पुणे, दि.१०: संतांनी माणसातला देव ओळखण्याचा संदेश मानवजातीला दिला असून आरोग्यवारीच्या माध्यमातून माणसातल्या ईश्वराची सेवा घडते, असे प्रतिपादन राज्याचे उच्च व तंत्रशिक्षण मंत्री तथा जिल्ह्याचे पालकमंत्री चंद्रकांतदादा पाटील यांनी केले.

निवडुंग विठोबा मंदिर येथे राज्य महिला आयोग आणि पुणे महानगरपालिका यांच्या संयुक्त विद्यमाने आयोजित आरोग्यवारी अभियानाच्या उदघाटन प्रसंगी ते बोलत होते. कार्यक्रमाला राज्य महिला आयोगाच्या अध्यक्षा रुपाली चाकणकर, आमदार रविंद्र धंगेकर, मनपा अतिरिक्त आयुक्त रविंद्र बिनवडे, महिला आयोगाच्या सदस्य संगिता चव्हाण, प्रशांत जगताप आदी उपस्थित होते.

पालकमंत्री श्री.पाटील म्हणाले, राज्य महिला आयोगाने अतिशय संवेदनशीलतेने हा उपक्रम सुरू केला आहे. मासिक पाळीसारख्या विषयाकडे बघण्याच्या समाजाच्या दृष्टिकोनामुळे याबाबतची समस्या मांडताना मनात संकोच असतो. त्यामुळे महिलांची ही समस्या लक्षात घेऊन महानगरपालिकेच्या सहकार्याने सुरू केलेला हा उपक्रम कौतुकास्पद आहे. समाजाच्या सहकार्याने शहरात अनेक ठिकाणी सॅनिटरी नॅपकिन उपलब्ध करून देणारे यंत्र बसविण्याची गरज आहे, असे त्यांनी सांगितले.

पुणे शहरात जागा उपलब्ध झाल्यास सामाजिक उत्तरदायित्व निधीतून तृतीयपंथीयांसाठी स्वतंत्र रुग्णालय उभारण्यात येईल. महिलांच्या सुरक्षेच्या विषयावर लवकरच बैठक आयोजित करण्यात येईल, असेही पालकमंत्री म्हणाले. वारीत स्वच्छतेचे काम करणाऱ्या कर्मचाऱ्यांच्या सेवेचे त्यांनी विशेष कौतुक केले.

श्रीमती चाकणकर म्हणाल्या, साधुसंतांच्या विचारधारा हे महाराष्ट्राचे वैभव आहे. पंढरपूर वारीच्या निमित्ताने हा विचार सर्वत्र पोहोचतो. पंढरीच्या वारीला जाणाऱ्या महिलांची संख्या वाढते आहे. वारीदरम्यान महिलांना २३ ते २४ दिवस चालावे लागते. या कालावधीत त्यांना एकदा तरी मासिक पाळीला सामोरे जावे लागते. त्यांची ही समस्या लक्षात घेऊन आरोग्यवारी अभियान सुरू करण्यात आले आहे.

वारी दरम्यान महिलांसाठी सॅनिटरी नॅपकिनची व्यवस्था करण्यात आली आहे. स्तनदा मातांसाठी वारी मार्गावर हिरकणी कक्ष उभारण्यात आला आहे. महिलांसाठी स्वतंत्र डॉक्टर्सची व्यवस्था करण्यात आली आहे. महिलांसाठी ‘१०९१’ टोल फ्री क्रमांक आणि पिवळ्या रंगाच्या दुचाकीवर मदतीसाठी दूतांची व्यवस्था केली आहे. महिला वारकऱ्यांच्या हस्ते १५ हजार वृक्षांची लागवड करण्यात येणार आहे. महिलांच्या आरोग्यासोबत त्यांच्या सुरक्षेची काळजी घेण्यासाठी गरज आहे, असे त्यांनी सांगितले.

राज्य महिला आयोगाच्या सदस्या दीपा ठाकूर यांनी प्रास्ताविकात आरोग्यवारी अभियानाची माहिती दिली. वारी सोहळ्यादरम्यान महिलांच्या आरोग्याची काळजी घेण्यासाठी महानगरपालिका आणि जिल्हा परिषद आरोग्य विभागाच्या सहकार्याने हा उपक्रम राबविण्यात येत असल्याचे त्यांनी सांगितले.

प्रारंभी पालकमंत्री श्री.पाटील यांच्या हस्ते आरोग्यवारी अभियान आणि महिलांसाठी तयार करण्यात आलेल्या कक्षाचे उदघाटन करण्यात आले.
0000

पुणे–

पुणे : पुण्याचे अतिरिक्त विभागीय आयुक्त डॉ. अनिल रामोड यांना सीबीआय न्यायालयाचे विशेष न्यायाधीश ए एस वाघमारे यांनी १३जूनपर्यंत सीबीआय कोठडी सुनावली. सीबीआयने तपासादरम्यान घर व कार्यालयातून ६ कोटी ६४ लाखांची रोकड जप्त केली आहे.त्यांच्या कार्यालयालयात १ सीलबंद आयफोन आढळून आला असून तो जप्त करण्यात आला आहे. तक्रादार व आरोपी यांमध्ये झालेले संभाषण रेकॉर्ड झाले आहे.

त्यामध्ये आरोपीने पैसे घेतल्याचे स्पष्ट झाले आहे. त्याच्या आवाजाचे नमुने घ्यायचे आहे. चौकशीसाठी रामोड सहकार्य करत नसून उडवाउडवीची उत्तरे देत आहे. त्यामुळे गुन्ह्याच्या अधिक तपासासाठी सरकारी वकील अभय अरीकर यांनी ५ दिवसांची सीबीआय कोठडी देण्याची मागणी केली. न्यायालयाने मान्य करत तीन दिवसांची कोठडी सुनावली. सीबीआयचे अतिरिक्त अधिक्षक आय बी पेंढारी यांनी त्याला न्यायालयात हजर केले.

सीबीआयचे वकील अभय अरिकर यांनी न्यायालयात युक्तिवाद करताना सांगितले की, आरोपींकडे पुणे, सातारा, सांगली, कोल्हापूर येथील महामार्ग लगत भूसंपादन मोबदला देण्याचा अधिकार होता. केंद्र सरकारने 2016साली आळंदी पंढरपूर महामार्ग प्रस्तावित केला होता. या महामार्गासाठी भूसंपादन करण्यासाठी तक्रारदार शेतकरी यांची जमीन जाणार होती त्या बदल्यात सरकारने देऊ केलेल्या मोबदल्यापेक्षा अधिक रक्कम मिळावी यासाठी संबंधित शेतकऱ्याने अधिक रक्कम मिळावी याकरीता त्यांनी लवादकडे दाद मागितली होती.

त्याचा गैरफायदा घेत डॉ. रामोडनी संबंधित प्रकरणाची लावदामार्फत सुनावणी जाणीवपूर्वक प्रलंबित ठेवली पण 21 एप्रिल 2023 रोजी प्रकरण सुनावणीस घेण्यात आले. तक्रारदार यांना अधिकचा सव्वा कोटी रुपयांचा मोबदला देण्याचे निश्चित केले.मात्र, यापैकी दहा टक्के रक्कम म्हणजेच दहा लाख रुपये द्यावे लागतील असे सांगण्यात आले होते. त्यामुळे संबंधित रक्कम कमी करण्यात यावी अशी मागणी शेतकऱ्याच्या वकिलाने अतिरिक्त विभागीय आयुक्त यांच्याकडे केली होती. तडजोडीअंती आठ लाख रुपये देण्याचे निश्चित झाले होते.

मात्र, या संदर्भात शेतकऱ्यांच्या वकिलांनी सीबीआय एसीबीकडे लेखी तक्रार दाखल केली होती.त्यानुसार आरोपीला आठ लाख रुपयांची लाच घेताना अटक केली आहे. आरोपीकडे सीबीआयने चौकशी केली असता त्याने चौकशी सहकार्य न करता उडवाउडवीची उत्तरे दिलेली आहे.आरोपी डॉ. रामोड यांचे वतीने वकील सुधीर शाह यांनी प्रतिवाद केला.

ठेकेदारासह दोन कामगारांविरुद्ध गुन्हा दाखल

पुणे-वाघोली परिसरात एका नवी बांधकाम सुरू असलेल्या गृहप्रकल्पाची प्रवेशद्वाराची कमान कोसळून सात वर्षांच्या मुलाचा दुर्देवी मृत्यू झाल्याची घटना घडली आहे.या दुर्घटनेस जबाबदार ठरवून ठेकेदारासह दोन कामगारांविरुद्ध गुन्हा दाखल करण्यात आला आहे अशी माहिती पोलिसांनी शनिवारी दिली.

या घटनेत अर्णव मिथीलेश राय (वय- 7, सध्या रा. गुलमोहोर सोसायटी, वाघोली, नगर रस्ता,पुणे) असे मयत मुलाचे नाव आहे. अर्णवचे वडील मिथीलेश राय (वय- 36) यांनी याबाबत लोणीकंद पोलीस ठाण्यात फिर्याद दिली आहे. त्यांनी दिलेल्या फिर्यादीनुसार ठेकेदार सिराज मुल्ला, कामगार दाजीज इबन खान, रामप्रवेश राधेशाम राय (रा. पोरवाल रस्ता, लोहगाव,पुणे) या आरोपीच्या विरुद्ध गुन्हा दाखल करण्यात आलेला आहे.

पोलिसांनी दिलेल्या माहितीनुसार, पुणे – अहमदनगर रस्त्यावरील वाघोलीतील नियोजित गुलमोहोर सोसायटीच्या आवारातील प्रवेशद्वार बांधकामाचे काम ठेकेदार सिराज मुल्ला याने घेतलेले आहे. प्रवेशद्वाराचे काम निकृष्ट केल्याने अचानक कमान कोसळली गेली. यावेळी कमानीचा काही भाग तेथे थांबलेला अर्णव राय याच्या अंगावर खेळत असताना कोसळल्याने तो गंभीर जखमी झाला. त्याला रुग्णालयात दाखल केले असता,उपचारादरम्यान त्याचा मृत्यू झाला आहे. पोलीस उपनिरीक्षक राहुल कोळपे याबाबत पुढील तपास करत आहेत.

पुणे, दि.१० : ‘ज्ञानोबा माऊली-तुकाराम’ असा नामघोष, टाळ-मृदंगाच्या तालावर होणारा विठूनामाचा गजर… तुळशी वृंदावन आणि दिंड्या-पताका… अशा भक्तिमय वातावरणात आषाढी वारीसाठी संत तुकाराम महाराज पालखी सोहळ्याने आज पंढरपूरकडे प्रस्थान केले. यावेळी भाविकांचा उत्साह ओसंडून वाहत होता.

देहू येथील जगद्गुरू तुकाराम महाराज मंदिरात पालकमंत्री चंद्रकांतदादा पाटील यांनी सपत्निक पादुकांचे पुजन आणि आरती केली. यावेळी खासदार श्रीरंग बारणे, आमदार महेश लांडगे, आमदार उमा खापरे, माजी राज्यमंत्री बाळासाहेब भेगडे, बारामती हाय-टेक टेक्स्टाईल पार्कच्या अध्यक्षा सुनेत्रा अजित पवार आदी पूजेला उपस्थित होते.

पूजेनंतर उपस्थित सर्वजण वारकऱ्यांसह टाळ-मृदुंगाच्या गजरात दंग झाले. यावेळी जगद्गुरु श्री संत तुकाराम महाराज संस्थानचे अध्यक्ष ह.भ.प. नितीन मोरे, पालखी सोहळा प्रमुख माणिक मोरे, संतोष मोरे, विशाल मोरे, संस्थांचे विश्वस्त संजय मोरे, भानुदास मोरे, अजित मोरे आदी उपस्थित होते.

महापूजेनंतर पालखीने इनामदारवाड्यातील मुक्कामाकडे प्रस्थान केले.

पुणे-केरळमध्ये दाखल झालेल्या मान्सूनने अखेर कर्नाटकात मुसंडी मारली असून, तो येत्या 48 तासांत महाराष्ट्रात येण्याची शक्यता हवामान विभागाने वर्तवली आहे.मान्सूनने आज पश्चिम किनारपट्टीवरच्या कर्नाटकातल्या कारवारपर्यंत मजल मारली आहे.येणाऱ्या दोन दिवसांत गोवा आणि महाराष्ट्राचा काही भाग व्यापण्याची शक्यता वर्तवली जातेय.

यंदा मान्सूनची गाडी केरळात लेट पोहचली. नियोजित वेळेपेक्षा आठवडाभराचा विलंब झाला. त्यामुळे दुष्काळाची भीती व्यक्त करण्यात आली होती. मात्र, आता लांबलेल्या मान्सूनने कर्नाटकचा काही भाग, बंगालच्या उपसागरात प्रवेश केला आहे. आता येणाऱ्या दोन-तीन दिवसांत महाराष्ट्राची किनारपट्टी, गोवा, अरबी समुद्राचा मध्य भाग मान्सूने व्यापण्याची शक्यता वर्तवण्यात येत आहे.

कोकणात शनिवारी सायंकाळी सहाच्या सुमारास मान्सूनपूर्व पावसाने हजेरी लावली.पुण्यात पाचच्या सुमारापर्यंत आकाशात ढग नव्हते. मात्र, सायंकाळी ढगांनी गर्दी केली. गेल्या दोन-चार दिवसांपासून उष्णता वाढली होती.

यंदा देशभरात पाऊस कमी होण्याची भीती तज्ज्ञांनी व्यक्त केली आहे. सोबत हवामान खात्याचीही ही अंतर्गत माहिती असल्याचे समजते. त्यात महाराष्ट्र, गोवा, कर्नाटक, आंध्र प्रदेश, गुजरात, केरळ, तामिळनाडू, ओडिशा, पश्चिम बंगाल या राज्यांसह इतर चार केंद्र शासित प्रदेशामध्ये मान्सून गुंगारा देण्याची भीती आहे. मात्र, तूर्तास तरी मान्सून दाखल होण्याची आशा निर्माण झाली आहे. आता येणाऱ्या काळात तो कसा बरसणार याची उत्सुकता लागून आहे.

पुणे : उच्च शिक्षण घेऊन परदेशी जावे आणि नावलौकिक मिळवावा, अशी अनेक तरुणांची इच्छा असते. माझीही तशीच इच्छा होती, परंतु आपल्या कौशल्याचा आपल्या लोकांना विशेषतः समाजातील गरजू लोकांना उपयोग व्हावा यासाठी मी भारतातच राहिलो. आपल्या कौशल्याचा केवळ पैसा आणि प्रसिद्धीसाठी वापर न होता तो समाजासाठी वापर व्हायला हवा तरच खऱ्या अर्थाने समाजसेवा घडेल, अशी भावना ज्येष्ठ कर्करोग शल्यचिकित्सक डॉ शैलेश पुणतांबेकर यांनी व्यक्त केली.

रोटरी क्लब ऑफ पूना मिडटाउन तर्फे सर्वोत्कृष्ट व्यावसायिक पुरस्कार वितरण सोहळ्याचे आयोजन एरंडवण्यातील सेवासदन संस्थेच्या सभागृहात करण्यात आले. ज्येष्ठ सामाजिक कार्यकर्ते विजय फळणीकर, क्लबच्या अध्यक्षा माधुरी कुलकर्णी, सचिव वैशाली चिंचोरे, संचालक स्मिता शहा आदी यावेळी उपस्थित होते. दगडखाण कामगारांसाठी काम करणाऱ्या संतुलन संस्थेच्या पल्लवी रेगे आणि डॉ. शैलेश पुणतांबेकर यांना यावेळी सर्वोत्कृष्ट सेवा पुरस्कार प्रदान करण्यात आला.

डॉ. शैलेश पुणतांबेकर म्हणाले, तुम्ही कुठे जन्म घेता? कोठे शिक्षण घेता? यापेक्षा तुमचे स्वप्न काय आणि त्यासाठी तुम्ही किती कष्ट घेता/ हे महत्त्वाचे आहे. आपण घेतलेले शिक्षण आणि त्यातून मिळालेले कौशल्य याचा आपण समाजासाठी किती उपयोग करतो यावरून आपण माणूस म्हणून जगण्यासाठी किती योग्य आहोत, हे ठरते. माझ्या शिक्षणाचा माझ्या देशातील सर्वसामान्य गरजू लोकांना उपयोग झाला हे मी माझे सुदैव समजतो.

विजय फळणीकर म्हणाले समाजामध्ये वेदना देणारे अनेक लोक आहेत. परंतु त्या वेदनेवर फुंकर घालणारे अगदी कमी लोक आहेत. फुंकर घालतानाही आपल्याला होणारे चटके सहन करत समाजासाठी योगदान देणारे लोक हे खऱ्या अर्थाने समाज घडवत असतात. आपण समाजासाठी काही केले तर समाजही त्या गोष्टीची जाणीव ठेवतो आणि त्या कामासाठी समाजही आपल्याला मदत करतो. त्यामुळे सामाजिक काम करताना जिद्द कायम ठेवली पाहिजे आणि समाजातील चांगल्या गोष्टींवर कायम विश्वास असला पाहिजे.

पल्लवी रेगे म्हणाल्या, शहरापासून थोड्याच अंतरावर असणाऱ्या दगडखाण कामगारांमध्ये आणि शहरातील लोकांमध्ये जमीन आसमानाचा फरक आहे. दगडखाण कामगार हे आजही मूलभूत गरजांसाठी झगडत आहेत. समाजातील लोकांनी त्यांना माणूस म्हणून स्वीकारावे आणि त्यांच्या विकासासाठी मदत करावी, यासाठी आम्ही प्रयत्न करीत आहोत, असेही त्या म्हणाल्या. डॉ. शुभदा जठार यांनी सूत्रसंचालन केले. माधुरी कुलकर्णी यांनी प्रास्ताविक केले

पुणे, दि. १० जून २०२३: महावितरणच्या १८ व्या वर्धापनदिनानिमित्त पुणे परिमंडलामध्ये कर्मचारी व त्यांच्या कुटुंबियांसाठी आयोजित विविध कार्यक्रमांचा, स्पर्धांचा तसेच पाच दिवसीय सौर रथयात्रेचा समारोप शुक्रवारी (दि. ९) उत्साहात झाला. ऐरवी धकाधकीच्या वीजक्षेत्रात अविश्रांत सेवा देणाऱ्या कर्मचाऱ्यांसह त्यांचे कुटुंबिय व बालगोपाळांना विविध कार्यक्रमातून नवी ऊर्जा मिळाली.

येथील लोकशाहिर अण्णाभाऊ साठे नाट्यगृहात आयोजित समारोप कार्यक्रमाचे मुख्य अतिथी म्हणून प्रादेशिक संचालक (प्र.) श्री. अंकुश नाळे उपस्थित होते. कार्यक्रमाच्या अध्यक्षस्थानी मुख्य अभियंता श्री. राजेंद्र पवार होते तर प्रमुख पाहुणे म्हणून अधीक्षक अभियंता सर्वश्री अरविंद बुलबुले, युवराज जरग, संजीव राठोड, डॉ. सुरेश वानखेडे उपस्थित होते.

महावितरणच्या वर्धापन दिनानिमित्त अधिकारी, कर्मचारी व त्यांच्या कुटुंबियांसाठी पुणे परिमंडल अंतर्गत पुणे, चिंचवड व नारायणगाव येथे आयोजित कार्यक्रमांत सुमारे २२०० कर्मचारी व त्यांचे कुटुंबिय सहभागी झाले होते. या कार्यक्रमांत महिलांसाठी ‘होम मिनिस्टर’, रांगोळी स्पर्धा, बालकांसाठी चित्रकला स्पर्धा, जादूचे प्रयोग, पुरुषांसाठी संगीतखूर्ची, संगीतरजनी पथनाट्ये आदींचे तसेच तणावमुक्तीसाठी माईंड पॉवर ट्रेनर डॉ. दत्ता कोहिनकर व उपकार्यकारी अभियंता डॉ. चिदानंद फाळके (नाशिक) यांच्या व्याख्यानांचे आयोजन करण्यात आले. तसेच गणेशखिंड मंडलमधील महिला अभियंता, अधिकारी व कर्मचाऱ्यांनी विविध ठिकाणी ‘ग्राहकसेवा हे ध्येय महावितरणचे’ या पथनाट्याचे सादरीकरण केले. विशेष म्हणजे या पथनाट्याची ध्वनिचित्रफित महावितरणच्या मुख्यालयातील वर्धापनदिनाच्या कार्यक्रमात प्रसारित करण्यात आली.

समारोपीय कार्यक्रमात प्रादेशिक संचालक श्री. अंकुश नाळे व मुख्य अभियंता श्री. राजेंद्र पवार यांच्याहस्ते विविध स्पर्धेतील विजेत्यांना बक्षिस प्रदान करण्यात आले. पथनाट्यातील सर्व महिला कलावतांचा प्रशस्तिपत्र देऊन गौरव करण्यात आला. तसेच शिवछत्रपती पुरस्कार विजेता व खोखोपटू प्रतीक वाईकर, क्रिकेटपटू अजय चव्हाण, धावपटू गुलाबसिंग वसावे, पॉवर लिफ्टर मनीष कोंड्रा, जनसंपर्क अधिकारी श्री. निशिकांत राऊत यांचा उत्कृष्ट कामगिरीबद्दल स्मृतिचिन्ह व सन्मानपत्र देऊन गौरव करण्यात आला.

दरम्यान दि. ३ व ४ जून रोजी पद्मावती क्रीडांगणावर आयोजित पुरुष व महिला क्रिकेट स्पर्धेत एकूण १७ संघांनी भाग घेतला. स्पर्धेचे विजेतेपद राजगुरुनगर विभाग (पुरुष) व गणेशखिंड मंडल (महिला) संघाने पटकावले तर मंचर विभाग (पुरुष) व रास्तापेठ मंडल (महिला) संघाला उपविजेतेपद मिळाले. परिमंडलस्तरीय रांगोळी स्पर्धेत प्रथम- स्नेहा कोल्हे, द्वितीय- सुजाता शिरोडे व तृतीय- रुपाली शिवतारे तर माधुरी तिजारे, तेजश्री वाघमारे, शिवकन्या पारधे, जयश्री निकाळजे यांना उत्तेजनार्थ बक्षिस मिळाले. बालचित्रकार स्पर्धेत प्रथम- अलफिया पिंजारी, द्वितीय- अर्णव खमितकर, तृतीय- ओवी गोगावले तर विवान सोनवणे, वैभवी परदेशी, आरोही परदेशी, आर्यन साबळे, अमन पिंजारी व पार्थ काळूमाळी यांना उत्तेजनार्थ बक्षिस मिळाले.

समारोपीय कार्यक्रमाचे प्रास्ताविक कार्यकारी अभियंता भागवत थेटे यांनी केले. कार्यक्रमांचे सूत्रसंचालन श्री. संतोष गहेरवार, भक्ती जोशी, कैलास कांबळे यांनी केले तर कार्यकारी अभियंता भाऊसाहेब सावंत यांनी आभार मानले. आयोजनासाठी सहायक महाव्यवस्थापक ज्ञानदा निलेकर (मानव संसाधन) व माधुरी राऊत (वित्त व लेखा), उपमुख्य औद्योगिक संबंध अधिकारी शिरीष काटकर, उपकार्यकारी अभियंता डॉ. संतोष पटनी यांच्यासह मंडलनिहाय स्थानिक समित्यांनी पुढाकार घेतला.

पाच दिवसीय सौर रथयात्रेचा समारोप- छतावरील सौर ऊर्जा प्रकल्प, मुख्यमंत्री सौर कृषिवाहिनी योजना २, इलेक्ट्रिक वाहन चार्जिंग स्टेशनसह विविध योजना व ग्राहकसेवांची माहिती देणाऱ्या पाच दिवसीय सौर रथयात्रेचा शुक्रवारी समारोप करण्यात आला. या सौर रथयात्रेने शहरी व ग्रामीण भागातील सुमारे ७० ठिकाणी जाऊन विविध माहिती दिली. संबंधित अभियंता व कर्मचाऱ्यांनी सुमारे ३५ हजार ग्राहकांशी थेट संवाद साधला व त्यांना विविध योजनांचे माहिती पत्रक दिले. समारोपीय कार्यक्रमात सौर रथयात्रेला सहकार्य करणाऱ्या ‘मास्मा’चे अध्यक्ष रोहन उपासनी व इतर पदाधिकारी उपस्थित होते.

पुणे-जून महिन्यात पुण्यामध्ये G-20 अंतर्गत दोन बैठका होत आहेत, त्यानिमित्त पुणे महानगरपालिका सायकल क्लबच्या वतीने – सायकल फेरीचे आयोजन करण्यात आले होते.भारताकडे G20 परिषदेचे यंदा असलेले अध्यक्षपद, याबद्दलची जनजागृती व “सायकल चालवा पर्यावरण वाचवा” हा संदेश घेऊन सायकल स्वार आज पुणे शहरात फिरले.

पुणे महानगरपालिकेचे अतिरिक्त महापालिका आयुक्त (वि) विकास ढाकणे यांनी सायकल फेरीला झेंडा दाखवून सुरुवात करून दिली.

सुमारे 2200 सायकल प्रेमींनी या उपक्रमास उत्स्फूर्त प्रतिसाद दिला. पुणे मनपा भवन, मॉडर्न कॅफे चौक, जंगली महाराज रस्ता, टिळक रस्ता, अभिनव महाविद्यालय चौक, बाजीराव रस्ता, शनिवार वाडा मार्गे पुन्हा मनपा भवन या मार्गाने सर्व सायकल वीरांनी शहरात चक्कर मारली. अतिशय उत्साहवर्धक वातावरणात विविध वयोगटातील स्त्री पुरुष या फेरीमध्ये सहभागी झाले होते. लहान मुलांचा सहभाग देखील लक्षणीय होता. सर्व सहभागी सायकल स्वारांना G-20 स्मृतीपदके देण्यात आली.

फेरीचे नेतृत्व सुरेश परदेशी, मुख्य समन्वयक पुणे मनपा सायकल क्लब, यांनी केले; तसेच महिला गटाचे नेतृत्व नेहा भावसार यांनी केले.याप्रसंगी क्रीडा विभाग उपायुक्त चेतना केरुरे, अतिक्रमण विभाग उपायुक्त माधव जगताप, पर्यावरण अधिकारी मंगेश दिघे इत्यादी अधिकारी व कर्मचारी मोठ्या प्रमाणात उपस्थित होते.