पुण्यात १५ ऑक्टोबरला सलग ७ प्रयोग
महापालिका शाळांतील सात हजार विद्यार्थ्यांना विनामूल्य प्रवेश
पुणे,: मराठी बालरंगभूमीवर लोकप्रियतेचा इतिहास घडविणाऱ्या ‘अलबत्या-गलबत्या’ या बालनाट्याचे एकाच दिवशी, एकाच ठिकाणी सलग सात प्रयोग सादर करून विश्वविक्रम करण्याचा संकल्प करण्यात आला आहे. येत्या गुरुवारी (ता. १५) बालगंधर्व रंगमंदिरात हे प्रयोग होणार असून, पुणे महापालिकेच्या शाळांमधील आर्थिकदृष्ट्या दुर्बल घटकांतील सात हजार विद्यार्थ्यांना विनामूल्य नाटक पाहण्याची संधी मिळणार आहे.
महाराष्ट्र राज्य सहकारी बँक, सर्वस्व प्रॉडक्शन आणि अद्वैत थिएटर्स यांच्या संयुक्त विद्यमाने, पुणे महापालिकेच्या सहकार्याने हा उपक्रम आयोजित करण्यात आला आहे. महाराष्ट्र राज्य सहकारी बँकेचे प्रशासक विद्याधर अनास्कर यांनी पत्रकार परिषदेत या उपक्रमाची माहिती दिली. निर्माता राहुल भंडारे आणि अभिनेत्री श्रद्धा हांडे उपस्थित होत्या.
मराठी बालरंगभूमीवरील गाजलेले ‘अलबत्या-गलबत्या’ हे नाटक २३ मे २०१८ रोजी पुन्हा रंगभूमीवर आले. त्यानंतर ३६५ दिवसांत ३३३ प्रयोगांचा टप्पा गाठणाऱ्या या नाटकाचे आजवर ९९३ प्रयोग झाले आहेत. लेखक रत्नाकर मतकरी यांच्या लेखणीतून साकारलेल्या या नाटकाने गेल्या पाच दशकांत बालप्रेक्षकांच्या अनेक पिढ्यांना भुरळ घातली आहे. निर्माता राहुल भंडारे आणि दिग्दर्शक चिन्मय मांडलेकर यांनी या नाटकाला नव्या स्वरूपात रंगभूमीवर आणले आहे.
या विश्वविक्रमासाठी सकाळी सात वाजल्यापासून रात्रीपर्यंत सात प्रयोगांचे आयोजन करण्यात आले आहे. सकाळी सात, सव्वानऊ, साडेअकरा, दुपारी दोन, सव्वाचार, साडेसहा आणि रात्री पावणेनऊ वाजता हे प्रयोग होणार आहेत. सातही प्रयोगांमध्ये कलाकारांचा एकच संच सहभागी होणार आहे. प्रत्येक प्रयोगासाठी नवीन बालप्रेक्षक उपस्थित राहणार आहेत.
नाटकात प्रसिद्ध अभिनेते चिन्मय मांडलेकर यांनी साकारलेली चेटकीण प्रेक्षकांच्या विशेष पसंतीस उतरली आहे. ऋद्धेश गोपाळराव, स्नेहभूषण मुणगेकर आणि श्रद्धा हांडे यांच्याही प्रमुख भूमिका आहेत. नाटकातील संवाद, गाणी, विनोद आणि कल्पनारम्य प्रसंगांतून मुलांना मनोरंजनाबरोबरच सकारात्मक विचारांचा संदेश दिला जातो.
विद्यार्थ्यांच्या आत्मविश्वासाला बळ
बालपणात नाटकाच्या माध्यमातून मुलांची कल्पनाशक्ती, सर्जनशीलता आणि संवेदनशीलता विकसित होते. त्यांच्यातील भीती, न्यूनगंड दूर होऊन आत्मविश्वास वाढण्यास मदत होते. त्यामुळे हा उपक्रम केवळ विश्वविक्रमापुरता मर्यादित नसून, महापालिका शाळांतील विद्यार्थ्यांना दर्जेदार नाट्यकलेचा अनुभव देण्याचा प्रयत्न असल्याचे अनास्कर यांनी सांगितले. या निमित्ताने विद्यार्थ्यांना ‘रंजू आणि वैशूचे झाड’ या चित्रपुस्तकाचे वाटपही करण्यात येणार आहे.
बालरंगभूमीच्या इतिहासातील आगळा उपक्रम
‘अलबत्या-गलबत्या’ नाटकाच्या लोकप्रियतेत त्यातील गाण्यांचाही मोठा वाटा आहे. रत्नाकर मतकरी, चिन्मय मांडलेकर, समृद्धी पांडे, सोनल गायकवाड आणि संस्कारी यांनी शब्दबद्ध केलेली गाणी बालप्रेक्षकांमध्ये लोकप्रिय झाली आहेत. गेल्या पाच दशकांपासून मुलांच्या मनावर अधिराज्य गाजविणाऱ्या या नाटकाचा एकाच दिवसातील सात प्रयोगांचा उपक्रम मराठी बालरंगभूमीच्या इतिहासातील महत्त्वाचा टप्पा ठरणार आहे.
चौकट
एका दिवसात सात प्रयोग, सात हजार बालप्रेक्षक
- १५ ऑक्टोबर : बालगंधर्व रंगमंदिर, पुणे
- ७ प्रयोग : एकाच दिवशी, एकाच ठिकाणी
- ७,००० विद्यार्थी : महापालिका शाळांतील विद्यार्थ्यांना विनामूल्य प्रवेश
- १,१९३ प्रयोग : ‘अलबत्या-गलबत्या’चे आजवरचे प्रयोग
- एकच कलाकार संच : सातही प्रयोगांत सहभागी
चौकट
‘आनंद सफर’मधून बालकांना नाट्यसंस्कार
‘सुदृढ बालपण म्हणजे सक्षम महाराष्ट्राची पायाभरणी’ या संकल्पनेतून मुख्यमंत्री देवेंद्र फडणवीस यांच्या मार्गदर्शनाखाली एक हजार दिवसांचा उपक्रम राबविण्याचा मानस आहे. या उपक्रमाचा भाग म्हणून ‘आनंद सफर’च्या माध्यमातून विद्यार्थ्यांना नाट्यकलेचा अनुभव देण्यात येणार आहे. मुलांमधील सर्जनशीलता, संवादकौशल्य आणि आत्मविश्वास वाढविण्याचा या उपक्रमाचा उद्देश असल्याचे अनास्कर यांनी सांगितले.
