विश्वकर्मा फौंडेशन पुणे आयोजित राज्यस्तरीय वधु वर परिचय मेळावा संपन्न

पुणे (दि.३ जानेवारी २०२४) जगाची निर्मिती प्रभू विश्वकर्मांनी केली आहे. या नावाने ओळखले जाणाऱ्या विश्वकर्मा समाजाचा सर्वांगीण विकास व्हावा या उद्देशाने पंतप्रधान नरेंद्र मोदी यांनी १७ सप्टेंबर २०२३ पासून विश्वकर्मा योजना लागू केली आहे. याचा समाजातील युवकांनी लाभ घ्यावा असे प्रतिपादन माय होम इंडिया या संस्थेचे संस्थापक व राष्ट्रीय नेते सुनील देवधर यांनी केले.
विश्वकर्मा सोशल वेलफेअर फौंडेशन ट्रस्ट, पुणे या संस्थेच्या वतीने पुणे स्टेशन येथील डॉ. बाबासाहेब आंबेडकर सांस्कृतिक भवन येथे आयोजित केलेल्या राज्यस्तरीय वधु वर परिचय मेळाव्यात मार्गदर्शन करताना सुनील देवधर बोलत होते. यावेळी प्रमुख पाहुणे उद्योजक अंबादास सुतार, महर्षी कर्वे स्त्री शिक्षण शिक्षण संस्थेच्या उपाध्यक्षा स्मिता कुलकर्णी, संस्थेचे मुख्य विश्वस्त विवेकानंद सुतार, संगीता सुतार, अध्यक्ष राजाराम दिवेकर, उपाध्यक्ष पांडुरंग सुतार, महिला अध्यक्ष अमृता देगावकर आदी उपस्थित होते. यावेळी विश्वकर्मा फौंडेशनच्या ची दिनदर्शिका प्रकाशित करण्यात आली.
सुनील देवधर यांनी सांगितले की, अहंकारी व्यक्तीचे पतन होते. नम्रतेने ध्येय गाठता येते, अंबादास सुतार यांच्यासारख्या अनेक व्यक्तींनी नम्रतेने आपले ध्येय गाठले आहे. असे निश्चित ध्येय गाठण्यासाठी व आपल्या अंगी असणाऱ्या कौशल्याचा वापर करून विकास साध्य करण्यासाठी विश्वकर्मा योजनेचा गरजू बेरोजगार युवकांनी लाभ घेण्यासाठी नोंदणी करावी. या योजनेमध्ये पंधरा दिवसाचे प्रशिक्षण, प्रत्येक प्रशिक्षणार्थीला ७५०० रुपये शिष्यवृत्ती आणि व्यवसाय सुरू करण्यासाठी प्रत्येकी १५ हजार रुपयांचे अनुदान पंतप्रधान नरेंद्र मोदी यांनी देण्याचे जाहीर केले आहे.
सुतार, लोहार, सोनार, शिल्पकार, ताम्रकार पांचाळ या समाजातील व्यक्ती विश्वकर्मा म्हणून ओळखले जातात. देशाचा विकास होण्यामध्ये यांचे महत्वपूर्ण योगदान आहे. विश्वकर्मा फौंडेशनचे कार्य स्तुत्य असून या कार्यास सर्वांनी हातभार लावावा असेही देवधर म्हणाले.
प्रमुख पाहुणे उद्योजक अंबादास सुतार मनोगत व्यक्त करताना म्हणाले की, आधुनिक युगात तंत्रज्ञानाचा वापर करून विश्वकर्मा समाज बांधव एकमेकांना संघटित करीत आहेत. हे अभिमानास्पद आहे या समाज बांधवांच्या अंगी असणारे कलागुण याचा वापर करून उद्योग व्यवसायात पुढे येता येते अशी अनेक उदाहरणे आहेत. विश्वकर्मा फौंडेशन या संस्थेची मागील ९ वर्षाची वाटचाल ही सर्व समावेशक आणि कौतुकास्पद आहे. विश्वकर्मा समाज आणि इतर न्याती बांधवांना देखील बरोबर घेऊन वधू वर परिचय मेळावे, विद्यार्थी गुणगौरव समाजभूषण पुरस्कार असे उपक्रम आयोजित करीत आहेत. आत्ताच्या आधुनिक युगात केवळ एका समाजाचा विचार करून विकासाचे ध्येय साध्य करता येणार नाही, तर इतर बांधवांनाही बरोबर घेऊन पुढे जावे लागेल तरच समाजाचा आणि देशाचा विकास होईल. समाजाच्या संघटनेची व्याप्ती आता देशभर होण्याची गरज आहे.
संस्थेचे मुख्य विश्वस्त विवेकानंद सुतार यांनी प्रास्ताविक करताना सांगितले की, या संस्थेच्या वतीने २४×७ ऑनलाईन पद्धतीने कार्यरत असणारी वधू वर नोंदणी वेबसाईट सुरू करण्यात आली आहे. विश्वकर्मा फौंडेशन दरवर्षी विविध सामाजिक उपक्रम राबवीत असते. यामध्ये विद्यार्थी गुणगौरव, शिष्यवृत्ती, वधु वर परिचय मेळावा, सामाजिक समस्या निराकरण वंचित निराधार वृद्ध व्यक्तींसाठी सहाय्य असे उपक्रम राबविण्यात येतात.
आयोजनात सुनील शिरसाठ, सुनील दिक्षित, विष्णूकांत पोतदार, ओंकार सुतार, किरण खरकड, नरेंद्र बोरसे, शेखर खिलारे, करण डूकले, राजू सूंभे, सोमनाथ गायकवाड, नीळकंठ सुतार, गणेश सुतार, अमेय सुतार, प्रदीप गाडे, विठ्ठल पांचाळ, सौ. सुरेखा सुतार, सौ.स्वाती पोतदार, ॲड.कोमल सुतार यांनी सहभाग घेतला.
स्वागत राजाराम दिवेकर, प्रास्ताविक विवेकानंद सुतार, सूत्र संचालन कुमार कोद्रे केले. आभार पांडुरंग सुतार यांनी मानले.

पुणे- गेली कित्येक वर्षांपासून नव्हे तर EVM मशीन मतदानासाठी आल्यापासून ते आजपर्यंत संशयाच्या भोवऱ्यातच अडकून आहे.अनेकांना वाटते आहे, ज्या इंधन आणि गैस च्या किंमतीवर महागाईवर, भ्रष्ट कारभार आणि बेरोजगारीच्या समस्येवर सत्ता बदल झाला , तो सत्ता बदलानंतर देखील चढता आलेख आणखी वेगाने वर सरकला इंधनाने शंभरी पार केली आणि गैस सिलेंडर ने हजारी पार केली. सत्ता बदल होऊन कोणता फरक पडला नाही उलट समस्या आणि व्याधी वाढतच गेल्या तरीही भाजपाला मते , बहुमत कसे मिळते आहे ?हा प्रश्न आ वासून च उभा आहे .अनेकांना असेही वाटते कि बँकावर सायबर हैकिंग चे दरोडे पडतात तर EVM मशीन सुरक्षित कसे ? ज्यामुळे अजूनही EVM मशीन संशयाच्याच भोवऱ्यात गोते खात आहे. एवढेच नव्हे तर आता निवडणूक आयोगावरचा विश्वास देखील उडत चालला आहे.संजय राऊत , सुषमा अंधारे सारेच विरोधी पक्ष मतपत्रिकेवर मतदान घेण्याचा आग्रह करत आहेत . कॉंग्रेसचे एक नेते दिग्विजय सिंग यांनी आज या विषयाला पुन्हा वाचा फोडली आहे.

दिग्विजय सिंग यांनी ट्वी ट करत म्हटले आहे कि,’ आमच्या “मदर ऑफ डेमोक्रसी” मध्ये सर्वात मोठ्या लोकशाहीमध्ये माझे मत योग्यरित्या टाकले गेले आहे आणि योग्यरित्या मोजले गेले आहे हे जाणून घेणे हा आमचा अधिकार आहे. पहिल्या दिवसापासून मी ईव्हीएमवर विश्वास ठेवला नाही. माझं मत कुठे गेलं माहीत नाही. VVPAT ने मला 7 सेकंदाची झलक दिली आहे की माझ्या हातात मुद्रित VVPAT स्लिप का असू शकत नाही याची खात्री पटली की ती योग्यरित्या छापली गेली आहे. चिपवर सॉफ्टवेअर असलेले कोणतेही इलेक्ट्रॉनिक उपकरण हाताळले जाऊ शकते. ती माझी आज्ञा ऐकणार नाही तर सॉफ्टवेअरची. VVPAT मध्ये चिपवर कोणते सॉफ्टवेअर आहे? आम्हाला माहित नाही. सॉफ्टवेअर कोणी लिहिले आहे? आम्हाला माहित नाही. जी व्यवस्था पारदर्शक नाही तिच्यावर विश्वास कसा ठेवायचा? भारतीय मतदार कृपया आमच्या लोकशाहीचे रक्षण करण्यासाठी उठून तुमचे मत योग्यरित्या नोंदवले गेले आणि मोजले गेले आहे की नाही हे जाणून घेण्यासाठी तुमच्या हक्कांसाठी लढा.

दरम्यान विधानसभा निवडणुकीतील पराभवानंतर माजी मुख्यमंत्री दिग्विजय सिंग पहिल्यांदाच इंदूरमध्ये आले होते. येथे काँग्रेस पदाधिकारी व कार्यकर्त्यांशी लोकसभा निवडणुकीच्या तयारीबाबत चर्चा केली. तसेच विधानसभा निवडणुकीतील पराभवाची कारणे जाणून घेतली.

ते म्हणाले, व्हीव्हीपीएटी स्लिपमधूनच मतांची मोजणी व्हायला हवी. ईव्हीएमद्वारे मतदान करू नये असे आम्ही कुठे म्हणतोय? मतदानानंतर व्हीव्हीपीएटीमध्ये पडणाऱ्या कागदाची स्लिप लोकांच्या हातात द्यावी आणि त्यांना स्वत:च्या हाताने स्वतंत्र बॉक्समध्ये ठेवण्याचा अधिकार द्यावा, अशी आमची इच्छा आहे. हा देशातील 90 कोटी मतदारांचा हक्क आहे. बॉक्समध्ये टाकलेल्या स्लिप्सची मोजणी करून निवडणूक निकाल जाहीर करावा.आयआयटी दिल्लीचे विद्यार्थी आणि माजी केंद्रीय मंत्र्याच्या मुलाने केलेल्या प्रयोगाचा दाखला देत दिग्विजय सिंह म्हणाले – या विद्यार्थ्याचे वडील केंद्रीय मंत्री होते. त्यांनी प्रयोग केला आहे. जेव्हा आपण बटण दाबतो तेव्हा तेच निवडणूक चिन्ह दिसते, परंतु काहीतरी वेगळे छापले जाते. म्हणजे कोणतेही सॉफ्टवेअर अशा प्रकारचे असू शकते की एक गोष्ट दिसते आणि दुसरी छापली जाते.ते पुढे म्हणाले की, आम्हाला VVPAT मध्ये काहीही दाखवू नका, पण छापील स्लिप आमच्या हातात द्या.दिग्विजय सिंह म्हणाले, देशातील 90 कोटी मतदारांचा हा घटनात्मक अधिकार आहे. जे तुम्ही हिरावून घेऊ शकत नाही. ते (भाजप) आता तेलंगणा, कर्नाटकात काँग्रेस कशी जिंकली ते सांगतात. चोरी करणारा कोणी गुपचूप सर्व माल घेऊन गेला तर तो पकडले जाईल. 2012 च्या गुजरात निवडणुकीनंतर ही चोरी सुरू झाली आहे. 2014 मध्ये बहुमत मिळेल असे सांगण्यात आले आणि सरकार स्थापन झाले. 2019 मध्ये 300 जागा आणतील असे सांगण्यात आले, पण 303 जागा मिळाल्या. ते (भाजप) निवडणुकीपूर्वीच घोषणा करतात. हे कसे दिसते? हा मोठा प्रश्न आहे.दिग्विजय सिंह यांनी बुधवारी सोशल मीडिया पोस्टमध्ये लिहिले – निवडणूक आयोग विरोधकांच्या बैठकीत का अडथळा आणत आहे? प्रमुख विरोधी पक्षांना भेटण्यासही नकार देणाऱ्या निवडणूक आयोगावर आपण विश्वास कसा ठेवू शकतो? आयोग अधिक पारदर्शक का होऊ शकत नाही? जर ते इतके सुरक्षित असेल की कोणीही ते हॅक करू शकत नाही किंवा हाताळू शकत नाही तर सार्वजनिक डोमेनमधील चिपवर स्त्रोत कोड का आणू नये.

दरम्यान

आदित्य भगत यांनी हि याच विषयावर ट्वीट केले आहे .

त्यांनी असे म्हटले आहे कि,'
काही मूलभूत प्रश्न भारतातील प्रत्येक नागरिकाने स्वतःला विचारले पाहिजेत:
भारत सरकारने मुख्य निवडणूक आयुक्तांच्या नियुक्ती प्रक्रियेतून सरन्यायाधीशांना का काढून टाकले?
भारतीय निवडणूक आयोग गेल्या 1 वर्षापासून विरोधी पक्षांशी त्यांच्या समस्यांवर चर्चा करण्यासाठी बैठक का घेत नाही?
विकसित देशांनी इलेक्ट्रॉनिक मतदान यंत्रे (EVM) वापरणे का बंद केले आहे?
माध्यमे ईव्हीएमशी संबंधित समस्या का दाखवत नाहीत?
ईव्हीएम मुद्द्यांवर माध्यमांच्या चर्चेसाठी विरोधी पक्षांच्या नेत्यांना का आमंत्रित केले जात नाही?

पुणे, दि. ३: पुणे जिल्ह्यातील १३ तालुक्यात २३३ ठिकाणी रास्तभाव दुकान परवाना मंजूर करण्याबाबत जाहीरनामा प्रसिद्ध करण्यात आला असून परवाना मिळण्यासाठी ३१ जानेवारी २०२४ पर्यंत अर्ज सादर करण्याचे आवाहन जिल्हा पुरवठा अधिकारी डॉ. सीमा होळकर यांनी केले आहे.

आंबेगाव आणि बारामती तालुक्यातील प्रत्येकी १०, भोर ७, दौंड आणि इंदापूर प्रत्येकी १, हवेली १७, जुन्नर २६, खेड ८, मावळ ३६, मुळशी २८, पुरंदर ९, शिरुर १२ आणि वेल्हे तालुक्यातील ६८ अशा जिल्ह्यातील एकूण २३३ गावांत रास्तभाव दुकान परवाना मंजूर करण्यात येणार आहे.

रास्तभाव दुकान परवाना मंजूर करण्याबाबतचा जाहिरनामा जिल्हाधिकारी कार्यालयाच्या https://pune.gov.in या संकेतस्थळावर उपलब्ध आहे. या जाहीरनाम्यात गावांची नावे, सविस्तर अटी व शर्ती, आवश्यक कागदपत्रांचा तपशील, नमुना अर्ज आदीबाबतची माहिती समाविष्ट असून संबंधित तहसिल कार्यालयाच्या पुरवठा शाखेत याबाबत संपूर्ण तपशील व कोरे अर्ज उपलब्ध आहेत.

इच्छुकांनी विहित मुदतीत अर्ज करावेत. मुदतीनंतर प्राप्त होणाऱ्या अर्जांचा विचार केला जाणार नाही, असेही जिल्हा पुरवठा अधिकारी यांनी कळविले आहे.

पुणे दि.३ : कोथरुड आणि कटक मंडळ येथे मुलींच्या विभागीय शासकीय वसतिगृहासाठी खासगी इमारत भाड्याने देऊ इच्छिणाऱ्या इमारत मालकांना संपर्क साधण्याचे आवाहन करण्यात आले आहे.

वसतीगृहासाठी २० ते २५ हजार चौरस फूट क्षेत्रफळ असलेल्या खाजगी इमारतीची आवश्यकता आहे. या इमारतींमध्ये किमान २० ते २५ खोल्या, १० शौचालये, १० स्नानगृहे, वीज, पिण्याचे पाणी, पाणी साठवणुकीची सोय आदी सर्व पायाभूत सुविधा, तसेच इमारतीच्या भोवती संरक्षक भिंत असावी.

कोथरुड आणि कटकमंडळ परिसरातील इच्छुकांनी सहायक आयुक्त समाजकल्याण, डॉ. बाबासाहेब आंबेडकर सामाजिक न्याय भवन सर्व्हेक्षण क्रमांक १०४/१०५, विश्रांतवाडी पोलीस ठाण्यासमोर समोर, येरवडा, पुणे-६ (दूरध्वनी ०२०-२९७०६६११) किंवा ८४८४८९६६७२ या भ्रमणध्वनी क्रमांकावर संपर्क साधावा, असे आवाहन समाज कल्याणच्या सहायक आयुक्त विशाल लोंढे यांनी केले आहे.

पुणे, ३ जानेवारी : शहर भारतीय जनता पार्टीचे मध्यवर्ती कार्यालय म्हात्रे पुलाजवळील डी.पी. रस्त्यावर स्थलांतरित करण्यात आले असल्याची माहिती पुणे शहराध्यक्ष धीरज घाटे यांनी आज पत्रकार परिषदेत दिली.घाटे म्हणाले, नूतन कार्यालयाच्या शुभारंभाच्या निमित्ताने सामाजिक, राजकीय, शैक्षणिक, सांस्कृतिक, सहकार, पत्रकारिता, प्रशासन आदी क्षेत्रांतील मान्यवरांना येत्या रविवारी (दिनांक ७ जानेवारी) दुपारी ४ ते रात्री १० या वेळेत स्नेह-मेळाव्यासाठी निमंत्रित करण्यात आले आहे.
या स्नेहमिलनासाठी उपमुख्यमंत्री देवेन्द्रफडणवीस, प्रदेशाध्यक्ष चंद्रशेखर बावनकुळे तसेच मंत्री चंद्रकांतदादा पाटील यांची प्रमुख उपस्थिती राहणार आहे.

नूतन कार्यालयात एक मोठे सभागृह, अध्यक्षीय दालन, पदाधिकाऱ्यांसाठी स्वतंत्र दालने, कॉन्फरन्स रूम, वॉर रूम यांची व्यवस्था केलेली आहे.कार्यालयात येणाऱ्या नागरिकांसाठी स्वागत कक्ष आणि पुरेशी बैठक व्यवस्था करण्यात आली आहे. वर्तमान युग हे माहिती व तंत्रज्ञानाचे असल्याने आणि माहितीचे आदान-प्रदान सुलभ व्हावे, प्रभावी जनसंपर्क करता या उद्देशाने अत्याधुनिक तंत्रज्ञान वापरून यंत्रणा उभारण्यात आली असल्याचे घाटे यांनी सांगितले.

पुणे शहरातील भारतीय जनसंघाचे कार्यालय सर्वप्रथम पुण्याचे ग्रामदैवत तांबडी जोगेश्‍वरी मंदिराच्या शेजारी असलेल्या भिडे वाड्यातील एका छोट्या खोलीत सुरू झाले. १९८३ साली भिडे वाड्याचे नूतनीकरण होऊन त्याच ठिकाणी दुसऱ्या मजल्यावरील नवीन जागेत कार्यालय स्थलांतरित झाले. तेव्हापासून २०१७ पर्यंत पुणे शहर भाजपाचे सर्व कामकाज तेथूनच चालू होते. काळाची गरज म्हणून सन २०१६ मध्ये जंगली महाराज रस्त्यावरील हॉटेल सन्मान येथे मध्यवर्ती कार्यालय हलविण्यात आले.

परंतु ती ही जागा अपुरी पडू लागल्याने महानगरपालिका भवनाच्या जवळील जागेत ३ डिसेंबर २०२१ रोजी पुन्हा एकदा कार्यालय स्थलांतरित केले.काळाच्या ओघात भाजपाच्या कामाची व्याप्ती सतत वाढत गेल्याने पुणे मनपा जवळील कार्यालय अजून मोठ्या जागेत आणि पार्किंग व्यवस्था मुबलक असलेल्या ठिकाणी स्थलांतरित करणे क्रमप्राप्त झाले. त्यामुळे शहराचे मध्यवर्ती कार्यालय नव्या वास्तूत स्थलांतरीत करीत आहोत, अशी माहिती घाटे यांनी दिली.