पुणे, दि.४ :- निवडणूक प्रक्रियेमध्ये कोणताही आदर्श आचारसंहितेचे पालन व्हावे यासाठी भारत निवडणूक आयोगाने तयार केलेल्या ‘सी-व्हिजिल’ ॲपवर मतदार संघात होत असलेल्या आचारसंहिता उल्लंघनाच्या तक्रारी नागरिकांना नोंदविण्याची सुविधा देण्यात आली आहे.

जिल्ह्यातील २०५- चिंचवड व २१५- कसबा पेठ विधानसभा मतदारसंघ पोटनिवडणुकीचा कार्यक्रम जाहीर झाला असून दिनांक २६ फेब्रुवारी २०२३ रोजी मतदान होणार आहे. निवडणुकीदरम्यान आचारसंहितेचे उल्लंघन, अवैध जाहिरात फलक, मतदारांना पैसे वाटप, दारु वाटप, भेट वस्तू किंवा आमिष दाखवणे, कोणत्याही प्रकारचे शस्त्र दाखवून धमकावणे आदी प्रकारच्या तक्रारी ऑनलाईन पद्धतीने करता येतील. यासाठी प्ले स्टोअरवर जाऊन ‘सी-व्हिजिल’ (cVIGIL) ॲप मोफत डाऊनलोड करता येते.

ॲप सुरु करुन त्यामध्ये छायाचित्र, व्हिडीओ किंवा ऑडिओ तयार करुन पोस्ट केल्यांनतर तक्रारीची नोंद होते. तक्रार नोंदवल्यानंतर पाच मिनीटामध्ये ही माहिती भरारी पथकाला पाठवली जाते. भरारी पथकाकडून तातडीने याबाबत चौकशी करून निवडणूक निर्णय अधिकारी यांना अहवाल सादर केला जातो आणि संबंधित निवडणूक निर्णय अधिकारी तातडीने त्याच्यावर कारवाई करतात तक्रारीचे स्वरुप व संख्येनुसार हा वेळ कमी-अधिक होतो.

तक्रारीचे निरसन झाल्यानंतर तक्रारदारास ॲपद्वारे संदेश जातो. याशिवाय आचारसंहिता कक्षाकडे देखील आचारसंहिता भंगा बाबत तक्रारी दाखल केल्या जाऊ शकतात, अशी माहिती उप जिल्हाधिकारी तथा समन्वय अधिकारी सचिन इथापे यांनी दिली

पोट निवडणूक कार्यक्रम जाहीर झाल्यापासून नोंद झालेल्या ५२ तक्रारींचे निरसन करण्यात आले आहे, अशी माहितीही श्री. इथापे यांनी दिली.
0000

पुणे :’सोसायटी ऑफ हिटिंग ,रेफ्रिजरेटिंग अँड एयर कंडिशनिंग इंजिनियर्स ‘च्या वतीने ‘सस्टेनेबिलिटी इन हाय राईझ’ विषयावर ग्रीन कॉन्क्लेव्ह चे आयोजन करण्यात आले होते. सुझलॉन वन अर्थ(केशवनगर,हडपसर) येथे ४ फेब्रुवारी रोजी सकाळी १० ते सायंकाळी ६ या वेळात ही कॉन्क्लेव्ह झाली. ‘मराठा चेंबर ऑफ कॉमर्स अँड इंडस्ट्रीज’चे महासंचालक प्रशांत गिरबाने प्रमुख पाहुणे म्हणून उपस्थित होते.

पुण्यात ३० मजली,५५ मजली उंच इमारतींची बांधकामे चर्चेत आहेत. आहे.निवासी इमारती,व्यावसायिक इमारती किंवा दोन्हीही असलेल्या इमारती स्मार्ट सिटी आणि इतर भागात आकाराला येणार आहेत. पुण्याची क्षितिजे उंचावणाऱ्या या इमारतींच्या बांधकामामुळे शाश्वत विकासाबाबत चर्चा घडवून आणण्यासाठी ही परिषद आयोजित करण्यात आली . आर्किटेक्ट,सल्लागार,अभियंते ,नागरिक प्रतिनिधी असे ३०० जण या परिषदेत सहभागी होते. या एक दिवसीय कॉन्क्लेव्ह मध्ये पंकज धारकर,एन एस चंद्रशेखर,आनंद चोरडिया,चेतन सिंग सोळंकी हे पाहुणे म्हणून उपस्थित होते.डॉ केरी चॅन,केन यिंग,डॉ हरिहरन,मिली मुजुमदार,अनुजा सावंत,अरविंद सुरंगे यांनी मार्गदर्शन केले. सानिका पागे यांनी सूत्रसंचालन केले. ‘सोसायटी ऑफ हिटिंग ,रेफ्रिजरेटिंग अँड एयर कंडिशनिंग इंजिनियर्स ‘च्या पुणे चॅप्टर चे अध्यक्ष वीरेंद्र बोराडे,कॉन्क्लेव्ह च्या निमंत्रक, अंशुल गुजराथी, कर्नल सुनील नरूला यांनी स्वागत केले.

यावेळी अरविंद सुरंगे,अमोल उंबरजे, सुभाष खनाडे,विशाल पवार, उल्हास वटपाल, अभिजीत पवार, केतन चौधरी दीपक वाणी, नंदकिशोर मातोडे, अरुण चिंचोरे, रितेश खेरा, सुजल शाह, सिध्दांत जैन,आशुतोष जोशी,अमित गुळवडे,नंदकिशोर कोतकर,विमल चावडा,चेतन ठाकूर,सिम्पल जैन, देविका मुथा, सानिका इत्यादी मान्यवर उपस्थित होते.

कार्बन न्यूट्रल शहरांसाठी स्वयंप्रेरणेने प्रयत्न व्हावेत : प्रशांत गिरबाने

प्रशांत गिरबाने म्हणाले, ‘कार्बन न्यूट्रल पुण्यासाठी एकत्रित प्रयत्न करावेत. त्यासाठी सक्ती करण्याची वेळ येता कामा नये.जागृती घडवून स्वयंप्रेरणेने हे काम झाले पाहिजे. मराठा चेंबर ऑफ कॉमर्स अॅण्ड इंडस्ट्रीज योगदान देईल.

एन.एस. चंद्रशेखर म्हणाले, ‘लोकसंखा, शहरांप्रमाणे रिएल इस्टेट मार्केट वाढत आहे. ३० टक्के जीडीपीमध्ये या क्षेत्राचा वाटा आहे. कार्बन उत्सर्जन देखील वाढत आहे. वीजेचा वापर कमी केला पाहिजे.आपल्या इमारती मुळे परिसंस्थेवर परिणाम होऊ देता कामा नये. आम्ही आमच्या सदस्यांना उर्जा वापरात स्वावलंबी होण्याचा आग्रह धरत आहोत. पुढील पिढयांना चांगल्या गोष्टी , पर्यावरणपूरक विकास दिला पाहिजे.पृथ्वी -पर्यावरण – परिवर्तन ही शाश्वत विकासाची त्रिसूत्री ठरली पाहिजे.

डिकार्बनायझेशन बद्दल बोलताना मिली मुजुमदार म्हणाल्या, ‘ भारत हा कार्बन उत्सर्जनाबाबत जगात तिसऱ्या कमांकावर आहे. ५७ टक्के उत्सर्जन वीज वापर, उष्णता यामुळे होते. २४ टक्के उत्सर्जन इंधन जाळल्याने तर १८ टक्के बांधकामात सिमेंट -लोखंड वापरल्याने होते. त्यावर पर्यावरणस्नेही उपाययोजना केल्या पाहिजेत. बांधकाम साहित्य, वातानुकूलन, रेन वॉटर हार्वेस्टिंग, जमेल तिथे पुनर्वापर या मुद्दयांचा विचार केला पाहिजे.

एसिया पॅसिफिक ग्रीन बिल्डींग कौन्सिल चे अध्यक्ष कॅरी चॅन यांनी दूरदृश्यप्रणालीद्वारे मार्गदर्शन केले.

इमारतींची वाढती उंची आणि शाश्वत विकास या विषयावर विचारमंथन

डी कार्बनायझेशन ,एयर क्वालिटी,हेल्थ,प्रॉडक्टिव्हिटी अँड सस्टेनेबिलिटी’ ,स्टेकहोल्डर्स इंटरव्हेन्शन फॉर हाय राईज’,इश्युज अँड रिझॉल्युशन्स -सर्व्हिसेस इन हाय राईज’,’पावरिंग सस्टेनेबल इंडिया विथ ग्रीन फायनान्स’ अशा विषयावर चर्चासत्रे या परिषदेत आयोजित करण्यात आली होती.

मान्यवरांचा गौरव :

आपल्या क्षेत्रात उल्लेखनीय योगदान दिलेल्या मान्यवरांचा यावेळी विविध पुरस्कार देऊन सत्कार करण्यात आला. आनंद चोरडिया(अर्थ अवॉर्ड),सुभाष देशपांडे(वॉटर अवॉर्ड),पंकज धारकर(फायर अवॉर्ड),एन एस चंद्रशेखर(विंड अवॉर्ड),विश्वास कुलकर्णी(स्पेस अवॉर्ड),प्रदीप भार्गव (इलेमंट ऑफ सस्टेनेबिलिटी अवॉर्ड),चेतन सोळंकी(एलेमेंट ऑफ एनर्जी),शीतल भिलकर(वूमन आयकॉन अवॉर्ड) यांचा त्यात समावेश आहे.ख्रिस्तोफर बेनिंजर यांच्या हस्ते या पुरस्कारांचे वितरण करण्यात आले.

फॅब्रिक सॉक्स,विप्रो,ग्राउंड ११ आर्किटेक्टस,असाही इंडिया ग्लास लि.,७५ एफ, गेब्रिट,चतुर प्रेमानंद वासवानी,प्रोलिट ऑटोग्लो यांच्या सहकार्याने ही कॉन्क्लेव्ह पार पडली. आर्किटेक्ट,इंजिनिअर्स अँड सर्व्हेअर्स असोसिएशन, एफ एस ए आय,जीबीसी आय,इन्फ्रा,ऑसम,इसले,सस्टेनेबिलिटी इनिशिएटिव्ह्ज या संस्थांनी संयोजनात सहकार्य केले.

पुणे- महापालिकेच्या स्थायी समितीवर ३ वेळा स्थायी समिती अध्यक्षपदाची संधी दिल्यानंतर आता भाजपाने पुन्हा हेमंत रासने यांना कसबा पेठ विधानसभेच्या पोटनिवडणुकीसाठी उमेदवारी दिली आहे . यामुळे भाजप जिसे देता है, छप्पर फाडके देता है .. हा मेसेज तर पुण्यात गेलाच पण त्याबरोबरच कसब्यात प्रथमच ब्राम्हण समाजाच्या उमेदवारांना डावलल्याने भाजपा मध्ये सुप्त चर्चा सुरु झाली आहे. हा एकच मतदार संघ या समाजासाठी सोडण्यात येत होता .जो भाजपचा बालेकिल्ला देखील मानला जात आहे.

दरम्यान भाजपाने छप्पर फाडके देण्याची हि परंपरा आजची नसून गेल्या ५ वर्षात मोहोळ आणि रासन यांच्यावर अशीच पदांची बरसात केली आहे याकडेही लक्ष वेधले जाते आहे.तर दुसरीकडे विरोधकांच्या ब्राम्हणविरोधी टीकेला लगाम बसावा म्हणून देखील हे पाउल महत्वाचे ठरेल असाही सूर आहे. आणि कदाचित बिनविरोध निवडणूक व्हावी या दृष्टीने हा निर्णय घेतला असावा असेही काहींना वाटते आहे.दरम्यान उमेदवारी जाहीर झाल्यावर रासने यांच्यावर एकीकडे अभिनंदनाचा वर्षाव सुरु आहे तर दुसरीकडे कुजबुज सुरु झाली आहे .

दरम्यान चिंचवडची उमेदवारी देताना मात्र भाजपाने परंपरा पाळली आहे. चिंचवड विधानसभा पोटनिवडणुकीसाठी भाजपने परंपरागत दिवंगत आमदार लक्ष्मण जगताप यांच्या पत्नी अश्विनी लक्ष्मण जगताप यांना उमेदवारी दिली आहे. 

पुणे दि. ३: जलयुक्त शिवार योजनेच्या माध्यमातून आर्ट ऑफ लिव्हींगने अनेक गावांमध्ये जाऊन तिथला दुष्काळ दूर केला, शेतकऱ्यांपर्यंत पाणी पोहोचवले. शेतकऱ्याच्या डोळ्यातले पाणी पुसून त्याच्या शेतीला पाणी मिळवून देण्याचे हे अतुलनीय कार्य आहे, असे गौरवोद्गार उपमुख्यमंत्री देवेंद्र फडणवीस यांनी काढले.

कोथरूड येथे आयोजित भक्ती उत्सव-महासत्संग कार्यक्रमात ते बोलत होते. यावेळी पालकमंत्री चंद्रकांत दादा पाटील, गुरूदेव श्री श्री रविशंकर, आमदार भीमराव तापकीर, शहाजी बापू पाटील, उद्योजक अनिरुद्ध देशपांडे, सूर्यकांत काकडे, माजी महापौर मुरलीधर मोहोळ, विशाल गोखले आदी उपस्थित होते.

उपमुख्यमंत्री श्री.फडणवीस म्हणाले, आर्ट ऑफ लिव्हींगच्या माध्यमातून अनेक लोकांचे जीवन सुधारत असताना सामाजिक दायित्वही गुरूदेवांनी आपल्याला शिकवले. शेतकऱ्यांच्या जीवनात परिवर्तन घडवून आणण्याचे आणि महाराष्ट्रातील १७ नद्यांच्या पुनरुज्जीवनाचे कार्य आर्ट ऑफ लिव्हींगच्या स्वयंसेवकांनी केले. जलयुक्त शिवार योजनेच्या कामात चांगले काम करणाऱ्या स्वयंसेवी संस्थांमध्ये आर्ट ऑफ लिव्हींग अग्रेसर होती.

गुरूदेव भारतीय संस्कृतीचे संदेशवाहक
गुरूदेव श्री श्री रविशंकर यांनी संपूर्ण भारतात आणि जगातील अनेक देशात भारतीय संस्कृती आणि भारतीय अध्यात्म लोकांमध्ये जागृत केले आणि त्यांच्या रुपाने भारतीय संस्कृतीचे संदेश वाहक पहायला मिळाले. जागतिक शांती परिषदेच्या माध्यमातून जगातल्या सर्व धर्मांना एकत्र करण्याचे कार्य गुरूदेवांनी केले. हे करत असताना भारतीय विचारांचे श्रेष्ठत्व स्वामी विवेकानंद यांच्यानंतर जगाला पटवून देण्याचे कार्य गुरूदेवांनी केले.

विज्ञानासह अध्यात्म हा श्री श्री रविशंकर यांच्या विचारांचा गाभा आहे. या विचारांमुळेच जगाच्या पाठीवर अस्तित्वात असलेली अत्यंत प्राचीन सभ्यता म्हणून भारताकडे पाहिले जाते, असे उपमुख्यमंत्री म्हणाले.

अथर्वशिर्ष पठणाचा विक्रम पुण्यात झाल्याचे नमूद करून पुणे हे बुद्धी अणि विद्येचे माहेरघर असल्याने इथेच अथर्वशिर्षाचे पठण होणे स्वाभाविक आहे आणि अथर्वशिर्ष पठणाचा विक्रम पुण्यातच होऊ शकतो, असेही श्री.फडणवीस म्हणाले.

यावेळी श्री श्री रविशंकर म्हणाले, पुणे शहरात आणि महाराष्ट्रात सर्वत्र गणेशोत्सवाच्या माध्यमातून भक्तीचा सोहळा साजरा होतो. तीक्ष्ण बुद्धी आणि कोमल भाव ही भारतीय संस्कृतीची देणगी आहे. मानसिक स्वास्थ्यासाठी ध्यान आवश्यक असल्याचे जगातील सर्व देशांनी मान्य केले आहे. आयुर्वेद, योग, ध्यान, आध्यात्मिक ज्ञान ही भारताची श्रेष्ठ संपत्ती आहे, असे त्यांनी सांगितले.

कार्यक्रमाच्या सुरूवातीला सामुहिक अथर्वशिर्ष पठणाचा जागतिक विक्रम करण्यात आला. या विक्रमाचे प्रमाणपत्र एशिया बुक ऑफ रेकॉर्ड आणि इंडिया बुक ऑफ रेकॉर्डसच्या डॉ.चित्रा आणि वर्ड बुक ऑफ लंडनचे डॉ.दीपक हरके यांच्या हस्ते गुरूदेव श्री श्री रविशंकर यांना प्रदान करण्यात आले.
000