पुणे: पुण्याचे अतिरिक्त विभागीय आयुक्त अनिल रामोड यांना आठ लाख रुपयांची लाच स्वीकारताना केंद्रीय गुन्हे अन्वेषण विभागाने पकडले. रामोड यांचे कार्यालय, क्विन्स गार्डन येथील सरकारी निवासस्थान आणि बाणेर येथील ‘ऋतुपर्ण’ सोसायटी या खाजगी निवासस्थानी छापे टाकण्यात आले असून, या ठिकाणी तीन ते चार कोटी रुपयांची रक्कम आढळली असून, पैसे मोजण्याची मशिनच पोलीस अधिकाऱ्यांनी मागविली आहे.रामोड हे मुळचे नांदेड येथील असून, गेल्या दोन वर्षांपासून ते पुण्यात अरिरिक्त विभागीय आयुक्त या पदावर काम पहात आहेत. महामार्गावरील भूसंपादनाचा मोबदला शेतकऱ्यांना देण्यासाठी त्यांनी पैशाची मागणी केली होती. ती रक्कम स्वीकारताना त्यांना रंगेहाथ पकडण्यात आले.

दुपारी सीबीआयने रामोड यांचे कार्यालय, क्विन्स गार्डन येथील सरकारी निवासस्थान आणि बाणेर येथील ‘ऋतुपर्ण’ सोसायटी या खाजगी निवासस्थानीही छापा टाकला आहे. अधिकाऱ्यांनी याठिकाणी पैसे मोजण्याच्या दोन मशीन्स मागवून घेतल्या आहेत.रामोड यांच्याविषयी मागील काही दिवसांपासून तक्रारी कानावरती येत होत्या. या तक्रारींची शहानिशा करुन सीबीआयने रामोड यांच्याभोवती सापळा लावला होता. आज लाच स्वीकारताना अखेर सीबीआयने रामोड यांना अटक केली. रामोड हे मुळचे नांदेडचे असून मागील 2 वर्षांपासून ते पुण्यात अतिरिक्त विभागीय आयुक्त आहेत.

पुणे, दि. ९ : सार्वजनिक बांधकाम मंत्री रवींद्र चव्हाण यांनी सासवड जेजुरी येथील पालखी मार्गाची आणि कऱ्हा नदीवरील नवीन पुलाच्या बांधकामाची आज पाहणी केली. श्री संत ज्ञानेश्वर महाराज यांच्या पालखी मार्गावरील रस्त्याचे कामे जलदगतीने पूर्ण करावीत, असे निर्देश त्यांनी दिले.

यावेळी आमदार संजय जगताप, , पुणे प्रादेशिक विभागाचे मुख्य अभियंता अतुल चव्हाण, उपविभागीय अधिकारी मिनाज मुल्ला, राष्ट्रीय महामार्ग प्रधिकरणाचे संजय कदम, पुरंदरचे प्रभारी तहसिलदार मिलिंद घाडगे, दक्षिण विभागाचे कार्यकारी अभियंता अमोल पवार आदी उपस्थित होते.

श्री.चव्हाण यांनी यांनी दिवे घाटमाथ्यावरील पालखी विसावा, झेंडेवाडी ग्रामपचायतीने वारकऱ्यांसाठी उभारण्यात आलेला हिरकणी कक्ष, सासवड येथील कऱ्हा नदीवरील नवीन बांधण्यात आलेला पुल आणि जेजुरी येथील पालखी मुक्काम स्थळाची पाहणी केली. ते म्हणाले, पालखी सोहळ्यात वारकऱ्यांचा प्रवास सुखकर व्हावा यादृष्टीने सार्वजनिक बांधकाम विभागाची महत्वाची जबाबदारी आहे. सार्वजनिक विभागाच्यावतीने पालखी मार्गावरील रस्त्याच्या कामासह वारकऱ्यांना विश्रांतीसाठी सुविधा उपलब्ध कराव्यात.

पालखी मार्गावरील रस्त्यांची अर्धवट राहिलेली कामे पूर्ण करावीत. रस्त्याच्या साईड पट्ट्या, रस्ता रुंदीकरण, रस्ता डांबरीकरण, आवश्यक ठिकाणी मुरूम भरणे, अतिक्रमण काढणे इत्यादी कामे राष्ट्रीय महामार्ग प्रधिकरणाने आणि बांधकाम विभागाने वेळेत पूर्ण करावीत. पुलाच्या जोडरस्त्याच्या भूसंपादनासाठी निधी उपलब्ध करुन देण्यात आला आहे. रस्त्याच्या कामासाठीची आवश्यक प्रक्रिया पूर्ण करावी. उन्हाची तीव्रता अधिक असल्याने भाविकांना कोणत्याही प्रकारचा त्रास होणार नाही यासाठी दक्षता घेवून पालखी सोहळ्याचे उत्तम नियोजन करावे, अशा सूचनाही त्यांनी यावेळी दिल्या.

सासवड मधील बोरकर कुटुंबीयांनी पुलाच्या जोड रस्त्यासाठी जमीन देवून सहकार्य केल्याने मंत्री श्री. चव्हाण यांनी त्यांना धन्यवाद दिले.

यावेळी मुख्य अभियंता चव्हाण आणि कार्यकारी अभियंता पवार यांनी पालखी मार्गावरील सुरू असलेल्या रस्त्यांच्या कामांची माहिती दिली.

पुणे दि. ९ : पुणे शहरात इतर मागास प्रवर्ग, विमुक्त जाती, भटक्या जमाती व विशेष मागास प्रवर्गातील १०० मुले व १०० मुलींच्या वसतिगृहासाठी दोन इमारती भाड्याने घेण्यात येणार असून त्यासाठी खासगी इमारत भाड्याने देऊ इच्छिणाऱ्या इमारत मालकांना संपर्क साधण्याचे आवाहन करण्यात आले आहे.

जिल्ह्याच्या ठिकाणी मुलांसाठी व मुलींसाठी प्रत्येकी एक वसतिगृह सुरू केले जाणार आहे. इच्छुकांनी पाचशे रूपयाच्या बंधपत्रावर मालकाचे इमारत भाड्याने देण्याबाबत संमतीपत्र, इमारतीचा तपशील, खोल्या, स्वच्छतागृह, विजेची व्यवस्था, पाण्याची व्यवस्था आदी बाबी नमूद कराव्यात.

इच्छुकांनी सहायक आयुक्त समाजकल्याण, डॉ. बाबासाहेब आंबेडकर सामाजिक न्याय भवन सर्व्हेक्षण क्रमांक १०४/१०५, विश्रांतवाडी पोलीस ठाण्यासमोर समोर, येरवडा, पुणे-६ (दूरध्वनी ०२०-२९७०६६११) येथे संपर्क साधावा, असे आवाहन समाज कल्याणचे सहायक आयुक्त कैलास आढे यांनी केले आहे.

पुणे, दि. ९ जून २०२३: जगदगुरू संत तुकाराम महाराज व संतश्रेष्ठ ज्ञानेश्वर माऊली यांच्या पालखी सोहळ्यांसाठी महावितरणकडून पुणे परिमंडल अंतर्गत वीजयंत्रणेच्या देखभाल व दुरूस्तीचे कामे करून यंत्रणा सज्ज ठेवण्यात आली आहे. तसेच संबंधित विभागांच्या कार्यक्षेत्रात २४ तास कार्यरत राहणार्‍या ३० अभियंता व १३५ कर्मचाऱ्यांची विशेष नियुक्ती करण्यात आली आहे. यासह मागणीप्रमाणे तात्पुरती वीज जोडणी देखील तात्काळ उपलब्ध होणार आहे.

आषाढी यात्रेनिमित्त पुणे परिमंडल अंतर्गत भोसरी, पिंपरी, रास्तापेठ, राजगुरुनगर व मुळशी विभागांच्या कार्यक्षेत्रात जगदगुरू संत तुकाराम महाराज व संतश्रेष्ठ ज्ञानेश्वर माऊली यांचा पालखी सोहळा रविवारी (दि. ११) ते बुधवार (दि. १४) पर्यंत होणार आहे. या विभागांमध्ये विविध ठिकाणच्या पालखी मार्गावर व मुक्कामाच्या ठिकाणी अतिरिक्त स्वरुपात रोहित्रे व इतर साधनसामग्री तयार ठेवण्यात आली आहे. वीज सुरक्षेसाठी विशेष उपाययोजना करण्यात आली आहे. आवश्यक ठिकाणी मोबाईल ट्रॉन्सफॉर्मरद्वारे वीजपुरवठा करण्यात येणार आहे. सोबतच सामाजिक बांधिलकी म्हणून महावितरणचे अभियंता व कर्मचाऱ्यांकडून पिण्याचे पाणी, फळ, अल्पोपाहार आदींची सेवा देण्यात येणार आहे.

पुणे परिमंडल अंतर्गत संपूर्ण पालखी सोहळा मार्गावर तसेच मुक्कामाच्या ठिकाणी व परिसरातील वीज यंत्रणेच्या देखभाल व दुरुस्तीची कामे करण्यात आली आहे. उपरी वीजवाहिन्या भूमिगत करणे, अर्थिंग, उच्चदाब व लघुदाब वाहिन्यांची तसेच रोहित्रांसह कुंपणाची देखभाल व दुरुस्तीची कामे, फिडर पिलर्सची दुरुस्ती, डिस्क इन्सूलेटर बदलणे, झोल पडलेल्या तारा ओढणे, तारांना स्पेसर्स लावणे, वाकलेले खांब सरळ करणे, गंजलेले वीजखांब बदलणे आदी कामे करण्यात आली. पालखी सोहळ्याच्या कालावधीत मुख्य अभियंता श्री. राजेंद्र पवार यांच्यासह संबधित विभागाचे कार्यकारी अभियंता, अधीक्षक अभियंता विविध भेटी देणार आहेत.

पालखी मार्गावर किंवा मुक्कामाच्या दरम्यान कोणत्याही व्यक्तीने सार्वजनिक ठिकाणी असलेल्या वीजयंत्रणेपासून सावध व सतर्क राहावे असे आवाहन करण्यात आले आहे. सध्या मान्सूनपूर्व पाऊस पडत आहे तसेच उन्हाळा देखील तापलेला आहे. त्यामुळे वीजखांब, फिडर पिलर, डीपी बॉक्स किंवा अन्य ठिकाणच्या वीजयंत्रणेपासून सुरक्षित अंतर ठेवावे. पालखी सोहळा मार्ग व मुक्कामाच्या ठिकाणी पुणे परिमंडल अंतर्गत अभियंता व कर्मचार्‍यांची नियुक्ती करण्यात आली असून ते २४x७ वीज सेवा देणार आहेत. वीजविषयक कोणतीही तक्रार असल्यास २४ तास सुरु असलेल्या १९१२ / १८००२१२३४३५ किंवा १८००२३३३४३५ या टोल फ्री क्रमांकावर संपर्क साधावा असे आवाहन महावितरणने केले आहे.

राजेंद्र पवार, मुख्य अभियंता, पुणे परिमंडल– पालखी सोहळ्याच्या कालावधीत अभियंता व कर्मचाऱ्यांना सुरळीत वीजपुरवठ्यासह भाविकांच्या वीजसुरक्षेबाबत संपूर्ण खबरदारी घेण्यात येईल. वीजपुरवठ्याची पर्यायी व्यवस्था तयार ठेवण्यात आली आहे. तसेच भाविकांनी किंवा स्वयंसेवकांनी वीज सेवेबाबत काही अडचणी असल्यास संबंधित अभियंता/ कर्मचारी किंवा महावितरणच्या टोल फ्री क्रमांकावर संपर्क साधावा. त्यांच्या तक्रारींचे तातडीने निराकरण करण्यात येईल.

पुणे, दि. ९ जून २०२३: तापलेल्या उन्हामुळे विजेची मागणी वाढल्यामुळे महापारेषण कंपनीची २२० केव्ही उर्से ते चिंचवड अतिउच्चदाब वीजवाहिनी अतिभारित (ओव्हरलोड) होण्याचा धोका असल्याने वाकड, बाणेर, बालेवाडी, हिंजवडी, पिंपळे सौदागर, बावधन, निगडी आदी परिसरात शुक्रवारी (दि. ९) सकाळी पावणे दहापासून दुपारी २ वाजेपर्यंत अर्धा ते दीड तासांपर्यंत चक्राकार पद्धतीने विजेचे भारनियमन करण्यात आले.

याबाबत माहिती अशी की, महापारेषणच्या २२० केव्ही उर्से ते चिंचवड अतिउच्चदाब वीजवाहिनीद्वारे चिंचवड २२० केव्ही उपकेंद्राला वीजपुरवठा केला जातो. तथापि तापलेल्या उन्हामुळे विजेची मागणी मोठ्या प्रमाणात वाढली आहे. त्यामुळे या वीजवाहिनीच्या ७५० ॲम्पीअरपेक्षा अधिक वीज भार (लोड) वाढत असल्याने सुमारे ५० ते ६० मेगावॅट विजेचे भारनियमन आवश्यक झाले. त्यामुळे महापारेषणच्या २२० केव्ही चिंचवड व हिंजवडी आणि १३२ केव्ही रहाटणी व एनसीएल या अतिउच्चदाब उपकेंद्राद्वारे विजेचे भारनियमन करण्यास कळविण्यात आले.

त्याप्रमाणे या अतिउच्चदाब उपकेंद्रांशी संलग्न महावितरणच्या वीजवाहिन्यांवर सकाळी पावणे दहापासून अर्धा ते दीड तासांपर्यंत विजेचे चक्राकार पद्धतीने भारनियमन करावे लागले. यामध्ये हिंजवडी परिसर, वाकड, ताथवडे, थेरगाव, चिंचवड, पिंपळे सौदागर, सांगवी, पिंपळ निलख, पुनावळे, बालेवाडी, बाणेर, बावधन, निगडीया परिसराचा समावेश होता. दुपारी दोन वाजताच्या सुमारास उर्से ते चिंचवड अतिउच्चदाब वीजवाहिनीवरील वीजभार कमी झाल्यानंतर या सर्व भागातील विजेचे भारनियमन मागे घेण्यात आले.

पुणे – संतश्रेष्ठ ज्ञानेश्वर माऊली आणि जगद्गुरु तुकोबाराय यांच्या पालख्यांची मार्गक्रमणा सुकर व्हावी याकरिता आमदार सिद्धार्थ शिरोळे यांनी पोलीस आणि महापालिका अधिकाऱ्यांसमवेत पालखी मार्गाची आज (शुक्रवारी) पाहणी केली.

या पाहणीत सर्व व्यवस्थेचा आढावा घेण्यात आला. जुन्या पुणे–मुंबई महामार्गावर रस्ता रुंदीकरणामुळे रस्ता बराच खराब झालेला असून, हा रस्ता पालखी येण्यापूर्वी दोन दिवसात व्यवस्थित केला जाईल. तसेच वारकऱ्यांना कोणतीही अडचण निर्माण होणार नाही, यासाठी संबंधित अधिकाऱ्यांना आवश्यक त्या सूचना आमदार शिरोळे यांनी दिल्या.

या पाहणी दौऱ्यात प्रकाशभाऊ ढोरे, आनंद छाजेड, सचिन वाडेकर, धर्मेश शहा, सुनिताताई वाडेकर, परशुराम वाडेकर, अनिल भिसे, अजित पवार, सुभाष पाडळे, रोहित भिसे, राजू पिल्ले, अनिकेत भिसे, पोलीस अधिकारी, वाहतूक विभागाचे अधिकारी, पुणे महानगरपालिकेचे अधिकारी, औंध क्षेत्रीय कार्यालयाचे वार्ड ऑफिसर व अधिकारी आदि उपस्थित होते.