पुणे-आपल्या ३२ वर्षाच्या राजकीय आयुष्यात प्रथमच पुण्यातील या पोटनिवडणूकीकडे संपूर्ण देशाचे लक्ष लागल्याचे दिसत असून महाविकास आघाडीचे धंगेकर शंभर टक्के विजयी होतील असा ठाम विश्वास राज्यातील विरोधी पक्ष नेते अजित पवार यांनी आज येथे व्यक्त केला. कसबा विधानसभा पोटनिवडणुकीत महाविकास आघाडीचे उमेदवार रवींद्र धंगेकर यांच्या प्रचारार्थ शनिवारवाडा येथून निघालेल्या दुचाकी रॅलीमध्ये ते पत्रकारांशी बोलत होते. कॉंग्रेसचे ज्येष्ठ नेते व माजी महसूलमंत्री बाळासाहेब थोरात यावेळी अजितदादांबरोबर या रॅलीमध्ये सहभागी झाले होते.

      उत्तरोत्तर रंगत चाललेली व दुरंगी लक्षवेधी लढत ठरलेली ही निवडणूक महाविकास आघाडी व भाजपा या दोन्ही पक्षांनी प्रतीश्तेची केली असून आजचा (सोमवार) पुण्यातील दिवस व्हिआयपींच्या वर्दळीमुळे गजबजून निघाला. महाविकास आघाडीतील हे दोन्ही दिग्गज उघड्या जीपमध्ये एकत्र आल्यानंतर कार्यकर्त्यांच्या उत्साहाला प्रचंड उधाण आले होते. उमेदवार धंगेकर व माजी आमदार मोहन जोशी हेदेखील या जीपमध्ये प्रमुख नेत्यांबरोबर सहभागी झाले होते. रॅलीच्या प्रारंभी अजितदादा व बाळासाहेब थोरात यांच्या जीपच्या पाठीमागे खासदार वंदना चव्हाण, माजी मंत्री रमेश बागवे,बाळासाहेब शिवरकर व माजी आमदार कमल ढोलेपाटील दुसऱ्या जीप मध्ये सहभागी झाले होते. तर महाविकास आघाडीचे शेकडो कार्यकर्ते दुचाकीमध्ये सहभागी झाले होते. यामध्ये महिलांची संख्या लक्षणीय होती. अजितदादांनी आपल्या उजव्या हातामध्ये पंजा हे निवडणूक चिन्ह असलेला फलक बांधून नागरिकांना ते अभिवादन करत होते. फटाक्यांची आतषबाजी आणि कार्यकर्त्यांच्या घोषणांनी शनिवारवाड्यापासून सुरु झालेल्या या रॅलीने पुणेकरांचे लक्ष वेधून घेतले होते. लालमहाल पासून ही रॅली जेव्हा फडके हौद चौकात आली तेव्हा दीडशे फुटांचा भव्य हार क्रेनच्या सहाय्याने  अजितदादा पवार यांच्या गळ्यात घालण्यात आला. याप्रसंगी प्रचंड टाळ्या, शिट्ट्या व ‘एकच वादा अजितदादा’ या घोषणांनी संपूर्ण परिसर दुमदुमून गेला होता.

      कार्यकर्त्यांचा उत्साह प्रचंड असल्याने व पुण्यातील सर्वाधिक वर्दळीच्या परिसरातून ही रॅली जात असल्याने पुणेकर जनता तसेच व्यापारी, दुकानदार, सामान्य नागरिक यांनी रॅली पाहायला प्रचंड गर्दी केली होती. अजितदादांना व बाळासाहेब थोरात यांना ठिकठिकाणी थांबून त्यांच्याशी हस्तांदोलन करण्यासाठी कार्यकर्त्यांमध्ये चढाओढ सुरु होती. फडके हौद चौकातून ही रॅली पुढे अपोलो टॉकीज, हिंदमाता चौक, लोहियानगर पोलीस चौकी, लक्ष्मी रोड, सिटी पोस्ट, एस,पी. कॉलेज, टिळक रोड, गांजवे चौक, अलका टॉकीज चौक, रमणबाग, आप्पा बळवंत चौक येथून सोमवंशी आर्य क्षत्रिय समाज कार्यालय येथे आल्यानंतर रॅलीची समाप्ती झाली.

पुणे : कसबा विधानसभा मतदारसंघाच्या भाजपाच्या आमदार मुक्ता टिळक यांच्या निधनानंतर पोटनिवडणूक जाहीर झाली असून, भाजपाकडून हेमंत रासने, तर महाविकास आघाडीकडून रविंद्र धंगेकर आणि हिंदू महासंघाचे आनंद दवे यांच्यासह अनेक उमेदवार निवडणुकीच्या रिंगणात आहेत. या निवडणुकीच्या पार्श्‍वभूमीवर आज कसबा मतदारसंघातील गुजराती हायस्कूल येथे मुख्यमंत्री एकनाथ शिंदे यांची व्यापारी, गणेश मंडळ आणि पक्षाच्या पदाधिकाऱ्यांसोबत चार वाजता बैठक होणार होती. मात्र, त्यापूर्वीच शाळा प्रशासनाने मुलांना साडेतीन वाजण्याच्या सुमारास सोडल्याची घटना घडली आहे.आमच्या प्रत्येक वर्गात येऊन शिक्षकानी सांगितले की, आज आपल्या शाळेत एकनाथ शिंदे यांची बैठक होणार आहे. त्यामुळे तुम्हाला साडेतीन वाजता सोडण्यात येणार आहे. आणि त्यानंतर काहीच वेळात सोडण्यात आले. आमची शाळा रोज १२ वाजता भरते आणि पाच वाजता सुटते. पण, आज अचानक शाळा सोडल्याने आम्ही रिक्षावाले काकांची वाट पाहत आहोत, असे विद्यार्थ्यांनी सांगितले. मुख्यमंत्री एकनाथ शिंदे यांच्या बैठकीमुळे एक तास लवकर शाळा सोडल्याने काही मुलांना आनंद झाला. लवकर घरी जायला मिळाले, पण काही मुलांना नाहक त्रासाला सामोरे जावे लागले आहे. या प्रकरणावर शाळा प्रशासनाने उत्तर देणे टाळले.

कसबा निवडणुकीच्या पार्श्वभूमीवर जाहिरात व्यावसायिकांची मुख्यमंत्र्यांनी घेतली बैठक

पुणे-कसबा पोटनिवडणुकीत भाजपच्या उमेदवाराला कॉंग्रेसच्या रवींद्र धंगेकर यांच्याशी लढत द्यायची असून या पार्श्वभूमीवर आज पुण्यात आलेल्या मुख्यमंत्री एकनाथ शिंदे यांनी पुणे शहर आणि जिल्हा जाहिरात व्यावसायिकांची बैठक घेतली . या बैठकीत जाहिरात व्यावसायिकांच्या संघटनेच्या प्रतिनिधींनी महापालिका प्रशासक आमची पिळवणूक करत आहेत असे सांगितले .२०१८ मध्येच आयुक्तांनी मुख्यसभेला डावलून होर्डिंग व्यावसायिकांकडून ८२ रुपये चौरस फुटाचा दर २२२ रुपये केला आणि त्यांची वसुली २०१३ पासून केली.आणि आता २८ डिसेंबर २०२२ रोजी प्रशासक विक्रम कुमार यांनी तर कडी केली. त्यांनी हा दर ५८० रुपये चौरस फुट केला . साहेब सांगा हो कसं जगायचं आम्ही ? असा सवाल यावेळी मुख्यमंत्र्यांना करण्यात आला . आणि त्यांना लेखी निवेदन देण्यात आले. यानंतर मुख्यमंत्र्यांनी भाषण केले आणि आपण तुमच्या अडचणी समजून घेऊ शकतो तुम्हाला निश्चित न्याय देऊ मात्र आता आचार संहिता असल्याने बोलता येत नाही . पण तुमची अडचण निश्चित सोडवू असे आश्वासन दिले .

पुणे: भारतीय जनता पक्ष, बाळासाहेबांची शिवसेना, आर.पी.आय. (आठवले गट), शिवसंग्राम, रा.स.प., रयत क्रांती संघटना, पतित पावन संघटना महायुतीचे कसबा विधानसभा मतदारसंघाचे उमेदवार हेमंत रासने यांच्या प्रचारार्थ भाजपाच्या राष्ट्रीय चिटणीस पंकजा मुंडे सहभागी झाल्या होत्या. या पदयात्रेला मतदारांचा मोठा प्रतिसाद लाभला होता. पालखी चौक येथून सुरू झालेली प्रचार यात्रा वटेश्वर, गाडीखाना, शिवाजी महाराज रस्त्याने आंग्रे वाडा येथे समाप्त झाली. समारोपप्रसंगी मुंडे पत्रकारांशी बोलत होत्या.

उमेदवार हेमंत रासने, आमदार माधुरी मिसाळ, कसब्याचे अध्यक्ष प्रमोद कोंढरे, स्थानिक नगरसेवक सम्राट थोरात, आरती कोंढरे, अजय खेडेकर , विजयालक्ष्मी हरिहर, तेजेंद्र कोंढरे यांच्यासह मोठ्या संख्येने कार्यकर्ते सहभागी झाले होते

आम्ही प्रत्येक निवडणूक चुरशीची समजून लढवत असतो त्यामुळे कार्यकर्ता अलर्ट राहतो कधी कधी मते मिळवण्यासाठी आम्ही प्रयत्न करीत असतो मी भारतीय जनता पार्टीची कार्यकर्ता या नेता या नात्याने या ठिकाणी प्रचाराला आली आहे, असे मुंडे म्हणाल्या.

मुंडे पुढे म्हणाल्या ‘कसब्यात प्रचंड प्रतिसाद मिळत आहे कार्यकर्त्यांचा उत्साह दांडगा आहे त्यामुळे विजय निश्चित आहे. पक्षासाठी पक्षाच्या जन्मापासून आयुष्य वेचलेले खासदार गिरीश बापट हे पक्षाच्या निवडणुकीत सहभाग घेऊन हेमंत रासने आशीर्वाद दिला आहे.

पुणे-  जनसामान्यांचा आवाज दाबण्याचे काम भाजपा करीत असून जनतेवर दहशत निर्माण करुन लोकशाही धोक्यात आणली जात आहे. माध्यमांची मुस्कटदाबी, एजन्सीचा गैरवापर यासह महागाईने सर्वसामान्यांचे जनजीवन विस्कळीत केले आहेत. अनेकांवर खोटे आरोप करुन इडीच्या धाडी टाकल्या जात आहेत. भाजपाकडून दुसर्‍यांच्या पक्षावर दरोडा टाकला जात आहे, भाजपा कोणालाही तोंड वर काढू देत नसल्याने सर्वसामान्य जनता त्यांच्या विरोधात आहे. त्यामुळे महाविकास आघाडीचा विजय होणार असून कसब्यात बदल निश्चित होणार आहे. कसब्यातला हाच बदल देशात घडणार आहे, त्यामुळे प्रत्येकाने घरोघरी जाऊन प्रचार करा, अशा सुचना राष्ट्रवादीचे प्रदेशाध्यक्ष जयंतराव पाटील यांनी कार्यकर्त्यांना सोमवारी केल्या.

      काँग्रेस, राष्ट्रवादी काँग्रेस पार्टी, शिवसेना उद्धव बाळासाहेब ठाकरे, समविचारी पक्ष, महाविकास आघाडीचे उमेदवार रविंद्र  धंगेकर यांच्या प्रचारार्थ संत सावता माळी भवन येथे महाविकास आघाडी कार्यकर्ता-पदाधिकारी मेळावा झाला. त्यावेळी ते बोलत होते. याप्रसंगी विधी मंडळ कॉंग्रेस पक्ष नेते बाळासाहेब थोरात, खासदार वंदना चव्हाण, माजी आमदार मोहन जोशी, माजी आमदार जयदेव गायकवाड, माजी मंत्री रमेश बागवे, माजी उपमहापौर दीपक मानकर, राष्ट्रवादी काँग्रेसचे शहराध्यक्ष प्रशांत जगताप, माजी आमदार कमलताई ढोलेपाटील, माजी नगरसेवक रविंद्र माळवदकर, वनराज आंदेकर, लक्ष्मी आंदेकर, रमेश अय्यर, जयंत किराड, गणेश नलावडे, प्रविण करपे, प्रदीप देशमुख, शानी नौशाद, संगीता पवार, लेखा नायर, शांतीलाल मिसाळ, दीपक जगताप, मृणालिनी वाणी, शिल्पा भोसले, सारिका पारिख, आदी पदाधिकारी, कार्यकर्ते मोठ्या संख्येने उपस्थित होते.

      पाटील म्हणाले, भाजपाला पराजयाचा मोठा धोका वाटत असल्याने त्यांचे वरिष्ठ नेते तळ ठोकून आहे. भाजपाने सर्वसामान्यांचे जनजीवन विस्कळीत केले असून त्यांचे जगणे अवघड केले आहे. गेल्या आठ वर्षात तीन हजारहून जास्त लोकांवर त्यांनी धाडी टाकल्या आहेत. बीबीसीसारख्या माध्यमांवर धाडी टाकून माध्यमांचे स्वातंत्र्य हिरावून घेतले जात आहे. आपल्याला हवे तेच माध्यमात प्रसिद्ध करुन भाजपा खोटेपणा दाखवत आहे. हा त्यांचा खोटेपणाचा भुरखा नागरिक फाडून काढणार आहे. कसबा विधानसभेतील मतदार संघातील महाविकास आघाडीचे उमेदवार रविंद्र धंगेकर हे त्यांच्या विकास कामातून लोकप्रिय आहे.  तिन्ही पक्षांची ताकद त्यांच्या पाठीशी असल्याने त्यांचा विजय निश्चित होणार आहे. मात्र तरीदेखील कार्यकर्त्यांनी गाफील न राहता घरोघरी जाऊन काम करा. हा आपला विजय देशात पुढे नेणार आहे. बुथ कमिटीचे अध्यक्ष, वार्ड अध्यक्ष यांनी घरे वाटून शेवटच्या दिवसांपर्यंत काम करा. कसब्यातील विजय देशात गुणगाण करणारा राहणार असल्याने ताकदीने काम करा यश दूर नाही, असे यावेळी त्यांनी विश्वास व्यक्त केला.

      बाळासाहेब थोरात म्हणाले, भाजपाचा एकधोरणी कार्यक्रम, हुकूमशाही व महागाईला कंटाळलेला आहे. जनसामान्य भाजपाच्या विरोधात गेला आहे. त्यामुळे महाविकास आघाडीसाठी ही निवडणूक अनुकूल आहे.  कसब्यातील प्रत्येक नागरिक सर्वसामान्यांची निवडणूक असल्याची समजून रविंद्र धंगेकर यांचे काम करीत आहे. त्यामुळे हा विजय सर्वसामान्यांचा असणार आहे. भाजपाने जनतेची फसवणूक केली असल्याने या निवडणूकीवर त्याचा परिणाम होणार असून येत्या निवडणूकीत महाविकास आघाडीचा महापौर असणार आहे. त्यामुळे निवडणूक स्वतःची समजून काम करा. या निवडणूकीवर महापालिकेची निवडणूक अवलंबून असून पुढील अनेक संधी या निवडणूकीवर आहे. त्यामुळे कोणीही गाफील राहू नका, कसबा मतदारसंघातील कोपरान कोपरा पिंजून काढा. भाजपाचे मतदेखील महाविकास आघाडीलाच राहणार आहे. असे यावेळी थोरात यांनी सांगितले.

      मोहन जोशी म्हणाले, महाविकास आघाडी पहिल्या दिवशीपासून रविंद्र धंगेकर यांचे काम जोमाने करीत आहे. मतदारसंघातील बैठका, सभा, कोपरा सभा, रॅलीला उर्त्स्फूत सहभाग आहे. महाविकास आघाडीचे नियोजन, समन्वय चांगले असल्याने विजय निश्चित होणार आहे. तिन्ही पक्षांचा कार्यकर्ते, पदाधिकार्‍याचा मोठा प्रतिसाद मिळत आहे. वंदना चव्हाण म्हणाल्या, महाविकास आघाडीचा प्रचार यंत्रणेत सहभाग आहे.  राष्ट्रवादीचा प्रत्येक कार्यकर्ता जोमाने  काम करीत आहे. शेवटच्या घटकांपर्यंत काम सुरु असल्याने महाविकास आघाडीचा विजय निश्चित आहे.

      प्रशांत जगताप म्हणाले, कसबा मतदार संघात बदल होणार आहे. रविंद्र धंगेकर हे आपल्या कामातून लोकप्रिय आहेत. बहुजन समाजापासून व्यापारीवर्ग, ब्राम्हण समाजदेखील त्यांच्या पाठीशी उभा आहे. त्यामुळे यश दूर नाही. रविंद्र माळवदकर, कमलताई ढोले पाटील यांच्यासह कार्यकर्ते, पदाधिकाऱ्यांनी आपली मते मांडली. गणेश नलावडे यांनी प्रस्ताविक व सुत्रसंचालन केले. अजिंक्य पालकर यांनी आभार मानले.

पाचही वर्षे धरणे हाउसफुल्ल पण पुण्यात अनेक ठिकाणी पाण्यासाठी दैना …

पुणे – महापालिकेकडून समान पाणी योजने अंतर्गत शहरातील मुख्य जलवाहिन्यांवर फ्लो मीटर बसविण्यात येणार आहेत. त्यामुळे, येत्या गुरूवारी ( दि. 23 ) रोजी कसबा विधानसभा मतदारसंघात पाणी पुरवठा बंद असणार आहे.या शिवाय, वारजे आणि रामेटेकडी तसेच स्वारगेट आणि परिसरातही पाणी बंद असणार असल्याचे महापालिकेने कळविले आहे. दरम्यान, दुसऱ्या दिवशी शुक्रवारी ( दि.24) रोजी उशीरा आणि कमी दाबाने पाणी सोडण्यात येणार असून नागरिकांनी सहकार्य करण्याचे आवाहन पालिका प्रशासनाकडून करण्यात आले आहे.

पाणी बंद असलेला भाग –
पर्वती एलएलआर टाकी दत्तवाडी परिसर, राजेंद्रनगर, लोकमान्यनगर, डेक्कन परिसर, शिवाजीनगर परिसर, स्वारगेट परिसर, रोहन कृतिका व लगतचा परिसर, शनिवार पेठ, सदाशिव पेठ, रविवार पेठ, शुक्रवार पेठ, नवी पेठ, बुधवार पेठ, गुरुवार पेठ, कसबा पेठ. बकरी हिल आऊट लेट ते ज्योती हॉटेल परिसर:- वानवडी, कोंढवा गावठाण, लुल्लानगर, एनआयबीएम , साळुंखे विहार रोड.

वारजे जलशुध्दीकरण प्रकल्प –
अहिरेगाव, अतुलनगर परिसर, वारजे माळवाडी, गोकुळनगर, रामनगर, गणेशपुरी, सहयोगनगर. कोंढवे धावडे, उत्तमनगर, कोपरे, शिवणे.

जुना होळकर जलशुद्धीकरण – एचई फॅक्‍टरी, एमईएस

रामटेकडी परिसर :- ससाणेनगर, काळेबोराटेनगर, हडपसर गावठाण, ग्लायडिंग सेंटर, फुरसुंगी, सय्यदनगर, सातववाडी, इंद्रप्रस्थ, मगरपट्टा, रामटेकडी, गोंधळेनगर, रामटेकडी औद्योगिक परिसर माळवाडी, भोसले गार्डन, 15 नं. आकाशवाणी, लक्ष्मी कॉलनी, महादेव नगर, मगरपट्टा आणि परिसर

पुणे, दि. २० फेब्रुवारी २०२२:छत्रपती शिवाजी महाराज यांनी नैतिकता व चारित्र्याचे अधिष्ठान देत जातीधर्माऐवजी माणुसकीच्या मूल्यांवर हिंदवी स्वराज्य निर्माण केले. त्यामुळे हे स्वराज्य खऱ्या अर्थाने रयतेचे ठरले असे प्रतिपादन इतिहास अभ्यासक व लेखक श्री. राजेंद्र घाडगे यांनी रविवारी (दि. १९) केले.

महावितरण व महापारेषणच्या वतीने रास्तापेठ येथील प्रशासकीय इमारतीमध्ये छत्रपती शिवाजी महाराज यांची जयंती साजरी करण्यात आली. यावेळी मुख्य वक्ते म्हणून श्री. राजेंद्र घाडगे बोलत होते. कार्यक्रमाच्या अध्यक्षस्थानी पुणे परिमंडलाचे मुख्य अभियंता श्री. राजेंद्र पवार तर प्रमुख पाहुणे म्हणून कार्यकारी अभियंता श्री. विवेक मुंडे (महापारेषण) यांची उपस्थिती होती.

श्री. घाडगे म्हणाले की, स्वराज्य उभारणी म्हणजे केवळ लढाया किंवा राज्याचा भौगोलिक विस्तार नव्हता. तर स्वराज्य हे प्रत्येकासाठी, सर्व रयतेसाठी स्वाभिमानाने, सुखाने व स्वकर्तृत्वाने जगण्यासाठी होते. यावेळी मुख्य अभियंता श्री. राजेंद्र पवार म्हणाले की, सर्वसामान्य रयतेसाठी हिंदवी स्वराज्याची निर्मिती ही छत्रपती शिवाजी महाराज यांनी स्वकर्तृत्वावर केली. स्वराज्यापूर्वी रयतेची स्थिती अतिशय दीन होती. अत्यंत प्रतिकूल परिस्थितीत व शून्यातून शिवाजी महाराजांनी स्वराज्य उभारले व त्याची व्यवस्थित घडी बसविली. व्यवस्थापनाचे शिवाजी महाराज खऱ्या अर्थाने गुरू आहेत. स्वराज्य उभारणीसाठी केलेल्या प्रत्येक कृतीतून त्यांनी नवीन विचार व आत्मविश्वास दिला.

यावेळी श्री. महेश कारंडे यांनी गीते व श्री. शहाजी साठे यांनी पोवाडा सादर केला. त्यांना शुभम ताठे व आदित्य केळकर यांनी साथसंगत केली. कार्यक्रमाचे प्रास्ताविक श्री. किशोर अहिवळे तर सूत्रसंचालन श्री. बाबा शिंदे यांनी केले. श्री. तुकाराम डिंबळे यांनी आभार मानले. कार्यक्रमाला महावितरण, महापारेषणमधील अभियंते, अधिकारी व सर्व संघटनांचे पदाधिकारी उपस्थित होते. आयोजनासाठी सर्व संघटनांच्या पदाधिकाऱ्यांनी पुढाकार घेतला.

पुणे((PRAB))-कसबापेठ विधानसभा मतदारसंघातील मतदार यादीत फोटो नसलेल्या मतदारांची तब्बल 15 हजार 914 मतदारसंख्या असून या मतदारांच्या नावे बोगस मतदान होण्याची भीती राजकीय पक्षाच्या कार्यकर्त्यांकडून वर्तवली जात आहे.       पुणे जिल्ह्यात सर्वाधिक कमी मतदारसंख्या असलेला कसबा पेठ विधानसभा मतदारसंघ असून या मतदारसंघात पोटनिवडणुकीत एकूण मतदारसंख्या 2 लाख 75 हजार 428 इतकी आहे. 1 लाख 36 हजार 873 पुरुष मतदार, 1 लाख 38 हजार 550 स्त्री मतदार आणि 5 तृतीयपंथी मतदार याप्रमाणे आहेत. 2019 च्या विधानसभा निवडणुकीच्या तुलनेत मतदार संख्येत 15 हजार 255 ची घट झाली आहे.

       मतदारयादीत वय 80 च्या वरील मतदारांची संख्या 19 हजार असून जेष्ठ मतदारांना पोस्टल टपाली मतदानाचा अधिकार असून त्यासाठी अत्यल्प प्रतिसाद प्रशासनाला मिळाला त्यामुळे मतदानाच्या प्रमाणात घट होण्याची शक्यता वर्तवली जात आहे. मतदार यादीत फोटो नसलेल्या मतदारांची तब्बल 15 हजार 914 मतदारसंख्या असल्याने बोगस मतदान होण्याची भीती व्यक्त केली जात आहे.       

कसबापेठ मतदारसंघात अतिशय चुरशीची निवडणूक होत आहे. धंगेकर विरुद्ध रासने अशी प्रमुख लढत मानली जात असल्याने अटीततटीत वैयक्तिक तुलनात्मक दृष्ट्या कॉंग्रेसचे रवींद्र धंगेकर यांच्या नावाला मतदारसंघात पाठींबा व पसंती मिळत असल्याचे चित्र असल्याने भाजपकडून सदरील लढत कॉंग्रेस विरुद्ध भाजप अशी पक्षीय असल्याचे स्पष्टीकरण द्यावे करावे लागत आहे. वैयक्तीक उमेदवारांच्या नावाऐवजी दोन राजकीय पक्षांची लढत असल्याचे बिंबवले जात आहे. मतदार यादीत फोटो नसलेल्या मतदारांची संख्या तुलनेने जास्त असल्याने सदरील मतदारांच्या नावे अन्य कोणतीही असंबंधित व्यक्ती ती स्वतः मतदार आहे म्हणून मतदान बोगस करू शकते अशी भीती कार्यकर्त्यांना वाटत आहे.        

मतदार यादीत फोटो नसलेल्या मतदारांची ४६८ पानांची यादी जिल्हा निवडणूक अधिकारी यांनी प्रसिद्ध केलेली आहे. त्यामध्ये सदरील मतदारांची सर्व माहिती देण्यात आलेली आहे. कसबापेठ विधानसभा मतदारसंघात मागील सार्वत्रिक निवडणुकांमध्ये सर्वसाधारण सरासरी 62 ते 70 टक्के मतदान होत असते.मात्र पोटनिवडणुकीत मतदानाचे प्रमाण तुलनेने अत्यल्प होत असते त्याचा थेट परिणाम निवडणुकीवर होत असतो. या मतदारसंघात चुरशीच्या निवडणुकीमुळे एकएका मताला महत्व असल्याने बोगस मतदानाची भीती व्यक्त केली जात आहे.        

मतदार यादीत फोटो नसलेल्या मतदारांची योग्य पडताळणी केल्याशिवाय मतदान करू देऊ नये अशाप्रकारच्या सूचना पोलिंग एजंटला देण्यात येणार असल्याचे राजकीय पक्षाच्या पदाधिकारी यांनी म्हंटले आहे. ही निवडणूक खूप गांभीर्याने महाविकास आघाडी आणि भाजप युतीने घेतली असून भाजपने प्रदेश पातळीवरुन संपूर्ण राज्यभरातील जिल्हा आणि मंडळ कार्यकारणीला कसबा तसेच चिंचवड पोटनिवडणुकीसाठी मतदार शोध मोहीमेसाठी कामाला लावण्याचा निर्णय घेतला आहे. परिचयाचे मतदारांचा शोध घेण्याच्या सुचना राज्यभरातील जिल्हा तसेच मंडळ कार्यकारणीला देण्यात आले आहेत. प्रत्येक जिल्ह्यातून किमान काही प्रमाणात अर्ज भरुन दिले जावेत असा फतवा काढण्यात आला असून परिचयाच्या मतदारांशी स्वत: संपर्क करावा असे आवाहनही करण्यात आले आहे. त्यामुळे पदाधिकाऱ्यांमध्येही आश्चर्य व्यक्त होत आहे.      

 कसबा पेठ विधानसभा मतदारसंघासाठी 270 मतदान केंद्र आहेत यामधील 30 मतदान केंद्रावर प्रत्येक निवडणुकीत अत्यल्प मतदान होत असते. एकूण मतदारसंख्येतील मतदार यादीत फोटो नसलेल्या मतदारांची 15 हजार 914 मतदारसंख्या तर 80 वयापेक्षा जास्त वय असणारे 19 हजार मतदार असून त्यांनी टपाली मतदानास प्रतिसाद दिलेला नाही त्यामुळे या 34 हजार 914 मतदारांचे मतदानाला फार महाते आलेले आहे. 2 लाख 75 हजार 428 एकूण मतदारसंख्येच्या तुलनेत सरासरी कमाल 60 टक्के मतदान झाले तर 1 लाख 65 हजार 256 इतके मतदान होऊ शकते तर किमान 40 टक्के मतदान झाले तर 1 लाख 10 हजार 171 इतके मतदान होऊ शकते.          

कमी मतदान झाल्यावर कोणत्या राजकीय पक्षाच्या उमेदवाराला त्याचा फटका बसणार हे सर्व जाणून आहेत. त्यामुळे मतदानाचे प्रमाण वाढवणे देखील आवश्यक आहे. प्रमुख पक्षाच्या दोन्ही उमेदवारांना पालिका निवडणुकीत त्यांच्या प्रभागात हमखास मतदान देखील काही प्रमाणात होत असते त्यातुलनेत 40 टक्के मतदान झाल्यास विजयी उमेदवाराच्या मताधिक्यावर परिणाम होणार आहे. कसबापेठ विधानसभा मतदारसंघातील पोटनिवडणूकीत सर्वच राजकीय पक्षांनी प्रतिष्ठेची केलेली असून वरिष्ठ नेते राजकीय प्रचाराच्या आखाड्यात उतरलेले आहेत यावरूनच या निवडणुकीतील चुरस किती आहे हे मतदारांना दिसून येत आहे.

१५ कसबा पेठ मतदारसंघ– मतदार यादीत फोटो नसलेल्या मतदारांची यादी- खालील लिंकवर पहा-:https://cdn.s3waas.gov.in/s3ffeabd223de0d4eacb9a3e6e53e5448d/uploads/2021/07/2021070548.pdf

पुणे,दि.२० :- जिल्ह्यातील चिंचवड आणि कसबा पेठ विधानसभा मतदारसंघ पोटनिवडणूकांच्या पार्श्वभूमीवर निवडणूक आयोगाच्या मार्गदर्शक सूचनांनुसार जिल्हाधिकारी कार्यालयात स्थापन करण्यात आलेल्या माध्यम कक्षाला महाराष्ट्राचे मुख्य निवडणूक अधिकारी श्रीकांत देशपांडे यांनी भेट दिली. माध्यम कक्षाच्या कामकाजाबाबत त्यांनी समाधान व्यक्त केले.

यावेळी जिल्हाधिकारी तथा जिल्हा निवडणूक निर्णय अधिकारी डॉ.राजेश देशमुख, निवडणूक उपजिल्हाधिकारी आरती भोसले, माध्यम संनियंत्रण समन्वयक डॉ.पुरुषेात्तम पाटोदकर, प्रसिद्धी समन्वयक डॉ.किरण मोघे, निवडणूक तहसीलदार रुपाली रेडेकर, सहायक संचालक जयंत कर्पे उपस्थित होते.

माध्यम कक्षाद्वारे पोटनिवडणूकीच्या अनुषंगाने वृत्तपत्र, इलेक्ट्रॉनिक माध्यमे, समाज माध्यमे आदींवरील निवडणूक विषयक मजकूर, विविध माध्यमातील निवडणूक विषयक वृत्तांच्या नोंदी, निवडणूक विषयक बातम्यांना मिळालेली प्रसिद्धी, समाज माध्यमातील निवडणूक विषयक मजकूर आदींचे श्री.देशपांडे यांनी अवलोकन केले आणि त्याविषयी माहिती घेतली.

इलेक्ट्रॉनिक माध्यमामधील निवडणूक विषयक मजकूरावर लक्ष ठेवण्यासाठी स्थापन करण्यात आलेल्या यंत्रणेची त्यांनी पाहणी केली व त्याविषयी समाधान व्यक्त केले. माध्यम प्रमाणिकरण व सनियंत्रण समितीमार्फत प्रमाणिकरण करण्यात आलेल्या प्रकरणांची माहिती यावेळी डॉ.पाटोदकर यांनी मुख्य निवडणूक अधिकाऱ्यांना दिली. प्रसृत करण्यात आलेल्या बातम्या आणि वृत्तपत्रातून मिळालेली प्रसिद्धी याची माहिती डॉ.मोघे यांनी दिली. माध्यम कक्षात नियुक्त अधिकारी व कर्मचारी यावेळी उपस्थित होते
000