पुणे-तक्रार करणारी गोपिका, लोणी चोरणारा अवखळ कृष्ण आणि गोपिकेहून अधिक विश्वास आपल्या लाडक्या मुलावर ठेवणारी प्रेमळ आई यशोदा यांचे सुंदर चित्र नृत्याद्वारे सादर होत होते  अलारिपू आणि शिवस्तुतीमध्ये तिघींचा उत्कट समन्वय ,श्रीमती रोजा कन्नन आणि त्यांच्या शिष्या सहाना सेल्वगणेश ,सुचेता भिडे चापेकर आणि त्यांच्या कन्या व शिष्या अरुंधती पटवर्धन तसेच नात सागरिका पटवर्धन यांच्या नृत्याने खिळवून ठेवलेली ती संध्या …अविस्मरणीय जणू जादुई संध्या ठरली .

अमृतांजली फेस्टिवल ऑफ क्लासिकल डान्सची येथे सांगता झाली. निपुण आणि प्रख्यात कलावंतांच्या तीन मंत्रमुग्ध करणाऱ्या भरतनाट्यम सादरीकरणांची मेजवानी पुणेकरांना प्राप्त झाली. महोत्सवाच्या निमंत्रक, समन्वयक आणि क्युरेटर डॉ. शशीकला रवि दरवर्षी विमाननगरमधील अत्याधुनिक अमृतांजली डान्स स्टुडिओमध्ये अमृतांजली नृत्य महोत्सवाचे आयोजन करतात. डॉ. रवि स्वत: निपुण भरतनाट्यम कलावंत आहेत, त्यांनी दिग्गज गुरूंच्या हाताखाली प्रशिक्षण घेतले आहे. त्या नृत्यदिग्दर्शनही करतात. भरतनाट्यम तसेच भरताच्या अन्य शास्त्रीय नृत्यप्रकारांचा प्रचार व प्रसार करण्यासाठी त्या काम करतात. दरवर्षी अमृतांजली फेस्टिवल ऑफ क्लासिकल डान्समध्ये कला सादर करण्यासाठी तसेच कार्यशाळा घेण्यासाठी त्या प्रख्यात कलावंत व गुरूंना आमंत्रित करतात. याशिवाय, सर्व शास्त्रीय नृत्यप्रकारांतील नवोदित कलावंतांना व्यासपीठ देण्यासाठी डॉ. रवि नोव्हेंबरमध्ये अमृतांजली नृत्योत्सवाचे आयोजन करतात.

या वर्षी दोन दिवस त्यांनी चेन्नईतील कलाइमामानी रोजा कन्नन यांना आमंत्रित करून भरतनाट्यम कार्यशाळेचे आयोजन केले होते. पुण्यातील नृत्य कलावंत या कार्यशाळेला मोठ्या संख्येने उपस्थित होते. पद्मभूषण दिवंगत कलानिधी नारायण यांनी नृत्यदिग्दर्शित केलेली दोन अभिनय पद्मे  श्रीमती रोजा कन्नन यांनी उत्साही विद्यार्थ्यांना शिकवली.डॉ. शशिकला रवि यांनी प्रमुख पाहुण्या गुरू शमा भाटे, अन्य प्रमुख पाहुणे आणि प्रेक्षक यांचे स्वागत केले. प्रेक्षागृह खचाखच भरलेले होते आणि सादरीकरणे पूर्ण होईपर्यंत तीन तास ते तसेच भरलेले राहिले.

डॉ. रवि यांनी ओमकारकारिणीचा शोध सर्वांपुढे सादर करून सादरीकरणांची सुरुवात केली. ओमकारकारिणी ही विश्वाची दैवी माता सर्वव्यापी स्त्री ऊर्जेचा स्रोत समजली जाते. डॉ. रवि यांनी ज्या कौशल्याने नृत्य सादर केले, ते बघून प्रेक्षक अचंबित झाले. निर्माती, जतनकर्ती व संहारक असे मातेचे अनेक वैविध्यपूर्ण गुण उत्तम नृत्यदिग्दर्शनाद्वारे तसेच डॉ. रवि यांच्या अप्रतिम सादरीकरणाद्वारे व्यक्त केले गेले. सूक्ष्म तपशिलांनी युक्त असा अभिनय आणि जटील पदन्यास ही त्यांच्या सादरीकरणाची वैशिष्ट्ये होती.

त्यानंतर श्रीमती रोजा कन्नन आणि त्यांच्या शिष्या सहाना सेल्वगणेश यांनी अप्रतिम नृत्य सादर केले. त्यांच्या सादरीकरणाचे नाव मॅजिक ऑफ मरगम असे होते. गुरू रोजा कन्नन यांनी पदवर्णन मोहमाना आणि पद्म सखी प्राणातील उत्कट अभिनयाने प्रेक्षकांना मंत्रमुग्ध केले.

अखेरचे साजरीकरण ‘परंपरा’तर्फे झाले. गुरू सुचेता भिडे चापेकर आणि त्यांच्या कन्या व शिष्या अरुंधती पटवर्धन तसेच नात सागरिका पटवर्धन यांनी नृत्य सादर केले. त्यांनी एकत्रितपणे काही खिळवून ठेवणारी सादरीकरणे दिली. तक्रार करणारी गोपिका, लोणी चोरणारा अवखळ कृष्ण आणि गोपिकेहून अधिक विश्वास आपल्या लाडक्या मुलावर ठेवणारी प्रेमळ आई यशोदा यांचे सुंदर चित्र त्यांनी नृत्याद्वारे उभे केले.  अलारिपू आणि शिवस्तुतीमध्ये या तिघींचा समन्वय उत्कृष्ट होता.

महोत्सवाची सांगता भैरवी रागातील भजनी ठेक्यातील ‘हे प्रभो’ या भजनाने झाली. गुरू सुचेता चापेकर यांनीच हे सादरीकरण केले. त्यानंतर आश्वासक, शांत व सुखद वातावरणात पडदा पडला.

ही संध्याकाळ खरोखर जादूई होती. पुण्याच्या प्रेक्षकांना अप्रतिम भरतनाट्यम सादरीकरणांद्वारे खिळवून ठेवण्याचे सर्व श्रेय डॉ. शशिकला रवि यांना जाते. 

पुणे, 10 एप्रिल, 2024: पुण्यातील सह्याद्रि हॉस्पिटलमध्ये २७ वर्षीय इंजिनीयर प्रियांका (नाव बदलण्यात आले आहे) यांना झालेल्या गार्टनर्स डक्ट सिस्ट या दुर्मिळ आजारावर यशस्वी उपचार करण्यात आले आहेत. मॉमस्टोरी बाय सह्याद्रि हॉस्पिटल्सच्या तज्ञ डॉक्टरांच्या टीममधील डॉ मिनी साळुंखे आणि डॉ गौरी जगदाळे यांनी प्रियांका यांच्यावर इन्टॅक्ट सिस्टचे सर्जिकल एक्सिजन (मार्सपियलायजेशन) करून वैद्यकीय उपचारांमध्ये एक महत्त्वाचा टप्पा यशस्वीपणे पार केला आहे.

गार्टनर डक्ट सिस्ट म्हणजे योनिमार्गामध्ये तयार होणारी एक प्रकारची गाठ. वयस्क महिलांपैकी २५% जणींमध्ये गार्टनर नलिका असतात पण फक्त १% महिलांमध्ये त्याचे रूपांतर गाठीमध्ये (गार्टनर्स डक्ट सिस्ट) होते, सामान्यत: याचा आकार २ सेमीपेक्षा लहान असून याची कोणतीही लक्षणे दिसून येत नाहीत. मात्र लक्षणे जरी दिसून येत नसली तरी सिस्टचा आकार वाढू शकतो. आणि जर सिस्ट मोठे असेल तर सर्जरी करावी लागू शकते. पेल्विक तपासणीद्वारे याचे निदान केले जाते. त्यामुळेच प्रियांका यांची केस अपवादात्मक ठरली. डॉ साळुंखे आणि डॉ जगदाळे यांची वैद्यकीय कौशल्ये, समन्वय आणि सह्याद्रि हॉस्पिटल्समधील प्रगत वैद्यकीय सुविधा यामुळे हे उपचार यशस्वी होऊ शकले.

सह्याद्रि हॉस्पिटल्स, हडपसर येथे करण्यात आलेल्या या प्रक्रियेमध्ये रुग्णाच्या जननेंद्रियाच्या बाह्य मांसल भागास एक छोटा कट देण्यात आला. यानंतर मार्सुपियालायझेशन (Marsupialization) या शस्त्रक्रिया तंत्राचा वापर केला गेला. ज्याद्वारे गळूमध्ये स्लीट बनवणे, त्याच्या कडा शिवणे आणि त्यातील द्रवाचा निचरा होऊ शकेल अशा पद्धतीने ती जागा उघडी ठेवणे याचा समावेश होता. अत्यंत नाजुक जागी असलेल्या या गाठीचा आकार ५X५ सेमी म्हणजे सर्वसामान्य केसेसमध्ये आढळणाऱ्या सिस्टपेक्षा बराच मोठा होता. त्यामुळेच ही केस दुर्मिळ व आव्हानात्मक होती. प्रक्रियेनंतर प्रियांका यांच्या तब्येतीत अतिशय वेगाने सुधारणा होत असल्याचे दिसून आले, सर्जरीनंतर अवघ्या सहा तासांत त्या पुन्हा चालू शकल्या.

मॉमस्टोरी बाय सह्याद्रि हॉस्पिटल्सच्या संचालिका आणि ऑब्स्टट्रिक्स विभागाच्या प्रमुख डॉ मिनी साळुंखे यांनी सांगितले, “गार्टनर्स डक्ट सिस्ट खूपच दुर्मिळ आहे. प्रियांकाच्या केसमध्ये सिस्टचा मोठा आकार आणि ते असलेली जागा यामुळे आमच्यासमोर खूप मोठे आव्हान होते. सर्जिकल एक्सिजन यशस्वी झाले आणि रुग्णाच्या हालचालींवर फारसा परिणाम होऊ न देता सिस्ट पूर्णपणे काढून टाकण्यात आले, त्यांची तब्येत वेगाने सुधारली याचा आम्हाला खूप आनंद आहे.“

अतुलनीय वैद्यकीय देखभाल प्रदान करण्यासाठी सह्याद्रि हॉस्पिटल्स वचनबद्ध आहे.  प्रगत प्रक्रिया व उपचारांमध्ये हे रुग्णालय सातत्याने आघाडीवर असून आपल्या रुग्णांच्या कल्याणासाठी समर्पित आहे.

पुणे- बहीण भावाच्या नात्याबद्दल बदनामीकारक , संस्कृतीला हानिकारक वक्तव्य करणाऱ्या सुधीर मुनगुंटीवार यांच्यावर गुन्हा दाखल करून कारवाई करावी अशा मागण्यांचे निवेदन काँग्रेसच्या महिला कार्यकर्त्यांकडून स्वीकारताना पुण्याच्या पोलीस आयुक्तांनी त्यांना फोटो काढून देण्यास मनाई केल्याचा प्रकार घडला आहे. पोलीस आयुक्तांनी त्यांना आचार संहितेचे कारण दिले आहे.
दरम्यान पुण्याच्या पोलीस आयुक्तांच्या सह महिला आयोग अध्यक्ष रुपाली चाकणकर ,भाजपच्या महिला नेत्या चित्रा वाघ यांनाही या कार्यकर्त्यांनी निवेदने पाठविली आहेत . पोलीस आयुक्तांना निवेदन देताना महिला काँग्रेस उपाध्यक्ष संगीता तिवारी.
सोशल मीडिया महाराष्ट्र प्रदेश सचिव सीमा महाडिक. सुवर्ण माने राष्ट्रवादी काँग्रेस शरद पवार गट सामाजिक न्याय विभाग महिला अध्यक्ष. छाया जाधव माजी अध्यक्ष पुणे शहर महिला काँग्रेस कमिटी सोनिया ओवाळ उपाध्यक्ष अनुसूचित जाती विभाग पुणे. ह्या उपस्थित होत्या.
चंद्रपूर येथे भाजपची सभा होती त्या मंचावर भाजपचे नेते सुधीर मुनगंटीवार यांनी बहिण भावाच्या पवित्र नात्यावर घाणेरडे गलिच्छ आणि आक्षेपार्ह असे विधान केले आहे. विरोधकांवर टीका ही झालीच पाहिजे परंतु त्या मध्ये महिलांचा अपमान कदापि सहन होणार नाही खास करून पवित्र बहीण भावाच्या नात्याचा अपमान तर अजिबात सहन होणार नाही.त्या नेत्यांच्या विधानातून त्यांच्या विकृत मानसिकतेची आणि असंस्कृतिक संस्कारांची कल्पना येऊ शकते. आम्ही सावित्रीच्या लेकी आपणास अशी मागणी करतो की आपण पोलीस ,महिला आयोग अंतर्गत ताबडतोब ह्या नेत्यावर कारवाई करावी. या नेत्याच्या विरुद्ध निवडणूक आयोगाकडे तक्रार देऊन त्यांची उमेदवारी रद्द करावी. असे संगीता तिवारी यांनी म्हटले आहे.

विवेकानंद इन्स्टिट्यूट ऑफ टेक्नॉलॉजीचे पद्मभूषण डॉ. वसंतदादा पाटील कॉलेज ऑफ आर्किटेक्टचर
पुणे :  विवेकानंद इन्स्टिट्यूट ऑफ टेक्नॉलॉजीच्या पद्मभूषण डॉ. वसंतदादा पाटील कॉलेज ऑफ आर्किटेक्टचरच्या विद्यार्थ्यांचे एक्झिट वास्तु प्रकल्प प्रदर्शनाचे आयोजन करण्यात आले होते.  एका वास्तूचा तिच्या कल्पनेपासून ते अंतिम बांधकाम पूर्ण होईपर्यंतचा संपूर्ण प्रवास विद्यार्थ्यांनी आपल्या प्रकल्पातून सादर केला. 

बिबवेवाडी येथील लोकशाहीर अण्णाभाऊ साठे नाट्यगृहात हे तीन दिवसीय प्रदर्शन झाले. विद्यार्थ्यांच्या प्रकल्पांचे मूल्यांकन करण्याकरिता भारतातील १६ नामवंत वास्तुरचनाकार परीक्षक म्हणून आमंत्रित करण्यात आले होते. अहमदाबाद  येथून पी. व्ही. के रामेश्वर व सूर्या काकाणी; दिल्ली येथून  संजय कानविंदे,तनुजा कानविंदे, आय.एम चिस्ती; बंगळुरू येथून आनंद कृष्णमूर्ती व विजय नार्णपट्टी; आणि मुंबई येथून विकास दिलावरी परीक्षक म्हणून उपस्थित होते. त्याचबरोबर पुण्यातून विक्रम हुंडेकर, मनिष बँकर, अंजली कुमठेकर, द्वापायन चक्रवर्ती,  जयंत धारप, बेक जॉन,  रवी कदम, व तुषार कोठवडे उपस्थित होते. एकूण ७१ विद्यार्थ्यांनी प्रकल्पांचे सादरीकरण केले. 
 तिसऱ्या दिवशी प्रदर्शनास अनेक प्रख्यात वास्तुविशारद  विकास भंडारी,  कल्पक भंडारी,  लक्ष्मण थिटे, गिरीश दोषी, माधव हुंडेकर, प्रशांत  देशमुख  इत्यादी यांनी भेट दिली.

 महाविद्यालयाचे अध्यक्ष अभय छाजेड, सरचिटणीस, जितेंद्र पितळीया, मार्गदर्शक विकास भंडारी प्राचार्य प्रसन्न देसाई, विजया श्रीनिवासन व  प्राध्यापक शेखर गरुड,  यांनी मार्गदर्शन केले.

• पालक व विद्यार्थ्यांसाठी प्रवेश विनामूल्य

पुणे : परदेशात शिक्षण घेण्याची इच्छा असणाऱ्या विद्यार्थ्यांसाठी ‘स्टडी स्मार्ट’च्या वतीने ‘ग्लोबल एज्युकेशन फेअर 2024’चे आयोजन करण्यात आले आहे. येत्या 13 एप्रिल 2024 रोजी दि पोच हॉल, बोट क्लब, पुणे येथे सकाळी 11.00 ते संध्याकाळी 5.00 यावेळेत ‘ग्लोबल एड्युकेशन फेअर 2024’ भरवण्यात येणार आहे. येथे पालक व विद्यार्थ्यांसाठी प्रवेश विनामूल्य असणार आहे, अशी माहिती ‘स्टडी स्मार्ट’ चे मॅनेजिंग डायरेक्टर चेतन जैन यांनी आज पत्रकार परिषदेत दिली.

पुणे श्रमिक पत्रकार भवन येथे झालेल्या या पत्रकार परिषदेत पुढे बोलताना चेतन जैन म्हणाले, 12 वी नंतर किंवा पदव्युत्तर शिक्षण घेण्यासाठी अनेक विद्यार्थ्यांना परदेशात जाण्याची इच्छा असते. पण त्यासाठी परदेशातील कोणत्या विद्यापीठात कोणत्या संधी उपलब्ध आहेत? त्यासाठीची संपूर्ण प्रक्रिया काय आणि कशी असते? परदेशात जायचं म्हटलं की तेथील राहण्याची सोय कशी होणार ? यासाठी लागणारा पैसा कसा उपलब्ध होईल? असे अनेक प्रश्न पडतात. या पार्श्वभूमीवर ‘स्टडी स्मार्ट’च्या वतीने आयोजित ‘ग्लोबल एड्युकेशन फेअर 2024’ मध्ये एकाच छताखाली या सगळ्या शंकांचे निरसन होणार आहे. यामध्ये इंग्लंड, अमेरिका, ऑस्ट्रेलिया, दुबई येथील जवळपास 40 हून अधिक टॉप विद्यापीठाच्या प्रतिनिधींशी चर्चा करता येणार आहे. तसेच येथील अभ्यासक्रम व करीयरच्या संधी जाणून घेता येणार आहेत.

या शिवाय परदेशात शिक्षणासाठी कोणकोणत्या शिष्यवृत्ती आहेत यांची माहिती देखील मिळणार आहे. तसेच या सर्वांसाठी आवश्यक असणारे अर्थसाहाय्य कशा प्रकारे उपलब्ध होईल? याविषयी विनामूल्य मार्गदर्शन देखील या ‘ग्लोबल एज्युकेशन फेअर 2024’ मध्ये विद्यार्थी व पालकांना मिळणार असल्याचे जैन यांनी सांगितले.

‘जर्नि ऑफ ग्लोबल राइझ ऑफ इंडिया’ या विषयावर शुक्रवारी व्याख्यान

पुणे-

आश्वासक युवा पिढीला संधीचे नवे जागतिक द्वार उघडुन देणारा विकसित भारताचा संकल्प मांडण्यासाठी भारताचे परराष्ट्र मंत्री एस. जयशंकर ‘जर्नि ऑफ ग्लोबल राइझ ऑफ इंडिया’ या विषयावर पुण्यातील युवकांशी संवाद साधणार आहेत. बालगंधर्व रंगमंदिर येथे शुक्रवारी (ता. 12 एप्रिल) सायंकाळी 5.00 वाजता या व्याख्यानाचे आयोजन करण्यात आले आहे. समर्थ युवा प्रतिष्ठानचे अध्यक्ष राजेश पांडे आणि युवा सुराज्य प्रतिष्ठानचे कार्याध्यक्ष पुनीत जोशी यांनी आज पत्रकार परिषदेत ही माहिती दिली.

देशाचे रॉकस्टार फॉरेन मिनिस्टर अशी ओळख असलेले एस जयशंकर यांनी अवघ्या पाच वर्षांत भारताची आंतरराष्ट्रीय प्रतिमा साफ बदलवली. कोणत्याही कुरापती खपवून न घेणारे आणि त्याचवेळी जगाच्या कल्याणाचा विचार करणारे जबाबदार राष्ट्र अशी भारताची प्रतिमा निर्माण करण्यात त्यांनी मोलाची भूमिका बजावली आहे. यापूर्वीच त्यांचा आंतरराष्ट्रीय प्रशासकीय अनुभव, त्यांची कार्यशैली यामुळे ते युवकांमध्ये विशेष लोकप्रिय आहेत.

पत्र परिषदेत कार्यक्रमाची माहिती सांगताना पांडे म्हणाले “विकासाची भूक असणारे, झपाट्याने प्रगती करणारे, स्वतःच्या नागरिकांच्या सुरक्षिततेसाठी सर्वस्व पणाला लावणारे राष्ट्र म्हणून भारत जगाच्या पटलावर पुढे आला. यासाठी मोलाची भूमिका बजावणारे, युवकांमध्ये लोकप्रिय रॉकस्टार फॉरेन मिनिस्टर पुण्यात येणार आहेत, हे पुणेकरांसाठी अत्यंत महत्वाचे आहे. भारताचे परराष्ट्र धोरण पुण्यावर थेट परिणाम करते. कारण, पुणे उद्योग आणि शिक्षण क्षेत्रात थेट आंतरराष्ट्रीय संस्थांशी जोडलेले आहे. माहिती तंत्रज्ञान, इलेक्ट्रॉनिक्स, वाहन, शेतीमाल प्रक्रिया, औषधनिर्माण ही उद्योगांची पाच क्षेत्रे पुण्यातून जगाशी व्यवहार करतात. भारतातून दरवर्षी सुमारे दहा लाख विद्यार्थी शिक्षणासाठी परदेशी जातात. त्यापैकी महाराष्ट्राचा वाटा १२.५ टक्के आहे. त्यामध्ये पुण्याचा वाटा सर्वाधिक आहे. भारताच्या आंतरराष्ट्रीय संबंधांबद्दल पुणे अत्यंत जागरूक महानगर आहे. म्हणून भारताच्या परराष्ट्र मंत्र्यांनी पुणेकरांशी संवाद साधणे महत्वाचे आहे.”

जोशी म्हणाले, “राजनैतिक भाषेचा सफाईदारपणा, निस्सीम देशभक्ती आणि देशासमोरील प्रश्नांची नेमकी जाण एस. जयशंकर यांना आहे. जग भारताकडे कसे पाहाते याबद्दल आजच्या तरुण पिढीला सतत उत्सुकता असते. जगात भारताची मान उंचावत आहे याचा तरुण वर्गाला अभिमान आहे. जयशंकर यांचे एकएक विधान तरुण वर्ग उत्साहाने पाहातो, ऐकतो आणि अधिकाधिक लोकांपर्यंत पोहोचवतो. असे कर्तृत्ववान परराष्ट्रमंत्री पुण्यातील तरूणाईशी खास संवाद साधणार आहेत. पुणेकरांनी या व्याख्यानाला मोठा प्रतिसाद द्यावा, असे आवाहन करतो.”

• मोनिका मोहोळ यांचा पहिल्या दिवसापासूनच सहभाग
• ६ विधानसभा मतदारसंघातील भेटीगाठींचा टप्पा पूर्ण

पुणे : भारतीय जनता पक्षाने लोकसभा निवडणुकीसाठी उमेदवारांच्या निवडीची प्रक्रिया सर्वात अगोदर सुरू केली. पक्षाच्या दुसऱ्याच यादीत दि. १३ मार्चला पुणे लोकसभा मतदार संघातून पक्षाने मुरलीधर मोहोळ याचे नाव जाहीर केले. नावाची घोषणा झाल्यानंतर मोहोळ यांनी ग्रामदेवतांच्या दर्शनाने आपल्या प्रचाराला सुरूवात केली. या देवदर्शनापासूनच मोहोळ यांच्या पत्नी आणि माजी नगरसेविका मोनिका मोहोळ यांनी निवडणुकीच्या रणधुमाळीत आपण सक्रिय होत असल्याचे स्पष्ट केले. त्यांनी पक्षातील महिला कार्यकर्त्या आणि स्थानिक कार्यकर्त्यांच्या साथीने भेटीगाठी सुरू केल्या. त्यामुळे सुरूवातीपासूनच मुरलीधर मोहोळ यांच्या प्रचाराच्या एका बाजूची धुरा होम मिनिस्टरनी सांभाळले असल्याचे अधोरेखीत झाले आहे.

भाजप-शिवसेना-राष्ट्रवादी काँग्रेस-रिपब्लीकन पक्ष (आठवले गट) व मित्र पक्षांच्या महायुतीचे पुण्यातील उमेदवार मुरलीधर मोहोळ यांच्या प्रचारार्थ मोनिका मोहोळ यांनी शहरातील सहाही विधानसभा मतदारसंघातील मान्यवर, आजीमाजी नगरसेवकांच्या घरी जाऊन त्यांच्या भेटीगाठी घेण्यास सुरूवात केली. गेल्या पंधरा दिवसात त्यांनी मतदारसंघात अनेकांच्या भेटीगाठी घेतल्या. या भेटीगाठी दरम्यान शक्य झाले तिथे त्या स्थानिक कार्यकर्त्यांच्याही घऱी जाऊन त्यांना भेटत आहेत. निवडणूक प्रचार याबद्दल कार्यकर्त्यांची मत त्यांनी जाणून घेतली. सध्याचा वाढता उन्हाळा बघून त्या कार्यकर्त्यांना उन्हापासून बचाव करत प्रचार आणि पक्षाचे काम करा. आपल्याला १३ मेपर्यंत ही लढाई लढायची असल्याने आपण आजारपणामुळे प्रचारापासून दुर रहाणार नाही याची काळजी घ्या, काही मदत लागली तर सांगा असे आवर्जून सांगत होत्या.

या आपल्या पहिल्या प्रचार फेरीबद्दल मोनिका मोहोळ यांनी सांगितले की, ‘मी महापालिकेत नगरसेविका म्हणून काम केले आहे. यात महापालिकेत अनेक सहकारी नगरसेवकांशी नव्याने ओळख झाल्या, मैत्रीही झाली. या पाच वर्षात मला समाजकारण आणि लोकांची कामे करण्याचे स्वातंत्र्य देत मुरलीधरआण्णांनी मला एकप्रकारे प्रशिक्षणच दिलं आहे. लोकसभेच्या निवडणुकीच्या प्रचारात पुढे कधीतरी सहभागी व्हावेच लागणार होते, मग सुरूवातीपासूनच का आपण यात सहभागी होऊ नये ! म्हणून या अनुभवाच्या जोरावरच मी सुरूवातीपासूनच प्रचारात सक्रिय होण्याचे ठरवले आणि त्याप्रमाणे स्वतंत्रपणे भेटीगाठी घेतल्या.

‘मला जवळपास पाच निवडणुकींचा अनुभव असून तो अनुभव आज महत्त्वाचा ठरत आहे. भेटीगाठींमधून नागरिकांचा उत्स्फूर्त प्रतिसाद मिळत असून पंतप्रधान नरेंद्र मोदी यांच्यावर जनसामान्यांच्या विश्वासाची साक्ष पदोपदी मिळत आहे. मी जवळपास सहाही विधानसभा मतदारसंघात जाऊन आले आहे. यापुढेही पक्षाच्या वतीने जसे नियोजन केले असेल तसे प्रचारात आपण सहभागी होणार असल्याचेही मोनिका यांनी स्पष्ट केले.

पुणे शहरात लोकसभेसाठी १३ मे यादिवशी मतदान होणार असून अद्याप निवडणुकीची अधीसूचना जाहीर झालेली नाही. त्यात उन्हाचा कडाका वाढत असताना मोहोळ यांच्या भेटीगाठी वाढल्या असून महायुतीच्या कार्यकर्त्यांकडून प्रचाराच्या नियोजनाची लगबग सुरू आहे. गेले काही दिवस रोज शहरातील मान्यवरांपासून सर्वसामान्यांपर्यंत अनेकांच्या भेटीगाठी घेण्याचे काम मुरलीधर मोहोळ व त्यांच्या होम मिनिस्टर या स्वतंत्रपणे करत आहेत. मधेच संस्था किंवा समाजांच्या मेळाव्याला उपस्थित रहात असून समाजबांधवांशी संवाद साधत आहेत.

महाराष्ट्र नवनिर्माण सेनेचे प्रमुख मा. राजसाहेब ठाकरे यांनी महायुतीला शिवतीर्थावरुन दिलेला बिनशर्त पाठिंबा, हा त्यांच्या देशाच्या विकासाबद्दल असलेला सच्चेपणा अधोरेखित करतो. हिंदू नववर्षाच्या शुभदिनी केलेल्या या घोषणेमुळे महायुतीच्या कार्यकर्त्यांना निश्तितच बळ मिळाले आहे. पुणे लोकसभा निडणुकीतही मनसैनिकांना सोबत घेऊन आम्ही एकदिलाने या निवडणुकीला सामोरे जाऊ आणि मोठ्या मताधिक्याने जिंकू, हा विश्वास वाटतो.

• मुरलीधर मोहोळ, उमेदवार, महायुती, पुणे लोकसभा

पुणे दि.९: विधानपरिषद उपसभापती डॉ. नीलम गोऱ्हे यांनी गुढी पाडवा तसेच मराठी नूतन वर्षानिमित्त राज्यातील जनतेला शुभेच्छा दिल्या आहेत. आज सकाळी त्यांच्या पुणे येथील सिल्व्हर रॉक्स या निवासस्थानी विधिवत गुढी उभारण्यात आली. यावेळी त्यांच्या भगिनी आणि स्त्री आधार केंद्राच्या विश्वस्त जेहलम जोशी व कार्यालयीन कर्मचारी उपस्थित होते.

गुढीपाडवा हिंदू नववर्षाचा दिवस हा, ब्रम्हध्वज म्हणजे गुढी उभारून त्याची विधिवत पूजा करून वंदन करण्यात आलेले आहे. अयोध्यामध्ये प्रभू श्रीराम आल्यावर जसं रामराज्य सुरू झालं, तशा प्रकारचं या देशावरती लोकांचं न्याय करणारं राज्य असू दे, देशांमध्ये पंतप्रधान नरेंद्र मोदी आणि राज्यामध्ये मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार अशा प्रकारच महायुतीच सरकार यावं अशा प्रकारची प्रार्थना गुढीकडे केलेली आहे.

यासोबतच, महाराष्ट्रातील, देशातील सर्व जनतेला सौख्य, आरोग्य, यश प्राप्त व्हावं. लोकांमधील परस्पर स्नेह, बंधुभाव व एकोपा वृद्धिंगत होवो या प्रार्थनेसह सर्वांना गुढीपाडवा आणि नवीन वर्षाच्या हार्दिक शुभेच्छा देते, असे उपसभापती डॉ. नीलम गोऱ्हे यांनी आपल्या संदेशात म्हटले आहे.