पुणे :

आंतरराष्ट्रीय नृत्य दिनाचे औचित्य साधून मनीषा नृत्यालय संस्थेने आयोजित केलेला ‘अनुवेध’ हा कार्यक्रम ज्येष्ठ नृत्य गुरु मनीषा साठे आणि शिष्यांच्या नृत्यप्रस्तुतीने गाजला ! बालगंधर्व रंगमंदिर येथे हा कार्यक्रम झाला.

मंजिरी कारूळकर, शांभवी दांडेकर, शिल्पा दातार, पूर्वा शाह, मानसी गदो, पद्मश्री जोशी, तेजस्विनी साठे, डॉ. माधुरी आपटे, गौरी स्वकुळ, मिथिला भिडे, ईशा काथवटे, पायल गोखले, अदिती कुलकर्णी, मधुरा आफळे, वल्लरी आपटे, अदिती लेले यांच्या बहारदार नृत्यसंरचना प्रस्तुत झाल्या. त्यांच्या शिष्याही प्रतिवर्षीप्रमाणे ह्या नृत्यसंध्येत उत्तम तयारीने सहभागी झाल्या होत्या.

ज्येष्ठ नृत्यगुरु मनीषा साठे यांच्या दुर्गा स्तवन आणि लक्ष्मीताल प्रस्तुतीने उपस्थित भारावून गेले. तराणा, सरगम, होरी, चतरंग, ध्रुपद यासारख्या पारंपरिक बंदिशींसह शिवभूषण, नरनारायण कवित्त, मोजार्ट सिम्फनी, सप्तचक्र अशा विषयांच्या कल्पक हाताळणीने रसिक तृप्त झाले. एकाच नृत्यगुरूंच्या १४ शिष्यांनी एकत्र येऊन अशी प्रस्तुती एकदिलाने साकार करण्याचे असे उदाहरण विरळाच!

मनीषा साठे यांनी छोटेखानी मनोगताद्वारे नव्या पिढीला मार्गदर्शन केले. त्या म्हणाल्या, ”माझ्या दृष्टीने सहृदय कलाकारांनी असे एकत्र राहणे, एकमेकांना तत्परतेने मदत करणे हे अतिशय महत्त्वाचे आहे. नृत्य तर त्यांनी विचारपूर्वक आणि चांगले केलेच पाहिजे पण एकमेकांबद्दलचे प्रेम आणि विश्वास ही सगळ्यात जमेची बाजू!”

डॉ. माधुरी आपटे यांनी निवेदनाची बाजूही सांभाळली.

पुणे – राष्ट्रीय विधि सेवा प्राधिकरण नवी दिल्ली व महाराष्ट्र राज्य विधि सेवा प्राधिकरण उच्च न्यायालय मुंबई यांच्या निर्देशांनुसार आणि प्रमुख जिल्हा न्यायाधीश श्याम चांडक यांच्या मार्गदर्शनाखाली जिल्ह्यातील सर्व न्यायालयांमध्ये आयोजित राष्ट्रीय लोकअदालतमध्ये पुणे जिल्ह्याने प्रलंबित १६ हजार ६४६ आणि दाखलपूर्व १ लाख २ हजार ११९ अशी एकूण १ लाख २१ हजार १७७ प्रकरणे निकाली काढून महाराष्ट्रात सलग दहाव्यांदा प्रथम स्थान मिळवले आहे.

या लोकन्यायालयामध्ये एकूण ५९ हजार ३१७ प्रलंबित व एकूण १ लाख ५५ हजार ७५७ दाखलपूर्व प्रकरणे ठेवण्यात आली होती. कौटुंबिक हिंसाचार प्रकरणांतील ८ प्रकरणात सामंजस्याने तडजोड करुन त्यातील पती पत्नी दोन्ही पक्षकार आनंदाने नांदण्यास तयार झाले, अशी माहिती जिल्हा विधी सेवा प्राधिकरणाच्या सदस्य सचिव मंगल कश्यप यांनी दिली.

व्हीडीओ कॉन्फरन्सद्वारे प्रकरण निकाली

वरिष्ठ स्तर दिवाणी न्यायाधीश जे. एस. भाटीया यांच्या पॅनलवर आलेल्या प्रकरणांपैकी दोन प्रकरणांमध्ये काही पक्षकार त्यांच्या वैयक्तीक कारणामुळे न्यायालयात उपस्थित राहू शकले नसल्यामुळे न्यायालयाच्या पुर्व परवानगीने व्हीडीओ कॉन्फरन्सद्वारे चर्चा करुन सदर प्रकरणे सामंजस्याने तडजोडकरुन मिटविण्यात यश आले.

प्रथमच डिजीटली ई-फायलिंगचे प्रकरण निकाली
जिल्हा न्यायाधीश-६ एस. आर. नावंदर यांच्या पॅनलवरील मोटार अपघात दावा प्राधिकरणाचे प्रकरण महाराष्ट्रात पहिल्यांदाच डिजीटली ई-फायलिंगचे प्रकरण लोकअदालतमध्ये निकाली काढण्यात आले. या प्रकरणाची संपूर्ण प्रक्रिया ही पेपरलेस घेण्यात आली. याच पॅनलवर एका प्रकरणात पक्षकार तिरुपती येथे असल्यामुळे व्हीडीओ कॉन्फरन्सद्वारे लोक अदालतमध्ये सहभागी झाले व प्रकरणात तडजोड केली. ‘न्याय तुमच्या दारी’ या तत्वानुसार हा खटला निकाली निघाला.

दिव्यांग पक्षकारासाठी न्यायालय कक्षाबाहेर लोकअदालत

मोटार अपघात दावा प्राधिकरणाच्या प्रकरणांपैकी दोन प्रकरणामध्ये पक्षकार दिव्यांग असल्यामुळे त्यांना न्यायालयातील इमारतीमध्ये येणे शक्य झाले नाही. त्यामुळे जिल्हा न्यायाधीश-६ एस. आर. नावंदर यांनी स्वतः न्यायालय कक्षाबाहेर येवुन पक्षकारास नुकसान भरपाई धनादेश दिला.

जिल्ह्यातील सर्व न्यायीक अधिकारी, तसेच पुणे व जिल्ह्यातील सर्व तालुका विधिज्ञ संघटना व इतर विविधि शासकीय, सामाजिक संस्था यांचे विशेष सहकार्याने लोकअदालत यशस्वी झाल्याचे श्री. चांडक यांनी सांगीतले. ग्रामपंचायत संदर्भातील प्रकरणे निकाली काढण्यात जिल्हा परिषदेचे मुख्य कार्यकारी अधिकारी आयुष प्रसाद आणि उप मुख्य कार्यकारी अधिकारी सचिन घाडगे यांचे सहकार्य लाभले.

निसर्गोपचाराचा प्रचार प्रसार होण्याची अपेक्षा केली व्यक्त

पुणे: मुख्यमंत्री वैद्यकीय सहायता निधी, महात्मा फुले जनआरोग्य योजना आदींच्या माध्यमातून राज्य शासन सर्वसामान्य जनतेच्या वैद्यकीय उपचारांसाठी मोठ्या प्रमाणात मदत करत आहे, असे प्रतिपादन राज्याचे उच्च व तंत्र शिक्षण मंत्री तथा जिल्ह्याचे पालकमंत्री चंद्राकांतदादा पाटील यांनी केले.

राष्ट्रीय निसर्गोपचार संस्था पुणे येथे हृदयमित्र प्रतिष्ठानच्यावतीने निसर्गोपचार भूषण पुरस्कार वितरण कार्यक्रमात श्री. पाटील बोलत होते. यावेळी माजी आमदार योगेश टिळेकर, निसर्गोपचार संस्थेच्या संचालक प्रा. डॉ. के. सत्यलक्ष्मी, हृदय मित्र प्रतिष्ठानचे अध्यक्ष श्रीकांत मुंदडा उपस्थित होते.

श्री. पाटील पुढे म्हणाले, निसर्गोपचार अत्यंत चांगला उपचार असल्याचा स्वतः अनुभव घेतला असल्याचे सांगून पालकमंत्री म्हणाले, कोरोना परिस्थितीने माणसाला वैद्यकीय उपचाराचे महत्व लक्षात आणून दिले. आज आजारांवरील उपचारांसाठी, औषधांसाठी मोठ्या प्रमाणावर खर्च होतो. हे पाहता निसर्गोपचार, प्राणायाम, मेडिटेशन, हीलींग उपचारपद्धती आदी पर्यायी उपचारपद्धतींना प्रोत्साहन दिले पाहिजे. यातील उपचारांची, औषधांची विश्वासार्हता वाढविण्यासाठी प्रचार प्रसाराची गरज आहे. कोंढवा येथे होत असलेले राष्ट्रीय निसर्गोपचार संस्थेचे निसर्गोपचार रुग्णालय निसर्गोपचाराच्या प्रसारासाठी उपयुक्त ठरेल, असा विश्वासही त्यांनी व्यक्त केला.

प्रा. डॉ. के सत्यलक्ष्मी म्हणाल्या, निसर्गोपचाराच्या प्रसारासाठी संस्था काम करत असून संस्थेला १०० वर्षांचा इतिहास आहे. चंद्रकांतदादा पाटील राज्याचे महसूलमंत्री असताना त्यांच्या प्रयत्नातून संस्थेला अद्ययावत निसर्गोपचार रुग्णालयासाठी कोंढवा येथे २५ एकर जागा मिळाली आहे. लवकरच येथे २५० खाटांच्या रुग्णालयाचे बांधकाम पूर्णत्वास येत आहे. या आवारात ५०० बाह्यरुग्ण सुविधा, निसर्गोपचार महाविद्यालय तसेच प्राध्यापक, विद्यार्थी यांची निवासाचीही व्यवस्था असणार असून गुरुकुल मॉडेलप्रमाणे येथे काम चालणार आहे.

इंटरनॅशनल नॅचरोपॅथी ऑर्गनायझेशनचे राष्ट्रीय अध्यक्ष डॉ. अनंत बिरादार म्हणाले, देश विदेशात निसर्गोपचार, योगाचा प्रसार करण्याचे काम करण्यात येत आहे. केंद्र शासनाकडूनही स्वतंत्र आयुष मंत्रालयाची स्थापना, पर्यायी उपचार पद्धतींचा प्रचार प्रसार करण्यात येत आहे.

श्रीकांत मुंदडा यांनी प्रास्ताविकात हृदय मित्र प्रतिष्ठानच्या कार्याची माहिती दिली. आजारांवर विविध उपचारपद्धतीच्या समन्वयातून उपचार करणे लाभदायक ठरते, असे ते यावेळी म्हणाले.

कार्यक्रमात मंत्री श्री. पाटील यांच्याहस्ते डॉ. अनंत बिरादार यांना निसर्गोपचार भूषण पुरस्कार प्रदान करण्यात आला.

बालभारती -पौड रस्त्याच्या विरोधामागे पर्यावरण प्रेमींचे ‘ बोलावते धनी’ कोण ? नदी सुधार योजनेला विरोध कोणाचा?

पुणे-कात्रजचे जंगल नाहीसे करून, टेकड्या फोडून तिथे बेकायदा बांधकामे उभारणाऱ्या लोकांनी,नदीतील झाडी वाचविण्याच्या नावाने नौटंकी करण्याबाबत राजकीय वर्तुळात खमंग चर्चा होत असताना आता थेट या विषयाला माजी विरोधी पक्षनेते उज्वल केसकर, आणि सुहास कुलकर्णी यांनी हाथ घातला आहे आणि बालभारती -पौड रस्त्याच्या विरोधामागे पर्यावरण प्रेमींचे ‘ बोलावते धनी’ कोण ? नदी सुधार योजनेला नेमका विरोध कोणाचा? असे सवाल केले आहेत.

माजी विरोधी पक्षनेते केसकर, आणि सुहास कुलकर्णी यांनी असे म्हटले आहे कि,’ प्रथम पूल बांधायचे मग ते पूल तोडायचे आणि मग ते पुन्हा बांधण्यासाठी प्रयत्न करायचे कुणाच्या हितासाठी?पुणेकर याचा जाब विचारत आहेत त्यामुळे तोंड लपवायला देखील जागा नाही सिंहगड रोड सारख्या गजबजलेल्या रस्त्याला पर्याय असलेला रस्ता उखडून टाकला.
अपयश झाकण्यासाठी राजकीय पक्षांचे षडयंत्र
केसकर आणि कुलकर्णी यांनी पुढेअसेही म्हटले आहे,’ सद्यस्थितीत शहरात सार्वजनिक वाहतुकीचा प्रश्न गंभीर आहे ती अपुरी आहे, सत्तेवर असताना ती नीट करण्याचा सक्षम करण्याचा प्रयत्न झाला नाही, त्यामुळे जीवघेण्या वाहतुकीमुळे होणाऱ्या अपघातांत बळींची संख्याही दिवसेंदिवस वाढत आहे. वाहतूक कोंडीत पुणेकरांचा श्वासही गुदमरत आहे.मात्र सुरळीत आणि सुरक्षित वाहतुकीच्यादृष्टीने होणाऱ्या शाश्वत विकासाला काही राजकीय पक्षांकडून ‘खो ‘घालण्याचे कारस्थान सुरु झाल्याच्या वास्तवतेचाही आता पर्दाफाश होत आहे. सत्ता भोगूनही पुणेकरांसाठी काय केले? या प्रश्नाला सोईस्कर बगल देताना अपयश झाकण्यासाठीच काही राजकीय पक्षांकडून आता स्वयंसेवी संस्थांचा आधार घेत ,पर्यावरणाच्या नावाखाली ‘ टाहो’ फोडला जात आहे. परिणामी अचानक पर्यावरणप्रेमींचे पेव का फुटले,त्यामागे राजकारण कुणाचे आणि पर्यावरण प्रेमींचे ‘ बोलविते धनी’ कोण ? हे प्रश्न यानिमित्ताने ऐरणीवर आले आहेत.
ते पुढे म्हणाले,’ यासंदर्भात राजकीय आकसापोटीच बालभारती -पौड रस्त्याला विरोध होत असल्याचे अधोरेखित झाले आहे. आज विकासाच्या दिशेने पुणे गतिमान होत आहे आणि नियोजनबद्धपणे शाश्वत विकासाचे प्रकल्प साकारत आहेत.केंद्रात मोदींचे सरकार आहे आणि राज्यात एकनाथ शिंदे देवेंद्र फडणवीस यांचे सरकार आहे आणि ते शहराच्या विकासासाठी कटिबद्ध आहेत. नदी सुधार योजनेसाठी माजीमंत्री खासदार प्रकाश जावडेकर यांनी ‘जायका’ मधून निधी आणला आहे.अकरा एसटीपी प्लांटद्वारे शुद्ध केलेले पाणी नदीत सोडले जाणार आहे. शिवाय नदीचे सुशोभीकरण होणार आहे. मात्र केवळ राजकीय आकसातून विरोधाचे राजकारण सुरू झाले आहे. त्यातून पुणेकर नागरिकांसह युवा पिढीचा दिशाभूल करण्याचे डावपेच आखले जात आहे. असेच कारस्थान बालभारती -पौड रस्त्याला विरोध करण्यासाठी रचले जात आहेत. सुंदरलाल बहुगुणा अशा थोर व्यक्तीने केलेल्या “चिपको” आंदोलनाचा आधार घेऊन किंबहुना गैरवापर करून राजकीय स्वार्थासाठी काही पक्षांनी ‘भासवा- भासवी’ सुरु केली असून पर्यावरण प्रेमींचीच फसवणूक केली जातेआहे.

ज्या सदनिकांमध्ये राहतो त्या इमारती उभारताना इमारतीचा पाया किती खोलीवर घेण्यात आला आहे, किती नैसर्गिक जलस्रोत बंद झाले. याची माहितीही कथित पर्यावरण प्रेमींनी द्यावी
केसकर पुढे म्हणाले कि,’ सत्ता भोगताना ‘आधी बांधायचे मग तोडायचे आणि पुन्हा बांधायचे’ या कारभारात कुणाचे हित जोपासले ? आणि पुण्यासाठी ठोस प्रकल्प कोणते दिले? या प्रश्नांना सामोरे जावे लागू नये यासाठी आता पर्यावरण प्रेमी, स्वयंसेवी संस्थांना पुढे करून सत्तेत आलेले अपयश झाकण्याचा प्रकार राजकीय पक्षांकडून होत आहे आणि त्याला पर्यावरण प्रेमी बळी पडत आहेत. त्यातही बालभारती -पौड रस्ता असो अथवा नदी सुधार योजनेला ज्यापद्धतीने विरोध केला जात आहे. त्यात अचानक पर्यावरण प्रेमींचे पेव का फुटले ? हाच संशोधनाचा भाग आहे. शिवाय पर्यावरण म्हणजे नेमके काय ? आणि पर्यावरणवादीची व्याख्या काय? याचे स्पष्टीकरण बालभारती -पौड रस्त्यासह नदी सुधार योजनेला विरोध करणाऱ्या कथित पर्यावरणप्रेमींनी द्यावे, त्यासाठी दैनंदिन कामकाजात पर्यावरण कसे जोपासले जाते, ज्या सदनिकांमध्ये राहतो त्या इमारती उभारताना इमारतीचा पाया किती खोलीवर घेण्यात आला आहे, किती नैसर्गिक जलस्रोत बंद झाले. याची माहितीही कथित पर्यावरण प्रेमींनी द्यावी. प्रदूषण रोखण्यासाठी सार्वजनिक वाहतूक सेवेचा वापर कितीजण करतात यासह अनेक प्रश्नांची उत्तरे द्यावी. मात्र वाढते शहरीकरण पाहता पर्यावरणाचा समतोल राखत शाश्वत विकासाचे प्रकल्प महत्वाचे आहेत आणि त्यासाठी बालभारती – पौड रस्ता, नदी सुधार असे प्रकल्प काळाची गरज आहे.

पुणे : पुणे कृषी उत्पन्न बाजार समितीची संचालक मंडळाची तब्बल २० वर्षांनी झालेली निवडणूक चुरशीची झाली. निवडणुकीत भारतीय जनता पक्ष पुरस्कृत सर्वपक्षीय अण्णासाहेब मगर शेतकरी विकास पॅनेलने १८ जागांपैकी १३ जागांवर विजय मिळवून निर्ववाद वर्चस्व मिळवले. बाजार समितीच्या राजकारणात भाजप शिरकाव केल्याने राष्ट्रवादीच्या वर्चस्वाच्या धक्का बसला.

बाजार समितीच्या निवडणुकीत राष्ट्रवादी काँग्रेस पुरस्कृत अण्णासाहेब मगर सहकार पॅनेल आणि भाजपा पुरस्कृत सर्वपक्षीय अण्णासाहेब मगर शेतकरी विकास पॅनेलने एकमेकांसमोर होते. राष्ट्रवादी पॅनेलचे नेतृत्व जिल्हाध्यक्ष प्रदीप गारटकर यांनी केले. भाजप पुरस्कृत पॅनेलचे नेतृत्व जिल्हा बॅकेचे संचालक विकास दांगट आणि भाजपचे हवेली तालुकाध्यक्ष रोहिदास उंद्रे यांनी केले होते.

मतमोजणीचा पहिला निकाल हमाल मापाडी मतदार संघाचा जाहीर झाला आहे. या गटातून संतोष नांगरे विजयी झाले. नांगरे यांना राष्ट्रवादी काँग्रेसने पाठिंबा दिला होता. त्यांना सर्वाधिक ८८८ मते मिळाली. त्यांनी हमाल मापाडी महामंडळाचे ज्येष्ठ नेते डॉ. बाबा आढाव यांनी जाहीर केलेल्या राजेंद्र चोरघे यांचा पराभव केला. चोरघे यांना ४०३ मते मिळाली तसेच गोरख मेंगडे ३१४ मते मिळाली.

पुणे कृषी उत्पन्न बाजार समितीच्या निवडणुकीत राष्ट्रवादी काँग्रेसला बंडखोरी भोवली. बाजार समितीच्या राजकारणात भारतीय जनता पक्षासह ठाकरे गटाने प्रवेश केला. निवडणुकीचा निकाल जाहीर झाल्यानंतर महर्षीनगर येथील शिवशंकर सभागृहाच्या परिसरात कार्यकर्त्यांनी जल्लोष करुन गुलालाची उधळण केली.

माझ्यावर कारवाई करणार्‍यांना हवेली तालुका समजून घेण्यास दहा जन्म घ्यावे लागतील : विकास दांगट

 माझ्यावर कारवाई करणार्‍यांना (राष्ट्रवादी काँग्रेस पक्षाचे जिल्हाध्यक्ष प्रदीप गारटकर) हवेली तालुका समजून घेण्यास दहा जन्म घ्यावे लागतील, अशा शब्दात राष्ट्रवादी काँग्रेस पक्षाचे जिल्हाध्यक्ष प्रदीप गारटकर यांना विकास दांगट यांनी टोला लगावला. हवेली बाजार समितीच्या निवडणुकीत विकास दांगट यांचा अण्णासाहेब मगर शेतकरी विकास आघाडी पॅनल विजयी झाला आहे. यावर विकास दांगट यांना विचारले असता त्यांनी सदर प्रतिक्रिया दिली.

हवेली कृषी उत्पन्न बाजार समितीच्या निवडणुकीत राष्ट्रवादी बंडखोर आणि भाजपाच्या पॅनलच्या अण्णासाहेब मगर शेतकरी विकास आघाडीला १८ पैकी १३ जागांवर दणदणीत विजय मिळविण्यात यश आले आहे. तर राष्ट्रवादी पुरस्कृत अण्णासाहेब मगर सहकार पॅनलचे २ उमेदवार विजयी, तर ३ जागांवर स्वतंत्र पॅनलचे उमेदवार विजयी झाले.पुणे जिल्हा मध्यवर्ती बँकेचे संचालक आणि राष्ट्रवादी काँग्रेस पक्षाचे माजी नगरसेवक विकास दांगट यांनी स्वतंत्र पॅनल तयार करून सर्वपक्षीय उमेदवारांना संधी दिली होती. त्यामुळे ही निवडणूक विशेष अर्थाने चर्चेत राहिली. त्याच दरम्यान राष्ट्रवादी काँग्रेस पक्षाचे जिल्हाध्यक्ष प्रदीप गारटकर यांनी विकास दांगट यांची पक्षातून हकालपट्टी करीत असल्याचे जाहीर केले होते. त्या निर्णयानंतर गारटकर आणि दांगट या दोघांमध्ये आरोप प्रत्यारोप पाहण्यास मिळाले. या सर्व राजकीय घडामोडीदरम्यान हवेली बाजार समितीच्या निवडणुकीत विकास दांगट यांचा अण्णासाहेब मगर शेतकरी विकास आघाडी पॅनलच विजयी झाला आहे.

 व्यापारी, अडते गटातून जय शारदा गजानन पॅनेलचे गणेश घुले, अनिरुद्ध भोसले विजयी

 पुणे बाजार समितीच्या निवडणुकीत व्यापारी, अडते मतदारसंघातून जय शारदा गजानन पॅनेलचे गणेश घुले, अनिरुद्ध भोसले विजयी झाले.

गणेश घुले यांना सर्वाधिक मते मिळाली. घुले पाच हजार ८५२ मते मिळवून विजयी झाले. अनिरुद्ध भोसले यांना पाच हजार ८१६ मते मिळाली. व्यापारी अडते संघातील १३ हजार १७४ मतदारांपैकी आठ हजार ७०७ मतदारांनी मतदानाचा हक्क बजावला. या मतदारसंघातील निवडणूक चुरशीची झाली होती. निवडणुकीत बाजार समितीचे माजी संचालक विलास भुजबळ यांच्यासह अमोल घुले, सौरभ कुंजीर पराभूत झाले. व्यापारी अडते मतदारसंघातील आठ हजार २९१ मते वैध ठरली. ४१६ मते अवैध ठरली.

पराभूत झालेल्या उमेदवारांना मिळालेली मते पुढीलप्रमाणे – सौरभ कुंजीर – १६४०, अशोक गावड, १२८, अमोल घुले – ३७४, रमेश बडदे – ३२, सुहास बनसोडे – १९, उमर फारुख बागवान – १५९, बाळासाहेब भिसे – १९४, विलास भुजबळ – ६५०, अविनाश शेवते – ३८, शिवाजी सूर्यवंशी – १२७०

खासदार विखेंना धक्का

पारनेर बाजार समितीच्या निवडणुकीत महाविकास आघाडी प्रणित शेतकरी विकास मंडळाने सर्व १८ जागांवर विजय मिळवत भाजप प्रणित जनसेवा मंडळाला धोबीपछाड दिली. बाजार समिती निवडणुकीच्या इतिहासात गेल्या ४० वर्षात झालेल्या बिनविरोध झालेल्या दोन निवडणुका वगळता एकाच मंडळाने प्रथमच सर्व १८ जागांवर विजय मिळवला आहे. महाविकास आघाडीचे सतरा उमेदवार २०० ते ५४० मतांच्या मताधिक्याने निवडून आले. त्यामुळे आमदार नीलेश लंके यांनी केलेला किमान ५०० मताधिक्क्याचा दावा खरा ठरला आहे. खासदार डॉ. सुजय विखे यांनी उमेदवार निवडीपासून या निवडणुकीत लक्ष घातल्याने या निवडणुकीच्या निकालाकडे राज्याचे लक्ष लागले होते. निवडणूक चुरशीची होईल असा अंदाज व्यक्त केला जात होता. मात्र, मतमोजणीत कुठेही चुरस दिसून आली नाही. भाजप प्रणित जनसेवा मंडळाचा पराभव हा खासदार विखे यांना धक्का मानला जात आहे.

अशोक चव्हाणांनी गड राखला

– भोकर कृषी उत्पन्न बाजार समितीत काँग्रेसची सत्ता कायम. 18 पैकी 15 जागांवर काँग्रेस-राष्ट्रवादी काँग्रेस विजयी. काँग्रेसच्या खात्यात 13 तर 2 जागांवर राष्ट्रवादी काँग्रेस विजयी. निवडणुकीत खा. प्रताप पाटील चिखलीकर यांना धक्का. भाजप-शिंदे गटाचा दारूण पराभव आणि बीआरएस देखील बेदखल.

केंद्रेंचे पॅनल विजयी

– गंगाखेड जिल्हा परभणी कृषी उत्पन्न बाजार समिती महाविकास आघाडीच्या ताब्यात. राष्ट्रवादी काँग्रेसचे माजी आमदार डॉक्टर मधुसूदन केंद्रे यांच्या नेतृत्वाखालील पॅनलने जिंकल्या 18 पैकी 11 जागा. भाजपा आमदार रत्नाकर गुट्टे यांच्या पॅनलचा पराभव. डॉ मधुसूदन केंद्रे हे आमदार धनंजय मुंडे यांचे मेहुणे आहेत.

सातार्‍यात रविवारी मतदान

– सातारा जिल्ह्यातील आठ बाजार समितीच्या पंचवार्षिक निवडणुकीसाठी रविवारी मतदान होणार आहे. प्रचाराच्या निमित्ताने गेली आठ दिवस आरोप-प्रत्यारोंचा धुरळा उडाला. स्थानिक राजकीय संदर्भ लक्षात घेऊन काँग्रेस, राष्ट्रवादी, शिवसेना (शिंदे, ठाकरे गट) आणि भाजप हे पक्ष आघाडीच्या माध्यमातून निवडणुकीच्या रिंगणात उतरले आहेत. नेत्यांची राजकीय प्रतिष्ठा पणाला लागल्याने मतदारांचा भाव वधारला आहे. कराडमधील काही मतदार हैदराबाद, सहलीवर गेले आहेत.

शिवेंद्रसिंहराजेंचे पॅनल विजयी

– जावळी-महाबळेश्वर कृषी उत्पन्न बाजार समिती निवडणुकीत भाजप आमदार शिवेंद्रसिंहराजे भोसले, राष्ट्रवादी काँग्रेसचे आमदार मकरंद पाटील व शशिकांत शिंदे यांच्या नेतृत्वाखालील पॅनलने दणदणीत विजय मिळवला.

हर्षवर्धन जाधवांना धक्का

– छत्रपती संभाजीनगरच्या कन्नड कृषी उत्पन्न बाजार समिती निवडणुकीत माजी आमदार हर्षवर्धन जाधव यांना धक्का. हर्षवर्धन जाधव यांच्या पत्नी संजना जाधव आणि शिंदे गटाचे नितीन पाटील यांच्या शिवशाही शेतकरी विकास पॅनलने पंधरा पैकी पंधरा जागा जिंकत मारली बाजी.

जयंत पाटलांनी गड राखला

– सांगली कृषी उत्पन्न बाजार समितीवर महाविकास आघाडीचा झेंडा फडकला आहे. इस्लापूरची कृषी उत्पन्न बाजार समिती राष्ट्रवादी काँग्रेसने आपल्याकडे राखण्यात यश मिळवले आहे. राष्ट्रवादी काँग्रेसचे प्रदेशाध्यक्ष जयंत पाटील यांचा हा गड आहे. तर विटा कृषी उत्पन्न बाजार समितीमध्ये शिवसेना, शिंदे गट, भाजप आणि काँग्रेस आघाडीच्या पॅनलने विजय मिळवला आहे.

पंकजा मुंडेंना धक्का, धनंजय मुंडेंचा विजय

– बीडमधील परळी आणि अंबाजोगाई कृषी उत्पन्न बाजार समितीच्या निवडणुकीत पंकजा मुंडे व धनंजय मुंडे पुन्हा आमने-सामने आले होते. मात्र, या निवडणुकीत पंकजा मुंडे यांना धक्का बसला आहे. अंबाजोगाई बाजार समितीत 18 पैकी 15 जागांवर धनंजय मुंडे यांचे समर्थक उमेदवार विजयी झाले आहे. दणदणीत विजय मिळवून धनंजय मुंडे यांनी अंबाजोगाई बाजार समिती आपल्या ताब्यात घेतली आहे. महाविकास आघाडीचा हा मोठा विजय झाले. तर भाजपच्या पंकजा मुंडे यांना अवघ्या तीनच जागांवर विजय मिळाला आहे. त्यामुळे पंकजा मुंडे यांच्यासोबतच भाजपलाही हा मोठा धक्का आहे. भाजपने ही निवडणूक पंकजा मुंडे यांच्या नेतृत्वात लढली होती.

परळीत घेतली आघाडी

दुसरीकडे, परळी बाजार समितीत धनंजय मुंडे यांचे 14 उमेदवार आघाडीवर आहेत. तर, पंकजा मुंडे यांचा एकच उमदेवार आघाडीवर आहे. परळी बाजार समितीही धनंजय मुंडे यांच्या ताब्यात जात असल्याचे चित्र आहे. त्यामुळे बीडमधील या दोन्ही महत्त्वाच्या बाजार समितीवर आता मविआचे वर्चस्व निर्माण झाले आहे.

छगन भुजबळ यांचे वर्चस्व

– येवला कृषी उत्पन्न बाजार समितीच्या 18 पैकी 13 जागा मिळवीत दोन अपक्षांसह एकूण 15 जागांवर माजी उपमुख्यमंत्री छगन भुजबळ यांच्या गटाचे उमेदवार विजयी. तर आमदार दराडे गटाला केवळ 3 जागा मिळाल्या आहेत. येवला विधानसभा मतदारसंघात येवला कृषी उत्पन्न बाजार समितीमध्ये छगन भुजबळ यांच्या शेतकरी विकास पॅनेलने बाजी मारली आहे.

छत्रपती संभाजीनगरमध्ये भाजप-शिंदे गटाची बाजी

– छत्रपती संभाजीनगर बाजार समितीच्या एकूण 15 पैकी 11 जागा भाजप-शिंदे गटाच्या खिशात गेल्या आहेत. महाविकास आघाडीला फक्त 4 जागांवर विजय मिळवता आल्याने मविआला हा धक्का समजला जात आहे.

एकनाथ खडसे यांना भुसावळमध्ये धक्का

– भुसावळ कृषी उत्पन्न समिती भाजपच्या ताब्यात

तिवसा बाजार समितीत महाविकास आघाडीचा एकतर्फी विजय

– अमरावतीत तिवसा कृषी उत्पन्न बाजार समिती संचालक मंडळाच्या निवडणुकीत महाविकास आघाडीच्या प्रणित सहकार पॅनलचा १८ पैकी १८ जागांवर एकतर्फी विजय झाला आहे. काँग्रेस नेत्या व माजी मंत्री यशोमती ठाकूर यांच्या नेतृत्वाखाली मविआने या निवडणुकीत बाजी मारली आहे.

थोरातांच्या पॅनलने उघडले खाते

– अहमदनगर जिल्ह्यात संगमनेर बाजार समितीच्या मतमोजणीच्या पहिल्या फेरीत बाळासाहेब थोरात यांच्या पॅनलने खाते उघडले आहे. एकूण 18 जागांपैकी चार जागांचे निकाल जाहीर झाले आहेत. यात बाळासाहेब थोरातांच्या शेतकरी विकास मंडळाने खाते उघडले असून चारही जागा महाविकास आघाडीने जिंकल्या आहेत. महसूलमंत्री राधाकृष्ण विखे पाटील यांचे पॅनल पिछाडीवर. तिसऱ्या फेरीतही महाविकास आघाडीचे 3 उमेदवार विजयी. विखे गटाला अद्याप एकही जागा मिळालेली नाही.

दिग्रस बाजार समितीत ठाकरेंचा शिंदे गटाला धक्का

– शिवसेनेचे नेते आणि यवतमाळचे पालकमंत्री संजय राठोड यांना आपल्याच होमग्राऊंडमध्ये धक्का बसला आहे. ठाकरे गटाने संजय राठोड यांच्या समितीचा धुव्वा उडवत दणदणीत विजय मिळवला आहे. दिग्रस बाजार समितीवर महाविकास आघाडीची सत्ता आली आहे.

खेडमध्ये राष्ट्रवादीचा विजय

– पुणे जिल्ह्यातील प्रतिष्ठेच्या खेड कृषी उत्पन्न बाजार समितीचा निकाल जाहीर झाला. या निवडणुकीत राष्ट्रवादी काँग्रेसने दणदणीत विजय मिळवला आहे. राष्ट्रवादी काँग्रेसचे आमदार दिलीप मोहिते पाटील यांनी विरोधकांना चितपट करत खेड बाजार समितीवर झेंडा लावला.

देवळ्यात राष्ट्रवादी, भाजपचा झेंडा

– देवळ्यामध्ये भाजप आणि राष्ट्रवादी काँग्रेसने एकत्र येत सर्व समावेशक पॅनलची निर्मिती केली होती. या देवळ्यात भाजप जिल्हाध्यक्ष केदा आहेर आणि राष्ट्रवादीचे योगेश आहेत यांच्या नेतृत्वात शेतकरी विकास पॅनलची सरशी झाली. यापूर्वी या पॅनलच्या 8 जागा बिनविरोध निवडून आल्या होत्या. आज झालेल्या 10 जागांपैकी 9 जागांवर विजय मिळवला.

मोशीत भाजपला धक्का

– अमरावतीच्या मोर्शी बाजार समितीत भाजप खासदार डॉ अनिल बोंडे यांना धक्का बसला आहे. मोर्शीत काँग्रेस, राष्ट्रवादी काँग्रेसचे 10 उमेदवार विजयी झाले असून भाजपचे 8 उमेदवार विजयी झाले आहेत.

लातूर बाजार समितीवर काँग्रेस

– भाजप आमदार रमेश कराड यांनी लातूर कृषी बाजार उत्पन्न समितीच्या निवडणूकीत काँग्रेसला मोठे आव्हान दिल्यानंतर भाजपमधील राजकारण चांगलेच तापले होते.18 जागा खेचत काँग्रेसने एकहाती विजय मिळवला आहे.

पालघरमध्ये महाविकास आघाडी

– पालघर कृषी उत्पन्न बाजार समितीवर महाविकास आघाडीने झेंडा फडकावला आहे. 17 पैकी 17 जागा जिंकत मविआने वर्चस्व प्राप्त केले. आज झालेल्या व्यापारी अडते निवडणूकीत मविआचे दोन उमेदवार निवडणून आले. त्यामुळे शिवसेना आणि भाजपला पालघर बाजार समितीत एकही जागा मिळवता आली नाही.

मुख्यमंत्री एकनाथ शिंदे आणि महापालिका आयुक्त यांना जाहीर आव्हान

पुणे- आज सहा हजार कोटी रुपयांचा असणारा हा प्रकल्प उद्या पन्नास हजार कोटी रुपयांवर पोहचवल्यावर निविदा काढणार का ? मूठभर बिल्डर्स लॉबीचे हित जोपासण्यासाठी पुणेकरांचा श्वास वाहतूक कोंडीत गुदमरू देणार काय ? असे सवाल उपस्थित करत पुण्याचे ज्येष्ठ नगरसेवक आणि माजी उपमहापौर आबा बागुल यांनी आता एचसीएमटीआरसाठी आमरण उपोषण करण्याचा निर्णय घेतला आहे .

या संदर्भात आबा बागुल यांनी मुख्यमंत्री एकनाथ शिंदे आणि महापालिका आयुक्त यांना दिलेल्या पत्रात असे म्हटले आहे कि,’ सद्यस्थितीत शहरात वाहतुकीचा बोजवारा उडाला आहे. जीवघेण्या वाहतुकीमुळे होणाऱ्या अपघातांत  बळींची संख्याही  दिवसेंदिवस वाढत आहे. वाहतूक कोंडीत पुणेकरांचा श्वासही  गुदमरत आहे.मात्र मूठभर बांधकाम व्यावसायिकांच्या हितसंबंधासाठी  प्रशासन   पुणेकरांना मृत्यूच्या खाईत   लोटत आहे, असेच आता खेदाने म्हणावे लागत आहे.   शहरासाठी महत्वपूर्ण असणाऱ्या उच्च क्षमता द्रुतगती वर्तुळाकार  [एच. सी. एम. टी. आर] मार्गाबाबत मी गेल्या अनेक वर्षांपासून पाठपुरावा करत आहे. आज ४२ वर्षे होत आली तरी हा सुरक्षित आणि गतिमान वाहतुकीसाठी दिलासादायक ठरणारा  एच. सी. एम. टी. आर मार्ग अद्यापही रखडलेला आहे.  सातत्याने माझा पाठपुरावा सुरु आहे.  निविदा प्रक्रियेपर्यंत आलेल्या या उच्च क्षमता द्रुतगती वर्तुळाकार मार्गाला   कोरोनाच्या पार्श्वभूमीवर  निधीचा मुद्दा उपस्थित करून  लांबणीवर टाकण्याची    भूमिका  घेण्यात आली होती.  मुळात सर्व प्रक्रिया पूर्ण झाल्याने एच. सी. एम. टी. आर प्रकल्प निधी नाही म्हणून रद्द करता येत नाही. जर रद्दच करायचा असेल तर तो डी. पी. मध्येच रद्द करायला पाहिजे होता. आजमितीस वेगवेगळ्या बाबींवर त्यासाठी दहा ते बारा कोटी रुपये खर्च झालेले आहेत. तसेच भूसंपादनपोटी टीडीआर, एफएसआयही  देण्यात आलेले आहेत. त्यामुळे  केवळ अलाइनमेंट बदलण्याच्या नावाखाली किंवा ९ मीटर रस्ते या भानगडीत न पडता आपण २४ मीटरनुसारच  या प्रकल्पासाठी निविदा प्रक्रिया पुन्हा राबवावी.  सध्या विकास आराखड्यात दर्शविण्यात आल्यानुसार एकही रस्ता  प्रत्यक्ष जागेवर नाही ही वस्तुस्थिती आहे  आणि शासनानेही आपल्याला रस्ते आखण्याचे निर्देश दिलेले आहेत. हेही दुर्लक्षून चालणार नाही. त्यामुळे निधी नाही हे कारण देऊन आपण  पुणेकरांच्या हितासाठी महत्वपूर्ण असणारा हा प्रकल्प रद्द अथवा लांबणीवर टाकू   शकत नाही. निधीबाबत मार्ग काढणे सहजशक्य आहे.  आज सहा हजार कोटी रुपयांचा असणारा हा प्रकल्प उद्या पन्नास हजार कोटी रुपयांवर पोहचवल्यावर निविदा काढणार का ? हा प्रश्न देखील महत्वाचा आहे. त्यामुळे सर्व खात्यांची बैठक घेऊन  उच्च क्षमता द्रुतगती वर्तुळाकार  [एच. सी. एम. टी. आर] मार्गाला चालना देण्यात यावी. गेली ४२  वर्षे आपण या रस्त्यासाठी हलगर्जीपणा करत आहोत, डीपीमध्ये दर्शविलेल्या या महत्वाच्या रस्त्यासाठी आपण चालढकल करत आहोत आणि नको ते रस्ते रुंद  करण्याचा घाट घालत आहोत. हे अत्यंत चुकीचे आहे. या उच्च क्षमता द्रुतगती वर्तुळाकार रस्त्यासाठी होणाऱ्या चालढकल कारभाराविरोधात आता आम्हाला आपल्या दालनासमोर आमरण उपोषण करावे लागेल याची आपण नोंद घ्यावी. कृपया मूठभर बिल्डर्स लॉबीचे हित जोपासण्यासाठी पुणेकरांचा श्वास वाहतूक कोंडीत गुदमरू देऊ नका. जीवघेण्या वाहतुकीत पुणेकरांना मृत्यूच्या खाईत लोटू नका. अशी आपणांस कळकळीची विनंती आहे.    उच्च क्षमता द्रुतगती वर्तुळाकार मार्गाला आता  प्राधान्यक्रम द्या, अशी विनंती बागुल यांनी केली आहे.

कोरोनाच्या महामारीत राज्याच्या संस्कृतीला शोभेल असे आरोग्य विभागाचे कार्य – सार्वजनिक आरोग्य मंत्री डॉ. तानाजी सावंत

पुणे, दि. २९: जिल्हा नियोजन समितीच्या आणि सामाजिक उत्तरदायित्व निधीतून आरोग्य केंद्र आणि शाळांच्या पायाभूत सुविधा उभारण्यात येणार आहेत. जिल्ह्यातील आरोग्य सेवांचे बळकटीकरण करुन नागरिकांना उत्तम प्रकारे आरोग्य सुविधा पुरविण्यासाठी प्रयत्नशील असल्याचे पालकमंत्री चंद्रकांतदादा पाटील म्हणाले.

पुणे जिल्हा परिषदेच्या शरदचंद्र पवार सभागृहात आयोजित उत्कृष्ट प्राथमिक आरोग्य केंद्रे, आशा स्वयंसेविका पुरस्कार आणि कायाकल्प बक्षीस वितरण सोहळ्याप्रसंगी पालकमंत्री श्री. पाटील बोलत होते. यावेळी राज्याचे सार्वजनिक आरोग्य मंत्री डॉ. तानाजी सावंत, मुख्य कार्यकारी अधिकारी आयुष प्रसाद, जिल्हा आरोग्य अधिकारी डॉ. रामचंद्र हंकारे, पुणे मनपाचे आरोग्य प्रमुख डॉ. भगवान पवार, जिल्हा शल्यचिकित्सक डॉ. नागनाथ यमपल्ले, जिल्हा नियोजन समिती सदस्य काळूराम नढे, शरद बुट्टे पाटील, माजी जिल्हा परिषद सदस्या अंकिता पाटील आदी उपस्थित होते.

कोरोनाच्या काळात आरोग्य यंत्रणेने जीवाची पर्वा न करता निस्वार्थपणे सेवा देऊन संकटातून बाहेर काढले, असे गौरवोद्गार काढून पालकमंत्री श्री. पाटील म्हणाले, कोरोना संकटात सेवा बजावताना जिल्ह्यातील ३८ आरोग्य कर्मचाऱ्यांचा कोरोना संसर्गामुळे मृत्यू झाला. त्यांच्या बलिदानाची दखल घेत त्यांचे जिल्हा परिषदेत येथे स्मारक उभारण्याचे काम सुरु असून ते लवकरात लवकर पूर्ण करण्यात येईल, असेही ते म्हणाले.

निष्ठापूर्वक करीत असलेल्या कार्याची दखल बक्षिसाच्या स्वरूपात घेतली जाते असे सांगत श्री. पाटील यांनी पुरस्कार प्राप्त आरोग्य अधिकारी कर्मचाऱ्यांचे अभिनंदन केले. आरोग्य कर्मचाऱ्यांच्या मागण्या पूर्ण करण्यासाठी शासनस्तरावर प्रयत्नशील राहू, अशीही ग्वाही पालकमंत्र्यांनी दिली.

राज्याच्या संस्कृतीला शोभेल असे आरोग्य विभागाचे कार्य – सार्वजनिक आरोग्य मंत्री डॉ. तानाजी सावंत
आरोग्यमंत्री डॉ. सावंत म्हणाले, महाराष्ट्र राज्याची कठीण प्रसंगात त्यागाची, बलिदानाची परंपरा असून कोरोनाच्या महामारीच्यावेळी स्वतःच्या जीवाची पर्वा न करता राज्याच्या संस्कृतीला शोभेल असे काम आरोग्य विभागाने केले आहे. कोरोनाच्या काळात बलिदान दिलेल्या आरोग्य विभागातील डॉक्टर, नर्स, पॅरामेडिकल स्टाफ, आशा स्वयंसेविका आदींना न्याय देण्यासाठी शासन प्रयत्न करीत आहे.

राज्यातील जनतेचे आरोग्य सदृढ करण्यासाठी प्रयत्न करण्यात येत असून त्यासाठी आवश्यक असलेल्या वैद्यकीय पायाभूत सुविधा अधिक बळकट करण्यासाठी स्वतंत्र आस्थापना स्थापन करण्यात येणार आहे.

आरोग्य विभागातर्फे राज्यात १८ वर्षावरील महिला, गरोदर स्त्रीया, माता यांच्या आरोग्य तपासणीसाठी ‘माता सुरक्षित तर घर सुरक्षित’ आणि शून्य ते अठरा वर्षांपर्यंतची बालके तसेच किशोरवयीन मुला-मुलींच्या सर्वांगीण आरोग्य तपासणीसाठी ‘जागरूक पालक, सुदृढ बालक’ हे अभियान राज्यभर राबविण्यात येत आहे. विभागाने घेतलेल्या निर्णयांची अमंलबजावणी करण्याची जबाबदारी आपल्यावर आहे. अशा अभियानामुळे राज्याचे आरोग्य पत्रक आपल्या समोर येईल आणि त्यानुसार आगामी काळात काम करावे लागणार आहे.

महाराष्ट्र हे पुरोगामी, प्रगत राष्ट्र म्हणून ओळखले जाते. रुग्णाला योग्य पद्धतीने आरोग्य सेवा देऊन त्यांचे समाधान केले पाहिजे. आपण आपली सेवा प्रामाणिकपणे पार पाडत असून शासन आपल्या पाठीशी खंबीरपणे उभे आहे. आपल्या मागण्या व अडीअडचणीबाबत शासन सकारात्मक विचार करीत आहे, असेही डॉ. सावंत म्हणाले.

जिल्हा परिषद देशात अव्वल स्थानी येण्यासाठी प्रयत्न- मुख्य कार्यकारी अधिकारी
श्री. प्रसाद म्हणाले, जिल्ह्यात ‘माता सुरक्षित तर घर सुरक्षित’ अभियानाअंतर्गत सुमारे ९ हजार महिलांची तसेच ‘जागरूक पालक, सुदृढ बालक’ अभियानाअंतर्गत बालकांचीही आरोग्य तपासणी केली आहे. जिल्ह्यात ३ लाख २८ हजार बालकांपैकी १६९ बालके कुपोषित आहेत. त्यांना कुपोषणातून बाहेर काढण्यासाठी आवश्यक त्या सर्व आरोग्य सुविधा देण्यात येत आहेत. पुणे जिल्हा परिषदेच्यावतीने शासनाच्या योजना राबविण्यावर भर देणार आहे. येत्या काळात जिल्हा परिषद देशात अव्वल येण्यासाठी प्रयत्न करणार असल्याचे श्री. प्रसाद यांनी सांगितले.

यावेळी २०२२-२३ आर्थिक वर्षात उत्तम कामगिरी केलेल्या प्राथमिक आरोग्य केंद्र, वाघोली, ता. हवेली (प्रथम क्रमांक), प्राथमिक आरोग्य केंद्र, मांडवगण फराटा, ता. शिरुर (द्वितीय क्रमांक), आणि प्राथमिक आरोग्य केंद्र, केंदूर, ता. शिरुर (तृतीय क्रमांक) यांचा तसेच तालुकास्तरीय प्रथम व द्वितीय पुरस्कार देऊन प्राथमिक आरोग्य केंद्राचा सन्मान करण्यात आला.

आशा स्वयंसेविका पुरस्कार अंतर्गत हवेली तालुक्यातील वाघोली प्राथमिक आरोग्य केंद्राच्या आशा स्वयंसेविका मयुरी रवी पवार यांना जिल्हास्तरीय प्रथम क्रमांक, शिरूर तालुक्यातील रांजणगाव प्राथ. आरोग्य केंद्राच्या शोभा सोनबा खेडकर यांना द्वितीय क्रमांक, पासली प्राथ. आरोग्य केंद्राच्या (ता. वेल्हा) राणी बापू जोरकर यांना जिल्हास्तरीय तृतीय पुरस्कार तर तळेगाव ढमढेरे प्राथ. आरोग्य केंद्राच्या (ता. शिरूर) आरती अमोल घुले यांना जिल्हास्तर प्रथम गट प्रवर्तक पुरस्काराने गौरविण्यात आले. तसेच आशा स्वयंसेविकांना तालुकास्तरीय प्रथम, द्वितीय पुरस्कारही वितरित करण्यात आले.
000