पुणे : थकबाकीमुळे वीजपुरवठा खंडित करण्याची कारवाई करणार्या महावितरणच्या दोन महिला विद्युत सहाय्यकांना अर्वाच्च व अश्लिल शिविगाळ केल्याचा प्रकार म्हाळसकर वाडी, तळेगाव दाभाडे येथे मंगळवारी (दि. 20) घडला. याप्रकरणी एका आरोपीविरुद्ध फौजदारी गुन्हा दाखल करण्यात आला आहे.
याबाबत माहिती अशी, की राजगुरुनगर विभाग अंतर्गत थकबाकीदार वीजग्राहकांचा वीजपुरवठा खंडित करण्याची कारवाई सुरु आहे. तळेगाव दाभाडेमधील म्हाळसकर वाडी येथे महावितरणच्या विद्युत सहाय्यक सीमा वानखेडे व माधुरी इंगळे थकबाकीदारांचा वीजपुरवठा खंडित करण्याची कारवाई करीत होत्या. यामध्ये रिद्धी सिद्धी मोबाईल दुकानाचाही थकीत वीजबिलांमुळे वीजपुरवठा खंडित करण्यात आला. त्याचा राग आल्याने आरोपी ओम यादव याने लाईट कनेक्शन कोणी कट करायला सांगितले असे विचारून आरडाओरड करीत अर्वाच्च व अश्लिल भाषेत शिविगाळ करून दमदाटी केली. याप्रकरणी तळेगाव पोलीस ठाण्यात तक्रार दाखल केल्यानंतर पोलीसांनी आरोपी ओम यादवविरुद्ध गुन्हा दाखल केला आहे.