पुणे-एच आय व्ही ग्रस्त  मुलांच्या संगोपनासाठी  जबाबदारी घेतलेल्या ममता फौन्डेशनला नगरसेवक राष्ट्रवादी कॉंग्रेसचे प्रकाश  कदम पुणे मनपा यांनी या संस्थेला स्वतःची 30 लाख रुपये किमतीची तिन गुंठे जागा
महाराष्ट्राचे माजी उपमुख्यमंत्री अजित पवार यांच्या वाढदिवसा निमित्त प्रदान केली .
येथील भुरुक दापत्यांने गुजर निंबाळकर वाडी येथे 2मुलांपासुन चालू केल्यानंतर ती संख्या 33 झाली अन जागेची कमतरता भासू लागली जागेसाठी अनेकांनी त्यांना मदतीची आश्वासने दिली पण शब्द दिलेल्यांनी शब्द पाळला नाही
नगरसेवक प्रकाश कदम यांचे जवळचे मित्र माजी सरपंच दिपक गुजर;  गुजर निंबाळकरवाडीचे सरपंच व्यंकोजी खोपडे तसेच प्रकाश कदम यांच्या  विचारातून तयार झालेले दोन तरूण कार्यकर्ते महेश धुत व प्रसाद बांदल यांच्या प्रयत्नातून एच आय व्ही ग्रस्त असलेल्या लहान मुलांच्या संगोपनासाठी निवाऱ्यासाठी  तीन गुंठ्यात छान अशी इमारत तयार होतेयं या सारखा आनंद  नाही असे यावेळी भूरूक यांनी म्हटले.
समाजसेवा मनापासून केली तरं देवरुपी माणसं मदतीला आहेत, दोन हजार एकोणीस ला दादांच्या वाढदिवशी हि इमारत पुर्ण होईल असेही ते म्हणाले.
अजित पवार यांच्या वाढदिवसानिमित्त यावेळी विठ्ठलराव वरुडे पाटील, युवा नेतृत्व प्रतिक कदम, राहुल काळे आकाश मोडक, ऋषिकेश कारले ,महेश, धुत प्रसाद, बांदल चेतन काळे यांनी मुलांना फळे वाटप केले

पुणे :पालिकेतील सभागृह नेते श्रीनाथ भिमाले यांनी पुढाकार घेवून मुख्यमंत्र्यांपर्यंत कामगार संघटनांचे प्रतिनिधी नेल्यानंतर  महापालिकेच्या अधिकारी आणि कर्मचाऱ्यांचा ग्रेड पे कमी केला जाणार नाही; याबाबत लवकरच आदेश काढू असे आश्‍वासन मुख्यमंत्री देवेंद्र फडणवीस यांनी महापालिकेच्या कामगार संघटनांच्या प्रतिनिधींना दिले आहे

पुण्याच्या दौऱ्यावर आलेल्या मुख्यमंत्री फडणवीस यांची पुणे मनपा कामगार युनियन, पीएमसी एम्प्लॉईज युनियन, अधिकारी अभियंता संघ, डॉक्‍टर असोसिएशन या संघटनांच्या प्रतिनिधींनी भेट घेऊन “ग्रेड पे’च्या संदर्भातील प्रश्‍नाविषयी चर्चा केली. यावेळी   सभागृह नेते श्रीनाथ भिमाले, कामगार संघटनांचे प्रतिनिधी उल्हास भट, बापू पवार, सुनिल कदम, आशिष चव्हाण, माधव जगताप आदी यावेळी उपस्थित होते. पाचवा वेतन आयोग लागू केल्याने पुणे महापालिकेचे अधिकारी आणि कर्मचाऱ्यांचा “ग्रेड पे’ हा राज्य शासनाच्या अधिकारी आणि कर्मचाऱ्यांपेक्षा अधिक होता.

राज्य सरकारने महापालिकेचा आकृतीबंधाला मंजूरी देताना महापालिका अधिकारी व कर्मचाऱ्यांचे वेतन राज्य शासनाच्या अधिकारी व कर्मचाऱ्यांपेक्षा अधिक होणार नाही, अशी सूचना केली होती. त्याची अंमलबजावणी करीत महापालिका प्रशासनाने अधिकारी आणि कर्मचाऱ्यांचा “ग्रेड पे’ कमी केला. यामुळे अधिकारी आणि कर्मचाऱ्यांचे वेतन कमी झाल्याने सर्व कामगार संघटनांनी या प्रश्‍नावर आंदोलने केली. राज्य सरकारने केलेली सुचना आणि महापालिका प्रशासनाने घेतलेल्या भुमिकेचा फटका 18 हजार कर्मचाऱ्यांना बसत आहे. याप्रश्‍नावर गेल्या दोन महिन्यापासून कर्मचारी संघटना आक्रमकपणे बाजू मांडत आहे. महापालिकेच्या सर्वसाधारण सभेतही याचे पडसाद पडले होते. गेल्या आठवड्यात झालेल्या सर्व साधारण सभेत महापौरांनी यासंदर्भात मुख्यमंत्री फडणवीस यांच्याशी चर्चा करू, “ग्रेड पे’ कमी केला जाणार नाही असे आश्‍वासन दिले होते. लोहगाव विमानतळ येथे महापालिकेतील पदाधिकारी आणि कामगार संघटनांच्या प्रतिनिधींनी मुख्यमंत्री फडणवीस यांची भेट घेतली. त्यांना वस्तुस्थिती सांगितल्यानंतर मुख्यमंत्र्यांनी सदर आश्‍वासन दिले.

पुणे-कॉंग्रेस पक्षाचे ज्येष्ठ नेते दिग्विजयसिंग यांनी आज पुण्यात चातुर्मासानिमित्त आलेल्या प.पू.१०८ पुलकसागरजी
महाराज यांचे धर्मानुरागी रसिकलाल.एम.धारीवाल नगरी, महालक्ष्मी लॉन्स,पुणे येथे जाऊन आशीर्वाद घेतले.

याप्रसंगी प.पू.१०८ पुलकसागरजी महाराज यांनी जुन्या आठवणींना उजाळा देऊन म्हटले की, मध्यप्रदेशाचे
मुख्यमंत्री असताना दिग्विजयसिंग यांनी गुरु परमपूज्य आचार्य पुष्पदंत सागरजी महाराज यांच्या नावाने इंदौर
पासून ६० किमी असणाऱ्या पुष्पगिरी येथे ३०० एकर जागा राज्यसरकारतर्फे दिली होती. येथे जैन समाजाचे
मोठे तीर्थक्षेत्र विकसित झाले असून शाळा, कॉलेज, इ. सुविधाही तेथे उपलब्ध झाल्या आहेत. अन्य
समाजांप्रमाणेच जैन समाजासाठीही दिग्विजयसिंग यांनी खूप मदत केली याचा उल्लेख प.पू.१०८ पुलकसागरजी
महाराज यांनी केला. याप्रसंगी दिग्विजयसिंग यांनी मध्यप्रदेशात विशेषतः बुंदेलखंड भागात दिगंबर जैन समाज
मोठा असल्याचा उल्लेख केला व मुनिश्रींना श्रीफळ अर्पण करून त्यांचे आशीर्वाद घेतले. प.पू.१०८.
पुलकसागरजी महाराज यांनी दिग्विजयसिंग यांना आशीर्वाद स्वरुपात’पुलकसागरम्’पुस्तके भेट दिली.
प्रारंभी सकल जैन वर्षायोग समितीचे कार्याध्यक्ष मिलिंद फडे व सचिव जितेंद्र शहा यांनी दिग्विजयसिंग यांचे
पुष्पगुच्छ देऊन स्वागत केले. समितीच्या अध्यक्षा श्रीमती शोभा धारीवाल यांनी दिग्विजयसिंग यांना 'णमोकर'
मंत्राची चांदीची प्रतिमा व श्रीफळ देऊन त्यांचा सत्कार केला. याप्रसंगी महाराष्ट्र प्रदेश कॉंग्रेस समितीचे
सरचिटणीस अॅड.अभय छाजेड समितीचे पदाधिकारी व भाविक मोठ्या संख्येने उपस्थित होते.

पुणे, 23 जुलै 2018-   राजेश वाधवान समुह व बॉलिवूड सुपरस्टार अर्जुन कपुर यांच्या सहमालकीच्या एफसी पुणे सिटी  तर्फे  व  नेस्टअवे, फास्ट अँड अप, स्कार्टर्स, मॅकडॉनडल्स, झुमकार, उबेर इट्स, रॅडिसन ब्लू(हिंजेवाडी)यांच्या संलग्नतेने आयोजित तिसऱ्या एफसी पुणे सिटी कॉर्पोरेट फुटबॉल स्पर्धेत उपांत्यपूर्व फेरीत फिनआयक्यु, सनगार्ड एएस, सायबेज, केपीआयटी या संघांनी आपापल्या प्रतिस्पर्ध्यांचा पराभव करून उपांत्य फेरीत प्रवेश केला.

मामुर्डी येथील एफसी पुणे सिटीच्या सराव मैदानावर सुरु असलेल्या या स्पर्धेत उपांत्यपूर्व फेरीत पहिल्या सामन्यात प्रकाश थोरात(2,5मि.)याने नोंदविलेल्या दोन गोलांच्या जोरावर फिनआयक्यु संघाने कॅपजेमिनी संघाचा 4-0असा सहज पराभव केला. सनगार्ड एएस संघाने अॅमडॉक्सचा 4-1असा पराभव केला. विजयी संघाकडून याकुब पिरजादे, क्रिशॉल फर्नांडिस, रोमिओ अरुलदास, योगेश यादव यांनी प्रत्येकी एक गोल केला. सायबेज संघाने कनव्हर्जीज संघाचा 2-1असा संघर्षपूर्ण पराभव करून उपांत्य फेरी गाठली.

चुरशीच्या झालेल्या लढतीत केपीआयटी संघाने इन्फोसिसचा टायब्रेकरमध्ये 3-1असा पराभव करून अंतिम फेरीत धडक मारली. निर्धारित वेळेत सामना गोलशून्य बरोबरीत सुटला व त्यामुळे टायब्रेकर पद्धतीचा अवलंब करण्यात आला. टायब्रेकरमध्ये केपीआयटीकडून हेमराज हुडा, प्रसाज सूर्यवंशी, प्रणव सिद्धेश्वर यांनी गोल केले, तर इन्फोसिसकडून सतीश बनसोडे, सुनील मेहता, विवेक नायर यांना गोल मारण्यात अपयश आले.

स्पर्धेचा सविस्तर निकाल: उपांत्यपूर्व फेरी:
फिनआयक्यु: 4(प्रकाश थोरात 2,5मि., श्रीकांत मोलनगिरी 12मि., वैष्णव शर्मा 20मि.)वि.वि.कॅपजेमिनी: 0;

सनगार्ड एएस: 4(याकुब पिरजादे 3मि., क्रिशॉल फर्नांडिस 6मि., रोमिओ अरुलदास 10मि., योगेश यादव 15मि.)वि.वि.अॅमडॉक्स: 1(अविरल जैन 12मि.);

सायबेज: 2(आरिफ चितेवान 8मि., आशिष मगर 13मि.)वि.वि.कनव्हर्जीज: 1(लुईस रेमेई 4मि.);

केपीआयटी: 3(हेमराज हुडा, प्रसाज सूर्यवंशी, प्रणव सिद्धेश्वर)(गोल चुकविले-अल्बि अब्राहिम)टायब्रेकरमध्ये वि.वि.इन्फोसिस: 1(विल्सन लोबो)(गोल चुकविले-सतीश बनसोडे, सुनील मेहता, विवेक नायर);पूर्ण वेळ: 0-0.

पुणे – नाणार प्रकल्प आणि दूध दरवाढ यासारखे विषय पुढे करून सरकारला अडचणीत आणण्याचा प्रयत्न करणा-या विरोधकांना नामोहरम करून सत्ताधारी पक्षाने विधीमंडळाच्या पावसाळी अधिवेशनात तब्बल तेवीस विधेयके मंजूर करवून घेतली. हे अधिवेशन शंभर टक्के यशस्वी झाले. असा दावा संसदीय कामकाज मंत्री गिरीश बापट यांनी सोमवारी केला. नागपूर येथील अधिवेशन संपल्यावर बापट यांनी आज संसदीय कामकाजाचा आढावा पत्रकारांना सादर केला. त्यावेळी ते बोलत होते. हिवाळी अधिवेशन नोव्हेंबर २०१८ मध्ये मुंबई येथे होणार असल्याची घोषणाही त्यांनी केली.

बापट म्हणाले की, नाणार प्रकल्पावरून सभागृहात विरोधकांनी मित्रपक्षाला बरोबर घेऊन गोंधळ घातला. राजदंड पळविण्यापर्यंत त्यांची मजल गेली. त्यामुळे सरकार अल्पमतात आल्याचा दावा काँग्रेससह सर्वच विरोधक सभागृहात करीत होते. तथापि मुख्यमंत्र्यांनी हा दावा फेटाळून लावीत अभ्यासपूर्ण शैलीत निवेदन केल्याने विरोधकांचा डाव फसला. त्यानंतर दोन्ही सभागृहाचे कामकाज सुरळित पार पडले. विधानसभेचे कामकाज तब्बल ८६ तास १९ मिनिटे चालले. तेथील रोजच्या कामाची सरासरी सहा तास ३९ मिनिटे होती. तर विधानपरिषदेचे कामकाज तब्बल ७४ तास १२ मिनिटे चालले. तेथील रोजच्या कामाची सरासरी

पाच तास ४२ मिनिटे एवढी होती. दोन्ही सभागृहाच्या प्रत्येकी तेरा बैठका झाल्या.

विधानसभेत सदस्यांच्या उपस्थितीचे सरासरी प्रमाण ७६.४२ होते. ते प्रगल्भ लोकशाहीचे दर्शन घडविणारे होते. विधानसभेत ८१३ तारांकित प्रश्न विचारले गेले. सदोतीस प्रश्नांना तोंडी उत्तरे देण्यात आली. फक्त एक अल्पसूचना प्रश्न उपस्थित करण्यात आला. एकूण ११४ लक्षवेधी सूचना पटलावर ठेवण्यात आल्या. त्यापैकी प्रत्यक्ष ४२ सूचनांवर चर्चा झाली. स्थगन प्रस्तावाच्या ११३ सूचना प्राप्त झाल्या. त्यापैकी एकही सूचना मान्य झाली नाही. अर्धा तास चर्चेच्या २४६ सूचना मांडण्यात आल्या त्यावर अजिबात चर्चा झाली नाही. ४०८ अशासकीय ठराव आलेत्यापैकी २५४ मंजूर झाले. विधानपरिषदेत ९५८ तारांकित प्रश्न विचारण्यात आले. तिथे १६५ औचित्याचे मुद्दे उपस्थित करण्यात आले. लक्षवेधी स्वरुपाच्या ५२ सूचनांवर चर्चा झाली. विधानसभेने मांडलेली बावीस विधेयके तिथे मंजूर करण्यात आली.

बापट पुढे म्हणाले की विदर्भ मराठवाड्याला बावीस हजार कोटी रुपयांचे पॅकेज देऊन प्रादेशिक असमतोल दूर करण्याचा शासनाचा निर्णय हे या अधिवेशनाचे सर्वात मोठे यश मानले जाते. ज्येष्ठ नागरिकांचे धोरण त्यांचे वय निश्चित करणे. मराठा समाजाला नोकरीत सोळा टक्के आरक्षण. पत्रकारांना पेन्शन. आँनलाईन औषध खरेदीला चाप मल्टीप्लेक्समधील पदार्थांच्या भरमसाठ दरवाढीला आळा. दूधात भेसळ करणारांवर कठोर कारवाई. इत्यादी महत्वाचे निर्णय या अधिवेशनात घेण्यात आले.

मराठी भाषा समिती, राज्यातील विद्यापीठे, एसटी महामंडळ, जिल्हा परिषदा, महाराष्र्ट्र जीवन प्राधिकरण यांचे प्रशासकीय अहवाल पटलावर ठेवण्यात आले. संमत झालेल्या महत्वाच्या विधेयकांमध्ये ग्रामपंचायत अधिनियम सुधारणा, सहकारी संस्था सुधारणा, महाराष्र्ट्र झोपडपट्टीगुंड हातभट्टीवाले वाळू तस्कर यांच्या विघातक कृत्यांना आळा घालण्यासाठी सुधारणा विधेयक, कृषि उत्पन्न पणन विकास अधिनियम सुधारणा, ठेवीदारांच्या हितसंबधांचे संरक्षण सुधारणा विधेयक इत्यादींचा समावेश आहे.

पुण्याच्या प्रश्नांना चालना

पुण्यातील प्रश्नांचा संदर्भ देऊन बापट पुढे म्हणाले की, पुण्यातील वायू प्रदूषणाचा कृति आराखडा हा सर्वात महत्वाचा विषय विधीमंडळात मार्गी लागला. तसेच मुलींची पहिली शाळा सुरु झाली त्या भिडे वाड्यातील सावित्रीबाई फुले यांचे नियोजित स्मृतिस्थळ या विषयाला अधिवेशनात चालना मिळाली. एकात्मिक सायकल योजनाची माहितीही सदस्यांनी जाणून घेतली. वनविभागाच्या जागेवरील अतिक्रमणे. इंद्रायणी नदी प्रदूषण. ससूनमधील नवीन प्रशासकीय इमारत, जिल्हा परिषद सौर पथदिवे खरेदी, पुणे विद्यापीठातील पेपरफुटी, महापालिकेतील विस्तारित इमारतीची गळती, पुणे मनपा रुग्णालयांची अवस्था, मुळा मुठा प्रदूषण व सांडपाणी प्रक्रिया प्रकल्प, महावितरणची बिले, कामधेनू दत्तक योजना, पुणे मनपातील औषध खरेदी, समाविष्ठ अकरा गावातील विकास, टँकरमाफिया, ज्येष्ठ कलाकारांचे मानधन, पिंपरी चिंचवडसाठी आंन्द्रा धरणाचे पाणी, जिल्हा

परिषदेतील शिक्षण अधिका-याचा गैरव्यवहार इत्यादी विषय चर्चेला आले. त्यावर समाधानकारक माहिती देण्यात आली.शेतक-यांची कर्जमाफी, राज्यातील कायदा व सुव्यवस्था, राज्याची आर्थिक स्थिती, मुंबईतील भूखंड इत्यादी विषयावर माजी मुख्यमंत्री पृथ्वीराज चव्हाण, विरोधी पक्षनेते राधाकृष्ण विखेपाटील, जयंत पाटील, अजित पवार यांनी प्रश्न उपस्थित करून चर्चा घडवून आणली. मुख्यमंत्री व मंत्रीमंडळातील अन्य सहका-यांनी अभ्यासपूर्ण उत्तरे देऊन कामकाज सुरळितपणे होऊ दिले.

पुणे- आता सुराज्‍याची लढाई लढावी लागेल, नव्‍या पिढीला सुराज्‍य द्यावे लागेल.  समाजातील शेवटच्‍या माणसांपर्यंत विकास पोहोचल्याशिवाय सुराज्‍य निर्माण होणार नाही, असे स्‍पष्‍ट मत मुख्‍यमंत्री देवेंद्र फडणवीस यांनी व्‍यक्‍त केले.

पिंपरी-चिंचवड महापालिका व क्रांतीवीर चापेकर स्मारक समिति यांच्या संयुक्त विद्यमाने चिंचवडगाव येथे क्रांतीवीर चापेकर राष्ट्रीय संग्रहालय उभारण्यात येणार आहे. त्‍याच्‍या भूमिपूजन प्रसंगी ते बोलत होते.  अन्न व नागरी पुरवठा मंत्री तथा पुणे जिल्ह्याचे पालकमंत्री गिरीश बापट, खासदार श्रीरंग बारणे, आमदार लक्ष्‍मण जगताप, महेश लांडगे, आयुक्त श्रावण हर्डीकर, उपमहापौर शैलजा मोरे,  क्रांतीवीर चापेकर स्मारक समितीचे अध्यक्ष गिरीश प्रभुणे,क्रांतीवीर चापेकर स्मारक समितीचे कार्यवाह ॲड सतिश गोरडे यांची विशेष उपस्थिती होती. कार्यक्रमाच्‍या  अध्यक्षस्थानी पिंपरी चिंचवड महानगरपालिकेचे महापौर नितीन काळजे होते.

मुख्‍यमंत्री श्री. फडणवीस म्‍हणाले, जो समाज इतिहास विसरतो, त्‍याला वर्तमानकाळ असतो, मात्र भविष्‍यकाळ नसतो. क्रांतीवीर चापेकर बंधूंच्‍या स्‍मारकातून नव्‍या पिढीला प्रेरणा मिळणार आहे. संग्रहालयात क्रांतीकारकांची आठवण जागृत ठेवली जाणार आहे. क्रांतीकारकांच्‍या बलिदानाचे मोल समजले नाही तर स्‍वातंत्र्य धोक्‍यात येणार आहे. देशाचा इतिहास जागृत ठेवायला हवा, असे नमूद करुन  नवीन पिढीला सुराज्‍य द्यावे लागेल, असे सांगितले. समाजाच्‍या शेवटच्‍या माणसापर्यंत विकास पोहोचल्‍याशिवाय सुराज्‍य निर्माण होणार नाही, असे स्‍पष्‍ट केले.

आपल्‍या भाषणाच्‍या प्रारंभी मुख्‍यमंत्री श्री. फडणवीस यांनी क्रांतीची प्रेरणा देणा-या लोकमान्‍य टिळकांच्‍या स्मृतीला अभिवादन केले. तसेच तरुणांच्‍या मनात क्रांतीची ज्‍योत पेटवणा-या चापेकर बंधूंच्या स्मृतिला वंदन केले. आषाढी एकादशीच्‍या दिवशी आपण पांडुरंगाला स्‍मरतो. आज महाराष्‍ट्रातील 12 कोटी जनता विठ्ठल-रखुमाईसारखी असून आपले दर्शन घेण्‍याचा मला योग आला. हा दिवस माझ्यासाठी भाग्‍याचा आहे, पांडुरंग आपल्‍या जीवनात आनंद आणो, असे भावपूर्ण उद्गार काढले.

मुख्‍यमंत्री श्री. फडणवीस यांनी क्रांतीवीर चापेकरांच्‍या कार्याचे स्‍मरण केले. 19 व्‍या शतकाच्‍या शेवटी पुण्‍यनगरी प्‍लेगची साथ पसरली होती. रँड नावाच्‍या इंग्रज अधिका-याने पुण्‍यातील नागरिकांवर अनन्वित अत्‍याचार केले. छत्रपती शिवाजी महाराजांपासून प्रेरणा घेवून  चापेकर बंधूंनी नागरिकांवरील अत्‍याचाराचा बदला घेतला. या संग्रहालयात अनेक क्रांतीकारकांच्‍या स्‍मृति जतन केल्‍या जातील, त्‍यापासून नवीन पिढीला प्रेरणा मिळेल, असा विश्‍वास त्‍यांनी व्‍यकत केला. पिंपरी-चिंचवडमधील प्रश्‍नांचा उल्‍लेख करुन मुख्‍यमंत्री श्री. फडणवीस म्‍हणाले, शास्‍तीकराचा मुद्दा महत्‍वाचा असून पूर्वलक्षी प्रभावाने शास्‍ती कर संपवणार आहे. यात काही त्रुटी असून त्‍याबाबत लवकरच बैठक घेण्‍यात येणार असल्‍याचे त्‍यांनी सांगितले. या भागातील अनधिकृत बांधकामे नियमित करण्‍याचा निर्णय घेण्‍यात आला असून नियमितीकरणाचे शुल्‍क किती घ्‍यायचे याचे अधिकार महापालिकेला देऊ, असेही ते म्‍हणाले.

पालकमंत्री गिरीश बापट यांनी क्रांतीवीर चापेकर समृती संग्रहालयाच्‍या भूमिपूजनाचा कार्यक्रम ऐतिहासिक असल्‍याचे सांगि‍तले.  चापेकर बंधूंनी देशात आदर्श निर्माण केला. तरुणांना त्‍यापासून प्रेरणा मिळेल. पिंपरी-चिंचवडमधील प्रश्‍नांचा उल्‍लेख करुन शासन पूर्णपणे  पाठीशी राहील, असेही ते म्‍हणाले.

कार्यक्रमाचे प्रास्‍ताविक एकनाथ पवार यांनी केले. यावेळी आमदार लक्ष्‍मण जगताप यांचेही समयोचित भाषण झाले. क्रांतीवीर चापेकर स्मारक समितीचे अध्यक्ष गिरीश प्रभुणे यांनी संग्रहालयाची माहिती दिली.

संग्रहालयाच्या तिस-या मजल्यावर प्रबोधन पर्वाचा इतिहास सचित्र दाखविण्यात येईल. यात राजा राममोहन राय यांच्या पासून महात्मा फुले, राजर्षि शाहू महाराज, डॉ. बाबासाहेब आंबेडकर या सर्व प्रबोधन चळवळींचा इतिहास, त्याबरोबर स्वामी परमहंस, स्वामी विवेकानंद, योगी अरविंद, महात्मा गांधी, सरदार वल्लभभाई पटेल या सर्व चळवळींचा सचित्र इतिहास ठेवण्यात येणार आहे. संग्रहालयाच्या पाचव्या मजल्यावर 350 आसन क्षमतेचे सभागृह असणार आहे. सहाव्या मजल्यावर स्मारक समिती अन्य उपक्रम रेकॉर्डिंग रूम, बैठक असणार आहे. यात ऐतिहासिक पुरातन काळात वापरण्यात येणाऱ्या वस्तू, भांडी, वेशभूषा, अलंकार, युद्ध कलेचे साहित्य, गडकोट, किल्ल्यांच्या प्रतिकृती,पुरातन भित्तिचित्रे यांचा समावेश असेल.त्यातून देशभरातील भारतीय संस्कृति, स्वातंत्र्य लढ्याचा इतिहास सांगणारे दोन हजार वर्षातील घटना आणि घडामोडींवर चिरंतन स्मृति जपणारे हे सहा मजली राष्ट्रीय संग्रहालय उभारणार आहे.

अमिता फडणीस यांचे आवाहन ; ‘आय पेरेंट्स क्लब’ या फेसबुक पेजचे उद्घाटन 

पुणे  :- लहान मुलांना शिकवण्यापेक्षा त्यांच्याकडून शिकल्यास आपण अधिकाधिक चांगले पालक होऊ असे मत बालरोगतज्ञ डॉ. अमिता फडणीस यांनी व्यक्त केले. बावधन मधील गंगा लेजंड येथे गोयल गंगा फौंडेशनच्या वतीने जीजीआयएस अथ अंतर्गत  ‘आय पेरेंट्स’ या सत्राचे आयोजन करण्यात आले होते त्यानिमित्त त्या बोलत होत्या.

‘आय पेरेंट्स’ अंतर्गत ‘आय पेरेंट्स क्लब’ या फेसबुक पेजची  सुरुवात  करण्यात आली आहे. ज्यात मुलांचे शारीरिक व मानसिक आरोग्य या क्षेत्रात अनेक वर्ष  काम करणारे मोहन आगाशे, रक्षित टंडन,भूषण शुक्ला,निर्मला तांबे,अनुपमा देसाई या तज्ञांचे मार्गदर्शन व पालकांच्या अनेक प्रश्नांचे निरसन निशुल्क  केले जाणार आहे.

यावेळी गोयल गंगा इंटरनैशनल स्कुलच्या मुख्याध्यापिका भारती भागवाणी, गोयल गंगा इंटरनैशनल स्कुलच्या संचालिका सोनू गुप्ता, नगरसेवक किरण दगडे पाटील उपस्थित होते. पालकत्वाचे स्वरूप मुलांच्या वाढीच्या वयानुसार बदलावेच लागते. याचे महत्वही त्यांनी उपस्थित पालकांना पटवून दिले. मुलांना समजून घेताना पालकांना कोणत्या अडचणी येतात, त्यासाठी काय केले पाहिजे. ‘पालक’ हे मुलांचे पहिले गुरु असतात त्यामुळे त्यांचे अनुकरण ते करत असतात म्हणूनच  पालकांनी आधी स्वतः अवलंबवाव्यात ज्यातून ते शकू शकतात यातूनच ते भविष्यात उत्तमोत्तम कामगिरी करू शकतात.अशा भावना सोनू गुप्ता यांनी मांडल्या.

आजच्या मुलांमध्ये संयमाची खूप कमी असल्याचे दिसून येते. कोणतीही गोष्ट मिळाली नाही कि त्यांचा चिडचिड सुरू होते. संयम ठेवणारी मुलेच भविष्यात कणखर,आत्मविश्वासी स्वावलंबी आणि संयमी होऊ शकतात. यासाठी त्यांना स्वतःची ओळख करून घ्यायला स्वतःची ओळख करू द्यायला थोडासा वेळ आणि मोकळीक द्या. त्यांच्या अनुभवातून त्यांना शिकायला वेळ द्या. असा सल्ला त्यांनी दिला.