मुंबई–

राष्ट्रवादी काँग्रेसमधील अंतर्गत बंडखोरी आता टोकाला पोहोचली आहे. अजित पवार स्वतः राष्ट्रवादी काँग्रेसचे अध्यक्ष झालेत. त्यानंतर आता शरद पवारांच्या नेतृत्वात पक्षाच्या राष्ट्रीय कार्यकारिणीची बैठक सुरू आहे. शरद पवार तिथे पोहोचण्यापूर्वीच अजित पवार व प्रफुल्ल पटेल यांचे फोटो असणारे बॅनर्स काढून टाकण्यात आले आहेत.

आता नवे पोस्टर छापण्यात आलेत. त्यात अजित पवार व प्रफुल्ल पटेलांचे फोटो नाहीत. यापैकी एका पोस्टरवर बाहुबली चित्रपटातील कट्टपाने बाहुबलीवर पाठीमागून वार केल्याचा फोटो आहे. त्यावर गद्दारांना जनता माफ करणार नाही, असा संदेश लिहिण्यात आला आहे.

• राष्ट्रवादी काँग्रेसच्या राष्ट्रीय कार्यकारिणी व कार्यकारी समितीतून अजित पवारांसोबत गेलेल्या खासदार प्रफुल्ल पटेल यांचे नाव आधीच वगळण्यात आले आहे. सुप्रिया सुळे यांची पक्षाच्या राष्ट्रीय कार्यकारी अध्यक्षा म्हणून नोंद असल्याची माहिती मिळत आहे.
• शरद पवारांसोबत सुप्रिया सुळे, जितेंद्र आव्हाड, खासदार, श्रीनिवास पाटील, खासदार फौजिया खान, खासदार मोहम्मद फैजल, खासदार वंदना चव्हाण यांच्यासह अनेक पदाधिकारी या बैठकीला हजर आहेत. देशातल्या विविध राज्यातील राष्ट्रवादीच्या पदाधिकाऱ्यांना या बैठकीसाठी निमंत्रित करण्यात आले आहे.
• उपमुख्यमंत्री अजित पवार यांनी शरद पवारांच्या नेतृत्वात दिल्लीत सुरू असणारी बैठक अवैध असल्याचा आरोप केला आहे.
• शरद पवारांच्या उपस्थितीत राष्ट्रवादी काँग्रेसच्या राष्ट्रीय कार्यकारिणीची दिल्लीत बैठक सुरू. पक्षाचे अनेक जुने जाणते नेते उपस्थित
• अजित पवार यांच्याशी युती झाल्यानंतर आमदारांमधील मतभेदाच्या वृत्तावर एकनाथ शिंदे म्हणाले – पक्षात सर्व काही ठीक आहे. मी राजीनामा देत नाहीये. काही दिवसांतच महाराष्ट्राचा मुख्यमंत्री बदलला जाईल, असे शिवसेना (उद्धव ठाकरे गट) नेते संजय राऊत यांनी म्हटले होते. भाजपनेही प्रत्युत्तर देत म्हटले की, फक्त शिंदेच मुख्यमंत्री राहतील.
• राष्ट्रीय अध्यक्ष झाल्यानंतर अजित पवार यांनी आपल्या 32 समर्थक आमदारांना ताज हॉटेलमध्ये पाठवले आहे. ते पुन्हा माघारी जाण्याच्या भीतीने हे पाऊल उचलल्याचे सांगण्यात येत आहे.

मुंबई-आज मुंबईत सभेला संबोधित करताना अजित पवारांनी राष्ट्रवादी काँग्रेसचे नेते जितेंद्र आव्हाड यांच्यावरही अप्रत्यक्षपणे टीकास्र सोडले. ठाण्यातील तो पठ्ठा, त्यांच्यामुळे गणेश नाईक, संदीप नाईक, सुभाष भोईर, निरंजन डावखेरे असे पक्ष सोडून गेले, असा आरोप अजित पवारांनी केला. दुसरीकडे अजित पवारांच्या आरोपाला जितेंद्र आव्हाडांनी देखील प्रत्युत्तर दिले आहे. मला जे बोलायचे ते बोला, पण साहेबांवर जे काही बोलला आहात, त्यांच्याविरोधात मी उभा आहे.शरद पवार तुम्हाला का लुळे-लंगडे, एका ठिकाणी बसलेला माणूस हवा होता का, त्यांच्याविषयी असलेली आस्था तुम्हाला संपवायची आहे. त्यासाठी तुम्ही लोकांनी रचलेले षडयंत्र आहे. एवढाच त्यांच्याविषयी राग असेल तर त्यांचे कशाला फोटो वापरता.?ज्यांच्याकडे वय नाही त्यांना हाकलण्यासाठी इतका आटापीटा का सुरू झाला?ज्यांनी हा वटवृक्ष उभा केला. त्याला या घरट्यातूनच बाहेर काढायचे? असे सवाल जितेंद्र आव्हाडांनी अजित पवारांना केले आहे.

अजित पवारांच्या टीकेबाबत जितेंद्र आव्हाड म्हणाले, माझ्यामुळे पक्षाचे नेते पक्ष सोडून गेले, असं त्यांना तसं वाटत असेल. तर ठीक आहे. अजित पवारांबद्दल माझी काहीही तक्रार नाही. माझी तक्रार फक्त एकच आहे. शरद पवारांनी निवृत्ती घ्यावी आणि घरी बसावं, ही जी भावना तुम्ही व्यक्त करताय, त्याविरोधात मी तुमच्याविरोधात उभा राहणार आहे.

राष्ट्रवादी काँग्रेसमधील बंडखोरीनंतर शरद पवार गट आणि अजित पवार गट आमने-सामने आले आहेत. दोन्ही गटांकडून आज मुंबईत शक्तीप्रदर्शन केले. अजित पवार गटाकडून मुंबईतील एमईटी येथे मेळाव्याचं आयोजन केलं होतं. तर शरद पवार गटाकडून वाय बी चव्हाण सेंटर सभागृहात मेळाव्याचं आयोजन केलं होते. या मेळाव्यातून दोन्ही गटातील नेत्यांनी आपापल्या भूमिका मांडल्या आहेत. शरद पवारांनी राजकारणातून निवृत्ती घेऊन घरी बसावं आणि आशीर्वाद द्यावा, अशी भूमिका अजित पवार यांनी मांडली.

जितेंद्र आव्हाड पुढे बोलताना म्हणाले की, तुम्हाला माझ्याबद्दल जे काही बोलायचे आहे, ते तुम्ही बोला. लोकशाहीमध्ये तुम्हाला तो अधिकार आहे. पण जो कर्तृत्ववान मुलगा असतो, तो आपल्या म्हाताऱ्या बापाला नेहमी सांगतो, तुम्ही काम करत राहा. पण तुम्ही (अजित पवार) तर सगळे मिळून त्यांना निरोपच देत आहात. घरी बसायला सांगत आहात. पण आमचं म्हणणं एवढंच आहे की, ते अजिबात घरात बसणार नाही.

आव्हाड म्हणाले की, कायद्याच्या बाजू गुंडाळून या देशाला कोणत्या दिशाकडे घेऊन जात आहात. ज्यांनी हा वटवृक्ष उभा केला. त्याला या घरट्यातूनच बाहेर काढायचे. त्यांचे ते छोटेसे घरटे होते. त्यातून बाहेर काढायचं. साहेबांनी तुमची कुठलीच महत्त्वकांक्षा रोखली नाही. त्याच व्यक्तीला तुम्ही लोक घरी जा, बाय बाय करू लागला आहात. यात काही माणुसकी असते का, असा सवाल जितेंद्र आव्हाड यांनी उपस्थित केला.

स्वतःचे मन असते. आपल्यासाठी कोणी कोणी कधी काय काय केले आहे. शरद पवारांनी त्यांच्यासाठी काय काय केले आहे. त्यांना माहित नाही का, त्यांनी अजिबात सत्ता भोगली नाही. तुम्हा सर्वांना सत्ता दिली. ज्या आईने खायला वाढले, त्या आईच्या हातातून भांडे ओढून घेण्यासाठी तयार झालात, असे सांगत आव्हाडांनी अजित गटावर निशाणा साधला.

शेवटी नारळ कोणावर फोडावे लागते. माझ्या मागे बाप-आई नाही. माझी कंपनी नाही, कारखाना नाही. कोणाचीही साथ नाही. माझ्यामागे फक्त शरद पवार ही एकमेव ताकद आहे. तरी देखील हा बोलतो. म्हणून काही लोकांचे दुखणं असू शकते. माझ्याविरूद्ध बोलणे सोपे आहे. पण मी कायम साहेबांसोबत राहील. शेवटच्या श्वासापर्यंत बोलत राहणार आहे.

आज मुंबईतील आमदार निवासातून एक आमदार घेऊन गेले. जे फेसबुक पेजवर पवारसाहेबांच्या समर्थनार्थ लिहतात. त्यांना धमक्या येत आहेत. परंतू अशा लोकांची घुसमट केली जात आहे. पण ते अजिबात घाबरणार नाहीत. आम्ही लढत राहणार आहोत.

पवार साहेबांवर कशा पद्धतीने जबरदस्ती केली जात होती. पण शरद पवार त्यांना नकोसे झाले होते. काही लोक म्हणतात माझ्याकडे वय आहे. ज्यांच्याकडे वय नाही त्यांना हाकलण्यासाठी इतका आटापीटा का सुरू झाला. त्यामुळे अशा पद्धतीने बोलून तुम्ही आम्हाला हरवू शकत नाही. असा घणाघात आव्हाडांनी केला.

अजित पवार गटाच्या प्रत्येक आक्षेपाला शरद पवारांनी दिले उत्तर

शिवसेना आणि भाजपच्या हिंदुत्वात काय फरक आहे ते सांगितले

नागालंड मध्ये बाहेरून पाठींबा का दिला ते स्पष्ट केले.

मी त्यांचा दैवत आहे ,सांगून फोटो लावतात … आणि …

मुंबई- शिवसेनेचे हिंदुत्व हे सर्वांना घेऊन जाणारे आहे म्हणून त्यांच्याबरोबर गेलो पण भाजपचे हिंदुत्व मनूवादी, विषारी, विभाजन करणारे जो विचार आपल्याला मान्य नाही त्यांच्यासोबत जाणे योग्य नाही, हे मला कदापी मान्य नाही, असा घणाघात शरद पवार यांनी केला.

 मुंबईत त्यांनी कार्यकर्त्यांशी संवाद साधला. तर पक्षातून उभी फुट पाडत बाहेर पडलेल्या अजित पवार गटावर देखील त्यांनी टीका केली. ते म्आहणाले,’जची बैठक ही ऐतिहासिक बैठक आहे. संपूर्ण देशाचे लक्ष या बैठकीकडे आहे. २४ वर्षांपूर्वी मुंबई शहरामध्ये तुम्हा सर्वांच्या उपस्थितीत राष्ट्रवादी काँग्रेस पक्षाचा जन्म झाला. मुंबईत षण्मुखानंद सभागृहात बैठक झाली आणि संध्याकाळी शिवाजी पार्कवर लाखोंची सभा झाली. पक्षाची स्थापना आपण केली. आज २४ वर्षे झाली. या काळात महाराष्ट्राच्या कानाकोपऱ्यात नेतृत्वाची फळी उभी करण्यात राष्ट्रवादी काँग्रेसला यश आले.

अनेक कार्यकर्ते विधिमंडळात आले. कोणी आमदार, खासदार तर कोणी मंत्री झाले. सामान्य कुटुंबातील कार्यकर्ता राज्य सरकार चालवू शकतो, हे राष्ट्रवादीच्या सहकाऱ्यांनी देशाला दाखवले. अनेक नवीन नेते तयार केले. यात महाराष्ट्राचा चेहरा बदलायचा ही एकच भावना होती. राज्यातील शेवटच्या माणसाच्या जीवनात प्रकाश कसा येईल याची काळजी घ्यायची. त्या कामात तुमच्या कष्टाने आपण यशस्वी झालो. आज आपल्याला आणखी पुढे जायचे आहे. संकटे खूप आहेत. ज्यांची वैचारिक भूमिका देशाच्या हिताची नाही अशांच्या हातामध्ये देशाची सूत्रं आहेत. ज्यांच्या हाती सूत्रं आहेत त्यांच्या सहकाऱ्यांनासुद्धा म्हणाव्या तशी कल्पना मांडण्याच्या मर्यादा आहेत. केंद्र सरकारमध्ये मी अनेकदा काम केलंय. विरोधी पक्षनेता म्हणून काम केलंय. त्यावेळी एखादी गोष्ट योग्य नसेल, जनतेची भावना वेगळी असेल तर त्यासंबंधी सुसंवाद साधणे, त्यातून मार्ग काढणे, हे सूत्र या देशात अनेक वर्षांपासून सुरू आहे. आज चित्र बदललं आहे. संवाद संपलाय. लोकशाहीमध्ये विरोधक असोत वा सहकारी असोत, त्यांच्यात सुसंवाद हवा. मी मुख्यमंत्री असताना माझी पद्धत असायची की एखादा निर्णय आपण घेतला तर त्या निर्णयासंबंधी सामान्य माणसात काय प्रतिक्रिया आहे ती जाणून घेण्यासाठी लोकांशी संवाद ठेवायचा. अयोग्य असेल ते दुरुस्त करण्याची मानसिकता ठेवायची. आज देशात हा संवाद नाही. आम्ही सत्ताधारी पक्षात नाही पण लोकांमध्ये आहोत. त्यामुळे कधीकाळी सामान्य माणसाच्या दुःखाची स्थिती समजते. त्यातून मार्ग काढण्याची इच्छा असते. पण राज्यकर्त्यांचा संवादच नसेल तर त्या गोष्टींवर मर्यादा येतात. आज देशातील जनतेमध्ये अस्वस्थता आहे. दुसऱ्या बाजूने आम्ही लोकांनी प्रयत्न सुरु केले की लोकशाही टिकवण्यासाठी संसदीय पद्धतीला शक्ती देण्यासाठी संवाद सुरू करण्याचा प्रयत्न केला पाहिजे. या पहिल्या संवादात सत्ताधारी पक्षात जे नाहीत त्या सगळ्यांना संघटीत करण्यास सुरुवात केली. यासाठी बैठका घेत आहोत. हे जसे घडायला लागले तशी ज्यांच्या हाती सत्ता आहे ते अस्वस्थ होऊ लागले. देशाच्या प्रधानमंत्र्यांनी आठ दिवसांपूर्वी एका भाषणात राष्ट्रवादी काँग्रेसवर सत्तर हजार कोटींचा आरोप केला. प्रधानमंत्र्यांनी किंवा राज्याच्या मुख्यमंत्र्यांनी कोणतीही विधानं आधार नसताना करणे हे शहाणपणाचे लक्षण नाही. जे देशाचे नेतृत्व करतात त्यांना बोलण्यासंबंधी काळजी घ्यावी लागते. आरोप करायचे तर नुसते आरोप करून चालणार नाही. खरंच जर कोणी चुकीचे काम केले असेल त्यावर कारवाई केली पाहिजे. पण त्यांनी तेवढी धमक दाखवली नाही. जर राष्ट्रवादी काँग्रेस पक्ष इतका भ्रष्ट आहे असे वाटत असेल तर कालच्या शपथविधीमध्ये त्याच पक्षाला बरोबर का घेतले? याचा अर्थ हे राज्यकर्ते पाहिजे ते बोलतात, आधार नसलेल्या गोष्टी बोलून जनमानसात वेगळे वातावरण तयार करण्याचा प्रयत्न करतात. आमदारांना दमदाटी, नवी पिढी तयार करण्याचा प्रयत्न केला तर त्यात अडथळे, अशा अनेक गोष्टी सांगता येतील. राज्यात काहींनी बाजूला जायची भूमिका घेतली त्याचे दुःख आहे. कारण राष्ट्रवादी काँग्रेस पक्षाच्या कार्यकर्त्यांनी त्यांना विधिमंडळात आणण्यासाठी मेहनत घेतली. त्यांच्या कष्टातून ते निवडून आले. ज्या कार्यकर्त्यांमुळे हे दिवस आणले त्यांना किंवा पक्षाला विश्वासात न घेता वेगळी भूमिका घ्यायची आणि जो राजकीय विचार आपल्याला मान्य नाही त्या विचाराच्या पंक्तीला जाऊन बसायचे हे लोकशाहीच्या दृष्टीने योग्य नाही. काल नाशिकला पक्षाच्या कार्यालयात काही गडबड करण्यात आली. काही लोक पोलिसांच्या मदतीने कार्यालयाचा ताबा घेतात आणि सांगतात हा पक्ष आमचा, ही घड्याळाची खूण आमची आहे. निवडणूक आयोगाने घड्याळाची खूण कोणाला दिली हे संपूर्ण देशाला माहिती आहे. खूण कुठेही जाणार नाही. ही गोष्ट खरी असली तरी खूण हे देशाचे राजकारण करत नाही. मी अनेक निवडणुका लढलो. त्यात घड्याळ, हात, चरखा, गाय-वासरू अशा चिन्हांवर लढलो आहे. जोपर्यंत सामान्य माणसांच्या अंत:करणात पक्षाचा विचार आणि कार्यकर्त्यांची भूमिका आहे तोपर्यंत काही चिंता करण्याची गरज नाही. आज काही लोकांनी भाषणं केली, त्यात माझ्याबद्दल बोलताना मी त्यांचा गुरु आहे असे सांगत होते. आज त्या सहकाऱ्यांच्या मेळाव्यात मागे असलेला फोटो पाहिला तर त्यावर सर्वात मोठा फोटो माझा होता. अनेक पोस्टरमध्ये माझा फोटो लावला. त्यांना माहिती आहे की आपलं नाणं चालणार नाही. त्यामुळे जे नाणं चालेल ते चालणारं नाणं घेतलं पाहिजे. कारण त्यांचं नाणं खरं नाही, खण्णकन वाजत नाही हे लोक ओळखतील. पांडुरंगाच्या भेटीमध्ये बडवे येऊ देत नाहीत असा उल्लेख काहींनी केला. पांडुरंगाच्या दर्शनाला येणं देशात कोणी थांबवू शकत नाही. मला पांडुरंग, गुरु असे म्हणायचे आणि आमच्याकडे दुर्लक्ष झाले असे म्हणायचे. जेव्हा निवडणूक आली तेव्हा दिड-दोन वर्ष तुरुंगात राहिलेल्यांना संधी देऊ नका असे काहींनी मला सांगितले. पण त्यांच्यावर अन्याय झाला असे मला वाटले. अशावेळी सहकाऱ्याला तोंडावर पडू न देण्याची भूमिका घेतली. माझा पक्ष त्यांच्या मागे उभा राहिला. तिकीट दिले, सरकार आले तेव्हा मंत्रिपदाची शपथ घेताना पक्षाच्या वतीने देण्यात आलेल्या नावांमध्ये पहिले नाव त्यांचे देण्यात आले, ही भूमिका आपण घेतली.राज्यकर्त्यांनी राज्य एकत्रित ठेवायची भूमिका घेतली पाहिजे. भाजपच्या राज्यातील उपमुख्यमंत्र्यांनी अनेकदा भाषणात हे राज्य तोडण्याची, वेगळा विदर्भ करण्याची वक्तव्यं केली. राज्याच्या ऐक्याला सुरुंग लावण्याची भाषा या लोकांनी कधीकाळी केली आहे. आपले काही सहकारी गेले म्हणून आपण अस्वस्थ आहोत. मात्र आठ-दहा दिवसांपूर्वी भाषण ऐकले तर राज्याच्या इतिहासात असला मुख्यमंत्री आला नाही असे त्यांचे भाषण होते. आता असल्या मुख्यमंत्र्यांसमोर नमस्कार करून काम करणार. आम्ही भाजपसोबत गेलो त्यात काय चुकलं असे सांगण्यात आले. नागालँडमध्ये तुम्ही परवानगी दिली हे सांगितले. ते खरं आहे. प्रामुख्याने चीन आणि पाकिस्तानच्या सीमेवर जी राज्यं आहेत तिथे अतिशय बारकाईने निर्णय घ्यावे लागतात. तिथे उद्रेक झाला आणि त्याचा गैरफायदा शेजारील देशाने घेतला तर त्याची किंमत संपूर्ण देशाला द्यावी लागेल. त्यामुळे त्याठिकाणी बाहेरुन पाठिंबा दिला. इथे आतच जाऊन बसले. त्यामुळे त्यांनी दिलेले उदाहरण माझ्या मते योग्य नाही. जे जे लोक देशात भाजपबरोबर सत्तेत सहभागी झाले तिथे काही कालावधीनंतर जो सहकारी आहे तो उद्ध्वस्त करणे, त्याची मोडतोड करणे हे भाजपचे सूत्र आहे. त्यांनी पक्षात बसून, चर्चा करून निकाल घेतला असता तर अधिक चांगले झाले असते. जे इतर राज्यात घडलंय त्याशिवाय वेगळे काही घडणार नाही. शिवसेना आणि भाजपमध्ये मी फरक करतो. आणीबाणीच्या काळात संपूर्ण देशात स्व. इंदिरा गांधींच्या विरोधात वातावरण होते. त्यावेळी स्व. बाळासाहेब ठाकरेंनी वक्तव्य केले की देशाच्या एकीसाठी इंदिरा गांधींना या संकटात पाठिंबा दिला पाहिजे. सहकार्याची भूमिका घेताना विधानसभेला राज्यात एकही उमेदवार शिवसेनेने उभा न करता काँग्रेसला पाठिंबा दिला. आणीबाणीच्या काळात अजून कटुता वाढू नये यासाठी त्यांनी हा निकाल घेतला होता. त्यामुळे शिवसेना आणि भाजपमध्ये फरक आहे. शिवसेनेचे हिंदुत्व हे अठरा पगड जातीच्या लोकांना घेऊन जाणारे आहे आणि भाजपचे हिंदुत्व हे विभाजनवादी, विषारी, मनुवादी आणि विघातक आहे. माणसामाणसात अंतर वाढवणारे हिंदुत्व भाजपकडून केले जाते. जो समाजाच्या ऐक्याला तडा देतो तो राष्ट्रप्रेमी असू शकत नाही. त्यामुळे जो राष्ट्रप्रेमी नाही त्याच्यासोबत जाण्याची भूमिका आम्ही घेणार नाही. आज देशात महागाई, बेरोजगारी, महिलांवर हल्ले असे प्रश्न आहेत. राज्यात मागील सहा महिन्यांच्या कालावधीत चार हजार मुली बेपत्ता झाल्या आहेत. ज्या राजवटीत महिलांना संरक्षण मिळत नाही त्यांना राज्य चालवण्याचा काय अधिकार आहे? हे राज्य छत्रपती शिवाजी महाराजांच्या विचाराने चालणारे आहे. त्यामुळे या लोकांवर विश्वास योग्य नाही. त्यांना सत्तेपासून बाजूला करून राष्ट्रवादी काँग्रेस पक्ष शक्तीशाली करणे हे एककलमी काम आपल्या सर्वांना करायचे आहे. आपल्यातून कोण गेले त्याची चिंता करू नका. जे गेले त्यांना सुखाने त्याठिकाणी राहू द्या. आपण एकत्र आहोत. त्या सामूहिक शक्तीतून नवीन, कर्तृत्ववान अशा सहकाऱ्यांची पिढी उद्या महाराष्ट्रात उभी करू या.असे ते म्हणाले.

शरद पवारांनी सभा घेतल्या तर मला बोलावे लागेल;

मुंबई : एक वय असतं. त्या वयात थांबावं लागतं. मग तो शेतकरी असो, शासकीय अधिकारी असो वा उद्योपती किंवा राजकारणी… पण वरिष्ठ नेते थांबालयाच तयार नाहीत. ते खूप हट्टी आहेत? पण हे नेमकं कशासाठी? मी सुप्रियाला सांगितलं की तू साहेबांशी बोल, समजावून सांग… पण नाही, त्यांना थांबायचंच नाही. तरुण नेतृत्वाला त्यांना आशीर्वाद द्यायला काय हरकत आहे? मी कुणाच्या पोटी जन्माला आलो नाही, हा माझा दोष आहे का? चुकलं तर चुकलं म्हणून सांगा, पण तसं ते करत नाही, असा हल्लाबोल करताना मागील महिन्यातही त्यांनी राजीनामा दिला आणि तो परतही घेतला. मग राजीनामा परत घ्यायचाच होता तर दिला कशाला? असा सवाल उपमुख्यमंत्री अजित पवार यांनी शरद पवार यांना केला.राष्ट्रवादीतून बंड केल्यानंतर अजित पवार यांच्या गटाची आज पहिलीच जाहीर सभा होतीये. या सभेत छगन भुजबळ, प्रफुल्ल पटेल, धनंजय मुंडे, रुपाली चाकणकर यांनी भाषणं केल्यानंतर अजित पवार यांनीही शरद पवारांवर जोरदार टीका करणारे भाषण केलं. शरद पवार यांच्या राजकीय कारकीर्दीची त्यांनी एकप्रकारे चिरफाडच केली.

अजित पवार म्हणाले, शरद पवार यांच्या मुशीत मी घडलो, त्यांच्या छत्रछायेखाली माझी जडण घडण झाली. ते आपले श्रद्धास्थान आहे. राज्यपातळीवर आणि देशपातळीवर राजकारण चाललंय ते पाहता काही निर्णय गरजेचे आहेत. एखादा पक्ष कशासाठी काम करतो तर लोकांच्या विकासासाठी….

आपल्या वरिष्ठ नेत्यांनी १९६२ ला राजकारणाची सुरुवात केली, ६७ साली आमदार झाले, पुढे मंत्री झाले, १९७८ ला वसंतदादांचं सरकार पाडून साहेब मुख्यमंत्री झाले, १९८० ला पुलोदचा प्रयोग झाला. जेव्हाचा जनसंघ आताचा भाजप साहेबांच्यासोबत होता. १९८० ला निवडणुका झाल्या, इंदिराजींची लाट झाली. इंदिराजी पंतप्रधान झाल्या. इतिहास बघितला तर या देशाला कुणी ना कुणी करिश्मा असलेलं नेतृत्व लागतं. १९७७ ला देशपातळीवर असणारा जनसंघ कुठेय? तर तो शोधावा लागतोय. कारण करिश्मा असणारं नेतृत्व नव्हतं. १९८६ साली समाजवादी काँग्रेस पक्ष काँग्रेस पक्षात विलिन झाली. पवारसाहेबांना देशाने गेली ५५ वर्ष साथ दिली, असं सांगतानाच अजित पवार यांनी विलिनिकरणाचा इतिहास मांडला.

अजित पवार पुढे बोलताना म्हणाले की, मी सुप्रीया सुळे यांना म्हटले होतो की शरद पवार यांचे वय झाले आहे. त्यांनी थांबायला हवे आणि आपल्याला मार्गदर्शन करायला हवे. पण सुप्रीया सुळे यांनी ते हट्टी आहेत ते ऐकणार नाही असे तिने स्पष्ट सांगितले. सुप्रीया सुळे यांना राष्ट्रीय अध्यक्ष करण्यासही मी तयार होतो. मात्र, हे ठरवूननंतर शरद पवार यांनी आपली भूमिका बदलली. आम्ही शरद पवार यांना विठ्ठल मानतो त्यांनी आम्हाला आशीर्वाद देण्याची भूमिका स्वीकारायला हवी असे मत अजित पवार यांनी व्यक्त केली आहे.

अजित पवार पुढे बोलताना म्हणाले की, मला अनेकदा पुढे करत राजकीय टीका करण्यात आली. मला मिळणार असलेली संधी दुसऱ्यांना देण्यात आली. मात्र, मी कधीच काही म्हणालो नाही, मला बदनाम करण्याचा प्रयत्न केला. केवळ मी कोणाच्या पोटी जन्माला आलो नाही ही माझी चूक आहे का असा सवालही अजितदादांनी उपस्थित केला.

अजित पवार पुढे बोलताना म्हणाले की, ठाण्यात तर अशा पठ्याला नेतृत्व देण्यात आले आहे, ज्याने ठाणे जिल्ह्यातील राष्ट्रवादी काँग्रेसचे सर्व नेते बाहेर काढले. अनेक ज्येष्ठ नेत्यांनी ते पक्षात मनमानी करतात म्हणून पक्षाला रामराम ठोकला. त्यांना संध देऊ नका असे मला अनेकदा लोकांनी सांगितले पण त्यांच्या हातात धुरा देण्यात आली. नेता होताना आपल्यासह ३ ते ४ आमदार निवडून आणावे लागतात. बेरजेचे राजकारण करता आले पाहिजे. त्सांना कधी ते जमलेच नाही अशा व्यक्तीच्या हातात पक्षाची धुरा दिली आहे असा टोलाही लगावला आहे.

मुंबई-माझ्या बापाचा व आईचा नाद करायचा नाही. बाकी कुणाबद्दलही बोला. माझ्याबद्दल बोला. पण माझ्या बापाचा नाद करायचा नाही. मी महिला आहे. कुणी बोललं तर टचकण डोळ्यात पाणी येतं. पण संघर्षाची वेळ आली की, हीच महिला पदर खोचून मैदानात उभी राहते. तीच अहिल्या होते व जिजाऊही होते, असा इशारा राष्ट्रवादी काँग्रेसच्या कार्याध्यक्षा सुप्रिया सुळे यांनी बुधवारी अजित पवार व त्यांच्या समर्थक आमदारांना दिला. काही जण पक्षातील वडिलधाऱ्यांना सांगतात की, तुमचे वय झाले, आता थांबा, अरे यांच्या पेक्षा आम्ही मुली बऱ्या, असेही त्या यावेळी अजित पवारांना उद्देशून म्हणाल्या.

काही जण पक्षातील ज्येष्ठांना घरी बसण्याचा सल्ला देत आहेत. यामुळे माझे मन अधिक घट्ट झाले आहे. वय केवळ आकडा असतो. आपल्यात जिद्द असली पाहिजे, असेही सुप्रिया यावेळी म्हणाल्या. यावेळी त्यांनी पंतप्रधान नरेंद्र मोदी यांचाही समाचार घेतला. भाजप हा देशातील सर्वात भ्रष्टाचारी पक्ष आहे. राष्ट्रवादी काँग्रेसला भ्रष्ट पक्ष असल्याचा दावा करणाऱ्यांनीच आज राष्ट्रवादीत फूट पाडून संपूर्ण पक्षच तिकडे नेला, असा आरोप सुप्रिया सुळे यांनी बुधवारी भाजपवर हल्लाबोल करताना केला. यावेळी त्यांनी शरद पवारांना घरी बसण्याचा सल्ला देणाऱ्या अजित पवारांचाही तिखट समाचार घेतला. बापाला घरी बस म्हणणाऱ्या मुलापेक्षा मुलगीच बरी, असे त्या यासंबंधी म्हणाल्या.

पक्ष पुन्हा बांधू त्यात काही होणार नाही, 2019 मध्ये राष्ट्रवादीला 11 जागा मिळणार होत्या, पण तेव्हा शरद पवार बाहेर पडले आणि 54 आमदार निवडून आले. आजपासून भाजपच्या खोटारडेपणाविरुद्ध लढायचे, असा निर्धार सुप्रिया सुळे यांनी व्यक्त केला. ही लढाई एका व्यक्तीच्या विरोधात नाही, फैजल आणि अलिल देशमुख यांच्यावर केस केल्या तरी ते शरद पवार यांच्यासोबत आहेत. वय हा फक्त आकडा आहे, भाजपच्या विरोधात आता जिद्दीने लढणार. स्टेजवरील 8 ते 9 खूर्च्या रिकाम्या झाल्या आहेत तिथे नव्या उमेदवारांना संधी मिळणार असे म्हणत सुप्रीया सुळेंनी महिलांना 33 टक्के आरक्षण द्यावे अशी मागणी केली आहे.

मुंबई-उपमुख्यमंत्री अजित पवार यांच्या नेतृत्वातील राष्ट्रवादीच्या गटाने बुधवारी शरद पवारांची NCP च्या राष्ट्रीय अध्यक्षपदावरून हकालपट्टी केली. तसेच अजित पवार पक्षाचे नवे अध्यक्ष असल्याचा प्रस्तावही पारित केला. प्रफुल्ल पटेल यांनी बोलावलेल्या पक्षाच्या राष्ट्रीय कार्यकारिणीच्या बैठकीत यासंबंधीचा निर्णय घेण्यात आला.

दुसरीकडे, अजित पवार गटाने निवडणूक आयोगाकडे एका पत्राद्वारे राष्ट्रवादी काँग्रेस पक्ष व त्याच्या घड्याळ या निवडणूक चिन्हावरही दावा सांगितला आहे. यासंबंधीचे 40 आमदारांच्या स्वाक्षऱ्यांचे एक पत्र त्यांनी निवडणूक आयोगाला सादर केले आहे. त्यामुळे आता अजित पवारांनी संपूर्ण राष्ट्रवादी पक्षावरच दावा केल्याचे स्पष्ट झाले आहे.

पत्रावर 30 जूनची तारीख

अजित पवार यांनी 40 आमदारांच्या प्रस्तावाचे दस्तऐवज निवडणूक आयोगाकडे सादर केले आहेत. त्यात अजित पवार हे राष्ट्रवादीचे अध्यक्ष असल्याचा उल्लेख आहे. महत्वाचे म्हणजे या पत्रावर 30 जून ही तारीख आहे. त्यावर निवडणूक आयोगाने आपण दोन्ही बाजुंचे म्हणणे ऐकून निर्णय देणार असल्याचे स्पष्ट केले आहे. आता हा निर्णय निवडणूक आयोगाकडे गेल्यामुळे शरद पवारांना कायदेशीर लढाई लढावीच लागणार आहे. एका मराठी वृत्तवाहिनीने यासंबंधीचे वृत्त दिले आहे.

शिवसेनेच्या मार्गाने जाणार लढा

उल्लेखनीय बाब म्हणजे मुख्यमंत्री एकनाथ शिंदे व उद्धव ठाकरे यांच्यातही शिवसेना पक्ष व निवडणूक चिन्हावरून निवडणूक आयोगाकडे याचिका दाखल करण्यात आल्या होत्या. यासाठी कार्यकर्त्यांची शपथपत्रे, पुरावे आदी सादर करण्यात आले होते. त्यानंतर आयोगाने शिवसेना पक्ष व निवडणूक चिन्ह शिंदे गटाला दिले होते. त्याला सर्वोच्च न्यायालयात आव्हान देण्यात आले. पण सध्या या दोन्ही गोष्टी शिंदे गटाकडे आहेत.

दुसरीकडे, शरद पवार गटाचे महाराष्ट्र प्रदेशाध्यक्ष जयंत पाटील यांनी अजित पवारांसह 9 आमदारांना अपात्र घोषित करण्याची मागणी केली आहे.

पवार गटाचे कॅव्हेट दाखल

आमची बाजू ऐकल्याशिवाय निवडणूक आयोगाने राष्ट्रवादी पक्ष आणि चिन्हावर कोणताही निर्णय घेऊ नये, अशी मागणी शरद पवारांनी कॅव्हेटद्वारे निवडणूक आयोगाकडे केली आहे. त्यामुळे आता निवडणूक आयोग काय निर्णय घेणार? हे पाहणे महत्त्वाचे ठरणार आहे. या सर्व घटनाक्रमामुळे राष्ट्रवादीतील सत्तासंघर्ष शिवसेनेच्याच वाटेने जात असल्याचे दिसून येत आहे.

बंडखोरीनंतर वेगवान घडामोडी

अजित पवारांच्या राष्ट्रवादी काँग्रेसमधील बंडखोरीनंतर वेगवान घडामोडी घडत आहेत. अजित पवारांनी बंडखोरीनंतर लगेचच उपमुख्यमंत्रीपदाची शपथ घेऊन शिवसेना-भाजप सरकारला पाठिंबा दिला. त्यानंतर लगेचच राष्ट्रवादी काँग्रेसचे नाव व पक्षचिन्हावर दावा सांगितला. त्यानंतर आता त्यांनी थेट निवडणूक आयोगाकडे याचिका दाखल करून या राष्ट्रवादी काँग्रेस हे नाव व घड्याळ या पक्षचिन्हाची मागणी केली आहे.

दुसरीकडे, राष्ट्रवादीच्या अजित पवार व शरद पवार या दोन्ही गटांनी बुधवारी मुंबईत जोरदार शक्तीप्रदर्शन केले. अजित पवारांच्या गटाच्या मेळाव्याला राष्ट्रवादीचे 30 हून अधिक आमदार उपस्थित होते. तर शरद पवारांच्या बैठकीला 15 हून अधिक आमदारांची हजेरी होती.

मुंबई-

एखाद्या शिष्याने गुरूचा धडा गिरवला तर त्यात गैर काय, हे तर चांगलेच आहे, असे मत मंत्री धनंजय मुंडे यांनी व्यक्त केले आहे. तर अजित पवार यांच्यावर अनेकदा आरोप करत त्यांची प्रतिमा मलिन करण्याचा प्रयत्न करण्यात आला आहे, अशी टीका केली आहे.

दरम्यान धनंजय मुंडे म्हणाले की, 1999 ला राष्ट्रवादी काँग्रेस पक्षाची स्थापना झाली. त्यावेळी छगन भुजबळ यांनी प्रदेशाध्यक्षपदावर काम केले. पहिल्या वर्षांतच सत्ता आली त्यावेळी स्वाभिमानासाठी शरद पवार यांनी निर्णय घेतला होता. मात्र, 3 ते 4 बडव्यांमुळे हा सर्वांना निर्णय घ्यावा लागला, असा आरोप करत धनंजय मुंडे यांनी जयंत पाटील यांच्यावर टीका करण्यात आली.

धनंजय मुंडे म्हणाले की, कठीण प्रसंगामध्ये अतिशय वाईट काळात सर्व नेत्यांनी शरद पवार यांची साथ दिली. तटकेर यांनी 40 वरुण 54 पर्यंत संख्या नेली, कारण अजितदादांनी अनेक वेदना सहन केल्या. मात्र, आमच्या विठ्ठल असेलेल्या शरद पवारांचा शब्द आम्ही तोडला नाही,आणि आज हा निर्णय घ्यावा लागतो तेव्हा किती वेदना सहन कराव्या लागत असतील हे समजून घेणे घेण्यासारखे आहे.

धनंजय मुंडे म्हणाले की,अजितदादांनी अनेकदा त्यांना मिळणारे पद इतर लोकांना दिले आहे.घरातून आणि पक्षातून काढलेल्या माणसाला अजित पवार यांनी मोठे केले आणि ही संधी मला दिली आहे.अजित पवार यांनी त्यांच्या सवालीला देखील आपला अपमान आणि समजू दिला नाही. अजित पवार यांच्यावर अनेकदा अजितदादांना बदनाम करण्यात येत आहे. अजित पवार यांनी सर्व काही सहन करूनही काहीच केले नाही, असे म्हणत आपली खंत व्यक्त केली आहे.आमचे हिंदुत्व छत्रपती शिवाजी महाराज हे आहे. हसन मुश्रीफ यांनी राम मंदिर उभे केले आहे. आम्ही सर्वांना सोबत घेऊन काम करतो.

मुंबई- आम्ही सत्तेत गेलो , साहेबांना वाईट वाटले असेल पण साहेब असेच वसंतदादा पाटलांनाही वाईट वाटले असेल अशा शब्दात काही मागच्या राजकारणाचे उल्लेख करत छगन भुजबळ यांनी थेट शरद पवार यांना टोमणे मारले ते म्हणाले तुमच्या भोवतालच्या बडव्यांना बाजूला करा , आम्ही येतो सारे … जसा नागालँड मध्ये सत्तेत सहभागी होणाऱ्यांना आशीर्वाद देऊन त्यांचा सत्कार केला ,तसा साहेब आम्हालाही परवानगी देऊन आमचाही सत्कार करा असे छगन भुजबळ म्हणाले .

अजित पवार आणि त्यांच्या मातब्बर सहकाऱ्यांनी बंड करत उपमुख्यमंत्री पद घेऊन भाजपा बरोबर सत्तेत सहभागी झाल्यावर आज मुंबईत अजित पवार गटाची बैठक होत आहे सुरुवातीलाच भुजबळ यांनी भाषण केले ते म्हणाले ,’

मागील अनेक दिवसांपासून अजित पवारांनी मुंबईसारख्या महत्त्वाच्या ठिकाणी आपला अध्यक्ष नियुक्त करण्याचा आग्रह धरला होता. पण त्याकडे दुर्लक्ष करण्यात आले. यामुळेच आम्ही वेगळी वाट निवडली, असा दावा छगन भुजबळ यांनी बुधवारी शरद पवार व जयंत पाटील यांच्यावर निशाणा साधताना केला आहे. आम्ही सत्तासंघर्षाच्या निकालाचा अभ्यास करूनच वेगळी वाट निवडली. त्यामुळे आमच्यावर कोणतीही कारवाई होणार नाही, असा विश्वासही त्यांनी यावेळी सुप्रीम कोर्टाच्या निर्णयाचा दाखला देत व्यक्त केला.

काय म्हटलं आहे छगन भुजबळ यांनी?

“मी तुरुंगातून बाहेर आलो तेव्हा अनेकांनी आमिषं दाखवली. पण आम्ही गेलो नाही. शरद पवारांशी एकनिष्ठ राहिलो आणि काम केलं. पण आता काय हा प्रश्न आहेच. साहेबांना (शरद पवार) वाईट वाटणं स्वाभाविक आहे. दिलीप वळसे पाटील यांच्यापासून सगळी मंडळी गेल्यानंतर त्यांच्या डोळ्यात पाणी तरळणं स्वाभाविक आहे.” असं छगन भुजबळ यांनी म्हटलं आहे

शरद पवार आमचे विठ्ठल
“आम्हाला विचारलं जातं की शरद पवारांचा फोटो का वापरला? अरे, साहेब आमचे विठ्ठल आहेत, पण त्या विठ्ठलाला बडव्यांनी घेरलं आहे. त्या बडव्यांना बाजूला करा आणि आम्हाला आशीर्वाद द्यायला या अशी माझी शरद पवार यांना विनंती आहे. मला एक सांगा ही सगळी मंडळी वेडी आहेत का? जी आमच्याबरोबर आली आहेत. आमच्या बरोबर आलेले काही लोक तर आमदार किंवा नामदारही नाहीत. पण तिथे (शरद पवार गट) काम करणारे पदाधिकारी या सगळ्याला जबाबदार आहेत. पक्षाच्या कार्यकर्त्यांना नीट वागवायचं नाही.
आजही माझ्या मनात शरद पवारांविषयी प्रेम आहे. पण आपण वसंतदादांना सोडलं तेव्हा वसंत दादांनीही असंच वाईट वाटलं. मी बाळासाहेब ठाकरेंसह होतो. मी त्यांना आई वडिलांच्या ठिकाणी मानत होतो. पण ३६ लोक तुमच्याकडे आले होते. तेव्हा मलाही येणं भाग पडलं. तुम्ही सांगितलं नाही की तिथे थांबा. मी तुमच्याबरोबर आलो. त्यावेळी बाळासाहेब ठाकरे आणि माँसाहेबांनाही असंच वाईट वाटलं. धनंजय मुंडे यांना राष्ट्रवादीत घेतलं तेव्हा त्यांचे काका गोपीनाथ मुंडे आणि बहीण पंकजा मुंडे यांनाही असंच वाईट वाटलं. या सगळ्याची पुनरावृत्ती झाली आहे. अजूनही काही बिघडलेलं नाही. अजित पवारांच्या नेतृत्त्वात आम्ही शेतकऱ्यांसाठी, ओबीसींसाठी, दलितांना न्याय देण्यासाठी काम करणार आहोत.” असंही भुजबळ यांनी म्हटलं आहे.
छगन भुजबळ यांनी शरद पवार आमचे विठ्ठल आहेत आणि त्यांना बडव्यांनी घेरलं आहे असं वक्तव्य करताच राष्ट्रवादीतले बडवे कोण? अशी चर्चा सुरु झाली आहे. जयंत पाटील, जितेंद्र आव्हाड हे यामध्ये येतात का? अशीही चर्चा राजकीय वर्तुळात रंगली आहे.