पुणे- महापालिकेच्या शिक्षण विभागातील शाळांतील गुणवत्ताधारक विद्यार्थ्यांना प्रोत्साहन देण्यासाठी ‘लोकमान्य टिळक गुणवत्ता पुरस्कार’ या शैक्षणिक वर्षापासून देण्यात येत आहे. यासाठी पालिकेच्या शाळेतील 41 गुणवंत विद्यार्थ्यांची निवड करण्यात आल्याची माहिती महापौर मुक्ता टिळक यांनी पत्रकार परिषदेत दिली.
महाराष्ट्र राज्याचे शिक्षण आयुक्त विशाल सोळंकी यांच्या प्रमुख उपस्थितीत सोमवारी (25 जून) सकाळी दहा वाजता पंडित जवाहरलाल नेहरू सांस्कृतिक भवन येथे या विद्यार्थ्यांचा गुणगौरव करण्यात येणार आहे. यामध्ये ‘स्टूडंट ऑफ द इयर’ या संकल्पनेनुसार प्राथमिक शाळांमधील 19 आणि माध्यमिक शाळांमधील 22 विद्यार्थ्यांची निवड करण्यात आली आहे. पाच हजार रुपये आणि पुस्तके असे या पुरस्काराचे स्वरूप आहे.
मागील वर्षीच्या अंदाजपत्रकामध्ये मुरलीधर मोहोळ यांच्या निधीमधून या पुरस्कारासीठी तरतूद करण्यात आली होती. महापालिकेच्या सर्व शाळामधून विद्यार्थ्यांची निवड करण्यात आली आहे. यासाठीचे निकष ठरवण्यात आले असून त्यामध्ये विद्यार्थ्यांची शाळेतील उपस्थिती, तीन वर्षातील शैक्षणिक गुणवत्ता, स्पर्धा परीक्षेतील येश, कला, क्रिडा क्षेत्रातील नैपुण्य, शालेय उपक्रमांमधील सहभाग, वत्कृत्व, नेतृत्व विकास, साहित्य निर्मिती, वर्तणूक आणि विशेष उल्लेखनीय कार्य या आधारे शिक्षक आणि मुख्याध्यापकांच्या परिक्षणाने विद्यार्थ्यांची निवड करण्यात आली आहे. यापुढे दरवर्षी अशा पद्धतीन प्रत्येक शाळेमधून एक विद्यार्थ्यांची निवड केली जाणार असल्याचे महापौरांनी सांगितले.
