पुणे-माझी विचारधाराी अन् पक्ष एकच आहे. मी केव्हाच पक्ष सोडला नाही. शरद पवार साहेब आमच्या हृदयात आहेत. खासदारकी किंवा निवडणुकीविषयी माझी त्यांच्याशी कोणतीही चर्चा झाली नाही. मी आज येथे केव्ळ पुस्तक प्रकाशनासाठी आलो आहे. त्यामुळे एखाद्या गोष्टीची चर्चाच झाली नाही तर त्यावर बोलणे योग्य ठरणार नाही, असे मत आमदार नीलेश लंके यांनी गुरुवारी येथे आयोजित पत्रकार परिषदेत बोलताना व्यक्त केले.

नीलेश लंके यांच्या ‘मी अनुभवलेला कोविड’ या पुस्तकाचे प्रकाशन यावेळी शरद पवार यांच्या हस्ते करण्यात आले. त्यानंतर पत्रकारांशी वार्तालाप करून ते आल्यापावली मार्गस्थ झाले. यावेळी शरद पवारांसह प्रदेशाध्यक्ष जयंत पाटील, खासदार अमोल कोल्हे ,आमदार अशोक पवार, प्राजक्त तनपुरे, शहराध्यक्ष प्रशांत जगताप,प्रवक्ते अंकुश काकडेउपस्थित होते.

यावेळी जयंत पाटील म्हणाले, बराच काळ आमची आणि निलेश लंके यांची भेट होत नव्हती. आज ती झाली. सर्वसामान्य लोकात लंके यांची ओळख असून राज्याला मदत काळात धावून येणारा नेता म्हणून त्यांची ओळख आहे. लंके हे शरद पवार यांना आज भेटण्यास आले. पवार यांच्या नेतृत्व आणि व्यक्तिमत्व याचे आकर्षन त्यांना राहिलेले आहे. पवार साहेब यांच्या विचारधारेनुसार यापुढे काम करण्याचा त्यांनी निर्धार केला आहे .शरद पवार यांचे वय इतके झाले असताना सुद्धा, तरुणांना लाजवेल अशा प्रकारे ते काम करत आहे. त्यांच्या ऊर्जेची अनेकांना भुरळ पडते.

निलेश लंके म्हणाले, देशात ज्या महत्वाच्या घडामोडी घडल्या आहेत, त्यात महत्वाची भूमिका शरद पवार यांनी बजावलेली आहे. शरद पवार साहेब आमच्या हृदयात आहेत. मला विधानसभा निवडणूक आज देखील आठवत आहे. त्याचा शुभारंभ पवार साहेब यांनी केला. कोरोना काळात अनेक जण नाती विसरली, पण शरद पवार यांच्या नावाने कोविड सेंटर सुरू करून 31 हजार लोकांना मदत केली. कोविड काळात आलेले अनुभव सविस्तरपणे या पुस्तकात मांडले आहेत.

ओझर, नाशिक, दि. १४ मार्च
मोदी सरकारने शेतकऱ्यांना देशोधडीला लावणारे तीन काळे कायदे २७ सप्टेंबर २०२० रोजी आणले होते परंतु शेतकऱ्यांच्या तीव्र आंदोलनापुढे त्यांना झुकावे लागले आणि अखेर ते तीन काळे कायदे वापस घ्यावे लागले. यासाठी १५ महिन्यांचे आंदोलन व ७०० शेतकऱ्यांना बलिदान द्यावे लागले आणि १९ नोव्हेंबर २०२१ रोजी हरित क्रांतीच्या प्रणेत्या दिवंगत पंतप्रधान इंदिराजी गांधी यांच्या जन्मदिनी मोदींना मजबुरीने काळे कायदे वापस घ्यावे लागले. तीन वर्षानंतर पुन्हा शेतकऱ्यांना आंदोलन करावे लागत आहे, हे आंदोलनही दडपण्याचा प्रयत्न झाला. मोदी सरकारने वारंवार शेतकऱ्यांचा अपमान केला आहे. मोदी सरकारची एकच निती आहे, चंदादात्याचा सन्मान व अन्नदात्याचा अपमान, असा हल्लाबोल अखिल भारतीय काँग्रेस कमिटीच्या मीडिया विभागाचे प्रभारी जयराम रमेश यांनी केला.
नाशिक जिल्ह्यातील ओझर येथे पत्रकार परिषदेशाला संबोधित करताना जयराम रमेश म्हणाले की, शेतकऱ्यांचे आंदोलन दडपून टाकण्यासाठी त्यांच्यावर अश्रुधुराच्या नळकांड्या फोडल्या, गोळीबार केला, राष्ट्रीय सुरक्षा कायद्याखाली कारवाई करण्याची धमकी दिली पण पुन्हा एकदा मोदी सरकारला झुकावे लागले आणि दिल्लीच्या रामलीला मैदानावर शेतकरी आंदोलन सुरु झाले तर आजच चांदवडमध्ये महाविकास आघाडीचा शेतकरी मेळावाही पार पडला. भारत जोडो न्याय यात्रेत राहुल गांधी यांनी शेतकऱ्यांना पाच गॅरंटी दिल्या आहेत. काँग्रेसचे सरकार सत्तेत आल्यानंतर डॉ. स्वामीनाथन समितीच्या शिफारशीनुसार एमएसपीचा कायदा करणार, शेतकऱ्यांची कर्जमाफी करणार, आयात निर्यात धोरण शेतकरी हिताचे करणार, पिक विमा योजनेची पुनर्रचना करणार व शेतकऱ्यांना जीएसटीतून वगळणार.

काँग्रेस प्रदेशाध्यक्ष नाना पटोले म्हणाले की, मोदी सरकारने १० वर्षात केवळ मुठभर श्रीमंत लोकांसाठी काम केले आहे. सर्व पातळीवर हे सरकार अपयशी ठरले आहे. भारत जोडो यात्रेला जनतेचा मोठा प्रतिसाद मिळत असून राहुल गांधी यांच्यावर जनतेचा विश्वास वाढलेला आहे. केंद्रातील मोदी सरकार पायउतार होण्याची वेळ आली असून राहुल गांधींच्या नेतृत्वाखालील काँग्रेस विचाराचे सरकार येईल असा विश्वास पटोले यांनी व्यक्त केला.

विधिमंडळ पक्षनेते बाळासाहेब थोरात म्हणाले की, भारत जोडो यात्रेसारखे भारत जोडो न्याय यात्रेलाही जनतेचे मोठे समर्थन मिळत आहे. महाराष्ट्रात नंदूरबारमध्ये या यात्रेचे जल्लोषात स्वागत करण्यात आले. धुळ्यात महिला हक्क परिषदेला मोठा प्रतिसाद मिळाला आणि चांदवडच्या शेतकरी मेळाव्यालाही मोठा प्रतिसाद मिळाला. भारत जोडो न्याय यात्रेतून राहुल गांधी शेतकरी, कामगार, तरुण, महिला, सर्वसामान्य जनतेला गॅरंटी देत आहेत. मोदींची गॅरंटी भेदभाव करणारी आहे तर राहुल गांधी यांची गॅरंटी मात्र सर्वसामान्य जनतेला न्याय देणारी आहे.

या पत्रकार परिषदेला माजी मंत्री व काँग्रेसच्या मीडिया विभागाचे प्रभारी जयराम रमेश, प्रदेशाध्यक्ष नाना पटोले, विधिमंडळ पक्षनेते बाळासाहेब थोरात, उपाध्यक्ष संघटन व प्रशासन नाना गावंडे, मुख्य प्रवक्ते अतुल लोंढे, प्रदेश प्रवक्ते डॉ. राजू वाघमारे, सोशल मीडियाचे राज्य प्रमुख विशाल मुत्तेमवार, सरचिटणीस ब्रिज दत्त आदी उपस्थित होते.

भारत जोडो न्याय यात्रा आज सकाळी मालेगाव येथून सुरु झाली त्यानंतर चांदवड मध्ये शेतकरी मेळावा झाला. ओझर येथे यात्रेचे स्वागत करण्यात आले, दुपारच्या विश्रातीनंतर नाशिकच्या द्वारका चौकातून यात्रा पुन्हा सुरु झाली व इंदिरा गांधी चौकात जनतेला संबोधित करुन राहुल गांधींनी त्र्यंबकेश्वराचे दर्शन घेतले. यात्रेचा मुक्काम मोखाडा येथे होईल.

आदिवासी महिला असलेल्या राष्ट्रपतींना राम मंदिराच्या कार्यक्रमात डावलले–जनतेचे मूळ मुद्यांवरून लक्ष हटवण्याचा प्रयत्न–22 जणांकडे 70 कोटी लोकांएवढे धन

नाशिक – केंद्रातील नरेंद्र मोदी सरकारवर आज येथे राहुल गांधी यांनी टीकेची झोड उठवली. कोणत्याही क्षेत्रात मागास वर्गाचे योग्य प्रतिनिधित्व नाही. या वर्गाच्या लोकसंख्येचा खरा आकडा कुणीही सांगू शकत नाही. त्यांचा आकडा 50 टक्क्यांच्या आसपास असल्याचा दावा केला जातो. पण प्रत्यक्षात आदिवासी, दलित, मागासवर्ग यांचा आकडा 90 टक्क्यांच्या आसपास आहे. या वर्गाने आपली ताकद ओळखली पाहिजे. त्यांनी जातगणनेची मागणी केली तर नरेंद्र मोदींना एकतर जातगणना करावी लागेल किंवा पळून जावे लागेल, असे राहुल गांधी म्हणाले.

देशाच्या राष्ट्रपती द्रौपदी मुर्मू आदिवासी आहेत. त्यामुळेच त्यांना राम मंदिराच्या उद्घाटन कार्यक्रमाचे निमंत्रण देण्यात आले नाही. कारण, भाजप त्यांना आदिवासी नव्हे वनवासी मानते. या कार्यक्रमाला धनदांडगे दिसून आले. पण तिथे एकही शेतकरी, कामगार, दिनदुबळे दिसला नाही. सरकार 24 तास तुमचा खिसा कापत असताना तुम्ही काहीच बोलत नाही ही खरी समस्या आहे, असे राहुल गांधी म्हणाले.

पंतप्रधान नरेंद्र मोदी सध्या सर्वसामान्य जनतेचे लक्ष मूळ मुद्यांवरून हटवण्याचा प्रयत्न करत आहेत. तर उद्योगपती गौतम अदामी जनतेची लूट करत आहे. या दोघांनंतर अमित शहा ईडी, सीबीआय, आयटीच्या माध्यमातून जनतेला दाबून टाकण्याचा प्रयत्न करत आहेत, असे राहुल म्हणाले. यावेळी त्यांनी केंद्राच्या अग्निवीर योजनेवरूनही सरकारवर निशाणा साधला.

22 जणांकडे 70 कोटी लोकांएवढे धन आहे. सरकार उद्योगपतींचे कर्ज माफ करत असेल तर शेतकऱ्यांचेही कर्ज माफ झाले पाहिजे. हे कसे होत नाही हे मी पाहतो. सरकारला शेतकऱ्यांचे कर्ज माफ करता येत नसेल तर उद्योगपतींचेही करू नये, असे राहुल गांधी म्हणाले.

काँग्रेस नेते राहुल गांधी यांचा गुरुवारी नाशिकमध्ये रोड शो झाला. यावेळी काँग्रेसच्या काही कार्यकर्त्यांनी राहुल यांना जेसीबीच्या मदतीने हार घालण्याचा प्रयत्न केला. पण राहुल यांच्या अंगरक्षकांनी सुरक्षेच्या कारणास्तव त्यांना तसे करण्यापासून रोखले. यामुळे कार्यकर्त्यांची चांगलीच नाराजी झाली. दरम्यान, देशातील आदिवासी, दलित, मासागवर्गीयांनी जातगणनेची मागणी केली तर नरेंद्र मोदींना एकतर जातगणना करावी लागेल किंवा पळून जावे लागेल, असे राहुल गांधी यावेळी म्हणाले.

राहुल गांधी यांची भारत जोडो न्याय यात्रा सध्या नाशिकमध्ये आहे. राहुल यांनी गुरुवारी दुपारी नाशिकमध्ये रोड शो काढला. दुपारी 3 च्या सुमारास हा रोड शो द्वारका चौकातून सुरू झाला. त्यानंतर हा रोड शो शहरातील सारडा सर्कल परिसरात आला असता काँग्रेसच्या काही पदाधिकारी व कार्यकर्त्यांनी राहुल यांना जेसीबीच्या मदतीने हार घालण्याचा प्रयत्न केला. पण राहुल यांच्या सुरक्षा रक्षकांनी त्यांना मज्जाव केला. ते एवढ्यावर थांबले नाही. त्यांनी जेसीबीवरील हार तोडून टाकला. यामुळे काँग्रेस कार्यकर्त्यांचा चांगलाच हिरमोड झाला.या घटनेनंतर राहुल यांचा ताफा शालिमार परिसराकडे रवाना झाला. तिथे राहुल गांधींची जाहीर सभा झाली.

तुम्हाला एवढा विश्वास असेल, तर तुम्ही तुमची छायाचित्रे वापरा, अशा शब्दात न्यायालयाने अजित पवार गटाला फटकारले आहे.आता स्वतःची ओळख निर्माण करा

आता शरद पवार यांचा फोटो वापरणार नाही, अशी बिनशर्थ लेखी हमी द्या

निवडणूक चिन्ह म्हणून दुसरे एखादे चिन्ह वापरण्याची सूचना

मुंबई-निवडणूक आयोगाने अधिकृतपणे राष्ट्रवादी काँग्रेस पक्ष (NCP) म्हणून मान्यता दिलेल्या अजित पवार गटाला सर्वोच्च न्यायालयाने गुरुवारी राष्ट्रवादी काँग्रेसचे माजी अध्यक्ष शरद पवार यांची छायाचित्रे प्रचार साहित्यात का वापरत आहात? असा सवाल केला. शरद पवार यांच्या नावाचा प्रत्यक्ष किंवा अप्रत्यक्ष वापर करणार नाही, असे हमीपत्र दाखल करण्याचे आदेश देखील न्यायालयाने अजित पवार गटाला दिले आहेत. पवार गटाने ‘घड्याळ’ या चिन्हाऐवजी दुसरे चिन्ह वापरावे, असेही न्यायालयाने तोंडी सांगितले आहे. मात्र, ही सूचना अजित पवार गटाला सध्या बाध्य नसेल. सर्वोच्च न्यायालयाचा हा निर्णय अजित पवार यांच्यासाठी मोठा धक्का मानला जात आहे.

तुम्ही शरद पवार यांची छायाचित्रे का वापरत आहात? तुम्हाला एवढा विश्वास असेल, तर तुम्ही तुमची छायाचित्रे वापरा, अशा शब्दात न्यायालयाने अजित पवार गटाला फटकारले आहे. “आम्हाला तुमच्याकडून अत्यंत स्पष्ट आणि बिनशर्त हमी हवी आहे की तुम्ही त्याचे नाव, फोटो इत्यादी वापरणार नाही. यात कोणतेही ओव्हरलॅप होऊ शकत नसल्याचे न्यायालयाने म्हटले आहे. अजित पवार गटाला निवडणूक आयोगाने पक्षाचे ‘घड्याळ’ हे निवडणूक चिन्ह वापरण्याची परवानगी दिली आहे. या निर्णयावरही शरद पवार गटाच्या वकिलांनी आक्षेप घेतला. पक्षात फूट पडल्यानंतर त्यांना नवीन चिन्ह वाटप करायला हवे होते. आमच्याकडे नवीन चिन्ह आहे त्यांना मात्र, घड्याळाव्यतिरिक्त कोणतेही चिन्ह वापरू द्या. घड्याळ या चिन्हाची ओळख शरद पवार यांच्याशी अतूटपणे जोडलेली असल्याचे शरद पवार यांच्या वकीलांनी न्यायालयात सांगितले. त्यांनी व्यक्त केलेल्या चिंतेची दखल घेत न्यायपीठाने अजित पवार गटाला वेगळे चिन्ह वापरण्याची सूचना केली.

तुम्ही आता एक वेगळा राजकीय पक्ष आहात. शरद पवार यांच्यासोबत राहायचे नाही, असा निर्णय तुम्ही घेतला आहे. मग त्यांचा फोटो तुम्ही प्रचारासाठी का वापरतात? असा प्रश्न सर्वोच्च न्यायालयाने अजित पवार गटाला विचारला आहे. इतकेच नाही तर आता स्वतःची ओळख निर्माण करा. निवडणूक चिन्ह म्हणून दुसरे एखादे चिन्ह वापरा, आणि त्या नव्या विचारधारे आधारे निवडणूक लढा, अशा सूचना देखील न्यायालयाने अजित पवार गटाला केल्या आहेत. निवडणूक चिन्हावरुन सर्वोच्च न्यायालयाने दिलेल्या निर्देशावरुन अजित पवार गटाल्या वकिलांनी निवडणूक तोंडावर आली असल्याचे न्यायालयाच्या निर्दशनास आणून दिले. त्या नंतर न्यायालयाने आम्ही केवळ तुम्हाला सूचना करत असल्याचे सांगितले. मात्र, न्यायालयाच्या या सूचनेमुळे भविष्यात अजित पवार गटाचे निवडणूक चिन्ह बदलण्याची शक्यता वर्तवली जात आहे.अजित पवार गट हा शरद पवार यांच्या फोटोचा वापर करत असून हे चुकीचे असल्याचे शरद पवार गटाने सर्वोच्च न्यायालयात निदर्शनास आणून दिले. त्यामुळे मतदारांची दिशाभूल करण्याचा प्रयत्न ते करत असल्याचा आरोप देखील शरद पवार गटाच्या वतीने करण्यात आला आहे. शरद पवार गटाची बाजू मांडताना वकील अभिषेक मनू सिंगवी यांनी न्यायालयाच्या सदरील बाप निदर्शनास आणून दिली. यावरून सर्वोच्च न्यायालयाने अजित पवार गटाची चांगलीच कानउघडणी केली. आता शरद पवार यांचा फोटो वापरणार नाही, अशी बिनशर्थ लेखी हमी द्या, असे आदेशच सर्वोच्च न्यायालयाने अजित पवार गटाला दिले आहेत. या प्रकरणाची पुढील सोनवणे 19 मार्च रोजी होणार आहे.

काँग्रेस सरकारचे व माझे दरवाजे शेतकऱ्यांसाठी, सर्वसामान्यांसाठी सदैव खुले

भाजपा सरकारला शेतकऱ्यांबद्दल आस्था नसल्यानेच शेतकऱ्यांची अवस्था बिकट: शरद पवार

भारत जोडो न्याय यात्रेमुळे एक गॅरंटी पक्की, ‘मोदी तो गयो!: संजय राऊत

शेतकऱ्यांना फसवणाऱ्या मोदी सरकारचा करेक्ट कार्यक्रम करा: नाना पटोले

युपीए सरकारचे निर्णय जनतेच्या हिताचे पण मोदी सरकारचे निर्णय मुठभर लोकांसाठी: बाळासाहेब थोरात

चांदवडच्या शेतकरी मेळाव्यात एनसीपीचे अध्यक्ष शरद पवार व शिवसेना खा. संजय राऊतांची उपस्थिती.

चांदवड, नाशिक, दि. १४ मार्च
शेतकरी आपल्या मागण्यांसाठी दिलीच्या सीमेवर व रामलीला मैदानावर आंदोलन करत आहेत. हमी भावाचा कायदा करावा ही शेतकऱ्यांची मागणी आहे पण मोदी सरकार त्यांची दखल घेत नाही. मोदी सरकारने २२ अरबपतींचे १६ लाख कोटींचे कर्ज माफ केले परंतु शेतकऱ्यांचे एक रुपयाचेही कर्ज माफ केले नाही. ज्यांना शेतकऱ्यांच्या कष्टाची जाणीव नाही, त्यांचे दुःख समजत नाही तो शेतकऱ्यांना मदत काय करणार? असा सवाल उपस्थित करत काँग्रेस सरकारचे व आपले दरवाजे सदैव शेतकरी व सर्वसामान्यांसाठी खुले असतील व इंडिया आघाडीचे सरकार आल्यावर शेतकऱ्यांना जीएसटीमधून वगळणार, पीक वीमा योजनेची पुनर्रचना करणार असे खासदार राहुल गांधी यांनी सांगितले.

भारत जोडो यात्रेदरम्यान चांदवड येथे शेतकरी मेळाव्याला राहुल गांधी संबोधित करत होते. राहुल गांधी पुढे म्हणाले की, देशात आज शेतकरी समस्या, बेरोजगारी, महागाई, भागिदारी हे मुळे मुद्दे आहेत पण जनतेच्या या मुद्द्यांपासून लक्ष दुसरीकडे वळवले जात आहे. पिक विमा योजनेचा फायदा केवळ कंपन्यांना होतो, शेतकऱ्यांचे नुकसान झाले तर त्यांना मदत मिळत नाही हे चित्र बदलण्याची गरज आहे, काँग्रेसचे सरकार आल्यानंतर पिक विमा योजनेची पुनर्रचना केली जाईल. आयात-निर्यात धोरणाचा फटका शेतकऱ्यांना बसणार नाही याची काळजी घेतली जाईल. शेतकऱ्यांवर जीएसटी लावलेला आहे त्याचा काँग्रेस सरकार विचार करुन शेततकऱ्यांना जीएसटीतून वगळण्याचा प्रयत्न करेल. मुठभर उद्योगपतींचे कर्ज माफ होत असेल तर शेतकऱ्यांचेही कर्ज माफ झाले पाहिजे व काँग्रेस सरकार ते करेल. सीमेवरील जवान व शेतकरी यांच्याशिवाय देश चालू शकत नाही म्हणून शेतकऱ्यांचे आवाज ऐकणारे काँग्रेसचे सरकार असेल असे राहुल गांधी म्हणाले.

राष्ट्रवादी काँग्रेस पक्षाचे अध्यक्ष शरद पवार यावेळी म्हणाले की, आज द्राक्ष, कांदा, कापूस या शेतमालाला भाव मिळत नाही अशी परिस्थिती आहे. शेतकऱ्याला दोन पैसे मिळाले पाहिजेत अशी भूमिका घेतली पाहिजे. आज शेतकरी संकटात आहे त्याला भाजपाचे सरकार जबाबदार आहे. युपीएचे सरकार असताना शेतकऱ्यांची ७० हजार कोटी रुपयांची कर्जमाफी करुन शेतकऱ्यांच्या खांद्यावरचे ओझे उतरवले होते. सध्याच्या भाजपा सरकारची शेतकऱ्यांबद्दल अनास्था असल्यामुळे शेतकऱ्यांची बिकट परिस्थिती आहे, असा आरोप शरद पवार यांनी केला.

शिवसेना खासदार संजय राऊत यावेळी म्हणाले की, भारत जोडो न्याय यात्रेतून राहुल गांधी शेतकऱ्याची, जनतेची बात ऐकत आहेत पण काही लोक फक्त मन की बातच करतात. या यात्रेमुळे देश जोडण्याचे, लोकांना जोडण्याचे काम केले आहे. चांदवड ही कांदा नगरी आहे पण या कांद्याने शेतकऱ्याला रडवले आहे. भाजपाच्या राज्यात गद्दार आमदार खासदारांना ५०-५० कोटी रुपयांचा भाव मिळतो पण कांद्याला भाव मिळत नाही. देशाच्या पंतप्रधानांनी जय जवान व जय किसानचा नारा दिला होता पण आज भाजपा राज्यात शेतकरी व जवान दोघेही मरत आहेत. देशाच्या उज्ज्वल भविष्यासाठी राहुल गांधी यात्रा काढत आहेत. या यात्रेने एक गॅरंटी तर पक्की केली आहे आणि ती म्हणजे ‘मोदी तो गयो’ असे म्हणत मोदी सरकार पुन्हा येणार नाही, असे स्पष्ट केले.

काँग्रेस प्रदेशाध्यक्ष नाना पटोले म्हणाले की, २०१४ च्या निवडणुकीवेळी नरेंद्र मोदी यांनी सरकार आले की पहिली सही शेतकरी कर्जमाफीच्या फाईलवर करेन असे आश्वासन दिले होते, शेतकऱ्यांचे उत्पन्न दुप्पट करणार, हमी भाव देणार अशी आश्वासने यवतमाळमध्ये दिली होती पण १० वर्षात ती पूर्ण केली नाहीत, मोदींनी शेतकऱ्यांना फसवले आहे. कांदा नाही खाल्ला तर काही फरक पडत नाही असे भाजपच्या अर्थमंत्री निर्मला सितारमण म्हणाल्या होत्या. या शेतकरीविरोधी व शेतकऱ्यांना फसवणाऱ्या भाजपा सरकारचा करेक्ट कार्यक्रम करायची वेळ आली आहे आणि लोकसभा निवडणुकीत तो करा, असे आवाहन पटोले यांनी केले.

विधिमंडळ काँग्रेस पक्षाचे नेते बाळासाहेब थोरात म्हणाले की, मणिपूरपासून राहुल गांधी हे शेतकरी, तरुण, कामगार, महिला वर्गाला गॅरंटी देत आहेत. २००४ ते २०१४ या काळात युपीए सरकार जनतेचे, शेतकरी हिताचे निर्णय घेत होते परंतु मागील १० वर्षात केवळ मुठभर लोकांसाठी निर्णय घेतले जात आहेत. आज शेतकरी संकटात आहे त्याला भारतीय जनता पक्षाचे सरकारच जबाबदार असेही थोरात म्हणाले.

या शेतकरी मेळाव्याला राष्ट्रवादी काँग्रेसचे अध्यक्ष खासदार शरद पवार, शिवसेनेचे खासदार संजय राऊत, काँग्रेस प्रदेशाध्यक्ष नाना पटोले, विधिमंडळ काँग्रेस पक्ष नेते बाळासाहेब थोरात, AICC मीडिया विभागाचे प्रभारी जयराम रमेश, AICC सचिव आशिष दुआ, माजी मंत्री CWC सदस्य यशोमती ठाकूर, माजी राज्यमंत्री विश्वजित कदम, राष्ट्रवादीचे प्रदेशाध्यक्ष जयंत पाटील, प्रदेश उपाध्यक्ष संघटन व प्रशासन नाना गावंडे, NSUI चे प्रदेशाध्यक्ष आमीर शेख, सरचिटणीस ब्रिजेश दत्त, प्रवक्ते डॉ. राजू वाघमारे, हेमलता पाटील, माजी आमदार शिरीष कोतवाल, कम्युनिस्ट नेते माजी आमदार जीवा पांडू गावात यांच्यासह महाविकास आघाडीचे नेते पदाधिकारी व हजारो शेतकरी उपस्थित होते.

काँग्रेसला अनेक मोठे धक्के बसणार : भाजपा प्रदेशाध्यक्ष चंद्रशेखर बावनकुळे

मुंबई, 13 मार्च 2024 : काँग्रेसचे ज्येष्ठ नेते आणि माजी मंत्री पद्माकर वळवी यांनी बुधवारी भारतीय जनता पार्टीत प्रवेश केला. भाजपा प्रदेशाध्यक्ष चंद्रशेखर बावनकुळे यांनी त्यांचे स्वागत केले. राहुल गांधी यांच्या भारत जोडो न्याय यात्रेचा समारोप होईपर्यंत महाराष्ट्रात काँग्रेसला अनेक मोठे धक्के बसणार आहेत, असे सूचक भाष्य भाजपा प्रदेशाध्यक्ष चंद्रशेखर बानवकुळे यांनी यावेळी केले.

भाजपा प्रदेश कार्यालयात झालेल्या या कार्यक्रमाला माजी मुख्यमंत्री अशोक चव्हाण, आदिवासी विकास मंत्री डॉ.विजयकुमार गावित, ग्रामिण विकास मंत्री गिरीश महाजन, प्रदेश उपाध्यक्ष श्रीमती. स्मिता वाघ, प्रदेश सरचिटणीस विजय चौधरी आदी उपस्थित होते.

श्री. बावनकुळे यांनी सांगितले की, काँग्रेसने आदिवासी समाज आणि मागासवर्गीयांची नेहमीच फसवणूक केली. या समाजातील नेत्यांना हे लक्षात आल्याने हे नेते भारतीय जनता पार्टीत प्रवेश करू लागले आहेत. पंतप्रधान नरेंद्र मोदी यांच्या विकसित भारताच्या संकल्पाला साथ देण्यासाठी श्री. वळवी यांनी काँग्रेस सोडून भारतीय जनता पार्टीत प्रवेश घेण्याचा निर्णय घेतला आहे. त्यांचा अनुभव व ज्येष्ठता लक्षात घेऊन संघटनेत त्यांचा सन्मान राखला जाईल, असेही श्री. बावनकुळे यांनी नमूद केले.

राहुल गांधी यांची भारत जोडो न्याय यात्रा नंदुरबारमध्ये असतानाच वळवी यांच्यासारखा निष्ठावंत नेता, माजी मंत्री काँग्रेसला सोडचिठ्ठी देतो यावरून या पक्षाची दारूण अवस्था लक्षात येते. राहुल गांधींच्या यात्रेचा समारोप होईपर्यंत राज्यातील अनेक काँग्रेस नेते, कार्यकर्ते मोठ्या संख्येने भारतीय जनता पार्टीत प्रवेश करतील, असेही ते म्हणाले.

श्री.वळवी यांनी सांगितले की, आपण काँग्रेसचे आजवर निष्ठेने काम केले. मोदी सरकारकडून होणार्‍या विकासकामांमुळे प्रभावित होऊन आपण भारतीय जनता पार्टीत प्रवेश केला आहे. भाजपा संघटनेचे काम आपण निष्ठापूर्वक करू. श्री. वळवी हे 1999 ते 2014 या काळात तळोदा व शहादा मतदारसंघातून विधानसभेवर निवडून आले होते. 2009 ते 2014 या काळात श्री. वळवी हे राज्य मंत्रिमंडळात मंत्री होते.
यावेळी प्रदेश काँग्रेस सरचिटणीस विनायक देशमुख, जालना जिल्ह्यातील मनसे नेते ज्ञानेश्‍वर(माऊली) गायकवाड, प्रदेश काँग्रेस सचिव अर्चना राठोड, जळगाव जिल्हा काँग्रेस सरचिटणीस मनोज सोनावणे, नंदुरबार पंचायत समितीचे माजी सदस्य लगन पावरा, महेंद्र बागुल, प्रदेश आदिवासी काँग्रेसचे सरचिटणीस अ‍ॅड. रोशन गावित यांनी भारतीय जनता पार्टीत प्रवेश केला.