पुणे : जयवंत पब्लिक स्कूलमध्ये चौथीच्या वर्गात शिकणाऱ्या अवघ्या ९ वर्षाच्या प्रणव प्रविण गुंड याने एक नवा विश्वविक्रम केला आहे. त्याची नोंद ‘इंटरनॅशनल बुक ऑफ रेकॉर्ड’मध्ये नुकतीच झाली आहे. प्रणव याने महाराष्ट्रातील ३६ जिल्ह्यांची नावे ३९ सेकंदात बोलत हा विक्रम प्रस्थापित केला आहे. अशा प्रकारचा विश्वविक्रम होण्याची ही पहिलीच वेळ आहे. प्रणवच्या नावाने ह्या विश्वविक्रमाची इंटरनॅशनल बुक ऑफ रेकॉर्डमध्ये अधिकृत नोंद झाली आहे.

प्रणव गुंड हडपसरमधील ड्रीम्स आकृती सोसायटीमध्ये राहत असून, त्याचे आई-वडील दोघेही डॉक्टर आहेत. आई डॉ. मीनाक्षी गुंड आयुर्वेद चिकित्सक आहे, तर वडील डॉ. प्रविण गुंड हे पुण्यातील रसायु कॅन्सर क्लिनिकमध्ये कार्यरत आहेत. मुलाने केलेल्या कामगिरीमुळे आई वडील समाधानी आहेत व भावी आयुष्यात त्याला प्रोत्साहन देण्याच्या संकल्प त्यांनी दिला आहे.

प्रणवच्या आई वडिलांनी भावना व्यक्त करताना सांगितले की प्रणव लहानपणापासून हुशार आहे. तो पटकन गोष्टी आत्मसात करतो. प्रणव चार वर्षाचा असताना तो विविध शहर, राज्य यांची नावे घेत असे व ती वारंवार बोलण्याचा प्रयत्न करत असे. त्याच्यामधील स्मृती व सातत्य लक्षात घेवुन त्याला प्रोत्साहन दिले. नुकतेच त्याने स्केटिंगमध्ये जिल्हा स्तरावर गोल्ड मेडल मिळवले आहे. क्यूब सोडविण्यातही त्याला रस असून, तो त्याचा नियमित अभ्यास करत आहे.
प्रणवच्या यशाचे सर्वत्र कौतुक होत आहे. तो शिकत असलेल्या शाळेच्या प्रिन्सिपल यांनी त्याचे फोन करून विशेष अभिनंदन केले. त्याच्या समवयस्क मुलासाठी ती एक प्रेरणा स्त्रोत बनला आहे. त्याने केलेला विश्वविक्रम ह्याचा व्हिडिओ इंटरनॅशनल बुक ऑफ रेकॉर्ड यांच्या यूट्यब चॅनलवर अपलोड झाला आहे. तसेच इंटरनॅशनल बुक ऑफ रेकॉर्ड यांच्या अधिकृत सर्व प्लॅटफॉर्म वर हा विश्वविक्रम प्रकाशित झाला आहे. प्रणव इथे न थांबता नवनवीन गोष्टी आत्मसात करून पुढे जाण्याच्या तयारीत आहे व ते नक्की करेन, असे विश्वासाने प्रणवने सांगितले.

पुणे : जगतज्योति महात्मा बसवेश्वर महाराज यांची ८९२ वी जयंती तसेच श्री श्री श्री जगदगुरु एकोरामाराध्य आणि चैत्र शुद्ध पंचमीला श्री श्री श्री जगदगुरु मरूळाराध्य यांचा प्रकट दिन अश्या त्रिवेणी संगमाचे औचित्य साधून हिंदू वीरशैव लिंगायत मंच या वीरशैव लिंगायत समाजात कार्य करणाऱ्या राज्यव्यापी संघटनेच्या वतीने महात्मा बसवेश्वर महाराज जयंती उत्साहात साजरी करण्यात आली. यावेळी बसवेश्वर महाराज यांना ढोल-ताशांच्या गजरात मानवंदना देण्यात आली.

हिंदू वीरशैव लिंगायत मंचाच्या पुणे महानगर शाखेतर्फे बाजीराव रस्त्यावरील महाराणा प्रताप उद्यान येथे महात्मा बसवेश्वर महाराज यांच्या अश्वारूढ पुतळ्यास अभिवादन करण्यात आले. यावेळी पालकमंत्री चंद्रकांत पाटील यांच्या हस्ते पुतळ्यास पुष्पहार अर्पण करण्यात आला. कार्यक्रमाला उद्योजक महेश कुगांवकर, पश्चिम महाराष्ट्र प्रांत सयोजक शरद गंजीवाले, सहसंयोजक अविनाश कुलकर्णी, पुणे महानगर सचिव अतुल सरडे, सुभाष जेयुर, ऍड. वैजनाथ विंचूरकर, अमोल महांकाळे, रामलिंग शिवणगे, आशिष हिंगमिरे आदी उपस्थित होते. महिलांच्या हस्ते प्रतिमांना औक्षण करून आरती देखील करण्यात आली.

महेश कुगांवकर म्हणाले, महात्मा बसवेश्वर महाराज यांच्या विचारांचे अनुकरण आपण करायला हवे. बसवेश्वर महाराजांनी समाजाला दिलेली शिकवण सर्वधर्म समभावाची आहे. त्याप्रमाणे सर्वाना एकत्र घेऊन चालणे आज गरजेचे आहे. प्रत्येकाला माणसाची गरज असते. त्यामुळे सर्वानी समाजाला धरून एकमेकांची प्रगती साधायला हवी, असेही त्यांनी सांगितले.

पुणे : स्त्रीच्या शरीरापेक्षा तिच्या मनावर, त्यागावर प्रेम करायला हवे. भारतीय कुटुंबव्यवस्था कुटुंबवत्सल आणि नात्यांची गुंतागुंत असलेली आहे. या नात्याची घट्ट वीण आणि वात्सल्य दर्शवणारी ‘असीमांत रेखा’ मनाला भिडते,” असे प्रतिपादन ज्येष्ठ साहित्यिक व माजी संमेलनाध्यक्ष डॉ. श्रीपाल सबनीस यांनी केले.वेदांत प्रकाशन प्रकाशित व महेश सावळे लिखित ‘असीमांत रेखा’ या पुस्तकाचे प्रकाशन डॉ. श्रीपाल सबनीस यांच्या हस्ते झाले. महाराष्ट्र साहित्य परिषदेच्या माधवराव पटवर्धन सभागृहात झालेल्या कार्यक्रमाप्रसंगी प्रसिद्ध लेखक श्रीकांत चौगुले, प्रकाशिका सुनिताराजे पवार, लेखक महेश सावळे, पत्नी रेखा, मुलगा अनुप, स्नुषा डॉ. पारुल आदी मान्यवर यावेळी उपस्थित होते.

डॉ. श्रीपाल सबनीस म्हणाले,” महात्मा गांधींजींचे सत्य, अहिंसा ही तत्वे सुखी संसाराची बीजे आहेत. प्रेम, विश्वासाने संसार अधिक फुलतो, बहरतो. सावळे दाम्पत्याने हेच सुञ अवलंबल्याने त्यांच्या संसाराचा हा रथ अधिक जोमाने पुढे सरकत आहे. समर्पण, सहनशीलता, प्रेम अशा विविध पैलुंचे दर्शन या पुस्तकात घडते. स्त्री कर्तृत्वाचा आणि सांसारिक वाटचालीचा छत्तीस वर्षाचा हा प्रवास उत्तम पद्धतीने मांडला आहे.”

महेश सावळे म्हणाले, “समाजात व्यक्ती तितक्या प्रवृत्ती आहेत. सांसारिक सहजीवनाची छत्तीस वर्षे यशस्वीपणे पूर्ण केल्यानंतर पत्नीचा वेगळेपणा, तिची आपुलकी, तिचा प्रेमळ सहवास आणि तिच्या अस्तित्वाचा परिघ शब्दबद्ध करण्यासाठी, तसेच पत्नीच्या नात्याप्रती ऋणनिर्देश म्हणून ‘असीमांत रेखा’ हे पुस्तक रेखाटले.”

सुनिताराजे पवार म्हणाल्या, “स्त्रीचे आयुष्य एखाद्या नदीप्रमाणे असते. ती जेव्हा शांत असते, तेव्हा सर्वांना आपुलकीने सामावून घेत तिचा प्रवाह सुरू असतो. माञ जेव्हा ती आक्रमक होते, तेव्हा महापुर येतो आणि संहार होतो. ‘असीमांत रेखा’ या पुस्तकात लेखकाने त्यांच्या पत्नीच्या कर्तृत्वाची गौरवगाथा समर्पक शब्दात मांडली आहे. निश्चितच या प्रेरक साहित्यकृतीचे वाचक स्वागत करतील. लोकांना सोपी वाटणारी गृहिणीची भुमिका ही अवघड असते.”

श्रीकांत चौगुले म्हणाले, “वसुधैव कुटुंबकम ही भारतीय संस्कृती आहे. या संस्कृतीला धरून लिहिलेले हे पुस्तक प्रत्येक घरातील कथा वाटावी अशी आहे. पुस्तकातील त्याग, सर्मपणाची भावना प्रेरणा देणारी आहे.” प्रास्ताविक डॉ. पारुल सावळे यांनी केले. सूत्रसंचालन रुपाली अवचरे यांनी केले. आभार अनुप सावळे यांनी मानले.

श्री महालक्ष्मी मंदिर सारसबागेच्यावतीने आयोजन ; अक्षयतृतीयेला मंदिरात आकर्षक पुष्पसजावट
पुणे : मोग-यासह सुवासिक फुलांचा श्री महालक्ष्मी, श्री महासरस्वती व श्री महाकाली देवीला केलेला पुष्पाभिषेक… पुष्पमुकुट व पुष्पपोशाख परिधान केल्यानंतर देवीचे दिसणारे विलोभनीय रुप आणि मंदिराचा गाभारा व सभामंडपातील विविधरंगी पुष्पांची आरास पाहण्याकरीता देवीभक्तींनी गर्दी केली. सारसबागेसमोरील श्री महालक्ष्मी मंदिराच्या परिसरात मोग-याच्या हजारो फुलांचा सुगंध दरवळत होता. 
निमित्त होते, श्री महालक्ष्मी मंदिर सारसबाग, श्री बन्सीलाल रामनाथ अग्रवाल धार्मिक व सांस्कृतिक ट्रस्ट च्यावतीने अक्षयतृतीयेच्या निमित्ताने आयोजित वासंतिक मोगरा व पुष्पोत्सवाचे. मोग-याच्या फुलांनी मंदिराचा परिसर खुलून गेला होता. तब्बल १५१ किलो मोगरा, २५१ गुलाबाच्या फुलांच्या गड्डया, चाफा, जाई-जुई, गुलछडी, झेंडू यांसह अनेक फुलांची आरास करण्यात आली. भाविकांनी अक्षयतृतीयेनिमित्त देवीदर्शनासाठी मोठी गर्दी केली होती, अशी माहिती ट्रस्टच्या प्रमुख विश्वस्त अमिता अग्रवाल यांनी दिली.

पुणे- पुण्यात अनधिकृत बांधकामे आणि अतिक्रमणांची कमतरता नाही ,पण म्हणून कारवाई देखील हतबल झालेली नाही आणि होणार नाही हे दर्शविण्यासाठी काल पुन्हा बाणेर मध्ये महापालिकेच्या वतीने अनधिकृत बांधकामे , अतिक्रमणे यांवर धडक कारवाई करण्यात आली .बाणेर येथील बाणेर येथील बाणेर – औंध लिंक रोड ( मेडि पॉइंट चौक ते बाणेर स्मशान भूमी ) येथे अनेक अनधिकृत हॉटेल्स ,व्यवसायिक पत्राशेड व अनधिकृत बांधकाम यावर धडक कारवाई बांधकाम विकास विभाग झोन ३ व औंध – बाणेर क्षेत्रीय कार्यालय अतिक्रमण विभाग यांचेमार्फत पोलीस स्टाफच्या मदतीने संयुक्त कारवाई नियोजित करण्यात आलेली होती.सदर कारवाई मधे सुमारे १,१०,७३० चौ.फूट क्षेत्र निष्कासित करण्यात आले आहे.

सदर कारवाई पुणे महानगरपालिकेचे अधिक्षक अभियंता युवराज देशमुख,बांधकाम विभाग झोन क्र.३ चे कार्यकारी अभियंता – श्रीकांत वायदंडे यांचे मार्गदर्शनाखाली,उप अभियंता निवृत्ती उतळे,कनिष्ठ अभियंता संदेश कुवळमोडे, अजित सणस, विश्वनाथ बोटेआरेखक नविन महेत्रे,टूलीप इंजिनियर सुरज शिंदे, प्राची सर्वगोड यांचे पथकाने तीन जेसीबी, दोन गॅस कटर, एक ब्रेकर, १० अतिक्रमण कर्मचारी यांचे सहाय्याने कारवाई केली.

श्रीमंत दगडूशेठ हलवाई सार्वजनिक गणपती ट्रस्ट व सुवर्णयुग तरुण मंडळातर्फे आयोजन ;
ससून रुग्णालयातील रुग्णांना आणि सामाजिक संस्थांमध्ये होणार आंब्याच्या प्रसादाचे वाटप

पुणे :  साडेतीन मुहूर्तापैकी एक मुहूर्त असलेल्या अक्षयतृतीयेच्या मंगलदिनी दगडूशेठ गणपतीला ११ हजार आंब्यांचा महानैवेद्य दाखविण्यात आला. लाडक्या गणपती बाप्पांच्या भोवती केलेली आंब्यांच्या आकर्षक आरास… मंदिरावर फुलांनी साकारलेल्या आंब्यांच्या प्रतिकृती… प्रवेशद्वारापासून गाभा-यापर्यंत रंगीबेरंगी फुलांनी केलेली सजावट अशा मनोहारी वातावरणात स्वराभिषेकातून अक्षयतृतीयेच्या निमित्ताने गणराया चरणी सेवा अर्पण करण्यात आली.

श्रीमंत दगडूशेठ हलवाई सार्वजनिक गणपती ट्रस्ट व सुवर्णयुग तरुण मंडळातर्फे मंदिरात आंबा महोत्सव आयोजित करण्यात आला. यामध्ये गणपती बाप्पांना ११ हजार आंब्यांचा महानैवेद्य अर्पण करण्यात आला. पुण्यातील आंब्यांचे सुप्रसिद्ध व्यापारी श्री देसाई बंधु आंबेवालेचे मंदार देसाई आणि परिवाराच्या वतीने हा नैवेद्य देण्यात आला. आब्यांची आरास पाहण्यासोबतच गणरायाचे दर्शन घेण्यासाठी भाविकांनी पहाटेपासून मोठी गर्दी केली होती.

यापूर्वी पहाटे ४ ते सकाळी ६ पर्यंत गायक अविनाश चंद्रचूड, विश्वजित जोशी, सावनी रवींद्र यांनी स्वराभिषेकातून गायनसेवा अर्पण केली. त्यानंतर सकाळी ८ वाजता विशेष गणेशयाग आणि  रात्री ९ वाजता भजन विठ्ठल प्रासादिक महिला भजनी मंडळाच्यावतीने उटीचे भजन झाले. आंब्याचा प्रसाद ससूनमधील रुग्ण, वृद्धाश्रम, अनाथाश्रम तसेच गणेशभक्तांना देण्यात येणार आहे.

पुणे – तरूणांना फिटनेस व शरीर सौष्ठवाच्या लागलेल्या ध्यासाला एक सकारात्मक व हक्काचे व्यासपीठ मिळावे तसेच उदयोन्मुख व शरीरसौष्ठव पटूना हक्काचे व्यासपीठ मिळावे या उद्देशाने पिंपरी चिंचवड येथे दोन दिवसीय राज्यस्तरीय महाराष्ट्र श्री शरीर सौष्ठव अजिंक्यपद स्पर्धेचे आयोजन करण्यात आले आहे.

इंडियन बॉडी बिल्डर्स फेडरेशन मान्यता प्राप्त महाराष्ट्र बॉडी बिल्डिंग असोसिएशन संलग्न बॉडी बिल्डिंग ॲण्ड फिजिक स्पोर्ट्स असोसिएशन, पिंपरी-चिंचवड संघटना व महाराष्ट्र बॉडी बिल्डिंग असोसिएशनचे अध्यक्ष किरण सावंत यांच्या सौजन्याने महाराष्ट्र श्री २०२३ भव्य राज्यस्तरीय शरीरसौष्ठव ही स्पर्धा गुरूवार, ४ मे व शुक्रवार, ५ मे २३ या दरम्यान आयोजित करण्यात आली आहे. या सर्व अजिंक्यपद स्पर्धा सिल्व्हर बँक्वेट हॉल जवळ डांगे चौक रावेत बीआरटी रोड ताथवडे. पिंपरी चिंचवड, पुणे येथे होणार आहे.

यामध्ये पुरुष शरीर सौष्ठव, मेन्स फिजिक, महिला शरीर सौष्ठव व वूमन मॉडेल फिजिक या गटात स्पर्धा असतील. वर्ल्ड बॉडिबिल्डींग अण्ड फिजिक्स स्पोर्ट्स फेडरेशन चे जनरल सेक्रेटरी श्री चेतन पठारे यांच्या शब्दाला मान देऊन ही महाराष्ट्र श्री या स्पर्धेच्या आयोजनासाठी जबाबदारी किरण सावंत यांनी स्वीकारली, महाराष्ट्र बॉडिबिल्डींग असोसिएशनच्या नवनिर्वाचित अध्यक्ष पदावर निवडून आलेले किरण सावंत यांच्या आज पर्यंत शरीरसौष्ठव या खेळासाठी केलेल्या उल्लेखनीय कामगिरी कौतुकास्पद असून भविष्यात ते अजून चांगल्याप्रकारे स्पर्धेचे आयोजन करतील तसेच महाराष्ट्रातील खेळाडूंना वेळोवळी मदत करतील असे वर्ल्ड बॉडिबिल्डींग अण्ड फिजिक्स स्पोर्ट्स असोसिएशन व एशियन बॉडीबिल्डींग अण्ड फिजिक्स स्पोर्ट्स असोसिएशनचे कायदेशीर सल्लागार श्री. विक्रम रोठे यांनी नमूद केले. या स्पर्धासाठी साऊथ एशियन बॉडिबिल्डींग अँण्ड फिजिक्स स्पोर्ट्स असोसिएशनचे अध्यक्ष श्री. प्रशांत आपटे यांनी शूभेच्छा दिल्या. महाराष्ट्र बॉडी बिल्डींग असोसिएशन सेक्रेटरी राजेंद्र चव्हाण आणि खजिनदार सूनिल शेगडे यांच्या मार्गदर्शनाखाली या स्पर्धचे आयोजन बॉडी बिल्डिंग ॲण्ड फिजिक्स स्पोर्ट्स असोसिएशन पिंपरी-चिंचवड करत आहे.अशी माहिती आज इथे आयोजित पत्रकार परिषदेत दिली.

ही स्पर्धा १२ गटांमध्ये होणार असून महाराष्ट्रातील २२ जिल्हातील खेडाळू सहभाग घेणार आहेत. ज्यामध्ये प्रामुख्याने मुंबर्ईचा रस्सेल डिब्रोटो, अजिंक्य रेडेकर, नितीन म्हात्रे, निलेश दगडे, सूशांत राजंणकर, उमेश गूप्ता, रोहन गूरव, पिंपरी चिंचवडचा श्रीनिवास वास्के, तोसिफ मोमीन, अदिती बंब, रेणूका मूदलीयार, शितल वाडेकर व तन्विर हक यांच्यामध्ये चुरस होणार आहे. राज्यभरातून अधिकाधिक तरूण- तरूणींनी या स्पर्धेत सहभाग घ्यावा असे आवाहन महाराष्ट्र बॉडी बिल्डिंग असोसिएशनने केले आहे.

दोन गटात होणार स्पर्धा…
स्पर्धेतंर्गत वजन तपासणी व स्पर्धा होणार आहे. मेन्स फिजिक दोन गटात होणार असून ही स्पर्धा दिनांक गुरूवार, ४ मे रोजी सायंकाळी ४ ते १० या वेळात होईल. तर पुरूष शरीर सौष्ठव आणि महिला शरीर सौष्ठव व वूमन मॉडेल फिजिक स्पोर्ट्स ही स्पर्धा शुक्रवार ५ मे २०२३ रोजी फिजिक वजन तपासणी सकाळी १० ते दुपारी ३ व स्पर्धा संध्याकाळी ५ ते ११ या वेळी होईल.

लाखोंची बक्षिसे…
स्पर्धेतील विजेत्यांना एकूण सहा लाख ५० हजार अशी रोख रकमेची बक्षिसे ट्रॉफी प्रमाणपत्र दिली जाणार आहेत. तर अजिंक्यपद पटकाविणाऱ्या विजेत्यास १ लाख २५ हजार रूपये, उपविजेत्यास ५० हजार व रनर अप २५ हजार रूपये रकमेचे रोख पारितोषिक दिले जाणार आहे. तसेच उत्तेजनार्थ ६ ते १० क्रमांक स्पर्धकांना प्रत्येकी १ हजार रूपये व प्रशस्तीपत्र देखील प्रदान केले जाणार आहे. असून मेन्स फिजिक, महिला शरीर सौष्ठव व वूमन मॉडेल फिजिक स्पोर्ट्स महिलांना देखील रोख रकमेची पारितोषिके ट्रॉफी व प्रमाणपत्र देण्यात येणार आहे.
क्रीडा प्रकार व स्पर्धा अधिकधिक तरूण-तरूणींपर्यंत पोहचवणार – किरण सावंत

किरण सावंत यांनी नुकतीच महाराष्ट्र बॉडी बिल्डिंग असोसिएशनच्या अध्यक्षपदाची सुत्रे हाती घेतली आहेत. ते स्वतः विविध क्रीडा प्रकार, व्यायाम व फिटनेस विषयी जागरूक असून ते यासंबंधाने ते या बाबतीत कमालीचे पॅशनेट आहेत. हा क्रीडा प्रकार, स्पर्धा, तसेच या क्रीडा प्रकाराप्रति तरूणांमध्ये जागरूकता, आकर्षण वाढविण्याच्या दृष्टीने अधिक उत्तम व भव्य अशा स्पर्धेसाठी आम्ही प्रयत्नशील असणार आहोत, अशी महाराष्ट्र बॉडी बिल्डिंग असोसिएशनचे अध्यक्ष किरण सावंत यांनी सांगितले.

चंद्रकांतदादा पाटील यांच्या हस्ते स्पर्धेचे उद्घाटन

पुणे : भारतीय संघाने पोलंडला पराभूत करताना पुरुष गटातून वरिष्ठ गटाच्या सहाव्या रोलबॉल विश्वकरंडक स्पर्धेत विजयी सलामी दिली.

म्हाळुंगे बालेवाडी येथील श्री शिव छत्रपती स्टेडीयम येथे सुरु झालेल्या स्पर्धेचे औपचारिक उद्घाटन उच्च तंत्र, शिक्षण तथा पालकमंत्री चंद्रकांतदादा पाटील यांच्या हस्ते करण्यात आले. यावेळी पुणे महानगरपालिकेचे आयुक्त विक्रम कुमार, पिंपरी चिंचवड महापालिकेचे आयुक्त शेखर सिंग, पीएमआरडीएचे आयुक्त राहुल महिवाल, उद्योगपती पुनीत बालन, महाराष्ट्र रोलबॉल संघटनेचे अध्यक्ष संदीप खर्डेकर, रोलबॉल खेळाचे जनक राजू दाभाडे, यांच्यासह पुणे मनपाच्या शिक्षण समितीच्या अध्यक्षा नगरसेविका मंजुश्री खर्डेकर, ज्योती कळमकर आदी मान्यवर उपस्थित होते.

यावेळी बोलताना चंद्रकांतदादा पाटील यांनी स्पर्धेसाठी सर्वच संघाना शुभेच्छा देताना भारतीय संघाच्या जर्सीचे अनावरण केले. पुण्यात जन्मलेला हा खेळ सुमारे ५० पेक्षा अधिक देशात खेळला जात आहे. सहावी विश्वकरंडक स्पर्धा पुण्यात होत असल्याचा आनंद होत आहे. या स्पर्धेत सुमारे २७ देश सहभागी झाले असून भविष्यात अजून देश सहभागी होतील, असा विश्वास पालकमंत्री चंद्रकांतदादा पाटील यांनी व्यक्त केला.

उद्घातानावेळी शाहू लक्ष्मी कला क्रीडा अकादमीच्या वतीने तलवारबाजी, भाले, ढाल-तालवर यांचे विविध प्रयोग करताना महाराष्ट्राची लोककला प्रदर्शित केली. रॅम्बो सर्कसच्या कलाकारांनी विविध कलाकारी सादर करताना स्पर्धेच्या उद्घाटनात जान आणली. यावेळी पोलीस बँडने देखील सर्वच देशांच्या खेळाडूंचा उत्साह वाढविण्यासाठी विविध गीते सादर केली. यामुळे खेळाडूंमध्ये मोठ्या प्रमाणात उत्साह निर्माण झाला.

सलामीच्या लढतीत पुरुषांच्या गटात भारतीय संघाने पोलंड संघाला १४-१ अशा फरकाने पराभूत करताना विजयी सलामी दिली. मध्यंतराला भारतीय संघाने ८-० अशी आघाडी घेतली होती. भारताकडून आकाश गणेशवाडेने ४ (१२.३३, १३.५५, १४.२२ व ३२.०९ मिनिटे), हर्षल घुगेने २ (५.१० व ३१.० मिनिटे), सचिन सैनीने २ (२.४७ व ३९.०८ मिनिटे) मिहीर सानेने १ (६.३६ मिनिटे), श्रीकांत साहूने १ (१७.००मिनिटे), विकी सैनीने १ (१०.२४ मिनिटे), आदित्य सुतारने १ (२४.२० मिनिटे), गुरुवचन सिंगने १ (२६.५६ मिनिटे) व प्रदीप टी.ने १ (३६.४३ मिनिटे) गोल केला. पोलंड संघाकडून रडदिया सत्यमने (२५.२८ मिनिटे) एक गोल केला.

महिलांच्या गटातील इजिप्त व नेपाळ लढतीला सुरुवात झाली आहे. थोड्या वेळात अपडेटेड बातमी पाठवतो.पुरुष गटातून भारताची विजयी सलामी

मुंबई दि.21 पुणे महापालिकेने सन 1970 पासून, नागरिकांना मालमत्ता करात दिलेली सवलत पूर्वलक्षी प्रभावाने पुन्हा लागू करण्याबाबत शासन निर्णय जारी करण्यात आला आहे अशी माहिती उच्च व तंत्र शिक्षण मंत्री तथा पुणे जिल्हा पालकमंत्री चंद्रकांत(दादा)पाटील यांनी दिली.

या शासन निर्णयानुसार आता घरमालक स्वतः राहत असलेल्या मालमत्तेचे वाजवी भाडे 60टक्के धरून मालमत्ता करात सन 1970 पासून देण्यात येणारी 40टक्के सवलत कायम करण्यात आली आहे. तसेच, दि.17 सप्टेंबर 2021 च्या शासन निर्णयानुसार या सवलतीच्या रक्कमेची पूर्वलक्षी प्रभावाने वसुली करण्यात येणार नाही.
निवासी व बिगर निवासी मालमत्ता देखभाल दुरुस्ती करीता देण्यात येणारी 15टक्के वजावट रद्द करण्यात येऊन महानगरपालिका अधिनियमातील तरतुदीनुसार दि.01 एप्रिल, 2023 पासून 10टक्के वजावट करण्यात येणार. मात्र, दि.28 मे 2019 रोजीच्या पत्रानुसार सन 2010 पासून करण्यात येणाऱ्या 5टक्के फरकाच्या रक्कमेची वसुली दि.31 मार्च 2023 पर्यंत माफ करण्यात आली आहे.
नव्याने बांधकाम करण्यात आलेल्या निवासी मालमत्तांची आकारणी दि.01 एप्रिल 2019 पासून पुढे झालेली असून त्यांना 40टक्के सवलतीचा लाभ देण्यात आलेला नाही अशा प्रकरणांची तपासणी करून त्यांना दि.01 एप्रिल 2023 पासून ही सवलत लागू करण्यात येणार आहे.
*सन 2019 ते 23 या कालावधीत ज्यांनी मालमत्ता कर भरणा केला आहे. त्यांच्या फरकाची रक्कम पुढील देयकामधून वळती करण्यात येणार असून या सर्व निर्णयांचे नियमितिकरण करण्यासाठी आवश्यक असलेली कायद्यातील दुरुस्ती देखील आगामी अधिवेशनात करण्यात येईल,असे उच्च व तंत्रशिक्षण मंत्री श्री. पाटील यांनी सांगितले.