‘लोकशाही मार्गाने होणारी आंदोलने दादागिरीच्या जोरावर मोडण्याचा प्रयत्न’; दिल्ली-मुंबईतील कारवाईवर सरकारला लक्ष्य
जालना : दिल्ली आणि मुंबईत आंदोलनांच्या पार्श्वभूमीवर आंदोलकांना ताब्यात घेण्याच्या कारवाईवर मराठा आरक्षण आंदोलनाचे नेते मनोज जरांगे पाटील यांनी सरकारवर जोरदार टीका केली आहे. “सरकार सध्या गुंडगिरीच्या भूमिकेत आहे. सरकारला मनमानी करायची असून लोकशाही मार्गाने होणारी आंदोलने दादागिरीच्या जोरावर मोडून काढायची आहेत,” असा आरोप जरांगे पाटील यांनी केला. ते जालन्यात पत्रकारांशी बोलत होते.
कॉकरोच जनता पार्टीचे (CJP) संस्थापक अभिजीत दीपके यांना दिल्ली पोलिसांनी ताब्यात घेतल्याच्या पार्श्वभूमीवर जरांगे पाटील यांनी ही प्रतिक्रिया दिली. दीपके यांच्यासह सौरव दास आणि आशुतोष रांका यांना दिल्ली विमानतळावर विमानातून उतरतानाच ताब्यात घेण्यात आले होते.
जरांगे पाटील म्हणाले की, लोकशाही व्यवस्थेत नागरिकांना आपल्या मागण्यांसाठी शांततेच्या मार्गाने आंदोलन करण्याचा अधिकार आहे. मात्र सरकारविरोधात आवाज उठवणाऱ्यांना रोखण्याची भूमिका घेतली जात असल्याचा त्यांनी आरोप केला. “सरकार म्हणेल त्याच पद्धतीने आंदोलन झाले पाहिजे, अशी भूमिका सध्या घेतली जात आहे,” असेही त्यांनी म्हटले.
विद्यार्थी, शेतकरी आणि सर्वसामान्यांच्या प्रश्नांकडे लक्ष देण्याऐवजी आंदोलकांवर कारवाई केली जात असल्याचा आरोपही जरांगे पाटील यांनी केला. अभिजीत दीपके प्रकरणाची संपूर्ण माहिती आपल्याकडे नसल्याचे सांगतानाच विद्यार्थी आणि इतर प्रश्न उपस्थित करणाऱ्यांचा आवाज दाबला जात असल्याचा आरोप त्यांनी केला.
दिल्लीत हजारो आंदोलक ताब्यात
मुख्य निवडणूक आयुक्त ज्ञानेश कुमार यांच्या राजीनाम्याची मागणी आणि मतदार याद्यांच्या विशेष सखोल पुनरीक्षणाच्या (SIR) प्रक्रियेविरोधात CJP ने जंतर-मंतर येथे आंदोलनाची हाक दिली होती. मात्र दिल्ली पोलिसांनी आंदोलनाला परवानगी नाकारत मोठ्या प्रमाणावर प्रतिबंधात्मक कारवाई केली. उपलब्ध ताज्या वृत्तांनुसार राजधानीत 3,000 हून अधिक आंदोलकांना ताब्यात घेण्यात आल्याचे दिल्ली पोलिसांच्या सूत्रांनी सांगितले आहे.
या पार्श्वभूमीवर दिल्लीमध्ये मोठा पोलीस आणि सुरक्षा बंदोबस्त तैनात करण्यात आला. मेट्रो प्रवेशांवर निर्बंध, काही भागात मोबाइल इंटरनेट सेवा स्थगित करणे आणि जंतर-मंतरकडे जाणाऱ्या मार्गांवर बॅरिकेडिंग अशा उपाययोजना करण्यात आल्या.
मुंबईतही मोठी कारवाई
दिल्लीतील आंदोलनाला पाठिंबा देण्यासाठी मुंबईच्या ऑगस्ट क्रांती मैदानावर आंदोलनाचे आवाहन करण्यात आले होते. मात्र मुंबई पोलिसांनी आंदोलनाला परवानगी नसल्याचे सांगत प्रतिबंधात्मक कारवाई केली. महात्मा गांधी यांचे पणतू तुषार गांधी यांना वांद्रे परिसरातून ताब्यात घेऊन डी. एन. नगर पोलिस ठाण्यात नेण्यात आले.
ऑगस्ट क्रांती मैदान परिसरातही मोठ्या संख्येने आंदोलकांना ताब्यात घेण्यात आले. न्यू इंडियन एक्स्प्रेसच्या वृत्तानुसार विविध ठिकाणच्या कारवाईत सुमारे 400 जणांना ताब्यात घेण्यात आले, ज्यात अभिनेते इमरान खान आणि विविध संघटनांचे कार्यकर्ते होते.
मनोज जरांगे पाटील यांनी या सर्व कारवाईवरून सरकारला लक्ष्य करत आंदोलकांचे म्हणणे ऐकून घेण्याऐवजी आंदोलन मोडून काढण्याचा प्रयत्न होत असल्याचा आरोप केला आहे.
