पुणे-कमिशनवाढ आणि सुट्टीच्या मागणीसाठी पेट्रोलपंपचालकांनी उद्या, रविवारी पुकारलेला संप मागे घेतला आहे. संप केल्यास ‘मेस्मां’तर्गत कारवाई करण्याचा इशारा दिल्यानंतर पंपचालकांनी संप मागे घेतला आहे, अशी माहिती पालकमंत्री गिरीश बापट यांनी पुण्यात दिली. वाहनधारकांना कोणत्याही प्रकारचा त्रास होता कामा नये, याची काळजी घेण्यात यावी, असेही त्यांनी सांगितले.
राज्य सरकारची भूमिका असोसिएशनच्या विरोधात नाही त्यामुळे राज्य शासनाच्या मदतीने पेट्रोलपंपचालकांच्या समस्येवर लवकरात लवकर तोडगा काढण्यात येईल तसेच संप मागे घेतल्यामुळे, नागरिकांची गैरसोय होणार नाही असे सांगून पालकमंत्री गिरीश बापट यांनी असोसिएशनचे अभिनंदन केले.पेट्रोल व डिझेल विक्रीमध्ये अपूर्व चंद्रा कमिटीप्रमाणे सहा महिन्यांतून एकदा कमिशन वाढ व्हावी, यासाठी जिल्ह्यासह राज्यात पेट्रोलपंपचालक असोसिएशनने संप पुकारण्याची घोषणा केली होती. पालकमंत्री गिरीश बापट यांच्या अध्यक्षतेखाली झालेल्या पेट्रोलपंपचालकांच्या बैठकीत संप मागे घेण्याबाबतचा निर्णय आज झाला.
पालकमंत्री गिरीश बापट यांच्या अध्यक्षतेखाली शासकीय विश्रामगृहात झालेल्या बैठकीत पेट्रोलपंप चालकांनी संप मागे घेत असल्याची ग्वाही यावेळी पालकमंत्र्यांना दिली. या बैठकीस महाराष्ट्र पेट्रोलपंप असोसिएशनचे प्रवक्ते सागर रुकारी, जिल्हा प्रशासनाचे पुरवठा अधिकारी दिनेश भालेदार, अन्न धान्य वितरण अधिकारी शहाजी पवार, जिल्ह्यातील पेट्रोलपंपचालक तसेच असोसिएशनचे पदाधिकारी उपस्थित होते.
