श्री महालक्ष्मी मंदिर सारसबागेच्यावतीने आयोजन ; घनश्यामाचार्याजी महाराज यांची उपस्थिती
पुणे : कुर्यात बटो मंगलम्… चे स्वर आणि मंत्रोच्चारांच्या उद््घोषाच्या साक्षीने सारसबागेसमोरील श्री महालक्ष्मी मंदिरात यज्ञोपवीत उपनगर संस्कार पार पडले. तब्बल २० हून अधिक मुले व युवकांवर मंत्रपठण, याग, पूजन अशा पारंपरिक विधींनी उपनयन संस्कार करण्यात आले. अनंत श्री विभुषित जगद््गुरु रामानुजाचार्य झालरीया पीठाधीपती पूज्य श्री श्री १००८ स्वामीजी श्री घनश्यामाचार्याजी महाराज यांच्या प्रमुख उपस्थितीत हा आध्यात्मिक कार्यक्रम संपन्न झाला. 
श्री महालक्ष्मी मंदिर सारसबाग, श्री बन्सीलाल रामनाथ अग्रवाल धार्मिक व सांस्कृतिक ट्रस्ट च्यावतीने यज्ञोपवीत उपनगर संस्कार या आध्यात्मिक कार्यक्रमाचे आयोजन करण्यात आले होते. यावेळी ट्रस्टच्या प्रमुख विश्वस्त अमिता अग्रवाल, संस्थापक विश्वस्त राजकुमार अग्रवाल, भरत अग्रवाल, तृप्ती अग्रवाल, हेमंत अर्नाळकर, अ‍ॅड.प्रताप परदेशी यांसह पदाधिकारी व भाविक मोठया संख्येने उपस्थित होते. वेदमूर्ती मिलिंद राहुरकर गुरुजी यांनी पौरोहित्य केले. 
घनश्यामाचार्याजी महाराज म्हणाले, परमेश्वर आणि ज्ञान यांच्या जवळ जाण्याकरिता हा संस्कार आवश्यक आहे. गायत्री मंत्रापासून हा संस्कार सुरु होतो. गायत्री मंत्रामध्ये तीन चरण आणि २४ अक्षरे असतात. उपनयन संस्कार झालेल्यांनी ६४ कला आणि ३२ विद्या शिकण्याचा प्रयत्न करायला हवा, अशी धारणा आहे. बदलत्या जीवनशैलीमध्ये या संस्काराच्या वयोमर्यादेच्या कालावधीमध्ये देखील बदल झाले आहेत. मात्र, लहान वयातचा मुलांवर हा संस्कार होणे अत्यंत आवश्यक आहे.

मिळकतकर वेळेत भरा अन्‌ थेट ‘कार’ जिंका ! पुणे पालिकेची बक्षीस योजना.. ई-बाइक, मोबाइल जिंकण्याची संधी

पुणे -मिळकतकराचे उत्पन्न वाढविण्यासह प्रामाणिक करदात्यांना भेट म्हणून महापालिका या वर्षीपासून लकी ड्रॉ काढणार आहे. त्यात दि.15 मे ते 31 जुलै या कालावधीत कर भरणाऱ्यांना तब्बल 5 कार, 15 ई-बाइक आणि मोबाइल यांसह 10 लॅपटॉप बक्षीस म्हणून देण्यात येणार आहेत.

या लकी ड्रॉमध्ये निवासी, बिगर निवासी तसेच रिकाम्या जागा असलेल्या मिळकतधारकांना समाविष्ट केले जाणार आहे. ऑगस्टमध्ये हा लकी ड्रॉ काढला जाणार आहे.

महापालिकेकडे नोंदणी असलेल्या सुमारे साडेबारा लाख मिळकतींपैकी सुमारे आठ लाख मिळकतकतधारकच नियमित कर भरतात. महापालिकेच्या मिळकतकराचे उत्पन्न मागील वर्षी सुमारे 2 हजार कोटींवर गेले आहे. त्याचवेळी थकबाकीही दहा हजार कोटींच्या घरात आहे. त्यामुळे मिळकतकर उत्पन्न वाढविण्यासाठी पालिका विविध उपाययोजना करत आहे. दरम्यान, नियमित कर भरणाऱ्यांसाठी आयुक्तांनी 2022-23 च्या अंदाजपत्रकात बक्षीस योजना जाहीर केली होती. या योजनेचे स्वरूप अखेर जाहीर करण्यात आले. याद्वारे जवळपास 40 मिळकतधारकांना कोटीभर रुपयांची बक्षिसे दिली जाणार आहेत. मात्र, 31 जुलैपूर्वी कर भरलेले नागरिकच योजनेसाठी पात्र असतील.

कर रक्‍कम (रुपयांत) आणि बक्षीस
1 लाखांपुढे : 1 कार, 3 ई-बाइक, 3 मोबाइल, 2 लॅपटॉप
50 हजार ते 1 लाख – 1 कार, 3 ई-बाइक, 3 मोबाइल, 2 लॅपटॉप
25 हजार ते 50 हजार- 1 कार, 3 ई-बाइक, 3 मोबाइल, 2 लॅपटॉप
25 हजार किंवा त्यापेक्षा कमी – 2 कार, 6 ई-बाइक, 6 मोबाइल,
4 लॅपटॉप

प्रोत्साहन योजना
मिळकतकर हा महापालिकेच्या उत्पन्नाचा सर्वाधिक मोठा स्रोत आहे. आधी जकात आणि एलबीटी बंद केल्यानंतर महापालिकेस या उत्पन्नाची प्रतिपूर्ती म्हणून शासनाकडून एक निश्‍चित उत्पन्न दिले जाते. पण, त्यासाठी शासनाच्या निर्णयावर अवलंबून राहावे लागते. परिणामी, महापालिकेने मिळकतकर वसुली वाढविण्याचा निर्णय घेतला आहे. त्यासाठी अशा प्रोत्साहन योजना राबविण्यात येत आहेत.

२४ तास पाणीपुरवठा योजनेचे तीन तेरा ….

आठवड्यातून एक दिवस बंद ची घोषणा मात्र पुरवठ्यावर २ दिवस परिणाम

पुणे – महापालिकेकडून शहरात 18 मे पासून आठवडयातून एक दिवस पाणी बंद ठेवण्यात येत आहे. मात्र, या पाणीबंद नंतर शहरातील काही भागात पुढे दोन ते तीन दिवस पाणी अतिशय कमी दाबाने तसेच कमी येत असल्याने महापालिकेकडून दोन आठवडयांपूर्वी सिंहगड रस्ता आणि कात्रज भागातील पाण्याचे नियोजनात बदल केला होता.

त्यानंतर आता खराडी- चंदननगर भागाच्या पाण्याच्या नियोजनात बदल करण्यात आला असून येत्या शनिवार ( दि. 10 ) पासून प्रभाग क्रमांक 4 मध्ये काही भागात दिवसाआड पाणी पुरवठा करण्यात येणार आहे. त्यामुळे या भागातील नागरिकांनी सहकार्य करण्याचे आवाहन महापालिका प्रशासनाकडून करण्यात आले आहे.

एक दिवसआड पाणीपुरवठा होणारा भाग व वेळ
शुक्रवार, रविवार, मंगळवार
सकाळी 9.3 ते दुपारी 2 : चौधरी वस्ती, सातववस्ती, पंढरीनगर, गुलमोहर, शंकरनगर.
दुपारी 1.30 ते सायंकाळी 6. 30 : चंदननगर, श्रीकृष्ण सोसायटी, हनुमान व्यायाम शाळा, मथुरानगर, संघर्ष चौक, शिवाजी पुतळा, दत्तप्रसाद, चव्हाण नगर, त्रिमूर्ती सोसायटी, प्रीत नगर, समता सोसायटी, म्हाडा सोसायटी, नागपाल रोड.

शनिवार, सोमवार, बुधवार
सकाळी 9.30 ते दुपारी 2 : गणपती सोसायटी, तुकारामनगर, बोराटेवस्ती, झेन्सार, थिटे नगर, पाटील बुवानगर
दुपारी 1.30 ते सायंकाळी 6 : बोराटे वस्ती गल्ली नं. 1 ते 23, शंकरनगर, वृंदावन सोसायटी, राघवेंद्रनगर, यशवंतनगर, तुकराम नगर, सितारा बेकरी, साई पार्क, शेजवल पार्क, साईबाबा मंदिर

पुणे – आळंदी परिसरातून वाहणारी इंद्रायणी नदी हा सर्वांच्या आस्थेचा, प्रथा, परंपरा, श्रद्धेचा विषय असून, नदीमध्ये प्रदूषित सांडपाणी येऊ नये, यासाठी पिंपरी चिंचवड महापालिका, नगरपरिषदा, ग्रामपंचायत हद्दीतील गावांमधील दैनंदिन वापराचे ६० ते ६५ एमएलडी पाणी कुठलीही प्रक्रिया न करता दूषित पाणी थेट इंद्रायणी नदीत सोडले जात आहे. तसेच या परिसरातील औद्योगिक वसाहती आणि काही लघु, माध्यम कारखाने नदीत थेट सांडपाणी सोडत असल्याचे निदर्शनास येत आहे. आषाढी वारी पालखी सोहळा अवघ्या काही दिवसांवर येऊन ठेपला आहे. ऐन वारीच्या तोंडावर आळंदीत येणाऱ्या वारकऱ्यांच्या, भाविकांच्या जीवाशी खेळ होण्याची शक्यता नाकारता येत नाही. त्यामुळे संबंधित कंपन्या सहकारी सोसायट्या, स्थानिक स्वराज्य संस्थांचे बेजवाबदार अधिकारी, औद्योगिक वसाहतींवर गुन्हे दाखल करण्याची मागणी शिवसेनेच्या वतीने करण्यात आली आहे.  लवकरात लवकर यावर कारवाई न झाल्यास शिवसेना स्टाईलने आंदोलन केले जाणार असल्याचे निवेदन महाराष्ट्र प्रदूषण नियंत्रण मंडळच्या पुणे विभाग प्रादेशिक अधिकारी यांना देण्यात आले. यावेळी शहर प्रमुख संजय मोरे, प्रसिद्धी प्रमुख अनंत घरत, युवा सेनेचे युवराज पारीख, विभागप्रमुख राजेश मोरे, शिवाजीनगर विभाग संघटक अतुल दिघे, शाखाप्रमुख राजेश शेलार, राजा गांजेकर, अभिषेक जगताप  उपस्थित होते.

अनंत घरत म्हणाले की, इंद्रायणीतील केमिकलसह सांडपाणी मिश्रीत पाणी वारकऱ्यांना तीर्थ म्हणून प्यावं लागत आहे हे आमच्यासाठी धार्मिक भावना दुखावल्या इतकेच धक्कादायक आहे. आषाढी वारीच्यावेळी राज्यभरातील चार ते पाच दिवस लाखो भाविकांना याच पाण्यात आंघोळ करावी लागते. शिवाय काही ठराविक वेळेला संत ज्ञानेश्वर महाराज यांच्या समाधीला मुखवट्याला देखील इंद्रायणीच्या पाण्याने अभिषेक केला जातो. प्रदूषित पाण्यामुळे भाविकांच्या भावना दुखावल्या जात आहेत. भाविकांच्या आरोग्याशी खेळ होत आहे. प्रशासनाकडून देखील याकडे लक्ष दिलं जात नसल्याचं पाहायला मिळतं. त्यामुळे अलंकापुरी जणू इंद्रायणीला काळ्या पाण्याची शिक्षा मिळाली आहे. त्यामुळे वेळेप्रसंगी अधिकाऱ्यांना त्यांच्या कर्तव्याची जाणीव करून देण्यासाठी तुकाराम महाराजांच्या अभंगाच्या उक्तीप्रमाणे “नाठाळाच्या माथी हाणू काठी” चा वापर करावा लागेल असे घरत म्हणाले.

पुणे- पुणे लोकसभा निवडणूक प्रमुख पदावर माजी महापौर मुरलीधर मोहोळ यांची तर पुणे महापालिका निवडणूक प्रमुख पदावर राजेश पांडे यांची भाजपचे प्रदेश अध्यक्ष चंद्रशेखर बावनकुळे यांनी नियुक्ती केल्याने आज भाजप सह एकूणच राजकीय वातावरण पुण्यातील आगामी निवडणुकीच्या चर्चेने ढवळून निघाले आहे. भाजप प्रदेशाध्यक्ष चंद्रशेखर बावनकुळे यांनी 48 मतदार संघासाठी निवडणूक प्रभारी जाहीर केले आहेत. येत्या लोकसभेसाठी पुणे आणि पुणे जिल्ह्यावर भाजपनं विशेष लक्ष केंद्रीत केले आहे.

महाराष्ट्रातील सर्व 48 लोकसभा मतदारसंघ आणि 288 विधानसभा मतदारसंघांच्या निवडणूक प्रमुखांच्या नियुक्त्या आज भाजपा प्रदेशाध्यक्ष चंद्रशेखर बावनकुळे यांनी केल्या.सर्व लोकसभा आणि विधानसभा निवडणूक प्रमुख यांना त्यांचा अनुभव आणि संघटन कौशल्याच्या बळावर 2024 च्या लोकसभा व विधानसभा निवडणुकीत भाजपा-शिवसेना युतीला प्रचंड विजय मिळवून देण्याची जबाबदारी या द्वारे त्यांच्यावर सोपविण्यात आली आहे.

दरम्यान, जी 20 परिषदेनंतर राजेश पांडे यांच्यावर आता पुणे महापालिका निवडणुकीची मोठी जबाबदारी देण्यात आलीय. निवडणूक प्रमुखपदी निवड झाल्यानंतर पुणे महापालिकेत पुन्हा एकदा विजय खेचून आणण्याची जबाबदारी आपण पार पाडाल, असा विश्वास व्यक्त बावनकुळेंनी व्यक्त केला आहे.

आगामी 2024 च्या लोकसभा निवडणुकांसाठी भाजपनं राष्ट्रवादीचे अध्यक्ष शरद पवार यांच्या बारामती मतदार संघ काबीज करण्यासाठी कंबर कसली असून, या मतदार संघात केंद्रीय अर्थमंत्री निर्मला सीतारामन यांनीदेखील भेट देत निवडणुकांच्या तयारीचा आढावा घेतला आहे. आगामी लोकसभेसाठी पवारांच्या बालेकिल्ल्यात सुरूंग लावण्यासाठी भाजपनं बारामती लोकसभा मतदारसंघाची जबाबदारी पुन्हा राहुल कुल यांच्याकडे दिली आहे. त्यामुळे आता पवारांचा बालेकिल्ला भाजपकडे कसा जाईल यासाठी कुल आता कशी सूत्रं फिरवणार हे पाहणे महत्त्वाचे ठरणार आहे. बारामती लोकसभा मतदार संघात दौंड, बारामती, इंदापूर, पुरंदर, भोर आणि खडकवासला विधानसभा मतदारसंघ येतो. या लोकसभा मतदार संघावर १९९१ पासून पवार कुटुंबियांचे वर्चस्व आहे. या मतदार संघावर भाजपचा झेंडा फडकवण्याची जबाबदारी राहुल कुल यांच्याकडे आली आहे. आता शिरूर लोकसभा मतदारसंघाची जबाबदारी महेश लांडगे यांच्यांकडे दिली आहे.

पश्चिम महाराष्ट्र :लोकसभा निवडणूक प्रमुख

१) पुणे : श्री. मुरलीधर मोहोळ
२) बारामती : श्री. राहुल कुल
३) शिरुर : श्री. महेश लांडगे
४) मावळ : श्री. प्रशांत ठाकूर
५) कोल्हापूर : श्री. धनंजय महाडिक
६) हातकणंगले : श्री. सत्यजीत देशमुख
७) सांगली : श्री. दिपक शिंदे
८) सातारा : श्री. अतुल भोसले
९) सोलापूर : श्री. प्रशांत परिचारक

पक्ष नेतृत्वाने माझ्यावर दाखवलेला विश्वास सार्थ करण्यासाठी पूर्ण क्षमतेने कार्यरत असेल. पार्टीने आजवर दिलेल्या जबाबदाऱ्या यशस्वीपणे पार पाडण्याचा प्रामाणिक प्रयत्न केला. पुणे लोकसभेच्या आगामी निवडणुकीतही भारतीय जनता पार्टी प्रचंड बहुमताने विजयी होईल, हा ठाम विश्वास आहे.आगामी काळात पुणे लोकसभेतील संघटन अधिकाधिक मजबूत करणार आहोत. शिवाय सर्वांना सोबत घेऊन देशाचे नेतृत्व सक्षमपणे पुन्हा करण्यासाठी पंतप्रधान मा.श्री. नरेंद्रजी मोदी यांचे हात बळकट करण्यासाठी आम्ही सज्ज आहोत.

मुरलीधर मोहोळ,
निवडणूक प्रमुख, पुणे लोकसभा

प्रदेश भाजपने पुणे महापालिका निवडणूक प्रमुख म्हणून नियुक्ती केली आहे. उपमुख्यमंत्री देवेंद्र जी फडणवीस, प्रदेश अध्यक्ष चंद्रशेखर बावनकुळे, पालकमंत्री चंद्रकांत दादा पाटील यांच्या शिफारशीनुसार ही निवड झाली आहे. पक्ष नेतृत्वाने टाकलेला विश्वास मी सार्थ ठरवीन. महापालिकेच्या माध्यमातून भाजपने शहरात मोठी विकासकामे केली आहेत. आगामी काळात होणाऱ्या महापालिका निवडणुकीत आम्ही मागील यशाची पुनरावृत्ती करू. त्यासाठी मी सर्वांच्या सहकार्याने प्रयत्न करीन. बूथ रचनेचे सक्षमीकरण, नियोजनबद्ध निवडणूक व्यवस्थापन आणि विकासकामे व योजना नागरिकांपर्यंत पोहोचविण्यासाठी प्रयत्न करू.

राजेश पांडे
प्रदेश उपाध्यक्ष, भाजप, महाराष्ट्र
पुणे महापालिका निवडणूक प्रमुख, भाजपा

विधानसभा मतदार संघासाठी निवडणूक प्रमुखांची घोषणा करण्यात आली त्यामध्ये पुण्यातील नियुक्त्या पुढीलप्रमाणे –

हडपसर – योगेश टिळेकर
पर्वती – जितेंद्र पोळेकर
कसबा – हेमंत रासने
वडगावशेरी – जगदीश मुळीक
शिवाजीनगर – दत्ता खाडे
खडकवासला – सचिन मोरे
पुणे कँटोन्मेंट – अजिंक्य वाळेकर
कोथरूड – पूनित जोशी

पुणे दि. ८ : श्री संत ज्ञानेश्वर महाराज आणि जगदगुरू तुकाराम महाराज यांच्या पालखी सोहळ्यानिमित्त ड्रायव्हिंग प्रशिक्षण आणि संशोधन संस्था (आयडीटीआर), नाशिक फाटा, भोसरी, आळंदी रास्ता कार्यालय व दिवे ब्रेक टेस्ट ट्रॅक येथील कामकाजात बदल करण्यात आल्याचे उप प्रादेशिक परिवहन अधिकारी पुणे यांनी कळवले आहे.

संतश्रेष्ठ श्री ज्ञानेश्वर महाराज यांच्या पालखीचा १२ जुन रोजी दुपारचा मुक्काम प्रादेशिक परिवहन कार्यालयाच्या आळंदी रस्ता येथील चाचणी मैदानावर असल्याने येथे नियमितपणे होणारे वाहन तपासणी व अनुज्ञप्ती चाचणी विषयक कामकाज आणि १२ जून रोजीची पूर्वनियोजित वेळ घेतलेल्या वाहनधारक आणि उमेदवारांची वाहन तपासणी किंवा चाचणी १७ जून रोजी होईल.

संतश्रेष्ठ श्री तुकाराम महाराज यांची पालखी १२ जुन रोजी जुना पुणे-मुंबई रस्ता- नाशिक फाटा या मार्गे पुण्याकडे प्रयाण करणार आहे. या दिवशी ड्रायव्हिंग प्रशिक्षण आणि संशोधन संस्था येथे येण्या-जाण्याचा मार्ग बंद ठेवण्यात आल्याने अनुज्ञप्ती चाचणीसाठी अर्जदारांना आयडीआर येथे पोहोचण्यास गैरसोय निर्माण होऊ शकते. अनुज्ञप्ती चाचणीसाठी ड्रायव्हिंग प्रशिक्षण आणि संशोधन संस्था (आयटीडीआर) येथील १२ जुन रोजी पूर्वनियोजीत वेळ घेतलेल्या उमेदवारांनी अनुज्ञप्ती चाचणीसाठी १७ जुन रोजी उपस्थित रहावे.

संतश्रेष्ठ श्री ज्ञानेश्वर महाराज यांची पालखी १४ जुन रोजी पुणे येथून सासवडकडे प्रयाण करणार आहे. या दिवशी हडपसर-सासवड मार्ग वाहतूकीकरिता बंद ठेवण्यात येणार आहे. वाहनाच्या योग्यता प्रमाणपत्र नुतनीकरणासाठी १४ जुन रोजीची पूर्वनियोजित वेळ घेतलेल्या वाहनांची दिवे ता. पुरंदर येथील ब्रेक टेस्ट ट्रॅकवर तपासणी होऊ शकणार नाही. अशा वाहनधारकांनी त्यांची वाहने १४ जुन पासून पुढील सात दिवासांमध्ये कोणत्याही दिवशी तपासणीसाठी दिवे येथे सादर करावीत.

वाहन तपासणी, अनुज्ञप्ती चाचणी व वाहनाची योग्यता प्रमाणपत्र नुतनीकरण विषयक कामकाजात झालेल्या बदलाची वाहनधारकांनी, उमेदवारांनी नोंद घेवून बदल केलेल्या तारखेला नियोजित ठिकाणी उपस्थित रहावे, असे आवाहनही उप प्रादेशिक परिवहन कार्यालयाने केले आहे.

पुणे, दि. ८: भारत निवडणूक आयोगाच्या निर्देशान्वये १ जानेवारी २०२४ या अर्हता दिनांकावर आधारित छायाचित्र मतदार यादीचा विशेष संक्षिप्त पुनरीक्षण कार्यक्रम घोषित करण्यात आला आहे.

पूर्व पुनरिक्षण उपक्रमांतर्गत १ जून २०२३ ते १६ ऑक्टोबर २०२३ या कालावधीत मतदान केंद्राचे सुसूत्रीकरण, प्रमाणिकरण करणे, दुबार, समान नोंदी, एका पेक्षा अधिक नोंदी, तार्किक त्रुटी दूर करणे, आयोगाच्या मानकानुसार छायाचित्र प्राप्त करून मतदार यादीत सुधारणा, विभाग/भाग यांची आवश्यकतेनुसार सुधारणा व मतदान केंद्रांच्या सीमांच्या पुर्नरचना तयार करून मतदान केंद्राच्या यादीला मान्यता आणि तुलनात्मक फरक शोधून फरक दूर करण्यासाठी कालबद्ध योजना आखण्यात येईल. ३० सप्टेंबर ते १६ ऑक्टोबर २०२३ या कालावधीत १ जानेवारी २०२४ या अर्हता दिनांकावर आधारित पुरवणी व एकत्रित प्रारुप यादी तयार करण्यात येईल.

एकत्रीकृत प्रारुप मतदार यादी १७ ऑक्टोबर २०२३ रोजी प्रसिद्ध करण्यात येणार आहे. दावे व हरकती स्वीकारण्याचा कालावधी १७ ऑक्टोबर ते ३० नोव्हेंबर २०२३ आहे. मुख्य निवडणूक अधिकारी यांनी निश्चित केलेल्या दोन शनिवार आणि रविवारी विशेष मोहिमेअंतर्गत दावे व हरकती स्वीकारण्यात येतील. तर २६ डिसेंबर २०२३ पर्यंत दावे व हरकती निकाली काढले जाणार आहेत. मतदार यादीची अंतिम प्रसिद्धी ५ जानेवारी २०२४ रोजी करण्यात येणार असल्याची माहिती जिल्हाधिकारी तथा जिल्हा निवडणूक अधिकारी डॉ.राजेश देशमुख यांनी दिली आहे.
0000

पाणी बचत विषयातील सर्वात शिक्षण संस्थेचा सर्वात मोठा प्रकल्प

पुणे-डेक्कन एज्युकेशन सोसायटीच्या (डीईएस) फर्ग्युसन रस्त्यावरील ११० एकर कॅम्पसवर पर्जन्यजल पुनर्भरण प्रकल्प (रेनवॉटर हार्वेस्टिंग) राबविण्यात येत असल्याची माहिती संस्थेच्या नियामक मंडळ आणि परिषदेचे अध्यक्ष डॉ. शरद कुंटे यांनी कळविली आहे.

डीईएस आणि कमिन्स इंडिया फाउंडेशन यांच्यात या संदर्भात सामंजस्य करार करण्यात आला. या प्रकल्पासाठी श्री. शिवदुर्ग संवर्धन या स्वयंसेवी संस्थेचे सहाय घेण्यात येणार आहे. डीईएसच्या वतीने डॉ. कुंटे, उपाध्यक्ष डॉ. रवींद्र आचार्य, कार्यवाह प्रा. धनंजय कुलकर्णी, प्रकल्पाचे प्रबंधक सुनील भिडे, कार्यकारी अभियंता नीरज पूर्णपात्रे, कमिन्स इंडियाच्या उद्योगांचे सामाजिक उत्तरदायित्व (सीएसआर) विभागाच्या प्रमुख सौजन्या वेगुरू, पंकज कुलकर्णी, शिवदुर्गचे पंडित अतिवाडकर यांची प्रमुख उपस्थिती होती.

कुंटे म्हणाले, शहराच्या मध्यवर्ती भागात टेकडीसह ११० एकरचा फर्ग्युसन महाविद्यालयाचा परिसर असून, दुर्मीळ वनस्पतींचा समावेश असणारे बोटॅनिकल गार्डन आहे. दरवर्षी सरासरी ८०० मिमि पावसाचा अंदाज धरल्यास या परिसरात ३५ कोटी लीटरहून अधिक पाणी वाहून जाते. या प्रकल्पामुळे या पाण्याचा पुनर्वापर करता येणार आहे. परिसरातील भूगर्भातील पाण्याची पातळी वाढण्यास मदत होणार आहे. माती वाहून जाऊ नये यासाठी गवताची लागवड केली जाणार आहे. त्यानंतर बोटॅनिकल गार्डनसह सर्व परिसरात मोठ्या प्रमाणात वृक्षारोपण केले जाईल. त्यामध्ये आणखी काही दुर्मीळ वृक्षांचा समावेश असेल. शहराच्या मध्यवर्ती भागात मोठ्या स्वरूपात हरित क्षेत्र विकसित झाल्याने शहराचे प्रदूषण आणि तापमान कमी होण्यास मदत होणार आहे. महाविद्यालयात शिकत असलेल्या अकरा हजारहून अधिक विद्यार्थी आणि त्यांच्या माध्यमातून समाजात पर्यावरण, पाण्याची बचत याबाबतची जनजागृती करण्यात येणार आहे. पाणी बचत या विषयात कुठल्याही शैक्षणिक संस्थेने हाती घेतलेला हा मोठा प्रकल्प आहे.

वेगुरू म्हणाल्या, शिक्षण, पर्यावरण आणि पर्यावरणशास्त्र या क्षेत्रात कमिन्स इंडिया फाउंडेशन सीएसआरच्या माध्यमातून कार्यरत आहे. डीईएससारख्या ऐतिहासिक शिक्षण संस्थेबरोबर पाणी बचत क्षेत्रात काम करण्याची संधी मिळणे हा भाग्याचा क्षण आहे. या प्रकल्पासाठी आवश्यक आर्थिक मदत कमिन्स करणार आहे. तीन वर्षांसाठी हा करार आहे. तो पुढे वाढवला जाईल. उत्तम प्रकारचा नैसर्गिक अधिवास या ठिकाणी विकसित होईल असा विश्‍वास वाटतो. या हरित परिसराचा उपयोग संपूर्ण शहराच्या पर्यावरणासाठी होणार आहे.

-गेली दोन वर्षे या प्रकल्पावर प्राथमिक काम सुरू आहे. हरित क्षेत्र निर्माण करण्यासाठी पाण्याची गरज आहे. खुल्या विहिरी तयार करणे, परिसरातील १५ बोअरवेल मधील गाळ काढून त्या कार्यान्वित करणे, टेकडीवर चर खोदणे, खोल चर घेणे, गॅबियन स्टॅक्चर निर्माण करणे, शोषण खड्डे घेणे अशा शास्त्रीय उपाययोजना या प्रकल्पांतर्गत केल्या जाणार आहेत. त्यासाठी परिसर हरित करण्यासाठी आणि बोटॅनिकल गार्डनसाठी आवश्यक असणारी पाण्याची गरज भागणार आहे. त्याबरोबर प्रत्येक विभागाची गरज लक्षात घेऊन पाणी वापराचे ऑडिट, बॅलन्सशीट तयार केले जाईल, पाण्याचा गरजेनुसार वापर व्हावा यासाठी उपायोजना केल्या जातील.
सुनील भिडे, प्रबंधक

तिकोना, धर्मवीर, रोहिडेश्‍वर, राजगड, तुंग, रायरेश्‍वर या किल्ल्यांवरील निसर्गाचे संवर्धन आणि संरक्षण करण्यासाठी श्री. शिवदुर्ग संवर्धन संस्था कार्यरत आहे. या क्षेत्रातील संस्थेचा कामाचा अनुभव दांडगा आहे. महाविद्यालयीन विद्यार्थ्यांना सोबत घेऊन परिसर हिरवागार करण्यासाठी आम्ही शास्त्रीय पद्धतीने प्रयत्न करणार आहोत. या ठिकाणची पाण्याची गरज या प्रकल्पामुळे भागू शकेल असा विश्‍वास वाटतो.
पंडित अतिवाडकर