व करुन एव्हरेस्ट शिखरावर यशस्वी चढाई करणाऱ्या समीर पाथम व सूरज झिंगान या विजयीवीरांना काल ‘फोर्स मोटर्स कंपनी’च्या आकुर्डी प्रकल्पात गौरवण्यात आले. समीर व सूरज या दुकलीने जगातील सर्वोच्च उंचीचे माऊंट एव्हरेस्ट हे शिखर गेल्या १८ मे रोजी सर केले होते. या थरारक चढाईचा अनुभव विशद करत या पुणेकर गिर्यारोहकांनी मोहिमेचे व्हिडिओ उपस्थितांना दाखवले. मोहिमेवर नेलेला फोर्स मोटर्सचा ध्वज त्यांनी कंपनीचे व्यवस्थापकीय संचालक प्रसन फिरोदिया यांच्याकडे सुपूर्द केला आणि शिखरावरील आपल्या चढाईच्या छायाचित्रावर स्वाक्षरीही केली. “समीर व सूरज यांची चिकाटी व निर्धार इतरांना वैयक्तिक व व्यावसायिक उद्दिष्ट्ये गाठण्यासाठी प्रेरणादायी ठरेल,” या शब्दांत श्री. फिरोदिया यांनी कौतुक केले.

गेल्या २२ मार्च रोजी कंपनीच्या आकुर्डी येथील मुख्यालयातून झेंडा फडकवून या मोहिमेचा शुभारंभ झाला. समीर व सूरज यांनी काही आठवडे एव्हरेस्टजवळच्या शिखरांवर चढाई करुन आपल्या तांत्रिक कौशल्यांची उजळणी केली आणि नंतर ते एव्हरेस्ट बेस कॅम्पकडे रवाना झाले. तेथे त्यांनी अधिक उंचावरच्या कॅम्पला जाण्यासाठी अनेक फेऱ्या केल्या. त्यामागे अंतिम चढाईसाठी गरजेचे असलेले तंबू, अन्नपाणी व प्राणवायू आदी सामान साठवण्याचा हेतू होता.

अनुकूल हवामानाची साथ मिळाल्याने गेल्या १७ मे रोजी सायंकाळी या दोघांनी समुद्रसपाटीपासून ८००० मीटर उंचीवरील कॅम्प ४ सोडला आणि एव्हरेस्टवर चढाई सुरु केली. रात्रभर वाटचाल केल्यानंतर सकाळी सहा वाजून २० मिनिटांनी ते शिखरावर पोचले. तेथे ४० मिनिटे वेळ घालवून मग ते परतीच्या प्रवासासाठी खाली उतरले.

या मोहिमेसाठी फोर्स मोटर्स कंपनीने दिलेल्या पाठबळाबद्दल समीर व सूरज यांनी कृतज्ञता व्यक्त केली. या दुकलीला वर्ष २०१५ मधील एव्हरेस्ट चढाईचा आपला पहिला प्रयत्न नेपाळमधील भूकंपामुळे सोडून द्यावा लागला होता. या भूकंपामुळे एव्हरेस्ट बेस कॅम्पच उद्ध्वस्त झाल्याने समीर व सूरज माघारी फिरले. वर्ष २०१७ मध्ये त्यांनी पुन्हा एकदा मोहीम आखली, पण त्याहीवेळी ताशी १६० किलोमीटर वेगाने वाहणाऱ्या तुफानी वाऱ्यांमुळे त्यांच्या मेहनतीवर पाणी पडले. तिसऱ्या मोहिमेच्या रुपाने फोर्स मोटर्सने त्यांच्या स्वप्नांना नवजीवन मिळवून दिले. “आमच्या निर्धारावर दृढ विश्वास ठेवणाऱ्या सर्वांचे आम्ही आभारी आहोत,” अशी प्रतिक्रिया समीर व सूरज यांनी यावेळी व्यक्त केली.

पुणे :’अवामी महाज’ आयोजित ईद मिलन स्नेह मेळावा शनिवारी सायंकाळी उत्साहात पार पडला. समाजातील विविध मान्यवर, सर्वधर्मीय, सर्वपक्षीय कार्यकर्ते, संस्थांच्या प्रतिनिधींनी उपस्थित राहून सामाजिक सलोख्याचे दर्शन घडवले.

डॉ.कुमार सप्तर्षी ,सामाजिक न्याय राज्य मंत्री दिलीप कांबळे, माजी केंद्रीय मंत्री सुरेश कलमाडी, खा. वंदना चव्हाण, आ. जयदेव गायकवाड, डॉ. उर्मिला सप्तर्षी,मोहन सिंह राजपाल, सय्यदभाई, शमसुद्दीन तांबोळी, मोहन जोशी, डॉ. सतीश देसाई,दीप्ती चवधरी, चेतन तुपे, अभय छाजेड , अविनाश बागवे इत्यादी मान्यवर उपस्थित होते.

अवामी महाज ‘ चे अध्यक्षडॉ.पी. ए. इनामदार , आबेदा इनामदार, लतीफ मगदूम,वाहिद बियाबानी, शाहीद  शेख यांनी स्वागत केले.

यावेळी ‘नादब्रह्म संगीतालय, अहमदनगर ‘ यांच्या वतीने सुफी दरबार चे आयोजन केले होते. पवन श्रीकांत नाईक (अहमदनगर) यांच्या सुफी गायनाच्या सुफी दरबार कार्यक्रमाने वातावरणात रंगत आणली.

अल्लाह (जिक्र) ने दरबार ची सुरुवात झाली. मोहंमद प्रेषित पैगंबरांवरील ३ रचना सादर केल्या गेल्या. यामध्ये ‘फर्श पे रेहकर अर्श पे जाना’, ‘भर दो झोली मेरी या मोहंमद’, ‘जिक्रे एहमद से दिल को सजा लिजिए’, आध्यत्मिक तत्वज्ञानाची ‘बेखुद किए देते है’, प्रसिद्ध रचना ‘ख्वाजा मेरे ख्वाजा’, ‘फुल रही सरसो ही पारंपरिक हजरत आमीर खुसरो यांची रचना, ‘छास तिलक’, तेरे वाज्जो’, ‘आफरीन- आफरीन’ या रचना सादर झाल्या. संत सोयराबाईंची ‘ हरी भजनाविण काळ ‘ ही रचनाही सादर करण्यात आली.

ईश्वरी तत्वज्ञानापासून ते मानवतावाद असा सुफी सांप्रदायातील सुंदर प्रवास या मैफिलीचा माध्यमातून उलगडला .

या मैफिलीत अरबी, उर्दू, पंजाबी, ब्रज, हिंदी अशा विविध भाषांमधून रचना सादर करण्यात आल्या.

कल्याण मुरकुटे, नरसिंह देसाई ,पंकज नाईक यांनी हार्मोनियमवर, कुलदीप चव्हाण (बेंजो), हर्षद भावे (तबला) ,विश्वजित कुलकर्णी (तबला, जंबे, डफ) यांनी पवन नाईक यांना साथसंगत केली.

पंकज नाईक यांच्याबरोबर संकेत गांधी, पवन तळेकर, हरीश कुटे, अविनाश तिजोरे, नवरतन वर्मा, मुलांशु परदेशी, रिझवान शेख, विजय जाधव, सय्यद एहमद, उद्धव म्हस्के, भालचंद्र जाधव, संहिता परदेशी, उज्वल कुलकर्णी यांनी सहगायन केले.

कार्यक्रमाचे निवेदन वीणा दिघे यांनी केले. या सुफी दरबार विशेष मैफिलीत सुफी तत्वज्ञानातील विविध रहस्य उलगडले गेले.

उपस्थितांनी शीरखुर्मा, पुरणपोळी तसेच दालचा या पदार्थांचा आस्वाद घेतला.

हा कार्यक्रम शनिवारी सायंकाळी असेम्ब्ली हॉल, आझम कॅम्पस येथे झाला.

‘ईद मिलन’ हे सामाजिक सलोखा, संवादाचे माध्यम व्हावे, भेटीगाठी व्हाव्यात, संवाद व्हावा , यासाठी हा उपक्रम आयोजित करण्यात आल्याचे डॉ.पी. ए. इनामदार यांनी सांगीतले.

पुणे-राज्यात आजपासून प्लास्टिक बंदी लागू करण्यात आली असून  हॉटेल, दुकानदार यांच्यावर कडक कारवाई करण्यात येत आहे. पुण्यात आज सकाळ पासून 2 वाजे पर्यत 8 हजार 711 किलो कॅरीबॅग, ग्लास आणि थर्माकोल पुणे महानगरपालिकेच्या घनकचरा विभागाकडून शहरातील हॉटेल आणि दुकानदाराकडून जप्त केला आहे.त्यांच्याकडून 3 लाख 69 हजार 100 रुपयांचा दंड वसूल केला आहे.अशी माहिती घनकचरा विभागाचे सुरेश जगताप यांनी माहिती दिली.

राज्य शासनाच्या आदेशानुसार महानगरपालिका,नगरपालिका आणि जिल्हा परिषद यांच्या मार्फत प्लास्टिक बंदीवर कडक कारवाई करण्यात येत आहे. पुणे महानगरपालिकेच्या 15 क्षेत्रीय कार्यालया मार्फत सकाळी 10 वाजल्यापासून कारवाईला सुरुवात झाली.या कारवाईमध्ये किराणा दुकानदार, बेकरी चालक, कपड्याचे शॉप यासह अनेक दुकानदारावर कारवाई केली असून यात कॅरीबॅग आणि ग्लास असा माल मिळून 8711 किलो आणि थर्माकोल 75 किलो जप्त करण्यात आला आहे.या कारवाईतून 3 लाख 69 हजार 100 रुपयांचा दंड वसूल केला आहे.येत्या काळात अधिक तीव्र कारवाई केली जाणार असल्याचे त्यांनी सांगितले.

पुणे :’किल्ले केवळ ऐतिहासिक महत्वाची स्थळे नाहीत, तर पाणी- वनसंपदा, जैववैविध्य देणारी भौगोलिक , जैविक महत्वाची केंद्रे आहेत, त्यामुळे गडसंवर्धनाचा, सुशोभीकरणाचा विचार करताना जैववैविध्याला धोका पोहोचणार नाही, याची दक्षता घ्यायला हवी’, असे प्रतिपादन ‘बाँबे नॅचरल हिस्ट्री सोसायटी’च्या धोरण विभागाचे सहसंचालक डॉ. राहुल मुंगीकर यांनी केले.

‘जीविधा’ आयोजित आठव्या हिरवाई महोत्सवात दुसऱ्या दिवशीच्या व्याख्यानात ते बोलत होते. हा कार्यक्रम शुक्रवारी सायंकाळी इंद्रधनुष्य सभागृह येथे झाला.

डॉ. मुंगीकर म्हणाले, ‘महाराष्ट्राला ६० टक्के पाणी हे पश्चिम घाटातून, किल्ले भागातून मिळते. तिथल्या इतिहासाबरोबर भूगोल आणि पर्यावरणालाही समजून घेतले पाहिजे. तसे समजून न घेता गड संवर्धनाची आधुनिक कामे करणे योग्य ठरणार नाही. गड संवर्धनासाठी एकात्मिक दृष्टीकोण बाळगावा लागेल.

किल्ल्याच्या बुरुजात, भिंतीमधील वड- पिंपळाची झाडे काढली तर या बुरुजांना धरून ठेवणाऱ्या मुळया सैल होऊन बुरुज लवकर ढासळतील. उंच किल्ल्याच्या प्रतिकूल नैसर्गिक वातावरणात दगडांना धरून ठेवणारे दुसरे कोणतेही ताकदवान, परवडणारे सिमेंट मटेरियल उपलब्ध नाही.

किल्ल्याजवळच्या पठारावरील, कपारीजवळील गवताळ प्रदेश माती धरून ठेवत असल्याने तिथे वनीकरण करण्याचा आग्रह धरू नये. गवताळ प्रदेशावर अवलंबून असलेली जीवसाखळी धोक्यात येते.

‘महाराष्ट्राची किल्ल्यांची साखळी ही वन्य श्वापदांचे कॉरिडॉर आहेत, ते नष्ट होता काम नयेत.
किल्ला आणि किल्ल्याचा परिसर, तेथील वनसंपदा, उपयोग याचे ज्ञान स्थानिक व्यक्तींना असल्याने त्यांच्या सूचना विचारात घेतल्याशिवाय गड संवर्धन करून चालणार नाही.

गडांच्या परिसरात स्थानिक वृक्ष लावले जावेत. दूध -दुभते देणारे गवताळ प्रदेश नष्ट केले जाऊ नयेत. अन्यथा माती सरकण्याची माळीणसारखी दुर्घटना होण्याची शक्यता वाढते’, असेही डॉ. मुंगीकर यांनी सांगितले.’

‘ निसर्ग सेवक ‘ चे अध्यक्ष डॉ. रमेश गोडबोले, उपवनसंरक्षक सत्यजित गुजर यांच्या हस्ते रामकृष्ण आडकर, प्रीती कोरे, डॉ. विनया घाटे यांच्या ‘सातारा जिल्ह्यातील देवराया’ या पुस्तकाचे प्रकाशन झाले.

राजीव पंडित यांनी प्रास्ताविक केले. यावेळी डॉ. सचिन पुणेकर, निवेदिता जोशी, आदी मान्यवर होते.

पुणे, दि. 23 जून : पॅकिंगच्या वस्तुंवरही चुकीच्या पद्धतीने दंड आकारून प्लास्टिक बंदीच्या निर्णयाची बेकायदेशीरपणे अंमलबजावणी केल्याच्या निषेधार्थ किरकोळ व्यापाऱ्यांनी आज उत्स्फूर्तपणे दुकाने बंद केली. ही कारवाई हुकुमशाही पद्धतीने होत असल्याचे लक्षात येताच शहरातील सिंहगड रस्ता, कोथरुड, सातारा रस्ता, मंडई, वडगावशेरी, हडपसर आदी भागातील दुकाने कारवाई सुरु होताच बंद झाली, अशी माहिती पुणे जिल्हा रिटेल व्यापारी संघाचे अध्यक्ष सचिन निवंगुणे यांनी दिली.

राज्य सरकारने प्लास्टिक बंदी कायद्याचे स्पष्टीकरण करताना पॅकिंगच्या वस्तुंवर कारवाई होणार नसल्याचे सांगितले होते. वास्तवात आज कायदा लागू झाल्यानंतर व्यापाऱ्यांवर पॅकिंगच्या वस्तू असल्याचे सांगून दंडाच्या पावत्या देण्यात आल्या. व्यापाऱ्यांनी प्लास्टिक बंदीचे स्वागत केले आहे. त्यामुळे या कायद्याच्या विरोधात कुठल्याही प्रकारच्या आंदोलनाची घोषणा झालेली नव्हती. मात्र, आजची कारवाई हुकुमशाही पद्धतीने होत असल्याचे पाहून व्यापाऱ्यांनी आपले व्यवसाय बंद ठेवले. ही कारवाई अशीच राहणार असेल तर, 5 हजार, 10 हजार व 25 हजार रुपयांचा दंड भरणे महाराष्ट्रातल्या सामान्य व्यापाऱ्याला परवडणार नाही. ते आपले व्यवसाय बंद करतील.

आजच्या पहिल्या दिवशी झालेल्या कारवाईची आम्ही माहिती घेत आहोत. शहरातील सर्व विभागातल्या व्यापारी संघटनांच्या पदाधिकाऱ्यांची बैठक सायंकाळी होणार आहे. त्यामध्ये या कारवाईबद्दल आणि पुढील कार्यवाहीबद्दल निर्णय घेण्यात येईल, असे निवंगुणे यांनी सांगितले.