पुणे- वाकडेवाडी येथे मोक्याच्या ठिकाणी असलेली आरे डेअरीची तब्बल १६ एकर जमीन कवडीमोल किंमतीत विकण्याचा डाव तिघाडी सरकारने मांडला आहे. ही जागा फडणवीस, शिंदे, पवार यांच्या मालकीची नसून पुणेकरांच्या मालकीची आहे याचा विसर त्यांना पडला असा आरोप करत प्रशांत जगताप यांच्या नेतृत्वात राष्ट्रवादी काँग्रेस (शरदचंद्र पवार) पार्टीच्या वतीने येथे तीव्र निषेध आंदोलन करण्यात आले.
या संदर्भात जगताप यांनी सांगितले कि,’महाराष्ट्राला लाभलेले द्रष्टे नेते स्व. यशवंतराव चव्हाण साहेब यांनी महाराष्ट्राच्या भविष्याचा विचार करून सरकारी आस्थापनांची निर्मिती केली. या सरकारी आस्थापनांची मोक्याच्या अर्थात वाकडेवाडी या ठिकाणी असलेली जमीन कवडीमोल भावात विकण्याचं पाप हे तिघाडी सरकार ( शिंदे-पवार-फडनवीस ) करत आहे.
महाराष्ट्रातील दूध उत्पादक शेतकऱ्यांना हक्काची बाजारपेठ मिळावी, पुण्यासह महाराष्ट्रातील जनतेला सकस दुधाचा पुरवठा व्हावा यासाठी स्व. यशवंतराव चव्हाण साहेबांनी आरे डेअरीची स्थापना केली. पुढे राजकीय नेत्यांनीच स्वतःचे दूध संघ काढल्याने हा आरे दूध संघ डबघाईला आला. पुणे शहराच्या अगदी प्रवेशद्वारावर वाकडेवाडी येथे मोक्याच्या ठिकाणी असलेली आरे डेअरीची तब्बल १६ एकर जमीन विकण्याचा डाव आता या तिघाडी सरकारने मांडला आहे. ही जागा फडणवीस, शिंदे, पवार यांच्या मालकीची नसून पुणेकरांच्या मालकीची आहे याचा विसर त्यांना पडला असा आरोप करत प्रशांत जगताप यांच्या नेतृत्वात राष्ट्रवादी काँग्रेस (शरदचंद्र पवार) पार्टीच्या वतीने तीव्र निषेध आंदोलन करण्यात आले.
पुरेशी जागा उपलब्ध नसल्याने कोविडच्या काळात कोविड सेंटर उभारण्यासाठी सीओईपी संस्थेची जागा मागण्याची वेळ यापूर्वी पुणे महानगरपालिकेवर आली होती, हा भूतकाळ ताजा असतानाच भविष्यात अशी आपत्तिच येणार नाही असं गृहीत धरून एवढा मोठा भूखंड बिल्डरच्या घशात घालण्याचं कारण काय? १० हजार कोटी रुपयांची जमीन ४०० कोटीपेक्षा कमी किंमतीत विकण्यात कोणाचं हित आहे? असा सवाल प्रशांत जगताप यांनी केला. या जागेवर मोठे सरकारी हॉस्पिटल अथवा शाळा उभारून सामान्य पुणेकरांना दिलासा देण्याऐवजी हे सरकार फक्त बिल्डरांचे घर भरण्यात व्यस्त आहे, हा सरकारने सामान्य पुणेकर जनतेवर घातलेला दरोडा आहे असा आरोपही त्यांनी केला.
यावेळी राष्ट्रवादी काँग्रेस (शरदचंद्र पवार) पार्टीचे माझ्यासह उदय महाले, गणेश नलावड़े, राजू साने, रमीज सैयद, रोहन पायगुड़े, प्रसाद गावड़े, आशाताई साने, किशोर कांबले, स्वप्निल जोशी, दिलशाद आतार, हेमंत बधे तथा शहरातील सर्व पदाधिकारी, कार्यकर्ते मोठ्या संख्येने उपस्थित होते.

विश्वमोहिनी दीदी’ सांगीतिक मैफल बुधवारी; हृदयनाथ मंगेशकर, राहुल देशपांडे यांचे सादरीकरण
पुणे : गानसम्राज्ञी भारतरत्न लता मंगेशकर यांच्या द्वितीय स्मृतिदिनानिमित्त मंगेशकर कुटुंबियांच्या वतीने संगीत क्षेत्रातील सेवेबद्दल दिला जाणारा ‘दीदी पुरस्कार’ वितरण व भावगंधर्व पंडित हृदयनाथ मंगेशकर यांच्या सादरीकरणातून होणाऱ्या ‘विश्वमोहिनी लता दीदी’ या सांगीतिक कार्यक्रमाचे आयोजन केले आहे. यंदाचा ‘दीदी पुरस्कार’ प्रसिद्ध गायिका विभावरी आपटे-जोशी यांना प्रदान केला जाणार आहे, अशी माहिती संयोजन समिती सदस्य व गायिका मनीषा निश्चल यांनी पत्रकार परिषदेत दिली. कार्यक्रमाची व्यवस्था पाहणारे निश्चल लताड, सत्यजित धांडेकर यावेळी उपस्थित होते.
मनीषा निश्चल म्हणाल्या, “संगीत क्षेत्रामध्ये सातत्याने भरीव, उत्तुंग व उल्लेखनीय कार्य करणाऱ्या व्यक्तीला मंगेशकर कुटुंबियांच्या वतीने लतादीदी मंगेशकर यांच्या नावाचा दीदी हा पुरस्कार दिला जातो. यंदा हा पुरस्कार विभावरी आपटे-जोशी यांना जाहीर झाला असून, येत्या बुधवारी (दि. २०) सायंकाळी ५ ते रात्री १२ या वेळेत कोथरूड येथील यशवंतराव चव्हाण नाट्यगृहात दोन सत्रांत होणाऱ्या सांगीतिक कार्यक्रमात हा पुरस्कार प्रदान करण्यात येणार आहे. भावगंधर्व पंडित हृदयनाथ मंगेशकर यांच्या सादरीकरणातून होणाऱ्या ‘विश्वमोहिनी लता दीदी’ या सांगीतिक कार्यक्रमात प्रसिद्ध शास्त्रीय गायक राहुल देशपांडे हे विशेष अतिथी म्हणून सहभागी होतील.”
“या कार्यक्रमाचे आणखी एक आकर्षण म्हणजे राहुल देशपांडे एका वेगळ्या स्वरूपात ऐकता येणार आहेत. मास्टर दीनानाथ मंगेशकर यांच्या रचना व मंगेशकर आणि देशपांडे कुटुंबियातील जुन्या आठवणी श्रोत्यांना ऐकण्याची संधी मिळणार आहे. तसेच लतादीदींनी काही गाणी व त्यातील बारकावे राहुल देशपांडे यांच्याकडून ऐकता येतील. लतादीदींनी गायलेल्या अजरामर मराठी व हिंदी गाण्यांचे सादरीकरण ‘विश्वमोहिनी लता दीदी’ या सांगीतिक मैफलीतून होणार असून, यामध्ये विभावरी आपटे-जोशी, प्राची देवल, श्रेयस बेडेकर, मनीषा निश्चल सादरीकरण करणार आहेत. रवींद्र खरे यांचे ओघवते निवेदन, विवेक परांजपे, राजेंद्र दूरकर, प्रसाद गोंदकर, अमृता ठाकूरदेसाई, ऋतुराज कोरे, विशाल थेलकर, विशाल गन्द्रतवार, निलेश देशपांडे यांची वाद्यांवर साथसंगत असणार आहे. हा कार्यक्रम पूर्णतः विनामूल्य आहे,” असे मनीषा निश्चल यांनी सांगितले.
सत्यजित धांडेकर म्हणाले, “अखंड विश्वाला सुरेल आवाजाने मोहिनी घालणाऱ्या लतादीदींची प्रेरणा घेत मनीषा निश्चल गेली तीन दशके आपल्या सुमधुर गायनाने संगीतसेवा करीत आहेत. मंगेशकर कुटुंबियांशी त्यांचा स्नेह अतूट आहे. लतादीदींच्या स्मरणार्थ होत असलेल्या या कार्यक्रमाच्या संयोजनाची जबाबदारी मंगेशकर कुटुंबियांच्या वतीने मनीषा निश्चल पार पाडत आहेत. आपल्या महक संस्थेच्या माध्यमातून लतादीदींची गाणी गात राहण्याची इच्छा बाळगून त्या मेहनतीने व सामाजिक बांधिलकीच्या भावनेतून कार्यरत आहेत.”

पुणे- – कात्रज येथील नानासाहेब पेशवे तलावात रविवारी तरुणीचा मृतदेह सापडला. अग्निशमन दलाला शनिवार टाळून गेल्यावर रविवारी रात्री साडेबाराच्या वेळी कॉल मिळाला.कात्रज अग्निशमन दलाच्या जवानांकडून व पोलिसांकडून तलावात बोटीच्या साहाय्याने दोन ते तीन तास शोध घेण्यात आला. परंतु, रात्रीच्या वेळी मृतदेह मिळून आला नाही. त्यामुळे अग्निशमन दलाकडून सकाळच्या वेळी सात वाजता शोध घेण्यात आला. शोध मोहिमेदरम्यान मृतदेह आढळून आला .

त्यानंतर अग्निशामक दलाच्या जवानांकडून महिलेचा मृतदेह पाण्यातून बाहेर काढण्यात आला. पुढील कार्यवाहीसाठी पोलिसांनी मृतदेह ताब्यात घेतला असून महिलेची ओळख अद्याप पटलेली नाही. पोलिसांकडून मृतदेहाची ओळख पटवण्यात येत असल्याचे सांगण्यात आले आहे.
तसेच, महिलेचा मृतदेह पुढील तपासणीसाठी ससून येथे पाठवण्यात आला आहे. अंदाजे २२ ते २४ वर्षाची महिला असल्याचे पोलिसांकडून सांगण्यात आले असून ही कार्यवाही कात्रज अग्निशमन दलाचे तांडेल वसंत भिलारे, तांडेल प्रसाद कदम, वाहनचालक फारुख शेख आदीच्या पथकाने केली.

पुणे ः भारतीय विद्या भवन आणि इन्फोसिस फाऊंडेशनच्या सांस्कृतिक प्रसार उपक्रमांतर्गत  गायन  आणि नृत्य सादरीकरणाचे आयोजन करण्यात आले होते. या कार्यक्रमातील संगीत आणि नृत्याने रसिकांची मने जिंकली !  हा कार्यक्रम इंडियन कौन्सिल फॉर कल्चरल रिलेशन्स (पुणे विभागीय कार्यालय) यांनी  सादर केला. आय सी सी आर चे संचालक  राज कुमार  यांनी आपले मनोगत व्यक्त केले.भारतीय विद्या भवनचे मानद सचिव प्रा.नंदकुमार काकिर्डे यांनी प्रास्ताविक केले.अनुप्रिता लेले यांनी सूत्रसंचालन केले.  सानिया पाटणकर यांच्या भारतीय शास्त्रीय गायनाने कार्यक्रमाची सुरुवात झाली. दुर्गा रागातील बंदीश ‘ सखी मोरी रूम झूम बादल गरजे ‘ ‘जय भवानी दुर्गे ‘ तराना आणि  ‘सकल ब्रिज धून मची ‘ होली गीत  सादर करून रसिकांची मने जिंकली.  माधव लिमये यांनी हार्मोनियम तर  किशोर बोर्डे यांनी तबल्यावर साथसंगत केली.        आस्था गोडबोले-कार्लेकर यांनी कथक नृत्य सादर केले.  ‘आदी देव महादेव ‘, दूर्गा प्रणाम , आमद , गतनिकास , तराना आदी रचना सादर केल्या.संजय आगळे  (तबला), अक्षय शेवडे ( पखवाज) , पूर्वा कवठेकर (पढ़न), मेघा तळेकर( गायन) , सुधीर टेकाळे (हार्मोनिअम) यांनी साथसंगत केली. हा कार्यक्रम रविवार,१७ मार्च  २०२४ रोजी सायंकाळी साडे पाच   वाजता  भारतीय विद्या भवनचे सरदार महादेव बळवंत नातू सभागृह,(सेनापती बापट रस्ता) येथे  झाला.

पुणे दि.१७: भारत निवडणूक आयोगाने जिल्ह्यातील मावळ, पुणे, बारामती आणि शिरूर लोकसभा मतदारसंघांच्या निवडणुकीचा कार्यक्रम जाहीर केला असून मुक्त आणि पारदर्शक वातावरणात निवडणुका पार पाडण्यासाठी प्रशासनाने सर्व आवश्यक तयारी पूर्ण केली आहे. जिल्ह्यातील एकूण ८ हजार २१३ मतदान केंद्र आणि १६९ सहाय्यकारी मतदान केंद्र अशा एकूण ८ हजार ३८२ मतदान केंद्रांवर मतदान होणार आहे, अशी माहिती जिल्हाधिकारी डॉ.सुहास दिवसे यांनी दिली.

जिल्हाधिकारी कार्यालयात लोकसभा सार्वत्रिक निवडणूक कार्यक्रमाची माहिती देण्यासाठी आयोजित पत्रकार परिषदेत ते बोलत होते. यावेळी पुणे शहर पोलीस आयुक्त अमितेश कुमार, पिंपरी-चिंचवड शहर पोलीस आयुक्त विनयकुमार चौबे, पुणे ग्रामीण पोलीस अधीक्षक पंकज देशमुख, मावळ लोकसभा मतदारसंघाचे निवडणूक निर्णय अधिकारी दीपक सिंगला, बारामती लोकसभा मतदारसंघाच्या निवडणुक निर्णय अधिकारी कविता द्विवेदी, शिरूर लोकसभा मतदारसंघाचे निवडणुक निर्णय अधिकारी अजय मोरे, उपजिल्हा निवडणूक अधिकारी मिनल कळसकर आदी उपस्थित होते.

डॉ. दिवसे म्हणाले, जिल्ह्यात पारदर्शक लोकसभा निवडणुका पार पाडण्यासाठी जिल्हा प्रशासनाने पूर्ण तयारी केली आहे. निवडणूक कालावधीत आदर्श आचारसंहितेचे काटेकोर पालन करण्यात येणार आहे. यासाठी स्थीर पथक, भरारी पथक व व्हिडीओ चित्रीकरण पथकांची नियुक्ती करण्यात आली आहे. आचारसंहिता भंग झाल्याची तक्रार करण्यासाठी निवडणूक आयोगाने ‘सी-व्हिजील’ ॲप तयार केले आहे. या ॲपच्या माध्यमातून आचारसंहिता विषयक तक्रारींचा जलदगतीने निपटारा होणार आहे. आचार संहिता जाहीर झाल्यापासून ४८ तासाच्या आत सर्व राजकीय प्रचार साहित्य, पोस्टर, बॅनर्स काढण्यासाठी सर्व शासकीय विभाग, स्थानिक स्वराज्य संस्था यांना निर्देश दिले आहेत. निवडणुका निष्पक्ष व भयमुक्त वातावरणात पार पाडण्यासाठी पोलीस विभागामार्फत प्रतिबंधात्मक कारवाई, शस्त्रे जमा करणे आदी कार्यवाही पूर्ण करण्यात आली आहे.

दिव्यांग व वयोवृद्धांसाठी मतदान केंद्रावर विशेष सुविधा
जिल्ह्यात एकूण ८२ लाख २४ हजार ४२३ मतदार आहेत. दिव्यांग व वयोवृद्ध मतदारांसाठी मतदान केंद्रांवर विशेष व्यवस्था करण्यात येणार आहे. अशा मतदारांना रांगेत उभे न करता त्यांना मतदानासाठी सहकार्य करण्यात येईल. मतदान केंद्रावर येणे शक्य नसल्यास त्यांच्यासाठी विशेष व्यवस्था करण्यात येईल.

निवडणुकीसाठी चोख सुरक्षा व्यवस्था
जिल्ह्यात २० संवेदनशील मतदान केंद्र असून याठिकाणी आवश्यक खबरदारी घेण्यात येणार आहे. ३ हजार ९४१ मतदान केंद्रावरून सीसीटीव्ही कॅमेऱ्यांच्या सहाय्याने वेबकास्टींग करण्यात येणार असून नियंत्रण कक्षाद्वारे येथील मतदान प्रक्रियेचे अवलोकन करण्यात येईल. केंद्रीय सशस्त्र पोलीस बलाचे कर्मचारी आवश्यकतेनुसार तैनात करण्यात येतील. भोर तालुक्यात ३२, खेड-आळंदी ५ आणि आंबेगाव तालुक्यात २ असे एकूण ३९ ठिकाणी इंटरनेट व अन्य सुविधा नसलेले मतदान केंद्रे आहेत. त्याठिकाणी सोयी सुविधा उपलब्ध करून देण्यात येणार आहेत.

जिल्ह्यात संवेदनशील मतदान केंद्रावर २४x७ एकात्मिक नियंत्रण कक्ष, संवेदनशील बुथमध्ये वेबकास्टींग, पुरेसा सशस्त्र पोलीस बंदोबस्त, प्रतिबंधात्मक कार्यवाही, संपूर्ण जिल्ह्यात चेक पोस्टचे जाळे आणि सूक्ष्म निरीक्षक तैनात करणे आदी उपाय योजण्यात येणार आहेत.

बारामती मतदारसंघात ७ मे तर इतर तीन मतदारसंघात १३ मे रोजी मतदान
३५- बारामती लोकसभा मतदार संघात १२ एप्रिल पासून नामनिर्देशन पत्रे दाखल करून घेण्यात येतील. नामनिर्देशन पत्रे दाखल करण्याचा शेवटचा दिनांक १९ एप्रिल आहे. नामनिर्देशन पत्रांची छाननी २० एप्रिल रोजी, उमेदवारी मागे घेण्याचा शेवटची तारीख २२ एप्रिल, मतदानाची तारीख ७ मे रोजी, मतमोजणी ४ जून रोजी होणार आहे.

३३- मावळ, ३४- पुणे व ३६- शिरूर लोकसभा मतदार संघात १८ एप्रिलपासून नामनिर्देशन पत्रे दाखल करून घेण्यात येतील. नामनिर्देशन पत्रे दाखल करण्याचा शेवटचा दिनांक २५ एप्रिल आहे. नामनिर्देशन पत्रांची छाननी २६ एप्रिल रोजी, उमेदवारी मागे घेण्याचा शेवटची तारीख २९ एप्रिल, मतदानाची तारीख १३ मे रोजी, मतमोजणी ४ जून रोजी होणार आहे.

मतदारांना मतदानासाठी प्रोत्साहित करणार
जिल्ह्यात प्रत्येकी २१ आदर्श मतदान केंद्र, महिला संचलित, दिव्यांग संचलित, युवकांद्वारे संचलित आणि विशेष मतदान केंद्र असतील. याद्वारे मतदान केंद्रावर चांगले वातावरण निर्माण करून मतदारांना मतदानासाठी प्रोत्साहित करण्यात येणार आहे. मतदान केंद्रावर पिण्याचे पाणी, रॅम्प, स्वच्छतागृह, व्हीलचेअर, मतदार सुविधा केंद्र, पुरेशी प्रकाश व्यवस्था आणि उन्हापासून संरक्षणासाठी मंडप किंवा छत असणार आहे.

मतदानासाठी २० हजार ११७ बॅलेट युनिट, १० हजार ५९ कन्ट्रोल युनिट आणि १० हजार ८९७ कन्ट्रोल युनिट पुरविण्यात येणार आहेत. मावळ लोकसभा मतदार संघाची मतमोजणी श्री छत्रपती शिवाजी महाराज क्रीडा संकुल, बालेवाडी, पुणे आणि बारामती लोकसभा मतदार संघाची मतमोजणी एफसीआय गोदाम कोरेगाव पार्क येथे तर शिरूर लोकसभा मतदार संघाची मतमोजणी रांजणगाव (कोरेगाव) औद्यागिक वसाहतीतील महाराष्ट्र वखार महामंडळाच्या गोदामात होणार आहे.

लोकसभा निवडणूक शांततेत व सुरळीत पार पाडण्यासाठी सर्वांचे सहकार्य आवश्यक आहे. निवडणुकीमध्ये सर्व मतदारांनी सक्रिय सहभाग नोंदवून लोकशाही मजबूत करण्यासाठी सहकार्य करावे,असे आवाहन जिल्हाधिकारी डॉ.दिवसे यांनी केले.

निवडणुकीसाठी पोलीसांचे प्रशिक्षण पूर्ण-अमितेश कुमार

पुणे शहर पोलीस आयुक्त अमितेश कुमार म्हणाले, पुणे शहर आयुक्तालयात ३ हजार २८७ मतदान केंद्र असून त्यापैकी बारामती लोकसभा मतदारसंघातील ४३० मतदान केंद्र आहेत. १६ संवदेनशील मतदान केंद्र आहेत. याकरीता ७ हजार पोलीस अधिकारी व कर्मचाऱ्यांचे निवडणुकीच्या अनुषंगाने प्रशिक्षण पूर्ण करण्यात आले आहे.

आदर्श आचारसंहितेची अतिशय पारदर्शक, प्रभावीपणे अंमलबजावणी करण्यात येणार असून त्याकरीता पथकांची नेमणूक करण्यात आलेली आहे. निवडणुकीवर प्रभाव पाडणाऱ्या बाबीवर अतिशय बारकाईने लक्ष ठेवण्यात येत असून त्याला प्रतिबंध करण्यासाठी पोलीस दलाच्यावतीने प्रभावीपणे उपाययोजना करण्यात येत आहे. ‘सी-व्हिजील’ ॲप आणि ‘सुविधा’ संकेतस्थळावरील तक्रारीच्या अनुषंगाने कार्यवाही करण्यात येणार आहे, लोकसभा सार्वत्रिक निवडणुका भयमुक्त व पारदर्शक वातावरणात पार पाडण्यासाठी योग्य नियोजन करण्यात असून, याकरीता पुणे शहर पोलीस दल सज्ज आहे, असेही श्री. कुमार म्हणाले.

अडीच हजारापेक्षा अधिक व्यक्तींवर प्रतिबंधात्मक कारवाई-विनयकुमार चौबे

पिंपरी चिंचवड पोलीस आयुक्त श्री. चौबे म्हणाले, पिंपरी-चिंचवड पोलीस आयुक्तालयात १ हजार ८५४ मतदान केंद्र असून त्यात प्रामुख्याने मावळ व शिरुर लोकसभा मतदारसंघाचे क्षेत्र आहे. निवडणुकीच्या अनुषंगाने १ डिसेंबर २०२३ पासून आतार्यंत २ हजार ५०० पेक्षा अधिक आरोपींवर प्रतिबंधात्मक कारवाई, एमपीडीएअंतर्गत १३, मोक्का कायद्याअंतर्गत १८ संघटनेवर कारवाई करुन ९९ आरोपींना अटक, तसेच ९५ आरोपींना हद्दपार, शस्त्र जमा करणे अशा कारवाया करण्यात आल्या आहेत. यापुढेही आदर्श आचारसंहितेचे अतिशय प्रभावीपणे अंमलबजावणी करण्यात येईल. पोलीस अधिकारी व कर्मचाऱ्यांचे निवडणुकीच्या अनुषंगाने प्रशिक्षण पूर्ण करण्यात आले आहे. पोलीस बंदोबस्ताचे नियोजन करण्यात आले आहे, असेही श्री. चौबे म्हणाले.

निवडणुकीसाठी सुरक्षा आराखडा तयार-पंकज देशमुख

पोलीस अधीक्षक पंकज देशमुख म्हणाले, पुणे ग्रामीण पोलीस विभागाअंतर्गत शिरुर, बारामती मावळ असे तीन लोकसभा मतदारसंघ असून ३ हजार १०२ मतदान केंद्र आहेत. याकरीता लागणारे पुरेसे मनुष्यबळ असून बारामती व शिरुर लोकसभा निवडणुकीच्याकरीता अतिरिक्त मनुष्यबळ उपलब्ध होणार आहे. या मतदासंघात ५ संवदेनशील मतदान केंद्र आहेत. जानेवारीपासून २२ अवैध शस्त्रधारकांकडून शस्त्रे जमा करण्यात आली असून संबंधितांवर कारवाई करण्यात आली आहे. निवडणुकीच्या अनुषंगाने प्रतिबंधात्मक आराखडा तयार करण्यात आला असून विविध गुन्ह्याअंतर्गत असलेल्या आरोपी तसेच अवैध शस्त्रधारकांवर कारवाई करण्यात येणार आहे. सार्वत्रिक निवडणुकीकरीता पुणे जिल्हा ग्रामीण पोलीस दल सज्ज असून निवडणुक अतिशय शांततेत पार पाडण्यासाठी सहकार्य करण्याचे आवाहन त्यांनी यावेळी केले.
0000

पुणे दि. १७- लोकसभा सार्वत्रिक निवडणुका निकोप वातावरणात आणि शांततेत पार पाडण्यासाठी राजकीय पक्षांनी सहकार्य करावे, असे आवाहन जिल्हाधिकारी डॉ.सुहास दिवसे यांनी केले.

जिल्हाधिकारी कार्यालयात आयोजित राजकीय पक्ष प्रतिनिधींच्या बैठकीत ते बोलत होते. बैठकीस मावळ लोकसभा मतदारसंघाचे निवडणूक निर्णय अधिकारी दिपक सिंगला, बारामती लोकसभा मतदारसंघाच्या निवडणूक निर्णय अधिकारी कविता द्विवेदी, शिरुर लोकसभा मतदारसंघाचे निवडणूक निर्णय अधिकारी अजय मोरे, उप जिल्हा निवडणूक अधिकारी मीनल कळसकर आदी उपस्थित होते.

डॉ.दिवसे म्हणाले, निवडणुकांच्यादृष्टीने प्रशासनाने आवश्यक तयारी पूर्ण केली आहे. पुरेशा प्रमाणात मनुष्यबळाची नियुक्ती करण्यात आली आहे. निवडणूक प्रक्रीयेच्या प्रत्येक टप्प्यावर राजकीय पक्षांना माहिती देण्यात येत आहे. ईव्हीएम सुरक्षेसाठी आवश्यक खबरदारी घेण्यात आली आहे. निवडणूक जाहीर झाल्यापासूनच स्थिर आणि भरारी पथके कार्यान्वित करण्यात आली असून ईएसएमएस ॲपवर होणाऱ्या कारवाईची माहिती भरण्यात येणार आहे.

बँकेतून होणाऱ्या मोठ्या रकमेच्या व्यवहारांची माहिती घेतली जाणार आहे. पेड न्यूजवर लक्ष ठेवण्यासाठी स्वतंत्र यंत्रणा असणार आहे. सार्वजनिक मालमत्तेचे विद्रुपीकरण केल्यास किंवा खाजगी जागेत परवानगी न घेता प्रचार केल्यास कारवाई करण्यात येईल. राजकीय पक्षांनी भारत निवडणूक आयोगाने आदर्श आचारसंहितेबाबत दिलेल्या सुचनांचे पालन करावे.

दिव्यांग आणि वयोवृद्ध नागरिकांना मतदान करण्यासाठी आवश्यक सुविधा पुरविण्यात येणार आहेत. संपूर्ण निवडणूक प्रक्रीया पारदर्शक राहील यावर भर देण्यात येत आहे. पुणे जिल्ह्यात शांततेच्या वातावरणात निवडणुका होण्याची परंपरा आहे. ही परंपरा कायम ठेवण्यासाठी आणि मुक्त वातावरणात निवडणुका व्हाव्यात यासाठी राजकीय पक्षांनी सहकार्य करावे,असे आवाहन त्यांनी केले.

एकत्रित कामाने शाश्वत विकास शक्य : विनायक पै

पुणे :’आर्किटेक्ट्स, इंजिनिअर्स  अँड  सर्व्हेअर्स असोसिएशन’च्या वतीने  ‘एईएसए  व्यावसायिक गुणवत्ता पारितोषिक वितरण समारंभ’  शनिवारी सायंकाळी उत्साहात पार पडला.टाटा प्रोजेक्टस् लि.चे व्यवस्थापकीय  संचालक विनायक पै  हे प्रमुख पाहुणे म्हणून उपस्थित होते. रामप्रसाद आखिशेट्टी  यांची प्रमुख उपस्थिती या कार्यक्रमात होती.आर्किटेक्चर आणि अभियांत्रिकी क्षेत्रातील उल्लेखनीय कामगिरी करणाऱ्या व्यक्ती, संस्थांचा आणि सर्वोत्तम बांधकाम प्रकल्पांचा गौरव या कार्यक्रमात करण्यात आला.

हा पारितोषिक वितरण समारंभ रॉयल कोर्ट लॉन (चांदणी चौक)येथे झाला. पारितोषिक वितरण समारंभाचे हे २९ वे वर्ष होते.प्रत्येकी ५० हजार रक्कम ,मानचिन्ह असे या पारितोषिकांचे स्वरूप होते.रहिवासी बंगला,इमारत,सोसायटी,इन्स्टिट्यूट,उद्योग,कार्यालय,पूल बांधणी,उद्यान,रेस्टोरंट,दुरुस्ती आणि संवर्धन,युवा आर्किटेक्ट अशा अनेक गटातून ही पारितोषिके दिली गेली.तज्ज्ञांच्या  समितीने या प्रकल्पांचे परीक्षण करून नावे निवडली. सीईपीटी युनिव्हर्सिटी कडून मिळालेल्या डॉक्टरेट बद्दल ख्रिस्तोफर बेनिंजर यांचा सत्कार करण्यात आला. त्यांच्या वतीने  रामप्रसाद आखिशेट्टी यांनी तो स्विकारला.

एकत्रित कामाने शाश्वत विकास शक्य : विनायक पै

 विनायक पै म्हणाले, ‘ भारतात शहरीकरणाने वेग पकडला आहे. नव्या संधी तयार झाल्या आहेत. सरकार आणि खासगी क्षेत्राकडून  मोठया प्रमाणात बांधकाम क्षेत्रात कामे चालू आहेत. जीडीपीतील मोठा वाटा बांधकाम क्षेत्रामुळे आहे.  बांधकामे पूर्ण होताना होणारा उशीर ही सार्वत्रिक आहे. त्याच्या मागील कारणांवरही विचार व्हायला हवा. आर्किटेक्ट, इंजिनियर्सनी जास्तीत जास्त वेळ एकत्र काम केल्यास उपाय निघतील. अधिक चांगले नियोजन करता येईल. गुणवत्तेत वाढ होईल. उत्तम नियोजन ही या क्षेत्रातील यशाची गुरुकिल्ली आहे.एकत्रित कामाने शाश्वत विकास होईल.

ख्रिस्तोफर बेनिंजर यांच्या वतीने उपस्थित प्रतिनिधी  रामप्रसाद आखिशेट्टी म्हणाले ,’ भारत परिवर्तनाच्या वाटेवर आहे. आपण सर्व आपल्या कामातून राष्ट्र निर्मितीत कार्यरत आहोत. पुणे बदलत आहे, सातत्याने बांधकामे चालू आहेत, त्यावर आपण गुणवत्तेचा ठसा उमटविला पाहिजे.’ परीक्षकांच्या वतीने लक्ष्मण थिटे यांनी मनोगत व्यक्त केले.

‘आर्किटेक्ट्स, इंजिनिअर्स  अँड  सर्व्हेअर्स असोसिएशन’ चे  प्रेसिडेंट इंजिनिअर  पराग लकडे यांनी प्रास्ताविक केले.’आर्किटेक्ट्स, इंजिनिअर्स  अँड  सर्व्हेअर्स असोसिएशन’ चे चेअरमन महेश बांगड तसेच आलोका काळे यांनी सूत्रसंचालन केले.विश्वास कुलकर्णी,दिवाकर निमकर,केशव देसाई हे विश्वस्त,खजिनदार हेमंत खिरे, सचिव संजय तासगावकर,सहसचिव मनाली  महाजन ,निनाद जोग,शेखर गरुड,मकरंद गोडबोले,नितीन भोळे, आनंद कुंकलोळ,हृषीकेश कुलकर्णी,जयंत पटवर्धन,नुपूर चिचखेडे,स्काँन प्रोजेक्ट्सचे नीलेश चव्हाण  आदी मान्यवर उपस्थित होते. राजीव राजे यांनी आभार मानले.

असोसिएशनचे माजी अध्यक्ष  आर्कीटेक्ट पुष्कर कानविंदे हे या पारितोषिक वितरण सोहळ्याचे निमंत्रक होते. स्काँन प्रोजेक्ट्स ,एस जे काँट्रॅक्ट्स प्रा लि ,कुमार प्रॉपर्टीज,रोहन बिल्डर्स,बेहरे -राठी ग्रुप , सी एस आर एल प्रा .लि. यांचे सहकार्य या सोहळ्याला लाभले .

बांधकाम क्षेत्रातील नवनिर्मितीचा,उत्तम प्रकल्पांचा गौरव

या कार्यक्रमात उत्तम प्रकल्पांना  गौरविण्यात आले.मुख्य पुरस्कारामध्ये  प्रकल्पांना प्रत्येकी ५० हजार रुपये प्रमाणपत्र, सन्मानचिन्ह देऊन गौरविण्यात आले.अनघा पाटील, अर्चना देशमुख – कुलकर्णी यांना एईएसए यंग अचिव्हर्स अवॉर्ड’ देण्यात आले. २५ हजार रोख, सन्मानचिन्ह असे पुरस्काराचे स्वरूप होते.

पुण्याबाहेरील नॉन रेसिडेन्सीयल ऑफीस रिटेल प्रकल्पासाठी  यश टेक्नोलॉजी प्रा.लि., स्ट्रीट फॉर ऑल प्रकल्प (पेन्सिल चौक , बारामती), करंदीकर वाडा संवर्धन प्रकल्प(सातारा ) या प्रकल्पाला गौरविण्यात आले. साईट मॅनेजमेंटसाठी आय.आय .टी., धारवाड ला तसेच  नरेंद्र मोदी स्टेडियम प्रकल्पाला ज्युरी रेकमेंडेशन अवॉर्ड    देण्यात आले.

रेसिडेन्शियल विभागात सिंगल फॅमिली हाऊस अॅट कामशेत प्रकल्पाला गौरविण्यात आले. ग्रुप हाऊसिंग प्रकल्पांना आयआयटी गांधीनगर प्रकल्पाला गौरविण्यात आले. जालिहाल हाऊस, राजभवन ( महाबळेश्वर ) या प्रकल्पांना ज्युरी रेकमेंडेशन अवॉर्ड    देण्यात आले.

पुण्यातील नॉन रेसिडेन्शियल विभागात संस्थातंर्गत पुरस्कारासाठी व्ही.एन. लाहोटी स्टुडंट होस्टेलला, पुण्यातील कमर्शियल प्रकल्पासाठी तौराल इंडिया प्रा.लि. कार्यालयाला गौरविण्यात आले. इंडस्ट्री विभागासाठी बजाज ऑटो लि. च्या ग्रँड कॅनोपी प्रकल्पाला गौरविण्यात आले. ‘ऑफीस अॅट आमराई ‘ , मंगलम लाईफपार्क एक्स्पीरियन्स सेंटर, कैलास भेळ फूड कोर्ट, एनझेन बायो सायन्सेस लि. या प्रकल्पांना ज्युरी रेकमेंडेशन अवॉर्ड    देण्यात आले.

सिंगल फॅमिली होम रेसिडेन्शियल विभागात अभिमानश्री प्रकल्प यांना गौरविण्यात आले.मायरा बंगलो, अरिहंत कृपा होम, हाऊस अराऊंड स्कायलाईट, माहेश्वरी हाऊस , गीते फार्म हाऊस यांना ज्युरी रेकमेंडेशन अवॉर्ड   देण्यात आले.

मल्टी टेनमेंट बिल्डींगसाठी अंजली प्रकल्पाला गौरविण्यात आले.तत्व प्रकल्पाला ज्युरी रेकमेंडेशन अवॉर्ड    देण्यात आले.ग्रुप हाऊसिंगसाठी मंगलम ब्रीझ प्रकल्पाला गौरविण्यात आले.

पुण्याच्या विकासात  ५४ वर्षांचे योगदान:

‘आर्किटेक्ट्स, इंजिनिअर्स  अँड  सर्व्हेअर्स असोसिएशन'(एईएसए ), पुणे ही  शहराच्या सर्वांगिण सुधारणेसाठी सर्व प्रकारच्या बांधकाम व्यावसायिकांनी एकत्र येऊन काम करण्यासाठी १९७० मध्ये स्थापन झालेली एक आगळीवेगळी संस्था आहे. ज्ञानाचा प्रसार, मूल्याधारित व्यवसाय, आणि स्थानिक सरकारी संस्थांबरोबर सामंजस्याने काम करण्यासाठी संस्था सतत कार्यरत असते. यामुळे असोसिएशनला  आणि व्यावसायिक गुणवत्ता पारितोषिकांना बांधकाम क्षेत्रात मानाचे स्थान आहे.

कॉंग्रेसचा उमेदवार घोषित होण्यापूर्वी लोकसभा प्रचारात मोहोळ यांनी घेतली आघाडी

पुणे-पुणे लोकसभा मतदारसंघाचे भारतीय जनता पार्टी महायुतीचे उमेदवार मुरलीधर मोहोळ यांनी उमेदवारी जाहीर होताच पक्षांतर्गत भेटीगाठी घेत प्रचाराला सुरुवात केली आहे. इच्छुक उमेदवार आणि महत्त्वाच्या पदाधिकाऱ्यांची घरी जावून भेट घेत प्रचारात आघाडी घेतली आहे. या भेटींना सकारात्मक प्रतिसाद मिळत असून भेटींमुळे पदाधिकाऱ्यांमध्ये उत्साह वाढत असल्याचे चित्र आहे. शिवाय या भेटींदरम्यान मोहोळ यांचा विजय मताधिक्याचा उच्चांक गाठेल, असा विश्वास राज्यसभा खासदार प्रा. मेधा कुलकर्णी यांनी व्यक्त केला.

भारतीय जनता पार्टीने निवडणूक जाहीर होण्यापूर्वीच उमेदवाराची घोषणा केल्याने प्रचाराली लागलीच सुरुवात झाली आहे. मोहोळ यांनी प्रचाराच्या पहिल्या टप्प्यात पक्षांतंर्गत भेटीगाठींना प्राधान्य दिल्याने संघटना पातळीवर सर्वच घटक कार्यरत करण्याचा मोहोळ यांचा प्रयत्न आहे. मोहोळ यांनी सर्वात आधी त्यांचे राजकीय गुरु माजी खासदार अनिल शिरोळे यांची भेट घेत संवाद साधला. आपल्याच तालमीतील पैलवान लोकसभेच्या आखाड्यात आल्याने शिरोळे यांच्या चेहऱ्यावर आनंदाचे भाव दिसून आले. शिवाय शिवाजीनगरचे मा. आमदार विजय काळे यांच्याशीही मोहोळ यांनी संवाद साधला.

कोथरुडच्या माजी आमदार आणि राज्यसभेच्या नवनिर्वाचित खासदार प्रा. मेधा कुलकर्णी यांच्याही घरी मोहोळ यांनी भेट देत लोकसभा निवडणुकीच्या पार्श्वभूमीवर चर्चा केली. यावेळी खा. कुलकर्णी यांनी मोहोळ यांचे औक्षण करत विजयाचा संकल्प केला. मोहोळ आणि खा. कुलकर्णी एकत्र आल्याने याचा मोठा फायदा कोथरुड विधानसभेच्या मताधिक्यात होईल, अशी शक्यता राजकीय जाणकारांना आहे. शहर भाजपाचे मा. अध्यक्ष योगेश गोगावले यांचीही भेट मोहोळ यांनी घेऊन त्यांनाही प्रचारात सक्रिय करण्याचा प्रयत्न केला आहे.

भेटींबाबत मोहोळ म्हणाले, ‘भारतीय जनता पार्टी ही केवळ पार्टीच नाही तर परिवार आहे. त्यामुळे सर्वात आधी परिवारातील घटकांशी संवाद आणि भेटी आवश्यक असतात. शिवाय या निमित्ताने जुन्या आठवणींनाही उजाळा मिळतो. या सर्व भेटींमधून सर्वांचा मिळालेला सकारात्मक प्रतिसाद माझ्या प्रचाराचा उत्साह वाढवणारा आहे. पुढील काळातही या भेटीगाठी कायम सुरु राहणार आहेत.’

मोहोळ विक्रमी मतांनी विजयी होतील : खा. मेधा कुलकर्णी

मोहोळ यांचा विजय निश्चित असून त्यांचा हा विजय आजवर मिळालेल्या विजयांपेक्षा अधिक मतांचा असेल, असा विश्वास खा. कुलकर्णी यांनी व्यक्त केला. भारतीय जनता पार्टीच्या वतीने आता अधिकच्या मताधिक्यासाठी आम्ही तयारी करत आहोत. मोहोळ यांच्याशी प्रचाराच्या रणनितीसंदर्भातही बोलणे झाले आहे, असेही खा. कुलकर्णी म्हणाल्या.

पुणे : दिव्यांग विद्यार्थ्यांसाठी वसतिगृह सर्वत्र आहेत. परंतू दिव्यांग विद्यार्थी व त्यांच्या पालकांसाठी निवासासाठी सुरू केलेला ‘बालक-पालक’ हा स्तुत्य उपक्रम आहे, असे मत माजी प्रांतपाल लायन रमेश शहा यांनी व्यक्त केले. उमेद फाऊंडेशनचे संस्थापक राकेश सणस यांनी हा सेवाप्रकल्प सर्वांच्या सहकार्याने कार्यान्वित राहणार आहे. यासाठी सर्वांनी सर्व प्रकारचे सहकार्य करावे, असे आवाहन केले. 
उमेद फाउंडेशनच्या वतीने पौड येथे उभारण्यात येत असलेल्या ‘बालक-पालक’ प्रकल्पाचे भूमीपूजन रमेश शहा व स्मिता शहा यांच्या हस्ते झाले. दिव्यांग व्यक्तीसोबत त्यांच्या पालकाना मायेचा निवारा देणारा हा पहिला प्रकल्प आहे, असे या प्रकल्पाच्या मार्गदर्शक सीमा दाबके यांनी सांगितले. श्रीमती प्रतिभा केंजळे यांनी हा प्रकल्प सुरू करून दिव्यांग व्यक्ती व त्यांचे पालक यांना  खराखुरा मायेचा आधार दिला असे मत व्यक्त केले.