सकाळी नऊचा भोंगा महिनाभरात बंद करा यासाठी दिली महिनाभराची मुदत
मुंबई- खासदार संजय राऊत आणि त्यांचे बंधू सुनील राऊत यांना धमकीचा फोन आल्याची तक्रार त्यांनी पोलिसांकडे केली आहे. संजय राऊत आणि सुनील राऊत या दोघांनाही अशा प्रकारची धमकी देण्यात आली आहे. धमकी देणारा फोन कॉल आला असल्याची माहिती संजय राऊत यांचे बंधू सुनील राऊत त्यांनी पोलिसांना दिली.या संबंधी देण्यात आलेल्या माहितीनुसार संजय राऊत यांनी सकाळी 9 वाजेचा भोंगा बंद करावा, त्यासाठी एक महिन्याचा वेळ देत असल्याचे या फोनवर सांगण्यात आले आहे. हा धमकीवजा फोन सुनील राऊत यांच्या फोनवर आला असून संबंधित व्यक्ती हिंदी भाषेत बोलत असल्याची माहिती त्यांनी दिली. यामध्ये संबंधित व्यक्ती वारंवार सकाळी नऊ वाजेचा भोंगा बंद करा, अशा इशारा देत होता, अशी माहिती त्यांनी पोलिसांना दिली आहे.
ज्याने धमकी दिली त्यालाच पोलिसांनी दिले संरक्षण ….
पोलिसांना कळवून सुद्धा ते धमकी देणाऱ्याला संरक्षण देतात, अशा शब्दात संजय राऊत यांनी त्यांना आलेल्या धमकीवर प्रतिक्रिया दिली आहे. मला वारंवार धमक्या येत आहेत. या बाबत मी चार वेळा गृहमंत्र्यांना कळवले आहे. एका गुंडाचे फोटो काही दिवसांपूर्वी मुख्यमंत्री आणि त्यांच्या चिरंजीवासोबत पाहिले होते. त्याने माझ्यावर हल्ल्या करण्याचा कट रचला होता, त्याचे पुरावे देखील मी मुख्यमंत्र्यांकडे पाठवले. पण काही दिवसांनी मला कळाले की, मी पाठवलेल्या पुराव्याबाबत काहीच कारवाई झाली नाही. पण त्या गुंडाला पोलिस संरक्षण दिले गेले आहे, असा आरोप खासदार संजय राऊत यांनी केला आहे.