पुणे-प्रवक्ते सुधांशु त्रिवेदींच्या विधानावर आज येथे उपमुख्यमंत्री देवेंद्र फडणवीस म्हणाले की, “सुधांशु त्रिवेदींचं वक्तव्य मी नीट ऐकलं आहे आणि कुठल्याही वक्तव्यात त्यांनी महाराजांनी माफी मागितली असं म्हटलेलं नाही.”पत्रकारपरिषदेत यासंदर्भात विचारण्यात आलेल्या प्रश्नावर उत्तर देताना फडणवीस म्हणाले, “एक गोष्ट स्पष्ट आहे जोपर्यंत चंद्र आणि सूर्य या पृथ्वीवर आहेत तोपर्यंत महाराष्ट्राचे, देशाचे आणि आमच्या सगळ्यांचे आदर्श हे छत्रपती शिवाजी महाराजच राहणार आहेत. आमचे हिरोदेखील छत्रपती शिवाजी महाराजच आहेत. कोणाच्याही मनात याबद्दल शंका नाही. त्यामुळे मी असं मानतो की यावर काही वाद होण्याचं कारण नाही. मला वाटत नाही की राज्यपालांच्या मनातही काही शंका आहे.”

याशिवाय, “राज्यपालांच्या बोलण्याचे वेगवेगळे अर्थ काढण्यात आले आहेत. पण मला असं वाटतं की त्यांच्याही मनात असा कुठलाही भाव नाही. छत्रपती शिवाजी महाराजांपेक्षा दुसरा कुठला आदर्श महाराष्ट्रात आणि देशात असू शकत नाही. असही यावेळी देवेंद्र फडणवीसांनी स्पष्ट केलं.”

मुंबई-राज्यपालांनी छत्रपती शिवाजी महाराजांविषयी पुन्हा एकदा वादग्रस्त वक्तव्य करून 72 तास उलटले आहेत. तरीही राज्याचे मुख्यमंत्री शिंदे व उपमुख्यमंत्री फडणवीस गप्प का?, असा सवाल ठाकरे गटाचे खासदार संजय राऊत यांनी केला आहे.तसेच, राज्यपालांचा राजीनामा घेऊन इथे बदला घ्या बदला, असा जोरदार टोलाही त्यांनी उपमुख्यमंत्री देवेंद्र फडणवीसांना लगावला.

आज पत्रकार परिषदेत राज्यपाल भगितसिंह कोश्यारी यांनी काल औरंगाबादेत छत्रपती शिवाजी महाराजांबाबत केलेल्या वादग्रस्त वक्तव्याचा चांगलाच समाचार घेत भाजप व शिंदे गटावर जोरदार टीका केली. संजय राऊत म्हणाले, राज्यपालांचे वक्तव्य हे दळभद्री आहे. एवढेच नव्हे तर भाजपचे राष्ट्रीय प्रवक्ते सुधांशू त्रिवेदी यांनी छत्रपती शिवाजी महाराजांनी औरंगजेबाची पाच वेळा माफी मागितली, असे वक्तव्य एका नॅशनल चॅनेलवर केले.

भाजपची हीच भूमिका आहे का?

पुढे संजय राऊत म्हणाले, महाराष्ट्राचा स्वाभिमान वैगरे शब्दच्छल करीत भाजपने शिवसेना फोडली व एक मिंधे सरकार सत्तेवर आणले. छत्रपती शिवाजमहाराजांचा अपमान भाजपचे राज्यपाल आणि राष्ट्रीय प्रवक्ते खुलेआम करीत असताना स्वाभिमानी मुख्यमंत्री उपमुख्यमंत्री गप्प का? भाजपचीदेखील हीच भूमिका आहे का? संपूर्ण महाराष्ट्र तुमच्या सरकारवर थुंकतोय.

राज्यपालांना जोडे मारणार का?

संजय राऊत म्हणाले, राज्यपालांनी यापूर्वीही शिवाजी महाराजांचा तसेच महात्मा फुले, सावित्रीबाई फुले यांचा अपमान केला आहे. एका वर्षात या राज्यपाल महोदयांनी महाराष्ट्राच्या स्वाभिमानाला चार वेळेस दुखावले आहे. हीच आपली अधिकृत भूमिका आहे का?, हे आता भाजपला सांगावेच लागेल. वीर सावरकरांबद्दल वादग्रस्त बोलल्यास भाजप पेटून उठतो. जोडे मारो आंदोलन करतो. त्याचे स्वागत आहे. मात्र, शिवाजी महाराजांचा अपमान केल्याबद्दल हे जोडे आता कोणाला मारणार. भाजपच्या राष्ट्रीय प्रवक्त्यांना मारणार की राज्यपालांना मारणार?

संजय राऊत म्हणाले, महाराष्ट्राचा स्वाभिमान असणाऱ्यांविषयी असे वक्तव्य आम्ही सहन करू शकत नाही. मोठमोठ्या स्वाभिमानाच्या गप्पा मारत मिंधे गट मविआतून बाजूला झाला. आता या 40 आमदारांचा स्वाभिमान कुठे गेला? एकानेही राज्यपालांच्या वक्तव्याचा निषेध नोंदवला नाही. मुख्यमंत्री शिंदे यांनी अधिकृतपणे राज्यपालांचा राजीनामा घ्यावा. अन्यथा शिवसैनिक जोडे मारो आंदोलन करणार. शिवसैनिकांचे जोडे कसे असतात, हे तेव्हा तुम्हाला कळेल.

संजय राऊत म्हणाले, शिवरायांचा अपमान करणाऱ्यांना भाजप पाठीशी घालत असेल तर पंतप्रधान मोदी महाराष्ट्रात आल्यावर छत्रपती शिवाजी महाराजांचे नाव का घेतात? नौदलाला शिवरायांचे बोधचिन्ह का देण्यात आले आहे? शिवरायांचा अपमान सहन करता तर अफझल खान, औरंगजेबाची कबर पाडण्याचे नाटक का करता? वीर सावरकर हे शिवरायांची आरती करत होते. छत्रपती शिवाजी महाराज हे वीर सावरकरांचे प्रेरणास्त्रोत होते. केवळ सत्तेला चिकटून बसण्यासाठी मिंधे गट आता शांत आहे. महाराष्ट्र तुमच्यावर थुंकतोय, अशा शब्दांत राऊतांनी आज टीका केली.

मीरारोड येथे डॉ. बाबासाहेब आंबेडकर सांस्कृतिक भवनाचे झाले भूमिपूजन 

मुंबई दि. 20 –  पहाटे पासून रात्रीपर्यंत १८-१८ तास डॉ. बाबासाहेब आंबेडकर अभ्यास करायचे. समाजाच्या उध्दारासाठी, कल्याणासाठी आयुष्यभर त्यांनी ऐतिहासिक असे काम केले. त्यांच्या नावाने २७ कोटी रुपये खर्च करून मीरा भाईंदरमध्ये डॉ. बाबासाहेब आंबेडकर सांस्कृतिक भवन उभे राहत आहे ही अत्यंत मोठी व महत्वाची , आनंद देणारी अशी गोष्ट आहे. सर्व सुविधांनी सज्ज असे हे भवन येणाऱ्या पिढींना प्रेरणा देईल. याठिकाणी स्पर्धा परीक्षा मार्गदर्शन केंद्राबरोबरच बँकिंग बाबतचे व स्वयं रोजगाराचेही प्रशिक्षण दिले जावे , असे प्रतिपादन  रिपब्लिकन पक्षाचे राष्ट्रीय अध्यक्ष केंद्रीय सामाजिक न्याय राज्य मंत्री ना.रामदास आठवले यांनी मीरारोड येथे केले. 

आमदार प्रताप सरनाईक यांच्या संकल्पनेतून व अथक प्रयत्नांनी साकार होत असलेल्या मीरा भाईंदर मधील डॉ. बाबासाहेब आंबेडकर सांस्कृतिक भवनाचे भूमिपूजन आज ना.रामदास आठवले यांच्या हस्ते पार पडले. जवळपास ६० ते ६५ कोटी रुपये बाजार मूल्य असलेल्या हटकेश परिसरातील जवळपास १ एकर मोक्याच्या जागेवर हे भवन होणार असून तीन मजली सांस्कृतिक भवन इमारतीमध्ये  कार्य होण्यासाठी मोठा हॉल , विपश्यना हॉल , प्रदर्शन हॉल , ग्रंथालय , मिनी थिएटर , कॉन्फरन्स रूम , कॅफे एरिया , लिफ्ट अशा सर्व सुविधा असतील. राज्यातील आंबेडकरी चळवळीतील नेते-कार्यकर्ते जर मीरा भाईंदर शहरात आले तर त्यांच्या विश्रामाची व्यवस्थाही भवनात केली जाईल. त्यासाठी ४ चांगल्या रूम भवनात असतील.  त्याचप्रमाणे या आंबेडकर भवनाच्या प्रांगणात १५ ते २० फूट उंचीचा डॉ. बाबासाहेब आंबेडकर यांचा धातूचा पूर्णाकृती पुतळा उभारण्याची नागरिकांची मागणीही आमदार प्रताप सरनाईक यांनी मान्य करत आपण त्यासाठी परवानगी आणू पण हा पुतळा तेथे उभारला गेला पाहिजे , असे कार्यक्रमात घोषित केले. याच सांस्कृतिक भवनात स्पर्धा परीक्षा देणाऱ्या विद्यार्थ्यांना मार्गदर्शन मिळण्यासाठी केंद्रही सुरु केले जाणार आहे. डॉ. बाबासाहेब आंबेडकर हे लंडनमध्ये शिकण्यासाठी गेले होते व लंडन मधील ज्या घरात बाबासाहेब राहिले होते, त्या लंडनच्या घराप्रमाणेच मीरा भाईंदरच्या या सांस्कृतिक भवनाची इमारत उभारली जाणार आहे. लंडनमध्ये बाबासाहेब १९२२ मध्ये शिकण्यासाठी गेले होते. २०२२ मध्ये त्याला १०० वर्षे होत असताना त्या लंडनच्या घराप्रमाणेच डॉ. बाबासाहेब आंबेडकर सांस्कृतिक भवन इमारत उभारली जाईल. लंडनच्या घराप्रमाणे ही मीरा भाईंदरमध्ये उभी राहणारी  भवन इमारत आपल्याला डॉ. बाबासाहेब आंबेडकर यांचे अफाट ज्ञान , त्यांनी केलेले कार्य , त्यांची शिकवण आपल्याला आठवण करून देत राहील  , हे भवन राज्यात पहिल्यांदा उभे राहत आहे असे आमदार सरनाईक म्हणाले. 

यावेळी मंत्री रामदास आठवले म्हणाले की , २७ कोटी रुपये खर्च करून भारतरत्न डॉ. बाबासाहेब आंबेडकर यांच्या नावाने भवन उभे राहत आहे ही गोष्ट अत्यंत चांगली आहे. २७ कोटी इमारतीवरील खर्च व ६० कोटींची जमीन त्यामुळे हा प्रकल्प १०० कोटींचा भव्य झाला आहे. या सांस्कृतिक भवनात ग्रंथालय, मंगल कार्यालय , विपश्यना केंद्र याबरोबरच स्पर्धा परीक्षा मार्गदर्शन केंद्र होत आहे. त्याचबरोबरीने बँकेत नोकरी मिळविण्यासाठी काय करायचे त्याचेही प्रशिक्षण द्या. आपले तरुण बँक तसेच आंतरराष्ट्रीय कंपन्यामध्ये कामाला लागले पाहिजेत , असे ते म्हणाले. 

मै आया हू जीस शहर के अंदर उसका नाम है मीरा भयंदर अशी कविता सादर करीत ना.रामदास आठवले यांनी आपल्या खुमासदार शैलीत केलेल्या भाषणाने कार्यक्रमात उपस्थित मीरा भाईंदर मधील नागरिकांमध्ये  उत्साह संचारला होता. 

प्रताप सरनाईक यांचे नेतृत्व डॅशिंग आहे. त्यांचे काम चांगले आहे व काम पाहून मला आनंद वाटला. त्यांच्या प्रयत्नातून जवळपास ४० ते ४२ हजार फूट बांधकाम असलेले इतके चांगले भवन इथे होत आहे.  ते पुन्हा आमदार होतील. आणि लवकरच सरनाईक यांना मंत्री पद मिळावे अशी अपेक्षा आहे. महाराष्ट्रातील स्ट्रॉंग असे आमदार प्रताप सरनाईक आहेत. मुख्यमंत्री एकनाथ शिंदे नक्की तुमचा मंत्रिपदासाठी विचार करतील असे सांगत आठवले यांनी सरनाईक यांच्या कामाचे तोंडभरून कौतुक केले. आमदार प्रताप सरनाईक यांनी सर्वात आधी शिवसेना पक्षप्रमुखाना पत्र लिहून महाविकास आघाडीतून शिवसेनेने बाहेर पडून भाजपसोबत जाण्याचा आग्रह पत्रातून धरला होता. त्या आमदार सरनाईक यांच्या पत्राचा उल्लेख आठवले यांनी प्रारंभी भाषणात केला. आज जे एकनाथ शिंदे व देवेंद्र फडणवीस यांचे सरकार आले आहे ते सरकार आणण्यात सर्वात मोठा वाटा सरनाईक यांचा आहे असे रामदास आठवले म्हणाले व त्यांनी शिवशक्ती – भीमशक्ती युती कशी झाली त्याची आठवणही सांगितली. यावेळी प्रताप सरनाईक व रामदास आठवले या दोघांनीही आपल्या चारोळ्या , कविता सादर करून टाळ्या मिळवल्या. मीरा भाईंदर मधील शेकडो नागरिकांची या कार्यक्रमाला उपस्थिती होती. 

यावेळी व्यासपीठावर मनपा आयुक्त दिलीप ढोले , आमदार गीता जैन , रिपब्लिकन पक्षाचे जिल्हा अध्यक्ष देवेंद्र शेलेकर; माजी महापौर ज्योत्स्ना हसनाळे; निर्मला सावळे; नीला सोंस;रिपाइं मुंबई युवक अध्यक्ष रमेश गायकवाड; चंद्रमानी मनवर; अनंत शिर्के;  नगरसेवक , पालिका अधिकारी उपस्थित होते. 

गायक नंदेश उमप यांच्या भीम गीतांचा कार्यक्रम यावेळी झाला. नंदेश उमप यांच्या एका गाण्यावर तर उपस्थित लोक अक्षरशः ५ मिनिटे नाचत होते. डॉ. बाबासाहेब आंबेडकर यांच्या नावाने अशी भव्य वास्तू शहरात उभी राहत आहे याचा आनंद उपस्थित शेकडो नागरिकांनी व्यक्त केला.

जळगाव जामोद, दि. २० नोव्हेंबर
भारतीय जनता पक्ष व राज्यपाल भगतसिंह कोश्यारी हे महापुरुषांचा सातत्याने अपमान करत आहेत. राज्यपाल कोश्यारी यांनी पुन्हा एकदा छत्रपतीबद्दल अवमानकारक वक्तव्य केले आहे. छत्रपतींची तुलना भाजपाच्या नितीन गडकरींशी करण्याचे पाप त्यांनी केले आहे. महाराष्ट्रात छत्रपती शिवाजी महाराजांचा अपमान कदापी सहन केला जाणार नाही, अशा वादग्रस्त राज्यपालांची तात्काळ हकालपट्टी करा तसेच शिवाजी महाराजांबद्दल भाजपाच्या प्रवक्तेंनी अकलेचे तारे तोडले आहेत त्याबद्दल भाजपाने जाहीर माफी मागावी अन्यथा भाजपाच्या नेत्यांना रस्त्यावर फिरु देणार नाही, असे महाराष्ट्र प्रदेश काँग्रेस कमिटीचे अध्यक्ष नाना पटोले यांनी म्हटले आहे.
जळगाव जामोद येथे पत्रकार परिषदेत बोलताना नाना पटोले यांनी राज्यपाल कोश्यारी व भाजपा प्रवक्ता सुधांशू त्रिवेदीचा खरपूर समाचार घेतला. महात्मा ज्योतीबा फुले, सावित्रीबाई, छत्रपती शिवाजी महाराज यांच्याबद्दल अवमानकारक बोलताना राज्यपाल कोश्यारींची जीभ कशी झडली नाही? त्यांच्या अशा विधानातून आरएसएसची मानसिकता दिसून येते. महाराष्ट्रातच महाराष्ट्राच्या दैवतांचा धडधडीत अपमान करण्याची हिम्मत होतेच कशी? निवडणुकीत नरेंद्र मोदी व देवेंद्र फडणवीस छत्रपतींच्या नावाने मतं मागतात आणि सत्तेत बसून वारंवार त्यांचाच अपमान करता, ही सत्तेची गुर्मी आहे, राज्यातील हा कचरा आता साफ करण्याची वेळ आहे.
अखिल भारतीय काँग्रेस कमिटीच्या मीडिया विभागाचे अध्यक्ष जयराम रमेश यावेळी म्हणाले की, भारत जोडो यात्रेला महाराष्ट्रातून चांगला प्रतिसाद मिळाला असून या पदयात्रेमुळे काँग्रेस कार्यकर्त्यांमध्ये नवी उर्जा, नवा उत्साह, नवा जोश निर्माण झाला असून काँग्रेस पक्ष महाराष्ट्रात आगामी काळात चांगली कामगिरी करेल व काँग्रेस पक्षाचे नवे रुप यापुढे दिसेल. भाजपाला जनता कंटाळली असून त्यांना पर्याय हवा आहे आणि काँग्रेसच योग्य पर्याय आहे याची जनतेला खात्री आहे. या पदयात्रेत महाविकास आघाडीचे घटक पक्ष शिवसेना व राष्ट्रवादी काँग्रेस पक्ष सहभागी झाले, त्यांचे आभार. पदयात्रेत महिला व तरुणांचा सहभाग वाखाणण्याजोगा होता.
पत्रकारांच्या एका प्रश्नाला उत्तर देताना जयराम रमेश म्हणाले की, भारतीय जनता पक्ष ज्या दिवशी काँग्रेस पक्षाच्या नेत्यांची बदनामी करणे थांबवतील त्या दिवशी आम्हीही आरएसएस व भाजपाबद्दल ‘सत्य’ सांगण्याचे बंद करू.
विधिमंडळ काँग्रेस पक्षनेते तथा भारत जोडो यात्रेचे राज्य समन्वयक बाळासाहेब थोरात म्हणाले की, भारत जोडो यात्रा हा आपल्या सर्वांसाठी एक ऐतिहासिक व अविस्मरणीय क्षण ठरला आहे. लोकशाहीतील स्तंभ डळमळीत होत असताना ते मजबूत रहावेत यासाठी ही पदयात्रा काढण्यात आलेली आहे. याबरोबर जनतेच्या मुलभूत प्रश्नांना वाचा फोडण्याचे काम झाले. महागाई, बेरोजगारी याकडे सरकारचे लक्ष वेधण्याचे काम केले. बेरोजगारीमुळे तरुणांमध्ये नैराश्य असल्याचे दिसले, हे वातावरण बदलले पाहिजे यासाठी जनजागृती करण्यात आली. महाराष्ट्रातील जनतेने पदयात्रेचे उस्फूर्त स्वागत केले. तसेच राज्याच्या काना-कोपऱ्यातून विविध सांस्कृतीचे दर्शन दररोज घडले. शेगावची सभा हा पदयात्रेतील परमोच्च क्षण ठरला, अपेक्षेपेक्षा जास्त लोकांनी सभेला उपस्थिती लावली.
पदयात्रेत विविध सामाजिक संस्था व संघटनांनी सहभाग घेतला त्यात ‘लोकायत’ या संस्थेने भारत जोडो यात्रा कशासाठी आहे, याविषयाची पत्रके वाटून जनजागृती करण्याचे काम केले. पदयात्रा पुढे निघून गेल्यानंतर मागे पडलेला कचरा, पाण्याचा बाटल्या उचलून रस्ता स्वच्छ करण्याचे काम प्रदेश काँग्रेसच्या पर्यावरण विभागाने केले. ही दोन्ही कार्य उल्लेखनीय आहेत. जनतेने दिलेल्या प्रतिसादाबद्दल थोरात यांनी आभार व्यक्त केले.
या पत्रकार परिषदेला अखिल भारतीय काँग्रेस कमिटीच्या मीडिया विभागाचे अध्यक्ष जयराम रमेश, प्रभारी, एच. के. पाटील, प्रदेशाध्यक्ष नाना पटोले, विधिमंडळ पक्षनेते बाळासाहेब थोरात, प्रदेश काँग्रेसचे मुख्य प्रवक्ते अतुल लोंढे आदी उपस्थित होते.

मुंबई, दि: १९ नोव्हेंबर २०२२
उद्धव ठाकरेंनी दगाबाजी करून मुख्यमंत्रिपद मिळवले, आता महापालिकेतून येणारे मार्गही बंद झाल्यामुळे ते अस्वस्थ झालेत. उद्धव ठाकरेंची शिवसेनाच मुंबईच्या विकासाची मारेकरी असल्याची घणाघाती टीका भाजपा मुंबई प्रभारी आमदार अतुल भातखळकर यांनी केली. मुंबई भारतीय जनता पार्टीच्या वतीने आयोजित ‘जागर मुंबईचा’ या अभियानंतर्गत जाहीर सभेत ते शनिवारी बोलत होते. वर्सोवा येथे भव्य सभा पार पडली. आमदार भारती लव्हेकर, योगीराज दाभाडकर, सरिता पाटील, रंजना पाटील, इंद्रसेन सिंग यांची प्रमुख उपस्थिती होती.

आमदार अतुल भातखळकर म्हणाले, महाराष्ट्रातील जनतेने देवेंद्र फडणवीस यांना निवडले असताना जनतेशी विश्वासघात करून उद्धव ठाकरे यांनी महाभकास आघाडी स्थापन केली. सत्तेवर आल्यानंतर अडीच वर्षात त्यांनी मुंबईतील चालू विकास कामे बंद पाडण्याचे काम केले. महाविकास आघाडीचे सरकार पांढऱ्या पायाचं होतं. देवेंद्र फडणवीस यांनी सुरू केलेली विकासकामे थांबवण्याचे पाप महाविकास आघाडीने केले. आता जनतेचे सरकार आले आहे. जागर मुंबईचा कार्यक्रम यांच्या डोळ्यात खूपत आहे. आदित्य ठाकरे मुंबई महापालिकेतील टेंडरविषयी विचारतात. ५ हजार करोड रुपयांचे सिमेंटचे रस्ते बनवण्याचे काम आमच्या सरकारने हाती घेतले आहे. टेंडरमध्ये कमिशन मिळत नाही याचे दुःख आदित्य ठाकरे यांना आहे. आम्ही आमच्या कामाचा हिशोब जनतेसमोर ठेवतो. महाविकास आघाडीच्या अडीच वर्षाच्या काळात जनतेला लुटण्याचे काम झाले. कोरोना काळात पालकमंत्री आदित्य ठाकरे गायब होते. त्यावेळी भारतीय जनता पक्षाने जनतेत जाऊन काम केले. मुख्यमंत्री जनतेतही नाहीतच पण मंत्रालयातही गेले नाहीत. त्यावेळी विरोधी पक्षनेते देवेंद्र फडणवीस यांनी जनतेत जाऊन काम केले. त्यावेळी उद्धव ठाकरे तुम्ही कुठे होता? असा सवाल आमदार अतुल भातखळकर यांनी विचारला.

मुंबईतील मेट्रो प्रकल्प रखडवण्याचे काम उद्धव ठाकरे यांनी केले. पर्यावरणाच्या नावावर आरे कारशेडचे काम थांबवले. आता शिंदे फडणवीस सरकारमध्ये आरे कारशेडचे काम सुरू झाले. उद्धव ठाकरे यांनी मेट्रोचे काम रोखल्याने मेट्रोच्या खर्चात दहा हजार करोड रुपयांची वाढ झाली. हा वाढीव खर्च उद्धव ठाकरे यांच्याकडून वसूल केला पाहिजे. मंत्रालयात न जाता ते बेस्ट सीएम झाले. मुख्यमंत्री मंत्रालयात जात आहेत ही ब्रेकिंग न्यूज होते ही दुर्दैवाची बाब आहे अशी टीका आमदार अतुल भातखळकर यांनी केली.