२७व्या तत्त्वज्ञ संतश्री ज्ञानेश्वर-तुकाराम स्मृती व्याख्यानमालेचे दुसरे पुष्प गुंफतांना

पुणे, दि. २५ नोव्हेंबर:“ नवीन शैक्षणिक धोरण मानवाला परिपूर्ण करणारे असून जगातील सर्व विद्यापीठाशी करार करण्याचे कार्य सुरू आहे. येत्या शैक्षणिक वर्षापासून महाविद्यालयांना नवीन शैक्षणिक धोरणाची अंमलबजावणी करण्यात येईल. चार वर्षांची पदवी व अभ्यासक्रम सुरू करण्यात येईल. तसेच या बदलामुळे प्राध्यापकांच्या नोकरीवर गदा येणार नाही.”असे आश्वासन महाराष्ट्राचे उच्च व तंंत्रशिक्षण मंत्री चंद्रकांत पाटील यांनी दिले.
एमआयटी वर्ल्ड पीस युनिव्हर्सिटी, विश्वशांती केंद्र (आळंदी), माईर्स एमआयटी, पुणे, भारत आणि संतश्री ज्ञानेश्वर-संतश्री तुकाराम महाराज स्मृती व्याख्यानमाला न्यास यांच्या संयुक्त विद्यमाने युनेस्को अध्यासना अंतर्गत आयोजित २७वी तत्त्वज्ञ संतश्री ज्ञानेश्वर-तुकाराम स्मृती व्याख्यानमालेत ‘राष्ट्रीय शिक्षण धोरण’ या विषयावर आयोजित दुसरे पुष्प गुंफतांना प्रमुख पाहुणे म्हणून ते बोलत होते.
या वेळी प्रा.डॉ. मोहन केशव फडके हे सन्माननीय पाहुणे होते. अध्यक्षस्थानी विश्वशांती केंद्र (आळंदी), माईर्स एमआयटी, पुणेचे संस्थापक अध्यक्ष व युनेस्को अध्यासनाचे प्रमुख प्रा. डॉ. विश्वनाथ दा. कराड होते.
तसेच एमआयटी वर्ल्ड पीस युनिव्हर्सिटीचे कार्यकारी अध्यक्ष राहुल विश्वनाथ कराड, कुलगुरू डॉ. आर.एम.चिटणीस, डॉ. प्रसाद खांडेकर व प्रा.दत्ता दंडगे उपस्थित होते.
यावेळी प्रा.डॉ. मोहन केशव फडके लिखित ‘वैदिक मंत्रा फॉर द डिसिज फ्री लाइफ’ या इंग्रजी व मराठी पुस्तकाचे प्रकाशन मान्यवरांच्या हस्ते करण्यात आले.
चंद्रकांतदादा पाटील म्हणाले,“ पॉलिटेक्निक, इंजिनियरींग, मेडिकल आणि लॉ हे सर्व शिक्षण मराठीत व्हावे यासाठी कार्य सुरू आहे. येत्या मार्च पासून यांची प्रश्नपत्रिका दोन भाषेत असेल. सुरूवातीलाच मराठी व इंग्रजी भाषेचे पर्याय दिले जाणार आहे. त्यातील एक भाषा निवडून त्या भाषेतच उत्तरे द्यावीत. या पद्धतीचा पहिला टप्पा पूर्णात्वास नेत आहोत.”
“ या धोरणात १२वीं नंतर ४ वर्षांची पदवी असेल. यात ७० टक्के पाठ्यक्रम हा करियर संदर्भातील असेल. उर्वरित ३० टक्के पाठ्यक्रम योग, तत्वज्ञान, मेडिटेशन, खेळ व संगीत  या सारख्या विषयांचा अंतर्भाव असेल. यामध्ये विद्यार्थ्यांना मिळणारे पॉइंट हे त्याच्या डिजिटल बँकेत जमा होतील. जेव्हा विद्यार्थी हा विदेशात शिक्षणासाठी जाईल तेव्हा त्याच्या डिजिटल बँक खात्यातून ते पॉइंट तेथील विद्यापीठात जमा होतील. नवीन शिक्षण पद्धत घोकमपट्टीची नसून माणवाला परिपूर्ण करणारी असेल. जून २०३० मध्ये सर्वांना ही अनिवार्य असेल. ”
चंद्रकांत पाटील पुढे म्हणाले,“नवीन शैक्षणिक धोरणामुळे प्राध्यापकांच्या मनात खूप भिती निर्माण झाली आहे. पण त्यांना घाबरण्याची गरज नाही. त्यांच्यावर कोणत्याही प्रकारचा वर्कलोड वाढणार नाही किंवा कमी पण होणार नाही. तसेच त्यांच्या नोकरीवर गदा येणार नाही. परंतू प्राध्यापकांची भर्ती ही मोठ्या प्रमाणात होणार आहे. आता राज्यात नव्या ऑर्टस, कॉमर्स आणि सायन्स कॉलेजला परवांगी दिली जाणार नाही असे ही ते बोलले. ”
“ व्यावसायभिमूख शिक्षणाबरोबरच यावर बजेटचा १० टक्के खर्च व्हावा, शिक्षण हे मातृभाषेतून व्हावे यासाठी पूर्व प्राथमिक व प्राथमिक शिक्षण म्हणजेच मुलांच्या ६ वर्षात पर्यंत बुद्धी आणि आत्म्याचा संपूर्ण विकास करण्यावर अधिक भर दिला जाणार आहे. त्यांना लहानपणापासूनच अद्वैत तत्वज्ञानाचे ज्ञान दिले जाणार आहे. असे ही ते म्हणाले. ”
प्रा.डॉ. विश्वनाथ दा. कराड म्हणाले,“ देव ही शक्ती आहे व्यक्ती नाही. शिक्षणाच्या माध्यमातूनच मानव व जगाला दिशा दाखविता येईल. तसेच जीवनातील सर्व गोष्टींचा अनुभव घेण्यासाठी अध्यात्माला समजून घेणे आवश्यक आहे. ज्ञानेश्वरांचे सर्व सिद्धांत मानव जातीच्या कल्याणासाठी आहे. अध्यात्म एक शास्त्र ते अंधश्रध्दा नाही. जगाला नवी दिशा देण्यासाठी नवीन शिक्षण पद्धत गरजेची आहे.”
प्रा.डॉ. आर.एम.चिटणीस यांनी स्वागत पर भाषण केले.
प्रा.डॉ. प्रसाद खांडेकर यांनी प्रास्ताविक केले.
प्रा.अतुल कुलकर्णी यांनी सूत्रसंचालन केल. प्रा.दत्ता दंडगे यांनी आभार मानले.

पुणे-सीरम इन्स्टिट्यूटचे मुख्य कार्यकारी अधिकारी अदर पूनावाला यांच्या नावे समाजमाध्यमाद्वारे बनावट संदेश पाठवून एक कोटी रुपयांची फसवणूक केल्या प्रकरणी बंडगार्डन पोलिसांनी सात जणांना अटक केली. आराेपींना मध्यप्रदेश, बिहार, उत्तरप्रदेश आणि आंध्रप्रदेशातून ताब्यात घेण्यात आले.

राजीव कुमार शिवजी प्रसाद (रा. सिवान, बिहार), चंद्रभूषण आनंद सिंग (रा.गोपालगंज, बिहार), कन्हैय्याकुमार संभू महंतो (रा. सिवान, बिहार), रवींद्रकुमार हुबनाथ पटेल (रा. वाराणसी, उत्तरप्रदेश), रावी कौशलप्रसाद गुप्ता (रा. चिंगवाह, मध्यप्रदेश), यासीर नाझीम खान (रा. ग्वाल्हेर, मध्यप्रदेश), प्रसाद सत्यनारायण लोवुडू (रा. विशाखापट्टन्नम, आंध्रप्रदेश) अशी अटक करण्यात आलेल्यांची नावे आहेत. आरोपींच्या खात्यात जमा झालेली १३ लाख रुपयांची रक्कम गोठविण्यात आली आहे, अशी माहिती पोलीस उपायुक्त स्मार्तना पाटील यांनी पत्रकार परिषदेत दिली. सहायक आयुक्त आर. एन. राजे या वेळी उपस्थित होते. सप्टेंबर महिन्यात ही घडली होती.  याबाबत सीरम इन्स्टिट्यूटचे वित्त विभागातील व्यवस्थापक सागर कित्तुर यांनी फिर्याद दिली होती.

सीरम इन्स्टिट्यूटमध्ये सतीश देशपांडे संचालक आहेत. ७ सप्टेंबर रोजी देशपांडे यांच्या मोबाइल क्रमांकावर अदर पूनावाला यांच्या नावे संदेश पाठविण्यात आला होता. त्वरीत एक कोटी रुपये जमा करावेत, असे संदेशात म्हटले होते. आरोपींनी पूनावाला यांचा मोबाइल क्रमांक हॅक करुन बनावट संदेश पाठविला होता. देशपांडे सीरम इन्सिट्यूटच्या खात्यातून एक कोटी एक लाख एक हजार ५४४ रुपये पाठविले. त्यानंतर त्यांनी पूनावाला यांच्याशी संपर्क साधला. तेव्हा फसवणूक झाल्याचा प्रकार उघडकीस आला. या प्रकरणी गुन्हा दाखल झाल्यानंतर पोलिसांनी तपास सुरू केला. तांत्रिक तपासात मिळालेल्या माहितीनुसार चार आरोपींना गेल्या महिन्यात बिहारमधून ताब्यात घेण्यात आले.  तपासात अन्य आरोपींची माहिती मिळाल्यानंतर त्यांना अटक करण्यात आली.

आरोपी प्रसाद हा संगणक अभियंता आहे. रावी गुप्ता हा विज्ञान शाखेचा पदवीधर असून तो एका बँकेत काम करत असल्याची माहिती तपासात मिळाली आहे. पोलीस उपायुक्त स्मार्तना पाटील यांच्या मार्गदर्शनाखाली वरिष्ठ पोलीस निरीक्षक प्रताप मानकर, गुन्हे शाखेच्या पोलीस निरीक्षक अश्विनी सातपुते, राजाराम घोगरे, अमोल सरडे, किरण तळेकर, सागर घोरपडे, मनोज भोकरे, ज्ञाना बडे आदींनी ही कारवाई केली.

पुणे, दि. २५ : लोकशाहीच्या बळकटीकरणासाठी नवयुवकांची भूमिका महत्त्वाची असून त्यासाठी मतदान प्रक्रियेत युवकांचा सहभाग वाढणे आवश्यक आहे. जास्तीत जास्त युवकांची मतदार नोंदणी व्हावी यासाठी प्रशासन प्रयत्नशील असून या कार्यक्रमात सहभाग घेवून मतदार नोंदणी करावी, असे आवाहन जिल्हाधिकारी डॉ. राजेश देशमुख यांनी आज केले.

महाराष्ट्र कॉस्मो पॉलिटन एज्युकेशन सोसायटीचे अबेदा इनामदार ज्युनिअर कॉलेज आणि २१४- विधानसभा कॅन्टोन्मेंट बोर्ड पुणे मतदार संघ यांच्या संयुक्त विद्यमाने आझम कॅम्पस पुणे येथे मतदार याद्यांचा विशेष संक्षिप्त पुनरिक्षण कार्यक्रमाअंतर्गत आयोजित मतदार नोंदणी विशेष शिबिराच्या उद्घाटन प्रसंगी ते बोलत होते.

कार्यक्रमास उपजिल्हा निवडणूक अधिकारी आरती भोसले, उपजिल्हाधिकारी तथा २१४ विधानसभा पुणे कॅन्टोन्मेंट मतदार संघ मतदार नोंदणी अधिकारी सुभाष भागडे, तहसिलदार तथा सहायक मतदार नोंदणी अधिकारी डॉ. सुनील शेळके, महाराष्ट्र कॉस्मो पॉलिटन एज्युकेशन सोसायटीचे अध्यक्ष पी. ए. इनामदार, उपाध्यक्ष अबेदा इनामदार, सचिव इरफान जे. शेख आदी उपस्थित होते.

डॉ. देशमुख म्हणाले, भारत निवडणूक आयोगातर्फे घेण्यात आलेल्या विशेष पुनरिक्षण कार्यक्रमांतर्गत नवीन मतदारांसह समाजातील दिव्यांग, तृतीयपंथी, वंचित घटक यांचा मतदान प्रक्रियेत सहभाग वाढावा यासाठी विविध कार्यक्रम आयोजित करून जनजागृती करण्यात येत आहे. शहरी भागात मतदान कमी प्रमाणात होते, त्याचे प्रमाण वाढणे आवश्यक आहे. १७ ते २९ वयोगटातील युवकांचे मतदार यादीत कमी प्रतिनिधित्व असून ते वाढणे आवश्यक आहे.

भारत निवडणूक आयोगाने सायकल रॅलीच्या माध्यमातून पुणे येथे जनजागृती कार्यक्रम आयोजित केला होता. भारत निवडणूक आयोगातर्फे १ जानेवारी २०२३ या अर्हता दिनांकावर आधारित मतदार याद्यांचा विशेष संक्षिप्त पुनरिक्षण कार्यक्रम जाहीर केला आहे. आतापर्यंत मतदार नोंदणीसाठी १ जानेवारी हा अर्हता दिनांक असायचा. मात्र २०२३ पासून जानेवारी, एप्रिल, जुलै आणि ऑक्टोबर या महिन्यांच्या एक तारखेला किंवा त्याआधी ज्या नागरिकांची अठरा वर्षे पूर्ण होतील, त्यांना विशेष मोहिमेअंतर्गत आगाऊ मतदार नोंदणी करता येणार आहे. यावर्षी ८ डिसेंबर २०२२ पर्यंत विशेष मोहीम हाती घेण्यात आली आहे.

युवकांनी स्वत:च्या मतदार ओळखपत्राला आधार जोडणी करुन घेण्यासह कुटुंबातील सदस्यांनाही आधार जोडणीसाठी प्रोत्साहित करावे. सुदृढ लोकशाहीसाठी मिळालेल्या मतदानाच्या अधिकाराचा उपयोग करावा. मतदार यादीत आपले नाव नोंदवणे व मतदानात भाग घेणे हे आपले कर्तव्य आहे. महाविद्यालयातील १७ वर्षांच्या पुढील सर्व वयोगटातील युवकांनी मतदार नोंदणी करून घ्यावी, त्यासाठी विशेष करून शिक्षकांनी पुढाकार घ्यावा, असे आवाहनही त्यांनी यावेळी केले.

या शिबिरात १ हजार ४०० विद्यार्थ्यांनी नमुना अर्ज क्र. ६ भरून नवीन मतदार नोंदणीत सहभाग घेतला.

प्रस्ताविकात मतदार नोंदणी अधिकारी श्री. भागडे म्हणाले, आज पुणे जिल्ह्यात ४५० महाविद्यालयात शिबिराचे आयोजन करण्यात आले आहे. जास्तीत जास्त प्रमाणात विद्यार्थांनी मतदार नोंदणी करावी हा यामागचा प्रमुख उद्देश आहे. ८ डिसेंबरपर्यंत ही मोहीम सुरू राहणार आहे.

श्री. इनामदार म्हणाले, पूर्वी मतदार नोंदणी करण्यासाठी कार्यालयात जावे लागत असे. आता जिल्हाधिकाऱ्यांच्या पुढाकाराने महाविद्यालयात विशेष शिबिराचे आयोजन करण्यात आले आहे, त्याचा जास्तीत जास्त विद्यार्थ्यांनी लाभ घ्यावा.

पुणे-‘शिक्षण क्षेत्रातील दीपस्तंभ’ हे प्रदीप आगाशे यांनी लिहिलेले, अनमोल प्रकाशनाचे पुस्तक डेक्कन एज्युकेशन सोसायटीचे अध्यक्ष डॉ. शरद कुंटे यांच्या हस्ते नुकतेच प्रकाशित करण्यात आले.
शिक्षण क्षेत्रासाठी बहुमूल्य योगदान देणाऱ्या 51 शिक्षकांच्या कार्याचा परिचय या पुस्तकात करून देण्यात आला आहे. त्यासाठी आगाशे यांनी अथक प्रयत्न केले आहेत. या माहितीचा शिक्षण क्षेत्रात कार्य करणाऱ्यांना दीपस्तंभासारखा उपयोग होईल, असे मत कुंटे यांनी व्यक्त केले. सोनाली नांदुरकर, आशिष आगाशे, एकनाथ बुरसे यांनी संयोजन केले.

पुणे – महाराष्ट्राचे शिल्पकार व पहिले मुख्यमंत्री स्व. यशवंतराव चव्‍हाण यांच्या पुण्यतिथी निमित्त पुणे शहर जिल्हा काँग्रेस कमिटीच्या वतीने अध्यक्ष अरविंद शिंदे व माजी गृहराज्य मंत्री रमेश बागवे यांच्या हस्ते व महाराष्ट्र प्रदेश काँग्रेस कमिटीचे सरचिटणीस ॲड. अभय छाजेड यांच्या उपस्थितीत स्व. यशवंतराव चव्‍हाण यांच्या प्रतिमेस व पुतळ्यास काँग्रेस भवन येथे पुष्पहार अर्पण करून अभिवादन करण्यात आले.

     यावेळी माजी गृहराज्य मंत्री रमेश बागवे म्हणाले की, ‘‘आधुनिक महाराष्ट्राचे शिल्पकार स्व. यशवंतरावजी चव्‍हाण यांनी आपल्या संघटनात्मक कौशल्याने काँग्रेस पक्षाचे व देशाचे नाव आतंरराष्ट्रीय पातळीवर पोहचवले. केंद्रात त्यांनी उपपंतप्रधान, गृह, अर्थ व संरक्षण खाते सांभाळले. तरी महाराष्ट्रावरचे प्रेम त्यांनी कमी केले नाही व सर्वसामान्य गोरगरीबांचे नेते म्हणून ते लोकप्रिय होते. त्याचप्रमाणे त्यांच्या सर्व कृतीतून हिमालयाच्या मदतीला सह्याद्री आला अशी म्हण रूजू झाली. त्यांनी त्यांच्या कामातून काँग्रेसचा विचार रूजवून आदर्श तर दिलाच परंतू त्यांच्या विचारांची आज काँग्रेसला गरज आहे. महाराष्ट्रात सर्वजण त्यांना साहेब म्हणायचे त्यांच्याच विचारांनी आपण सर्वजण मिळून काँग्रेस पक्षाची उभारणी करू. अशा या थोर स्वातंत्र्य सेनानीस त्यांच्या पुण्यतिथी दिनी विनम्र अभिवादन.’’

     यावेळी ब्लॉक अध्यक्ष सचिन आडेकर, उमेश कंधारे, संदिप मोकाटे, द. स. पोळेकर, गुलाम हुसेन, लतेंद्र भिंगारे, अनिस खान, चंद्रकांत नार्वेकर, रविंद्र उकिरंडे, करीम शेख, स्वप्निल, मुन्ना खंडेलवाल आदी उपस्थित होते.

पुणे : खेलो इंडिया वुशु महिला लीगमध्ये महाराष्ट्राच्या श्रावणी कटके, आराध्या शिंदे, अनुष्का जैन, स्वीटी मेश्राम यांनी सुवर्णपदक पटकाविले. स्पर्धेचे आयोजन रांची येथील ठाकूर विश्वनाथ शहादेव इनडोअर स्टेडियम येथे करण्यात आले होते. या स्पर्धेमध्ये महाराष्ट्राच्या खेळाडूंनी विविध गटांमध्ये घवघवीत यश मिळवले. 
वुशु महिला लीग मध्ये विविध प्रकारात महाराष्ट्राच्या खेळाडूंनी ६ सुवर्ण, ३ रौप्य, १५ कांस्य पदकांची कमाई केली. स्पर्धेच्या पारितोषिक वितरण समारंभासाठी रांचीचे खासदार संजय सेठ, आमदार शिल्पी नेहा टिरकी, खेलो इंडियाचे सहाय्यक संचालक नरेंद्र उज्वल, रामकुमार, कृष्णा सामनिया, साईचे डी. दास उपस्थित होते. सर्व खेळाडूंना ऑल महाराष्ट्र वुशुचे अध्यक्ष एस. एस. झेंडे व महासचिव एस. एस. कटके यांचे मार्गदर्शन लाभले.
सुवर्णपदक विजेत्या सीनियर, ज्युनियर आणि सब ज्युनियर गटातील विजेत्यांना अनुक्रमे ५० हजार, ३० हजार आणि २० हजार, रौप्य पदक विजेत्या सीनियर, ज्युनियर, सब ज्युनिअर  विजेत्यांना अनुक्रमे ४० हजार, २० हजार आणि १५ हजार, कांस्य पदक विजेत्या सीनियर, ज्युनियर, सबज्युनियर गटात अनुक्रमे २० हजार, १५ हजार आणि १० हजार अशी रोख पारितोषिके देण्यात आली.

इतर निकाल खालील प्रमाणे :
सांशु  सब ज्युनिअर – खुशी तलमले- कांस्य – (३० किलो), अनुष्का जैन – सुवर्ण (३९ किलो), आयुषी घेवारे –  कांस्य (४२ किलो), मुक्ता दादवी- कांस्य (४२ किलो), कुमुदिनी बिसेन- कांस्य (४५ किलो), सरस्वती रोंगे- कांस्य, स्वीटी मेश्राम – सुवर्ण, सेजल तायडे – रौप्य, फर्जाना मुलानी – कांस्य (सर्व ४८ किलो).

जूनियर – वैष्णवी दुडमल – कांस्य (४५ किलो)

सीनियर – तनु – रौप्य (५२ किलो), सुमन पाल – कांस्य (५२ किलो) शायना- कांस्य (७० किलो), दीक्षा – कांस्य (७५ किलो)

ताउलू सब ज्युनियर – आराध्या शिंदे – सुवर्ण, समृद्धी शिंदे – कांस्य,  मृगाक्षी झोडे – कांस्य

ज्युनियर   – सलोनी जाधव – सुवर्ण, सिद्धी शिंदे – रौप्य

सीनियर – श्रावणी कटके ताईजीक्वान, ताईजीजॅन (२ सुवर्ण), तृप्ती चांदवडकर (३ कांस्य)

पुणे-डीईएसच्या टिळक रस्ता प्रांगणातील शाळांमध्ये विद्यार्थ्यांची वाहतूक करणाऱ्या वाहनचालकांच्या क्रीडा स्पर्धांचे आयोजन करण्यात आले होते. धावणे, रस्सीखेच, बादलीत चेंडू टाकणे, बूक बॅलन्सिंग या खेळांचा समावेश होता.
डीईएसचे अध्यक्ष डॉ. शरद कुंटे यांच्या हस्ते बक्षीस वितरण करण्यात आले. डॉ. कुंटे यांनी विद्यार्थ्यांची सुरक्षित वाहतूक या विषयीचे महत्त्च स्पष्ट केले. डीईएसच्या फिजिओथेरपी विभागाच्या दीप्ती भोळे आणि शरयू रायबोले यांनी वाहनचालकांना शारीरिक आणि मानसिक आरोग्यासाठी सोप्या व्यायाम प्रकारांची माहिती दिली.
न्यू इंग्लिश स्कूल, मा. स. गोळवलकर गुरुजी विद्यालय आणि डीईएस इंग्लिश मीडियम या शाळांतील वाहनचालकांनी सहभाग घेतला. मुख्याध्यापिका दर्शना कोरके, सुरक्षा अधिकारी प्रदीप अष्टपुत्रे, आनंदा पाटील, सुनेत्रा वेदपाठक, स्वाती राजगुरू, सुभाष निंबाळकर, प्रवीण जाधव, आनंद पाटील, डेंगळे यांनी संयोजन केले.