पुणे श्रमिक पत्रकार संघाच्या वार्षिक निवडणुकीत (२०२३-२०२४) अध्यक्षपदी दैनिक पुढारीचे वरिष्ठ पत्रकार पांडुरंग सांडभोर यांची तर सरचिटणीसपदी सुकृत मोकाशी ( तरुण भारत ) व खजिनदार पदी अंजली खमितकर (दै. प्रभात) यांची निवड झाली आहे.

निवड झालेल्या पदाधिकारी

अध्यक्ष : पांडुरंग सांडभोर (दै. पुढारी)
उपाध्यक्ष : उमेश शेळके (दै. सकाळ )
स्वप्निल शिंदे (दै. महाराष्ट्र टाईम्स)
सरचिटणीस : सुकृत मोकाशी (तरुण भारत)
खजिनदार : अंजली खमितकर (दै. प्रभात)
चिटणीस : पूनम काटे – कलापुरे (दै. राष्ट्र संचार )
प्रज्ञा केळकर – सिंग (दै. पुढारी )
कार्यकारिणी सदस्य
हर्ष दुधे (दै. महाराष्ट्र टाईम्स)
वरद पाठक (दै. महाराष्ट्र टाईम्स)
विक्रांत बेंगाळे (दै. आज का आनंद)
शहाजी जाधव (दै. सकाळ )
श्रद्धा सिदीड (दै. महाराष्ट्र टाईम्स)
विनय पुराणिक (दै. पुण्यनगरी )
गणेश राख (दै.सामना )
संभाजी सोनकांबळे (दै.लोकमत)
शंकर कवडे (दै. पुढारी )
भाग्यश्री जाधव (दै. पुढारी )

अॅड. प्रताप परदेशी, अॅड. स्वप्नील जोशी, निवडणूक निर्णय अधिकारी म्हणून काम पहिले होते.

कौशल्याभिमुख शिक्षण घेण्यावर भर द्यायला हवा-विवेक वेलणकर यांचे प्रतिपादन
पुणे : “आत्मनिर्भर भारताचे स्वप्न साकारायचे असेल, तर कुशल मनुष्यबळाची मोठी गरज आहे. तंत्रज्ञानामुळे सर्वच क्षेत्रात रोजगार व स्वयंरोजगाराच्या अनेक संधी खुणावत आहेत. त्यामुळे विद्यार्थ्यांनी पारंपरिक शिक्षणासोबत कौशल्याभिमुख शिक्षण घेण्याला अधिक प्राधान्य द्यायला हवे,” असे प्रतिपादन ज्येष्ठ माहिती अधिकार कार्यकर्ते व सजग नागरिक मंचाचे अध्यक्ष विवेक वेलणकर यांनी केले.

क्रांतिवीर लहुजी वस्ताद प्रतिष्ठान, पुणे आयोजित ३३ व्या हिंदू मागासवर्गीय विद्यार्थ्यांच्या गौरव समारंभात विवेक वेलणकर बोलत होते. बालगंधर्व रंगमंदिरात आयोजित कार्यक्रमात क्रांतिवीर लहुजी वस्ताद प्रतिष्ठानचे अध्यक्ष मिलिंद एकबोटे, क्रांतिवीर लहुजी यांचे वंशज किसन जाधव, ठाणे जनता सहकारी बँकेचे उपसरव्यवस्थापक राजीव कुमार मिश्रा, मातंग विकास संस्थेचे अध्यक्ष राजेश रासगे, रामोशी समाजाचे नेते सुनील जाधव, मॉडर्न शाळेच्या मुख्याध्यापिका रोहिणी काळे, डॉ. नंदकिशोर एकबोटे, अशोक लोखंडे आदी उपस्थित होते. सुहास पासलकर, हरिश्चंद्र कोंढरे, मंगेश नलावडे, अभिजित पतंगे, राजेंद्र जाधव, दीपक पाटील, प्रा. शांताराम पिंगळे, पराग शिवदास, राजू पाटील यांनी कार्यक्रमाचे यशस्वी संयोजन केले.
क्रांतिवीर लहुजी वस्ताद पुरस्कार सामाजिक कार्यकर्ते राजेश रासगे, पूजनीय गोळवलकर गुरुजी पुरस्कार विद्यार्थिनी सोनाली खैरे (सन्मानचिन्ह, श्रीफळ, उपरणे व प्रत्येकी रोख ११ हजार रुपये), वंदनीय लालबहादूर शास्त्री पुरस्कार विद्यार्थी ओंकार खाडे (सन्मानचिन्ह, श्रीफळ, उपरणे व रोख ५ हजार रुपये) यांना प्रदान करण्यात आला. डॉ. बाबासाहेब आंबेडकर पारितोषिक अस्मिता चंदनशिवे, आद्यक्रांतिकारक उमाजी नाईक पारितोषिक ईश्वर आखाडे, संत रोहिदास पारितोषिक सुजाता खडसे व स्वातंत्र्यवीर सावरकर पारितोषिक स्मिता वाघमारे या विद्यार्थ्यांना देण्यात आले. तसेच ८००-९०० मागासवर्गीय विद्यार्थ्यांचा यावेळी प्रमाणपत्र व भेटवस्तू देऊन गौरव करण्यात आला.
विवेक वेलणकर म्हणाले, “दहावी आणि बारावीचा टप्पा महत्त्वाचा असतो. व्यावसायिक अभ्यासक्रम शिकण्यावर भर दिला पाहिजे. आपल्यातील क्षमता, कला ओळखून करिअरची दिशा ठरवली पाहिजे. आयटीआय, डिप्लोमा, व्होकेशनल कोर्स, नर्सिंग, हॉटेल मॅनेजमेंट, फार्मसी असे जगभरात मोठी मागणी असणाऱ्या क्षेत्रात करिअरच्या अनेक संधी आहेत. त्या समजून घेत आवश्यक शिक्षण घेतले, तर नोकरी व व्यवसायाच्या अनेक वाटा आपल्याला मिळतील.”

प्रास्ताविकात मिलिंद एकबोटे म्हणाले, “अनेक हालअपेष्टा सहन करूनही ज्यांनी हिंदू धर्म सोडला नाही, त्या दलित बांधवाचे आमच्यावर उपकार आहेत, हा गोळवलकर गुरुजींचा विचार घेऊन आम्ही गेली ३३ वर्षे हा कार्यक्रम घेत आहोत. हिंदू समाजातील मागासवर्गीय विद्यार्थ्यांनी अत्यंत खडतर परिस्थितीत हे यश मिळवलेले असते. दलित, उपेक्षित नाहीत, तर हे प्रगतीशील बांधव आहेत. हिंदू धर्माच्या रक्षणासाठी योगदान देणाऱ्या लहुजी साळवे, उमाजी नाईक, डॉ. बाबासाहेब आंबेडकर यांचा आदर्श ठेवून चांगले शिकावे व राष्ट्र कार्यात योगदान द्यावे.”

राजीव कुमार मिश्रा यांनी विद्यार्थ्यांचे कौतुक केले. करिअरच्या विविध संधी त्यांनी सांगितल्या. तसेच अभ्यासातील सातत्य, चिकाटी आणि प्रामाणिकपणा तुम्हाला यश मिळवून देते, असे नमूद केले. रोहिणी काळे, राजेश रासगे, सुनील जाधव यांनी विद्यार्थ्यांना मार्गदर्शन केले. दीपक पाटील यांनी सूत्रसंचालन केले. प्रा. शांताराम पिंगळे यांनी आभार मानले.

पुणे-पंतप्रधान नरेंद्र मोदी 1 ऑगस्ट रोजी महाराष्ट्रातील पुणे दौऱ्यावर जाणार आहेत. पंतप्रधान सकाळी 11 वाजता दगडूशेठ गणपती मंदिरात जाऊन दर्शन घेऊन   पूजाअर्चा करणार आहेत. सकाळी 11.45 वाजता पंतप्रधानांना लोकमान्य टिळक राष्ट्रीय पुरस्कार प्रदान करण्यात येईल. त्यानंतर, दुपारी 12:45 वाजता पंतप्रधान मेट्रो रेल्वेला हिरवा झेंडा दाखवणार आहेत तसेच विविध विकास प्रकल्पांचे उद्घाटन आणि पायाभरणी करणार आहेत.

पंतप्रधान मेट्रो रेल्वेला हिरवा झेंडा दाखवून पुणे मेट्रो टप्पा 1 च्या कार्य पूर्ण झालेल्या दोन मार्गिकांच्या सेवेचे लोकार्पण करणार आहेत. हे विभाग फुगेवाडी स्थानक ते दिवाणी न्यायालय स्थानक तसेच गरवारे महाविद्यालय स्थानक ते रुबी हॉल क्लिनिक स्थानकापर्यंत आहेत. 2016 मध्ये पंतप्रधानांच्याच हस्ते या प्रकल्पाची पायाभरणी झाली होती. मेट्रो रेल्वेचे हे नवीन विभाग पुणे शहरातील शिवाजी नगर, दिवाणी न्यायालय, पुणे महानगरपालिका कार्यालय, पुणे आरटीओ आणि पुणे रेल्वे स्थानक यांसारखी महत्त्वाची ठिकाणे जोडतील. देशभरातील नागरिकांना आधुनिक आणि पर्यावरणस्नेही गतिमान शहरी वाहतूक व्यवस्था उपलब्ध करून देण्याच्या पंतप्रधानांच्या दृष्टीकोनाला साकार करण्याच्या दिशेने हे लोकार्पण एक महत्त्वाचे पाऊल आहे.

छत्रपती शिवाजी महाराज यांच्यापासून प्रेरणा घेत मेट्रो रेल्वे मार्गावरील काही मेट्रो स्थानकांची रचना करण्यात आली आहे. छत्रपती संभाजी उद्यान मेट्रो स्थानक आणि डेक्कन जिमखाना मेट्रो स्थानकांची रचना ही छत्रपती शिवाजी महाराजांच्या मावळ्यांनी परिधान केलेल्या पगडी सारखी म्हणजेच ज्याला “मावळा पगडी” देखील म्हटले जाते, या सारखी आहे. शिवाजी नगर भूमिगत मेट्रो स्थानकाची एक विशिष्ट रचना आहे जी छत्रपती शिवाजी महाराजांनी बांधलेल्या किल्ल्यांची आठवण करून देते.

आणखी एक वैशिष्ट्य म्हणजे दिवाणी न्यायालय मेट्रो स्थानक. हे देशातील सर्वात खोलवर असलेल्या मेट्रो स्थानकांपैकी पैकी एक आहे, ज्याचा सर्वात खोल बिंदू 33.1 मीटर आहे. सूर्यप्रकाश थेट फलाटावर पडेल अशा पद्धतीने या स्थानकाचे छत बनवण्यात आले आहे.

पिंपरी चिंचवड महानगरपालिका (पीसीएमसी) अंतर्गत कचऱ्यापासून ऊर्जा निर्माण करणाऱ्या (वेस्ट टू एनर्जी) संयंत्राचे उद्घाटन पंतप्रधान करणार आहेत. सुमारे 300 कोटी रुपये खर्चून विकसित करण्यात आलेल्या या संयंत्राच्या माध्यमातून दरवर्षी सुमारे 2.5 लाख मेट्रिक टन कचरा वापरून वीज निर्मिती केली जाईल.

सर्वांसाठी घरे या उद्दिष्टपूर्तीच्या ध्येयाकडे वाटचाल करत, प्रधानमंत्री आवास योजनेंतर्गत पिंपरी चिंचवड महानगरपालिकेद्वारे बांधण्यात आलेली 1280 हून अधिक घरे पंतप्रधानांच्या हस्ते हस्तांतरीत करण्यात येणार आहेत. पुणे महापालिकेने प्रधानमंत्री आवास योजनेअंतर्गत बांधलेली 2650 हून अधिक घरे देखील पंतप्रधान हस्तांतरित करणार आहेत. त्यांनतर प्रधानमंत्री आवास योजनेअंतर्गत पिंपरी चिंचवड महानगरपालिकेद्वारे बांधण्यात येणार्‍या सुमारे 1190 घरांची आणि पुणे महानगर प्रदेश विकास प्राधिकरणाकडून बांधण्यात येणाऱ्या 6400 हून अधिक घरांची पायाभरणी देखील पंतप्रधानांच्या हस्ते होणार आहे.

पंतप्रधानांना लोकमान्य टिळक पुरस्कार प्रदान केला जाणार आहे. लोकमान्य टिळकांच्या परंपरेचा सन्मान म्हणून दिल्या जाणाऱ्या या पुरस्काराचा आरंभ टिळक स्मारक संस्थेने 1983 मध्ये केला. देशाची प्रगती आणि विकास यासाठी कार्य केलेल्या तसेच त्या बाबतीत उल्लेखनीय आणि विशेष योगदान देणाऱ्या व्यक्तींना हा पुरस्कार दिला जातो. लोकमान्य टिळकांची पुण्यतिथी म्हणजे 1 ऑगस्टला दरवर्षी हा पुरस्कार प्रदान केला जातो.

पंतप्रधान या पुरस्काराचे 41 वे मानकरी असतील. हा पुरस्कार मिळालेल्या दिगजांमध्ये डॉक्टर शंकर दयाळ शर्मा, प्रणव मुखर्जी, अटल बिहारी वाजपेयी, इंदिरा गांधी, मनमोहन सिंग, एन आर नारायण मूर्ती, डॉ. ई‌. श्रीधरन या व्यक्तींचा समावेश आहे.

पुणे- आंधळ दळतय आणि कुत्र पीठ खातय अशी पुणे महानगरपालिकेची अवस्था झाली आहे, गेली काही महिने हवी तिथे बदली , थेट वरून करविण्याचा घाट घालून एक माजी लोकप्रतिनिधी करोडोची माया गोळा करत असल्याची महापालिकेत चर्चा असतानाच आता पाच वर्ष भाजपा आणि प्रशासन यांनी रस्त्यांच्या कामात देखील घोटाळे केल्याच्या चर्चेला उत आला आहे. ..कागदोपत्री रस्ते अन प्रत्यक्षात बिलांच्या रकमा मात्र खिशात असा प्रकार झाल्याचा आरोप आता उघड उघड होऊ लागला आहे. याच पार्श्वभूमीवर आता शिवसेनेचे शहर अध्यक्ष संजय मोरे यांनी देखील पाच वर्षात झालेले रस्ते , रस्ते दुरुस्तीची कामे तसेच सल्लागारांच्या नेमणुका आणि त्यांचा कारभार याबाबत सीबीआय चौकशी करावी अशी मागणी मुख्यमंत्री एकनाथ शिंदे यांच्याकडे केली आहे.
त्यांनी मुख्यमंत्र्यांना दिलेल्या पत्रात असे म्हटले आहे कि,’ पुणे महानगरपालिकेने पाच वर्षांमध्ये अडीच हजार कोटी रुपये सिमेंट काँक्रिट व डांबरी रस्ते करण्यावर खर्च केले. तरीदेखील पुणे शहरातील रस्त्यांवर खड्ड्यांच साम्राज्य दिसतच आहे. गेल्या काही वर्षांमध्ये पैसे उकळण्याचे नवीन फॅड आलय, तज्ञ सल्लागार नेमायचा आणि त्या सल्लागारांनी आपली फी घ्यायची आणि महानगरपालिकेच्या कामाकडे दुर्लक्ष करायचं. अधिकाऱ्यांनी कंत्राटदाराच्या हातात हात घालायचा ही पद्धत चालू झाली आहे. सल्लागाराला आपण बिलाच्या अडीच टक्के फी देतो कामाचा दर्जा तपासणीचे काम त्याचेच आहे ते फक्त कागदांवर सह्या करतात प्रत्यक्ष साइटवर सल्लागार कधीच फिरकत नाहीत. इस्टिमेट तयार करताना PWD चा DSR वापरतात तो बाजार भावाने प्रमाणेच असतो, तरीदेखील चाळीस टक्के पर्यंत टेंडर बिलो गेल्यावर कामाचा दर्जा कसा काय राहणार ?
इस्टिमेट कमिटी त्या रस्त्याची मेंटेनन्सची जबाबदारी पाच वर्षांसाठी काम केलेल्या ठेकेदारावर टाकते त्यासाठी त्याला पैसेही वाढवून दिले जातात. परंतु पावसाळ्यात व इतर वेळेस जसे खड्डे पडतात तसे महानगरपालिकाच खड्डे बुजवते आणि कॉन्ट्रॅक्टर हा नामानिराळा राहतो, ही महानगरपालिकेची कार्यपद्धती राहिली आहे. मुळात कामाची आवश्यकता आहे का? हे बघायचं काम वित्तीय समितीच आहे परंतु त्याकडे सुद्धा दुर्लक्ष होतं. प्रशासन काय काम करत आहे. त्यांच्यावर लोकप्रतिनिधींचा अंकुश आहे का नाही ? असा प्रश्न पुणेकर म्हणून आमच्या मनात येतो. काही जण असं सांगतात की सल्लागार, कॉन्ट्रॅक्टर, नगरसेवक आणि अधिकारी हे सगळे एकत्रच असतात, अशा पद्धतीचे हे सगळं कामकाज चालू आहे.काही ठिकाणी काम न करता बिल काढली गेली आहेत. अशी देखील चर्चा खाजगी मध्ये लोक करतात, तसेच वर्तमानपत्रातूनही वाचायला मिळते. भाजपने खड्ड्यात पुणेकरांचे पैसे घालवले आणि आता प्रशासनाने दोघेही सपशेल फेल झाले आहेत. एवढ्या अडीच हजार कोटी रुपयात शहरातील सर्व रस्त्यांचे चांगल्या दर्जाचे डांबरीकरण झाले असते. अंगाला राख फासून काम करा अस आमच म्हणण नाही किमान ओरबाडू नका.पुणे महानगरपालिकेतील सत्ताधारी भाजप आणि प्रशासन काळातील रस्त्यांच्या टेंडरची सीबीआय चौकशी व्हावी ही आमची आग्रहाची मागणी आहे.

महावितरण तब्बल सहा पुरस्कारांचे मानकरी

पुणे, दि. ३० जुलै २०२३: राज्याचे उपमुख्यमंत्री व ऊर्जामंत्री ना. श्री. देवेंद्र फडणवीस यांच्या मार्गदर्शनात छतावरील सौर ऊर्जा निर्मिती योजनेच्या अंमलबजावणीमध्ये केलेल्या उल्लेखनीय कामगिरीची दखल घेत महावितरणला राष्ट्रीयस्तरावरील सहा पुरस्कारांनी शनिवारी (दि. २९) गौरवण्यात आले.

पणजी (गोवा) येथील कार्यक्रमात गोव्याचे मुख्यमंत्री ना. श्री. प्रमोद सावंत यांच्याहस्ते महावितरणचे संचालक (प्रकल्प) श्री. प्रसाद रेशमे, पुणे परिमंडलाचे मुख्य अभियंता श्री. राजेंद्र पवार यांनी पुरस्कार स्वीकारले. यावेळी प्रमुख पाहुणे म्हणून केंद्रीय नवीन व नवीकरणीय ऊर्जा राज्यमंत्री श्री. भगवंत खुबा, गोव्याचे ऊर्जामंत्री ना. श्री. सुदीन ढवळीकर, ‘एआयआरईए’चे अध्यक्ष श्री. साकेत सुरी उपस्थित होते. या कार्यक्रमात केंद्रीय ऊर्जा राज्यमंत्री श्री. खुबा यांनी महावितरणच्या ‘सौर’ योजनेतील कामगिरीचे विशेष कौतुक केले.

छतावरील सौर ऊर्जा निर्मिती प्रकल्पाच्या अंमलबजावणीसाठी ‘नॅशनल पोर्टल फॉर रूफटॉप सोलर’ या वेबपोर्टलचे उद्घाटन मा. पंतप्रधान श्री. नरेंद्र मोदी यांच्याहस्ते मागीलवर्षी झाले होते. या वेबपोर्टलच्या वर्षपूर्तीनिमित्त पणजी जिमखाना येथे केंद्रीय नवीन व नवीकरणीय ऊर्जा मंत्रालय आणि ऑल इंडिया रिन्यूएबल एनर्जी असोसिएशनच्या (एआयआरईए) वतीने कार्यक्रम आयोजित करण्यात आला होता.

महावितरणचे अध्यक्ष व व्यवस्थापकीय संचालक श्री. लोकेश चंद्र यांच्या नेतृत्वात छतावरील सौर ऊर्जा योजनेच्या सुलभ व लोकाभिमुख अंमलबजावणीमध्ये केलेल्या उल्लेखनीय कामांसाठी महावितरणचे संचालक (प्रकल्प) श्री. प्रसाद रेशमे यांना पुरस्कार प्रदान करण्यात आला. या योजनेच्या ग्राहक प्रबोधन व जनजागरणासाठी विविध माध्यमांद्वारे केलेल्या कामाची दखल घेत पुणे परिमंडलाचे मुख्य अभियंता श्री. राजेंद्र पवार यांना पुरस्कार प्रदान करण्यात आला. योजनेसंबंधी उल्लेखनीय कामगिरी केल्याबद्दल नाशिक परिमंडलाचे मुख्य अभियंता श्री. दीपक कुमठेकर, नागपूर परिमडंलाचे मुख्य अभियंता श्री. दिलीप दोडके, महावितरण विशेष प्रकल्प कक्षाचे मुख्य अभियंता श्री. चंद्रमणी मिश्रा, कार्यकारी अभियंता श्री. शरद बंड यांनाही पुरस्कार प्रदान करण्यात आले.

पुणे परिमंडल अंतर्गत छतावरील सौर ऊर्जा प्रकल्पांच्या जनजागरणासाठी सातत्याने विविध उपक्रम घेण्यात येत आहे. त्यासाठी उपकार्यकारी अभियंता डॉ. संतोष पटनी समन्वयक म्हणून काम पाहत आहे. दृकश्राव्य माहितीपट, प्रदर्शनी, सौर ऊर्जारथ, ग्राहकसंवाद मोहीम व माहितीपत्रकांचे वितरण, प्रात्यक्षिक, समाजमाध्यमे तसेच प्रसारमाध्यमांद्वारे योजनेबाबत प्रबोधन व जनजागरण सुरु आहे. त्याची दखल या पुरस्काराच्या निमित्ताने राष्ट्रीयस्तरावर घेण्यात आली आहे. सौर योजनेच्या वेगवान व प्रभावी अंमलबजावणीसाठी पुणे परिमंडलातील अभियंता, तांत्रिक कर्मचाऱ्यांसह एजन्सीजच्या प्रतिनिधींना प्रशिक्षण देण्यात आले आहे. त्यामुळे पुणे परिमंडलामध्ये सध्या १० हजार २०० पेक्षा अधिक ग्राहकांकडील २५४ मेगावॅट क्षमतेचे छतावरील सौर ऊर्जा प्रकल्प कार्यान्वित झाले आहेत. तर आणखी ३ हजार ५०० पेक्षा अधिक ग्राहकांकडे ९६ मेगावॅट क्षमतेच्या सौर प्रकल्पांचे काम सुरु आहे.

मनोगत : राजेंद्र पवार, मुख्य अभियंता, पुणे परिमंडल– ‘छतावरील सौर ऊर्जा योजना अधिकाधिक लोकाभिमुख व वेगाने कार्यान्वित करण्यासाठी सातत्याने उपक्रम सुरु आहे. त्यासाठी राष्ट्रीय पातळीवरील पुरस्कार मिळाला हा पुणे परिमंडलाच्या सांघिक कामगिरीचा गौरव आहे. या कामगिरीमध्ये प्रसिद्धी माध्यमांचा देखील मोलाचा वाटा आहे’.

पुणे : आज भारतात अनेक अडचणी आहेत. भारतात काय राहिले आहे असा विचार केला तर भारतात चांगले शिक्षक आहेत. खूप काही चांगलं घडविण्याची ताकद आहे. विद्यार्थ्यांच्या ऊर्जेचे चांगल्या गोष्टींमध्ये रूपांतर करण्याचे काम शिक्षक करतात. आर्टिफिशियल इंटेलिजन्स आले तरी शिक्षकांचे महत्त्व कमी होणार नाही. शिकवताना शिक्षकांची जी भावना असते ती आर्टिफिशियल इंटेलिजन्स नाही, त्यामुळे शिक्षकाला पर्याय नाही. शिक्षणाचे वृत्तीमध्ये रूपांतर होणे गरजेचे आहे. असे मत माजी आमदार प्रा. मेधा कुलकर्णी यांनी व्यक्त केले.

अखिल ब्राह्मण मध्यवर्ती संस्था नाशिक पुणे केंद्राच्या वतीने शिक्षक पुरस्कार आणि विद्यार्थी आर्थिक सहाय्य कार्यक्रमाचे आयोजन शुक्रवार पेठेतील वरदश्री सभागृहात करण्यात आले होते. यावेळी केंद्रप्रमुख मकरंद माणकीकर, कार्यवाह विश्वनाथ भालेराव, मध्यवर्ती सदस्य अनिल शिदोरे, संयोगिता पागे, शैक्षणिक प्रमुख राजेंद्र देवधर आदी उपस्थित होते.

कार्यक्रमात संस्कृत शिक्षिका भाग्यश्री हर्षे, मराठी विषय शिक्षक यशवंत हरिभक्त, योग शिक्षिका लीना भुस्कुटे, विज्ञान शिक्षक हेमंत पाठक यांचा सन्मान करण्यात आला. याशिवाय गरजू विद्यार्थ्यांना आर्थिक सहाय्य आणि शैक्षणिक साहित्य वाटप करण्यात आले. संस्कृत आणि मराठी विषयात पीएचडी आणि पदवी आणि पदव्युत्तर शिक्षण घेणाऱ्या विद्यार्थ्यांचा देखील सन्मान करण्यात आला.

मेधा कुलकर्णी म्हणाल्या, आजच्या काळात समाजातील सर्व लोकांनी एकत्र येण्याची गरज आहे समाजामध्ये फूट पाडण्याचे काम आधी इंग्रजांनी केले आता समाजातीलच काही लोक करत आहेत. देशावर भक्ती करायला शिक्षकांनी शिकवले पाहिजे.

आपली संस्कृती सोडून दुसऱ्यांच्या संस्कृतीचे अनुकरण करू नका. आपल्यावरची श्रद्धा हरवते तेव्हा दुसऱ्याचे आकर्षण वाटते आणि आपल्या गोष्टींचे विस्मरण होते. शेक्सपिअर वाचा पण कालिदास देखील वाचायलाच हवे, असेही त्यांनी सांगितले.

विश्वनाथ भालेराव यांनी स्वागत, मकरंद माणकीकर यांनी प्रास्ताविक केले. प्रमोद कुलकर्णी यांनी कार्यक्रमाचे सूत्रसंचालन केले. सुजाता मवाळ यांनी आभार मानले.

पुणे – हिटिंग, वेंटिलेशन आणि एअर कंडिशनिंग (HVAC) उद्योगात कोड आणि मानके महत्त्वपूर्ण भूमिका बजावतात. एचव्हीएसी प्रणालींचे सुरक्षित, कार्यक्षम आणि पर्यावरणास जबाबदार डिझाइन, स्थापना, ऑपरेशन आणि देखभाल सुनिश्चित करण्यासाठी मार्गदर्शक तत्त्वे आणि नियम म्हणून काम करतात. या सर्व बाबींचे महत्व जाणून इशरे पुणे चॅप्टरच्या वतीने या परिषदेचे आयोजन केले. परिषदेमध्ये १३० पेक्षाही जास्त सभासदांनी सहभाग घेतला होता.द इंडियन सोसायटी ऑफ हीटिंग रेफ्रिजरेटिंग अँड एअर कंडिशनिंग इंजिनियर्स (इशरे) च्या वतीने पहिल्या ‘कोड आणि मानक शिखर परिषद २०२३-२४’ चे आयोजन पुण्यात करण्यात आले होते. या परिषदेचे उदघाटन श्रीमंत मालोजीराजे भोसले यांच्या शुभहस्ते झाले. यावेळी इशरे पुणे शाखेचे अध्यक्ष नंदकिशोर कोतकर यांनी मागील कार्यक्रमाचे तपशील आणि येणार्‍या काळात होणारे कार्यक्रम या बद्दल माहिती दिली, यावेळी चेतन ठाकूर, वीरेंद्र बोराडे, रितेश खेरा, अमित गुलवडे, विमल चावडा, डॉ. निलेश गायकवाड, सागर मुनीश्वर, अनुज गुप्ता, सुभाष खनाडे, विशाल पवार आणि रशिदा शेख उपस्थित होते. सुबोध मुरकेवार व सुजल शाह सेठ यांनी कार्यक्रमाचे सूत्रसंचालन केले तर आशुतोष जोशी यांनी आभार मानले.मंजुनाथ राव यांनी एचव्हीएसी मधील भारतीय आणि आंतरराष्ट्रीय कोड आणि मानकांचे विहंगावलोकन करून मार्गदर्शन केले. खुशबू ज्योत्स्ना किंडो यांनी एअर कंडिशनिंगमध्ये भारतीय मानके व त्यांचे महत्व विशद केले. मधुरिमा माधव यांनी राष्ट्रीय बिल्डिंग कोडमधील एचव्हीएसी मानकांबद्दल माहिती दिली. विक्रम मूर्ती व डॉ. ज्योतिर्मय माथूर यांनी ASHRAE व AHRI मानकांबद्दल माहिती दिली. डॉ मनीष पांडे. मनोज खट्टी आणि निवेदिता जाधव यांनी कोड आणि मानक संदर्भातील विविध पैलू यांचे महत्व अधोरेखित करून सर्वांची मने जिंकली. एकंदरीत, कोड आणि मानके एक गंभीर फ्रेमवर्क म्हणून काम करतात ज्यामुळे एचव्हीएसी उद्योग, त्याचे भागधारक आणि सामान्य जनतेला फायदा होतो. एचव्हीएसी प्रणाली अधिक विश्वासार्ह, किफायतशीर आणि टिकाऊ बनवून सुरक्षितता, ऊर्जा कार्यक्षमता, पर्यावरणीय जबाबदारी आणि गुणवत्तेला प्रोत्साहन देतात. एचव्हीएसी उद्योगातील व्यावसायिकांना त्यांच्या क्लायंटला सुरक्षित आणि उच्च-कार्यक्षम समाधाने वितरीत करण्यासाठी या नियमांचे पालन करणे आवश्यक आहे.विशाल पवार आणि रशिदा शेख यांनी परिषदेच्या निमित्ताने प्रश्नमंजुषा स्पर्धेचे आयोजन केले. त्याला चांगला प्रतिसाद मिळाला.