भाजप शिंदे गटाला एका-एका जागेसाठी रडवेल–ठाकरेंनी काय भोगले, हे आता शिंदेंना कळेल, एकनाथ शिंदेंना देखील ईडीची भीती होती

मुंबई – शिवसेना एकनाथ शिंदेंनी नव्हे तर केंद्रीय गृहमंत्री अमित शहांनी फोडली. भविष्यात ते शिंदे गटालाही नष्ट केल्याशिवाय राहणार नाही. अमित शहांचे हेच राजकारण आहे, अशी टीका ठाकरे गटाचे नेते संजय राऊत यांनी केली.भाजपच्या नेत्यांनी मुख्यमंत्री शिंदे यांच्या पुत्राच्या कल्याण लोकसभा मतदारसंघात शिंदे पिता-पुत्रावर बहिष्कार घातला आहे. त्यामुळे कल्याणचे खासदार श्रीकांत शिंदे यांनी खासदारकीचा राजीनामा देण्याचीही तयारी दाखवली. त्यामुळे प्रथमच भाजप आणि शिंदे शिवसेना यांच्यात मोठा दुरावा निर्माण झाला आहे. त्याचा संदर्भ देत आज पत्रकार परिषदेत संजय राऊत म्हणाले, अमित शहा, भाजपचे हेच राजकारण आहे. उद्धव ठाकरेंनी भाजपसोबत युती का तोडली?, हे शिंदे गटाला आता कळेल. भाजपसोबत सत्तेत असताना उद्धव ठाकरेंनी काय भोगले, याचा अनुभव आता शिंदे गटाला घेऊ द्या. कल्याण लोकसभेची जागा पूर्वी भाजपकडेच होती. मात्र, आनंद दिघे व बाळासाहेब ठाकरे यांनी ही जागा शिवसेनेकडे खेचून आणली. मात्र, आता शिवसेना फोडल्यानंतर भाजपला ही जागा हवी आहे.

संजय राऊत म्हणाले, कल्याणमधून लोकसभेवर पूर्वी निष्ठावान शिवसैनिक खासदार म्हणून निवडून येत होते. मात्र, एकनाथ शिंदेंनी ती जागा आपले पुत्र श्रीकांत शिंदे यांच्यासाठी मागितली. उद्धव ठाकरे यांनी औदार्य दाखवत श्रीकांत शिंदेंना दोनदा तेथून खासदार म्हणून निवडून आणले. पण, उद्धव ठाकरेंनी शिंदे पुत्राचे फाजिल लाड केले, हे नंतर कळाले. केवळ कल्याणच्या जागेसाठी नव्हे तर भाजप एका-एका जागेसाठी शिंदे गटाला असाच रडवेल व हळूहळू नष्ट करून टाकेल. त्याची सुरूवात आता झाली आहे.संजय राऊत म्हणाले, शिवसेनेची मुंबई, महाराष्ट्रावरील पकड कमी करणे हे भाजपचे स्वप्न होते. त्यासाठी त्यांना शिवसेना फोडायचीच होती. एकनाथ शिंदे यांची ताकद 4, 5 आमदारांच्या पलीकडे नाही. अमित शहांच्या माध्यमातूनच शिवसेना फोडली. त्यासाठी केंद्रीय तपास यंत्रणांचा वापर, पैसा, दहशत अशी सर्व हत्यारे अमित शहांनी वापरली. शिवसेना फोडून महाराष्ट्र कमजोर करण्यात आला. एकनाथ शिंदेंना देखील ईडीची भीती होती. ते आदित्य ठाकरेंसमोर रडले होते. त्यांनी मन खंबीर ठेवावे, असे आमचे म्हणणे होते. मात्र, ते दबावाला बळी पडले.

आमदारांच्या अपात्रतेसंदर्भात आपण लवकरच क्रांतिकारी निर्णय घेऊ, असे वक्तव्य विधानसभेचे अध्यक्ष राहुल नार्वेकर यांनी केले आहे. त्यावर संजय राऊत म्हणाले, राहुल नार्वेकरांना खरे तर क्रांतिकारी निर्णय घेण्याची आवश्यकता नाही. त्यांनी सर्वोच्च न्यायालयाच्या निर्देशांनुसार, नियमांनुसार निर्णय घेतला तरी पुरेसे आहे. त्यांनी तसे केले तर आम्ही नार्वेकरांचा शिवतीर्थावर जाहीर सत्कार करू.अमित शहांची आज नांदेडमध्ये सभा आहे. त्यावर टीका करताना संजय राऊत म्हणाले, महाराष्ट्रातील भाजप नेते कमजोर पडल्यामुळेच दिल्लीतील नेत्यांना वारंवार महाराष्ट्रात यावे लागत आहे.

तानाजी सावंत ,गुलाबराव पाटील ,संजय राठोड ,अब्दुल सत्तार ,संदिपान भुमरे हि त्या ५ मंत्र्यांची नावे …

बंडात साथ देणाऱ्या या मंत्र्यांना काढावे कसे : मुख्यमंत्र्यांसमोर धर्मसंकट

शिंदेसेनेच्या पाच मंत्र्यांना ‘नारळ’ देऊन त्या जागी नवीन मंत्री नेमा, असे आदेश भाजपच्या हायकमांडने दिले आहेत. त्यामुळे मुख्यमंत्री एकनाथ शिंदे यांची गोची झाली आहे. बंडात साथ देणाऱ्यांना हटवायचे कसे, असा प्रश्न त्यांच्यासमोर आहे. सर्व मंत्र्यांच्या कामगिरीवर नजर ठेवण्यासाठी भाजपची स्वतंत्र यंत्रणा आहे. लोकसभा, विधानसभा निवडणुकीत या मंत्र्यांचा कितपत उपयोग होईल, याचा अहवाल यंत्रणेने हायकमांडला दिला आहे. त्यात शिंदेसेनेचे ५ मंत्री ब्लॅकलिस्टमध्ये आले आहेत, असा दावा सूत्रांनी केला आहे.

सर्वोच्च न्यायालयाचा निकाल लागताच शिंदे-फडणवीस सरकारच्या मंत्रिमंडळाचा पहिला विस्तार होईल, अशी आशा दोन्ही गटांतील इच्छुक आमदारांना होती. तसे दावेही मुख्यमंत्री- उपमुख्यमंत्र्यांनी वारंवार केले. पण खांदेपालटात समाधानकारक काम न केलेल्या शिंदेंच्या गटातील ५ मंत्र्यांना नारळ द्यायचे आदेश दिले गेल्याने बंडात साथ देणाऱ्यांना काढावे कसे ? असे धर्मसंकट आता मुख्यमंत्री एकनाथ शिंदे यांच्यापुढे उभे राहिले आहे असे सूत्रांचे म्हणणे आहे.

तानाजी सावंत :भाजपाला का नको ?

प्रत्येक जिल्ह्यात स्वत:चे ‘खासगी सचिव’ नेमले
सार्वजनिक आरोग्य सुधारणेत कोणतीही महत्त्वाची कामगिरी बजावली नाही. शिवाय प्रत्येक जिल्ह्यात व्यवहारासाठी स्वत:चे ‘खासगी सचिव’ही नेमले.
शिंदेंना का हवे : प. महाराष्ट्रात मोठे आर्थिक बळाचे प्रस्थ

अब्दुल सत्तार : भाजपाला का नको ?

कृषी योजनांचा लाभ नाही
केंद्राच्या योजनांचा लाभ कृषिमंत्री सत्तार खालपर्यंत प्रभावीपणे पोहोचवू शकलेले नाहीत. त्यामुळे राज्यातील शेतकरी नाराज आहेत.
शिंदेंना का हवे : एकमेव मुस्लिम मंत्री. वेळोवेळी अनेक ‘अर्था’ने मदत. स्वबळावर विजयाची क्षमता.

गुलाबराव पाटील : भाजपाला का नको ?

अपेक्षित कामे नाहीत
ग्रामीण, शहरी भागातील पाणीपुरवठ्याची कामे अपेक्षेनुसार झाली नाहीत. त्यामुळे ग्रामीण मतदारांत सरकारविषयी नाराजी.
शिंदेंना का हवे : उद्धवसेनेकडून होणाऱ्या हल्ल्यांना आक्रमक उत्तर देणारे. उत्तर महाराष्ट्रात ताकदवान.

संजय राठोड : भाजपाला का नको ?

औषधी विक्रेत्यांच्या तक्रारी
भाजप समर्थक असलेल्या औषधी विक्रेत्यांच्या तक्रारी. एका युवतीच्या आत्महत्या प्रकरणाने समाजात प्रतिमा मलिन.
शिंदेंना का हवे : विदर्भात मोठ्या संख्येने असलेल्या बंजारा समाजाची मते मिळवण्यात उपयोगी ठरतील.

संदिपान भुमरे : भाजपाला का नको ?

बदल्यांमध्ये गुंतले
रोहयो, फलोत्पादन योजना प्रभावीपणे अमलात आणल्या नाहीत. अनेक अधिकाऱ्यांच्या बदल्यांमध्ये हस्तक्षेपाचा आरोप.
शिंदेंना का हवे : बंडासाठी सर्वात अग्रेसर. बंडखोरांना एकत्र करण्यात महत्त्वाची भूमिका. मराठा चेहरा.

लांबलेला मंत्रिमंडळ विस्तार, अधिकारी बदल्या, शिवसेनेच्या मतदारसंघांत भाजपचा हस्तक्षेप, कल्याणमध्ये पुत्र श्रीकांत शिंदेंना भाजपमधून तीव्र विरोध या कारणांमुळे मुख्यमंत्री शिंदे भाजपवर नाराज आहेत. त्यामुळे बुधवारी रात्रीपासून ते मुंबईतच पण अज्ञातवासात राहतील ,खासगी व धार्मिक कामात व्यग्र असल्याचे सांगितले जाईल असाही दावा केला जातोय .

ज्येष्ठ सनदी अधिकाऱ्यांच्या बदल्या, भाजप पदाधिकाऱ्यावर गुन्हा नोंदल्याचे निमित्त

आगामी लोकसभा व विधानसभा युती एकत्र लढवणार असल्याची घोषणा मुख्यमंत्री एकनाथ शिंदे आणि भाजप प्रदेशाध्यक्ष चंद्रशेखर बावनकुळे यांनी केली असली तरी भाजपने विधानसभेच्या २८८ आणि लोकसभेच्या ४८ मतदारसंघात स्वबळावर लढायची तयारी चालवल्याचे शिंदेसेनेकडून मानले जाते आहे.ज्येष्ठ सनदी अधिकाऱ्यांच्या बदल्या, कल्याण लोकसभा मतदारसंघातील भाजप पदाधिकाऱ्यावर नाेंदलेला गुन्हा आणि मतदारसंघप्रमुखांची नेमणूक अशा कार्नानावरून आणि भाजपा नेते फडणवीस यांच्या सर्वोच्च मी या आतील स्वभावातून राज्यातील सत्ताधारी युतीचे घटक पक्ष भाजप आणि शिंदे शिवसेना यांच्यात मोठा दुरावा निर्माण झाल्याचे वृत्त आहे. त्यात भाजपच्या नेत्यांनी मुख्यमंत्री शिंदे यांच्या पुत्राच्या कल्याण लोकसभा मतदारसंघात शिंदे पिता-पुत्रावर बहिष्कार घातल्याच्या बातमीने या अंतर्गत धुसफुसीला दुजोरा मिळतो आहे.

मागच्या आठवड्यात राज्यातील २५ ज्येष्ठ सनदी अधिकाऱ्यांच्या बदल्या झाल्या. त्या करताना मुख्यमंत्री शिंदे आणि उपमुख्यमंत्री फडणवीस यांच्यात एकमत झाले नाही. परिणामी शिंदेंनी आपल्या मर्जीप्रमाणे काही बदल्या केल्या.तरीही महसूल आणि नगरविकासच्या बदल्यांमध्ये फडणवीसांनी हस्तक्षेप करत आपल्या मर्जीचे अधिकारी आणले. एमएमआरडीए आयुक्त नेमण्यावरून दोघांमध्ये तणाव निर्माण झाला. त्यात कल्याण लोकसभा मतदारसंघातील प्रकरणाची भर पडली आहे.

कल्याण या ठाणे जिल्ह्यातील लोकसभा मतदारसंघात मुख्यमंत्र्यांचे पुत्र श्रीकांत खासदार आहेत. तेथील भाजपचे डोंबिवली पूर्व विभागाचे अध्यक्ष नंदू जोशी यांच्यावर विनयभंगप्रकरणी गुन्हा नोंद झाला आहे. हा गुन्हा मुख्यमंत्र्यांच्या निकटवर्तीयांकडून आलेल्या दबावामुळे झाल्याचा भाजप पदाधिकाऱ्यांचा दावा आहे. गुन्हा नोंदवणाऱ्या पोलिस अधिकाऱ्यांचे निलंबन करेपर्यंत कल्याणमध्ये सेनेच्या सर्व कार्यक्रमांवर बहिष्कार घालायचा असा निर्णय भाजप पदाधिकाऱ्यांनी घेतला आहे.

प्रदेश भाजपने नुकतेच विधानसभेच्या २८८ आणि लोकसभेच्या ४८ मतदारसंघात निवडणूकप्रमुख नेमले आहेत. त्यात मागच्या वेळी पराभूत झालेल्या उमेदवारांना नेमण्याची खबरदारी घेतली आहे. म्हणून आगामी निवडणुकांमध्ये शिंदेसेनेच्या मतदारसंघात मोठा पेच निर्माण होणार आहे. शिंदेसेनेच्या वाट्यास येणाऱ्या मतदारसंघात भाजप व सेनेत संघर्ष उद्भवण्याची शक्यता आहे.

ठाणे आणि कल्याण कळीचा मुद्दा

ठाणे मतदारसंंघ शिंदेसेनेने घ्यावा आणि कल्याण आपल्याला मिळावे अशी भाजपची इच्छा आहे. कल्याण मतदारसंघात रा. स्व. संघाचे प्राबल्य आहे. हा मतदारसंघ भाजपच्या राम कापसे यांचा. मात्र आनंद दिघे यांच्या दांडगाईने तो मतदारसंघ प्रमोद महाजन यांनी तत्कालीन शिवसेनेला दिला.ठाणे आणि कल्याण दोन्ही आमच्याच आहेत, असा मुख्यमंत्री एकनाथ शिंदे यांचा दावा आहे. या दोन्ही जागा आम्ही सोडणार नाही, अशी शिंदे यांची भूमिका आहे. त्यामुळे भाजप आणि शिंदे गटातील तणावाचा हा कळीचा मुद्दा ठरला आहे.ठाणे मतदारसंघ शिवसेनेने घ्यावा अशी भाजपची इच्छा आहे. येथे सध्या ठाकरे यांच्या शिवसेनेचे राजन विचारे खासदार आहेत, तर कल्याणमधून खासदार असलेले मुख्यमंत्री एकनाथ शिंदे यांचे पुत्र श्रीकांत यांनी ठाण्यातून लढावे असा भाजपचा पर्याय आहे.

शरद पवारांना ‘तुमचा देखील दाभोलकर करू’ अशी धमकी देणारा सौरभ पिंपळकर भाजपचा कार्यकर्ता असल्याचे समोर येते आहे. त्याचे भाजप नेत्यांसोबतचे फोटोही समोर येत आहेत . यातला एक फोटो पोस्ट करून बावनकुळेजी हे रक्त नेमकं कुणाचं? असा सवाल करत आमदार अमोल मिटकरी यांनी भाजपवर वार केला आहे.भाजप प्रदेशाध्यक्ष चंद्रशेखर बावनकुळे यांनी ‘धमकी देणे हे आमच्या रक्तात नाही,’ असे म्हणत सकाळी राष्ट्रवादी काँग्रेसचे आरोप खोडून काढले होते. हाच धागा पकडून अमोल मिटकरी यांनी हा सवाल केला आहे.

राष्ट्रवादी काँग्रेसचे अध्यक्ष शरद पवार यांना ट्विटरवरून ‘तुमचा देखील दाभोलकर करू’ अशी धमकी मिळाली. या प्रकरणी खासदार सुप्रिया सुळे यांनी मुंबईच्या पोलिस आयुक्तांची भेट घेत तक्रार दिली. त्यानंतर मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी तपास करून कारवाईच्या सूचना पोलिसांना दिल्या. तर ‘मी धमकीची मी चिंता करीत नाही. कायदा आणि सुव्यवस्था सांभाळायची जबाबदारी सरकारची आहे. ज्यांच्या हातात सूत्र त्यांना जबाबदारी टाळता येणार नाही. त्यांनी यासंबंधी जबाबदारी घ्यावी,’ असे म्हणत सुरक्षेचा चेंडू शरद पवारांनी गृहमंत्री देवेंद्र फडणवीस यांच्या कोर्टात टाकला आहे.

शरद पवारांच्या धमकी प्रकरणावरून राष्ट्रवादी आणि भाजपमध्ये कलगीतुरा रंगला. चंद्रशेखर बावनकुळे यांनी ‘धमकी देणे हे आमच्या रक्तात नाही. ज्याने कोणी धमकी दिली असेल, त्याच्यावर कठोर कारवाई झाली पाहिजे. तो राष्ट्रवादीचा असो, भाजपचा असो किंवा काँग्रेसचा असो, त्याच्यावर कारवाई व्हायला हवी,’ अशी मागणी केली. मात्र, हा धमकी देणारा सौरभ पिंपळकर भाजपचा कार्यकर्ता असल्याचे समोर आले आहे. तो अमरावतीचा राहणार असल्याचे समजते.

दुसरीकडे शरद पवारांना धमकी देणाऱ्या सौरभ पिंपळकरच्या ट्विटर हॅंडलवर मी भाजपचा कार्यकर्ता आहे. मी धर्मनिरपक्षतेचा तिरस्कार करतो, असा उल्लेख असल्याचे समोर आले आहे. तसेच त्याचे भाजप नेत्यांसोबतचे फोटो समोर आलेत. त्यात एका फोटोत तो केंद्रीय मंत्री रावसाहेब दानवे यांच्यासोबत तर दुसऱ्या फोटोमध्ये भाजप प्रदेशाध्यक्ष चंद्रशेखर बावनकुळे यांच्यासोबत तो दिसतो आहे. हाच फोटो पोस्ट करून मिटकरींनी चंद्रशेखर बावनकुळे यांना जोरदार उत्तर दिले आहे.

अमोल मिटकरी आपल्या पोस्टमध्ये म्हणतात, हे आमच्या रक्तात नाही म्हणणारे बावनकुळेजी हे रक्त नेमकं कुणाचं आहे? पवार साहेबांना धमकी देणारा पिंपळकर तुमच्या बाजूला केक कापतोय , ‘राजकारण महाराष्ट्राचे’ ‘नर्मदाबाई पटवर्धन’ सौरभ पिंपळकर हे ट्विटर अकाउंट कुणाच्या रक्ताचे? असा सवाल त्यांनी केला असून, करारा जवाब मिलेगा, असे उत्तरही दिले आहे.

मास्टरमाईंड शोधा- डॉ. दाभोळकरांची हत्या करणाऱ्या शक्ती राज्यात पुन्हा सक्रिय झाल्या आहेत, ही बाब अधिक चिंताजनक

अजित पवार यांनीही एक पोस्ट केली आहे. त्यात ते म्हणतात की, पवार साहेबांना सोशल मीडियावर ‘तुमचा लवकरंच दाभोळकर होणार…’ अशी देण्यात आलेली धमकी, हे गंभीर प्रकरण आहे. केंद्र आणि राज्य सरकारने या धमकीची गांभीर्यानं दखल घेऊन आरोपींना तातडीने गजाआड करावे. धमकी मागचा खरा मास्टरमाईंड शोधावा. अशा विचारांच्या समाजविघातक शक्तींना वेळीच रोखावे, हेच राज्याच्या हिताचे असेल.अजित पवार पुढे म्हणतात की, पवार साहेबांचे संरक्षण करण्यास महाराष्ट्रातील जनता समर्थ आहे. परंतु डॉ. दाभोळकरांची हत्या करणाऱ्या शक्ती राज्यात पुन्हा सक्रिय झाल्या आहेत, ही बाब अधिक चिंताजनक आहे. निवडणुका जवळ येऊ लागल्यानं यापुढे जात, धर्म, पंथ, प्रांत, भाषावादाचे असे मुद्दे उपस्थित करुन समाजात द्वेष निर्माण करण्याचे, दुही माजवण्याचे, मतांच्या ध्रुवीकरणाचे प्रयत्न होतील. ते हाणून पाडले जातील. देशातील जनता आता सावध आहे. समाजात द्वेष निर्माण करणाऱ्यांच्या भूलथापांना भुलणार नाही. कुणाच्याही कटकारस्थानांना बळी पडणार नाही.