गानसम्राज्ञी लता मंगेशकर यांच्या स्मरणार्थ विभावरी आपटे-जोशी यांना ‘दीदी पुरस्कार’ प्रदान
पुणे : “लतादीदीचा मी बाळ होतो. शेवटपर्यंत तिने माझी काळजी घेतली. तिच्या कंठात साक्षात ईश्वराचा अंश होता. वयाच्या पाचव्या वर्षापासून ती बाबांच्या सानिध्यात गात होती. विविध भाषांतील लहेजा, शब्द समजून घेत ती सर्व प्रकारची गाणी गायची. तिने गायलेली सर्वच गाणी अजरामर झालेली आहेत. तिच्यात संवेदनशीलपणा होता. सामाजिक जाणीव होती. लतादीदीच्या जाण्याने संगीत सागरातील एक हिमनग कोसळला आहे. दोन वर्षांनंतरही मी पूर्णपणे सावरलेलो नाही, अशा शब्दांत लतादीदींचे बंधू भावगंधर्व पंडित हृदयनाथ मंगेशकर यांनी आपल्या बहिणीविषयीच्या आठवणी जागवल्या.
गानसम्राज्ञी भारतरत्न लता मंगेशकर यांच्या द्वितीय स्मृतिदिनानिमित्त मंगेशकर कुटुंबियांच्या वतीने संगीत क्षेत्रातील सेवेबद्दल दिला जाणारा ‘दीदी पुरस्कार’ ज्येष्ठ गायिका उषा मंगेशकर व दीनानाथ मंगेशकर रुग्णालयाचे वैद्यकीय संचालक डॉ. धनंजय केळकर यांच्या हस्ते गायिका विभावरी आपटे-जोशी यांना प्रदान करण्यात आला. यशवंतराव चव्हाण नाटय़गृहात आयोजित कार्यक्रमात भावगंधर्व पंडित हृदयनाथ मंगेशकर, प्रसिद्ध गायक राहुल देशपांडे, भारती मंगेशकर, आदिनाथ मंगेशकर, संयोजन समिती सदस्य व गायिका मनीषा निश्चल, निश्चल लताड आदी उपस्थित होते.
यावेळी सादर झालेल्या ‘विश्वमोहिनी लता दीदी’ या सांगीतिक मैफलीने रसिक श्रोते मंत्रमुग्ध झाले. भावगंधर्व पंडित हृदयनाथ मंगेशकर यांच्यासह गायक राहुल देशपांडे, गायिका विभावरी आपटे-जोशी, मनीषा निश्चल, प्राची देवल, गायक श्रेयस बेडेकर यांनी लतादीदींची अजरामर गाणी सुरेल पद्धतीने सादर केली.
श्रीरामचंद्र कृपाळू भजमन या गीताने मैफलीची सुरुवात झाली. त्यांनतर लग जा गले… एक प्यार का नगमा है… रुक जा रात ठहर जा रे चंदा… आज कल पाव जमी पर पडते नहीं मेरे… अखेरचा हा तुला दंडवत… तू तेव्हा तशी… ये दिल और उनकी निगाहो के साये… अशा अजरामर गीतांनी श्रोत्यांना मंत्रमुग्ध केले. श्रोत्यांमधून प्रत्येक गाण्यानंतर ‘वन्स मोअर’ची दाद मिळत होती.
मास्टर दीनानाथ मंगेशकर यांच्याविषयी हृदयनाथ मंगेशकरांनी लिहिलेल्या आठवणींचे वाचन करत मास्टरजींच्या काही चीजा सादर केल्या. तसेच मंगेशकर आणि देशपांडे कुटुंबियातील जुन्या आठवणींना उजाळा दिला. लतादीदींची काही गाणी व त्यातील बारकावे, त्यावेळचे किस्से मंगेशकर यांनी सांगितले. 
रवींद्र खरे यांचे ओघवते निवेदन, सिंथेसायझरवर विवेक परांजपे व अमृता ठाकूरदेसाई, तबल्यावर डॉ. राजेंद्र दूरकर व विशाल गंड्रतवार, बासरीवर निलेश देशपांडे, सतारीवर प्रसाद गोंदकर, ऑक्टोपॅडवर ऋतुराज कोरे, गिटारवर विशाल थेलकर यांनी साथसंगत केली.

‘एमआयटी एडीटी’त सहाव्या राष्ट्रीय परिषदेला प्रारंभ

पुणेः भारतातील तंत्रज्ञानाने सध्या जगाला भुरळ घातली आहे. चांद्रयान सारख्या अंतराळ मोहीमा, जगातील सर्वांत मजबूत मिसाईल, विविध प्रकारचे ट्रोन्स बनवून आपल्या शास्त्रज्ञांनी जगाचे लक्ष आकर्षित केले आहे. भारत आता सॉफ्टवेअरसह हार्डवेअर क्षेत्रातही स्वावलंबी बनला आहे. त्यामुळे या स्पर्धात्मक युगात आपल्याकडील लोकल तंत्रज्ञानाला प्रचंड मागणी मिळत असल्याने ते ग्लोबल व्हायला हवे, असे मत संरक्षण संशोधन व विकास संस्थेचे(डीआरडीओ) माजी संचालक व एस-व्यासा विद्यापीठ बंगळुरूचे प्र.कुलगुरू पद्मश्री डाॅ.प्रल्हाद रामराव यांनी मांडले.

        ते एमआयटी आर्ट, डिजाईन आणि टेक्नाॅलाॅजी विद्यापीठात ‘इनोव्हेटिव्ह ग्लोबल टेक्नॉलॉजी ट्रेंड्स’ या विषयावर आधारीत सहाव्या राष्ट्रीय परिषदेच्या उद्घाटन समारंभात बोलत होते. याप्रसंगी, सावित्रीबाई फुले पुणे विद्यापीठाचे प्र.कुलगुरु डाॅ.पराग काळकर, ‘एमआयटी एडीटी’ विद्यापीठाचे कार्याध्यक्ष तथा कुलगुरू प्रा.डाॅ.मंगेश कराड, विद्यापीठाच्या कार्यकारी संचालक प्रा.डाॅ.सुनीता कराड, प्र.कुलगुरू डाॅ.रामचंद्र पुजेरी, डाॅ.मोहीत दुबे, कुलसचिव डाॅ.महेश चोपडे, डाॅ.विरेंद्र भोजवानी आदी उपस्थित होते. 
डाॅ.रामराव पुढे म्हणाले की, भारतात सध्या अणुऊर्जेवर मोठ्या स्थरावर संशोधन चालू आहे. अणू उर्जेचा सकारात्मक वापर करून अगदी तालुका स्तरावर ऊर्जा निर्मितीतून गावांच्या ऊर्जेच्या गरजा भागवण्याचे उद्दिष्ट आता शास्त्रज्ञांचे, असल्याचे प्रतिपादन त्यांनी यावेळी केले. 
प्रा.डाॅ.काळकर यांनी याप्रसंगी आपल्या भाषणातून टेक जायंट्स, एआय, मेटाव्हर्स तंत्रज्ञानाचे फायदे व तोट्यांबद्दल मत व्यक्त केले. तसेच त्यांनी मेक इन इंडिया सारख्या भारत सरकारच्या योजनांमुळे विद्यार्थ्यांमध्ये संशोधन वृत्ती रुजल्याचेही स्पष्ट केले.
यावेळी बोलताना प्रा.डाॅ.सुनीता कराड म्हणाल्या, एमआयटी एडीटी विद्यापीठ दरवर्षी ही राष्ट्रीय परिषद आयोजित करते. यंदा या परिषदेचे सहावे वर्ष असून त्यामाध्यमातून आत्तापर्यंत ६०+ स्टार्टअप्स व २००० हून अधिक विद्यार्थ्यांना रोजगार देण्यात आम्ही यशस्वी ठरलो आहोत. यंदा २० हून अधिक विषय घेवून विद्यापीठात वेगवेगळ्या ठिकाणी एकाच वेळेला पुढील तीन दिवस ही परिषद पार पडणार असल्याचेही त्यांनी स्पष्ट केले.  दीपप्रज्वलन व सरस्वती पूजेद्वारे सुरू झालेल्या या कार्यक्रमाचे प्रास्ताविक प्रा.डाॅ.सुनीता कराड यांनी तर आभार डाॅ.रामचंद्र पुजेरी यांनी मानले. तर डाॅ.स्नेहा वाघटकर व डाॅ.स्वप्निल शिरसाठ यांनी कार्यक्रमाचे सूत्रसंचालन केले. पसायदान द्वारा कार्यक्रमाची सांगता झाली. 

तंत्रज्ञानाच्या धोक्यांपासून सावध रहा-प्रा.डाॅ.कराड-यावेळी अध्यक्षीय मनोगत व्यक्त करताना प्रा.डाॅ. मंगेश कराड म्हणाले की, पंतप्रधान नरेंद्र मोदी यांनी गेल्यावर्षी विकसित भारत@2047 संकल्पना मांडली. त्यांच्या या संकल्पनेत संशोधकांचा सर्वांत मोठा हातभार लागणार आहे. भारतातील युपीआय, आधार सारख्या योजना आता फ्रान्ससारख्या देशाने स्विकारल्या आहेत. त्यामुळे दिवसेंदिवस एआय सारख्या तंत्रज्ञानाचा सकारात्मक उपयोग करत असताना त्यातील डिफेक सारख्या धोक्यांपासून आपण सावध रहायला हवे, असा इशाराही त्यांनी दिला.

पुणे, दि. २१ मार्च २०२४: पुणे परिमंडलातील ५ लाख ८७ हजार २८६ घरगुती, वाणिज्यिक व औद्योगिक वीजग्राहकांकडे अद्यापही १२४ कोटी ७७ लाख रुपयांची थकबाकी आहे. त्यामुळे नाईलाजास्तव गेल्या २० दिवसांमध्ये १८ हजार ९५२ थकबाकीदारांचा वीजपुरवठा खंडित करण्यात आला आहे. ही मोहिम आणखी तीव्र करण्यात येत असल्याने थकीत वीजबिलांचा ताबडतोब भरणा करावा असे आवाहन महावितरणकडून करण्यात आले आहे.

महावितरणची संपूर्ण आर्थिक मदार ग्राहकांकडील वीजबिलांच्या दरमहा वसूलीवरच आहे. वीजबिलांच्या वसूलीमधूनच वीजखरेदीसह विविध देणी दरमहा द्यावी लागतात. त्यामुळे थकीत वीजबिलांच्या वसूलीला मोठा वेग देण्यात आला आहे. थकबाकीमुळे वीजपुरवठा खंडित करणे व खंडित केलेल्या वीजजोडण्यांची तपासणी करण्यासाठी सर्व अधीक्षक अभियंते कार्यकारी अभियंते व इतर अधिकारी, कर्मचारी सध्या ‘ऑन फिल्ड’ आहेत. स्वतः मुख्य अभियंता श्री. राजेंद्र पवार परिमंडलात विविध ठिकाणी दौरे करून शाखा कार्यालयांपर्यंत थकबाकी वसूलीचा आढावा घेत आहेत.

पुणे शहरात एकूण २ लाख ५४ हजार ९११ वीजग्राहकांकडे ४६ कोटी ६३ लाख रुपयांची थकबाकी आहे. यामध्ये घरगुती २ लाख १७ हजार ६२५ ग्राहकांकडे ३२ कोटी ३२ लाख रुपये, वाणिज्यिक ३४ हजार ८६९ ग्राहकांकडे ११ कोटी ६४ लाख रुपये, औद्योगिक २ हजार ४१७ ग्राहकांकडे २ कोटी ६७लाख रुपयांची थकबाकी आहे. गेल्या २० दिवसांमध्ये ९ हजार ७२६ थकबाकीदारांचा वीजपुरवठा खंडित करण्यात आला.

पिंपरी चिंचवड शहरात एकूण १ लाख ४५ हजार ६२२ वीजग्राहकांकडे ३२ कोटी २० लाख रुपयांची थकबाकी आहे. यामध्ये घरगुती १ लाख २३ हजार ४८६ ग्राहकांकडे १९ कोटी ९३ लाख रुपये, वाणिज्यिक १८ हजार ४९१ ग्राहकांकडे ८ कोटी २८ लाख रुपये, औद्योगिक ३ हजार ६४५ ग्राहकांकडे ३ कोटी ९९ लाख रुपयांची थकबाकी आहे. गेल्या २० दिवसांमध्ये ४ हजार ५३९ थकबाकीदारांचा वीजपुरवठा खंडित करण्यात आला.

तसेच ग्रामीण भागातील आंबेगाव, जुन्नर, मावळ, खेड, मुळशी, वेल्हे, हवेली तालुक्यांमध्ये एकूण १ लाख ८६ हजार ७५३ वीजग्राहकांकडे ४५ कोटी ९४ लाख रुपयांची थकबाकी आहे. यामध्ये घरगुती १ लाख ६७ हजार १७ ग्राहकांकडे ३२ कोटी ८७ लाख रुपये, वाणिज्यिक १७ हजार ३१३ ग्राहकांकडे ८ कोटी ५९ लाख रुपये, औद्योगिक २ हजार ४२३ ग्राहकांकडे ४ कोटी ४८ लाख रुपयांची थकबाकी आहे. तर ४ हजार ६८७ ग्राहकांचा वीजपुरवठा खंडित करण्यात आला आहे. वीजग्राहकांनी थकबाकीचा त्वरीत भरणा करावा व वीजपुरवठा खंडित करण्याची कटू कारवाई टाळावी असे आवाहन महावितरणकडून करण्यात आले आहे.

वीजग्राहकांना चालू व थकीत वीजबिलांचा भरणा करणे सोयीचे व्हावे यासाठी पुणे परिमंडलातील महावितरणचे सर्व अधिकृत वीजबिल भरणा केंद्र शनिवारी (दि. २३) व रविवारी (दि. २४) सार्वजनिक सुटीच्या दिवशी कार्यालयीन वेळेत सुरु राहणार आहे. सोबतच लघुदाब वीजग्राहकांना बिलांचा घरबसल्या भरणा करण्यासाठी महावितरणच्या www.mahadiscom.in  वेबसाईट व मोबाईल अॅपद्वारे ‘ऑनलाईन’ सोय उपलब्ध आहे.

तात्यासाहेब थोरात उद्यान वाचविण्यासाठी आंदोलन; मोनोरेलला नागरिकांचा तीव्र विरोध

पुणे : तात्यासाहेब थोरात उद्यान हे कोथरूडकरांचा श्वास आहे. या उद्यानातील वनसंपदा नष्ट करून येथे मोनोरेल स्टेशन उभारण्याचा घाट प्रशासनाकडून रचला जात आहे. त्यामुळे येथील नागरिकांनी दिलेल्या हाकेला धावून जात आमदार रवींद्र धंगेकर यांनी गुरुवारी (ता. २१) सकाळी आंदोलन केले व ‘उद्यान वाचवू’ असा नारा दिला.

मोनोरेलसाठी तात्यासाहेब थोरात उद्यानातील वृक्षांवर व येथील निसर्गसंपदेवर कुऱ्हाड चालवली जाणार आहे. त्यामुळे येथील नागरिकांनी आज सकाळी एकत्र येवून आमदार रवींद्र धंगेकर यांना दूरध्वनी केला व तात्यासाहेब थोरात उद्यानात येण्याची विनंती केली. आमदार रवींद्र धंगेकर हे अवघ्या काही क्षणात तात्यासाहेब थोरात उद्यानात पोहोचले. त्यांनी नागरिकांचे म्हणणे ऐकून घेतले व या उद्यानाचा प्रशासनापासून आपण बचाव करू, असा शब्द नागरिकांना दिला.

आमदार रवींद्र धंगेकर म्हणाले, हे अत्यंत सुंदर व नेटके उद्यान शशिकांतभाऊ सुतार यांच्या कार्यकाळात झालेले आहे. हे उद्यान म्हणजे इथल्या नागरिकांसाठी आरोग्याच्या दृष्टीने फार मोठी सुविधा आहे. इथल्या उद्यानाचे सौंदर्य नष्ट करणे म्हणजे लोकांचा श्वास नष्ट करण्यासमान आहे. त्यामुळे इथल्या नागरिकांनी अनेकदा अधिकाऱ्यांच्या भेटी घेण्याचा प्रयत्न केला. पण, त्यांना वेळ दिली गेली नाही. पण, यापुढे आम्ही आणि महाविकास आघाडी इथल्या नागरिकांसोबत कायम आहोत. इथले नागरिक येणाऱ्या काही दिवसांत जनआंदोलन उभे करणार आहेत. त्यातही आम्ही सहभागी असू.

आमचा विकासाला अजिबात विरोध नाही. आम्ही विकासाच्या बाजूनेच आहोत. पण, विकास साधत असताना जनतेला नेमके काय हवे आहे, याचाही प्रशासनाने नीट अभ्यास करायला हवा. पर्यावरण नष्ट करून विकास होवू नये, असे येथील नागरिकांचे म्हणणे आहे. त्यामुळे आम्ही या उद्यानाचे प्रशासनापासून रक्षण करू.

– रवींद्र धंगेकर, आमदार

पुणे, दि. २० : आगामी लोकसभा सार्वत्रिक निवडणूकीच्या पार्श्वभूमीवर जिल्ह्यात स्वीप उपक्रम राबविण्यात येत असून २०८ वडगाव शेरी विधानसभा मतदार संघात शिक्षकांच्या माध्यमातून जास्तीत जास्त पालक, विद्यार्थी आणि नागरिकांपर्यंत पोहोचण्याच्या उद्देशाने संत ज्ञानेश्वर प्राथमिक विद्यालयात शिक्षकांच्या प्रशिक्षण कार्यक्रमात मतदान जागृती करण्याचे आवाहन करण्यात आले.

मतदार यादीत नाव शोधण्यासाठी, मतदार नोंदणी आणि नावात बदल करण्यासाठी, त्यांच्या डिजिटल छायाचित्र, मतदार स्लिप डाउनलोड करण्यासाठी मतदार हेल्पलाइन ॲप कसे वापरता येईल याविषयी सविस्तर माहिती देण्यात आली. तसेच ५० टक्क्यांपेक्षा कमी मतदान असलेल्या परिसरात मतदान जागृती करण्याबाबत आवाहन करुन मतदानाची शपथ देण्यात आली.

निवडणूकीतील लोकशाहीचे महत्त्व आणि मतदानाचे महत्त्व पटवून देण्याविषयी उपस्थित शिक्षकांना मार्गदर्शन करण्यात आले.

यावेळी वडगाव शेरी मतदार संघातील स्वीपचे नोडल अधिकारी सुहास नवले व कर्मचारी उपस्थित होते.

पुणे-ओळखीच्या महिलेस व्हाॅटसअपवर मेसेज केल्यावर त्याआधारे महिला व तिच्या पतीने संबधित मेसेज पाठविणाऱ्या व्यावसायिकाला ब्लॅकमेल करत त्याच्याकडून तब्बल 13 लाख रुपये उकळले. तसेच आणखी पैशाची मागणी संबंधित दांम्पत्य करत असल्याने या त्रासाला कंटाळून व्यावसायिकाने विषारी आैषध प्राश्न करुन आत्महत्या केल्याचा प्रकार उघडकीस आला आहे. अशाेक जाेशी (वय-38,रा. नऱ्हे,पुणे) असे आत्महत्या केलेल्या व्यवसायिकाचे नाव आहे.

याप्रकरणी वैष्णवी गणेश चव्हाण (वय-२६) व गणेश चव्हाण (२८,दाेघे रा.खैरेवाडी,विद्यापीठ राेड, पुणे) यांचेवर विश्रामबाग पोलिस ठाण्यात आत्महत्येस प्रवृत्त केल्याचा गुन्हा दाखल करण्यात आला आहे. हा प्रकार १३/१/२०२४ ते २१/२/२०२४ यादरम्यान घडल्याची माहिती पोलिसांनी दिली आहे. याबाबत आराेपी विराेधात गाेपाल कांजी भाई जाेशी (वय-३३) यांनी तक्रार दाखल केलीआहे. पोलिसांनी दिलेल्या माहितीनुसार, तक्रारदार गाेपाल जाेशी यांचा भाऊ मयत अशाेक जाेशी याने वैष्णवी चव्हाण हिचे व्हाॅटसअपवर मेसेज पाठवला हाेता.

त्याचे आधारे मयत याची पोलिसात तक्रार करण्याची वारंवार तिने धमकी दिली. संबंधित आराेपी जाेडप्याने मयत अशाेक यास ब्लॅकमेल करुन वेळाेवेळी पैशाची मागणी करुन जबरदस्तीने 13 लाख रुपये घेतले. परंतु त्यानंतरहीत्यांचे समाधान न झाल्याने त्यांनी पुन्हा अशाेक याचे ऑफिसवर येऊन त्याला पोलिसात तक्रार करण्याची धमकी देऊन त्यास ब्लॅकमेल करुन पुन्हा पैशाची मागणी केली. त्यामुळे त्यास आत्महत्येस प्रवृत्त केल्याने अशाेक याने विषारी औषध पिल्याने त्याचा त्यात मृत्यू झाला आहे. याप्रकरणी पुढील तपास विश्रामबाग पोलिस करत आहे.

पुणे, दि.२०: लोकसभा सार्वत्रिक निवडणुकीच्या पार्श्वभूमीवर आचारसंहिता भंगाच्या तक्रारीसाठी जिल्हाधिकारी कार्यालयात जिल्हा संपर्क केंद्र कार्यान्वित करण्यात आले आहे. या केंद्राकडे तसेच सी- व्हिजील पोर्टलवर प्राप्त ४६ तक्रारीपैकी योग्य असलेल्या ३५ तक्रारींवर कार्यवाही तात्काळ पूर्ण करण्यात आली असून ११ तक्रारीवर कार्यवाही सुरू असल्याची माहिती जिल्हा नियंत्रण कक्षातर्फे देण्यात आली आहे.

जिल्ह्यात २१ विधानसभा मतदारसंघात १३५ भरारी पथके व १२९ स्थिर पथके नियुक्त केली आहेत. या पथकामार्फत सी-व्हीजील पोर्टलवर प्राप्त तक्रारीवर कार्यवाही करण्यात येत आहे. १६ मार्चपासून पर्वती विधानसभा मतदार संघात १८, कसबा -६, पुणे कॅन्टोन्मेंट आणि मावळ ४, कोथरूड आणि चिंचवड-३, पुरंदर, वडगाव शेरी, बारामती, खडकवासला आणि पिंपरी प्रत्येकी १, तर चुकीच्या तक्रारी ३ अशा एकूण ४६ तक्रारी सी-व्हीजील पोर्टलवर दाखल झाल्या. त्यापैकी ३५ तक्रारी योग्य आढळल्याने त्यावर त्वरित कारवाई करण्यात आली. उर्वरित ११ तक्रारी संदर्भात कार्यवाही सूरू आहे.

प्राप्त झालेल्या तक्रारी ह्या विनापरवानगी लावण्यात आलेले बॅनर व पोस्टर बाबत आहेत. नागरिकांना आचारसंहिता भंगाच्या तक्रारी करावयाच्या असल्यास सी- व्हिजिल पोर्टल, १८००२३३०१०२ आणि १९५० टोल फ्री क्रमांकावर नियंत्रण कक्षाशी संपर्क साधावा. या कक्षाद्वारे तातडीने तक्रारींची दखल घेण्यात येईल. हा कक्ष २४ तास सुरू राहणार असून त्यासाठी कर्मचाऱ्यांची नियुक्ती करण्यात आली आहे. नियंत्रण कक्षाला आलेल्या तक्रारीनुसार भरारी पथके आवश्यक कारवाई करतील, अशी माहिती नियंत्रण कक्षातर्फे देण्यात आली आहे.