नवी दिल्ली :कॉकरोच जनता पार्टीच्या दिल्लीतील आंदोलनाचे नेतृत्व आता अजिंक्य शिंदे करणार आहेत. पक्षाचे संस्थापक अभिजीत दिपके यांनी दिल्ली पोलिसांच्या ताब्यात असताना व्हिडीओ शेअर करून ही घोषणा केली. केंद्रीय निवडणूक आयोगाचे मुख्य आयुक्त ज्ञानेश कुमार यांच्याविरोधात जंतरमंतर येथे आंदोलन करण्याच्या तयारीत असलेल्या सीजेपीच्या प्रमुख नेत्यांना पोलिसांनी ताब्यात घेतल्याने आंदोलनाच्या नेतृत्वाचा प्रश्न निर्माण झाला होता. त्यानंतर अभिजीत दिपके यांनी अजिंक्य शिंदे यांच्याकडे आंदोलनाची सूत्रे सोपवली. जंतर-मंतरवरील आंदोलन रोखण्यासाठी दिल्ली पोलिसांनी केलेल्या मोठ्या कारवाईनंतर कॉकरोच जनता पार्टीने पत्रकार परिषद घेत आपले आंदोलन सुरूच ठेवण्याची भूमिका स्पष्ट केली आहे. पक्षाच्या पदाधिकाऱ्यांनी निवडणूक आयोगाच्या भूमिकेवर प्रश्न उपस्थित करत मुख्य निवडणूक आयुक्त ज्ञानेश कुमार यांच्या राजीनाम्याची मागणी कायम असल्याचे सांगितले आहे.दिल्लीतील आंदोलनाच्या पार्श्वभूमीवर CJPचे प्रमुख नेते आणि हजारो समर्थकांना ताब्यात घेण्यात आले. जंतर-मंतरकडे जाणारे मार्ग बंद करण्यात आले, मेट्रो आणि वाहतुकीवर निर्बंध लावण्यात आले आणि काही भागांतील मोबाइल इंटरनेट सेवा स्थगित करण्यात आली होती.
CJPच्या पदाधिकाऱ्यांनी यापूर्वीही शांततेच्या आणि लोकशाही मार्गाने आंदोलन करण्याचा घटनात्मक अधिकार असल्याचे सांगत दिल्ली पोलिसांनी आंदोलनाला परवानगी नाकारण्यावर आक्षेप घेतला होता. “मुंबई किंवा बंगळुरूमध्ये आंदोलन करता येते, तर दिल्लीत का नाही?” असा सवालही पक्षाच्या नेत्यांनी उपस्थित केला होता.
पक्षाने मतदार यादीच्या विशेष सखोल पुनरीक्षणाच्या प्रक्रियेबाबत उपस्थित केलेले आक्षेप कायम ठेवले असून निवडणूक व्यवस्थेबाबतचा लढा पुढे चालू ठेवण्याची भूमिका घेतली आहे. निवडणूक आयोगाने मात्र मतदार यादीतील फेरबदलांबाबतचे राजकीय पक्षांचे आरोप फेटाळले आहेत.
