दुसर्‍या यादीत 57 जणांना उमेदवारी

कोल्हापूर लोकसभेला श्रीमंत छत्रपती शाहू महाराज यांची उमेदवारी घोषित

काँग्रेसकडून नंदुरबार अमरावती नांदेड पुणे लातूर सोलापूर आणि कोल्हापूर या जागांवरील उमेदवार घोषित करण्यात आले आहेत. नंदुरबारमधून गोवळ पडवी यांना उमेदवारी देण्यात आली आहे. अमरावतीमधून बळवंत वानखेडे यांना उमेदवारी देण्यात आली आहे. नांदेडमधून वसंतराव बळवंतराव चव्हाण यांना उमेदवारी देण्यात आली आहे, तर लातूरमधून शिवाजीराव काळगे यांना उमेदवारी देण्यात आली आहे. तर सोलापूरमधून प्रणिती शिंदे यांना उमेदवारी देण्यात आली आहे

पुणे लोकसभा मतदारसंघात महाविकास आघाडी विरुद्ध महायुती अशी थेट लढत होण्याची शक्यता आहे. भाजपने महापौर मुरलीधर मोहोळ यांचे नाव जाहीर केल्याच्या नंतर काही दिवसातच आता आज महाविकास आघाडीने रवींद्र धंगेकरांचे नाव जाहीर केले आहे.आक्रमक कार्यशैलीसाठी ओळखले जाणारे धंगेकर लोकसभेच्या रिंगणात आल्याने या निवडणुकीत आणखीनच रंग भरण्याची शक्यता वर्तवली जात आहे.

धंगेकर हे कसबा विधानसभा मतदारसंघातून काँग्रेसचे आमदार म्हणून निवडून आले होते.पुणे लोकसभा ही काँग्रेसची तशी परंपरागत जागा. मात्र जवळपास 10 वेळा खासदार निवडून आणणाऱ्या काँग्रेसची ही जागा मोदी लाटेत म्हणजेच 2014 साली भाजपकडे गेली.

कधीकाळी हा मतदारसंघ बॅरिस्टर गाडगीळ, जयंतराव टिळक त्यानंतर माजी केंद्रीय मंत्री सुरेश कलमाडी यांच्या नेतृत्वाखाली म्हणून ओळखला जायचा. पण मोदी लाटेत अनिल शिरोळे आणि त्यानंतर गिरीश बापट यांनी पुणे लोकसभेवर विजय मिळवला. मुख्यत: काँग्रेस विरुद्ध भाजप अशीच लढत पुणे लोकसभेत होते.

13 मार्च रोजी भारतीय जनता पक्षाने लोकसभा उमेदरांच्या नावाची घोषणा केली त्यात मुरलीधर मोहोळ यांना पुण्यातून उमेदवारी जाहीर करण्यात आली आहे. आबा बागुल यांनी उमेदवारीचा आग्रह धरला होता पण दिल्लीपर्यंत त्यांचा आग्रह पोहोचू शकला नसल्याचे स्पष्ट झाले आहे. कॉंग्रेस मध्ये सुरुवाती पासून धंगेकर हेच नाव आघाडीवर होते.

आता खरी लढत मोहोळ विरुद्ध धंगेकर

पुणे लोकसभा मतदारसंघ हा कॉंग्रेस आणि भाजपा अशा दोन विचारधारांमध्ये विभागलेला मतदारसंघ आहे.महाविकास आघाडी आणि महायुती अशी नवी समीकरणं उदयाला आल्याने त्याचाही परिणाम शहराच्या राजकारणावर झालेला दिसतोय.

यंदा आता खरी लढत मोहोळ विरुद्ध धंगेकर अशीच होणार असून अन्य उमेदवार मते खाण्यासाठी कोणाला निवडून आणण्यासाठी तर कोणाला पाडण्यासाठी उभे राहण्याची शक्यता नाकारता येत नाही.

पुणे लोकसभा मतदारसंघात सहा विधानसभा मतदारसंघ येतात. यामध्ये वडगाव शेरी, पर्वती, कोथरूड, कसबा पेठ, शिवाजीनगर, पुणे छावणी या विधानसभा मतदारसंघांचा समावेश आहे.

यात राष्ट्रवादी अजित पवार गटाचे 2 पैकी 1आमदार, भाजपचे चार आणि काँग्रेसचा एक आमदार आहे. तसं पाहायला गेलं तर या मतदारसंघात भाजपचं वर्चस्व जास्त आहे. पण कॉंग्रेस मधून बंडखोरी झाली नाही तर किंवा सरळ लढत झाली तर, आणि गत 5/7 वर्षांत भाजपचे पदाधिकाऱ्यांनी केलेल्या कार्याची व्यवस्थीत चर्चा जनतेत घडवून आणली तर कॉंग्रेसला येथे विजय मिळविता येऊ शकतो.असा विश्वास राजकीय समीक्षक व्यक्त करत आहेत.

पुणे : पुणे हे सांस्कृतिक, शैक्षणिक शहर आहे. या शहरातील उमेदवार मुरलीधर मोहोळ हे माझे युवा मोर्चातील सहकारी आणि स्वर्गीय गोपीनाथ मुंडे यांच्या अत्यंत जवळचे आहेत. म्हणूनच त्यांच्या भेटीसाठी मी येथे खास आली आहे. मोहोळ प्रचंड बहुमताने विजयी होतील आणि दिल्लीला जातील, असा विश्वास भाजपा नेत्या पंकजा मुंडे यांनी व्यक्त केला. ‘पुण्याच्या सेवेसाठी मुरलीधर मोहोळ हक्काचे खासदार असतील’, असेही त्या म्हणाल्या.

पुणे लोकसभेचे महायुतीचे उमेदवार मुरलीधर मोहोळ यांच्या कर्वे रस्त्यावरील २४ तास खुल्या संपर्क कार्यालयाला मुंडे यांनी भेट दिली. त्यानंतर त्या माध्यमांशी बोलत होत्या. यावेळी पर्वती विधानसभा मतदारसंघाच्या आमदार माधुरी मिसाळ यांच्यासह पक्षाचे पदाधिकारी, कार्यकर्ते उपस्थित होते.

पत्रकारांशी संवाद साधताना मुंडे म्हणाल्या ‘आ. मिसाळ या माझ्या मोठ्या भगिनी तर मुरलीधर मोहोळ हे माझे छोटे बंधू असून त्यांची मोठी बहीण म्हणून त्यांना शुभेच्छा देण्यासाठी पुण्यात आली आहे. त्यांना मोठा विजय प्राप्त होवो, असेही मुंडे म्हणाल्या.

पत्रकारांच्या प्रश्नांना उत्तर देताना त्या म्हणाल्या, ‘मी लोकसभेसाठी आजवर उमेदवार नव्हते, मात्र निवडणूक लढवण्याचा मला अनुभव आहे. वयाच्या १७ व्या वर्षांपासून मी प्रचार करत आहे. मला २२ वर्षांचा राजकारणाचा अनुभव आहे. ही माझी पाचवी निवडणूक आहे. पक्षाने सांगितले तर राज्यभर प्रचार करेन. परंतु, सध्या मी माझ्या निवडणुकीकडे लक्ष दिले आहे. मी माझ्या आणि मुरलीधर मोहोळ यांच्याही विजयाविषयी आश्वस्त आहे’

स्व. गोपीनाथ मुंडेंच्या आठवणीत रमल्या पंकजा !

मोहोळ यांच्या २४ तास खुल्या कार्यालयाच्या राजकीय कारकीर्दीवर प्रकाश टाकणारी छायाचित्रे लावली असून यात दिवंगत नेते गोपीनाथ मुंडे यांच्याही छायाचित्रांचा समावेश यात आहे. त्यातील प्रत्येक फोटोची आठवण मुंडे यांनी जाणून घेतली.

पुणे ता. २१: उद्गार भारततर्फे प्रकाशित होत असलेल्या ‘नाद अनाहत’ मासिकाचा प्रकाशन सोहळा येत्या मंगळवारी ( दि.२६) तारखेला पार पडणार आहे. गणेश हॉल, न्यू इंग्लिश स्कूल, टिळक रस्ता येथे हा कार्यक्रम सायंकाळी ६.३० ते ९.०० या वेळेत रंगेल. भारत वर्षाचे सांस्कृतिक आणि अध्यात्मिक पुनरुत्थान घडविणारे जननायक नरेंद्र मोदी अर्थातच ‘नाद अनाहत’चा प्रथम नरेंद्र मोदी विशेषांक यावेळी प्रकाशित होईल.
महंत शिवगिरी महाराज यांच्या शुभहस्ते तर उद्गार भारत प्रकाशनच्या संस्थापिका आसावरी पाटणकर, नाद अनाहत मासिकाचे संपादक सुजीत भोगले, व उदयनाथ महाराज यांच्या प्रमुख उपस्थितीत हा सोहळा संपन्न होईल.
कला, संस्कृती आणि इतिहास या विषयांना वाहिलेले ‘धर्मयुग’ हे साप्ताहिक अत्यंत लोकप्रिय होते. हे साप्ताहिक बंद पडल्यानंतर या विषयांना वाहून घेतलेले एकही साप्ताहिक, पाक्षिक किंवा मासिक छापले जात नव्हते. ‘नाद अनाहत’ हे मासिक धर्म, कला, संस्कृती, इतिहास आणि अध्यात्म या विषयांनाच समर्पित असेल. या मासिकातून दर्जेदार साहित्य प्रकाशित करण्याचा आमचा प्रयत्न असून ‘नाद अनाहत’ रसिक वाचकांच्या पसंतीस उतरेल, असा विश्वास आसावरी पाटणकर यांनी व्यक्त केला आहे.

पुणे-यंदाच्या लोकसभा निवडणुकीसाठी एकीकडे रवींद्र धंगेकर यांच्या नावावर शिक्कामोर्तब झाल्याच्या बातम्या माध्यमातून येत असताना दुसरीकडे निष्ठावंतांना संधी दिली पाहिजे, अन्यथा त्याचे विपरीत  पडसाद सहाही विधानसभा मतदार संघात निश्चित उमटतील, अशी आक्रमक भूमिका घेत पर्वती विधानसभा मतदार संघातील  सर्व ब्लॉक अध्यक्ष, पदाधिकारी आणि  कार्यकर्त्यांनी माजी उपमहापौर आबा बागुल यांच्या पाठीमागे उभे राहण्याचा निर्धार व्यक्त करताना पक्ष श्रेष्ठींनी तत्काळ दखल घ्यावी, अन्यथा तटस्थ राहण्याचा इशारा यावेळी पक्षाच्या निरीक्षक व अन्य पदाधिकाऱ्यांना दिला.

लोकसभा निवडणुकीसाठी पुणे शहर काँग्रेस पक्षाच्या पर्वती ब्लॉकची बैठक संपन्न झाली.माजी उपमहापौर आबा बागुल यांनी या बैठकीचे आयोजन केले होते.यावेळी निरीक्षक मुख्तार शेख, अभय छाजेड, द. स पोळेकर, मार्केटयार्ड ब्लॉक अध्यक्ष रमेश सोनकांबळे, पर्वती ब्लॉक अध्यक्ष संतोष पाटोळे, सतीश पवार, इम्तियाज तांबोळी, इर्शाद शेख आदींसह पदाधिकारी – कार्यकर्ते तसेच तिळवण तेली समाजाचे अध्यक्ष घनश्याम वाळुंजकर, संताजी प्रतिष्ठान कोथरूडचे अध्यक्ष रमेश भोज, प्रकाश कर्डिले, हरीश देशमाने,अप्पा खवळे, दिपक ओव्हाळ,ओबीसी सेल पर्वतीचे अध्यक्ष रफिकभाई अलमेल, विनायक मुळे,जयकुमार ठोंबरे, पुणे पीपल्स बँकेच्या संचालिका निशा करपे यांच्यासह विविध संघटनांचे प्रतिनिधी उपस्थित होते.

यावेळी लोकसभा निवडणुकीत जर निष्ठावंतांना डावलले जात असेल तर कार्य कसे करायचे, असा थेट सवाल पदाधिकारी व कार्यकर्त्यांनी निरीक्षकांना विचारला. ज्यांनी आजवर पक्षाशी प्रामाणिकपणे राहून काम केले. त्यांनाच बाजूला सारण्याचे राजकारण होत असेल तर आता पक्षाच्या श्रेष्ठींनी निष्ठावंत म्हणजे काय ? याची व्याख्या जाहीररीत्या सांगावी, असे आव्हानही यावेळी भावना व्यक्त करताना कार्यकर्त्यांनी दिले. कोणत्याही स्थितीत निष्ठावंतांना संधी मिळालीच पाहिजे तरच एकदिलाने काम केले जाईल, असेही यावेळी पदाधिकाऱ्यांनी सांगितले.
याप्रसंगी माजी उपमहापौर आबा बागुल म्हणाले की, गेल्या चाळीस वर्षांपासून मी समाजकारण आणि राजकारणात कार्यरत आहे. काँग्रेसचा निष्ठावंत आहे. सलग ३०वर्षे निवडून येत आहे आणि विकासाला सदैव प्राधान्य दिले आहे. पक्षाचे ध्येय धोरणे तळागाळात रुजवली आहेत. यंदाच्या लोकसभा निवडणुकीत पक्षात मरगळ होती. त्यामुळे जाहीर सभा घ्या आणि पुणेकरांचा कौल घेवून उमेदवार ठरवा हे पत्र दिले मात्र त्याला लेटर बॉम्बचे स्वरूप दिले. मात्र, काँग्रेस यंदाच्या निवडणुकीत आहे हे वातावरण निर्माण झाले.ते पत्र जर लेटर बॉम्ब होते मग आता पुढे पहा काय होते. पुढील भूमिका ही कार्यकर्ते, समर्थक, मतदारांशी बोलून लवकरच ठरवली जाईल, असेही त्यांनी स्पष्ट केले. तसेच आताचे जे स्थानिक नेते आहेत.त्यांना पूर्वी कुणी थारा देत नव्हते. अशा नेत्यांची नावे विकासकामांच्या कोनशिलेवर माझ्याच आग्रहामुळे आयुष्यभर कोरली गेली. याची आठवणही आबा बागुल यांनी पक्षांतर्गत राजकारण करणाऱ्या स्थानिक नेत्यांना यावेळी करून दिली.