विद्यार्थी सहाय्यक समितीमध्ये पारितोषिक वितरण

पुणे : “विद्यार्थ्यांनो, पारंपरिक अभ्यासक्रम न निवडता, आपल्या आवडत्या विषयात करिअर करा. आपल्यावर ज्यांनी संस्कार केले, शिक्षण दिले, त्यांचा कधीही विसर पडू देऊ नका,” असा सल्ला ज्येष्ठ अभिनेते राहुल सोलापूरकर यांनी दिला. स्वभाषेचे महत्व जपण्याचे आवाहन करत सोलापूरकर यांनी स्वभाषा उत्तम आल्याशिवाय दुसरी भाषा शिकता येत नाही. त्यामुळे वाचन वाढवा, वृत्तपत्रे वाचा आणि आपला इतिहास पुस्तकांतून जाणून घ्या, असे सांगितले.
विद्यार्थी साहाय्यक समितीच्या विद्यार्थी विकास केंद्रातर्फे वसतिगृहनिहाय घेण्यात आलेल्या विविध स्पर्धांचे पारितोषिक वितरण डॉ. अ. शं. आपटे वसतिगृहातील मोडक सभागृहात सोलापूरकर यांच्या हस्ते झाले. प्रथम तीन विजेत्यांचा स्मृतिचिन्ह आणि प्रमाणपत्र देऊन सन्मान करण्यात आला. सांस्कृतिक कार्यक्रमासाठीचा प्रथम क्रमांक सिंहगड गटाला देण्यात आला. याशिवाय पाचही वसतिगृहातील व्यवस्थापन टीमचा गौरव करण्यात आला. जपानमधील कंपन्यांमध्ये नोकरी मिळालेल्या समितीच्या तीन विद्यार्थ्यांचाही यावेळी सत्कार करण्यात आला.
समितीचे कार्यकारी विश्वस्त तुषार रंजनकर यांनी प्रास्ताविक केले. विद्यार्थिनी स्नेहल कुलकर्णीने पाहुण्यांचा परिचय करून दिला. यावेळी विश्वस्त डॉ. ज्योती गोगटे, विनया ठोंबरे, संजय अमृते, कार्यकर्ते सीमा होस्कोटे, रवींद्र नामजोशी, राजेंद्र ततार, हरीष अष्टेकर, निसार चौगुले, मुख्य कार्यकारी अधिकारी चंद्रकांत कुलकर्णी यांच्यासह सर्व वसतिगृहांचे पर्यवेक्षक उपस्थित होते. विद्यार्थी प्राजक्ता क्षीरसागर व ओंकार शिंदे यांनी सूत्रसंचालन केले.

पुणे, दि. ०१ एप्रिल २०२४ : महापारेषण कंपनीच्या पिरंगुट २२०/२२ केव्ही अतिउच्चदाब उपकेंद्रातील ५० एमव्हीए क्षमतेचा नादुरुस्त पॉवर ट्रान्सफॉर्मर बदलण्याचे काम बुधवार (दि. ३) ते शनिवार (दि. ६) पर्यंत होणार आहे. या चार दिवसांच्या कालावधीत विजेच्या भारव्यवस्थापनासाठी महावितरणच्या काही २२ केव्ही वाहिन्यांचा वीजपुरवठा सकाळी ८ ते रात्री ९ वाजेपर्यंत बंद ठेवावा लागणार असल्याने मुळशी तालुक्यातील काही गावांमध्ये चक्राकार पद्धतीने भारनियमन करण्यात येणार आहे.

यामध्ये बुधवारी, दि. ३ एप्रिलला महावितरणच्या २२ केव्हीच्या सहा वाहिन्यांचा वीजपुरवठा बंद राहील. त्यामुळे रिहे, भरे, घोटावडे, मुळखेड, खांबोली, कातरखडक, पिंपोली, आंधाले या गावांसह काही उच्चदाब औद्योगिक अशा सुमारे ६५०० ग्राहकांचा वीजपुरवठा सकाळी ८ ते रात्री ९ वाजेपर्यंत बंद राहील. गुरूवारी, दि. ४ एप्रिलला २२ केव्हीच्या दोन वाहिन्यांचा वीजपुरवठा बंद राहील. त्यामुळे पिरंगुट गाव, पिरंगुट औद्योगिक परिसर, पौड, दारवली, करमोळी, चाले, दखणे, खुळे, साथेसाई, नांदगाव, कोंढावळे, रावडे, शेरे, वेलावडे, जामगाव, दिसली यासह कोळवण खोऱ्यातील सर्व गावे व वाड्यावस्त्यांमधील सुमारे १८ हजार ५०० ग्राहकांचा वीजपुरवठा सकाळी ८ ते रात्री ९ वाजेपर्यंत बंद राहील.

तसेच शुक्रवारी, दि. ५ एप्रिलला महावितरणच्या २२ केव्हीच्या तीन वाहिन्यांचा वीजपुरवठा बंद राहील. त्यामुळे भुगाव, भूकूम, खातपेवाडी, लवळे, चांदे, नांदे या गावांतील सुमारे २७ हजार ५०० ग्राहकांचा वीजपुरवठा सकाळी ८ ते रात्री ९ वाजेपर्यंत बंद राहील. तर शनिवारी, दि. ६ एप्रिलला उरवडे, कासारआंबोली, धोत्रेवाडी, आंबेगाव, मारणेवाडी, कोंढूर, कोंढावळे, आंधगाव, आंबरवेत, आमराळेवाडी, गडगावणे यासह मुठा खोऱ्यातील सर्व गावे व वाड्यावस्त्यांमधील सुमारे ९ हजार ग्राहकांचा वीजपुरवठा सकाळी ८ ते रात्री ९ वाजेपर्यंत बंद राहणार आहे. या कालावधीत सहकार्य करावे असे आवाहन महावितरण व महापारेषणकडून करण्यात आले आहे.  

पुणे-पुणे शहर पोलीस आयुक्तालयाचे हददीत मोटर सायकलच्या विशेषतः बुलेटच्या सायलेन्सरमध्ये फेरबदलकरून अनेक वाहनचालक मोटर वाहन कायदाकलम १९८ अन्वये उल्लंघनकरत आहेत. तसेच शहरातील अनेक वस्त्यांमध्येदिवसा रात्री असे फेरबदलकेलेले सायलेन्सर असलेले वाहन वापरूनकर्णकर्कश आवाज करूनध्वनी प्रदूषणात भर टाकत आहेत. अशी मोटरसायकलचालवणारे वाहनचालकांवर व मोटार सायकलचे सायलन्सर मांडीफाईड करुन देणारे इसमावर कारवाई करण्यासाठी पुणे शहर वाहतूक शाखे मार्फत संपूर्ण पुणेशहरातील एकुण २७ वाहतूक विभागामध्येदिनांक २९/०३/२०२४ ते ३१/०३/२०२४ रोजीदरम्यान पोलीस आयुक्तअमितेशकुमार.सह पोलीस आयुक्त प्रविण पवार,अप्पर पोलीस आयुक्त पुर्व प्रादेशिक विभाग मनोज पाटील ,पोलीसउप आयुक्त वाहतूक शाखा रोहिदास पवार यांचे मार्गदर्शनाखाली विशेष मोहिम राबवण्यात आली.
या विशेष मोहिमे दरम्यानवाहतूक पोलीसांनी फेरबदलकेलेले सायलेन्सर असलेले ६१९ मोटर सायकलचालकांवर दंडात्मक कारवाया केल्या. कारवाई केलेल्या एकूण ६१९मोटार सायकलचालकांनीमॉडीफाईड केलेले सायलेन्सर काढून टाकले. तसेच मोटार सायकलचे सायलन्सर मॉडीफाईड करुनदेणा-या ३१६ इसमांवर कारवाई करण्यात आली आहे. मोटार सायकलचे सायलन्सर मॉडीफाईड करणा-या गॅरेजवाले तसेच मॉडीफाईड सालन्सर विक्रेते यांना सक्त सुचना करण्यात आलेल्या आहेत. विशेष मोहिमे दरम्यानवाहतूक परिमंडळ १ मधील फरासखाना- १८, विश्रामबाग ४, खडक ०८, स्वारगेट- १३, सहकारनगर ०७, भारतीविद्यापिठ ३७, सिंहगड रोड २९, दत्तवाडी- १६, वारजे १६ कारवाई, वाहतूक परिमंडळ २ मधीलकोथरुड १७, डेक्कन २१, चतुः श्रृंगी १३, शिवाजीनगर १४, खडकी ४१, येरवडा २८, विमानतळ ३३, कोरेगाव पार्क ३६, लोणीकंद २० कारवाई व वाहतूक परिमंडळ ३ मधील समर्थ १२, बंडगार्डन- १२, लष्कर- ०६, वानवडी २१, कोंढवा-२५, हांडेवाडी ३३, हडपसर ४४, मुंढवा ८५ व लोणीकाळभोर- १० इतक्याकारवाया वाहतूक विभाग निहायकरण्यात आल्या आहेत.
तरी पुणे शहर वाहतूक शाखेतर्फनागरिकांना आवाहन करण्यात येतेकी, पुणे शहर आयुक्तालयाचे हददीत अशा फेरबदलकेलेल्या सायलेन्सर लावलेल्या मोटरसायकलचालवताना वाहनचालक आढळून आल्यास त्याची माहिती पुणे शहर वाहतूक शाखेच्या व्हॉटसअॅप क्र. ८०८७२४०४०० यावर वाहन क्रमांक व लोकेशनसह कळवावी, त्यांचेवर कडककारवाई केली जाईल. तसेच मोंडीफाईड सायलन्सर विकणा-या दुकानदारांवर सुध्दा कठोर कारवाई करण्यात येईल. भविष्यात देखील ही मोहिम अशीच राबण्यात येणार आहे.

; आचार्य श्री महाश्रमण प्रवास व्यवस्था समितीच्या वतीने आयोजित प्रवचनाचा चौथा दिवस
पुणे : आपल्या शरीरात पाच ज्ञानेंद्रिये आहेत. त्यामध्ये इंद्रिये, त्याचा विषय आणि प्रवृत्ती हे तीन भाग आहेत. कान, डोळे, नाक, जीभ, स्पर्श या इंद्रियांचे विषय आणि प्रवृत्ती वेगवेगळे आहेत. इंद्रियांमधून आपण ज्ञान ग्रहण करू शकतो आणि विषयाचा बोध देखील मिळवू शकतो. कान आणि डोळे हे दोन कामी इंद्रिये आणि नाक, जीभ, स्पर्श हे तीन भोगी इंद्रिये आहेत. प्रत्यक्षात कान व डोळे ही दोन मोठी इंद्रिये ज्ञानप्राप्तीची प्रमुख माध्यमे आहेत, त्यांचा उपयोग ज्ञानप्राप्ती करिता अधिकाधिक व्हायला हवा, असे जैन तेरापंथचे धर्मसंघाचे महातपस्वी आचार्य श्री महाश्रमणजी यांनी सांगितले.   
आचार्य श्री महाश्रमण प्रवास व्यवस्था समितीतर्फे  गंगाधाम चौकाजवळील वर्धमान सांस्कृतिक केंद्रात आचार्य श्री महाश्रमणजी यांची प्रवचनमाला सुरु आहे. त्याच्या चौथ्या दिवशी ते बोलत होते. यावेळी खासदार प्रा. डॉ. मेधा कुलकर्णी, आमदार माधुरी मिसाळ, माजी महापौर मुरलीधर मोहोळ, ज्येष्ठ उद्योजक फत्तेचंद रांका, राजेंद्र बांठिया, माजी नगरसेवक प्रविण चोरबेले, ऍड. अभय छाजेड आदी उपस्थित होते. 
प्रा. डॉ. मेधा कुलकर्णी म्हणाल्या, राजकारणात आध्यात्मिकता गरजेची आहे. राजकारणात आध्यात्म असेल, तर देशात चांगले राजकारण होउ शकेल. पंतप्रधान नरेंद्र मोदी देखील अध्यात्माची जोड देत सर्व कार्य करीत आहेत. आम्हाला देखील अध्यात्मातून चांगले राजकारण करण्याची शक्ती मिळो, अशी प्रार्थना त्यांनी यावेळी केली.  

आमदार माधुरी मिसाळ म्हणाल्या, तरुणाईमध्ये नशेचे प्रमाण अधिक वाढत आहे. पूर्वीच्या काळात या गोष्टीचे प्रमाण कमी होते. पुण्यात नशेचा प्रसार मोठया प्रमाणात होत आहे. त्यामुळे आजच्या पिढीला यातून बाहेर काढण्यासाठी आपण कार्य करीत असलेल्या एकता व धर्माच्या कार्याप्रमाणेच नशामुक्तीचे कार्य व्हावे. ‘ड्रग मुक्त महाराष्ट्र’ हे अभियान उपमुख्यमंत्री देवेंद्र फडणवीस यांच्या नेतृत्वाखाली राबविले जात आहे, त्यात आपणही सहभागी व्हावे, असे आवाहनही त्यांनी केले. 

श्री महाश्रमणजी म्हणाले, माणूस कानाद्वारे ऐकून मोठ्या प्रमाणात ज्ञान ग्रहण करतो.  आजच्या काळात ऑनलाईन माध्यमाद्वारे हजारो मैल अंतरावरून देखील ज्ञान प्राप्त केले जाते. हजारो वर्षांपूर्वी गुरूकडून मिळणारे ज्ञान ऐकून म्हणजेच श्रोतृ इंद्रियांद्वारे शिष्य शिक्षण घेत असत. डोळ्याद्वारे पुस्तके वाचून देखील मोठया प्रमाणात ज्ञान प्राप्त केले जाते. 
ते पुढे म्हणाले, शाळा, महाविद्यालय, विद्यापीठांमध्ये कान व डोळे ही ज्ञानसंपादनाची दोन सक्षम माध्यमे आहेत. शब्दाचा अर्थ माहीत आहे की नाही, हे महत्वाचे आहे. शब्दांचा अर्थ समजला तरच आपण ज्ञान मिळवू शकतो. भाषेच्या क्षेत्रात व्याकरणाचे ज्ञान नसेल, तर सगळेच व्यर्थ आहे. व्याकरणाचे ज्ञान नसेल तर याक्षेत्रात ती व्यक्ती दृष्टीहीन म्हणून ओळखली जाईल. आभूषणे आपण किती घालतो, हे महत्वाचे नाही. तर, सद्गुणांचे आभूषण सगळ्यांकडे असायला हवे. इंद्रियांचा दुरुपयोग न करता चांगला वापर केला पाहिजे, असेही त्यांनी सांगितले.  
श्री महाश्रमणजी यांचे गंगाधाम चौकाजवळील वर्धमान सांस्कृतिक केंद्रात दिनांक २ एप्रिल पर्यंत दररोज सकाळी ९.३० वाजता प्रवचन होणार असून दिवसभर विविध कार्यक्रमांचे आयोजन करण्यात आले आहे. आचार्य श्री महाश्रमण प्रवास व्यवस्था समिति एवं समस्त तेरापंथ समाज पुणे, श्री भिक्षु मेमोरियल फाउंडेशन, तेरापंथ युवक परिषद, तेरापंथ महिला मंडळ, तेरापंथ प्रोफेशनल फोरम, अणुव्रत समिती आयोजनात सहभागी झाले आहे.

शांतिनिकेतनच्या डॉ. शर्मिला रॉय पोम्मो यांचे सादरीकरण : पुणे प्रार्थना समाजाच्या वतीने समन्वय कार्यक्रम

पुणे :  ब्राह्म संगीतात वेदोपनिषदांमधील संस्कृत वचने, बंगालमधील सुगम भक्तिसंगीत, बाउल लोकसंगीत याबरोबर संत मीराबाई, गुरु नानक तसेच रवींद्रनाथ टागोर यांच्या रचनांचा समावेश होतो. अशा प्रकारे सर्व धर्म समन्वय करणार्‍या ब्राह्म संगीताचे सादरीकरण व विवेचन शांतीनिकेतनच्या टागोर स्कॉलर विदुषी डॉ. शर्मिला रॉय पोम्मो यांनी केले. राजा राममोहन रॉय यांनी ऋग्वेदातील वचनांचा आधार घेऊन ब्राह्मो समाजाची स्थापना केली हे सांगून त्यांनी रवींद्रनाथ टागोर यांनी संगीतबद्ध केलेली विश्वबंधुत्वाचा संदेश देणारी ऋग्वेदातील सूक्ते अत्यंत सुमधुर स्वरात म्हटली.

पुणे प्रार्थना समाजाने आयोजित केलेल्या “समन्वय” ह्या कार्यक्रमात  विदुषी डॉ. शर्मिला रॉय पोम्मो यांचे सादरीकरण व विवेचन झाले. यावेळी स्वामी रामानंद तीर्थ मराठवाडा विद्यापीठाचे माजी कुलगुरु डॉ. पंडित विद्यासागर,  पुणे प्रार्थना समाजाच्या अध्यक्ष डॉ. सुषमा जोग, सचिव डॉ. दिलीप जोग उपस्थित होते. पुणे प्रार्थना समाजाच्या शिष्यवृत्तीचे वितरण पाहुण्यांच्या हस्ते झाले.

डॉ. पंडित विद्यासागर म्हणाले, आपल्या समाजात वैज्ञानिक दृष्टिकोन अंगीकारण्यासाठी लोक संकोच करतात. परंतु विविध जाचक रुढीपरंपरांनी ग्रासलेल्या समाजात ब्राह्मो समाजाने वैज्ञानिक दृष्टिकोन आणला. दूरदृष्टी असणाऱ्या विचारवंतांनी एकत्र येत महाराष्ट्रात प्रार्थना समाजाची स्थापना केली. आत्ताच्या काळात भारतीय समाजाची परिस्थिती अत्यंत चिंताजनक आहे. एक समाजघटक दुसऱ्या समाजघटकाला लक्ष्य करतो आहे. प्रार्थना समाजामध्ये सामाजिक परिवर्तनाची ताकद आहे. त्यामुळे सर्व धर्म समन्वयाचा  संदेश प्रार्थना समाजाच्या माध्यमातून जनसमुदायापर्यंत पोहोचायला पाहिजे.

डॉ. सुषमा जोग म्हणाल्या,ब्राह्मो व प्रार्थना समाजाचा सर्व – धर्म – समन्वय साधणारा बंधुत्वाचा विचार स्वतंत्र भारताच्या संविधानातील कलम ५१ अ  मध्ये विशद केला आहे. या कलमाचे पालन करणे हे प्रत्येक भारतीयाचे कर्तव्य आहे. समाजातील प्रत्येकाने सर्व धर्म समन्वयाचा प्रसार केला पाहिजे. 

या कार्यक्रमात पुणे येथील ग्लोबल उपासना फोरम यांनी रवींद्रनाथ टागोर यांच्या रचना सादर केल्या. पुणे प्रार्थना समाजाच्या नमिता मुजुमदार व इतरांनी या कार्यक्रमात संतरचना सादर केल्या.  शर्मिला मझुमदार आणि डॉ. दिलीप जोग यांनी सूत्रसंचालन केले.  अंजली राव (व्हायोलिन), प्रणव कुलकर्णी (संवादिनी), नीलेश कुलकर्णी (तबला) व शशिकांत भोसले(पखवाज) यांनी साथसंगत केली.

पुणे, दि. १ : आगामी लोकसभा निवडणुक २०२४ च्या पार्श्वभूमीवर राज्य उत्पादन शुल्क, विभागीय भरारी पथकाने मावळ तालुक्यातील सिंहगड, कासुर्डे, शिरगाव व अंबी या ठिकाणी अवैध गावठी हातभट्टी दारू निर्मितीच्या ३ ठिकाणांवर दारूबंदी गुन्ह्याअंतर्गत छापे मारून ३ गुन्ह्यांची नोंद करून १ लाख ४४ हजार रूपयांचा मुद्देमाल जप्त केला आहे.

या कारवाईत १०५ लिटर तयार गावठी हातभट्टी दारु, ३ हजार ६०० लिटर रसायन व गावठी हातभट्टी दारु निर्मीतीचे इतर साहीत्य असा मुद्देमाल जप्त करण्यात आला आहे. यापुढेही अवैध दारु व्यवसायाविरुद्ध अशाच प्रकारच्या मोहिमा आखून सातत्याने कारवाई करण्यात येणार असल्याचे राज्य उत्पादन शुल्क विभागाने नमूद केले आहे.

या कारवाईत दुय्यम निरीक्षक ए. बी. पाटील, व्हि.एम. माने, जवान पी. टी. कदम, एस.एस. पोंधे, ए. आर. थोरात, एस.सी. भाट, आर. टी. तारळकर व महिला जवान यु.आर. वारे यांनी सहभाग घेतला. गुन्ह्याचा तपास राज्य उत्पादन शुल्कच्या विभागीय भरारी पथकाचे दुय्यम निरीक्षक व्हि. एम. माने व दुय्यम निरीक्षक ए.बी. पाटील करीत आहेत.

पुणे : रस्त्याच्या कडेला लावण्यात आलेल्या मोटार, तसेच टेम्पोला आग लागल्याची घटना मुंढवा भागात मध्यरात्री घडली. आगीत दोन वाहने पूर्णपणे जळाली. जुना मुंढवा रस्ता परिसरातील बोराटे वस्ती परिसरात एका इमारतीसमोर टेम्पो आणि मोटार लावण्यात आली होती.

मध्यरात्री दोनच्या सुमारास टेम्पो आणि मोटारीने पेट घेतला.

मोटार, टेम्पोने पेट घेतल्यानंतर परिसरात मोठ्या प्रमाणावर धूर झाला. नागरिकांनी या घटनेची माहिती अग्निशमन दलाला दिली. अग्निशमन अधिकारी सुभाष जाधव आणि जवानांनी घटनास्थळी धाव घेतली. जवानांनी पाण्यााचा मारा करुन आग आटोक्यात आणली. आगीत कोणी जखमी झाले नाही, अशी माहिती अग्निशमन दलाचे केंद्रप्रमुख सुभाष जाधव यांनी दिली.

आगीमागचे कारण समजू शकले नाही. एकंद परस्थिती पाहिल्यावर टेम्पो आणि मोटार हे एकमेकांपासून काही अंतरावर होते. तरी त्यांना आग लावल्याचा संशय व्यक्त करण्यात येत आहे. त्यादृष्टीने पोलिसांकडून चाैकशी करण्यात येत आहे.