मुंबई. बॉलिवूड अभिनेता इरफान खानचे वयाच्या 54 व्या वर्षी निधन झाले आहे. मुंबईतील कोकिलाबेन रुग्णालयात उपचारादरम्यान त्याने अखेरचा श्वास घेतला. रिपोर्ट्सनुसार, इरफानला पोटाचा त्रास झाला होता. त्याला कोलन इन्फेक्शन झाले होते. गेल्या आठवड्याभरापासून आयसीयूत त्याच्यावर उपचार सुरु होते. पण आज अखेर त्याची प्राणज्योत मालवली. बॉलिवूडचा हा प्रतिभावंत कलाकार असा अचानक निघून गेल्याने चाहते आणि बॉलिवूडकर यांना मोठा धक्का बसला आहे.
दोन वर्षांपूर्वी झाले होते कॅन्सरचे निदान
दोन वर्षांपूर्वी मार्च 2018 मध्ये इरफानला न्यूरोएन्डोक्राइन ट्यूमर नावाचा कॅन्सर झाल्याचे निदान झाले होते. 16 मार्च 2018 मध्ये इरफानने आपल्या आजाराविषयी खुलासा केला होता. ‘आपण अपेक्षा करतो, ते देणे आयुष्यासाठी बंधनकारक नाही’ या आशयाचा मार्गारेट मिशेल यांचा कोट इरफानने पोस्ट केला होता. या आजारावर उपचार करण्यासाठी तो लंडनला गेला होता. दहा महिन्यांनी इरफान उपचार पूर्ण करुन मायदेशी परतला आणि आपल्या आजारातून सावरत ‘अंग्रेजी मीडियम’ या चित्रपटाचे चित्रीकरणही केले होते.
चार दिवसांपूर्वीच झाले होते आईचे निधन
इरफान खान राजस्थानच्या टोंकमधील नवाबी कुटुंबातील होता. त्याचे बालपणही टोंकमध्ये गेले. त्याचे आईवडील टोंकचे रहिवासी होते. आजही त्याचे नातेवाईक आणि कुटुंबातील बरेच लोक येथेच वास्तव्याला आहेत. चार दिवसांपूर्वीच (शनिवारी) जयपूर येथे त्याच्या आईचे निधन झाले. तब्येत बिघडल्यामुळे इरफान खान आईच्या अंत्यसंस्कारात सहभागी होऊ शकला नव्हता. व्हिडिओ कॉन्फरसिंगच्या माध्यमातून त्याने आईचे अंत्यदर्शन घेतले होते.
इरफान खानचे निवडक चित्रपट आणि सन्मान
जवळपास 30 वर्षांच्या करिअरमध्ये इरफानने 50 हून अधिक बॉलिवूड चित्रपटांमध्ये काम केलं. ‘लाइफ इन अ मेट्रो’, ‘पानसिंग तोमर’, ‘द लंचबॉक्स’, ‘हैदर’, ‘गुंडे’, ‘पिकू’, ‘तलवार’, ‘हिंदी मीडियम’ हे त्याचे निवडक गाजलेले चित्रपट आहेत. त्याला हासिल (निगेटिव्ह रोल), ‘लाइफ इन अ मेट्रो’ (बेस्ट अॅक्टर), ‘पान सिंह तोमर’ (बेस्ट अॅक्टर क्रिटिक) आणि ‘हिंदी मीडियम’ (बेस्ट अॅक्टर) साठी फिल्मफेअर पुरस्कार मिळाले. ‘पान सिंह तोमर’साठी राष्ट्रीय पुरस्काराने त्याला सन्मानित करण्यात आले होते. बॉलिवूडसोबतच त्याने हॉलिवूडमध्येही छाप सोडली. कलाक्षेत्रातील अभूतपूर्व कामगिरीसाठी 2011 मध्ये ‘पद्मश्री’ पुरस्कार देऊन त्याचा गौरव करण्यात आला होता.
गेल्या आठवड्याभरापासून आयसीयूत इरफानवर उपचार सुरु होते. पण आज अखेरच त्याची प्राणज्योत मालवली.
इरफान खान यांचा अल्प परिचय.
जन्म. ७ जानेवारी १९६७ जयपुर येथे.
इरफान खान हा केवळ उत्तम अभिनेता नव्हता, तर त्यांना बॉलिवूड आणि हॉलिवूडमधला सर्वांत सक्षम अभिनेता मानला जात असे. अर्थात गुणवत्ता आणि क्षमता असूनही या टप्प्यापर्यंत पोहोचण्यासाठी इरफान खान यांना बरीच मेहनत करावी लागली. बॉलिवूडपासून हॉलिवूडपर्यंत आपल्या अभिनयाची छाप सोडणारा इरफान खानचा आयुष्य जगण्याचा संघर्ष फार मोठा होता. इरफान खान यांचा एका मुस्लिम पठाण कुटुंबियात इरफानचा जन्म झाला. इरफान खान यांचं पूर्ण नाव साहबजादे इरफान अली खान असे होते. इरफान यांच्या वडिलांचा टायरचा व्यवसाय होता.
जेव्हा त्याला एनएसडीमध्ये प्रवेश मिळाला, त्याच दरम्यान इरफान यांचे वडील गेले. यानंतर त्यांना घरच्यांकडून पैसे मिळणं बंद झालं.
एनएसडीकडून मिळणाऱ्या शिष्यवृत्तीवर त्याने कोर्स पूर्ण केला. इरफान खान यांनी त्याच्या करिअरमध्ये एकाहून एक सरस सिनेमे दिले. बॉलिवूडप्रमाणे तो हॉलिवूडमध्येही सक्रिय होता. त्यांनी हॉलिवूड मधील’स्पाइडर मॅन’, ‘जुरासिक वर्ल्ड’ आणि ‘इन्फर्नो’ या सिनेमांमध्ये काम केलं. एका मुलाखतीत हॉलिवूड अभिनेता टॉम हँक्सने इरफानचं कौतुक करत म्हटलं होतं की, ‘इरफानचे डोळेही अभिनय करतात.’
इरफान खान यांनी २००५ मध्ये रोग या सिनेमातून बॉलिवूडमध्ये पदार्पण केलं होतं. हासिल या चित्रपटासाठी इरफान यांना सर्वोत्कृष्ट खलनायकाचा फिल्मफेअर पुरस्कार मिळाला होता. यानंतर इरफान यांनी ‘लंचबॉक्स’, ‘गुंडे’, ‘हैदर’, ‘पीकू’ आणि ‘हिंदी मीडियम’ सारख्या सिनेमांमध्ये काम केलं. ‘पान सिंह तोमर’ सिनेमासाठी इरफान यांना राष्ट्रीय पुरस्कारही मिळाला. २०११ मध्ये भारत सरकारकडून पद्मश्री पुरस्काराने त्यांना सन्मानित करण्यात आले. इरफान खान यांनी त्यांची वर्ग मैत्रीण सुतपा सिकंदरशी १९९५ मध्ये लग्न केलं. इरफानच्या अनेक वाईट दिवसांमध्ये सुतपा सिकंदर त्याच्या पाठीशी खंबीर उभी राहिली. २०१८ मध्ये इरफान कॅन्सरने आजारी झाले होते. त्याच्या उपचारांसाठी ते लंडनला गेले होते. एक वर्ष उपचार घेतल्यानंतर इरफान खान भारतात परतले. इरफान खान त्यावेळी पूर्णपणे बरे झाले होते त्यांनी इंग्लिश मीडियम या चित्रपट नुकतात प्रदर्शित झाला होता.
इरफान खान यांना भावपूर्ण श्रद्धांजली.