पुणे-राज्याचे उच्च व तंत्रशिक्षण मंत्री चंद्रकांतदादा पाटील हे नेहमीच लहान मुलांमध्ये रमून जातात. लहान मुलांशी संवाद साधताना, ते अतिशय आनंदी होतात. आजही त्यांचे एक वेगळे रुप सर्वांना पाहायला मिळाले. आज त्यांनी चक्क शाळेच्या शिक्षकाच्या भूमिकेतून विद्यार्थिनींना स्वच्छतेचे धडे दिले. तसेच सुकन्या समृद्धी योजनेच्या माध्यमातून सर्व विद्यार्थिनींचे पालकत्व स्वीकारले. तसेच एक पालक असलेल्या विद्यार्थिनींचे शैक्षणिक पालकत्व स्विकारण्याची घोषणा केली.

कोथरूड मधील कर्वेनगर भागातील जिव्हाळा फाऊंडेशन संचालित अनुराधा पूर्व माध्यमिक शाळा आणि स्व. सुरेश मुठे मुलींचे वसतिगृह सुमन बालसंस्कार केंद्राला पालकमंत्री चंद्रकांतदादा पाटील यांनी सदिच्छा भेट दिली. पुण्याच्या ग्रामीण भागातील या शाळेत भटक्या विमुक्त जाती आणि आर्थिकदृष्ट्या दुर्बल कुटुंबातील विद्यार्थ्यांनी इंग्रजी माध्यमातून शिक्षण घेतात. तसेच या सर्व मुलीं शाळेच्या वसतिगृहात राहतात.

या शाळेला भेट दिल्यानंतर सर्वप्रथम मुलींनी ‘गुड मॉर्निंग’ म्हणत माननीय चंद्रकांतदादा पाटील यांचे स्वागत केले. यावर माननीय दादांनी गुड मॉर्निंगला मराठीत काय म्हणतात असा प्रश्न केला. त्यावर विद्यार्थ्यांनींना काही सांगणे शक्य झाले नाही, त्यामुळे प्रेमाने गुड मॉर्निंगच्या ऐवजी ‘सुप्रभात’ शब्द वापरत असल्याचे सांगितले. आणि सर्वांना चॉकलेट वाटप केले.

त्यानंतर चंद्रकांत पाटील यांनी “माझ्याशी कोण बोलणार?” असे विचारताच, राजनंदनी नरेंद्रसिंह घोरपडे, रेखा भीमा शेट्टी आणि आरोही अविनाश तुपेकर या तीन मुले पुढे आल्या. माननीय दादांनी या तिन्ही मुलींची आत्मियतेने विचारपूस केली. तसेच मोठी झाल्यावर काय होणार? असा प्रश्न विचारला. दादांच्या या प्रश्नानंतर या तिन्ही मुलींनी आपल्या भावना व्यक्त करताना डॉक्टर, पोलीस अधिकारी, शिक्षिका असे सांगितले. त्यानंतर दादांनी ही तिघींचे आनंदाने कौतुक केले.

यानंतर चंद्रकांत पाटील यांनी सर्व विद्यार्थ्यांशी संवाद साधताना, देशाचे पंतप्रधान नरेंद्र मोदी यांच्या स्वच्छ भारतच्या संकल्पाविषयी सर्व विद्यार्थिनींना सविस्तर माहिती दिली.‌ तसेच, “मी आता दिलेले चॉकलेटचा कागद खाली कुठेही न टाकता, कचरा पेटीतच टाकावा,” असे समजावून सांगितले.

विद्यार्थिनींशी संवादानंतर जिव्हाळा फाऊंडेशनच्या संचालिका ॲड. शर्वरी मुठे आणि अनुराधा शाळेच्या शिक्षिका सोनिया मारणे, निलिमा वाडकर, सुजाता जोशी, विनया चौधरी, योगिनी शिंदे, मोनिका कदम, दादांनी संवाद साधून, त्यांच्या अडचणी जाणून घेतल्या. त्यानंतर शिक्षिकांना सुकन्या समृद्धी योजनेची माहिती देऊन, सर्व‌ विद्यार्थिनींचे सुकन्या समृद्धी योजनेच्या माध्यमातून पालकत्व घेतले.

तसेच, संस्थेच्या शिक्षिकांनी पुण्यातील शाळांचे सर्वेक्षण करावे, आणि ज्या विद्यार्थिंनीच्या एका पालकाचे निधन झाले आहे, अशा एक पालक असलेल्या विद्यार्थिनींची माहिती संकलित करावी. या सर्व विद्यार्थिनींचे शैक्षणिक पालकत्व स्विकारण्याची घोषणा चंद्रकांत पाटील यांनी यावेळी केली.

12 गरजू व्यक्तींवर होणार मोफत मोतीबिंदू शस्त्रक्रिया – सौ. मंजुश्री खर्डेकर.
पुणे-भारतीय जनता पार्टी प्रभाग 13, क्रिएटिव्ह फाउंडेशन, म. ग. आचवल ट्रस्ट आणि नयनतारा आय क्लिनिक च्या सहकार्याने लोकनेते गोपीनाथराव मुंडे यांच्या जयंती निमित्त नेत्रचिकित्सा शिबिराचे आयोजन करण्यात आले होते. माजी शिक्षण मंडळ अध्यक्ष व माजी नगरसेविका मंजुश्री खर्डेकर यांनी एरंडवणे, दहा चाळ येथे आयोजित केलेल्या शिबिरात तब्ब्ल 12 गरजू व्यक्तींवर मोफत मोतीबिंदू शस्त्रक्रिया करण्यात येणार असल्याचे सांगितले. शिबिराचा लाभ घेण्यासाठी सकाळपासूनच नागरिकांनी गर्दी केली होती. ह्या शिबिरास माजी नगरसेवक व भाजपा पुणे शहर सरचिटणीस दीपक पोटे, नगरसेवक जयंत भावे, स्वीकृत सदस्य मिताली सावळेकर,सरचिटणीस प्राची बगाटे, उद्योग आघाडीचे सरचिटणीस रामदास गावडे,ब्राह्मण संघाचे दत्तात्रय देशपांडे इ मान्यवर उपस्थित होते.
नयनतारा आय क्लिनिक चे डॉ. अनिल परांजपे आणि डॉ. मेधा परांजपे व त्यांच्या चमुने नेत्रतपासणी करून शस्त्रक्रियेसाठीच्या रुग्णांची निवड केली. उद्याच ह्या सर्वांवर शस्त्रक्रिया करण्यात येणार असल्याचे मंजुश्री खर्डेकर म्हणाल्या.हे शिबीर यशस्वी करण्यासाठी भाजपा महिला आघाडी उपाध्यक्ष संगीताताई आदवडे व संगीताताई वांद्रे यांनी विशेष परिश्रम घेतले. लोकनेते गोपीनाथराव मुंडे यांनी आम्हाला सतत समाजातील दुर्बल घटकांना मदत करण्याची शिकवण दिली, त्यालाच अनुसरून त्यांच्या जयंती दिनी मोफत शस्त्रक्रिया शिबीर आयोजित केल्याचे सौ. खर्डेकर यांनी स्पष्ट केले.

पुणे : छत्रपती शिवाजी महाराजांबद्दल अपमानास्पद वक्तव्ये मोठ्या पदावरील व्यक्ती तसेच काही लोकप्रतिनिधींकडून केली जात आहेत. यामुळे आमच्या भावना दुखावल्या गेल्या असून, या वक्तव्याचा खेदजनक निषेध व्यक्त करीत पुण्यातील गणेशोत्सव मंडळांनी १३ डिसेंबर पुणे बंदच्या आवाहनाला पाठिंबा दिला.

श्री तांबडी जोगेश्वरी मंडळ, केसरीवाडा मंडळ, श्री तुळशीबाग गणपती सार्वजनिक गणपती मंडळ ट्रस्ट, अखिल मंडई मंडळ, श्रीमंत दगडूशेठ हलवाई गणपती यांसह शहरातील ३६ गणेशोत्सव मंडळांनी या बंदला पाठिंबा दिला आहे.

अण्णा थोरात म्हणाले, छत्रपती शिवाजी महाराज हे आमचे दैवत आहेत. ते आमचे प्रेरणास्थान आणि स्फूर्तिस्थान आहेत आणि कायम राहतील. देशातील इतर सर्वच महापुरुष आणि महान स्त्री व्यक्तिमत्वांबद्दल आम्हाला नितांत आदर आहे व या सर्वांचे देशाप्रती असलेल्या अमूल्य योगदानाचे आम्हाला भान आणि अभिमान हे दोन्ही आहे.

गेल्या काही दिवसांपासून छत्रपती शिवाजी महाराजां बद्दल अपमानास्पद व्यक्तव्ये मोठ्या पदावरील व्यक्ती तसेच काही लोकप्रतिनिधींकडून केली जात आहेत. यामुळे आमच्या भावना तीव्र दुखावल्या गेल्या असून, या गोष्टीचा आम्ही खेदजनक निषेध व्यक्त करीत आहोत, खेदजनक यासाठी कारण आपणच निवडून दिलेले लोकप्रतिनिधी आमच्या श्रद्धास्थानाबद्दल अशी बेताल विधाने करीत आहेत.

यापुढे कधीही कोणत्याही व्यक्तीने मग ती राजकीय असो किंवा अराजकीय, छत्रपती शिवाजी महाराजां बद्दल एक शब्द जरी चुकीचा किंवा अपमानास्पद काढला, तर अजिबात खपवून घेतले जाणार नाही. याची नोंद घ्यावी व भविष्यात छत्रपती शिवाजीमहाराजांबद्दल बोलताना याचे भान राखावे, असे आवाहनही यावेळी गणेशोत्सव मंडळांच्या प्रतिनिधींनी केले.

पुणे–पीएमपीएमएल कडून कोंढणपूर येथील श्री तुकाईदेवी यात्रा निमित्ताने भाविकांच्या सोयीसाठी मार्ग क्र. २९२-
कात्रज सर्पोद्यान बसस्थानक ते कोंढणपूर या मार्गावर दि. १३/१२/२०२२ ते दि. २८/०२/२०२३ या कालावधीत
आठवड्यातील दर रविवार, मंगळवार व शुक्रवार या दिवशी २ जादा बसेस सोडण्यात येणार आहेत.
सध्या कात्रज सर्पोद्यान बसस्थानक ते कोंढणपूर या मार्गावर पीएमपीएमएलच्या दररोज नियमित ५ बसेस दर ३०
मिनिटांच्या वारंवारीतेने सुरु असून दिवसभरात एकूण ५८ फेऱ्या होतात. या ५ बसेस व्यतिरिक्त २ जादा बसेसचे नियोजन
दि. १३/१२/२०२२ ते दि. २८/०२/२०२३ या कालावधीत आठवड्यातील दर रविवार, मंगळवार व शुक्रवार या दिवशी
करण्यात आले आहे. सदरच्या २ जादा बसेस भाविकांच्या गर्दीनुसार व आवश्यकतेनुसार धावतील.
तसेच पुणे सातारा रोडवर कात्रज सर्पोद्यान बसस्थानकावरून बसमार्ग क्र. ६१- कात्रज सर्पोद्यान ते सारोळा (दररोज
५ बसेस), मार्ग क्र. २९३- कात्रज सर्पोद्यान ते सासवड – मार्गे कापूरहोळ (दररोज २ बसेस), मार्ग क्र. २९६- कात्रज सर्पोद्यान
ते विंझर (दररोज ३ बसेस) व मार्ग क्र. २९६अ- कात्रज सर्पोद्यान ते वांगणीवाडी (दररोज १ बस) या मार्गावर संचलनात
असणाऱ्या बसेस कोंढणपूर फाट्यापर्यंत जाणेसाठी उपलब्ध आहेत.
तरी कोंढणपूर येथील श्री तुकाईदेवी दर्शनासाठी जाणाऱ्या सर्व भाविकांनी सदर बससेवेचा लाभ घ्यावा, असे आवाहन
पीएमपीएमएल कडून करण्यात येत आहे.

पुणे, दि.११: अंडरवॉटर स्पोर्ट्स फेडरेशन ऑफ इंडियाच्या वतीने शिवछत्रपती क्रीडासंकुल म्हाळुंगे- बालेवाडी येथे ९ ते ११ डिसेंबर २०२२ या कालावधीत आयोजित दुसऱ्या राष्ट्रीय फिनस्विमिंग स्पर्धेत पश्चिम बंगालने 32 सुवर्ण पदकांसह 90 पदके जिंकत सर्वसाधारण विजेतेपद पटकावले. केरळने 17 सुवर्णपदकांसह 44 पदके मिळवत दुसरे स्थान मिळवले तर तेलगंणाने 16 सुवर्ण पदकांसह 34 पदके मिळवत तिसरे स्थान पटकावले. तर महाराष्ट्राला 1 सुवर्ण, 1 रौप्य आणि एका कांस्य पदकावर समाधान मानावे लागले.

अंडरवॉटर स्पोर्ट्स फेडरेशन ऑफ इंडिया (USFI) द्वारे आयोजित दुसऱ्या नॅशनल फिनस्विमिंग चॅम्पियनशिप पुणे 2022 स्पर्धेचा समारोप रविवारी झाला. यावेळी राज्याचे उच्च व तंत्रशिक्षण मंत्री तथा पुणे जिल्ह्याचे पालकमंत्री चंद्रकांत दादा पाटील, अंडरवॉटर स्पोर्ट्स फेडरेशन ऑफ इंडियाचे जनरल सेक्रेटरी आणि द्रोणाचार्य पुरस्कार विजेते राष्ट्रीय प्रशिक्षक डॉ. तपन कुमार पानिग्रही, रोल बाॅल राज्य संघटनेचे अध्यक्ष संदिप खर्डेकर, अभिषेक लोणकर, अचिंता पंडित (कोषाध्यक्ष USFI),रियर एडमिरल पीडी शर्मा (अध्यक्ष RLSS (I),साईश्री हॉस्पिटलचे डॉ. नीरज आडकर आदी मान्यवर उपस्थित होते

यावेळी बोलताना चंद्रकांत पाटील म्हणाले की, फिनस्विमिंग खेळ ज्या उद्देशाने खेळला जातो त्याप्रमाणे या खेळाला प्रतिष्ठा मिळाली पाहिजे, अधिकाधिक खेळाडूंनी फिनस्विमिंग हा खेळ खेळला पाहिजे, यासाठी आगामी काळात पुणे येथे आयोजित होणाऱ्या स्पर्धेला सहकार्य करेल, पाटील म्हणाले, रोलबॉलची सुरुवात पुणे येथून झाली असून राष्ट्रीय तसेच आंतरराष्ट्रीय स्तरावर स्पर्धेचे आयोजन करण्यात येत आहे. त्याची लोकप्रियता दिवसेंदिवस वाढत आहे. राज्यात खेळाडूंना प्रोत्साहित करण्यासाठी शासकीय खात्यात नोकरी तसेच इयत्ता १० व १२ वी मध्ये शिक्षण घेणाऱ्या खेळाडूंला २५ गुण देण्यात येते. राज्यात खेळाला प्रोत्साहन देण्यासाठी राज्य शासन प्रयत्नशील आहे.

या स्पर्धेत ३४ राज्य, केंद्रशासित प्रदेशातून ३०० पेक्षा जास्त जिल्ह्यातील १ हजार पेक्षा जास्त खेळाडू आणि प्रशिक्षक, तांत्रिक अधिकारी सहभाग घेतला आहे. यावेळी पालकमंत्री पाटील यांच्या हस्ते विजेत्या खेळाडूंना सुवर्ण, कांस्य व रौप्य पदक प्रदान करण्यात करुन खेळाडूंना पुढील वाटचालीस शुभेच्छाही दिल्या. या स्पर्धेत महाराष्ट्राच्या स्मिता राजन काटवे, यांना मास्टर्स व्ही 2 महिला गटात सुवर्णपदक, साब्यासाची पानिग्रही ला 50 मीटर मोनोफिन मध्ये रौप्यपदक तर निया पतंगे, ज्युनिअर डी गर्ल, 50 मीटर सरफेस (मोनो फिन) कांस्यपदक मिळाले आहे.

पुणे-पालकमंत्री चंद्रकांतदादा पाटील यांच्यावर झालेल्या भ्याड शाईहल्ल्याचा तीव्र निषेध व्यक्त करण्यासाठी शहराध्यक्ष जगदीश मुळीक यांच्या नेतृत्वाखाली जिल्हाधिकारी कार्यालयासमोर निदर्शने करण्यात आली. विचारांचा सामना विचारांनी करता येत नसल्यामुळे असामाजिक तत्त्वांनी जाणीवपूर्वक आणि इजा पोहोचवण्याच्या उद्देशाने चंद्रकांत दादांवर शाईहल्ला केला. दादांनी याबाबत दिलगिरी व्यक्त करुनही हा प्रकार घडला. या प्रवृत्तीविरोधात आणि विशेषत: हल्ल्याच्या सुत्रधारावर कडक कारवाई करावी, अशी मागणी करत निषेध नोंदवला.
विश्वासघाताने आणि संधी साधूपणामुळे राज्यात आलेली सत्ता गेल्याने विरोधक सैरभैर झाले आहेत. राज्यातील शांततेचे वातावरण बिघडवून कायदा सुव्यवस्था प्रश्न निर्माण करायचा विरोधक सतत प्रयत्न करीत आहेत. भाजपाचा प्रत्येक कार्यकर्ता संयमी आहे आणि भारतरत्न डॉ. बाबासाहेब आंबेडकरांनी दिलेल्या घटनेच्या मर्यादेत राहून काम करणार आहे.
यावेळी भारतरत्न डॉ.बाबासाहेब आंबेडकर यांच्या पुतळ्याला पुष्पहार अर्पण करून अभिवादन केले.

यावेळी शहराध्यक्ष जगदीश मुळीक, आमदार माधुरीताई मिसाळ, प्रदेश सरचिटणीस मुरलीधर मोहोळ,आमदार भीमरावअण्णा तापकीर, सिद्धार्थ शिरोळे, सुनील कांबळे, ओबीसी मोर्चाचे प्रदेशाध्यक्ष योगेश टिळेकर, पुणे प्रभारी धीरज घाटे, गणेश बीडकर, संघटन सरचिटणीस राजेश पांडे, सरचिटणीस गणेश घोष, राजेश येनपुरे, दिपक पोटे, दिपक नागपुरे, दत्ताभाऊ खाडे, संदीप लोणकर, बापू मानकर, नगरसेवक, मंडल अध्यक्ष यांच्यासह पदाधिकारी आणि कार्यकर्ते मोठ्या संख्येने उपस्थित होते.

पुणे : राजकारणापेक्षा टिपेला पोहोचलेली महागाई, बेरोजगारी आणि गुन्हेगारीकडे वाढत जाणारा तरुणाईचा कल, हे महत्वाचे आहे. राज्यकर्त्यांना रॉ मटेरियल लागते, त्यांच्या मोर्चे, आंदोलन व सभांसाठी. जर सगळ्याच मुलांना नोक-या लागल्या, तर राज्यकर्त्यांकडे रॉ मेटेरियल म्हणून कोण जाईल? त्यामुळे ते रॉ मटेरियल करु इच्छितात. त्यामुळे हे रॉ मटेरियल होऊ नका, असे आवाहन शिवसेना- उद्धव बाळासाहेब ठाकरे च्या उपनेत्या अ‍ॅड. सुषमा अंधारे यांनी व्यक्त केले. 

अखिल म्हसोबा उत्सव मंडई ट्रस्टतर्फे मंडईतील बुरुड आळी येथे १०० कष्टकरी व्यावसायिकांना जंबो छत्री वाटप कार्यक्रमाचे आयोजन करण्यात आले होते. यावेळी परिमंडळ १ चे पोलीस उपायुक्त संदीपसिंग गील्ल, श्रीमंत दगडूशेठ हलवाई सार्वजनिक गणपती ट्रस्टचे अध्यक्ष माणिक चव्हाण, म्हसोबा ट्रस्टचे विश्वस्त अध्यक्ष राहुल सूर्यवंशी, विश्वस्त उपाध्यक्ष निवृत्ती जाधव, सारिका निंबाळकर आदी उपस्थित होते. श्रीमंत दगडूशेठ हलवाई सार्वजनिक गणपती ट्रस्टच्या अध्यक्षपदी निवड झाल्याबद्दल माणिक चव्हाण यांचा विशेष सन्मान करण्यात आला. वेंकिग उद्योग समूहाचे संचालक बालाजी राव यांच्या वाढदिवसानिमित्त या कार्यक्रमाचे आयोजन करण्यात आले होते. 
अ‍ॅड.सुषमा अंधारे म्हणाल्या, कष्टकरी व संघर्षाच्या वारशातून आलेल्या माणसाला सुख- दु:ख कळतात. गेल्या काही महिन्यात महापुरुषांचा अवमान असेल, महाराष्ट्राची अस्मिता पायदळी तुडविणे असेल, जाणीवपूर्व खोडसाळपणा करणे, यागोष्टींमुळे सर्वसामान्य माणूस सैरभर होत चालला आहे. सर्वसामान्यांचे जगण्या-मरण्याचे जे प्रश्न आहेत, त्यावरुन लक्ष हटावे, याकरिता हे ठरवून चालले आहे. त्यावरुन न हालता, आपण प्रश्न विचारत राहूया, असे आवाहनही त्यांनी केले. 
संदीपसिंग गील्ल म्हणाले, समाजामध्ये एकमेकांना हात देऊन मदत करणे महत्वाचे आहे. म्हसोबा ट्रस्टतर्फे कष्टकरी वर्गाला दिलेली ही मदत खूप महत्वाची आहे. प्रत्येकाने असेच कार्य करत रहायला हवे, असेही त्यांनी सांगितले. निवृत्ती जाधव म्हणाले, मंडईतील कष्टकरी व्यावसायिकांचे ऊन-पावसापासून संरक्षण व्हावे, याकरिता हा उपक्रम घेण्यात आला. उत्तम प्रतीच्या १०० जंबो छत्र्या या उपक्रमाच्या माध्यमातून देण्यात येत आहेत, असेही ते म्हणाले. सुधीर साकोरे, योगेश निकम, सागर जाधव, उमंग शहा, दिनेश पिसाळ आदींनी कार्यक्रमाच्या आयोजनात सहभाग घेतला. करिश्मा शेख यांनी सूत्रसंचालन केले.