मुंबईः माजी आमदार, अंडरवर्ल्ड डॉन अरुण गवळी उर्फ डॅडी याला मुंबई उच्च न्यायालयाच्या नागपूर खंडपीठाने १० मे पर्यंत जेल बाहेर राहण्यास सशर्त परवानगी दिली आहे. जेल बाहेर असताना कायद्याचे पालन करणे, पॅरोलच्या नियमांचे तंतोतंत पालन करणे अशा अटी त्याला घालण्यात आल्या आहेत.
शिवसेनेचे नगरसेवक कमलाकर जामसंडेकर यांच्या हत्येप्रकरणी नागपूर मध्यवर्ती तुरुंगात जन्मठेपेची शिक्षा भोगत असलेल्या अरुण गवळीला नागपूर खंडपीठाने १३ मार्च रोजी ४५ दिवसांची पॅरोलची रजा दिली होती. न्यायालयाच्या आदेशानुसार गवळीला २७ एप्रिलला तुरुंगात हजर व्हायचे होते. मात्र देशात लॉकडाऊन सुरू असल्यामुळे अरुण गवळीने पॅरोलची रजा वाढवून मागण्यासाठी अर्ज सादर केला. या अर्जावर नागपूर खंडपीठाने व्हिडीओ कॉन्फरन्सद्वारे सुनावणी घेतली. सुनावणीसाठी अरुण गवळी मुंबईतून हजर होता
आधीच्या सर्व फर्लो आणि पॅरोलच्या रजांचा कालावधी संपण्याच्या दिवशी तुरुंगात परतल्याचे कारण देत अरुण गवळीने ताज्या परिस्थितीची माहिती वकिलामार्फत नागपूर खंडपीठाला दिली. देशभर लॉकडाऊन सुरू आहे. मुंबईत सर्वाधिक कोरोना रुग्ण आढळले आहेत. अशा परिस्थितीत मुंबईत घराबाहेर पडणेच कठीण झाले आहे. घरातून बाहेर पडून कोरोना पसरवण्यास कारणीभूत ठरू नये यासाठी घरातच आणखी काही दिवस राहू द्यावे अशी विनंती गवळीने केली. त्याने पॅरोलची रजा वाढवून मागितली. अर्जदाराची वागणूक, त्याने आधीच्या फर्लो आणि पॅरोलच्या रजांच्या काळात तुरुंगाबाहेर केलेले वर्तना याचा रेकॉर्ड तपासून न्यायालयाने निकाल दिला. अरुण गवळीला १० मे पर्यंत तुरुंगाबाहेर राहण्याची परवानगी मिळाली.
पत्नीच्या आजारपणाचे कारण पुढे करुन मागील काही वर्षांमध्ये वारंवार अरुण गवळीने फर्लो किंवा पॅरोलच्या रजा घेतल्या आहेत. यावेळीही गवळी पत्नीसाठीच तुरुंगाबाहेर आला. तुरुंगाबाहेर असताना त्याने बेकायदा वर्तन केल्याची नोंद आढळलेली नाही. ही बाब गवळीचे वकील अॅडव्होकेट मीर नगमान अली यांनी न्यायालयासमोर मांडली. सर्व बाजू ऐकून घेऊन न्यायाधीश विनय जोशी यांनी अरुण गवळीच्या पॅरोलची मुदत वाढवली.
