मुंबई: आर्थिक साक्षरता सप्ताहानिमित्त (जून 5 – 9, 2017) आर्थिक समावेशकतेला चालना देण्यासाठी बँक ऑफ महाराष्ट्रतर्फे 1895 शाखांमध्ये, ग्राहकांना सहभागी करून घेणारे अनेक उपक्रम आयोजित करण्यात आले. हा उपक्रम नाशिक, पुणे, सातारा, ठाणे, औरंगाबाद, जालना व पालघर येथील बँकेच्या सात आर्थिक साक्षरता केंद्रांमध्येही (एफएलसी) राबवण्यात आला.
भारतीय रिझर्व्ह बँकेने निश्चित केलेल्या नो युवर कस्टमर (केवायसी), क्रेडिटविषयी शिस्त पाळणे, तक्रार निवारण व डिजिटल होणे (यूपीआय व *99# यावर प्रामुख्याने भर देऊन) या चार संकल्पना या अभियानाच्या केंद्रस्थानी होत्या. रिझर्व्ह बँक, नाबार्डचे अधिकारी व लीड डिस्ट्रिक्ट मॅनेजर्स यांच्या उपस्थितीत आठवड्यातील सर्व पाच दिवशी आर्थिक साक्षरता शिबिरे घेण्यात आली. अंदाजे 2600 लोकांपर्यंत पोहोचत एकूण 52 शिबिरे झाली. वरील संकल्पनांबरोबरच, बँक ऑफ महाराष्ट्रने मुद्रा कर्जे व कार्डे, स्टँड अप इंडिया योजना, सामाजिक सुरक्षा योजना, आधार व मोबाइल लिंकिंग आणि अन्य आर्थिक समावेशकता कार्यक्रमांवरही भर दिला. राज्यातील कानाकोपऱ्यातून असंख्य जण यामध्ये सहभागी झाले होते. सहभागींच्या शंकांचे निरसन करण्यासाठी बँक ऑफ महाराष्ट्रच्या कर्मचाऱ्यांनी विशेष प्रयत्न केले. या वेळी बोलताना, बँक ऑफ महाराष्ट्रचे मुख्य कार्यकारी अधिकारी व व्यवस्थापकीय संचालक रवींद्र प्रभाकर मराठे यांनी सांगितले, “आर्थिक समावेशकतेला चालना देणे हा दीर्घ प्रयत्न आहे आणि त्यासाठी वर्षभर काम करावे लागणार आहे. टिअर III/टिअर IV शहरांत लक्षणीय कार्य करणारी बँक म्हणून आम्ही याचे महत्त्व पुरेपूर जाणतो. आर्थिक साक्षरता सप्ताह साजरा करण्याच्या रिझर्व्ह बँकेच्या उपक्रमामुळे बँकिंग सेवा नसलेल्या लोकांना शिक्षित करून व अधिकाधिक लोकांना औपचारिक बँकिंग व्यवस्थेत समाविष्ट करून आर्थिक समावेशकता साधण्याची आवश्यकताही अधोरेखित होणार आहे.” जूनच्या सुरुवातीला, बँक ऑफ महाराष्ट्रने मुख्यमंत्री देवेंद्र फडणवीस यांच्या अध्यक्षतेखाली 135व्या स्टेट लेव्हल बँकर्स कमिटीचे (एसएलबीसी) समन्वयन केले. त्यामध्ये बँकिंग सुविधा मिळत नसलेल्या देशातील विविध भागांपर्यंत पोहोचण्यासाठी सर्व राज्यस्तरीय बँकांना प्रेरित करण्यात आले. बँकेने इंग्रजी, हिंदी व मराठी या भाषांमध्ये आपल्या सर्व शाखांमध्ये, एटीएममध्ये व वेबसाइटवर रिझर्व्ह बँकेचे संदेश प्रसिद्ध केले आहेत. तसेच, बँकेने आर्थिक साक्षरतेचे विविध पैलू असलेले पोस्टर, फ्लायर्स व तक्तेही लावले आहेत.