लोकमान्य होमिओपॅथी मेडिकल काॅलेजच्या वतीने आयोजित राष्ट्रीय परिषदेत तज्ज्ञांचे मार्गदर्शन

पिंपरी, पुणे (दि. ३१ मार्च २०२४) असाध्य अशा कर्करोगावर जगभरात विविध उपचार पद्धतींनी औषधोपचार केले जात असून खात्रीशीर इलाजासाठी प्रयोगशाळांमधून संशोधक नवनवीन संशोधन करीत आहेत. कर्करोग रूग्णांवर होमिओपॅथीव्दारे औषधोपचार गुणकारी ठरतात हे सिध्द झाले आहे, असे प्रतिपादन महाराष्ट्र आरोग्य विज्ञान विद्यापीठाच्या होमिओपॅथी विभागाचे अधिष्ठाता डॉ. राजकुमार पाटील यांनी केले.
चिंचवड येथील स्व. फकिरभाई पानसरे एज्युकेशन फाऊंडेशन, लोकमान्य होमिओपॅथी मेडिकल काॅलेजच्या वतीने ‘होमिओपॅथी व्दारे कर्करोगावर उपचार’ या एकदिवसीय राष्ट्रीय परिषदेचे आयोजन निगडीतील ग. दि. माडगूळकर सभागृह येथे करण्यात आले होते. यावेळी ज्येष्ठ होमिओपॅथी डॉ. कटेकरी, डॉ. धर्मेंद्र शर्मा, डॉ. आर. एस. गुंजाळ, डॉ. मनिषा सोलंकी, डॉ. अरुण जाधव, डॉ कमलेश घोलप, डॉ जयकुमार भानुसे, डॉ. राहुल फेरवानी, परिषदेचे तज्ज्ञ मार्गदर्शक डॉ. श्रीकांत तलारी, डॉ. राजन शंकरन, फाऊंडेशनचे कार्यकारी विश्वस्त निहाल पानसरे, व्यवस्थापकीय संचालिका डॉ. झोया पानसरे, विश्वस्त डॉ. श्याम अहिरराव, प्राचार्या डॉ. नंदिनी जोशी, संयोजिका डॉ. विद्या इंडी, डॉ. समीर बोडस, डॉ. सोनाली मोहरील, डॉ शिशिर परांजपे, डॉ जानकी दोशी, डॉ. कविता पाटील व संस्थेचे प्राध्यापक, कर्मचारी उपस्थित होते.
होमिओपॅथी औषधांव्दारे कर्करोग रूग्णांवर प्रभावी उपचार करता येतात. या उपचारांमुळे रूग्ण बरे होण्याचे प्रमाण अधिक आहे. आजाराचे योग्य निदान, रूग्णांची शारीरिक, मानसिक परिस्थिती औषधांची योग्य निवड करून उपचार केले तर रूग्ण लवकर बरा होऊ शकतो, असे तज्ज्ञ डॉ. श्रीकांत तलारी यांनी सांगितले.
दुपारच्या सत्रात डॉ. राजन शंकरन यांनी उपस्थितांना मार्गदर्शन केले. होमिओपॅथी उपचार पध्दती प्रभावी आहे. विशेषतः असाध्य रोगांवर होमिओपॅथी औषधे गुणकारी ठरतात. या औषधोपचारांनी रूग्ण कर्करोगावर पूर्णपणे मात करू शकतो, असे डॉ. शंकरन यांनी सांगितले. त्यांनी काही चित्रफित द्वारे मार्गदर्शन केले.
स्वागत डॉ. नंदिनी जोशी, सूत्रसंचालन डॉ. उल्का ठाकूर व डॉ. समीर बोडस यांनी तर डॉ. आरती खळदकर यांनी आभार मानले. परिषदेस महाराष्ट्रासह देशभरातून विद्यार्थी, डॉक्टर मोठ्या संख्येने उपस्थित होते.

पुणे :सुनेत्रा पवार बारामती लोकसभा मतदार संघाच्या मुळशी तालुका दौऱ्यावर बावधन परिसरात सुनेत्रा पवार यांचं स्वागत करण्यात आले.भोर विधानसभा मतदार संघांचे भारतीय जनता पार्टीचे निवडणूक प्रमुख आणि कोथरूडचे माजी नगरसेवक किरण दगडे पाटील यांच्याकडून सुनेत्रा पवार यांचं जंगी स्वागत झाले.
फटाक्यांची आतिषबाजी आणि क्रेनने हार घालत झाले स्वागत
सुनेत्रा पवार यांच्या बारामती लोकसभा मतदार संघातील उमेदवारीनंतर महायुतीच्या कार्यकर्त्यांमध्ये उत्साह दिसून आला.
बारामती लोकसभा मतदारसंघातील राष्ट्रवादी कॉंग्रेस पक्षाच्या उमेदवार सुनेत्रा पवार या आज मुळशी तालुक्यातील बावधन दौऱ्यावर होत्या.या दौऱ्यादरम्यान सुनेत्रा पवार यांनी बावधन परिसरातील विविध सोसायट्यांना भेट देत स्थानिक नागरीकांच्या समस्या जाणून घेतल्या.. यावेळी बोलताना सुनेत्रा पवार यांनी घड्याळाच्या चिन्हाला मत देवून प्रचंड मताधिक्यानं निवडून देण्याचं आवाहन नागरिकांना केलं. घड्याळाला मत म्हणजे विकासाला आणि पंतप्रधान नरेंद्र मोदी यांना मत असल्याचं त्यांनी सांगितलं. येथील नागरीकांच्या समस्या सोडवण्यासाठी नेहमीच कटीबद्ध राहू अशी ग्वाहीदेखील त्यांनी यावेळी दिली..

महावितरणचे संचालक अरविंद भादिकर यांचे निर्देश

पुणे, दि. ३१ मार्च २०२४: पुणे परिमंडल अंतर्गत अचूक वीजबिल व इतर उपाययोजनांमधून महसूलवाढ तसेच उत्कृष्ट ग्राहकसेवा देण्यासाठी विभागनिहाय नियोजन तयार करावे. सोबतच यापुढे कोणत्याही परिस्थितीत वीजबिलांच्या थकबाकीमध्ये वाढ खपवून घेतली जाणार नाही. त्यामुळे प्रत्येक कार्यालयाने ‘शून्य थकबाकी’च्या उद्दिष्टानुसार कामकाज करावे असे निर्देश महावितरणचे संचालक (संचालन) श्री. अरविंद भादिकर यांनी दिले.

रास्तापेठ येथील ‘प्रकाशदूत’ सभागृहात रविवारी (दि. ३१) संचालक श्री. भादिकर यांनी पुणे परिमंडलमधील वीजबिलांच्या थकबाकीसह इतर विविध कामांचा आढावा घेतला. यावेळी पुणे प्रादेशिक संचालक श्री. अंकुश नाळे, मुख्य अभियंता श्री. राजेंद्र पवार यांची प्रमुख उपस्थिती होती.

संचालक (संचालन) श्री. अरविंद भादिकर म्हणाले की, पुणे परिमंडलामध्ये एकीकडे विजेची मागणी व वीजवापर वाढत आहे. त्याच प्रमाणात महसूलवाढ देखील होणे आवश्यक आहे. यासह प्रामुख्याने औद्योगिकसह इतर सर्व वर्गवारीतील ग्राहकांना आणखी तात्काळ व उत्कृष्ट सेवा देण्यासाठी प्रत्येक विभाग कार्यालयाने नियोजनाचा व अंमलबजावणीचा कृती आराखडा तयार करावा. येत्या काही दिवसांत या नियोजनाच्या अंमलबजावणीचा आढावा घेतला जाईल असे त्यांनी स्पष्ट केले.

महसूलवाढ व वीजबिल वसूलीमध्ये उत्कृष्ट कामगिरी केल्याबद्दल उपविभाग कार्यालयांचे अतिरिक्त कार्यकारी अभियंता दिलीप मदने (वडगाव शेरी), सचिन पाटील (गणेशखिंड) रामचंद्र लोंढे (फायरब्रिगेड), उमेश कवडे (पेशवेपार्क), भूजंग बाबर (खराळवाडी) तसेच सहायक अभियंता भरत पवार (कॅम्प शाखा), जनमित्र देविदास शिंदे, मंगेश घोडे व उमाकांत ढोले यांचा संचालक (संचालन) श्री. भादिकर यांच्याहस्ते सत्कार करण्यात आला.

रास्तापेठ येथील ग्राहक सुविधा केंद्राला संचालक श्री. भादिकर यांनी भेट दिली. या केंद्रातून वीजग्राहकांना देण्यात येणाऱ्या विविध सेवांच्या कार्यप्रणालीचा व प्रतिसादाचा आढावा घेत त्यांनी विविध सूचना दिल्या. तसेच भारतरत्न सर मोक्षगुंडम विश्वेश्वरय्या बहुउद्देशीय प्रशिक्षण केंद्राची पाहणी केली. ग्राहकसेवा, सौर ऊर्जा व इतर विषयांच्या प्रशिक्षणाच्या आयोजनांची संचालक (संचालन) श्री. अरविंद भादिकर यांनी माहिती घेत समाधान व्यक्त केले.  

या बैठकीला अधीक्षक अभियंता श्री. अरविंद बुलबुले, श्री. युवराज जरग, श्री. संजीव राठोड, श्री. संजीव नेहेते, सहायक महाव्यवस्थापक माधुरी राऊत (वित्त व लेखा) व ज्ञानदा निलेकर (मानव संसाधन) यांच्यासह कार्यकारी अभियंता व इतर अधिकारी उपस्थित होते.

 कै.श्रीमती लक्ष्मीबाई दगडूशेठ हलवाई दत्तमंदिर ट्रस्टतर्फे आयोजन
पुणे : बुधवार पेठेतील कै.श्रीमती लक्ष्मीबाई दगडूशेठ हलवाई दत्तमंदिर ट्रस्टतर्फे नाथषष्ठी निमित्त योगाभ्यानंद प.पू.माधवनाथ महाराज इंदौर यांचे साधने समयी आसन असलेले ९० पेक्षा जास्त वर्षांपूर्वीचे व्याघ्रांबर व शाल यांचे पूजन मंदिरात झाले. श्रीमंत दगडूशेठ हलवाई व कै. श्रीमती लक्ष्मीबाई दगडूशेठ हलवाई यांचे प. पू. माधवनाथ महाराज हे अध्यात्मिक गुरु होते. त्यामुळे या वस्तूंचे पूजन दरवर्षी मंदिरात करण्यात येते. 
पूजन प्रसंगी दत्तमंदिर ट्रस्टचे अध्यक्ष युवराज गाडवे, खजिनदार अ‍ॅड.रजनी उकरंडे, विश्वस्त अ‍ॅड. शिवराज कदम जहागिरदार यांसह ट्रस्टचे माजी विश्वस्त बी. एम. गायकवाड आदी उपस्थित होते. ट्रस्टचे माजी अध्यक्ष शिरीष मोहिते यांच्यातर्फे १००० भाविकांना खिचडीचा प्रसाद देखील वाटण्यात आला. याप्रसंगी दिल्ली येथे कार्यरत आयपीएस अधिकारी केतन पाटील यांच्या हस्ते आरती झाली. आरतीसाठी ट्रस्टचे कार्यकारी विश्वस्त डॉ. पराग काळकर, विश्वस्त महेंद्र पिसाळ व राजू बलकवडे उपस्थित होते. 
अध्यक्ष युवराज गाडवे म्हणाले, योगाभ्यानंद प. पू. माधवनाथ महाराजांची पुण्यतिथीचा हा दिवस नाथषष्ठीचा. महाराजांचा जन्म १८५७ रोजी चित्रकूट येथे झाला. त्यांच्या नित्य साधनेच्यावेळी त्यांनी वापरलेले व्याघ्रासन व शाल रविवार पेठ येथील श्री लक्ष्मीनारायण मंदिराचे पुजारी कै. रंगनाथ नारायण होशिंग-आलेगांवकर यांना दिले होते. हे साहित्य गेली ९० वर्षे येथील पुजारी कै. बाळकृष्ण आलेगांवकर, कै. विनायक आलेगांवकर यांनी जतन केले. 
त्यांच्या पश्चात पत्नी कै. पद्मजा आलेगांवकर व मुलगी गौरी गुमास्ते, जावई राहुल गुमास्ते व नातू देवेश गुमास्ते यांनी हा अध्यात्मिक वारसा जोपासला असून दत्तमंदिरात दरवर्षी भाविकांना दर्शनासाठी नाथषष्ठीला घेऊन येतात. श्रीमंत दगडूशेठ हलवाई व त्यांच्या धर्मपत्नी श्रीमती लक्ष्मीबाई यांचे माधवनाथ महाराज हे अध्यात्मिक गुरू. त्यांच्या प्रेरणेनेच श्रीमंत दगडूशेठ यांनी पुण्यातील धार्मिक वैभव असलेले जगद् विख्यात श्रीमंत दगडूशेठ हलवाई गणपती व श्रीमती लक्ष्मीबाई यांनी श्री दत्त मंदिराची स्थापना केली.  

पुणे : बंधुता लोकचळवळीच्या सुवर्णमहोत्सवी वर्षानिमित्त आयोजित पहिल्या विश्वबंधुता साहित्य संमेलनाच्या निमित्ताने दिला जाणारा ‘डॉ. बाबासाहेब आंबेडकर विश्वबंधुता पुरस्कार’ जाहीर करण्यात आला आहे. आंबेडकरी चळवळीतील ज्येष्ठ कार्यकर्ते, माजी आमदार व साहित्यिक ऍड. जयदेव गायकवाड, सिकंदराबाद (तेलंगणा) कॅन्टोन्मेंट बोर्डाच्या ज्येष्ठ सदस्या नलिनी व्यंकटराव पणसा आणि भारतीय जैन संघटनेचे वाघोली येथील महाविद्यालय यांना हा पुरस्कार घोषित करण्यात आला आहे. नवी पेठेतील एसएम जोशी सभागृहात येत्या १२ एप्रिल २०२४ रोजी आयोजित समारंभामध्ये संमेलनाध्यक्ष डॉ. श्रीपाल सबनीस यांच्या हस्ते या पुरस्कारांचे वितरण होईल, अशी माहिती राष्ट्रीय बंधुता साहित्य परिषदेचे संस्थापक अध्यक्ष बंधुताचार्य प्रकाश रोकडे यांनी दिली.
प्रकाश रोकडे म्हणाले, “संमेलनामध्ये विविध संस्थांचा सहभाग असून, सकाळी ९ वाजता सभागृहाच्या संविधान कट्ट्यावर बंधुताप्रेमी साहित्यिकांचा आनंद सोहळा होईल. त्यानंतर रयत शिक्षण संस्थेचे कार्याध्यक्ष चंद्रकांत दळवी यांच्या हस्ते संमेलनाचे उद्घाटन होणार असून, यावेळी स्वागताध्यक्ष कृष्णकुमार गोयल, ज्येष्ठ समाजवादी विचारवंत प्रा. सुभाष वारे, डॉ. विजय ताम्हाणे, मनुद्दीन शेख, मधुश्री ओव्हाळ, प्रा. चंद्रकांत वानखेडे, डॉ. अशोककुमार पगारिया, डॉ. अरुण आंधळे, डॉ. संजय गायकवाड यांची उपस्थिती राहणार आहे.”
“दुपारच्या सत्रात ‘अभिजात मराठी काव्यपंढरी’मध्ये महाराष्ट्रातील नामवंत कवींचा सहभाग राहील. दुपारी ४ वाजता पुरस्कार वितरणाने संमेलनाचा समारोप होईल. याप्रसंगी ‘बंधुता काव्यप्रतिभा’, ‘बंधुता शब्दक्रांती’, ‘प्रकाशयात्री’, ‘प्रकाशपर्व’ आणि ‘प्रकाशगाथा साहित्य पुरस्कार’ प्रदान केले जातील. प्रा. शंकर आथरे, संगीता झिंजुर्के, प्रा. प्रशांत रोकडे, डॉ. प्रभंजन चव्हाण, प्रा. सदाशिव कांबळे आणि डॉ. सहदेव चव्हाण आदी संमेलनाच्या यशस्वीतेसाठी परिश्रम घेत आहेत,” असेही प्रकाश रोकडे यांनी नमूद केले.

पुणे : रोटरी इंटरनॅशनल झोन-४ अंतर्गत रोटरी क्लब ऑफ पुणे डायमंड व रोटरी क्लब ऑफ पुणे सनराईज यांच्या वतीने दिला जाणारा ‘रोटरी व्होकेशनल एक्सलन्स अवॉर्ड’ उचित माध्यमचे प्रमुख जीवराज भागाबाई महादेव चोले यांना प्रदान करण्यात आला. सामाजिक, जनसंपर्क व पत्रकारिता क्षेत्रातील उल्लेखनीय योगदानाबद्दल चोले यांना सन्मानित करण्यात आले.
सेनापती बापट रस्त्यावरील ‘एमसीसीएआय’च्या मुळगावकर सभागृहात झालेल्या या सोहळ्यात रोटरी इंटरनॅशनल डिस्ट्रिक्ट ३१३१चे निर्वाचित प्रांतपाल शीतल शाह यांच्या हस्ते हे पुरस्कार प्रदान करण्यात आले. यावेळी व्होकेशनल डायरेक्टर वसंतराव माळुंजकर, झोनल डायरेक्टर प्रकाशकुमार सुतार, शिरीष पुराणिक, रोटरी क्लब पुणे सनराईजचे अध्यक्ष विनीत अग्रवाल, सचिव संध्या तायल, असिस्टंट गव्हर्नर फिरोज मास्तर, राजेश जैन, महेश माखिजा, मनोजीत चौधरी, समीर भिडे आदी उपस्थित होते.
विविध क्षेत्रात उल्लेखनीय योगदान देणाऱ्या १२ व्यक्तिमत्त्वांना ‘रोटरी व्होकेशनल एक्सलन्स अवॉर्ड’ देऊन गौरविण्यात आले. यामध्ये अवयवदान चळवळीसाठी धीरज गोडसे, शिक्षणासाठी प्रा. रफिक सौदागर, डॉ. एम. डी. लॉरेन्स, सामाजिक कार्यासाठी राम भागवत, झैनाब चिनीकमवला, अनाथांसाठी कार्यरत केशव धेंडे, दिव्यांगांसाठी कार्यरत जाई खामकर, अपंग सैनिकांसाठी कार्यात कर्नल वसंत बल्लेवार, आरोग्य क्षेत्रात कार्यरत ब्रिगेडियर अमरजित सिंग, कर्नल एन. एस. न्यायपती, डॉ. शिवलाल जाधव यांचा समावेश होता.

हा सन्मान विद्यार्थी सहायक समिती, वंचित विकास या संस्थांच्या माध्यमातून शैक्षणिक व सामाजिक कार्यात योगदान देण्यासाठी प्रोत्साहन देईल. उचित माध्यमच्या साहाय्याने समाजातील अनेकांचे उचित कार्य समाजासमोर आणण्याचा प्रयत्न यापुढेही करणार असून, सामाजिक कार्यात अधिक योगदान कसे देता येईल, यावर अधिक लक्ष्य केंद्रित करणार आहे.- जीवराज भागाबाई महादेव चोले, प्रमुख, उचित माध्यम पुणे. 

आचार्य श्री महाश्रमण प्रवास व्यवस्था समितीच्या वतीने आयोजित प्रवचनाचा तिसरा दिवस
पुणे :   जीवनात विचारांची देवाणघेवाण करण्याचे वाणी हे साधन आहे. वाणी रुपी रथावर आरूढ होऊन विचार व भाव बाहेर जातात. त्यामुळे आपण कोणावरही खोटा आरोप करता कामा नये, याला पाप समजले जाते. माणसाला राग आलेला असताना वाणी वर नियंत्रण ठेवले, तर रागावर नियंत्रण ठेवता येते. मौन ठेवले, तर हे सहज शक्य आहे. चांगल्या किंवा वाईट अशी कोणतीही परिस्थिती आली, तरी देखील शांती व धैर्य ठेवले पाहिजे. दोन्ही स्थितीमध्ये समत्व भाव ठेवणे आवश्यक आहे, असे जैन तेरापंथचे धर्मसंघाचे महातपस्वी आचार्य श्री महाश्रमणजी यांनी सांगितले.

आचार्य श्री महाश्रमण प्रवास व्यवस्था समितीतर्फे  गंगाधाम चौकाजवळील वर्धमान सांस्कृतिक केंद्रात आचार्य श्री महाश्रमणजी यांची प्रवचनमाला सुरु आहे. त्याच्या तिसऱ्या दिवशी ते बोलत होते. 
श्री महाश्रमणजी म्हणाले, भाषा प्राणीमात्रांकडे देखील असते, परंतु माणसाकडे जी भाषा आहे. ती भाषा व्यापक व विकसित आहे. जगात अनेक भाषांचा वापर केला जातो. आज अनेक भाषा शिकाव्या लागतात. भाषा मूळ गोष्ट नाही. भाषा हे साधन आहे, साध्य हा विषय आहे, तो आपण समजून घ्यायला हवा. जगात एकच भाषा असती, शास्त्र असते, तर जेवढा वेळ सगळ्या भाषा शिकण्यास लागतो, तो प्रत्येकाचा वाचला असता. त्या वेळेचा उपयोग इतर चांगल्या गोष्टींकरिता आपण वापरू शकलो असतो. जी भाषा आपल्या दैनंदिन आयुष्यात सहजोपयोगी ठरेल, ती भाषा उपयुक्त असते.

ते पुढे म्हणाले, शारीरिक व्यंगामुळे अनेकांना बोलता किंवा ऐकायला येत नाही, तर स्वभावामुळे काहीजण बोलू शकत नाही. भाषेची शक्ती होणे देखील महत्वाचे आहे. ज्यांच्याकडे भाषेची शक्ती आहे, ते भाषेचा प्रयोग कधी व कोणत्या स्वरूपात करतील, हे महत्वाचे आहे. आवश्यकते शिवाय बोलणे हे उपयुक्त नाही. बोलणे किंवा न बोलण्यात विवेक ठेवणे आवश्यक आहे. कुठे बोलणे आणि कुठे न बोलणे तसेच काय, कसे  बोलावे हे आपल्याला समजणे गरजेचे आहे.

खूप वेळ गरज नसताना जास्त वेळ बोलणे आणि सार व अर्थहीन गोष्टी बोलणे, हे वाणीमध्ये असलेले दोन प्रकारचे विष आहेत. कमी वेळेत कामाविषयी बोलणे हे वाणीचे अमृत असून याचा उपयोग केल्यास चांगला वक्ता तयार होऊ शकतो. जे बोलायचे ते खरे बोलायला हवे. खोटे न बोलणे हा नियम अंगिकारायला हवा. चांगले व गोड बोलण्याने सुखप्राप्ती करता येईल.

श्री महाश्रमणजी यांचे गंगाधाम चौकाजवळील वर्धमान सांस्कृतिक केंद्रात दिनांक २ एप्रिल पर्यंत दररोज सकाळी ९.३० वाजता प्रवचन होणार असून दिवसभर विविध कार्यक्रमांचे आयोजन करण्यात आले आहे. आचार्य श्री महाश्रमण प्रवास व्यवस्था समिति एवं समस्त तेरापंथ समाज पुणे, श्री भिक्षु मेमोरियल फाउंडेशन, तेरापंथ युवक परिषद, तेरापंथ महिला मंडळ, तेरापंथ प्रोफेशनल फोरम, अणुव्रत समिती आयोजनात सहभागी झाले आहे.

पुणे ः ’संवाद पुणे’चे संस्थापक-अध्यक्ष सुनील महाजन यांचे समाजासाठी कार्य खूप मोठे आहे. जे पेराल ते उगवे असे सुनील महाजनांचे कार्य असून त्यांनी सर्वांना प्रेम दिले. महाजन हे सांस्कृतिक विद्यापीठ आहेत, त्यांची सर्व क्षेत्रातील बड्या लोकांशी ओळख असून त्यांच्याकडून आणखी सामाजिक कार्य होत राहो, अशा शुभेच्छा देत पद्मश्री डॉ. डी. वाय. पाटील विद्यापीठाचे कुलपती डॉ. पी. डी. पाटील यांनी आपली भावन व्यक्‍त केली.
पुण्यासारख्या सांस्कृतिक शहरामध्ये गायन, वादन, नृत्यसंगीत, नाटके, बालमहोत्सव आदींचे गेली 40 वर्षे आयोजन करणार्‍या ‘संवाद पुणे’चे संस्थापक  अध्यक्ष सुनील महाजन यांचा वयाच्या एकसष्ठीनिमित्त रसिक पुणेकर व सुनील महाजन गौरव समितीच्या वतीने भव्य नागरी सत्कार शनिवारी बालगंधर्व रंगमंदिरात पद्मश्री डॉ. डी. वाय. पाटील विद्यापीठाचे कुलपती डॉ. पी. डी. पाटील आणि ज्येष्ठ क्रिकेटपटू चंदू बोर्डे यांच्या हस्ते करण्यात आला. याप्रसंगी डॉ. मोहन आगाशे, उल्हास पवार,. मोहन जोशी,शेखर गायकवाड, मा. ल. म. कडू, श्रीमती लीला गांधी, पं. सुरेश तळवलकर, रामदास फुटाणे, मा. राजेश पांडे, डॉ. अभिजित वैद्य, मा. आनंद माडगूळकर, डॉ. संजय चोरडिया, वसंतराव मस्के, आशा काळे हे प्रमुख पाहुणे म्हणून उपस्थित होते.
  डॉ. पी. डी. पाटील म्हणाले, जे पेराल ते उगवे असे सुनील महाजनांचे कार्य असून त्यांनी सर्वांना प्रेम दिले. 1985 मध्ये ते पुण्यात आले, आणि त्यांनी ठरवले व्यवस्थापन करण्याचे ठरविले. सुनील महाजन म्हणजे प्रेमाचा सागर सांस्कृतिक विद्यापीठ आहेत. त्यांनी नेहमीच समाजासाठी काम केले. ते शतायुशी होवो हीच इच्छा अशा भावना पी.डी. पाटील यांनी व्यक्त केल्या.
  चंदू बोर्डे म्हणाले, सुनील महाजन त्यांच्यासारखे विविध कार्यक्रमांचे नियोजनबद्ध व्यवस्थापन कोणाला करणे जमत नाही. त्यांनी माझ्या वाढदिवसाने इतके पद्धशीर व्यवस्थापन केले. सचिन तेंडुलकर, दिलीप वेंगसरकर  यांच्या सारख्या दिग्गज खेळाडूंशी त्यांनी संपर्क करुन त्यांना माझ्या वाढदिवसाला आमंत्रित केले. ते माझ्या साठी खूप मोठे होते. ही त्यांची सुरुवात आहे, ते शतक नक्की करणार याची मला खात्री आहे. तुमची ही कला समाजाला भरभरुन देत राहो, अशी ईश्वरचरणी प्रार्थना करतो यु मस्ट हॅव विन असे त्यांनी नमूद केले.  
 आशा काळे म्हणाल्या, देवाने मला सुनील महाजन यांच्या रूपाने मोठा पुरस्कार दिला आहे. त्यामुळे आता माला कोणत्याही पुरस्काराची गरज नाही.
  सत्काराला उत्तर देताना सुनील महाजन म्हणाले, आपण जर इतरांवर प्रेम केले, तर माणसे आपल्यावरही प्रेम करतात. आपली कदर करणारी माणसे या  खूप आहेत. आपण चांगले काम केले तरच ती नक्कीच आपल्याला भेटतात. आयुष्यात संकटे येत राहतात, पण कधी थांबायचे नाही. कारण कधी ना कधी अचूक वेळ देखील येतेच. मी एक कार्यकर्ता म्हणून जगलो आणि यापुढेही जगत राहणार असल्याचे यावेळी ते म्हणाले.
  ’संवाद पुणे’चे संस्थापक-अध्यक्ष सुनील महाजन यांच्या कार्याची यावेळी चित्रफीत दाखविण्यात आली. तसे गौरव विशेषांकाचे प्रकाशन  यावेळी मान्यावरांच्या हस्ते करण्यात आले. कार्यक्रमानंतर ‘रंग-तरंग’ गीत, संगीत, नृत्य सांस्कृतिक सोहळा संपन्न झाला. यामध्ये नृत्य सहभाग अभिनेत्री शर्वरी जमेनीस, वैशाली जाधव, ऋतुजा जुन्नरकर, वैष्णवी पाटील यांचा असून, गायक जितेंद्र भुरुक, त्यागराज खाडिलकर, योगिता गोडबोले, सुजित सोमण, अश्विनी कुरपे हे आहेत. मिलिंद कुलकर्णी, स्नेहल दामले, योगेश सुपेकर हे निवेदक सहभाग होता.

पुणे : विधानपरिषदेचे सभापती म्हणून वि स पागे यांनी दिलेले निर्देश दिपस्तंभाप्रमाणे नेहमीच मार्गदर्शक ठरत आले आहेत. पागे यांचे साहित्य विधानभवनाच्या वि स पागे केंद्राच्यामाध्यमातून प्रकाशित आणि जतन करण्याचे काम करण्यात येणार असल्याचे प्रतिपादन विधानपरिषद उपसभापती डॉ. नीलम गोऱ्हे यांनी केले.

कै. वि. स. पागे यांच्या ३४व्या स्मृतिदिनानिमित्ताने, आध्यत्मिक विषयावर वि स पागे यांनी केलेल्या प्रवचनांच्या संकलनाचे ‘किंबहुना श्रीनारायणे विश्व कोंदले’ या पुस्तकाच्या तिसऱ्या आवृत्तीचे प्रकाशन महाराष्ट्र विधानपरिषद उपसभापती डॉ. नीलम गोऱ्हे यांच्या शुभहस्ते व माजी आमदार उल्हासदादा पवार, महाराष्ट्र लोकसेवा आयोगाचे माजी अध्यक्ष किशोरराजे निंबाळकर यांच्या प्रमुख उपस्थितीत संपन्न झाला. या कार्यक्रमाचे अयोजन ऍड. शशिकांत पागे व दिलीप पागे यांनी केले.

उपसभापती डॉ. नीलम गोऱ्हे म्हणाल्या की, महाराष्ट्राचे देशामधील योगदान नमूद करताना वि स पागे यांच कार्य विचारात घेतल्याशिवाय पुढे जाता येत नाही. राज्यातील रोजगार हमी योजना ही पागे यांच्या संकल्पनेतून उभी राहिलेली योजना आहे जी पुढे सर्व देशभर सुरू करण्यात आली आहे. अनेक मजुरांना त्यातून जीवन जगण्याचा मार्ग मिळाला आहे. कोविड काळात या योजनेमुळे अनेक कामगारांना रोजगार मिळण्यास मदत झाली असल्याचे उपसभापती डॉ. गोऱ्हे यांनी सांगितले.

विधानपरिषदेच्या शतकोत्तर महोत्सवानिमित्त तयार करण्यात येणाऱ्या पुस्तकात वि स पागे यांचा सभागृतील भाषणांचा समावेश करण्यात आला आहे. वि स पागे यांचे प्रत्येक गोष्टीतील सार काढणे आणि ते पुस्तकांतून लोकांसमोर सादर करणे हे आजच्या पिढीसाठी मार्गदर्शक असल्याचे डॉ. गोऱ्हे यांनी सांगितले.

महाराष्ट्र लोकसेवा आयोगाचे माजी अध्यक्ष किशोरराजे निंबाळकर म्हणाले, वि स पागे यांची आध्यत्मिक, तात्विक आणि धार्मिक या विषयावर दिलेल्या प्रवचनांवरील पुस्तके ही कायमच तरुण पिढीला मार्गदर्शक ठरणारी असल्याचे त्यांनी सांगितले.

माजी आमदार उल्हासदादा पवार म्हणाले, वि स पागे यांच्याकडे लेखनाचे सामर्थ्य होते. त्यांनी विविध क्षेत्रातील विषयांवर लेखन केलेले आहे जे सर्वांसाठी मार्गदर्शक आहे. राज्यात रोजगार हमी योजना यशस्वीपणे राबविण्याच काम त्यांनी केल जी पुढे देशामध्ये लागू करण्यात आली.

या कार्यक्रमाचे सूत्रसंचालन गीता पागे यांनी केले तर वि स पागे यांच्या कन्या उज्वला वरदे यांनी आभार मानले.