पुणे, दि. १८: लोकसभा सार्वत्रिक निवडणुकीच्या अनुषंगाने मुद्रणालय चालकांनी लोकप्रतिनिधीत्व अधिनियम १९५१ मधील तरतुदींचे पालन करावे, असे आवाहन जिल्हाधिकारी तथा जिल्हा निवडणूक अधिकारी डॉ.सुहास दिवसे यांनी केले.

लोकसभा निवडणुकीच्या पार्श्वभूमीवर जिल्हाधिकारी कार्यालयात आयोजित बैठकीत ते बोलत होते. बैठकीस निवासी उपजिल्हाधिकारी श्रीमती ज्योती कदम, पूना प्रेस ओनर्स असोसिएशनचे अध्यक्ष राहूल मारुलकर, सदस्य रवींद्र जोशी आदी उपस्थित होते.

यावेळी जिल्हाधिकारी डॉ. दिवसे म्हणाले, निवडणुकीदरम्यान उपयोगात आणले जाणारे हस्तपत्र, हस्तपुस्तिका, भित्तीपत्रके आदी छापिल प्रचारसाहित्याच्या छपाईसंदर्भात लोकप्रतिनिधीत्व अधिनियम १९५१ चे कलम १२७ए नुसार तरतुदींचे पालन होणे आवश्यक आहे. त्यानुसार निवडणूक प्रचारसाहित्यावर मुद्रक आणि प्रकाशकाचे नाव व पत्ता असणे बंधनकारक आहे.

प्रकाशकाने ओळखीचा पुरावा म्हणून ओळखणाऱ्या दोन व्यक्तींनी साक्षांकित केलेले स्वस्वाक्षरीत प्रतिज्ञापत्र दोन प्रतीत मुद्रकाकडे सादर करणे आवश्यक आहे. मुद्रकाने छपाईनंतर प्रतिज्ञापत्र आणि प्रचारसाहित्याची एक प्रत तात्काळ जिल्हाधिकारी यांना पाठविणे आवश्यक आहे.

या कलमाचा भंग झाल्यास सहा महिन्यापर्यंतचा तुरुंगवास किंवा दोन हजार रुपयांपर्यंत दंड किंवा दोन्ही अशा शिक्षेची तरतूद आहे. तरी जिल्ह्यातील सर्व मुद्रणालय चालकांनी लोकप्रतिनिधीत्व अधिनियमाचे पालन करुन वेळोवेळी माहिती सादर करावी. मुद्रणालय संघटनेनेदेखील आपल्या सर्व सदस्यांना या तरतुदीची माहिती द्यावी, असेही आवाहन जिल्हाधिकारी डॉ. दिवसे यांनी बैठकीदरम्यान केले.

संशयास्पद बँक व्यवहारांची माहिती बँकांनी जिल्हा प्रशासनाला तात्काळ द्यावी-जिल्हाधिकारी डॉ.सुहास दिवसे

लोकसभा सार्वत्रिक निवडणुकीच्या आदर्श आचारसंहितेची अंमलबजावणी जिल्ह्यात सुरू असून संशयास्पद बँक व्यवहारांवर बँकांनी लक्ष ठेवावे आणि अशा सर्व व्यवहारांची माहिती जिल्हा प्रशासनाला तात्काळ द्यावी, असे निर्देश जिल्हाधिकारी डॉ.सुहास दिवसे यांनी आज दिले.

जिल्हाधिकारी कार्यालयात लोकसभा सार्वत्रिक निवडणुकीच्या अनुषंगाने बँक अधिकाऱ्यांच्या बैठकीत ते बोलत होते. अतिरिक्त जिल्हाधिकारी तथा निवडणूक खर्च समन्वयक अधिकारी सोनाप्पा यमगर, उपजिल्हा निवडणूक अधिकारी मिनल कळसकर, जिल्हा अग्रणी बँक व्यवस्थापक प्रविण नलावडे यावेळी उपस्थित होते.

डॉ.दिवसे म्हणाले, निवडणूक आयोगाने दिलेल्या सूचनांनुसार जिल्ह्यातील बँकाकडून होणाऱ्या व्यवहारांची माहिती निवडणूक आयोगाकडे सादर करण्यासाठी समन्वय समिती स्थापन करण्यात आली आहे. एक लाख रुपयांपेक्षा जास्त रकमांच्या संशयास्पद व्यवहारांवर प्रशासन करडी नजर ठेवून आहे. बँकांनी त्यांच्या स्तरावर समन्वयक अधिकारी नियुक्त करुन जिल्हा अग्रणी बँक अधिकारी यांच्यामार्फत अशाप्रकारच्या संशयास्पद बँक व्यवहारांची माहिती जिल्हा प्रशासनाला तात्काळ उपलब्ध करुन द्यावी. आर्थिक व्यवहाराच्यादृष्टीने संवेदनशील असलेल्या काही भागात जिल्हा प्रशासनातर्फे विशेष लक्ष ठेवण्यात येत असल्याचे त्यांनी सांगितले.

यावेळी राष्ट्रीयकृत बँका, सहकारी बँका, पतसंस्था, वित्त पुरवठा करणाऱ्या संस्थांचे वरिष्ठ अधिकारी उपस्थित होते.

पुणे, दि. १८: पुणे महानगर प्रदेश विकास प्राधिकरण क्षेत्रातील सर्व अनधिकृत व धोकादायक जाहिरात फलक, आकाशचिन्ह, बोर्ड, बॅनर, फ्लेक्स त्वरीत जाहिरात फलक मालक, जागा मालक, विकासक, जाहिरातदार संस्था यांनी हटवावेत किंवा पुणे महानगर प्रदेश विकास प्राधिकरणाकडून ३१ मार्चपर्यंत ते लावण्याची परवानगी घ्यावी, असे आवाहन करण्यात आले आहे.

पीएमआरडीए क्षेत्रात असलेल्या मुख्य चौक, गर्दी वा वर्दळीच्या ठिकाणी, जास्त लांबी, रुंदी व उंचीचे, उंच इमारतीवरील कमाल मर्यादेपेक्षा मोठे तथा राष्ट्रीय महामार्गालगत असलेल्या अनधिकृत, धोकादायक असलेले आकाशचिन्ह, बोर्ड, बॅनर, फ्लेक्स येणाऱ्या उन्हाळी वाऱ्यामुळे पडून किंवा कोसळून जीवितहानी वा वित्तहानी होण्याची शक्यता नाकारता येत नाही.

अनधिकृत, धोकादायक होर्डिंग, आकाशचिन्ह, बोर्ड, बॅनर, फ्लेक्स त्वरीत हटविण्यात आले नसल्यास पीएमआरडीकडून निष्कासित करण्यात येतील. तसेच होर्डिंगमुळे दुर्घटना घडल्यास संबंधित जाहिरातदार संस्था यांना व्यक्तिशः जबाबदार धरून योग्य ती कायदेशीर कार्यवाही करण्यात येईल, असेही पीएमआरडीचे विकास परवानगी विभागाचे महानगर नियोजनकार सुनिल मरळे यांनी कळविले आहे.

पुणे : विवेकानंद इन्स्टिट्यूट ऑफ टेक्नॉलॉजी आणि पद्मभूषण डॉ. वसंतदादा पाटील कॉलेज ऑफ आर्किटेक्चर महाविद्यालयाच्या वतीने आयोजित आंतरमहाविद्यालयीन स्पोर्ट्स लीग शिअरफोर्स स्पर्धेत भारती विद्यापीठ डीम्ड युनिव्हर्सिटी कॉलेज ऑफ आर्किटेक्चर संघाने विजेतेपद पटकावले.

वानवडी येथील ‘एस.आर.पी.एफ.’च्या मैदानावर ही स्पर्धा झाली. स्पर्धेच्या पारितोषिक वितरण प्रसंगी राष्ट्रीय फुटबॉल खेळाडू परेश शिवलकर, राष्ट्रीय बास्केटबॉल खेळाडू सुयोशा शेट्टी, राष्ट्रीय व्हॉलीबॉल खेळाडू प्रसाद खटावकर, संस्थेचे सचिव जितेंद्र पितळीया, महाविद्यालयाचे प्राचार्य प्रसन्न देसाई, ज्येष्ठ आर्किटेक्ट मनोज तातूसकर, खिरीड टुरिझमचे संतोष खिरीड उपस्थित होते. महाविद्यालयाच्या क्रीडा संघातील तेजल अंधारे ऋषिकेश वखारे आदित्य पवार नमन पारेख यांनी आयोजनात सहभाग घेतला.
स्पर्धेतील मुलांच्या गटातील फुटबॉल स्पर्धेतील अंतिम लढतीत भारती विद्यापीठ संघाने ब्रिक स्कूल ऑफ आर्किटेक्चर संघावर सडनडेथमध्ये ६-५ अशी मात केली. निर्धारित वेळेत दोन्ही संघांना गोल नोंदविण्यात अपयश आले. त्यामुळे पेनल्टी शूटआउटचा अवलंब करण्यात आला. यातही ५-५ अशी बरोबरी झाली. यात भारती विद्यापीठकडून आर्यासेन, ईसाक, रिषी, दीपककुमार, प्रियांशू यांनी गोल केले, तर ब्रिककडून अथर्व वानकडे, मनीष यादव, जयेश खैरे, शुभम अग्रवाल, अंश अग्रवाल यांनी गोल केले. सडनडेथमध्ये भारती विद्यापीठकडून दिनांको मोदकने गोल केला, तर ब्रिकच्या शिवम राठोडला गोल करण्यात अपयश आले.

फुटबॉल स्पर्धेत मुलींच्या गटात भानुबेन नानावटी कॉलेज ऑफ आर्किटेक्चर संघाने विजेतेपद पटकावले. अंतिम लढतीत भानुबेन कॉलेजने पिंपरी-चिंचवडच्या एस. बी. पाटील कॉलेज ऑफ आर्किटेक्चर संघावर १-०ने मात केली. यात श्रुती वीरने दहाव्या मिनिटाला केलेला गोल निर्णायक ठरला.

व्हॉलीबॉलमध्ये पाटील स्कूल विजेते

व्हॉलिबॉल स्पर्धेत मुलांच्या गटात आकुर्डीच्या डॉ. ज्ञानदेव यशवंतराव पाटील स्कूल ऑफ आर्किटेक्चर संघाने विजेतेपद पटकावले. अंतिम लढतीत पाटील स्कूलने सिंहगड कॉलेज ऑफ आर्किटेक्चर संघावर २५-९, २५-२७, १५-७ अशी मात करून विजेतेपद पटकावले. व्हॉलिबॉल स्पर्धेत मुलींच्या गटात सिंहगड कॉलेजने या पराभवाची परतफेड केली. अंतिम लढतीत सिंहगड कॉलेजने डॉ. ज्ञानदेव यशवंतराव पाटील स्कूल ऑफ आर्किटेक्चर संघावर २५-१६, २५-२२ अशी मात केली.

बास्केटबॉलमध्ये पाटील स्कूलचीच बाजी

बास्केटबॉल स्पर्धेतील मुलांच्या गटात डॉ. ज्ञानदेव यशवंतराव पाटील स्कूल ऑफ आर्किटेक्चर संघानेच बाजी मारली. अंतिम लढतीत पाटील स्कूलने मराठवाडा मित्रमंडळ कॉलेज ऑफ आर्किटेक्चर संघावर ४५-३४ असा विजय मिळवला. मुलींच्या गटात मराठवाडा मित्रमंडळ कॉलेज ऑफ आर्किटेक्चर संघाने विजेतेपद पटकावले. अंतिम लढतीत मराठवाडा कॉलेजने भानूबेन नानावटी कॉलेज ऑफ आर्किटेक्चर संघावर ३२-३१ असा रोमहर्षक विजय मिळवला.

स्पर्धेतील सर्वोत्कृष्ट खेळाडू

१.    व्हॉलिबॉल मुली – कांचन (डी. वाय. पी. सी. ओ. ए., आकुर्डी).

२.    व्हॉलिबॉल मुले – पुरुषोत्तम मुसमाडकर (डी. वाय. पी. सी. ओ. ए., आकुर्डी)

३.    बास्केटबॉल मुली – शांभवी शिंदे (एमएमसीओए) आणि आश्लेषा नेहेरे (एमएमसीओए)

४.    बास्केटबॉल मुले – सिद्धांत केंजळे (एमएमसीओए)

५.    फुटबॉल मुली – समीक्षा पाटील (एसबीपीसीओए) आणि वैष्णवी निवेकर (बीएनसीए)

६.    फुटबॉल मुले – अंश अग्रवाल (बीएसओए) आणि दीपक कश्यप (बीव्हीडीयू)

रायगडावरील मेघडंबरीची हुबेहूब प्रतिकृती
पुणे : ‘बहुजन हिताय बहुजन सुखाय’ असे ब्रीद असणाऱ्या आणि समाजातील बहुजनांसाठी शिक्षणाचे व्रत घेतलेल्या शुक्रवार पेठेतील श्री शिवाजी मराठा सोसायटीच्या प्रांगणातील छत्रपती शिवरायांच्या पुतळ्यावरील मेघडंबरीचे अनावरण करण्यात आले. कोल्हापूरचे श्रीमंत स्वर्गीय शाहू महाराज यांनी छत्रपती शिवाजी महाराज यांच्या स्मरणार्थ सुरू केलेल्या संस्थेच्या प्रांगणात हा पुतळा असून रायगडावरील मेघडंबरीची हुबेहूब प्रतिकृती साकारण्यात आली आहे.

संस्थेचे उपाध्यक्ष राजेंद्र जगताप यांच्या हस्ते मेघडंबरीचे उद्घाटन झाले. यावेळी संस्थेचे मानद सचिव अण्णा थोरात, सहसचिव विकास गोगावले, खजिनदार जगदीश जेधे, नियामक मंडळ अध्यक्ष सत्येंद्र कांचन, कारभारी मंडळ अध्यक्ष विलास गव्हाणे, कमल व्यवहारे आणि सर्व सभासद यावेळी उपस्थित होते.  विशाल ताजनेकर आणि नागेश परदेशी यांच्या मार्गदर्शनाखाली मेघडंबरी साकारण्यात आली.

अण्णा थोरात म्हणाले,  श्री शिवाजी मराठा सोसायटी १९१८ पासून बहुजन समाजाला शैक्षणिक संधी आणि सुविधा उपलब्ध करून देण्याचे काम करत आहे.   कोल्हापूरचे श्रीमंत शाहू महाराज यांनी संस्थेची स्थापना थोर योद्धा राजा छत्रपती शिवाजी महाराज यांच्या स्मरणार्थ पुण्यात केली. त्याचे प्रतीक म्हणून शिवरायांचा पुतळा १६ एप्रिल १९७१ साली संस्थेच्या प्रांगणात  स्थापित करण्यात आला. याच पुतळ्याचे नूतनीकरण करीत त्यावर मेघडंबरी साकारण्यात आली आहे.

पुणे -काँग्रेसकडून रवींद्र धंगेकर,आबा बागुल, अरविंद शिंदे, मोहन जोशी अशी इच्छुकांची जंत्री असताना…जर लोकसभेला वसंत मोरे अपक्ष म्हणून उभे राहिले तर भाजपाची नाही तर मोहन जोशींची मते खातील असे विधान आज पत्रकार परिषदेत मंत्री चंद्रकांतदादा पाटलांनी केल्याने,काँग्रेसची उमेदवारी यंदा देखील खेचून आणण्यात मोहन जोशी यशस्वी होणार किंवा कसे याबाबत राजकीय चर्चेला आता उधाण येऊ पहाते आहे.धंगेकर -मोहोळ अशी सरळ लढत माध्यमांनी रंगविली आहे तर आबा बागुलांनी निष्ठेचा रंग आस्मानी चढविला आहे. अशा स्थितीत चंद्रकांतदादांनी मोहन जोशींचे नाव घेऊन धुराळा उठविला आहे. विरोधी पक्षाच्या उमेदवाराने विचार करूनच निवडणुकीला उभे राहावे.’ अशा शब्दात देखील चंद्रकांत पाटील यांनी काँग्रेसच्या या इच्छुकांना चिमटा काढला आहे.

पुणे, बारामती, शिरूर लोकसभा क्‍लस्टरच्या प्रमुख पदाची जबाबदारी पाटील यांच्याकडे आहे. त्यानुसार, त्यांनी सोमवारी पुणे लोकसभा मतदारसंघातील सहा विधानसभा मतदारसंघातील पदाधिकाऱ्यांची बैठक घेतली. दीपक मानकर,संदीप खर्डेकर,श्रीनाथ भीमाले,अजय भोसले आदि यावेळी उपस्थित होते.यावेळी त्यांनी पत्रकारांशी संवाद साधला.ते म्हणाले,”भाजपसाठी पुणे लोकसभेची निवडणूक अवघड आहे, असा विरोधकांचा समज आहे. या निवडणुकीत उद्धव ठाकरे यांच्या सेनेची लाखभर मते कमी झाली, तरी अजित पवार यांच्या राष्ट्रवादी कॉंग्रेस पक्षाची दीड लाख मते वाढणार असल्याने आमचे मताधिक्‍य चांगलेच वाढेल. म्हणून विरोधी पक्षाच्या उमेदवाराने विचार करूनच निवडणुकीला उभे राहावे.

पाटील म्हणाले, ‘राज्यातील ४८ जागा भाजप जिंकणार असून मोदी फॅक्‍टर अद्यापही कायम आहे. मी स्वतः गणवेश बदलून तुमच्यासोबत येतो, आपण १०० लोकांना भेटून सर्वेक्षण करू. त्यापैकी ९० जणांकडून मोदी यांचेच नाव येईल. यावरूनच मोदी फॅक्‍टर किती लोकांपर्यंत पोचला आहे, हे तुम्हाला कळू शकेल. इलेक्‍ट्रॉल बॉन्डमध्ये कोणत्याही प्रकारचा घोटाळा झालेला नाही.

सगळे पैसे धनादेशाने आले आहेत. त्यामुळे विरोधकांनी किती आरोप केले तरी महाराष्ट्रातील जनतेला त्यासंबंधीचे वास्तव माहीत आहे. ‘वसंत मोरे यांनी अपक्ष निवडणूक लढल्यास भाजपला किती फटका बसेल, या प्रश्‍नावर पाटील यांनी भाजपला कमी फटका बसेल, मात्र जास्त फटका मोहन जोशी यांना बसेल, असे सांगत मोहन जोशी हेच विरोधी पक्षाचे उमेदवार असतील, असे अप्रत्यक्षपणे जाहीर केल्याने सगळ्यांच्याच भूवया उंचावल्या.भाजपकडून सोलापूर लोकसभेसाठी उमेदवारीची चाचपणी सुरू आहे. आत्तापर्यंत तीन उमेदवारांबाबत भाजपकडून विचार करण्यात आला आहे. मात्र सोलापूरमध्ये सारे काही अलबेला नसल्याचे पाटील यांनी सांगितले. उपमुख्यमंत्री देवेंद्र फडणवीस यांनी स्वतः या मतदारसंघातील उमेदवाराबाबत लक्ष घातले आहे. ते प्रत्येक गोष्ट तावून सुलाखून घेत असल्याने अनेकांची झोप उडाली असून फडणवीस योग्य उमेदवार देतील, असेही पाटील यांनी स्पष्ट केले.सोलापूरच्या उमेदवाराबाबत बोलताना पाटील यांनी देवेंद्र फडणवीस यांचे नाव घेऊन त्यांच्या कार्यपद्धतीचे कौतुक केले. त्याचवेळी बारामती लोकसभा मतदारसंघासाठी सुनेत्रा पवार यांच्या उमेदवारीबाबत चर्चा सुरु आहे का ? याविषयी पाटील यांनी “देवेंद्र फडणवीस यांना राजकारणामध्ये जितके लांब दिसते, तितके कोणालाच दिसत नाही. ते कधीच चुकीचा पत्ता काढत नाहीत’ असे विधान केले.

कोल्हापूर मध्ये चारही जागावर मी निवडणुक लढवून जिंकण्यास पात्र असताना देखील, गृहमंत्री अमित शाह यांनी मला भविष्यातील गणिते करुन पुण्यातून निवडणुक लढण्यास सांगितले त्यामुळे आमदार रोहित पवार यांनी मला शिकवण देऊ नये. फडणवीस असे डॉक्टर झाले की त्यांना कोणतेही निदान पटकन हाेते व त्यावर लगेच इंजेक्शन देता येते. त्यामुळे इतरजण त्यांना दबकून असतात. फडणवीस यांना जेवढे लांबचे दिसते तितके हल्ली काेणाला दिसत नाही ते कधी चुकीचा पत्ता टाकत नाही. रक्ताचे नात्याचे घरात देखील मतभेद असतात. ते मतभेद काेणीतरी त्या कुटुंबाला सांगून संपवू शकताे. पवार कुटुंबाला एकमेकाला काय मते व्यक्तशी करु वाटतात याबद्दल मी भाष्य करणार नाही.

पुणे- महापालिकेच्या आणि एकूणच स्थानिक स्वराज्य संस्थांच्या निवडणूका कायम पुढे पुढे ढकलत , मतदानाच्या बाबतीत EVM ची सक्ती लादणाऱ्या सरकारी व्यवस्थेने विभागीय आयुक्तांच्या अध्यक्षतेखाली स्वतःच्या मर्जीनुसार राजकीय कार्यकत्यांची समिती गावांच्या विकास कामांसाठी नेमणे म्हणजे लोकशाहीचा गाला घोटण्यासारखे आहे. असा आरोप करत या निर्णयाला आता न्यायालयात आव्हान द्यावे लागेल ,लोकांना आपले प्रतिनिधी निवडण्याचा हक्क आहे त्यानुसार निवडू द्या , त्यांच्यावर तुमच्या मर्जीतले कार्यकर्ते लादु नका असा इशारा शिवसेनेच्या उद्धव बाळासाहेब ठाकरे गटाने दिला आहे .

या संदर्भात शिवसेनेच्या संजय मोरे, गजानन थरकुडे, शंकरनाना हरपळे, राजाभाऊ होले, बाळासाहेब भांडे, भरत कुंभारकर, समीर तुपे, आनंद गोयल, मा नगरसेवक बाळा ओसवाल, पल्लवी जावळे, दिलीप व्यवहारे, सूरज मोराळे, अजय परदेशी, नागेश खडके, ओंकार शेवाळे यांनी विभागीय आयुक्तांना निवेदन दिले आहे . यावेळी संजय मोरे म्हणाले कि,’विभागीय आयुक्तांच्या अध्यक्षतेखाली चार दिवसांपूर्वी भाजप व शिंदे गटाच्या प्रत्येकी 9 सदस्यांची म्हणजे एकूण 18 सदस्यांची नेमणूक समाविष्ट गावांसाठी करण्यात आली. आचारसंहिता सुरू होणार म्हणून काल परत अजित पवार गटाच्या 9 सदस्यांची यादी प्रसिद्ध झाली. त्यात माजी नगरसेवक बाबुराव चांदेरे, दत्ता धनकवडे इत्यादी जुन्या पुण्यातील माजी नगरसेवकांचा खरतर या गावांशी काही संबंध नसताना सुद्धा समाविष्ट गावांच्या लोकप्रतिनिधी सदस्य पदी निवड केली आहे. यापूर्वी महानगरपालिकेच्या हद्दीमध्ये समाविष्ट झालेल्या गावांसाठी अशी समिती नेमलेली नव्हती. 1997 साली महानगरपालिकेच्या हद्दीत समाविष्ट झालेल्या 38 गावांना पाच वर्ष लोकप्रतिनिधीत्व नव्हतं. 2002 सालात या गावांचे वेगळे प्रभाग करून त्यांना प्रतिनिधित्व देण्यात आले. त्यामुळे आज त्या भागांमध्ये चांगला विकास होत आहे. लोकसभेच्या पार्श्वभूमीवर ही गावं शिरूर आणि बारामती लोकसभा मतदारसंघांमध्ये येतात. त्यासाठीच राष्ट्रवादी आणि शिवसेना शिंदे गट यांनी हे तुष्टिकरणाच राजकारण केलेले आहे. आणि त्यातून राजकीय लाभ घेण्याचा प्रयत्न केला आहे. शिरूर आणि बारामती लोकसभा मतदारसंघांमध्ये महायुतीतील पक्षांची नाजुक स्थिती लक्षात घेता, त्या भागातील नागरिकांना आणि पक्षातील पदाधिकाऱ्यांना खुश करण्यासाठी अशा प्रकारचं धोरण आपली सत्ता टिकवण्यासाठी मुख्यमंत्री आणि त्यांचे नगर विकास खातं करीत आहे.कायद्यामध्ये या समितीला कुठे स्थान द्यावे, याचे निकष नाहीत आणि या संदर्भामध्ये सर्व कागदपत्रे तपासून बघितली तर अशी समिती शासन दरबारी शिफारस केलेली नाही. निवडणुकीची आचारसंहिता जाहीर होण्याच्या दोन दिवस आधी एक आणि त्याच दिवशी सकाळी दुसरी अशा प्रकारची सदस्यांची नावांची यादी हे राजकीय तुष्टीकरण आणि लोकसभा निवडणूक डोळ्यासमोर ठेवून केलेली आहे. शासनाने आणि विभागीय आयुक्ताने या समितीची दखल घेऊ नये, कारण या संदर्भात महामयीम राज्यपाल यांच्या स्वाक्षरीचा अध्यादेश नाही. त्यामुळे ही समितीच बेकायदेशीर आहे. शासनाने आणि विभागीय आयुक्त यांनी या समितीला कायदेशीर स्थान नसल्यामुळे या बेकायदेशीर सदस्यांच्या सल्ल्याने या समाविष्ट गावांचा विचार करू नये. कायद्याने विभागीय आयुक्त यांना असे सदस्य नेमण्याचा एमएमसी ॲक्ट प्रमाणे कुठलेही अधिकार नाहीत. विशेष म्हणजे सरकारलाही नाहीत आणि महापालिका आयुक्त यांना तर नाहीच नाही. विभागीय आयुक्त यांच्या अध्यक्षतेखाली समिती नेमून एक सत्तेचं वेगळच केंद्र निर्माण करण्याचा आणि महानगरपालिकेचे आयुक्त यांच्यावर अंकुश ठेवण्याचा प्रयत्न असणारा हा निर्णय आहे. 48 तासांमध्ये हि समिती रद्द करण्यासंदर्भात निर्णय घेतला नाही, तर शिवसेना उद्धव बाळासाहेब ठाकरे यासंदर्भामध्ये हायकोर्टामध्ये याचिका दाखल करेल. आणि सर्वात महत्त्वाचं लोकप्रतिनिधी जनता निवडते. यांच्या अध्यादेशामध्ये, अध्यादेश नसलेल्या पत्रामध्ये लोकनियुक्त सदस्य शासन लोकनियुक्त कसं करू शकते ? हा मुद्दा महत्त्वाचा आहे. कायद्याला मान्य नसणारी कायदाबाह्य राजकीय तुष्टीकरण करण्यासाठी केलेली ही समिती याविरुद्ध शिवसेना मोठं जन आंदोलन उभारेल.

मुख्य अभियंता श्री. राजेंद्र पवार यांचे प्रशिक्षणार्थींना आवाहन

पुणे, दि. १८ मार्च २०२४: ‘महावितरणमध्ये गेल्या वर्षभरात वीजयंत्रणेची देखभाल व दुरुस्ती तसेच ग्राहकसेवेचे प्रशिक्षण देण्यात आले आहे. या प्रशिक्षणाचा पुढे निश्चितच फायदा होईल. मात्र आयुष्यभर शिकाऊ वृत्ती कायम ठेऊन कौशल्य विकासासाठी ज्ञान वाढवत राहा. केवळ ते आज उपयोगाचे नाही म्हणून दुर्लक्ष करू नका. आत्मसात केलेले हेच ज्ञान भविष्यात उत्तुंग भरारी घेण्यास उपयुक्त ठरेल’, असे मत मुख्य अभियंता श्री. राजेंद्र पवार यांनी सोमवारी (दि. १८) व्यक्त केले.

पुणे परिमंडलामध्ये अप्रेंटिस म्हणून एक वर्षाचे प्रशिक्षण पूर्ण केलेल्या २० विद्युत अभियंत्यांना रास्तापेठ येथील ‘प्रकाशदूत’ सभागृहात निरोप देण्यात आला. यावेळी मुख्य अभियंता श्री. पवार बोलत होते. कार्यक्रमाला सहायक महाव्यवस्थापक (मानव संसाधन) ज्ञानदा निलेकर, प्रशिक्षणाचे समन्वयक डॉ. संतोष पाटणी यांची प्रमुख उपस्थिती होती.

विद्युत अभियांत्रिकीची पदवी व पदविका उत्तीर्ण असलेल्या या २० प्रशिक्षणार्थींना गेल्या वर्षभरात पुणे परिमंडलाच्या विविध कार्यालयाद्वारे उपकेंद्र, वीजवाहिन्या, वितरण रोहित्रांची देखभाल व दुरुस्ती, वीजजोडण्या व मीटरची तपासणी, भूमिगत वीजवाहिन्यांची चाचणी, ग्राहक संवाद, वीजसुरक्षा, ऑनलाइन ग्राहकसेवा, सौर ऊर्जा प्रकल्प, विद्युत वाहनांचे चार्जिंग स्टेशन आदींचे प्रशिक्षण देण्यात आले.

मुख्य अभियंता श्री. पवार म्हणाले की, ‘विजेसारख्या तांत्रिक क्षेत्रात प्रावीण्य मिळवायचे असेल तर स्वतःचे कौशल्य व ज्ञान विकसित करणे अतिशय महत्वाचे आहे. वीजक्षेत्र हे सेवा क्षेत्र आहे. त्यामुळे केवळ पैसा हेच आयुष्याचे ध्येय न ठेवता या क्षेत्रात नोकरी किंवा व्यवसाय करताना सामाजिक बांधिलकी व सेवा कामातून माणसं कमावण्याचे ध्येय ठेवा. यश व समाधान दोन्ही नक्की मिळेल’.

या कार्यक्रमात प्रशिक्षणार्थी विद्युत अभियंत्यांनी प्रातिनिधिक मनोगतामध्ये ‘वीजक्षेत्रातील प्रत्यक्षात तांत्रिक माहिती व ज्ञान मिळाल्याने आत्मविश्वास वाढला. सकारात्मकता आली. अभियंता व कर्मचाऱ्यांची अखंड सुरू असलेली ग्राहकसेवा जवळून पाहता आली. सांघिक कामाचा प्रत्यय आला’, असे मत व्यक्त केले.

पिंपरी चिंचवड पत्रकार संघाच्या वतीने कर्तृत्ववान महिलांचा सन्मान

पिंपरी, पुणे (दि. १८ मार्च २०२४) स्त्री जन्माचा सार्थ अभिमान आहे असे अभिनेत्री प्राजक्ता गायकवाड यांनी सांगितले.
पिंपरी चिंचवड पत्रकार संघाच्या वतीने महिला दिन आणि क्रांतीज्योती सावित्रीबाई फुले यांच्या पुण्यतिथी निमित्त विविध क्षेत्रातील महिलांचा सन्मान चिंचवड, सायन्स पार्क येथे करण्यात आला.
यावेळी अभिनेत्री सायली गोडबोले, विभागीय सचिव गणेश मोकाशी, जिल्हा पत्रकार संघाचे अध्यक्ष सुनील लोणकर, परिषदेचे प्रसिद्धी प्रमुख भरत निगडे, परिषदेचे प्रतिनीधी एम. जी. शेलार, हवेली पत्रकार संघाचे अध्यक्ष रमेश निकाळजे, पिंपरी चिंचवड पत्रकार संघाचे अध्यक्ष अनिल वडघुले, कार्याध्यक्ष अविनाश अदक, उपाध्यक्ष सुरज साळवे, जिल्हा प्रतिनीधी श्रावणी कामत, चिराग फुलसुंदर, विनय सोनवणे, अशोक कोकणे, रामकुमार शेडगे, महावीर जाधव, संतोष गोतावळे, सिद्धांत चौधरी, मारुती बानेवार आदींसह पिंपरी चिंचवड पत्रकार संघाचे पदाधिकारी, सदस्य उपस्थित होते.
पिंपरी चिंचवड मनपा प्रशासन अधिकारी संगीता बांगर, पुणे मनपा उपायुक्त प्रतिभा पाटील, उपजिल्हाधिकारी अर्चना तांबे, वन विभाग अधिकारी ऋतुजा भोरडे, मनपा शाळेतील नॅशनल कबड्डी चॅम्पियन मनीषा राठोड तसेच महिला पत्रकार, महिला पोलिस आदींसह विविध क्षेत्रात उल्लेखनीय कार्य केलेल्या महिलांचा विशेष सन्मान करण्यात आला.
या वेळी प्राजक्ता गायकवाड म्हणाल्या की, आपले अस्तित्व सिद्ध करण्यासाठी ज्या महिला लढत असतात त्यांना प्रोत्साहन देऊन सन्मान करणे इतरांना प्रेरणादायी आहे. महाराणी येसूबाई पात्रासाठी जे प्रेम मला जनतेतून मिळालं त्यांची जन्मभर ऋणी राहील. मांजरांना घाबरणारी मी, पण भूमिकेमुळे घोडेस्वारी शिकले. पिंपरी चिंचवड पत्रकार संघाने माझा सन्मान केला आता मला आणखी उत्कृष्ठ काम करण्यास प्रोत्साहन मिळेल. हा पुरस्कार भेटणे ही यशाची पहिली पायरी आहे. जीवनात आणखी मोठे शिखर गाठायचं आहे.
अभिनेत्री सायली गोडबोले यांनी राजमाता जिजाऊ व क्रांतीज्योती सावित्रीबाई फुले यांच्या जीवनावर व्याख्यान दिले.
प्रास्ताविक करताना अध्यक्ष अनिल वडघुले म्हणाले की, आता सर्वच क्षेत्रात महिलांनी आपल्या कार्यकर्तृत्वाचा ठसा उमठवला आहे. शिक्षण, कला, क्रीडा, सांस्कृतिक, आरोग्य, पर्यावरण, राजकारण, सहकार, व्यापार, पत्रकारिता, पोलिस, प्रशासन अशा सर्वच क्षेत्रात महिला पुरुषांच्या बरोबरीने जबाबदारी पार पाडत आहेत. त्यांना प्रोत्साहन देण्यासाठी आणि इतर युवती, महिलांना प्रोत्साहन मिळावे म्हणून त्यांचा सन्मान या ठिकाणी केला आहे.
कवी अनिल दीक्षित, विनोद शिंदे, गजानन परब, आनंद रांजणे या कवींनी कविता सादर करून दाद मिळवली.
सूत्रसंचालन प्रा. अपर्णा शिंदे, आभार सुरज साळवे यांनी मानले.

पुणे, दि. १८ मार्च : विद्यार्थ्यांमध्ये इनोव्हेशन, इन्क्युबेशन आणि इनव्हेंशनची संस्कृती वाढविण्यासाठी एमआयटी वर्ल्ड पीस युनिव्हर्सिटी तर्फे आयोजित ‘ हॅकएमआयटी-डब्ल्यूपीयू’ २०२४ चे उद्घाटन १९ मार्च रोजी सकाळी ११ वा युनिव्हर्सिटीच्या स्वामी विवेकानंद सभागृहात होणार आहे.
याच्या उद्घाटन प्रसंगी गोदरेज अँड बॉयस एमएफजी कंपनी, लि.चे कार्यकारी उपाध्यक्ष आणि व्यावसायीक प्रमुख पुष्कर गोखले आणि महाराष्ट्र मेट्रो रेल कॉर्पोरेशन लि. (सिस्टम आणि ऑपरेशन्स) चे संचालक विनोद अग्रवाल हे प्रमुख पाहुणे यांच्या उपस्थित होणार आहे. तसेच एमआयटी वर्ल्ड पीस युनिव्हर्सिटीचे संस्थापक अध्यक्ष प्रा.डॉ. विश्वनाथ दा. कराड व उपस्थित राहणार आहेत.
तसेच कुलगुरू डॉ. आर.एम.चिटणीस, एमआयटी वर्ल्ड पीस युनिव्हर्सिटीचे प्र कुलगुरू डॉ. मिलिंद पांडे, डॉ. कृष्णा वरखडे व डॉ. कृष्णप्रसाद गुणाले यांची उपस्थिती राहणार आहे.
एमआयटी डब्ल्यूपीयूचे कार्याध्यक्ष राहुल विश्वनाथ कराड यांच्या संकल्पनेवर आधारित हा कार्यक्रम २१ मार्च पर्यंत होणार आहे. या संदर्भात प्रा.डॉ. मिलिंद पांडे यांनी सांगितले की, माइंड टू मार्केट आणि पेपर टू प्रोडक्ट ही संकल्पना विद्यार्थ्यांमध्ये रूजविण्यासाठी खूप महत्वाची आहे. विद्यार्थ्यांच्या कल्पनांना वाव देऊन त्यांना चालना द्यावी व त्यांची बौद्धिक क्षमता वृद्धिंगत करून त्यांना उद्योजक बनविण्याचे धोरण प्रत्यक्षांत आणण्याच्या हा एक स्तुत्य प्रयत्न आहे. आत देशात नोकरी मागणारे नाही तर नोकरी देण्यार्‍यांची संख्या वाढवायची आहे. आत्मनिर्भर भारत आणि स्टार्ट अप इंडिया संस्कृति वाढविण्यासाठी हॅकेथॉनची मदत होणार आहे.

• कल्‍याणकारी महामंडळासाठी पाठपुरावा केल्‍याबद्दल व्‍यक्‍त केली कृतज्ञता
• रिक्षा चालक, कष्टकऱ्यांना न्‍याय देणे हे माझे कर्तव्‍य : बाबा कांबळे

पिंपरी-

विविध आंदोलने, निवेदने देऊन रिक्षा चालकांच्‍या कल्‍याणकारी मंडळासाठी पाठपुरावा करत यश मिळवून दिले. याबद्दल ऑटो, टॅक्सी, ट्रान्सपोर्ट फेडरेशनचे व महाराष्ट्र रिक्षा पंचायत राष्ट्रीय अध्यक्ष तसेच ऑटो टॅक्सी चालक-मालक संघटना संयुक्त कृती समिती महाराष्ट्र राज्य संस्थापक बाबा कांबळे यांचा पुणे आणि पिंपरी-चिंचवड मधील चालक मालकांनी सन्‍मान केला. पिंपरी येथील बाबा कांबळे यांच्‍या कार्यालयात भेट घेऊन हा सन्‍मान करण्यात येत आहे रिक्षा चालकांसाठी केलेल्‍या कामाप्रती कृतज्ञता व्‍यक्‍त केली. या सन्‍मानाला उत्‍तर देताना बाबा कांबळे म्‍हणाले की, सर्वसामान्‍य कष्टकरी, रिक्षा चालकांच्‍या न्‍याय हक्‍कासाठी आयुष्य समर्पित केले आहे. त्‍यामुळे कल्‍याणकारी मंडळासाठी झालेला निर्णय हे माझ्या लढ्याचे यश असले तरी त्‍यासाठी पाठपुरावा करणे हे माझे कर्तव्‍य असल्‍याचे प्रतिपादन बाबा कांबळे यांनी व्‍यक्‍त केले.

या वेळी. लोणावळा येथील वरिष्ठ नेते बाबुभाई शेख लोणावळा शहराध्यक्ष आनंद सदावर्ते परीक्षा चालका उपस्‍िथत होते.

रिक्षा चालकांसाठी कल्याणकारी महामंडळ स्थापन करण्यासाठी बाबा कांबळे यांच्‍या नेतृत्‍त्‍वात सातत्‍याने पाठपुरावा करण्यात आला. मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार आणि उद्योगमंत्री उदय सामंत यांच्‍या भेटी घेऊन निवेदनाद्वारे पाठपुरावा केला आहे. प्रत्‍यक्ष भेट घेऊन कल्याणकारी मंडळ स्थापन करण्याची मागणी केली होती. या पाठपुराव्‍याला आणि मागणीला यश आले आहे. राज्‍य सरकारने संघटनेला दिलेला शब्द पाळत कल्‍याणकारी मंडळ स्‍थापन करण्यासाठी पाऊले उचलली आहेत. त्‍याचा पहिला भाग म्‍हणून मंडळ स्‍थापन करण्यासाठी तब्‍बल ५० कोटी रुपये निधी देखील मंजूर केला आहे. या निर्णयामुळे राज्‍यातील २० लाख ऑटो, रिक्षा, टॅक्सी चालकांच्‍या आनंदात भर पडली आहे. यासाठी पाठपुरावा करून यश मिळवून दिल्‍याबद्दल पुणे आणि पिंपरी-चिंचवड शहरसह जिल्‍ह्यातील रिक्षा चालकांनी बाबा कांबळे यांचे आभार मानले आहेत. कांबळे यांच्‍या पिंपरी येथील कार्यालयात भेटण्यासाठी रिक्षा चालक गर्दी करत आहेत. तसेच बाबा कांबळे यांचा सन्‍मान करण्यात आला.

या सत्‍काराला उत्‍तर देताना बाबा कांबळे म्‍हणाले की, रिक्षा चालकांच्‍या सत्‍कारातून आणखी काम करण्याची प्रेरणा मिळते. रिक्षा चालकांच्‍या पाठिंब्यामुळे कल्‍याणकारी मंडळ स्‍थापन करण्याची दखल राज्‍य सरकारला घ्यावी लागली. येथून पुढेही ज्‍या मागण्या प्रलंबित आहेत. त्‍याला न्‍याय देण्यासाठी लढणार आहे. रिक्षा चालकांना हक्‍क मिळवून देण्यासाठी लढणे हे माझे कर्तव्‍य असल्‍याचे बाबा कांबळे म्‍हणाले.